Arreta Soziosanitarioa

Agindu honen xedea da: babes publikoko etxebizitzen araubide juridikoari eta etxebizitzaren eta lurzoruaren inguruko finantza-neurriei buruzko martxoaren 4ko 39/2008 Dekretuaren 41.b) artikulua garatzea, etxebizitzak erosteko finantza-neurriei dagokienez.

1. Etxebizitzaren erosketaren arloan, jardun babesgarritzat hartuko dira honako hauek:

   1. Babes publikoko etxebizitza erostea.

   2. Azalera-eskubidean eraikitako babes publikoko etxebizitzen titularrek lurzoruaren jabetza erostea.

   3. Erabilitako etxebizitza librea erostea.

2. Etxebizitzaren erosketa-arloko jardun babesgarriei aplika dakizkiekeen finantza-neurriak mailegu kualifikatuak eta itzuli beharrik gabeko diru-laguntzak izango dira, betiere Agindu honetan aurreikusitako kasuetan eta aurreikusitako eskakizunak betez.

1. Bai lehen eskualdatzean, baita bigarren eta hurrengoetan ere, pertsona fisikoek babes publikoko etxebizitza erostea finantziazio kualifikatuaren xede izan daiteke; etxebizitzaren gaineko hipoteka-mailegu bat izango da, Euskal Autonomia Erkidegoko Administrazioarekin finantza-lankidetza sinatu duten kreditu-erakundeekin hitzartuta.

2. Finantziazio kualifikatua lortzeko eskakizunak:

   1. Mailegu-hartzaileak babes publikoko etxebizitzaren onuradun izateko bete beharreko eskakizun guztiak bete beharko ditu, indarreko araudiari jarraiki.

   2. Bigarren eta hurrengo eskualdaketetan, diru-sarrerak egiaztatzeko kontuan hartu beharreko zergaldia honako hau izango da: Pertsona Fisikoen Errentaren gaineko Zergaren aitorpena aurkezteko epea amaitutakoan, finantza-neurriak eskatutako egunaren aurreko zergaldia.

   3. Kostu bidez etxebizitza bakarra eskuratzeko emango da finantziazio kualifikatua, betiere etxebizitza hori ohiko bizileku iraunkor gisa erabiltzeko bada.

   4. Inork ezin izango du babes publikoko etxebizitza eskuratzeko finantza-neurrien onuradun izan aurreko segidako hamar urteetan finantza-neurri horien onuradun izan bada.

Babes publikoko etxebizitzaren eskuratzailearentzako mailegu kualifikatua zuzenean eman ahal izango da edo sustatzailearentzako mailegu kualifikatuaren hipoteka-kargaren ordainketan subrogatuta.

1. Mailegu kualifikatuaren gehieneko zenbatekoa honako hau izango da: babes publikoko etxebizitzaren eta etxebizitzari lotutako eranskinen salmenta-prezioa, BEZik gabe.

2. Babes publikoko etxebizitzarekin batera, etxebizitzarekin loturarik ez duten baina eraikin, eraikuntza-unitate edo sustapen berekoak diren eranskinak erosiz gero, gehieneko zenbatekoa BEZik gabeko salmenta-prezioaren % 30 izango da.

3. Ez dute finantziazio kualifikaturik jasoko etxebizitzarekin loturarik ez duten baina eraikin, eraikuntza-unitate edo sustapen berekoak diren eranskinak babes publikoko etxebizitzarekin batera erosten ez badira.

4. Eskatzailea beste etxebizitza baten titularra bada, Etxebizitza premiaren inguruko egoerari buruzko Etxebizitza eta Gizarte Gaietako sailburuaren 2008ko apirilaren 16ko Aginduan edo horren ordezko araudian ezarritakoari jarraiki, mailegu kualifikatuaren gehieneko zenbatekoa honako hau izango da: eskatutako finantza-neurrien xede den etxebizitzaren eta, hala badagokio, haren eranskinen prezioaren eta Euskal Autonomia Erkidegoko Administrazioak etxebizitza erosteko ordaindu duen prezioaren arteko aldea.

5. Etxebizitzaren jabari osoa eskuratzeko finantza-neurriak eskatzen direnean, betiere eskatzailea etxebizitza horren titularkidea bada, mailegu kualifikatuaren gehieneko zenbatekoa honako hau izango da: eskuratzen den etxebizitzaren eta, hala badagokio, haren eranskinen zatiaren salmenta-prezioa.

Hasierako urteko interes-tasa abenduaren 22ko 628/2009 Dekretuan (kreditu-erakundeen eta Euskadiko Autonomia Erkidegoaren arteko finantza-lankidetzakoa etxebizitzaren eta lurzoruaren arloan) jasotako irizpideen arabera finkatuko da, edo bestela, horren ordezko araudiaren arabera.

1. Amortizazio-epea 20, 25, 30 edo 35 urtekoa izango da. Aukeran, maileguaren kontratuak hiru urteko gabealdia izan dezake; hura bukatuta, tronkoaren amortizazioa 17, 22, 27 edo 32 urteko epearen barruan egin beharko da.

2. Amortizazio-kuoten ezaugarriak eta ordaintzeko modua martxoaren 4ko 39/2008 Dekretuaren (kreditu-erakundeen eta Euskadiko Autonomia Erkidegoaren arteko finantza-lankidetzakoa etxebizitzaren eta lurzoruaren arloan) 43. artikuluan edo horren ordezko araudian ezarritakoak izango dira.

Mailegua hipotekarekin bermatuko da eta, hala badagokio, kreditu-erakundeek mailegu-hartzaileari eska diezazkioketen berme gehigarriekin.

1. Babes publikoko etxebizitzaren eskuratzailea sustatzailearentzako mailegu kualifikatuaren hipoteka-kargaren ordainketan subrogatu ahal izateko, Etxebizitza, Herri Lan eta Garraio Sailaren baimena behar da, finantza-erakundeek eskatuta eta betiere finantza-lankidetzako hitzarmenean ezarritakoari jarraiki.

2. Subrogazio bidez eskuratzaileari mailegua ematean gabealdia eta eraikuntzaldiari dagozkion interesen ordainketa amaitu egingo dira, eraikuntza amaitutakoan eskuratzea salerosketako edo esleipeneko eskritura publikoaren bidez formalizatzen denean.

3. Subrogaturiko maileguen interes-tasa honako hau izango da: etxebizitza-eskuratzailearen mailegurako baimena ematen denean indarrean dagoena.

4. Eskrituraren bidez, eskuratzaileak etxebizitzaren jabetza eskuratuko du, hipotekaren ondoriozko erantzukizun eta guzti. Eskritura sinatzen den egunetik hasten da zenbatzen mailegu kualifikatuaren amortizazio-epea. Horretarako, kreditu-erakundeei eskrituraren lehenengo kopia bidaliko zaie, eta horren zerbitzu-sariak sustatzaileak ordaindu beharko ditu.

5. Hipoteka Legearen 118. artikuluan xedatutakoari jarraiki eskuratzaileak hipoteka-erantzukizun horren subrogazioa ez ezik erantzukizun horren bidez bermaturiko obligazio pertsonalaren subrogazioa ere bere gain hartzen badu, obligazio horren subrogazioa hartuko du, kreditu-erakundeak adostasuna ematen badu esanbidez edo isilbidez.

Babes publikoko etxebizitzaren eskuratzaileari mailegu kualifikatua zuzenean emateko, honako eskakizun espezifiko hauek bete behar dira:

1. Etxebizitza, Herri Lan eta Garraio Sailak etxebizitzaren eskuratzailearen eta sustatzaile/saltzailearen arteko salerosketa-kontratuari edo esleipen-dokumentuari ikus-onetsia ematea.

2. Etxebizitzaren sustatzaile/saltzaileak etxebizitza hori sustatzeko edo eskuratzeko mailegu kualifikatua jaso badu, aldez aurretik mailegu hori ezeztatzea.

3. Babes publikoko etxebizitzaren lehen eta bigarren edo hurrengo eskualdatzeetan, 6 hilabete ez igarotzea behin betiko kalifikazioa lortu denetik edo salerosketa-kontratua ikus-onetsi denetik salerosketa-kontratua behin betiko kalifikazioaren ondorengoa bada kreditu-erakundean mailegu kualifikatuaren eskaera formalizatu arte.

1. Azalera-eskubidean eraikitako babes publikoko etxebizitzen titularrek lurzoruaren jabetza erostea finantziazio kualifikatuaren xede izan daiteke; ahal dela, hipoteka-mailegu bat izango da, Euskal Autonomia Erkidegoko Administrazioarekin finantza-lankidetza sinatu duten kreditu-erakundeekin hitzartutakoa.

2. Lurzoruaren jabetza erosteko maileguak honelakoak izango dira:

   1. Gehieneko zenbatekoa hauxe izango da: lurzoruaren jabetzaren salmenta-prezioa gehi salerosketa gauzatu eta Jabetza Erregistroan erregistratzeko beharrezkoak diren zerga nahiz gastuen % 100. Agindu honen 23.3 artikuluan aurreikusitako ebazpenean erabakiko da zenbateko hori, ataletan behar bezala banakatuta.

   2. Mailegu-operazioa formalizatzeko unean, bermea pertsonala edota hipotekarioa izango da, jabetza-azaleran eraikitako babes ofizialeko etxebizitzaren gainean, baina bermea hipotekarioa bada, eskatzaileak lurzorua jabetzan eskuratutakoan, lurzoru hori automatikoki sartuko da berme horren barruan. Era berean, finantza-erakundeak bere arrisku-irizpideen arabera egoki iritzitako bermeak jaso ahal izango ditu klausuletan.

   3. Interes-tasa, komisio eta penalizazioak, amortizazio-kuotak ordaintzeko modua eta berme gehigarriak babes publikoko etxebizitza erosteko mailegu kualifikatuetarako ezarritakoak izango dira, abenduaren 22ko 628/2009 Dekretuan (kreditu-erakundeen eta Euskadiko Autonomia Erkidegoaren arteko finantza-lankidetzakoa etxebizitzaren eta lurzoruaren arloan) aurreikusitakoari jarraiki.

   4. Gehieneko amortizazio-epea 35 urte izango da, eta interes-tasari aplikatu beharreko diferentziala abenduaren 22ko 628/2009 Dekretuaren (kreditu-erakundeen eta Euskadiko Autonomia Erkidegoaren arteko finantza-lankidetzarakoa etxebizitzaren eta lurzoruaren arloan) 2.2 artikuluan aurreikusitakoa izango da.

1. Pertsona fisiko eskuratzailearen ohiko bizileku iraunkorra izango den erabilitako etxebizitza librea erostea Etxebizitza, Herri Lan eta Garraio Sailak emandako itzuli beharrik gabeko diru-laguntzen xede izan daiteke, betiere etxebizitza honako hauetako batean kokatuta badago:

   1. Agindu honen I. eranskinean zerrendatutako udalerri batean.

   2. Birgaitze Integratuko Area batean; Birgaitze Integratuko Areatzat hartuko dira Birgaitze Integratuko Areatzat izendatutako areak eta gindu honen II. eranskinean zerrendatutako udalerrietako Area Degradatuak. Agindu hau indarrean jarri ondoren Birgaitze Integratuko Area gehiago deklaratzen edo aintzat hartzen badira, Area berri horiek ere izan daitezke agindu honetan aurreikusitako diru-laguntzen xede.

2. Etxebizitza libre erabilitzat honako hau hartzen da: eskualdatzaile gisa sustatzaileaz bestelako pertsona bat duena edo, eskualdatzailea sustatzailea bera izanik ere, eraikuntza amaitu ondoren eta jabeek, gozamen-eskubide errealen titularrek edo erosteko aukerarik gabeko errentariek bi urteko epean etengabe erabili ondoren eskuratzen dena, betiere eskuratzailea adierazitako epean etxebizitza erabili duenaz bestelako pertsona bat bada.

3. Agindu honen ondorioetarako ez dira erabilitako etxebizitza libretzat hartuko eskualdatzailea administrazio publiko bat, administrazio instituzionala barne, sozietate publiko bat eta aurrekoren bat partaide nagusitzat duten merkataritza-sozietate bat denean.

4. Hirigintzari dagokionez antolamenduz kanpokotzat kalifikatuta (edozein modalitatetan dela ere) dauden etxebizitzak ere ez dira erabilitako etxebizitza libretzat hartuko, lurzoruari eta hiri-antolamenduari buruz indarrean dagoen araudian xedatutakoari jarraiki.

5. Kostu bidez etxebizitza bakarra eskuratzeko diru-laguntza baino ez da emango.

6. Ez da diru-laguntzarik emango etxebizitzari atxikita ez dauden eranskinak erosteko.

   13 artikulua. Erabilitako etxebizitza libreen tasazio-balioak eta gehieneko salmenta-prezioak.

1. Ez erabilitako etxebizitza libreen tasazio-balioak, ezta salmenta-balioak ere, ezin izango dituzte gainditu honako zenbateko hauek:

   I. eranskinean aipatutako udalerrien kasuan: 2.184 euro/m² erabilgarri, eta gehienez 200.000 euro.

   II. eranskinean aipatutako Areen kasuan: 2.525 euro/m² erabilgarri, eta gehienez 230.000 euro.

   2. Etxebizitzari lotutako eranskinei dagokienez, salmenta-prezioa zein tasazio-balioa ezin izango dira ezein kasutan eta edozein udalerritan daudela ere zenbateko honetatik gorakoak izan: 589 euro/m² erabilgarri.

2. Tasazio-balioa honela zehaztuko da: kreditu-erakundeetako tasazio-zerbitzuek edo horretarako sortutako erakunde espezializatuek egindako txosten bidez, betiere martxoaren 25eko 2/1981 Legea (Hipoteka Merkatua arautzen duena) garatzen duen martxoaren 17ko 685/1982 Errege Dekretuari jarraiki; txostena eskatzaileak aurkeztu behar du. Etxebizitzak lotutako eranskinak baldin baditu, etxebizitzari eta eranskinei ezarritako balioak bereizi egin behar dira txostenean.

3. Aurkeztutako dokumentuak bat ez badatoz, aurreko paragrafoan aipatu dugun tasazio-txostenean adierazten den azalera erabilgarri egiaztatua hartuko da kontuan etxebizitzen eta haiei lotutako eranskinen azalera finkatzeko.

4. Diru-laguntza jasotzeko baldintzak betetzen dituzten etxebizitzen azalera erabilgarria edozein izanik ere, erabilitako etxebizitza libreen edo haiei loturiko eranskinen azalera erabilgarritik gehienez 90 m²-ko azalera eskuratzeko soilik emango da diru-laguntza (azalera hori finkatu baita, oro har, babes ofizialeko etxebizitzetarako), bost kide edo gehiagoko bizikidetza-unitateek erosi beharreko etxebizitzetarako izan ezik. Kasu horretan, etxebizitzaren azalera erabilgarria 120 m² izan daiteke, diruz laguntzeari dagokionez. Nolanahi ere, etxebizitzen salmenta-prezioak ezin izango ditu gainditu artikulu honen 1. idatz-zatian ezarritako gehieneko mugak.

1. Ondare Urbanizatua eta Eraikia Birgaitzeko Jarduera Babestuei buruzko 317/2002 Dekretuaren IV. eranskinean adierazitako bizigarritasun-baldintzak betetzen ez dituzten erabilitako etxebizitza libreak eskuratzeko diru-laguntzak jaso ahal izateko, eskuratzaileak birgaitze-proiektua aurkeztu beharko du. Eskuratzaileak, horretarako, gehienez ere urtebeteko epea izango du, diru-laguntzak emateko ebazpenaren egunetik kontatzen hasita. Proiektu horren gauzatzea ondare urbanizatu eta eraikiaren birgaitze-arloan ezarritako finantza-neurrien bitartez babestu ahal izango da.

2. Birgaitze-proiektu hori adierazitako epean aurkezten ez bada, edo obren amaierako ziurtagiria kontratua ikus-onetsi eta bi urteko epean aurkezten ez bada, diru-laguntza emateko baldintzak ez-betetzat hartuko dira.

Erregimen orokorreko babes ofizialeko etxebizitzaren onuraduna izateko ezarritako eskakizun guztiak betetzea eskatuko da, eta eskaeraren data hartuko da erreferentziatzat. Era berean, honako berezitasun hauek hartuko dira kontuan:

1. Urteko diru-sarrera haztatuak gutxienez 3.000 eta gehienez 33.000 euro izango dira.

2. Babes ofizialeko etxebizitzak lortzeko indarreko legedian aurreikusitako salbuespen-egoerak kontuan izango dira.

3. Ezein pertsonak ezin izango du erabilitako etxebizitza librea eskuratzeko diru-laguntzen onuradun izan, aurreko segidako hamar urteetan onuradun izan bada.

1. Itzuli beharrik gabeko diru-laguntzaren zenbatekoa Agindu honen 13.1 artikuluan adierazitako tasazio-balioaren arabera kalkulatuko da, salbu eta salmenta-prezioa baxuagoa bada, kasu horretan prezio horren arabera kalkulatuko baita. Ehunekoak honako hauek izango dira:

   Oro har: % 5.

   Birgaitze Integratuko Areetan dauden etxebizitzen edo 35 urtetik beherakoez osatutako bizikidetza-unitateen kasuan: % 6.

   5 kide edo gehiagoko bizikidetza-unitateen kasuan: % 6 gehi 600 euro hirugarrenetik aurrerako seme-alaba bakoitzeko (hirugarrena barne hartuta).

   Nolanahi ere, diru-sarrera haztatuen araberako gehieneko muga hauen azpikoa izango da beti zenbatekoa:

   Diru-sarrera haztatuak Gehieneko muga, oro har Gehieneko muga, BIAetan dauden edo 35 urtetik beherakoen etxebizitzetarako Gehieneko muga, 5 kide edo gehiagoko bizikidetza-unitateetan

   000 eurora arte 7.935 euro 9.015 euro 10.098 euro

   001etik 33.000 eurora 3.606 euro 4.329 euro 4.684 euro

2. Eskatzaileek aurreko paragrafoan adierazitako hainbat ehunekoren onuradunak izateko beharrezkoak diren baldintzak betetzen badituzte, ehunekorik onuragarriena aplikatuko zaie soilik.

1. Jasotako finantza-neurrien bidez eskuratzen diren erabilitako etxebizitza libreak ezin izango dira inter vivos borondatez eskualdatu 10 urteko epean (salerosketa-eskritura publikoa formalizatzen den egunetik aurrera kontatzen hasita), aldez aurretik jasotako diru-laguntza (itzultzen den unera eguneratua) eta horri dagozkion legezko interesak itzultzen ez bazaizkio Administrazioari.

2. Horri dagokionez, ez da eskualdaketatzat hartuko honako kasu hauetan etxebizitza osoa titularkide bati esleitzea: ezkontza-banantzeen edo dibortzioen edo izatezko bikoteek harremana bertan behera uztearen eta lehen mailako odolkidetasuneko kideek bizikidetza-unitatea apurtzearen ondorioz.

3. Diru-laguntzaren onuradunak, berriz, diru-laguntza emateko administrazio-ebazpena aurkeztu beharko du dagokion Jabetza Erregistroan; bertan, administrazio-dokumentu hori ikusi ondoren, hipoteka-legeriaren arabera bidezkoa den jabariaren erabilera-mugapenaren erregistro-idazpena egingo da.

Zigor- eta administrazio-arloan diru-laguntza edo laguntza publikoak lortzeko aukera galtzearekin zehatuta dauden pertsona fisikoek ezin izango dute agindu honetan arauturiko diru-laguntzen deialdian parte hartu, ezta hartarako ezgaitzen dituen legezko debekuaren eraginpean daudenek ere, sexu-diskriminazioaren ondoriozko debekuak barne, 4/2005 Legearen (otsailaren 18koa, Emakumeen eta Gizonen arteko Berdintasunerakoa) azken xedapenen arteko seigarrenean xedatutakoari jarraiki.

1. Agindu honetan aurreikusitako diru-laguntzak, itzuli beharrekoak ez direnak, bateragarriak izango dira xede berarekin eman daitezkeen bestelako laguntzekin.

2. Agindu honek xede dituen diru-laguntzekin batera onuradunak bestelako laguntzak jasotzen baditu, laguntza guztien zenbatekoak ezingo du gainditu diruz lagundutako jardunen kostua. Eta gainditzen duela ikusten bada, diru-laguntza gutxiagotu egingo da jardunaren kostura iritsi arte. Hori egiteko, lehenbizi, Euskal Autonomia Erkidegoaren Aurrekontu Orokorren pentzutan ematen diren diru-laguntzen bermeei eta horiek itzultzeari buruzko erregimen orokorra arautzen duen eta horien kudeaketan parte hartzen duten erakunde laguntzaileek bete beharreko baldintzak, erregimena eta eginbeharrak ezartzen dituen abenduaren 17ko 698/1991 Dekretuan aurreikusitako prozedura izapidetu beharko da.

Agindu honen bidez araututako diru-laguntzak jasotzen dituzten onuradunek honako eginbehar hauek bete beharko dituzte betiere:

1. Diru-laguntza emateko ezarritako eskakizunak eta baldintzak betetzen dituztela justifikatzea.

2. Diru-laguntza eman den xederako erabiltzea.

3. Laguntza eman duen erakundeari helburu bererako lortutako diru-laguntza, laguntza, diru-sarrera edo baliabideen berri ematea.

4. Kontrol Ekonomikoko Bulegoari eta Herri Kontuen Euskal Auzitegiari, erakunde horiek beren eginkizunak betez eskatzen dieten informazioa ematea, Agindu honen kargura jasotako diru-laguntzei dagokienez.

5. Aurkeztutako egitasmoan esleipena egiterakoan kontutan izandako gorabehera objektibo edo subjektiboen artean aldaketarik emanez gero, horren berri laguntza ematen duen entitateari ematea.

Laguntza eman zuen ebazpena aldatu ere egin daiteke, baldin eta laguntzak ematerakoan zeuden baldintzetakoren bat aldatzen bada betiere laguntza xedea betetzat joz gero, edo laguntza horiekin batera, beste edozein erakunde publiko nahiz pribatuk emandako laguntzak ere jaso badira. Baina, betiere, beharrezkoa izango da arau honetan laguntzaren onuradun izateko ezarritako gutxieneko baldintzak gordetzea.

1. Diru-laguntzaren onuradunak Agindu honetan bilduriko edozein baldintza eta eskakizun betetzen ez badu, edo azaroaren 11ko 1/1997 Legegintzako Dekretuaren 53.1 artikuluan aurreikusitako kasuren batean baldin badago, emandako laguntzarako eskubidea galdu duela deklaratuko da (betiere aldez aurretik dagozkion administrazio-izapideak beteta), eta, hala badagokio, jasotako kopurua itzuli beharko du, diru-kopurua jaso zuenetik sortu diren legezko interesak gehituta.

2. Nolanahi ere, horri dagokionez, honako kasu hauek ez-betetzat hartuko dira: salmentaren eskritura publikoan adierazitako funtsezko daturen bat eskaeran edo salerosketa-kontratu pribatuan emandakoekin bat ez etortzea, eta 23.3 artikuluan bildutako nahitaezko klausulak ez aipatzea.

1. Finantza-neurriak emateko prozedura Etxebizitzako Lurralde Ordezkaritzan eskaera eginez hasiko da. Eskaera horrekin batera, diru-laguntzen onuradun izateko bete beharreko baldintzak eta eskakizunak betetzen direla egiaztatzen duen dokumentazioa aurkeztuko da. Eskaera hori salerosketako eskritura publikoa formalizatu aurretik aurkeztu beharko da.

2. Aipaturiko eskaera lurralde historiko bakoitzaren etxebizitzako lurralde ordezkaritzetan hartarako duten eta interesdunei bertan emango dieten ereduaren arabera egin ahal izango da. Era berean, eredu hori Etxebizitza, Herri Lan eta Garraio Sailaren web-orrian dago eskuragarri, etxebide.info atalean edo haren ordez ezartzen den atalean.

3. Eskaerarekin batera, salerosketa-kontratu pribatuak edo esleipen-dokumentuak aurkeztu beharko dira, eta, bertan, etxebizitzaren eskuratzaileak eta eskuratzailearen bizikidetza-unitateko kide guztiek ohiko bizileku iraunkor gisa erabiltzeko eta ematen zaienetik hiru hilabeteko epean bertan bizitzen hasteko konpromisoa hartzen dutela jasoaraziko da esanbidez eta nahitaezko klausula gisa. Gainera, bertan bizi direla egiaztatu beharko dute dagokion udal-ziurtagiriaren bidez. Egiaztagiri hori, berriz, adierazitako hiru hilabeteko epean aurkeztu beharko da dagokion Lurralde Ordezkaritzan. Era berean, Agindu honen 17.1 artikuluan aipatzen den jabaria erabiltzeko muga ere nahitaezko klausula gisa agerraraziko da esanbidez.

1. Etxebizitzako Lurralde Ordezkaritzak aurkeztutako eskaeran akatsen bat dagoela edo gaizki adierazita dagoela, edo aurkeztu beharreko dokumenturen bat falta dela ikusten badu, eskatzaileari jakinarazi eta 10 eguneko epea emango dio arazoa konpontzeko edo falta dena aurkezteko. Halaber, hori egin ezean eskaerari uko egin diola ulertuko dela adieraziko dio, Ebazpena Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 42. artikuluan ezarritako moduan idatzi beharrekoa eman ondoren.

2. Nolanahi ere, egindako eskaera ebazteko organo eskudunaren iritziz, beharrezkoa den beste edozein dokumentu eskatu ahal izango da.

3. Nolanahi ere, finantza-neurriak Etxebizitza eta Gizarte Gaietako Sailaren dagokion Lurralde Historikoko Lurralde ordezkariak emandako administrazio-ebazpenaren bidez emango dira. Ebazpen hori gehienez ere sei hilabeteko epean emango da, eskaera osorik aurkezten denetik kontatzen hasita.

4. Erabilitako etxebizitza librea erosteko kasuetan, 17.1 artikuluan aipatzen den jabaria erabiltzeko muga bildu behar da ebazpenean.

5. Ebazpen horren aurka, gora jotzeko errekurtsoa aurkez dakioke Etxebizitzako sailburuari, ebazpena jakinarazten denetik kontatzen hasita hilabeteko epean.

6. Ebazpena emateko epea iragan eta interesdunari ebazpenik jakinarazi ez bazaio, eskaera onartutzat emango da.

7. Ez dira onartuko etxebizitza berbera eskuratzeko interesatuek aurkeztutako finantza-neurrien bigarren eskaerak edo hurrengoak, honako kasu hauetan izan ezik: azalera-eskubidean eraikitako babes publikoko etxebizitzen titularrek lurzoruaren jabetza erostean.

1. Babes publikoko etxebizitza edo erabilitako etxebizitza librea erostean, administrazio bidez onarturiko mailegua lortu edo itzuli beharrik gabeko diru-laguntza jasotzeko, aldez aurretik salerosketako eskritura publikoa egin beharko da. Era berean, mailegu eta diru-laguntza horiek Euskal Autonomia Erkidegoaren Administrazioarekin finantza-lankidetzako hitzarmena sinatu duten kreditu-erakundeen bitartez bideratuko dira. Horretarako, honela jardungo da:

   1. Babes publikoko etxebizitzen lehen eta bigarren edo hurrengo eskualdatzeetan, finantza-neurrien onuradunak laguntzak emateko ebazpena aurkeztu beharko du dagokion kreditu-erakundean.

      Era berean, onuradunak dagokion eskritura publikoa aurkeztu beharko du Etxebizitzako Lurralde Ordezkaritzan, hiru hilabeteko epean, behin betiko kalifikazioa eman izana jakinarazten denetik edo salerosketa-kontratua ikus-onesten denetik (behin betiko kalifikazioaren ondoren ikus-onesten bada) kontatzen hasita.

   2. Erabilitako etxebizitza librearen kasuan, laguntzak emateko ebazpena jakinarazten denetik kontatzen hasita hiru hilabeteko epean, diru-laguntzaren onuradunak salerosketaren eskritura publikoa aurkeztu beharko du Etxebizitzako Lurralde Ordezkaritzan, baita diru-laguntza emateko ebazpena Jabetza Erregistroan aurkeztu izanaren frogagiria ere, 17.1 artikuluan aipatzen den jabaria erabiltzeko muga erregistratu ahal izateko.

      Administrazioak aipaturiko dokumentu horiek jaso ondoren, itzuli beharrik gabeko diru-laguntza ordaintzeko baimena emango da. Horretarako, diru-laguntzak eskatu dituenak EAEko Administrazioarekin finantza-lankidetzarako hitzarmena sinatu duten kreditu-erakundeetako batera joan beharko du, aipaturiko diru-laguntza kobratzeko izapideak egin diezazkion erakunde horrek.

2. Azalera-eskubidean eraikitako etxebizitzen titularrek lurzoruaren jabetza erostean, eskuratzaileak kreditu-erakundera joan beharko du finantza-neurriak emateko ebazpena (Etxebizitzako dagokion Lurralde Ordezkaritzak emandakoa) hartuta; ebazpen horretan, honako datu hauek agertuko dira: Administrazioari ordaintzeko beharrezkoak diren banku-datuak, eskriturak egiteko eta erregistroko gastuak zenbatekoak diren, eta kreditua lortzean adierazi beharreko administrazio-erreferentzia.

   Kreditu-erakundeak Administrazioak adierazitako kontuetan ordainduko du maileguaren zenbatekoa, mailegua formalizatzen den unean, operazioa identifikatzeko emandako administrazio-erreferentzia adieraziz.

   Etxebizitzako lurralde ordezkaritzak, eskuratzailearen aldetik ordainketa jasotakoan, lurzoruaren jabetza esleitzeko ebazpena emango du, hilabeteko epean, eta eskuratzaileari eta kreditu-erakundeari jakinaraziko die zein prozesu bete behar duten eskritura publiko bihurtzeko; gehienez ere hiru hilabeteko epea dago eskritura publikoa egiteko.