Joseba Zorrilla Larrialdiei Aurre Egiteko eta Meteorologiako zuzendaria buru duen Prebentzio, Su Itzaltze eta Salbamendu Zerbitzuetarako Erakunde arteko Batzordeak positibotzat jo du Valentziako Erkidegora DANA dela-eta joandako larrialdietako euskal zerbitzuen parte-hartzea. Gogoratu behar da joan den azaroaren 3an joan zirela Valentziara hiru aldundietako eta EAEko hiru hiriburuetako lehen suhiltzaileak eta larrialdietako teknikariak, Gurutze Gorriko eta DYAko profesionalek lagunduta, harik eta, txandaka aritu ondoren, 500 bat langilek parte hartu zuten arte.

Eusko Jaurlaritzak, foru-aldundiek eta Euskadiko udalek, EUDEL Euskadiko Udalen Elkartearen bitartez, hasiera-hasieratik erakutsi zuten prest zeudela aireko eta lurreko baliabideak bidaltzeko kaltetutako eremuetara, modu koordinatuan lan eginez, euskal herritarrek erakutsitako elkartasuna ahalik eta modu antolatu eta eraginkorrenean bidera zedin. Ertzaintzaren txakur-unitateko ordezkaritza bat ere Valentziara abiatu zen desagertutako pertsonak bilatzeko lanetan laguntzeko.

Bestalde, Batzordeak baso-suteak itzaltzeko helikopteroaren errentamendu-kontratua gauzatzeari ere ekin dio. Ekimen hori Eusko Jaurlaritzak eta hiru aldundiek sinatutako eta irailaren 1ean indarrean sartu zen baterako finantzaketa-hitzarmenaren sinadurari esker sortu zen.

Azkenik, Batzordeak Murgiako Lanbide Heziketako Zentro Integratuan emandako Larrialdietako eta Babes Zibileko Teknikari ikastaro berriaren (erdi-mailakoa) berri eman du.

Osaera

Batzordean honako hauek parte hartzen dute: foru-aldundiek, euskal hiriburuetako hiru udalek, Segurtasun Saileko Larrialdiei Aurre Egiteko eta Meteorologiako Zuzendaritzak, Polizia eta Larrialdietako Euskal Akademiak, Euskadiko Udalen Elkarteak, Eudelek eta Euskadiko Suhiltzaileen Zebitzuak Bultzatzeko – AES suhiltzaileen elkarteak.

Informazio gehiago Irekia atarian (Leiho berrian irekiko da)