Arreta Soziosanitarioa

1. Dekretu honen helburua nekazaritza-ekoizpen ekologikoa sustatzeko diru-laguntzen araubidea ezartzea da.

2. Dekretu hau dela-eta ematen diren diru-kopuruak itzuli behar ez diren diru-laguntzak izango dira.

Euskadiko Nekazaritza eta Elikadura Ekologikoaren Kontseiluak kudeatzen duen Operadoreen Erregistroan izena emanda dauden pertsona fisiko edo juridikoak dekretu honetan ezartzen diren laguntzen onuradunak izan daitezke.

Eskabidea egiteko unean, eskatzaileak baldintza hauek bete beharko ditu:

1. Euskadiko Nekazaritza eta Elikadura Ekologikoaren Kontseiluak kudeatutako Operadoreen Erregistroan izena emanda egotea.

2. Euskadiko Nekazaritza eta Elikadura Ekologikoaren Kontseiluari deialdiaren aurre-aurreko ekitaldiko kuotak ordaindu izana.

3. Foru-ogasunekiko eta Gizarte Segurantzaren aurreko zerga-betebeharretan egunean egotea.

4. Erakunde eskatzaileak ez izatea diru-laguntza edo laguntza publikoak jasotzea eragozten dion zehapen penalik zein administrazio-zehapenik, eta ez izatea horretarako legezko inolako debekurik, sexu-bereizkeriagatiko debekuak barne, Emakumeen eta Gizonen Berdintasunerako otsailaren 18ko 4/2005 Legearen azken xedapenetatik seigarrenean ezarritakoarekin bat etorriz.

5. Euskadiko Nekazaritza eta Elikadura Ekologikoaren Kontseiluaren zigorrik jasota ez izatea.

1. Dekretu honetan xedatutako diru-laguntzak kudeatzeko eta ordaintzeko, Euskadiko Nekazaritza eta Elikadura Ekologikoaren Kontseilua (aurrerantzean, Kontseilua) erakunde laguntzaile izendatzen da, azaroaren 11ko 1/1997 Legegintzako Dekretuan, Euskal Autonomia Erkidegoko Ogasun Nagusiaren Antolarauei buruzko Legearen Testu Bategina onartzen duenean, ezarritako baldintzetan, bai eta abenduaren 17ko 698/1991 Dekretuan ezarritakoetan ere; azken horrek Euskal Autonomia Erkidegoaren Aurrekontu Orokorren kontura egiten diren bermeen eta itzulketen jardunbide orokorra arautzen du, eta kudeaketan parte hartzen duten erakunde laguntzaileen baldintzak, araubidea eta betebeharrak ezartzen ditu.

2. Kontseiluak, erakunde laguntzailea den aldetik, betebehar hauek izango ditu:

   1. Jasotako eskaerak aztertzea, eta esleipen-prozedura amaitu ondoren, ebazpen-proposamena helaraztea Elikagaien Kalitateko zuzendariari.

   2. Jasotako funtsak onuradunei ematea, dekretu honetan aurreikusitakoari jarraituz.

   3. Diru-laguntza jasotzeko eta erabiltzeko baldintza edo eskakizun erabakigarriak betetzen diren eta eraginkorrak diren egiaztatzea, bai eta jarduera egin den eta haren helburua bete duen ere.

   4. Ingurumen, Lurralde Plangintza, Nekazaritza eta Arrantza Saileko Elikagaien Kalitateko Zuzendaritzan justifikatzea jasotako funtsen erabilera, eta onuradunak aurkeztutako justifikazioa bidaltzea.

   5. Elikagaien Kalitateko Zuzendaritzak burutu ditzakeen funts horien kudeaketaren egiaztatze-jarduketei men egitea, bai eta Kontrol Ekonomikoko Bulegoari eta Herri Kontuen Euskal Epaitegiari dagozkienei ere.

1. Laguntza-eskabideak Ingurumen, Lurralde Plangintza, Nekazaritza eta Arrantza Saileko Elikagaien Kalitateko zuzendariari zuzendu behar zaizkio, eta Ingurumen, Lurralde Plangintza, Nekazaritza eta Arrantza Saileko egoitzan, 01010 Vitoria-Gasteizko Donostia kalearen 1.ean, edo Herri Administrazioen eta Ohiko Administrazioaren Prozeduraren Araubide Juridikoari buruzko 38.4 artikuluan aipatzen den edozein tokitan eta Euskal Autonomia Erkidegoko Administrazio Orokorreko eta bere Erakunde Autonomoekin dituzten erregistroak sortzeko, antolatzeko eta eragiteko apirilaren 29ko 72/2008 Dekretuaren arabera. Eskaera egiteko, dekretu honen I. eranskinean ezarritako inprimakia bete beharko da eta hemen aurki daiteke: www.nasdap.ejgv.euskadi.net.

2. Laguntzak eskatzen dituzten pertsonek agiri hauek aurkeztu beharko dituzte:

   1. Pertsona fisikoa bada, eskatzailearen NANaren fotokopia.

   2. Pertsona juridikoa bada, enpresaren IFKren, ahalorde-eskrituraren eta legezko ordezkariaren NANaren fotokopia, eta erakundearen eratze-eskrituraren eta estatutuen fotokopia, dagokion erregistroak zigilatuta. Agiri horiek dekretu honen esparruan eman badira eta eskatzaileak adierazten badu ez dela inolako aldaketarik egon agiri horietan, aurkeztutzat hartuko dira.

   3. Dagokion foru-ogasunarekin dituen zerga-betebeharrak eta Gizarte Segurantzari egin beharreko ordainketak egunean dauzkala erakusteko ziurtagiria.

   4. Erantzukizunpeko adierazpena, aurkeztutako agiri guztiak egiazkoak direla adierazteko, beste administrazio baten edo erakunde baten (publikoa zein pribatua) laguntza jaso edo ez jaso izanarena, eta 3. artikuluaren e) idatzi-zatian ezarritako eskakizunak betetzearena.

   5. Erantzukizunpeko adierazpena, edozein administrazio publikori edo erakunderi, publiko edo pribaturi, eskatu zaion eta lortu den ala ez diru-laguntzarik, laguntzarik, diru-sarrerarik edo beste baliabide ekonomikorik xede bererako.

3. Kuota ordaindu den edo ez ofizioz egiaztatuko du Kontseiluak.

4. Eskabideak aurkezteko epea dekretu honen 13. artikuluan adierazitako deialdia egiteko aginduan zehaztuko da, 2011. urteko ekitaldirako xedapen iragankorrean ezarritakoa kontuan hartuta.

5. Eskabideak baldintza guztiak betetzen ez baditu, Elikagaien Kalitateko zuzendaritzak interesdunari jakinaraziko dio hamar egun balioduneko epea duela akatsa zuzentzeko edo beharrezko agiriak eransteko. Halaber, adieraziko zaio horrela egin ezean atzera egin duela ulertuko dela, azaroaren 26ko 30/1992 Legearen, Herri Administrazioen Araubide Juridikoaren eta Administrazio Prozedura Erkidearen Legearen, 42. artikuluan ezarritakoarekin bat etorriz egindako ebazpena eman ondoren.

Deialdiaren aurre-aurreko urtean nekazariek Euskadiko Nekazaritza eta Elikadura Ekologikoaren Kontseiluan ordaindutako kuotak diruz laguntzeko moduko gastuak izango dira.

Gehienezko laguntza diruz laguntzeko moduko gastuen % 80ra irits daiteke. Dena dela, eman beharreko diru-laguntzaren gehieneko zenbatekoak ezingo du gainditu 2005eko irailaren 20ko Kontseiluaren 1698/2005 (EE) Erregelamenduaren Landa Garapenerako Europako Nekazaritza Funtsaren (FEADER) bidez landa-garapenari laguntzeari buruzkoaren eranskinean 3.000 euro finkatutako zenbatekoa, erregelamendu bereko 32. artikuluan adierazitako neurriari dagokion laguntza emateko, 2006ko abenduaren 15eko Batzordearen 1857/2006 (EE) Erregelamenduaren, nekazaritza-produktuak egiten dituzten enpresa txiki eta ertainei estatuko laguntzak emateko Tratatuko 87. eta 88. artikuluen aplikazioari buruzkoa eta 70/2001 (EE) Erregelamendua aldatzen duenaren, 14.2 f) artikuluan ezarritakoarekin bat etorriz.

1. Diru-laguntzak lehiarik gabeko prozeduraren bidez emango dira, baldintzak betetzen dituzten eskatzaileen artean. Urteroko deialdian xedatutako zenbateko ekonomikoa nahikoa bada kalkulatutako kopuruak emateko, guztiek jasoko dute aurrez erabakitako zenbatekoa.

2. Gehienezko zenbatekoa ez bada nahikoa eskatzaile guztien laguntzak ordaintzeko, eskatutako baldintzak betetzen dituzten eskatzaile guztien artean banatuko da, bakoitzarentzat hasiera batean kalkulatutako kopuruak kontuan hartuta, eta zenbateko osoa proportzio horri jarraituz banatuko da.

1. Dekretu honetan aurreikusitako laguntzak Euskal Autonomia Erkidegoko Aurrekontu Orokorren kontura finantzatuko dira.

2. Aurrekontu-ekitaldi baten barruan eman beharreko laguntzen guztizko bolumenak ezingo du gainditu urteroko deialdirako aginduan finantzaketarako bideratutako gehienezko zenbatekoa, edo hura eguneratzean lortzen dena, indarreko legeriak kreditu-loturari edo aurrekontu-aldaketari buruz aurreikusten duenarekin bat etorrita.

3. Zenbateko hori aldatu ahal izango da, eskatutako laguntzen guztizko zenbatekoa kontuan hartuta, Ingurumen, Lurralde Plangintza, Nekazaritza eta Arrantza Sailaren beste laguntza-programa batzuetan agortu ez diren aurrekontuetan sobera geratu izan denaren arabera, haien ebazpenak eman baino lehen. Nekazaritza eta Landa Garapeneko sailburuordearen ebazpen baten bidez jakinaraziko da gorabehera hori.

1. Deialdiaren ebazpena bakarra izango da eta Elikagaien Kalitateko zuzendariari dagokio hura jakinaraztea, aurrez Euskadiko Nekazaritza eta Elikadura Ekologikoaren Kontseiluak proposamena egin ondoren.

2. Ebazpena emateko eta jakinarazteko gehieneko epea sei hilabetekoa izango da, eskabideak aurkezteko epea amaitu ondoren zenbatzen hasita. Epe hori igaro ondoren ebazpenik izan ezean, interesdunek eskabideak ezetsi direla pentsatu ahal izango dute, Herri Administrazioen Araubide Juridikoaren eta Administrazio Prozedura Erkidearen Legearen 44. artikuluan ezarritakoarekin bat etorrita.

3. Laguntza emateko edo ukatzeko ebazpenaren kontra, pertsona interesdunak gora jotzeko errekurtsoa aurkeztu ahal izango du Nekazaritza eta Landa Garapeneko sailburuordearen aurrean, hilabeteko epean, ebazpena jaso eta hurrengo egunean zenbatzen hasita, edo hiru hilabeteko epean, administrazio-isiltasunak eragina duen egunaren hurrengo egunean zenbatzen hasita, Herri Administrazioen Araubide Juridikoaren eta Administrazio Prozedura Erkidearen Legearen 114. eta 115. artikuluetan xedatutakoari jarraituz.

4. Diru-laguntzei buruzko ebazpena behin betikoa denean, banan-banan jakinarazteaz gainera, Euskal Herriko Agintaritzaren Aldizkarian argitaratuko da, Nekazaritza eta Landa Garapeneko sailburuordearen ebazpen baten bidez.

5. Onuradunei diru-laguntza horiek emateko eta, bidezko denean, ordaintzeko ezinbestekoa izango da Euskal Autonomia Erkidegoko Administrazio Orokorrak eta haren erakunde autonomoek emanda dituzten izaera bereko laguntzen edo diru-laguntzen arloan hasi eta oraindik izapidetzen ari diren itzulketa edo zehapen-prozedura guztiei amaiera ematea.

Dekretu honetan xedatutako laguntzen onuradunek betebehar hauek bete beharko dituzte:

1. Emandako diru-laguntza onartzea. Horren haritik, diru-laguntzaren onuradunak diru-laguntza jasotzeari buruzko jakinarazpena jasotzen duenetik hamabost eguneko epean ez badio diru-laguntzari idatziz uko egiten, diru-laguntza hori isilbidez onartu dela ulertuko da.

2. Elikagaien Kalitateko Kontseiluari eta Zuzendaritzari haiek eskatutako informazio guztia ematea, jasotako diru-laguntzen zertarakoa eta zer helburu betetzeko eman diren kontrolatu ahal izan dezaten.

3. Diruz laguntzeko moduko ekintza bererako beste edozein administrazio edo erakunde publikok zein pribatuk emandako laguntzak edo diru-laguntzak Kontseiluari idatziz jakinaraztea, eskaera aurkeztu eta gero eta lehen ordainketa baino lehenago onartu edo jaso badira.

4. 1/1997 Legegintzako Dekretuaren, azaroaren 11koaren, Euskadiko Ogasun Nagusiaren Antolarauei buruzko Legearen Testu Bategina onartzen duenaren, 50. artikuluan ezarritako betebeharrak betetzea.

Diru-laguntza erakunde laguntzaileak ordainduko du, onuradunak dagokion foru-ogasunarekiko zerga-betebeharretan eta Gizarte Segurantzarekiko ordainketan egunean dagoela ziurtatu ondoren, eta, horretarako, bi hilabeteko epea izango du, diru-laguntza emateko ebazpena jasotzen duenetik.

1. Urtero, Ingurumen, Lurralde Plangintza, Nekazaritza eta Arrantzako sailburuaren agindu baten bidez, dekretu honetan xedatutako laguntzen deialdia egingo da.

2. Aginduan hau zehaztuko da:

   1. Eskabideak aurkezteko epea.

   2. Eskatutako laguntzen guztizkoari aurre egiteko bideratuko den gehienezko zenbatekoa.

Diru-laguntza emateko eta beste edozein erakunde publikok edo pribatuk emandako diru-laguntzak eta laguntzak jasotzeko baldintzen aldaketa idatziz jakinarazi eta justifikatu behar zaio Elikagaien Kalitateko Zuzendaritzari, eta diru-laguntzak onartzeko ebazpenaren aldaketa eragin dezake, betiere dekretu honetan ezarritako gutxieneko eskakizunak eta laguntzaren helburua babestuz. Horrenbestez, Elikagaien Kalitateko zuzendariak dagokion likidazio-ebazpena emango du, eman den diru-laguntzaren zenbatekoa oinarri berrira egokituta, eta abenduaren 17ko 698/1991 Dekretuan aurreikusitako itzulketa-prozedurari hasiera emanez, hala badagokio.

1. Laguntza eskatu duen pertsonak atzera egiteko aukera izango du. Eskatutako laguntzak emateko prozeduraren ebazpena jakinarazi baino lehen burutu behar da atzera-egitea, eta idatziz aurkeztu behar zaio Elikagaien Kalitateko zuzendariari, ebazpen baten bidez atzera-egitea erabat onartu eta prozedura amaitutzat eman dezan.

2. Laguntzaren onuradunak jasotako laguntzari uko egiteko aukera izango du, ebazpena jakinarazten denetik gastua egiten amaitu arte. Idatziz aurkeztu behar zaio Elikagaien Kalitateko zuzendariari, ebazpen baten bidez uko-egitea erabat onartu, eta prozedura amaitutzat eman dezan. Uko-egitea onartu ondoren, onuradunak ebazpen baten bidez onartutako eskubidea automatikoki galduko du, bai eta lortutako laguntza osorik edo partez jasotzeko eskubidea ere. Uko-egitea onartu ondoren, hala dagokionean, abenduaren 17ko 698/1991 Dekretuan aurreikusitako itzulketa-prozedura hasiko da.

1. Nolanahi ere, onuradunak dekretu honetan eta aplikatu beharreko gainerako arauetan ezarritako baldintza eta betebeharretako bat edo, hala badagokio, diru-laguntza emateko ebazpenean ezarritakoetako bat betetzen ez badu, laguntzaren helburua osorik galduz, edo Euskal Autonomia Erkidegoko Ogasun Nagusiaren Antolarauei buruzko Legearen 53. artikuluan ezarritako itzulketa-zioetako batean erortzen bada, Elikagaien Kalitateko zuzendariak, ez-betetzeagatiko espedientea izapidetu ondoren (interesduna entzunda), beste ebazpen bat emango du, bertan diru-laguntzarako eskubidea galdu dela aldarrikatuko du, eta, behar izanez gero, jasotako laguntzak eta legezko interesak Euskal Autonomia Erkidegoko Diruzaintza Nagusiari itzuli behar zaizkiola aginduko du, Euskal Autonomia Erkidegoaren Aurrekontu Orokorren kontura egiten diren bermeen eta itzulketen jardunbide orokorra arautzen duen abenduaren 17ko 698/1991 Dekretuan eta Euskal Autonomia Erkidegoko Ogasun Nagusiaren Antolarauei buruzko Legearen Testu Bateginaren 53. artikuluan ezarritakoaren arabera. Nolanahi ere, ez dira baztertuko gainerako bidezko ekintzak. Zenbateko horiek sarrera publikotzat joko dira legezko ondorio guztietarako.

2. Administrazio arloko arau-hauste izan daitezkeen gertakariek eragin badute itzulketa-prozedura, kasuan kasuko organo eskudunari jakinaraziko zaio hori, dagokion zehapen-prozedura has dadin.

Diruz laguntzeko moduko gastu baterako Ingurumen, Lurralde Plangintza, Nekazaritza eta Arrantza Sailak, beste administrazio publiko batzuek edo erakunde pribatuek emandako laguntzak bateragarriak dira, eta ez dute eraginik dekretu honen 7. artikuluan ezarritako gehienezko zenbatekoan.