Arreta Soziosanitarioa

1. Enplegu Publikoa Koordinatzeko Euskadiko Batzordeak hamabi kide ditu:

   1. Euskal Autonomia Erkidegoko Administrazioaren bost ordezkari.

   2. Lurralde historikoen foru-administrazio bakoitzeko ordezkari bana.

   3. Toki-erakundeen hiru ordezkari.

   4. Euskal Herriko Unibertsitatearen ordezkari bat.

2. Batzordekide bakoitzak ordezko bat izango du. Ordezko horiek ere kasuan kasuko organoek izendatuko dituzte.

3. Enplegu Publikoa Koordinatzeko Euskadiko Batzordearen buru izango da Eusko Jaurlaritzan langile-politikaren arloan eskumena duen sailaren egitura organiko eta funtzionalaren dekretuaren arabera gai horretaz arduratzen den organoa. Era berean, Euskal Autonomia Erkidegoko Administrazio Orokorraren ordezkarietako bat arituko da idazkari-lanetan. Batzordeburuak berariaz izendatuko du.

4. Batzorde horretako kide guztiek izan beharko dute zuzendaritza-organoen titular edo politika-arduradun giza baliabideen edo enplegu publikoaren alorrean.

5. Eusko Jaurlaritzaren ordezkari izango diren kideek, ezinbestean, giza baliabideen arloko goi-kargudun edo zuzendari publiko profesional behar dute izan, eta enplegu publikoaren arloko eskumena duen sailaren titularrak izendatuko ditu.

6. Era berean, osoko bilkuraren erabakiz lanerako ponentziak sortu ahal izango dira, eta haietan parte hartu ahal izango dute aztertuko diren gaietan aditu direnek.

1. Hona hemen Enplegu Publikoa Koordinatzeko Euskadiko Batzordearen buruaren eskuduntzak:

   1. Osoko Bilkuretarako deia egin, bilkura-buru izan eta saioak zuzentzea, funtzio horiek eskuordetzen dituen kasuetan izan ezik.

   2. Osoko Bilkuren gai-zerrenda finkatzea.

   3. Batzordearen ordezkari izatea ondorio guztietarako, eta organoaren zuzendari gisa jardutea.

   4. Batzordearen jarduerarako behar diren neurriak hartzea.

   5. Behar dituen dokumentu edo aurrekariak eskatzea kasuan kasuko administrazio publikoei Batzordeak hala erabakitakoan, egin beharreko azterlanak eta proposamenak egiteko nahikoa judizio-elementu izateko.

   6. Osoko bilkurak planteatutako irizpideen arabera, lanerako ponentzien osaera onestea, eta haietan aldi baterako parte hartuko duten adituak izendatzea.

   7. Osoko bilkurak proposatuta, dagokion arloko profesional edo adituei azterlan, txosten, irizpen edo proiektuak landu ditzaten agintzea.

   8. Erregelamendu hau eta beronen arau osagarriak betetzen direla zaintzea.

   9. Batzordearen jarduera bultzatzea, hark, esleituta dituen eskumenak baliatuz, aurreikusitako epeetan egin ditzan txostenak.

2. Batzordeburuaren ordezko izendatutako kideak batzordeburua ordeztuko du titularrak kargua uzten duenean, kanpoan denean, gaixorik dagoenean edo legezko beste arrazoiren bat dagoenean; kasu horietan, batzordeburuaren funtzio berak beteko ditu.

Batzordeko idazkariaren eskumenak dira:

1. Batzordeburuak onetsi ondoren, Batzordearen gai-zerrenda prestatzea, eta arauzko zitazioak egitea.

2. Osoko bilkuraren aktak idaztea.

3. Akten eta erabakien ziurtagiriak ematea.

4. Bertan izana ziurtatzea hala eskatzen dioten batzordekideei.

5. Batzordearen barneko eta kanpoko dokumentazio guztia izapidetzea.

6. Batzordearen dokumentazioa zaintzea.

7. Organoei beren eginkizunak betetzeko behar dituzten dokumentazioa, aurrekariak eta txostenak ematea.

8. Dagozkien administrazioei helaraztea Batzordeak hartutako erabaki, txosten, proposamen eta gainerako guztiak.

9. Batzordeari bidaltzen zaizkion edo Batzordeak bidaltzen dituen espedienteen eta dokumentuen sarrera- eta irteera-erregistroez arduratzea.

10. Behar duten informazioa eta laguntza teknikoa ematea batzordekideei.

11. Beteko ditu, era berean, organoaren Idazkaritzarekin zuzeneko lotura duten funtzio guztiak, aurreko puntuetan esleitu direnak.

1. Hona hemen Enplegu Publikoa Koordinatzeko Euskadiko Batzordeko kideen eskuduntzak:

   1. Osoko bilkuretan edo lanerako ponentzietan parte hartzea eta iritzia ematea.

   2. Botoa emateko eskubidea baliatzea edo, hala badagokio, gehiengoaren aurkako boto partikular arrazoitua ematea, dagokion aktan jasoko dena eta, era berean, hura jasotzen duten irizpenetan aintzat hartuko dena, halakorik izanez gero.

   3. Galde-eskea egin ahal izatea bilkura guztietan.

   4. Aztergai dituzten kontuetarako behar dituzten aurrekariak, informazioa edo dokumentazioa eskatzea.

   5. Proposamenak eta mozioak idatziz egin ahal izatea, gai-zerrendan aintzat har daitezen.

   6. Idazkaritzaren esku dauden dokumentazioa eta artxiboak libreki eskuratu ahal izatea.

   7. Esleitzen zaizkien txostenak landu eta idaztea. Txostengileek, haiei dagozkien bileretan, lehentasuna izango dute beren irizpenak edo txostenak defendatzeko.

2. Batzordekide izateak ez du ordainsaririk jasotzeko eskubiderik ematen. Kontseilukideek joan-etorrietako gastuak jasotzeko eskubidea izango dute soilik, unean-unean indarrean dagoen legeriak xedatzen duenaren arabera eta ordezkatzen duten erakundearen kontura.

3. Batzordekideak behartuta daude isilean eta zuhurtziaz jardutera, esku artean dituzten aztergaien izaerak hala eskatzen duenean eta, bereziki, Espainiako Konstituzioaren 18.1 artikuluan aitortutako eskubideei eragiten dietenean.

4. Batzordekideek, edo haiek eskuordetzen dituzten pertsonek, Batzordearen bileretara joateko betebeharra dute, erregelamenduaren araberako deia egin zaienean.

1. Enplegu Publikoa Koordinatzeko Batzordearen osoko bilkurak lanerako ponentziak eratzea erabaki ahal izango du, gai jakin batzuk aztertzeko edo proposamenak lantzeko.

2. Lanerako ponentzien osaera aldagarria izango da esleitzen zaien lan motaren arabera, eta batzordeburuak izendatutako kideek osatu ahal izango dituzte ponentziak, osoko bilkurak proposatutako irizpideen arabera.

3. Batzordeburuak aurreko puntuan adierazi den eran izendatutako adituek ere parte hartu ahal izango dute lanerako ponentzietan.

4. Lanerako ponentzia bakoitzean zuzendari edo koordinatzaile bat arituko da, eta hark aldian-aldian jakinaraziko dio Batzordeko Idazkaritzari ponentziako lanak nola doazen.

5. Euskal administrazio publikoek, batzordeburuak hala eskatuta, beren funtzionarioak izendatu ahal izango dituzte lan-ponentzietan parte hartzeko gai jakin batzuk aztertzeko edo haiei buruzko txostena lantzeko.

6. Ponentziek, edozein kidek eskatuta, helburuak betetzeko beharrezkotzat jotzen dituzten aurrekari eta txosten guztiak eskatu ahal izango dituzte idazkariaren bitartez.

1. Batzordearen osoko bilkurarako deia egitea batzordeburuari dagokio. Ohiko bilkuretarako, lau egun baliodun lehenago jakinarazi beharko da; eta ezohiko bilkuretarako, bi egun baliodun lehenago.

2. Deialdi-zitazio guztiei gai-zerrenda erantsi beharko zaie, eta argi eta garbi zehaztuko da bilera non, zein egunetan eta zein ordutan egingo den. Halaber, zitazioarekin batera, aurreko bileraren aktaren zirriborroa bidaliko da, bai eta dokumentazio egokia ere, aldez aurretik aztertu ahal dadin.

1. Gai-zerrendan erabakiak hartzea aurreikusten bada, osoko bilkura balio osoz eratzeko quoruma gehiengo osoa izango da; hau da, kideen erdia gehi bat beharko da.

2. Ezingo da gai-zerrendan agertzen ez den ezein gairi buruzko erabakirik hartu, salbu eta kide anitzeko organoko kide guztiak bertan badaude eta, gehiengo soilez, gaia presakotzat jo badute.

3. Gai-zerrendan datorren gairen bat kentzeko eskatu ahal izango da, aztergaiari aurrekariak, dokumentuak edo txostenak erantsi ahal izateko, baldin eta horiek gabe ezin bada erabakirik hartu, eta hala onartzen bada, gehiengo soilez.

4. Bilkura bakoitzeko akta bat egingo da, eta han jasoko dira bertaratutakoen izenak, bilkura non eta noiz egin den, eztabaida-gai nagusiak, bozketaren forma eta emaitza, eta erabakien edukia.

5. Aktak idazkariak idatzi eta sinatuko ditu, batzordeburuaren oniritziarekin, eta hurrengo bilkuran edo hurrengoetan onetsiko dira.

1. Lanerako ponentziak, behin eratu ondoren, ponentziaren zuzendariak edo koordinatzaileak Batzordeko idazkariaren bitartez deituta bilduko dira. Deialdirako zitazioari gehituko zaizkio bilkurako dokumentazioa, aurrekariak eta gai-zerrenda.

2. Lanerako ponentzien txostenak, proposamenak eta azterlanak osoko bilkuraren mende jarriko dira, eta organo horri esleitutako eskumenak egikaritzeko erabiliko dira; baina osoko bilkurak aukera izango du lan horien emaitza aldatzeko, edo gaia ponentziari itzultzeko, sakonago azter dezan.