Otsailaren 27ko 3/1998 Legeak —Euskal Herriko ingurumena babesteko Lege Orokorra— Euskal Herriko Ingurumen Batzordea sortu zuen. Batzorde hori organo aholku-emailea da eta Ingurumen arloaz arduratzen den Sailari atxikita dago; bestetik, Euskal Autonomia Erkidegoan ingurumen arloan diharduten administrazioen harremanak, parte hartzea eta koordinazioa taxutzea da organo horren egitekoa. Aipatu legeak Batzordearen oinarrizko funtzioak ezartzen ditu eta hura osatzen duten kideak zein arlotakoak diren zehazten du.

Aipatu Legea garatuz apirilaren 11ko 69/2000 Dekretuak Euskal Herriko Ingurumen Batzordearen osaketa eta funtzionamendua arautzen ditu.

Lehendakariaren irailaren 17ko 19/2001 Dekretuaren bidez —Euskal Autonomia Erkidegoaren Administrazioko sailak sortu, ezabatu eta aldatu eta horien egitekoak eta jardun-arloak finkatu zituen Dekretua aldatzekoa dena— Administrazioko sailen egitura eta sail desberdinen arteko eskumenen banaketa berrantolatu da. Berrantolaketa honen ondorioz etxebizitza arloko egitekoak, lehen Lurralde Antolamendu, Etxebizitza eta Ingurugiro Sailaren eskumenekoak zirenak, Etxebizitza eta Gizarte Gaietako Sailaren eskumen izatera pasatu dira.

Aipatu egiteko zenbaitek, besteak beste lurzorua eta hirigintza, etxebizitza, arkitektura, eraikuntza eta eraikuntza-kalitatearen arloei dagozkienek, garrantzi handia izan dezakete hiriko ingurumenaren babesean, bereziki presio sortzaile diren sektoreekin duten harremanen ondorioz, adibidez, lurzoruaren erabilera, energien kontsumoa, hondakinen sorrera, trafikoa etab. Hau guztia kontuan hartuta, komenigarria ikusten da Etxebizitza eta Gizarte Gaietako Sailak Euskal Herriko Ingurumen Batzordean parte har dezan.

Bestalde, Lurralde Antolamendu eta Ingurumen Saileko eskumen banaketa eta antolaketa administratibo berriekin bat eginez, Lurralde Antolamendu eta Biodibertsitate Sailburuordetzak lehengo Lurralde Antolamendu eta Etxebizitza Sailburuordetza ordezkatu du, zeinak, bere aldetik, ordezkotza bazuen Ingurumen Batzordean 69/2000 Dekretuaren 3 b) artikuluak xedatutakoaren arabera.

Era berean, azaroaren 20ko 306/2001 Dekretuak, Lurralde Antolamendu eta Ingurumen Saileko egitura organikoa ezartzeko denak, bere 14 d) artikuluan Ingurumenaren Plangintza, Partaidetza eta Kontrolerako Zuzendaritzari egozten dio Euskal Herriko Ingurumen Batzordearen idazkari izatea, eta laguntza teknikoa emateko eginkizuna. Egiteko horiek, 69/2000 Dekretuak, desagertutako Lurralde Antolamendu, Etxebizitza eta Ingurugiro Saileko Ingurugiro Baliabideen Zuzendaritzari egozten zizkion.

Ondorioz, Eusko Jaurlaritzako Aholku-Batzorde Juridikoari entzun ondoren, Lurralde Antolamendu eta Ingurumen sailburuaren proposamenez, eta Jaurlaritzaren Kontseiluak 2002ko apirilaren 9ko egindako bilkuran aztertu eta onartu ondoren, hauxe