Indartu 2022 programa : Inbertsio produktiboa egiten duten enpresentzako laguntza-programa, lehiakortasuna eta garapen ekonomikoa hobetzea dakarrena, ezkerralde zabaldua eta langabezia-tasa euskal autonomia erkidegoko urteko batez bestekoaren % 10etik gorakoa duten beste udalerri batzuk bultzatzeko.

1.- Enpresa eskatzaileek, eskabidearekin batera, enpresaren informazio orokorra eskaini beharko dute eta, bertan, honako agiri hauek gehitu beharko dituzte:

• a) Egin beharreko inbertsioei buruzko memoria zehatza. Memoria horretan, honako hauek jasoko dira: industria-plana, enpresaren plan ekonomiko-finantzarioa, horrekin lotutako lan-plana eta horiek egiteko epeak.
• b) Eratze-eskritura (enpresa eratu berria denean bakarrik), identifikazio fiskaleko txartela, eta pertsona eskatzailearen ahalordea, agiri horiek Ekonomiaren Garapen, Jasangarritasun eta Ingurumen Sailaren esku badaude eta enpresan aldaketarik izan ez bada salbu.
• c) Urteko kontuak eta dokumentazio osagarriaren kopiak, Merkataritza Erregistroan azken bi ekitaldietan aurkeztuak; halakorik aurkeztu ezean, Sozietateen gaineko Zergaren azken bi aitorpenak edo, hala badagokio, Pertsona Fisikoen Errentaren gaineko Zergaren azken bi aitorpenak. Enpresa beste enpresa batzuekin elkartuta edo haiekin lotuta badago, dokumentazio horrek horrela eratutako enpresa-taldeari buruzkoa ere izan beharko du.
• d) Enpresaren edo enpresa-taldearen plantillaren bilakaeraren memoria xehatua, urteka, azken hiru ekitaldi ekonomikoei dagokiena, sexuaren arabera bereizita, eta Gizarte Segurantzaren Diruzaintza Orokorrak emandako dokumentuak: "Txostena: alta-egoeran dauden langileen batez besteko plantilla", urteko deialdia argitaratu aurreko 12 eta 36 hilabeteei dagokiena. Enpresa beste enpresa batzuekin elkartuta edo lotuta badago, dokumentazio hori horrela eratutako enpresa-taldeari buruzkoa ere izan beharko da.
• e) Erakundearen erantzunkizunpeko adierazpena. Adierazpen hori indarrean den administrazio nahiz zigor-araudiaren menpe geratuko da, datu faltsuak eman ote diren egiaztatzeko honako alderdi hauei dagokienez:
• Enpresa eskatzaileak laguntza-deialdi honen artikuluetan eskatzen diren baldintza guztiak betetzen dituela.
• Inbertsio berberetarako beste erakunde publiko edo pribatu batzuetatik eskatu eta/edo jaso dituen laguntzak aitortu dituela.
• Eskabidea egiteko unean, enpresa eskatzaileak ez duela diru-laguntza edo laguntza publikoak eskuratzea eragozten dion zehapen administratiborik edo penalik, eta ez duela horretarako ezgaitzen duen legezko debekurik.
• Enpresa eskatzailea ez dagoela sartuta Euskal Autonomia Erkidegoko Administrazio Orokorrak eta haren erakunde autonomoek emandako izaera bereko laguntzen edo diru-laguntzen esparruan hasitako itzultze edo zehapen-prozedura batean, oraindik izapidetzen ari badira.
• Dagozkion neurri zuzentzaileak gauzatu dituela, ingurumen-kalteak eta eragindako kalteak konpondu eta ordaintzekoak, eta, hala badagokio, zehapena ordaindu duela, Euskadiko Ingurumen Administrazioari buruzko abenduaren 9ko 10/2021 Legean eta Ekonomia Zirkularrerako Hondakinei eta Lurzoru Kutsatuei buruzko apirilaren 8ko 7/2022 Legean aurreikusitako arau-hauste larri eta oso larriengatik zehatua izan bada.
• Egunean dituela diru-laguntzak itzultzeko betebeharrak.
• Ez dagoela berreskuratzeko agindu baten menpe, laguntza bat legez kanpokoa eta barne-merkatuarekin bateraezina dela deklaratzen duen Batzordearen aldez aurreko erabaki baten ondorioz, eta ez dela krisian dagoen enpresa bat, krisian dauden enpresa ez-finantzarioak salbatzeko eta berregituratzeko estatu-laguntzei buruzko Erkidegoko Zuzentarauen arabera (EBAO 2014/C 249/01).
• Ogasunarekin eta Gizarte Segurantzarekin egoera erregularizatuta duela.
• Diru-laguntzei buruzko Lege Orokorraren 13. artikuluan eskatutako baldintzak betetzen dituela.

2.- Eskabideak ez badira osorik betetzen, edo haiekin batera ez bada adierazitako dokumentazioa aurkezten, erakunde eskatzaileari hamar egun balioduneko epea emango zaio (bitarteko elektronikoen bidez eskatuko zaio) hutsegitea bitarteko berak erabiliz konpontzeko edo behar diren dokumentuak aurkezteko. Horrez gain, adieraziko zaio hori egin ezean eskabidean atzera egin duela ulertuko dela, Administrazio Publikoen Administrazio Prozedura Erkidearen Legean aurreikusten den moduan.

3.- Nolanahi ere, laguntza hauen organo kudeatzaileak beste edozein agiri edo informazio eskatu ahal izango die erakunde eskatzaileei, beharrezkotzat jotzen badu haiek aurkeztutako eskabidea behar bezala ulertu, ebaluatu eta tramitatu ahal izateko. Agindu honetan berariaz aurreikusi ez diren gaietan, Administrazio Publikoen Administrazio Prozedura Erkidearen urriaren 1eko 39/2015 Legean xedatutakoa aplikatuko da.