1. Babes zibilaren intereseko boluntario-erakunde hauek osatzen dute Larrialdiei Aurre Egiteko eta Babes Zibilerako Euskal Sistemako herritarrek laguntzeko eta parte hartzeko sarea:

   1. Babes zibileko udal-egiturari lotutako Euskadiko babes zibileko boluntarioen toki-erakundeak.

      IV. kapituluak aipatzen dituen Euskadiko babes zibileko erakunde laguntzaileak, Eusko Jaurlaritzarekin hitzarmena badute.

2. Babes zibilaren eta larrialdien arloko eskumena duen Eusko Jaurlaritzako zuzendaritzan propio sortutako erregistroan inskribatuko dira aurreko paragrafoetan aipatutako erakunde eta entitateak, Larrialdiei Aurre Egiteko eta Babes Zibilerako Euskal Sistema osatzen duen sarearen barruan jarduteko beharrezko baldintza gisa, eta kasuan kasu dagokion bulegoaren mende egongo dira.

Euskal administrazio publikoek babes zibileko toki-erakundeetako boluntarioen hasierako eta etengabeko prestakuntza bultzatuko dute.

1. Eusko Jaurlaritzan Larrialdiei Aurre Egiteko eta Babes Zibileko eskumena duen Zuzendaritzak Euskadiko Babes Zibileko Boluntarioen toki-erakundeei emango dizkie erakunde horietako kideen identifikazio-agiri pertsonalak.

2. Agiria doan emango da, dagokion toki-erakundeak aurretik eskatu eta gero. Erakunde horrek kide boluntarioa dela ziurtatu beharko du, eta dekretu honetan aipatzen diren curriculumeko konpetentziak dituela egiaztatu. Eskaerarekin batera, nortasun-agiriko argazkien tamainako bi argazki erantsiko dira.

3. Agiria pertsonala eta besterenezina da, eta, galdu edo hondatuz gero, edo datuak aldatuz gero, berritu egin behar da.

4. Boluntario batek bere erakundean baja ematen badu, hari itzuliko dio akreditazioa, eta erakundeak Eusko Jaurlaritzan larrialdiei aurre egiteko eta babes zibileko eskumena duen zuzendaritzara bidaliko du.

1. Erregistroan inskribatzeko eskatuko dute toki-erakundean eskuduna den arduradunak edo elkarte edo erakunde laguntzaileko lehendakaritzako titularrak, agiri hauek erantsita:

   1. Eraketa egiaztatzen duten agiriak, estatutuak, araudiak edo barne-arauak.

   2. Euskal Autonomia Erkidegoko eremura eta larrialdietara atxikitako antolakunde edo erakundean jardunean dauden kideen eta arduradunaren izenen zerrenda.

   3. Egiaztagiria, organo eskudunak egindakoa, dagokion erregistro publikoan inskripzioa egina duela egiaztatzen duena. Espainiako Gurutze Gorriaren kasuan eta babes zibileko boluntarioen toki-elkarteen kasuan ez da beharrezkoa izango horrelako egiaztapenik.

   4. Elkarte modura eratutako toki-erakundeen kasuan, hitzarmen bidez tokiko babes zibilarekiko lotura eta hari atxikia izana egiaztatzen duen egiaztagiria.

2. Eskabidea bide telematikoz aurkeztuko da Eusko Jaurlaritzaren egoitza elektronikoan, Eusko Jaurlaritzako Larrialdiei Aurre Egiteko eta Babes Zibileko Zuzendaritzan.

3. Eusko Jaurlaritzako Larrialdiei Aurre Egiteko eta Babes Zibileko Zuzendaritzak aztertuko ditu aurkeztutako agiriak, eta, aurreko artikuluan aipatutako datuetan akatsik edo hutsunerik baldin badago, eskatzaileari jakinaraziko dio, dagokion zuzenketa egin dezan, Administrazio Publikoen Administrazio Prozedura Erkidearen urriaren 1eko 39/2015 Legearen arabera. Gehienez ere 3 hilabeteko epean ebatziko da prozedura.

1. Behean aipatzen diren curriculumeko konpetentziak egiaztatu beharko dira baldin eta babes zibileko boluntarioen toki-erakunde bateko eskubide osoko kide boluntario bezala parte hartu nahi bada babes zibileko eta larrialdiei aurre egiteko lan prebentibo eta operatiboetan:

   1. Identifikatzea Euskal Autonomia Erkidegoan larrialdi-egoera bakoitzean aplikatu beharreko oinarrizko araudia eta antolaketa, baita babes zibileko planak, taktika operatiboak eta autobabeserako neurriak ere.

   2. Ezagutzea zein diren oinarrizko arrisku natural eta teknologikoen motak eta horien jatorria, faktore eragileak eta sailkapena, baita prebentziorako, autobabeserako eta esku-hartzerako oinarrizko neurriak ere.

   3. Mantentzea eta egiaztatzea erakundeak dituen bitarteko materialen funtzionamendua, larrialdiak prebenitzeko eta haietan esku hartzeko erabilitakoena.

   4. Larrialdietan komunikazioetarako oinarrizko elementuak erabiltzea.

   5. Biktimak bilatzeko, salbatzeko eta erreskatatzeko jarduerak egitea bitarteko eta teknika egokiekin eta segurtasun-baldintzetan.

   6. Larrialdi egoeretan lehen sorospenak eta bihotz-biriketako oinarrizko bizkortzea egitea, baita desfibriladorea erabiltzea eta zaurituak maneiatzea eta garraiatzea ere, betiere ezarritako protokoloen arabera.

   7. Suteak itzaltzeko oinarrizko elementuak erabiltzea (su-itzalgailuak eta suteetako ur-hargune hornituak erabiltzea).

   8. Larrialdi-egoeretan herritarrak ebakuatzeko eta aterpetzeko operazioak egitea.

   9. Larrialdi-egoeretan laguntza psikiko eta soziala ematea, ezarritako protokoloen arabera.

2. Babes zibileko entitate laguntzaileen kasuan, izenpeturiko hitzarmenaren lankidetza-eremua jarduera espezializatuei buruzkoa bada, eta jarduera horietarako ez bada beharrezkoa dekretu honetan aipaturiko curriculumeko konpetentziak izatea, halakoetan dagokion lankidetza-hitzarmenean zehaztuko dira curriculum-konpetentzia espezializatuak.

1. Babes zibileko boluntarioen toki-erakundeetako boluntarioen curriculumeko konpetentzia horiek honela egiaztatu ahal izango dira:

   1. Polizia eta Larrialdietako Euskal Akademiak horretarako ematen duen prestakuntza-ikastaroa gaindituz.

   2. Larrialdietan jarduteko funtzioak gauzatzeko curriculumeko oinarrizko konpetentziak ematen dituen titulu akademiko baten edo profesionaltasun-ziurtagiri baten bidez. Nolanahi ere, egiaztatutzat joko dira Larrialdietako eta Babes Zibileko teknikariaren titulua eta Larrialdien Koordinazioko eta Babes Zibileko Goi Mailako teknikariaren titulua dutenak, kontuan hartuta zer kualifikazio profesional eta konpetentzia sartzen diren titulazioa horietan.

   3. Larrialdiei Aurre Egiteko eta Babes Zibilerako Euskal Sistemarako funtsezkotzat edo oinarrizkotzat jotako zerbitzuetako zerbitzu profesionalak eman izana egiaztatuz.

2. Aurreko artikuluan aipatutako babes zibileko entitate laguntzaileen kasuan, curriculumeko konpetentziak egiaztatu ahal izango dira lankidetza-hitzarmenak edo hitzarmen horren jarraipen-batzordeak ezarritako ordezko mekanismoen bidez, betiere espezializazioaren berezkotasunak kontuan hartuta.

1. Polizia eta Larrialdietako Euskal Akademiak babes zibileko boluntarioen erakundeentzako prestakuntza-plan bat onartu eta argitaratuko du urtero, dauden babes zibileko boluntarioen erakundeei kontsulta egin ostean. Dokumentu horrek honako hauek jasoko ditu: prestakuntza-jarduerak, antzemandako premien eta errealitateen arabera planifikatuak; sartzeko arauak; egon daitezkeen ebaluazio-probak, eta dagokion ziurtagiria ematea.

2. Prestakuntza-plan horretako prestakuntza-jardueretan parte hartu ahal izango dute babes zibileko boluntariotzako erakunde laguntzaileen erregistroan inskribatuta dauden erakundeetako kide direnek.

3. Hauek sartuko dira prestakuntza-ikastaroetan:

   1. Nahitaezko oinarrizko prestakuntza, boluntario-izaeraren akreditazioa eskuratzeko beharrezkoak diren curriculumeko konpetentziak lortzera eta ziurtatzera bideratua.

   2. Eguneratzeko prestakuntza. Helburu hau izango du: erakundeak osatzen dituzten pertsonek euren mailari eustea bilakaera izan duten edo aldatu egin diren gaietan.

   3. Hauei prestakuntza espezifikoa ematea: erakundeetako burutzan edo agintean dauden pertsonei, edo babes zibileko boluntarioen instrukzio-lanetan laguntzen duten monitoreei.

   4. Espezializazioko prestakuntza ematea, helburu honekin: erakundeetako kideek jakin behar dituzten arlo edo egiteko espezifikoetan sakontzea.

4. Polizia eta Larrialdietako Euskal Akademiaren programazioan, boluntarioen parte-hartzea sustatuko da, ahal den neurrian urrutiko prestakuntza ahalbidetzen duten teknologiak erabiliz.

5. Polizia eta Larrialdietako Euskal Akademiak homologatu ahal izango ditu, egin baino lehen, dekretu honetan aurreikusi ez diren beste ikastaro batzuk, betiere organismo autonomo horrek ezarritako betekizunak betetzen badituzte honako alderdi hauei dagokienez: helburuak, programak, edukiak, iraupena, egutegia, irakasleak, ebaluazio-sistemak, eskainitako plazak eta non eta zer baliabide materialekin egingo diren.