Segurtasun Saila. Eusko Jaurlaritza

Nork bozka dezake posta bidez?

Gaixotasun edo ezintasunari dagokionez (ziurtagiri mediku ofizial bidez egiaztatu beharko dena) eskabidea notarioak edo kontsulak baimendutako pertsonak egin dezake hauteslearen izenean, hautesle bakoitzari banaka emango zaion dokumentuaren bidez. Bertan ezin izango dira hautesle gehiago sartu, eta pertsona berak ezin izango du hautesle bat baino gehiago ordezkatu. (Agiri horiek doakoak dira).

Zer egi behar dute gaixoek edo ezinduek botoa postaz emateko?

a) Baimendutako pertsonaren bitartez, notariotzara bertaratu notario-ahalorde bat eskuratzeko agiri hauek aurkeztu ondoren (HAUTESKUNDEEN ARAUBIDE OROKORRARI BURUZKO LEGEAREN 72.e artikulua):

• Ezinduaren NANa (fotokopiak ez du balio).
• Ezindua ordezkatzen duen pertsonaren NANa (fotokopiak ez du balio).
• Ziurtagiri mediku ofiziala; horrek egiaztatu behar du pertsona ezindua (izena eta bi abizen) ezin dela joan posta-bulegora botoa posta bidez emateko dokumentazioa eskatzera.
• Posta bidezko botoaren eskabide-inprimakia, ezinduaren eta ordezkatzen duenaren datu guztiekin behar bezala beteta, eskabidean ordezkariaren helbidea adieraziz (eta ez ezinduarena); berari bidal diezaioten botoa posta bidez emateko dokumentazioa. Inprimaki hori ordezkariak sinatu beharko du.

Notarioak aipatutako dokumentazioa duenean, pertsona ezinduari bisita egingo dio egiaztatu eta notario-ahalordea ordezkariaren alde egiteko. Hautesleak posta bidezko botoa eskatzeko izapideetan ordezka dezan baimenduriko pertsonaren aldeko banakako notario ahalordea doakoa da.

b) Posta bidezko botoa eskatzeko inprimakia aurkeztu posta-bulego batean.

Ordezkaria posta-bulegora joango da posta bidezko botoa eskatzeko inprimakiarekin, ziurtagiri medikuarekin eta notario-ahalordearekin, eta dokumentazio hori postako funtzionario bati emango dio. Horrek eskabidean ageri den ordezkariaren sinadura NANarekin bat datorren egiaztatuko du.

c) Posta bidezko botoa eskatzeko epea.

Posta bidezko botoa eska daiteke abuztuaren 28tik urriaren 11ra bitartean, biak barne.

d) Posta bidezko botoa ematea.

Dagokion Hautesle Erroldako Bulegoko Ordezkaritzak, posta ziurtatu bidez, botoa emateko beharrezkoa den dokumentazioa bidaliko du, urriaren 1etik 14ra bitartean, posta bidezko eskaeran adierazitako helbidera. Hain zuzen, dokumentu hauek bidaliko ditu:

• Hautesle-erroldako inskripzioaren ziurtagiria.
• Botoa eman beharko lukeen mahaiburuari zuzendutako gutun-azala.
• "Eusko Legebiltzarrerako Hauteskundeak -2012- Elecciones al Parlamento Vasco" idazpurua duen gutun-azala, Eusko Legebiltzarrerako boto-txartela sartzeko.
• Eusko Legebiltzarrerako aldarrikatutako hautagai-zerrenda bakoitzaren boto-txartela.
• Argibide-orria.

Agiri horiek jasotakoan, berehala egin behar dira Espainian bizi direnen posta bidezko botoari buruzko d) idatz-zatian adierazitako eragiketak.

e) Posta bidezko botoa bidaltzea.

Mahaiburuarentzako gutun-azala bidaltzeko azken eguna urriaren 18a da (epea luzatua, HBZren 2012-09-27ko Akordioa); halere, jasoko dutela bermatzeko, komeni zaizu ahalik eta lasterren bidaltzea. Gutun-azal horrek ez du frankeorik behar, baina posta ziurtatuz eta urgentez bidali behar duzu.