Euskal Herriko Agintaritzaren Aldizkaria

148. zk., 2024ko uztailaren 30a, asteartea

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

XEDAPEN OROKORRAK

OSASUN SAILA

3691

AGINDUA, 2024ko uztailaren 1ekoa, Osasuneko sailburuarena, Euskal Autonomia Erkidegoan mediku egoiliarren prestakuntza espezializaturako kanpo-txandaketak baimentzeko prozedura arautzen duena.

Kanpo-txandaketak, dagokion autonomia-erkidegoko organo eskudunak baimendutako prestakuntza-egonaldiak dira, eta prestakuntza-programan eta zentro edo irakaskuntza-unitateari emandako akreditazioan aurreikusita ez dauden zentro edo dispositiboetan egiten direnak.

Kanpo-txandaketen definizioa eta haiek baimentzeko betekizunak, urriaren 6ko 1146/2006 Errege Dekretuaren 8. artikuluan ezartzen dira lehen aldiz (errege-dekretu horren bidez, Osasun Zientzietako espezialistak prestatzeko egoiliarren lan-harreman berezia arautzen da; aurrerantzean, 1146/2006 Errege Dekretua). Dekretu horrek, Osasun Lanbideen Antolamenduari buruzko 44/2003 Legea garatuz (aurrerantzean, 44/2003 Legea), langileen prestakuntzaz arduratzen den zentroa edozein dela ere, esparru orokor eta homogeneo bat ezartzen du.

Osasun-zientzietako espezialitateak zehaztu eta sailkatzen dituen eta osasun-prestakuntza espezializatuko sistemaren zenbait alderdi garatzen dituen otsailaren 8ko 183/2008 Errege Dekretuak (aurrerantzean 183/2008 Errege Dekretua), 21. artikuluan (Kanpoko txandaketak, baimena eta ebaluazioa) kanpoko txandaketak baimentzeko betekizunak ezartzen ditu, haien definizioa zabaltzen du, eta baimena emateko eskumena autonomia-erkidegoetako organo eskudunei ematen die.

Gure autonomia-erkidegoan, osasun-prestakuntza espezializatuaren sistemari dagokionez, martxoaren 6ko 34/2012 Dekretua dugu, Euskal Autonomia Erkidegoan osasun-prestakuntza espezializatuaren sistema antolatzekoa, zeinaren bidez garatzen baita prestakuntza espezializatuaren arloko oinarrizko legeria. Prestakuntza espezializatuari buruzko hainbat alderdi arautzen dituen araua da; hala ere, ez du kanpo-txandakatzeak baimentzeko prozedurari buruzko xedapenik, tutore nagusiek eta irakaskuntza-batzordeek prestakuntza-egonaldiei dagokienez esleituta dituzten eginkizunetatik harago.

Aurrekari horiek ikusita, aipatutako oinarrizko araudia garatzeko beharrean gaude, kanpo-txandaketak baimentzeko prozedura arautzeko, bai osasun-zerbitzu publikoen eremuan, bai pribatuetan.

Horretarako, Jaurlaritzari buruzko ekainaren 30eko 7/1981 Legearen 26. eta 28. artikuluetan ezarritako eskumenen arabera, honako hau

XEDATZEN DUT:

1. artikulua.– Xedea.

Agindu honen xedea da prestakuntzan ari diren osasun-zientzietako espezialisten kanpo-txandaketak baimentzeko prozedura arautzea, Osasun-zientzietako espezialitateak zehaztu eta sailkatzen dituen eta osasun-prestakuntza espezializatuko sistemaren zenbait alderdi garatzen dituen otsailaren 8ko 183/2008 Errege Dekretuaren 21. artikuluaren arabera.

2. artikulua.– Betekizunak.

Kanpo-txandaketen baimena Plangintza, Antolamendu eta Ebaluazio Sanitarioko zuzendariak emango du, eta baldintza hauek bete beharko dira:

a) Egoiliarraren tutoreak proposatutakoak izatea, lortu nahi diren helburuak zehaztuta. Helburu horiek zentroan edo unitatean egin ez diren eta prestakuntza-programaren arabera beharrezkoak edo osagarriak diren ezagutzak zabaltzeari edo teknikak ikasteari buruzkoak izan behar dute.

b) Irakaskuntzarako akreditatuta dauden zentroetan edo ospe handiko zentro nazional edo nazioartekoetan egitea, ahal dela.

c) Lau urte edo gehiagoko iraupena duten espezialitateetan, ezin izango da lau hilabete jarraitutik gorakoa izan urteko ebaluazio-aldi bakoitzaren barruan, ezta 12 hilabetetik gorakoa ere dagokion espezialitatearen prestakuntza-aldi osoan. Urtebete, bi edo hiru urteko iraupena duten espezialitateetan, kanpo-txandaketa ezin izango da bi, lau edo zazpi hilabetetik gorakoa izan, hurrenez hurren, espezialitatearen prestakuntza-aldi osoan.

d) Jatorrizko zentroko gerentziak berariaz konpromisoa hartzea egoiliarrari ordainsari guztiak ordaintzen jarraitzeko, kanpo-txandaketan egiten duen etengabeko arretatik eratorritakoak barne.

e) Kanpo-txandaketa egingo den zentroko irakaskuntza-batzordeak berariaz adieraztea ados dagoela; horretarako, txandaketa egiten den dispositiboaren irakaskuntza-aukerak hartuko dira kontuan.

f) Urteko ebaluazioari dagokionez, prestakuntza jasotzen ari den egoiliarrak bere jatorrizko zentroan egon beharko du maiatzean edo urteko prestakuntza-aldia amaitzen den hilean; beraz, ez da aldi horietarako txandaketarik baimenduko.

g) Salbuespen gisa, lehen urteko egoiliarren txandakatzeak (R1) baimenduko dira; izan ere, lehenengo urtea oinarrizko prestakuntzatzat hartzen da, eta, beraz, tutore nagusiak bere proposamenean justifikatu beharko du prestakuntza hori beharrezkoa edo komenigarria dela.

3. artikulua.– Txandaketaren ebaluazioa.

Kanpo-txandaketa egin den zentroak dagokion ebaluazio-txostena egingo du, prestakuntza-programan aurreikusitako barne-txandaketen irizpide berdinei jarraituz, eta egoiliarraren erantzukizuna izango da txosten hori jatorrizko irakaskuntza-batzordeko idazkaritzara eramatea, ebaluazioa forman eta garaiz egiteko.

Artikulu honetan aurreikusitakoaren arabera baimendutako eta ebaluatutako kanpo-txandaketak prestakuntzan dagoen egoiliarraren liburuan inskribatuko dira.

4. artikulua.– Eskabideak aurkezteko epea eta modua.

Irakaskuntza-batzordearen ordezkari gisa jardungo duten pertsona baimenduek aurkeztuko dituzte eskabideak, eta Osasun Saileko Plangintza, Antolamendu eta Ebaluazio Sanitarioko Zuzendaritzaren Irakaskuntza eta Garapen Porfesionaleko Zerbitzuak izapidetuko ditu.

1.– Epea.

Eskaerak, gutxienez, kanpo-txandaketa hasi baino hilabete lehenago aurkeztu beharko dira.

Eskatutako aurrerapenarekin aurkezten ez diren eskabideak ez dira izapidetzeko onartuko.

2.– Aurkezteko modua.

2.1.– Eskabide-eredua.

Kanpo-txandaketak baimentzeko eskabideak, agindu honen eranskinean agertzen den ereduaren arabera aurkeztuko dira. Prozedura hori Euskal Herriko Agintaritzaren Aldizkarian argitaratuko da, eta argitalpen horrek egoitza elektronikora bideratuko du, ereduak eta inprimakiak eskuratzeko.

Eskaera bat egingo da, egin beharreko kanpo-txandaketa bakoitzeko.

2.2.– Aurkezteko lekua.

Eskabideak baliabide elektronikoen bidez aurkeztuko dira, Eusko Jaurlaritzaren egoitza elektronikoan eskuragarri dagoen formulario elektronikoaren bidez https://www.euskadi.eus/y22-home/es/), Administrazio Publikoen Administrazio Prozedura Erkidearen urriaren 1eko 39/2015 Legearen 14. artikuluan eta Administrazio Elektronikoari buruzko otsailaren 21eko 21/2012 Dekretuaren 28. artikuluko lehenengo paragrafoan ezarritakoaren arabera.

2.3.– Hizkuntza.

Eskatzaileek nahi duten hizkuntza ofizialean aurkeztu ahal izango dute eskabidea, eskatzen zaien gainerako dokumentazioarekin batera. Halaber, eskabidetik eratorritako jarduketetan, eta prozedura osoan, eskatzaileak hautatutako hizkuntza erabiliko da, Euskararen Erabilera Normalizatzeko azaroaren 24ko 10/1982 Oinarrizko Legearen 6.1 artikuluan eta 39/2015 Legearen 15. artikuluan ezarritakoaren arabera.

2.4.– Eskabidearekin batera aurkeztu beharreko dokumentazioa.

Eskabide-agiri normalizatua dokumentu hauekin batera aurkeztuko da:

a) Egoiliarraren tutore nagusiak elektronikoki sinatutako proposamena, lortu nahi diren helburuak zehazten dituena. Helburu horiek zentroan edo unitatean erabiltzen ez diren teknikak ikasteari edo ezagutzak handitzeari buruzkoak izan behar dute, eta, prestakuntza-programaren arabera, beharrezkoak edo osagarriak izan behar dute. Txandakatzearen iraupena ere zehaztu behar da proposamenean. Proposamena jatorrizko ikastetxeko irakaskuntza-batzordeari aurkeztuko zaio, eta memoria bat izango du, honako atal hauek jasoko dituena:

– Lortu nahi diren gaitasunak.

– Ikastetxearen hautaketaren justifikazioa.

– Aurreikusitako lan-plana.

– Txandaketaren hasiera- eta amaiera-datak.

b) Jatorrizko zentroko irakaskuntza-batzordearen aldeko txostena, ikasketa-buruak sinatuta.

c) Jatorrizko zentroko gerentziaren konpromisoa zehazten duen agiria, ordainsari guztiak ordaintzen jarraitzeko konpromisoa jasotzen duena, kanpo-txandaketan etengabeko arretatik eratorritakoak barne.

d) Destino-zentroko irakaskuntza-batzordearen gutuna, kanpo-txandaketa onartzen duela dioena. Eskatutako txandaketa irakaskuntzarako akreditatuta ez dagoen zentro batean egiten bada, onarpen-gutuna zentroko zuzendaritzak sinatuko du.

Jatorrizko sinadura elektronikoa, logotipoa edo zigilua jasotzen ez duten dokumentuak, faxak edo posta elektronikoak ez dira baliozkoak izango.

2.5.– Eskabideak zuzentzea.

Eskabideetan baldintzak betetzen ez badira edo 2.4 artikuluan adierazitako dokumentazio guztia aurkezten ez bada, eskatzaileari eskatuko zaio hamar (10) egun balioduneko epean gabezia zuzentzeko edo aurkeztu ez dituen nahitaezko dokumentazioa aurkezteko, eta adieraziko zaio, hala egiten ez badu, eskaeran atzera egin duela joko dela.

Era berean, eskabidearen espedientea behar bezala ebaluatzeko beharrezkotzat jotzen den dokumentazio osagarri guztia eskatu ahal izango da.

Jakinarazpenak egoitza elektronikoko «nire karpeta» zerbitzuaren bidez egingo dira (helbidea: https://www.euskadi.eus/nirekarpeta). Honako funtzionalitate hauek ditu:

a) Pertsona alderdi interesduna den prozedura guztietako espedienteen izapideen egoeraren jarraipena egitea, Administrazio Publikoen Administrazio Prozedura Erkidearen urriaren 1eko 39/2015 Legearen 53.1.a) artikuluan aurreikusitakoaren arabera.

b) Espediente bakoitzean egindako izapideen jarraipena eta horien data.

c) Espedienteetako dokumentu elektronikoak eskuratzea eta deskargatzea.

d) Komunikazio eta jakinarazpenetarako irispidea.

e) Administrazioaren esku dauden komunikazio- eta jakinarazpen-datuak ezagutzea, hargatik eragotzi gabe indarrean dagoen araudiak ezartzen dituen mugak.

f) Zehazten diren administrazio-ziurtagiriak lortzea.

Halaber, egoitza elektronikoan identifikazio eta sinadura elektronikorako onartuta dauden eta «nire karpeta» atalera sartzeko beharrezkoak diren bitartekoei buruzko informazioa ere emango da. Bitarteko horiek helbide honetan eskura daitezke: https://www.euskadi.eus/identifikazio-elektronikorako-onartutako-bitartekoak/web01-sede/eu/

5. artikulua.– Estatu Batuetako eta Kanadako txandaketetarako aseguru-ziurtagiria

Irakaskuntza eta Lanbide Garapeneko Zerbitzua arduratuko da prozedura hori izapidetzeaz eta Euskal Autonomia Erkidegoko Administrazioak Erantzukizun Zibil Profesionaleko poliza bat kontratatzeari buruzko aseguru-ziurtagiria eskatzeaz. Agiri hori beharrezkoa da Estatu Batuetan eta Kanadan kanpo-txandaketak egiteko.

6. artikulua.– Ebazpena eta ondorioak.

1.– Plangintza, Antolamendu eta Ebaluazio Sanitarioko Zuzendaritzak kanpo-txandakatzearen eskaera onartzeko edo ukatzeko ebazpen arrazoitua eta berariazkoa emango du hiru hilabeteko epean, eskaera aurkezten den egunetik zenbatzen hasita.

Epearen zenbaketa eten ahal izango da interesdunari nahitaezko dokumentazioa zuzentzeko edo aurkezteko eskatzen zaionean, errekerimenduaren jakinarazpenetik haren hartzaileak errekerimendua bete arte igarotako denboran.

Ebazteko aurreikusitako epea igaro eta ebazpenik eman ez bada, eskaera ezetsi dela jo dezake eskatzaileak.

2.– Ematen den ebazpena eskatzaileari jakinaraziko zaio, zeinak modu frogagarrian helaraziko baitio alderdi interesdunei.

Jakinarazpenak egoitza elektronikoko «nire karpeta» zerbitzuaren bidez egingo dira (helbidea: https://www.euskadi.eus/nirekarpeta).

3.– Plangintza, Antolamendu eta Ebaluazio Sanitarioko zuzendariaren ebazpenaren aurka, interesdunek gora jotzeko errekurtsoa aurkeztu ahal izango diote Osasuneko sailburuordeari, hilabeteko epean, ebazpena jakinarazi eta hurrengo egunetik aurrera, Administrazio Publikoen Administrazio Prozedura Erkidearen urriaren 1eko 39/2015 Legearen 121. artikuluan eta hurrengoetan xedatutakoaren arabera.

4.– Baimenaren ebazpena beharrezkoa izango da, eta kanpo-txandaketa hasi aurretik eman beharko da. Prestakuntza-egonaldia ezin izango da hasi, harik eta Plangintza, Antolamendu eta Ebaluazio Sanitarioko zuzendariak baimenaren ebazpena eman arte, eta hala egiten bada, diziplina-erantzukizuna izan dezake.

Era berean, organo eskudunak behar bezala baimendu ez dituen kanpo-txandaketek ez dute erantzukizun zibileko aseguruaren estaldurarik izango.

7. artikulua.– Atzera egitea eta uko egitea.

1.– Interesdunek bide elektronikoz egin dezakete atzera beren eskaeran, Eusko Jaurlaritzaren egoitza elektronikoan eskuragarri dagoen formulario normalizatuaren bidez (https://www.euskadi.eus/y22-home/es/)

2.– Interesdunek uko egin ahal izango diote ebazpen bidez aitortutako eskubideari, behar bezala justifikatutako arrazoiengatik, Eusko Jaurlaritzaren egoitza elektronikoan eskuragarri dagoen formulario normalizatuaren bidez (https://www.euskadi.eus/y22-home/es/).

Uko egitea kanpo-txandaketa hasteko aurreikusitako eguna baino lehen aurkeztu beharko da; bestela, burututzat joko da.

3.– Interesdunek kanpo-txandaketaren eskaeran parte hartzen duten gainerako pertsonei jakinarazi beharko diete atzera egin dutela edo uko egin dutela.

8. artikulua.– Aldaketak.

Plangintza, Antolamendu eta Ebaluazio Sanitarioko Zuzendaritzako titularrak kanpo-txandaketa aldatzeko baimena eman ahal izango du, aldez aurretik eskatzen bada, destino-zentroan gerora sortutako zirkunstantziak direla-eta ezinezkoa denean txandaketa hasierako baldintzetan egitea.

Aldaketa-eskabidean datu berriak sartuko dira, eskatzen diren aldaketen eta beharrezko diren justifikazioen arabera.

2.– Baldintzak hasierako baimena eskatzeko berdinak izango dira, eta, horretarako, dagokion aldaketa-eskabidea erabili beharko da.

9. artikulua.– Datu pertsonalak babesteari buruzko informazio-klausula.

Europako Parlamentuaren eta Kontseiluaren 2016ko apirilaren 27ko 2016/679 Erregelamendua (EB), Pertsona fisikoak babesteari buruzkoa, datu pertsonalen tratamenduari eta datu horien zirkulazio askeari dagokienez (Datuen Babeserako Erregelamendu Orokorra), Datu Pertsonalak Babesteari eta Eskubide Digitalak Bermatzeari buruzko abenduaren 5eko 2/2018 Lege Organikoa, eta datuen babesaren arloan indarrean dagoen gainerako araudia betez, jakinarazten da datu pertsonalak «Irakaskuntza eta garapen profesionala» izeneko tratamendu-jardueran sartuko direla, zeinak ezaugarri hauek baititu:

Arduraduna: Plangintza, Antolamendu eta Ebaluazio Sanitarioko Zuzendaritza.

Helburua: eskabideak kudeatzea eta kanpo-txandaketen prozeduraren jarraipena egitea.

Legitimazioa: interes publikoaren inguruan eginkizun bat betetzeko beharrezkoa den tratamendua edo tratamenduaren arduradunari esleitutako botere publikoen eginkizunean (44/2003 Legea, azaroaren 21ekoa, Lanbide Sanitarioak Antolatzekoa, eta otsailaren 8ko 183/2008 Errege Dekretuaren 21. artikulua; errege-dekretu horren bidez, osasun-zientzietako espezialitateak zehaztu eta sailkatzen dira eta osasun-prestakuntza espezializatuko sistemaren alderdi jakin batzuk garatzen).

Hartzaileak: gaian eskumena duten administrazio publikoei eman ahal izango zaizkie datu pertsonalak.

Eskubideak: datuak irispidean izateko, zuzentzeko eta ezerezteko eskubidea dago; era berean, datuen tratamendua mugatzeko edo tratamenduari aurka egiteko eskubidea ere badago, informazio gehigarrian azaltzen den bezala.

Informazio gehigarria: datuen babesari buruzko informazio gehigarria webgune honetan aurki daiteke: https://www.euskadi.eus/web01-aprat/es/contenidos/informacion/rat/es_def/es/contenidos/informacion/rat/es_def/adjuntos/0893_es.html

AZKEN XEDAPENA

Agindu hau Euskal Herriko Agintaritzaren Aldizkarian argitaratu eta hurrengo egunean jarriko da indarrean.

Vitoria-Gasteiz, 2024ko uztailaren 1a.

Osasuneko sailburua,

ALBERTO MARTÍNEZ RUIZ.

(Ikus .PDF)

Azterketa dokumentala