Nola bozkatu
Mahaian bertan bozkatzea
Eusko Legebiltzarrerako hauteskundeetarako bozketa goizeko bederatzietan hasi eta arratsaldeko zortzietan amaituko da, etengabeko ordutegian.
Hautesleek errolda-zerrendaren arabera dagokien mahaian baino ezin izango dute zuzenean bozkatu.
Zuzenean bozkatzeko, hautesleak, hala nahi badu, mahaiko kabinan sartzeko aukera izango du; bertan nahi duen hautagai-zerrendaren txartela hartu eta bozketarako gutun-azalean sartuko du, eta ondoren mahaira hurbilduko da botoa ematera.
Hautesleak banan-banan joango dira mahaira. Izen-abizenak adieraziko dituzte, eta mahaiburuari titularraren argazkia duen agiria (NANa, pasaportea edo gidabaimena) eta bozkatzeko gutun-azala emango dizkiote. Mahaiko bokalek hauteslearen nortasuna eta hautesle-erroldan ageri dela egiaztatuta, mahaiburuak nortasunaren egiaztagiria itzuliko du, eta gutun-azala hautestontzian sartuko du.
Bozketarako gutun-azala hautestontzian sartutakoan, mahaiko bokalek eta nahi duten artekariek zerrenda zenbakitu banatan idatziko dituzte boto-emaileen izena eta abizenak, botoa emateko ordenan, mahaiko hautesle-erroldaren zerrendan zer zenbaki duten adierazita.
