Lurralde Plangintza eta Hiri Agenda

Administrazio-prozeduretan bitarteko elektroniko, informatiko eta telematikoen erabilera arautzen duen abenduaren 18ko 232/2007 Dekretuaren aplikazio-eremuko erakunde publikoekin bitarteko elektroniko bidez harremanetan jartzeko ziurtagiri elektroniko aitortuen eta ziurtapen-zerbitzuen emaileen baldintza eta onarpen-betekizunak arautzen ditu agindu honek.

1. Abenduaren 19ko 59/2003 Legearen 11. artikuluaren 1. paragrafoaren arabera, sinadura elektronikoko ziurtagiri elektroniko aitortuak eskatzaileen nortasuna eta gainerako inguruabarrak egiaztatzeari eta ziurtapen-zerbitzuen fidagarritasunari eta bermeei dagokienez, Legean ezarritako baldintzak betetzen dituen ziurtapen-zerbitzuen emaile batek emandako ziurtagiriak dira.

2. Sinadura elektronikoari buruzko abenduaren 19ko 59/2003 Legeak ezarritako baldintzen arabera, eta ziurtagiri aitortuak emateari buruzko estandarrei eta gomendioei jarraiki, agindu honen I. eranskinean ezarritakoa bete beharko da. Eranskin hori etengabe eguneratuta egongo da www.euskadi.net web orrian.

3. Emandako ziurtagiri elektronikoaren indarraldia egiaztatzeari dagokionez, ziurtapen-zerbitzuen emaileak doan utziko du ziurtagirien indarraldia egiaztatzen, Online Certificate Status Protocol (OCSP) protokoloa edo antzeko funtzionaltasuna duen beste bitarteko bat erabiliz.

1. Estatu espainolean zein Europar Batasuneko beste edozein estatutan kokatutako ziurtapen-zerbitzuen emaileek euren sinadura elektronikoko sistemak onartzea eskatu ahal izango dute, baldin eta ondokoek ezarritako baldintzak betetzen badituzte: sinadura elektronikoari buruzko abenduaren 19ko 59/2003 Legea edo, egoitza Europar Batasuneko beste estatu batean duten ziurtagiri-emaileen kasuan, sinadura elektronikorako erkidego-eremua ezartzen duen abenduaren 13ko Europako Parlamentuaren eta Europako Kontseiluaren 1999/93/CE Zuzentaraua.

2. Ziurtapen-zerbitzuen emaileek ziurtagirien eskatzaileen nortasuna eta bestelako inguruabarrak egiaztatu beharko dituzte, betiere ondoko xedapenetan ezarritako moduan: sinadura elektronikoari buruzko abenduaren 19ko 59/2003 Legearen 13. artikuluan, edo egoitza Europar Batasuneko beste estatu batean duten ziurtagiri-emaileen kasuan, abenduaren 13ko Europako Parlamentuaren eta Europako Kontseiluaren 1999/93/CE Zuzentarauan.

3. Ziurtapen-zerbitzuen emaileek erantzukizuna izango dute Euskal Autonomia Erkidegoko Administrazioaren aurrean, sinadura elektronikoaren gaineko legeriak ezarritako moduan.

4. Sinaduraren gaineko legeriak eta agindu honek ezarritako eginkizunak betetzeko, eta beren jarduera burutzeko ziurtapen-zerbitzuen emaileek eta administrazio-organoek behar dituzten datu pertsonalen tratamendua, datu pertsonalak babesteko araudian xedatutakoarekin bat etorriko da.

1. Ziurtapen-zerbitzuen erakunde emaileek euren sinadura elektronikoko sistemak onartzeko, idatzizko eskaria egin beharko dute Euskal Autonomia Erkidegoko Administrazioarekiko harremanetan erabiltzeko. Administrazio Elektronikorako eta Herritarrei Arreta emateko Zuzendaritzari zuzenduko zaio eskaria. Eskari-eredua agindu honen II. eranskinean dator.

2. Sinadura elektronikoaren gaineko legerian ezarritako baldintzak betetzen dituztela egiaztatzeko beharrezkoa den dokumentazioa erantsiko zaio eskariari. Besteak beste, ondokoa aurkeztu beharko dute:

   1. Ziurtagiri-emaileen datuak: izena edo erakundearen izena, helbidea edo egoitza iraunkorra, dagokion erregistro publikoko inskripzioaren datuak, IFK, interneteko domeinuaren izena eta harremanetan jartzeko datuak.

   2. Onartzeko eskatzen diren ziurtagirien moten edo politiken datuak.

   3. Ziurtagiri-emailearen ordezkariaren erantzukizunpeko adierazpena, Agindu honetan eskatzen diren baldintzak betetzeari buruzkoa, hori egiaztatzen duen dokumentazioarekin batera.

      I. eranskinean ezarritakoa betetzen dela egiaztatzea. Gaitasuna duten hirugarren independenteen ziurtagiriak edo kontu-ikuskapenak onartuko dira.

   4. Hirugarren independente batek egindako beste kontu-ikuskapenak.

   5. Indarrean dauden ziurtagiri-jardute edota ziurtagiri-politiken adierazpena.

   6. Ondokoa adierazten duten ziurtapen-zerbitzuen emaileen ziurtagiriak: erakunde emailearen izena, ziurtagiriaren titulua eta norainokoa, zein egunetan eman den, ziurtagiriaren baliotasun-epea, baliogabetze- edo etete-data.

   7. Gailuen ziurtagiriak.

   8. Harremanetarako pertsonak, haien posta-helbideak eta helbide elektronikoak.

3. Aurkeztutako dokumentazioa ez badago ondo edo daturen bat falta bada, interesatuei eskatuko zaie hamar eguneko epean akatsak zuzentzeko edo, beharrezkoa bada, dokumentazioa osatzeko. Eskakizunari erantzunik ez emanez gero, eskaeran atzera egin dela ulertuko da, horretarako ebazpena eman ondoren.

Administrazio Elektronikorako eta Herritarrei Arreta emateko Zuzendaritzak eskumena du ziurtagiriak onartzeko espedientea bideratzeko. Beste organo, erakunde edo entitateei eskatu ahal izango dizkie onarpen-eskaria ebazteko behar dituen txostenak.

Ziurtapen-zerbitzuen emaile eskatzaileek alegazioak egin ditzakete eta agiriak edo bestelako datuak aurkeztu prozeduraren edozein urratsetan, entzunaldiaren izapidea egin aurretik.

Instrukzioa burutu ondoren, Eusko Jaurlaritzako Administrazio Elektronikorako eta Herritarrei Arreta emateko Zuzendaritzak erakunde interesatuari helaraziko dio espedientea, hamabost eguneko epean egoki iritzitako alegazioak eta agiriak aurkez ditzan.

Erakunde interesatuaren alegazioak jaso ondoren, edo alegaziorik egin ez balitz aipatu hamabost eguneko epea igaro ondoren, ziurtagiriak onartzeari buruzko ebazpena emango da.

Administrazio Elektronikorako eta Herritarrei Arreta emateko Zuzendaritzak ziurtagiriak onartzeari buruzko ebazpen arrazoitua emango du. Onarpena, betiere, Euskal Autonomia Erkidegoko Administrazioaren eta ziurtapen-zerbitzuen emaileen ziurtagiri indargabetuen argitalpen-zerbitzuaren artean beharrezko lotura telematikoak ezartzeari baldintzatuta egongo da.

Onarpen-eskariari Administrazio Elektronikorako eta Herritarrei Arreta emateko Zuzendaritzako erregistroan sarrera ematen zaion egunetik aurrera sei hilabeteko epean ebazpena eman eta jakinaraziko da.

Euskal Autonomia Erkidegoko Administrazioak edozein unetan egiaztatu ahal izango du ziurtagiriak ematea edo sinadura elektronikoko sistemen beste edozein alderdi adierazitakoaren arabera gauzatu dela, horretarako kontu-ikuskapenak eginez.

Onartutako ziurtagirien ezaugarriei dagokienez eta, oro har zerbitzua emateko baldintzei dagokienez, egiten diren aldaketak Euskal Autonomia Erkidegoko Administrazioari jakinaraztera behartuta daude ziurtagiri-zerbitzuen emaileak. Aldaketa horiek egiten hasteko aurreikusita dagoen eguna baino gutxienez hilabete lehenago egingo da jakinarazpena.

Ziurtapen-zerbitzuen emaileek, adostutako onarpen-baldintzei dagokienez egon diren aldaketa tekniko zein juridikoen berri ez dutela eman edo onarpenean eskatutako baldintza teknikoak zein juridikoak betetzeari utzi diotela antzematen badu, onartutako ziurtagirien baliotasuna etetea erabaki ahal izango du Euskal Autonomia Erkidegoko Administrazioak. Etendura hori ziurtagiri-zerbitzuen emaileei jakinarazi beharko zaie eta www.euskadi.net web orrian argitaratu beharko da.

Euskal Autonomia Erkidegoko Administrazioak ziurtagirien baliotasuna behin-behinekoz eten dezake eta sei hilabeteko epea eman egoera zuzentzeko, edo behin betikoz, aipatu epea igaro ondoren edo zuzendu ezin den egoera emango balitz.

Euskal Autonomia Erkidegoko Administrazioak onartutako ziurtagirien zerrenda eguneratua egongo da www.euskadi.net web orrian.