Euskal Herriko Agintaritzaren Aldizkaria

215. zk., 2024ko azaroaren 5a, asteartea

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

GOBERNANTZA, ADMINISTRAZIO DIGITAL ETA AUTOGOBERNU SAILA

5037

EBAZPENA, 2024ko urriaren 30ekoa, Autogobernu zuzendari eta Estatuko Administrazioaren eta Euskal Autonomia Erkidegoko Administrazioaren arteko Aldebiko Lankidetza Batzordeko idazkariarena, zeinaren bidez xedatzen baita argitara ematea Estatuko Administrazioaren eta Euskal Autonomia Erkidegoko Administrazioaren arteko Aldebiko Lankidetza Batzordearen 2024ko urriaren 28ko Akordioa, funtzionamenduari buruzko barne-erregelamendua onartzen duena.

EBAZTEN DUT:

Artikulu bakarra.– Euskal Herriko Agintaritzaren Aldizkarian argitaratzea Estatuko Administrazioaren eta Euskal Autonomia Erkidegoko Administrazioaren arteko Aldebiko Lankidetza Batzordearen akordioa, funtzionamenduari buruzko barne-erregelamendua onartzen duena.

Vitoria-Gasteiz, 2024ko urriaren 30a.

Autogobernu zuzendaria,

BEGOÑA PÉREZ DE EULATE GONZÁLEZ.

ESTATUKO ADMINISTRAZIOAREN ETA EUSKAL AUTONOMIA ERKIDEGOKO ADMINISTRAZIOAREN ARTEKO ALDEBIKO LANKIDETZA BATZORDEAREN AKORDIOA, ZEINAREN BIDEZ ONARTZEN BAITA ESTATUKO ADMINISTRAZIOAREN ETA EUSKAL AUTONOMIA ERKIDEGOKO ADMINISTRAZIOAREN ARTEKO ALDEBIKO LANKIDETZA BATZORDEAREN FUNTZIONAMENDUARI BURUZKO BARNE-ERREGELAMENDUA

1.– Sektore Publikoaren Araubide Juridikoaren urriaren 1eko 40/2015 Legearen 153. artikuluak xedatzen duenez, aldebiko lankidetza-batzordeak alde bik osatutako lankidetza-organoak dira, Estatuaren Administrazio Orokorra ordezkatzen duten Gobernuko kideak eta autonomia-erkidegoko gobernu-kontseiluko kideak edo Ceuta hiriko edo Melilla hiriko ordezkariak hainbana biltzen dituztenak. Aldebiko lankidetza-batzordeek aholkua emateko eta akordioak egiteko eginkizunak betetzen dituzte, baldin eta akordio horien xedea administrazioen arteko koordinazioa hobetzea bada, bereziki autonomia-erkidegoari, Ceuta hiriari edo Melilla hiriari eragiten dieten gaietan.

2.– Estatuko Administrazioaren eta Euskal Autonomia Erkidegoko Administrazioaren arteko Aldebiko Lankidetza Batzordea 1987ko ekainaren 29an sortu zen, Madrilen egindako akordio batean. Bertan onetsi ziren funtzionamenduari buruzko arauak.

3.– Urriaren 1eko 40/2015 Legeak emandako arau-esparru berria eta bere funtzionamendu-esperientzia ikusita, Estatuko Administrazioaren eta Euskal Autonomia Erkidegoko Administrazioaren arteko Aldebiko Lankidetza Batzordeak, bi administrazioen arteko lankidetza-organoa den aldetik, Estatuko Administrazioaren eta Euskal Autonomia Erkidegoko Administrazioaren arteko Aldebiko Lankidetza Batzordearen Funtzionamendurako Barne Erregelamendua onartu zuen 2024ko urriaren 28ko bileran. Akordio honi erantsi zaio aipatutako erregelamendua.

Estatuak Aldebiko Lankidetza Batzordean duen idazkaria,

JORGE GARCÍA CARREÑO.

Euskal Autonomia Erkidegoak Aldebiko Lankidetza Batzordean duen idazkaria,

BEGOÑA PÉREZ DE EULATE GONZÁLEZ.

O.E.

Estatuak Aldebiko Lankidetza Batzordean duen ordezkaritzako lehendakaria,

ARCADI ESPAÑA GARCÍA.

O.E.

Euskal Autonomia Erkidegoak Aldebiko Lankidetza Batzordean duen ordezkaritzako lehendakaria,

MARÍA UBARRETXENA CID.

ERANSKINA

ESTATUKO ADMINISTRAZIOAREN ETA EUSKAL AUTONOMIA ERKIDEGOKO ADMINISTRAZIOAREN ARTEKO ALDEBIKO LANKIDETZA BATZORDEAREN FUNTZIONAMENDUARI BURUZKO BARNE ERREGELAMENDUA

1. artikulua.– Izaera.

Estatuko Administrazioaren eta Euskal Autonomia Erkidegoko Administrazioaren arteko Aldebiko Lankidetza Batzordea kontsulta- eta akordio-eginkizunak betetzen dituen lankidetza-organoa da, eta Autonomia Erkidegoari bereziki eragiten dioten gaietan administrazioen arteko koordinazioa hobetzea du helburu.

2. artikulua.– Araubide juridikoa.

1.– Aldebiko Lankidetza Batzordea erregelamendu honetako xedapenek arautzen dute.

2.– Aldebiko Lankidetza Batzordeak erregelamendua aldatu ahal izango du, bi aldeen arteko adostasunez.

3. artikulua.– Osaera eta bileretan parte hartzea.

1.– Aldebiko Lankidetza Batzordea alderdi bakoitzeko lau kidek eta ordezkaritza bakoitzeko lehendakaritzak osatuko dute. Alde biko Lankidetza Batzordeak ondorio horietarako erabakitzen duena baztertu gabe, Estatuko Administrazio Orokorraren ordezkaritzaren lehendakaritza Lurralde Politikako eta Memoria Demokratikoko Ministerioaren titularrari egokituko zaio, eta Euskal Autonomia Erkidegoko Administrazioaren ordezkaritzaren lehendakaritza Gobernantza, Administrazio Digital eta Autogobernuko Sailaren titularrari. Bi administrazioek maila bereko edo beheragoko hurrengo mailako beste pertsona bati eskuordetu ahal izango diote beren ordezkaritzako lehendakaritza.

2.– Batzordea osatzen duten alderdietako bakoitzari dagokio ordezkaritza hori zein agintari edo karguri dagokion izendatzea, bai eta, hala badagokio, eskuordetzeen edo ordezkapenen araubidea ezartzea ere. Organo bakoitzaren barruan beheragoko hurrengo mailako agintari bati esleituko zaio ordezkariak batzordean ordezteko eginkizuna.

3.– Ordezkaritza bakoitzeko lehendakariak beste sektore-sail batzuetako karguak deitu ahal izango ditu Aldebiko Lankidetza Batzordearen bileretara, aztertu beharreko gaien izaerak eta edukiak haien presentzia justifikatzen edo aholkatzen dutenean, eta horren berri emango dio beste ordezkaritzari.

4.– Aldebiko Lankidetza Batzordearen osaeran gerora egiten den aldaketa oro beste ordezkaritzari jakinaraziko zaio, Idazkaritza Iraunkorraren bidez.

4. artikulua.– Lehendakaritza.

1.– Aldebiko Lankidetza Batzordearen Lehendakaritza Aldebiko Lankidetza Batzordea osatzen duten ordezkaritzetako bakoitzeko lehendakariek beteko dute, txandaka eta urtebeteko aldietan, urte naturalarekin bat etorriz.

2.– Aldebiko Lankidetza Batzordearen lehendakariak eginkizun hauek izango ditu:

a) Batzordearen bileretarako deia egitea eta gai-zerrenda ezartzea, beste ordezkaritzaren adostasunarekin.

b) Batzordearen bilkuretan buru izatea eta haren gogoetak eta eztabaidak gidatzea.

c) Aldebiko Lankidetza Batzordeak agintzen dion beste edozein eginkizun betetzea.

5. artikulua.– Idazkaritza Iraunkorra.

1.– Aldebiko Lankidetza Batzordearen Idazkaritza Iraunkorra elkarrekin beteko dute izendatzen diren pertsonek, batek Estatuko Gobernuaren ordezkari gisa eta besteak Eusko Jaurlaritzaren ordezkari gisa.

2.– Idazkaritza Iraunkorreko pertsona bakoitza dagokion Administrazioak ezarritako barne-prozeduraren bidez izendatuko da, eta, aldi berean, bere ordezkaritzaren idazkaritza-eginkizunak beteko ditu. Halaber, lehendakaritzak laguntza emango du dagozkion barne-koordinazioko jardueretan.

3.– Ordezkaritza bakoitzak besteari jakinaraziko dio zein izango den ordezkaritzako idazkaria, zeina Idazkaritza Iraunkorreko kide ere izango baita.

4.– Idazkaritza Iraunkorrak honako eginkizun hauek ditu:

a) Aldebiko Lankidetza Batzordearen bilerak prestatzea.

b) Bilera bakoitzaren akta egitea.

c) Aldebiko Lankidetza Batzordeak lortutako akordioen ziurtagiriak ematea.

d) Gaiak tratatzeko beharrezkoa den dokumentazioa prestatu, bildu eta banatzea.

e) Aldebiko Lankidetza Batzordearen helburuarekin eta edukiarekin zerikusia duten administrazio-jarduerei buruzko informazioa trukatzea.

f) Aldebiko Lankidetza Batzordearen laguntza-organoen jardueren jarraipena egitea, eta jarduera horien berri ematea batzorde horri.

6. artikulua.– Funtzionamendu-araubidea eta gai-zerrenda ezartzea.

1.– Aldebiko Lankidetza Batzordea urtean bitan bilduko da, eta alderdietako batek eskatzen duenean.

2.– Bilerak modu presentzialean egin daitezke, Madrilen edo Autonomia Erkidegoaren lurraldean, Lehendakaritzak erabakitzen duenaren arabera, edo bideokonferentzia bidez.

3.– Aldebiko Lankidetza Batzordearen bileretarako deialdia lehendakariak egingo du, gutxienez hirurogeita hamabi ordu lehenago, bi ordezkaritzek adierazitako premiazko kasuetan izan ezik, eta, nolanahi ere, gai-zerrendarekin eta beharrezkotzat jotzen diren agiriekin batera helaraziko da.

4.– Bilera bakoitzeko gai-zerrenda beste ordezkaritzako lehendakariaren adostasunarekin ezarriko da.

5.– Aldebiko Lankidetza Batzordea osatzen duten kideek aho batez onartu ahal izango dituzte gai-zerrendan ageri ez diren gaiak, eztabaidatzeko eta, hala badagokio, egokitzat jotzen diren erabakiak hartzeko, bi ordezkaritzek gai horiek presakoak direla adierazi ondoren.

7. artikulua.– Eginkizunak.

1.– Estatuak eta Euskal Autonomia Erkidegoak dagozkien lankidetza- eta kooperazio-harremanak ezarriko dituzte Aldebiko Lankidetza Batzordearen bidez, sektore publikoaren araubide juridikoari buruzko arauetan ezarritako administrazioen arteko harremanen printzipio orokorrei jarraikiz.

2.– Horretarako, Aldebiko Lankidetza Batzordeak aholkua emateko eta akordioak egiteko eginkizunak beteko ditu, baldin eta akordio horien xedea administrazioen arteko koordinazioa hobetzea bada, bereziki Euskal Autonomia Erkidegoari eragiten dioten gaietan; hauetan bereziki:

a) Bi alderdien artean sortzen den edozein eztabaida, eta, hala badagokio, eztabaida horiek ebazteko proposatzen diren neurriak, baita, behar denean, Autonomia Estatutua aplikatzeko eta interpretatzeko proposatzen direnak ere, Konstituzio Auzitegiaren eta justizia-auzitegien jurisdikzioa errespetatuz.

b) Euskal Autonomia Erkidegoari eginkizunak eta zerbitzuak eskualdatzeko aukera aztertzea eta bultzatzea, eta beste eskualdatze batzuk negoziatzeko lehentasuna eta egutegia ezartzea.

c) Europako politikaren jarraipena, Euskal Autonomia Erkidegoak Europar Batasunaren gaietan parte hartzen duela ziurtatzeko, batez ere Europar Batasunaren politika komunen eta autonomia-erkidegoko ekonomia- eta zerga-araubideari zuzenean eragiten dioten arauen diseinuaz eta aplikazioaz Estatuak hartzen duen jarrera finkatzeko prozesuan.

d) Bakoitzak bere eskumenak erabiltzean, parte hartzea, informatzea, lankidetzan aritzea eta koordinatzea.

3.– Aurreko apartatuan ezarritako esparruan, Aldebiko Lankidetza Batzordeak honako hauek egin ditzake:

a) Sektore-eremuetan politika komunak garatzeko plan, programa eta jarduera bateratuak bultzatzea eta zehaztea, aldebiko ikuspegitik.

b) Lankidetza-hitzarmenak egin daitezen bultzatzea, plan edo programa bateratu bat alde bien artean zehaztea beharrezkoa den eremu materialetan.

c) Elkarri laguntzeko mekanismoak diseinatzea, bi administrazioen jarduerak bat egin dezakeen arloetan.

d) Prebentziozko jarduketak bideratzea, bi administrazioen artean gatazkarik sor ez dadin.

e) Beren eskumeneko gaietan bi administrazioei interesatzen zaizkien gaiak konpontzeko proposamenak egitea.

f) Lege maila duten arauak aztertzea, estatukoak zein autonomia-erkidegoetakoak, baldin eta konstituziokontrakotasun-errekurtso bat planteatzea ekar dezaketen gaiak sortzen badira, hura aurkeztea saihestuko duen akordio batera iristeko, Konstituzio Auzitegiari buruzko urriaren 3ko 2/1979 Lege Organikoaren 33. artikuluan ezarritakoaren esparruan.

g) Bi alderdiei eragiten dien edozein gai aztertzea, eskumen-gatazkak saihesteko edo auzibidetik kanpo ebazteko direnak bereziki.

h) Autonomia Erkidegoari eginkizunak eta zerbitzuak eskualdatzeko prozesuak bultzatzea.

4.– Adierazitako eginkizunak betetzearen ondorioz lortutako akordioek ez dute inola ere ekarriko aldeen berezko eskumenak erabiltzeari uko egitea.

8. artikulua.– Akordioak hartzeko araubidea.

1.– Aldebiko Lankidetza Batzordeak bi ordezkaritzen adostasunarekin hartuko ditu erabakiak eta akordioak.

2.– Akordioak bi ordezkaritzetako idazkari iraunkorren eta lehendakarien sinaduraren bidez formalizatuko dira; hori Aldebiko Lankidetza Batzordearen bileran bertan edo geroago egin ahal izango da.

3.– Bi ordezkaritzek egokitzat jotzen badute, haien edukia eta ondorioak aztertu ondoren, akordioak Estatuko Aldizkari Ofizialean eta Euskal Herriko Agintaritzaren Aldizkarian argitaratu ahal izango dira.

9. artikulua.– Aktak.

1.– Idazkaritza Iraunkorrak Aldebiko Lankidetza Batzordearen bilkura bakoitzaren akta adostua egingo du, eta bi ordezkaritzen lehendakaritzek ikus-onetsiko dute.

2.– Aktak honako hauek jasoko ditu:

a) Nor bertaratu diren.

b) Bilkuraren gai-zerrenda.

c) Bilkuraren tokiari eta denborari buruzko inguruabarrak.

d) Aztergai nagusiak.

e) Lortutako akordioen edukia, hala badagokio, eta Aldebiko Lankidetza Batzordeak ateratako ondorioak.

3.– Akten bi ale egingo dira.

10. artikulua.– Aldebiko Lankidetza Batzordearen lantaldeak eta azpibatzordeak.

1.– Bere eskumeneko gaiak modu espezializatuan aztertzeko, Aldebiko Lankidetza Batzordeak aldi baterako laguntza-organoak sortu ahal izango ditu, hala nola lantaldeak eta azpibatzorde iraunkorrak. Horretarako, Aldebiko Batzordeak organo horien lana antolatuko du, eta haiek egindako lan eta jarduerez arduratuko da bilera bakoitzean.

2.– Aldebiko Lankidetza Batzordeak berariaz esleitutako eginkizunekin bat etorriz, lantaldeek eta azpibatzordeek dagozkien erabakiak hartu ahal izango dituzte, eta horien berri emango zaio Aldebiko Lankidetza Batzordeari, hurrengo bileran.

11. artikulua.– Aldebiko Lankidetza Batzordearen osaera eta funtzionamendua, urriaren 3ko 2/1979 Lege Organikoaren 33. artikuluan aurreikusitako kasuan.

Urtarrilaren 3ko 2/1979 Lege Organikoaren 33. artikuluan jasotako kasuan, Aldebiko Lankidetza Batzordeak prozedura eta lan-metodo hauen arabera jardungo du:

a) Gobernuetako batek uste badu arrazoi oinarridunak daudela legeen, xedapenen edo lege-indarreko egintzen aurka konstituzio-kontrakotasuneko errekurtso bat jartzeko, Aldebiko Lankidetza Batzordearen bilerarako deia egin dezake, negoziazioak hasteko dagokion akordioa hartzeko, araua argitaratu eta hiru hilabete igaro baino lehen, Aldebiko Lankidetza Batzordeak urtarrilaren 3ko 2/1979 Lege Organikoaren 33. artikuluan aurreikusitakoa aplikatzea erabaki dezan.

b) Aldebiko Lankidetza Batzordean desadostasunak konpontzeko negoziazioak hastea erabaki ahal izango da. Kasu horretan, Estatuaren lurralde-antolaketaren eta autonomia-erkidegoekiko harremanen arloko ministerio eskudunaren titularrak akordioaren berri emango dio Konstituzio Auzitegiko lehendakariari, hiru hilabeteko epean, Aldebiko Lankidetza Batzordeari helarazitako legea argitaratzen denetik hasita, konstituzio-kontrakotasuneko errekurtsoa jartzeko epea luzatzeko, urtarrilaren 3ko 2/1979 Lege Organikoan aurreikusitako baldintzetan. Halaber, dagokion aldizkari ofizialean argitaratzea xedatuko da.

c) Aldebiko Lankidetza Batzordeak lantalde bat sortu ahal izango du desadostasunak aztertzeko, urtarrilaren 3ko 2/1979 Lege Organikoaren 33. artikuluan aurreikusitako konstituziokontrakotasun-errekurtsoa saiheste aldera.

d) Lantaldeak desadostasunak konpontzeko proposamen bat egiten duenean, Aldebiko Lankidetza Batzordeari helaraziko dio, hala badagokio, dagokion erabakia har dezan. Berdin jokatuko da lantaldeak egiaztatzen badu ezinezkoa dela proposamen bateratu bat adostea.

e) Aldebiko Lankidetza Batzordearen akordioa Estatuko Aldizkari Ofizialean eta Euskal Herriko Agintaritzaren Aldizkarian argitaratuko da.

12. artikulua.– Antolaketaren eta jardueraren gardentasuna.

Erregelamendu honetan aurreikusitakoren arabera akordioak Estatuko Aldizkari Ofizialean eta Euskal Herriko Agintaritzaren Aldizkarian argitaratzea eskatzen duten kasuak alde batera utzi gabe, bi aldeek argitara emango dituzte Aldebiko Lankidetza Batzordearen antolaketa eta jarduera, bakoitzak bere gardentasun-arauak betez.

13. artikulua.– Urteko memoria.

Urtero, Aldebiko Lankidetza Batzordeak bere jardueraren eta egindako lanaren memoria egingo du.

AZKEN XEDAPENAK

Lehenengoa.– Ondoriorik gabe uzten dira Estatuko Administrazioak eta Euskal Autonomia Erkidegoak osatutako Aldebiko Lankidetza Batzordearen funtzionamendu-arauak, batzorde horren 1987ko ekainaren 29ko akordioaren bidez onartutakoak.

Bigarrena.– Funtzionamenduari buruzko Barne Erregelamendu hau Estatuko Aldizkari Ofizialean argitaratzen den egunean jarriko da indarrean. Euskal Herriko Agintaritzaren Aldizkarian ere argitaratuko da.

Azterketa dokumentala