1. Dekretu honen helburua da industria-segurtasunaren eremuan esku hartzeko irizpideak zehaztea, baita instalazioak, ekipoak, aparatuak edo produktuak, aurrerantzean, industria-instalazioak abiarazteko prozedura erraztea ere.

2. Arau honetan bildutako xedapenak industria-segurtasuneko araudiaren eraginpeko industria-instalazio guztiei aplikatuko zaizkie, horien kokapena edozein delarik ere (etxebizitzak, merkataritza-lokalak, jendarteko lokalak, industria-establezimenduak, eta abar).

Euskal Autonomia Erkidegoko Industriaren azaroaren 12ko 8/2004 Legearen 9. artikuluan aurreikusitakoaren arabera, honako hauek bakarrik izango dute administrazioaren baimena:

1. Indarreko legediaren arabera, funtzionamendurako administrazioaren baimena behar duten industria-instalazioek.

2. Salbuespen gisa administrazioaren baimena jaso ahal izango dute diseinu, helmuga, koka­leku, kokapen edo justifikatutako beste edozein arrazoirengatik indarreko preskripzio teknikoak betetzen ez dituzten industria-instalazioek; betiere, interesdunak aldez aurretik egiaztatu beharko du segurtasun-maila baliokideak eskaintzen dituzten neurriak hartu dituela edo bestelako baldintza alternatiboak ezarri dituela.

Aurreko artikuluan aurreikusitako kasuetatik kanpo, eta 10.3 artikuluan xedaturikoaz kanpo, industria-instalazioak abiarazteko nahikoa izango da dekretu honen 11. artikuluan ezarritako dokumentazioa Industria-arloko lurralde-organo eskudunari aurkeztea. Artikulu horretan ezinbestekotzat jotzen diren agiriren bat falta bada, ezinezkoa izango da instalazioa abiaraztea.

Industria Administrazioak, bere zerbitzu-teknikoen bitartez, edo eragile laguntzaileen zerbitzuak erabiliz, industria-segurtasuneko xedapenen betearazpena egiaztatu ahal izango du edozein unetan, ofizioz edo alderdi interesdunak eskatuta.

1. Eragile laguntzailetzat hartuko dira Euskal Autonomia Erkidegoko Industriako 8/2004 Legearen 14. artikuluan ezarritako betekizunak eta baldintzak betetzen dituztela egiaztatzen duten pertsona fisiko edo juridiko guztiak.

2. Industria Administrazioaren eskumenen esparruan jarduten dutenean, eragile laguntzaile horietako edonork emandako edo egindako egiaztagirien, ikuskapen- edo kontrol-akten edo bestelako egintzen aurka erreklamazioak aurkeztu ahal izango dira Industria-arloko lurralde-organo eskudunean. Erreklamazio horien ebazpenen aurka gora jotzeko errekurtsoa aurkeztu ahal izango da, indarreko legedian aurreikusitakoari jarraikiz.

1. Dekretu honen ondorioetarako, Industria Administrazioaren esku-hartzearen faseak honako hauek izango dira:

   1. Kontrol formala. Aurkezterakoan aztertuko da dokumentazioa, eta araubidez eskatzen den dokumentazioa dela eta formalki ezarritako baldintzak biltzen dituela egiaztatuko da.

   2. Kontrol teknikoa. Zerbitzu Teknikoek araubidez ezarritako dokumentazioa berrikusiko dute, eta dokumentazio horrek aplika dakizkiokeen Araubideetan ezarritako baldintzak betetzen dituela egiaztatuko dute. Hala badagokio, adierazitako kontrolak horren mendeko industria-instalazioak ikuskatzea ekar dezake.

   3. Auditoretza. Industria-segurtasunari dagokionez, esku-hartzen duten eragile laguntzaileen gaineko eta Industria-instalazioen gaineko kontrol sistematiko planifikatua izango prozedura.

      Auditoretzak bi motatakoak izan daitezke:

      Industria-instalazioak eta eragile laguntzaileak arautzen dituzten arauzko baldintza guztien kontrol orokorrerako auditoretzak.

      Industria-instalazioak eta eragile laguntzaileak arautzen dituzten arauzko baldintza baten edo batzuen kontrol espezifikorako auditoretzak.

      Bi kasuetan, ikuskatu beharreko industria-instalazioak edo eragile laguntzaileak laginketaz hautatuko dira.

2. Era berean, Industria Administrazioak honako kasu hauetan esku hartu beharko du:

   1. Arauzko ikuskapenak. Adierazitako esku-hartzea nahitaez eta derrigorrez aurreikusten duen arau bat dagoenean.

   2. Salaketa baten ondoriozko ikuskapenak. Industria-araudiaren mendeko instalazio baten egi­karitzeari edo funtzionamenduari lotutako salaketa bat dagoen kasu guztietan, betiere arrazoitutzat jotzen bada, eta argitzeko ikuskapen bat egitea ezinbestekoa bada.

   3. Istripu baten ondoriozko ikuskapenak. Industria-araudiaren mendeko instalazio baten egikaritze- edo funtzionamendu-prozesutik zuzenean ondorioztatutako istripu baten kasuan, dagokion ikuskapena egingo da, betiere beharrezkoa bada gertatu dena argitzeko edo eran­tzukizunak zehazteko, baita lankidetza-eskaerak betetzeko ere.

1. Industria-segurtasunaren arloko zuzendaritza eskudunak ezarriko ditu Industria-arloko lurralde organo eskudunen zerbitzu teknikoen jarduteko irizpideak. Eta horiek ezarriko dituzte aurkeztutako dokumentazio teknikoaren berrikuspenaren irismena eta edukia, baita laginketa bidez egin beharreko ikuskapenena ere. Irizpide horiek lehentasunez hartu beharko dituzte kontuan arrisku potentzial handiagoa duten industria-instalazioak.

2. Eskumendun zuzendaritzak ezarritako irizpideen arabera laginketa bidez egin beharreko ikuskapenez gain, industria-instalazioen ikuskapenak egingo dira, horiei buruz aurkeztutako dokumentazioaren berrikuspenean honako kasu hauetako bat atzematen denean:

   1. Dokumentazio teknikoak ez ditu betetzen industria-instalazioaren segurtasunean eragina duten arauzko baldintza teknikoak.

   2. Dokumentazio teknikoari araubide tekniko aplikagarriaren arabera funtsezkotzat jotzen den dokumenturen bat falta zaio.

   3. Funtsezkotzat hartutako aurkeztutako dokumentu teknikoetako batek ez dauka datu tekniko garrantzitsurik; industria-instalazioaren egikaritzearekin lotutako konponbideak nahasiak dira; edo horien idazkuntzatik arauzko ez-betetzeak edo zailtasun teknikoa ondoriozta daitezke egikaritzeari dagokionez. Irizpide hori kontuan hartuko da, bereziki, erabilera publikoko industria-instalazio bat denean edo lokal publiko batean kokatua dagoenean.

   4. Dokumentazio teknikoak, araubide tekniko aplikagarria bete gabe, neurri zuzentzaile bitxiak proposatzen ditu.

   5. Industria-instalazioa berritzailea da bere diseinu teknikoari dagokionez, eta konplexutasun tekniko handiagoa ekar dezake egikaritzean.

   6. Zirkunstantzia bereziak pilatzea, frogatzeko modukoak, instalazioen edo enpresa insta­latzailearen titularra tartean izanik.

Urtero, eskumeneko Zuzendaritzak egin beharreko auditoretza-programa espezifikoa ezarriko du, Euskal Autonomia Erkidegoko Industriako azaroaren 12ko 8/2004 Legearen 13.1 artikuluan bildutako irizpideak aplikatuz.

Programa hori lurralde-organo eskudunek gauzatuko dute.

Industria-administrazioaren aurreko esku-hartze eta kontroletan oinarrituta, industria admi­nistrazioaren Zerbitzu Teknikoek egiten dituzten ikuskatze-bisitei buruz, dagokion akta egingo da.

Aktetan, gutxienez, honako datu hauek jaso beharko dira:

1. Industria-instalazioaren pertsona titularraren edo, hala badagokio, erabiltzailearen iden­tifikazioa.

2. Industria-instalazioaren identifikazioa.

3. Eragile laguntzaileen identifikazioa, hala badagokio.

4. Egiaztatutako gertakarien deskribapena.

5. Ikuskapena ikusten dutenen identifikazioa eta nola jarduten duten.

6. Jarduneko ikuskatzaileak kautelazko neurriak ezartzen baditu, hartutako kautelazko neurria edo neurriak adieraziko ditu, baita horien arrazoi eta helburu zehatzak ere.

7. Pertsona interesdunek aurkezten dituzten alegazioak. Bisita egiten denean ez bada alegaziorik egiten, eta pertsona interesdunak hala eskatzen badu, administrazioak epe bat emango dio pertsona interesdunari, hain justu ere ikuskapenean egiaztatu eta aktan jasotako gertaerei dagokienez egoki irizten dien kontsideraziak aurkez ditzan.

1. Prozedura hori, indarreko legediaren arabera, aldez aurreko administrazio-baimenik behar ez duten industria-instalazioei aplikatuko zaie, eta industria-instalazio berriak nahiz jada existitzen direnen aldaketak, zabalkuntzak edo bajak hartuko ditu eraginpean.

2. Kapitulu honetan bildutako xedapenak mota guztietako industria-instalazioei aplikatuko zaizkie, alde batera utzita, araubide tekniko aplikagarriaren arabera, proiektu teknikoa edo beste edozein dokumentu tekniko aurkezteko eskatzen den ala ez.

3. Prozedura hori ez zaie aplikatuko honako hauei: abiaraztea izapidetzea energia hornitzen duen enpresaren edo enpresa banatzailearen aurrean egitea aurreikusten duen araudi espezifikoa duten industria-instalazioei.

1. Proiektua eskatzen duten industria-instalazioen kasuan, honako dokumentazio hau aurkeztu beharko da industria-arloko lurralde-organo eskudunean:

   1. Abiaraztearen jakinarazpena, dekretu honen eranskinean ezarritako ereduari jarraiki.

   2. Teknikari eskudunak sinatutako proiektua.

   3. Teknikari eskudun batek egindako egiaztagiria. Bertan, industria-instalazioa aurreko idatzi-zatian adierazten den dokumentaziora egokituta dagoela eta bidezkoak diren baldintza teknikoak eta araudiko preskripzioak betetzen direla adierazi beharko da.

   4. Araudi espezifiko aplikagarrian ezarritakoaren arabera, eska daitezkeen bestelako dokumentuak.

2. Proiekturik eskatzen ez duten industria-instalazioen kasuan, honako dokumentazio hau aurkeztu beharko da industria-arloko lurralde-organo eskudunean:

   1. Memoria edo dokumentazio teknikoa, araudi espezifikoan halakorik ezartzen denean.

   2. Enpresa instalatzaile gaituak emandako instalazio-egiaztagiria. Bertan, bidezkoak diren bal­dintza teknikoak eta araudiko preskripzioak betetzen direla adierazi beharko da.

   3. Araudi espezifiko aplikagarrian ezarritakoaren arabera, eska daitezkeen bestelako doku­mentuak.

   4. Igogailuen eta 13 m3-rainoko PGLko tangen instalaziorako, eranskinean jasotzen den abiarazte-jakinarazpena aurkeztu beharko da.

3. Araudiak ezartzen duen kasuetan, kontrol-erakunde baimendu batek emandako egiaztagiria aurkeztu beharko da.

4. Dekretu honen ondorioetarako, honako hau hartuko da funtsezko dokumentaziotzat: proiektu edo memoria teknikoa; obra-zuzendaritzaren egiaztagiria; instalazio-egiaztagiria; kontrol-erakundearen egiaztagiria edo txostena; eta, araudi espezifikoan funtsezkotzat jotzen diren gainerako dokumentuak.

5. Artikulu honetan adierazitako dokumentazio guztia paperean edo bitarteko telematikoen bidez aurkeztu ahal izango da, betiere bitarteko horiek ezarri badira.

1. Abiarazteko ezarritako dokumentazioa aurkeztu ondoren, kontrol formala egingo da, eta, hala badagokio, kontrol teknikoa, dekretu honen 6.1 artikuluan xedaturikoari jarraikiz.

2. Aurkeztu den dokumentazioa araubidez ezarritakoa ez bada, edo baldintza teknikoak biltzen ez baditu, pertsona interesdunari eskatuko zaio, hamar eguneko epean, dokumentazioa aurkeztu, osatu edo zuzentzeko.

   Lurralde-organo eskudunak, pertsona interesdunak eskatzen duenean, hasiera batean emandako epearen erdian luzatu ahal izango du epea eskatutakoa zuzentzeko.

3. Komunikazioa ez bada zuzentzen, errekerimenduan honako hau ohartaraziko zaio komu­nikatzaileari: atzera egin duela kontsideratuko dela.

1. Proiektudun industria-instalazioen kasuan, aurkeztutako «Abiarazte Jakinarazpenaren» dokumentua, Administrazioak bideratu ondoren, baliagarria izango da dekretu honen 3. artikuluan abiarazteko ezartzen diren administrazio-betebeharrak betetzen direla egiaztatzeko.

   Ondorio horietarako, proiekturik ez duten industria-instalazioen kasuan, aurkeztutako instalazio-egiaztagiria, Administrazioak bideratu ondoren, baliagarria izango da betekizun hori egiaztatzeko.

2. Izapidetze telematikoen kasuan, betetze-egiaztagiria aplikazio informatikotik bertatik lortu ahal izango da instalazio-ziurtagiria aurkeztu ondoren. Egiaztagiri horretan erregistro-zenbakia, aurkezpen-data eta industria-instalazioaren identifikaziorako datu garrantzitsuenak adieraziko dira.

3. Administrazioak egindako dokumentu horien sarrera-erregistroak ez du ekarriko instala­zioaren edo aurkeztutako dokumentazioaren egokitasunaren aldeko iritzia ematea.

1. Beren berezitasunagatik aldi baterakoak diren obrentzako edo ekitaldietarako hornidura elektrikoa lortzeko, araubidez ezarritako dokumentazioa aurkeztu beharko da enpresa banatzailean edo hornitzailean.

2. Aldi baterako hornidura elektrikoaren iraupenak ezin izango du gainditu dagokion administrazio-lizentzian edo baimenean obrarako edo ekitaldirako finkatutako iraupena, ezta horretarako emandako luzapenen iraupena ere.

1. Industria-instalazio lotuetan probak egiteko energia-hornidura lortzeko, energiako industria-instalazioa dagokion araudian ezartzen denera egokitzen dela egiaztatzen duen egiaztagiri teknikoa enpresa banatzailean edo hornitzailean aurkeztu beharko da. Egiaztagiri hori enpresa instalatzaileak edo eskumeneko teknikari tituludunak emango du, betiere araubidez gaituak badaude.

2. Probetarako behin-behineko hornidurak, proba horiek egiteko behar den denbora bakarrik iraun beharko du. Nolanahi ere, iraupena ezin izango da 30 egunetik gorakoa izan, enpresa banatzailearen edo hornitzailearen eta egikaritzean esku hartzen duten gainerako eragileen ardurapean. Epe hori amaitu ondoren, hornidura eten egingo da. Industria-arloko organo eskudunak iraupen bereko luzapen bat eman ahal izango du, interesdunak behar bezala arrazoitutako aparteko kasuetarako.

Industria-instalazioaren pertsona titularrak, behin betiko energia-hornidura lortu ahal izateko, enpresa banatzailean edo hornitzailean instalazio-ziurtagiria aurkeztu beharko du, eta, egoki bada, zerbitzua abiarazteko jakinarazpen-agiria, eskudun organoak izapidetua.