Euskal Herriko Agintaritzaren Aldizkaria

190. zk., 2024ko irailaren 30a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

XEDAPEN OROKORRAK

OSASUN SAILA

4476

AGINDUA, 2024ko irailaren 10ekoa, Osasuneko sailburuarena, zeinaren bidez garatzen baita martxoaren 6ko 34/2012 Dekretua, Euskal Autonomia Erkidegoan osasun-prestakuntza espezializatuaren sistema antolatzekoa, tutore nagusiak akreditatzeko prozeduraren deialdiari eta eskaerei buruzkoa.

Azaroaren 21eko 44/2003 Legeak, Lanbide Sanitarioen Antolamenduari buruzkoak, aldaketa garrantzitsuak sartu zituen osasun-zientzietako prestakuntza espezializatuaren arloan, eta otsailaren 8ko 183/2008 Errege Dekretuaren bidez garatu zen (183/2008 Errege Dekretua, Osasun Zientzietako espezialitateak zehaztu eta sailkatzen dituena eta osasun-prestakuntza espezializatuaren alderdi jakin batzuk garatzen dituena), arlo horretako esparru orokor bat osatuz.

Otsailaren 8ko 183/2008 Errege Dekretuak, osasun-zientzietako espezialitateak zehaztu eta sailkatzen dituenak eta osasun-prestakuntza espezializatuaren sistemaren alderdi jakin batzuk garatzen dituenak, 12.2 artikuluan adierazten duenez, autonomia-erkidegoek, tutoreen gaitasunak egokiak direla eta gaitasun horiei eutsiko zaiela bermatzeko, gaitasun horiek egiaztatzeko eta berriz egiaztatzeko ebaluazio-prozedurak arautuko dituzte aldizka, azaroaren 21eko 44/2003 Legeak, Osasun Lanbideen Antolamenduari buruzkoak, 10.1 eta 10.3 artikuluetan xedatutakoari jarraikiz; horretarako, kontuan hartuko dira, besteak beste, espezialista gisa etengabeko lan-esperientzia, irakaskuntza-esperientzia, etengabeko prestakuntzako jarduerak, ikerketa- eta kalitate-hobekuntzako jarduerak, irakaskuntza-metodologietako prestakuntza espezifikoa eta lortutako gogobetetasun-mailari buruzko inkestak.

Euskal Autonomia Erkidegoaren eremuan, martxoaren 6ko 34/2012 Dekretuak, Euskal Autonomia Erkidegoan osasun-prestakuntza espezializatuaren sistema antolatzekoak, kide bakarreko irakaskuntza-organoak eratzen ditu, eta 21. eta 25. artikuluetan ezartzen ditu, hurrenez hurren, tutoretza-jardueran aritzeko egiaztapen- eta berrakreditazio-prozedurak.

Dekretu horrek, besteak beste, prestakuntza espezializatuko tutore gisa akreditatzeko eta berrakreditatzeko prozedurak arautzen ditu. Hala ere, denborak aurrera egin ahala, aipatutako prozedurak egokitu egin behar dira arauen behar eta berritasun berrietara, hala nola akreditazio-aldia etengabe irekitzea, baliabideen araubidea ezartzea eta Irakaskuntza eta Lanbide Garapeneko Zerbitzuaren lana indartzea. Zerbitzu horrek akreditazioa laster iraungiko dela jakinarazi beharko die dagoeneko akreditatuta dauden pertsonei, tutore horiek berrakreditatzeko epea bete ez dezaten saihesteko.

Horretarako, Jaurlaritzari buruzko ekainaren 30eko 7/1981 Legearen 26. eta 28. artikuluetan ezarritako eskumenen arabera, honako hau

XEDATZEN DUT:

1. artikulua.– Xedea.

Agindu honen xedea da martxoaren 6ko 34/2012 Dekretuak, Euskal Autonomia Erkidegoan osasun-prestakuntza espezializatuaren sistema antolatzekoak, araututako zenbait alderdi garatzea, tutore nagusiak akreditatzeko eta berrakreditatzeko prozeduraren deialdiari eta eskaerei dagokienez.

2. artikulua.– Aplikazio-eremua.

Prestakuntza sanitario espezializatuko tutoreak akreditatzeko eta berrakreditatzeko prozedurak Euskal Autonomia Erkidegoko irakaskuntza-batzordea duten irakaskuntza-zentro edo -unitate egiaztatuetan zerbitzuak ematen dituzten osasun-profesionalei aplikatuko zaie, baldin eta martxoaren 6ko 34/2012 Dekretuan ezarritako baldintzak betetzen badituzte (34/2012 Dekretua, Euskal Autonomia Erkidegoan osasun-prestakuntza espezializatuaren sistema antolatzekoa).

3. artikulua.– Eskatzaileek bete beharreko baldintzak.

1.– Euskal Autonomia Erkidegoan osasun-prestakuntza espezializatuko sistema antolatzeko martxoaren 6ko 34/2012 Dekretuaren 21.2 artikuluan ezarritako baldintzak betetzen dituzten pertsonek parte hartu ahal izango dute osasun-prestakuntza espezializatuko tutore nagusiak akreditatzeko prozeduran.

Familia- eta komunitate-erizaintzaren espezialitatearen kasuan, eta maiatzaren 9ko PRE/861/2013 Aginduan ezarritakoaren arabera (agindu horren bidez, familia- eta komunitate-erizaintzako eta familia- eta komunitate-medikuntzako espezialistak prestatzeko irakaskuntza-unitate multiprofesionalak akreditatzeko betekizunak ezartzen dira), honako baldintza hauek bete behar dira tutoreak izendatzeko:

a) Zerbitzu aktiboan egotea, Familia eta Komunitateko Erizaintzaren lanbide-eremuan azken 5 urteotan esperientzia egiaztatua eta jarraitua izanik.

b) Azken 5 urteotan, Familia eta Komunitateko Erizaintzako berariazko ikerketa edo komunikazio zientifikoko proiektu batean parte hartu izana.

2.– Osasun-prestakuntza espezializatuko tutore nagusiak berrakreditatzeko prozeduran parte hartu ahal izango dute osasun-prestakuntza espezializatuko tutoretza nagusiaren eginkizunak betetzeko akreditatuta eta izendatuta dauden pertsonek, martxoaren 6ko 34/2012 Dekretuan xedatutakoaren arabera (Euskal Autonomia Erkidegoko osasun-prestakuntza espezializatuaren sistemaren antolamenduari buruzkoa), baldin eta emandako azken akreditazioa indarrean dagoen bitartean egoiliarrei tutoretza eman badiete, tutoretza nagusiaren eginkizunak betetzen jarraitu nahi badute eta akreditatzeko eskatzen diren betekizun guzti-guztiak betetzen badituzte, behin dagokion akreditazio-ebazpenean adierazitako indarraldia amaituta.

4. artikulua.– Eskabideak aurkezteko epea eta modua.

1.– Eskabideak aurkezteko beti egongo da irekita.

2.– Osasun-prestakuntza espezializatuko tutoretza nagusiko eginkizunak egiteko akreditazio-eskaera bitarteko elektronikoen bidez egingo da, Eusko Jaurlaritzaren egoitza elektronikoan eskuragarri dagoen formulario normalizatuaren bidez (https://www.euskadi.eus/servicios/1055718), Administrazio Publikoen Administrazio Prozedura Erkidearen urriaren 1eko 39/2015 Legearen 14. artikuluan eta Herritarrei arreta osoa eta kanal anitzekoa emateko eta zerbitzu publikoak bitarteko elektronikoen bidez eskuratzeko ekainaren 20ko 91/2023 Dekretuaren 16. artikuluan (II. kapitulua) ezarritakoaren arabera.

3.– Osasun-prestakuntza espezializatuko tutoretza nagusiko eginkizunak betetzen jarraitzeko berrakreditazio-eskaera bitarteko elektronikoen bidez egingo da, Eusko Jaurlaritzaren egoitza elektronikoan eskuragarri dagoen formulario normalizatuaren bidez (https://www.euskadi.eus/servicios/1055719), Administrazio Publikoen Administrazio Prozedura Erkidearen urriaren 1eko 39/2015 Legearen 14. artikuluan eta Herritarrentzako arreta integral eta multikanalari eta zerbitzu publikoetarako irispideari buruzko ekainaren 20ko 91/2023 Dekretuaren 16. artikuluan (II. kapitulua) ezarritakoaren arabera.

4.– Eredu normalizatu guztiak, prozedura bakoitzaren informazio-fitxa eta prozedurarako sarbidea egoitza elektronikoan argitaratuko dira, helbide honetan: https://www.euskadi.eus/servicios/

Akreditazio- eta berrakreditazio-eskaerak eta haiekin batera doazen dokumentuak EAEko edozein hizkuntza ofizialetan aurkeztu ahal izango dira. Era berean, espedientea eskatzaileak hautatutako EAEko hizkuntza ofizialean izapidetuko da.

1) Akreditazio-eskaerekin batera, 34/2012 Dekretuaren 21.3 artikuluan adierazitako dokumentuak aurkeztuko dira. Zehazki:

a) Tutoretza-helburuen proiektuaren dokumentuak honako atal hauek izango ditu:

– Espezialitatearen prestakuntza-ibilbidea.

– Banakako prestakuntza-plana egiteko kontuan hartu beharreko alderdiak.

– Prestakuntza-ebaluazioa.

– Urteko eta amaierako ebaluazioa.

b) Familia- eta komunitate-erizaintzako espezialitateko tutore nagusi gisa egiaztatu nahi duten pertsonentzat: azken 5 urteetan familia- eta komunitate-erizaintzako berariazko ikerketa-proiektu edo komunikazio zientifiko batean parte hartu izana justifikatzen duen dokumentazioa (proiektuaren ikertzaile nagusiak emandako ziurtagiria edo komunikazio zientifikoaren kopia).

2) Berrakreditazio-eskaerekin batera, 34/2012 Dekretuaren 25.2 artikuluan adierazitako dokumentuak aurkeztu beharko dira.

Egindako tutoretza-jardueren memoria gidan adierazitako jarraibideen arabera egingo da, eta Osasun Sailaren webgunean egongo da eskuragarri.

5.– Eskaerak zuzentzea.

Eskaerak ez badira osorik betetzen, edo haiekin batera ez bada adierazitako dokumentazio guztia aurkezten, eskatzaileari hamar egun balioduneko epea emango zaio akatsa zuzentzeko edo aurkeztu ez dituen nahitaezko agiriak eramateko. Era berean, jakinarazi egingo zaio, hala egiten ez badu, eskaeran atzera egin duela ulertuko dela.

Errekerimendu hori «Nire karpeta» atalaren bidez egingo da. Hau da, Euskal Autonomia Erkidegoko Administrazio Publikoaren egoitza elektronikoko «Nire karpeta» atalaren bidez (https://www.euskadi.eus/nire-karpeta/web01-sede/eu/) sartuko dira espedientera eta eskaeraren ondorengo izapideetara, bide elektronikotik, prozeduraren izapideetan emandako egintza guztien jakinarazpenak barne.

6.– Atzera egitea.

Interesdunek bide elektronikoz egin dezakete atzera beren eskaeran, Euskal Autonomia Erkidegoko Administrazio Publikoaren egoitza elektronikoko «Nire karpeta» atalaren bidez: https://www.euskadi.eus/nire-karpeta/web01-sede/eu/

5. artikulua.– Ebazpena.

Plangintza, Antolamendu eta Ebaluazio Sanitarioko Zuzendaritzak berariazko ebazpen arrazoitua emango du eskatutako akreditazioa edo berrakreditazioa onartzeko edo ukatzeko, 3 hilabeteko epean, eskaera aurkezten den egunetik zenbatzen hasita. Epe horren zenbaketa eten egingo da interesdunek eskabideak zuzentzeko eta hobetzeko eskatzen den epean.

Nolanahi ere, adierazitako epea igaro eta ebazpenik eman ez bada, akreditazio- edo berrakreditazio-eskaera ukatutzat jo beharko da.

Plangintza, Antolamendu eta Ebaluazio Sanitarioko Zuzendaritzaren ebazpenaren aurka, interesdunek gora jotzeko errekurtsoa aurkeztu ahal izango diote Osasun Sailburuordetzako titularrari, hilabeteko epean, ebazpena jakinarazi eta hurrengo egunetik aurrera, Administrazio Publikoen Administrazio Prozedura Erkidearen urriaren 1eko 39/2015 Legearen 121. artikuluarekin eta hurrengoekin bat etorriz, edo eskaera ezetsitzat jotzen den egunetik aurrera, administrazio-isiltasun negatiboaren figurak eragina izan duelako.

Ezin izango dira tutoretza nagusiko eginkizunak bete dagokion akreditazio- edo berrakreditazio-ebazpenik gabe, eta prestakuntzan dagoen egoiliarraren prestakuntza baliogabetu ahal izango da.

6. artikulua.– Akreditazioaren eta berrakreditazioaren ondorioak eta indarraldia.

1.– Akreditazioa edo berrakreditazioa emateko ebazpenak berekin dakar interesdunak beharrezko gaikuntza lortzea izendatua izateko eta osasun-zientzietan espezializatutako osasun-prestakuntzako tutoretza nagusiaren eginkizunak betetzeko.

2.– Akreditazioa eta berrakreditazioa jarduera asistentziala garatzen den irakaskuntza-dispositiboan tutoretza-funtzioak betetzeko ematen dira.

3.– Tutorea bera izango da prestakuntza-aldi osoan, arrazoi justifikaturik edo espezialisten prestakuntzan tronkalekotasun-irizpideak sartzearen ondoriozko egoera espezifikorik ez badago, eta gehienez ere bost egoiliar izango ditu esleituta.

4.– Tutoretza nagusiko eginkizunak betetzen dituen profesional espezialista irakaskuntza-unitate bereko beste irakaskuntza-dispositibo egiaztatu batera lekualdatu bada eta dispositibo berrian eginkizun horiek egiten jarraitu nahi badu, idazki bat bidali beharko dio Plangintza, Antolamendu eta Ebaluazio Sanitarioko zuzendariari, irakaskuntza-unitatearen erakunde titularraren ikasketa-burutzaren eta zuzendaritza-organoaren oniritziarekin, akreditazioaren irakaskuntza-dispositiboa alda dezan.

5.– Tutoretza nagusiko eginkizunak betetzen dituen profesional espezialista egiaztatutako beste irakaskuntza-zentro edo -unitate batera lekualdatu bada eta irakaskuntza-zentro edo -unitate berrian eginkizun horiek betetzen jarraitu nahi badu, idazki bat bidali beharko dio Plangintza, Antolamendu eta Ebaluazio Sanitarioko zuzendariari, bi ikasketa-buruen eta inplikatutako bi zuzendaritza-organoen oniritziarekin, datu horiek dagokion egiaztapenean alda daitezen.

7. artikulua.– Akreditazioa iraungitzea.

Egiaztapena arrazoi hauengatik iraungiko da:

– Arau-hauste larri edo oso larriengatik profesionala zigortzen duen diziplina-erantzukizuneko espediente baten ebazpen irmoa eman delako administrazio-bidean.

– Akreditatutako profesionalak berariaz uko egiteagatik.

– Egiaztapenaren indarraldia amaitzeagatik. Akreditazioaren epea amaitzen bada, baina profesional espezialista berrakreditazio-prozedura batean sartuta badago, ulertuko da gaikuntza hori luzatu egingo dela prozedura ebatzi arte.

8. artikulua.– Berrakreditazio-prozeduraren espezialitatea.

Berrakreditatu nahi duten tutoreei erraztasunak emateko, Plangintza, Antolamendu eta Ebaluazio Sanitarioko Zuzendaritzako Irakaskuntza eta Garapen Profesionaleko Zerbitzuak akreditazioa laster iraungiko dela jakinaraziko die tutoreei, gutxienez sei hilabete lehenago. Horrela, berrakreditazioa lortu nahi duten tutoreek berrakreditazio-eskaera egin eta hurrengo egunetik aurrera egin ahal izango dute, egoitza elektronikoan eskuragarri dagoen formulario normalizatuaren arabera, 34/2012 Dekretuaren 25.2 artikuluan adierazitako dokumentazioarekin batera. Eskabideak aurkezteko epea dagokion akreditazioaren muga-egunaren aurreko hilaren egun berean amaituko da.

Akreditazioaren indarraldia amaitzen bada berrakreditazio-eskaera egin gabe, interesdunak beste akreditazio bat eskatu beharko du.

9. artikulua.– Tutoretza nagusiaren jarduera aitortzea.

Akreditatutako tutoretza nagusiaren jarduera martxoaren 6ko 34/2012 Dekretuaren (Euskal Autonomia Erkidegoan osasun-prestakuntza espezializatuaren sistema antolatzekoa) 24. artikuluan eta Osakidetza-Euskal osasun zerbitzuko zuzendari nagusiaren 19/2020 Jarraibidean (osasun-prestakuntza espezializatuan esku hartzen duten figurei eta egindako lanaren ziurtagiriari buruzkoa) xedatutakoaren arabera aitortu eta sustatuko da.

10. artikulua.– Datu pertsonalak babesteari buruzko informazio-klausula.

Jakinarazten da datu pertsonalak «Irakaskuntza eta garapen profesionala» izeneko tratamendu-jarduerarako erabiliko direla, hauei jarraikiz: Europako Parlamentuaren eta Kontseiluaren 2016ko apirilaren 27ko (EB) 2016/679 Erregelamendua, datu pertsonalen tratamenduari eta datu horien zirkulazio askeari dagokienez pertsona fisikoak babesteari buruzkoa (Datuak Babesteko Erregelamendu Orokorra), Datu Pertsonalak Babesteari eta Eskubide Digitalak Bermatzeari buruzko abenduaren 5eko 3/2018 Lege Organikoa eta datuen babesaren arloan indarrean dagoen gainerako araudia. Ezaugarri hauek ditu tratamenduak:

– Arduraduna: Osasun Saila; Plangintza, Antolamendu eta Ebaluazio Sanitarioko Zuzendaritza.

– Helburua: osasun-prestakuntza espezializatuko tutoreak akreditatzeko eta berrakreditatzeko Osasun Sailak deitutako prozeduraren jarraipena eta eskabideen kudeaketa.

– Lege-oinarria: tratamendu hau beharrezkoa da interes publikoaren mesedetan edo tratamenduaren arduradunari esleitutako ahal publikoak gauzatzean egindako zeregin bat betetzeko (44/2003 Legea, azaroaren 21ekoa, Lanbide Sanitarioen Antolamenduari buruzkoa).

– Hartzaileak: gaian eskumena duten administrazio publikoei eman ahal izango zaizkie datu pertsonalak.

– Eskubideak: eskubidea duzu zeure datuak eskuratzeko, zuzentzeko eta ezerezteko, bai eta datuen tratamendua mugatzeko nahiz haren aurka egiteko ere, informazio gehigarrian azaltzen den moduan. Informazio gehigarria: datuen babesari buruzko informazio gehiago nahi baduzu, jo webgune honetara: https://www.euskadi.eus/web01-aprat/eu/ac34aRatWebWar/control/fichaRat/893?locale=eu

XEDAPEN GEHIGARRIA

Martxoaren 6ko 34/2012 Dekretuan (Euskal Autonomia Erkidegoan osasun-prestakuntza espezializatuaren sistema antolatzekoa) osasun-arloan eskumena duen sailean osasun-prestakuntza espezializatuaren ezagutza eta ebaluazioa kudeatzeko eskumena duen zuzendaritzari egiten zaizkion aipamenak egungo Plangintza, Antolamendu eta Ebaluazio Sanitarioko Zuzendaritzari egiten zaizkiola ulertu behar da, Osasun Sailaren egitura organikoa eta funtzionala ezartzen duen martxoaren 23ko 116/2021 Dekretuaren arabera.

AZKEN XEDAPENETAKO LEHENENGOA

Agindu honek amaiera ematen dio administrazio-bideari, eta, beronen aurka, interesdunek aukerako berraztertze-errekurtsoa aurkez diezaiokete Osasuneko sailburuari, hilabeteko epean, agindua Euskal Herriko Agintaritzaren Aldizkarian argitaratu eta hurrengo egunetik aurrera; bestela, administrazioarekiko auzi-errekurtsoa aurkez dezakete Euskal Autonomia Erkidegoko Auzitegi Nagusiko Administrazioarekiko Auzien Salan, bi hilabeteko epean, agindua EHAAn argitaratu eta hurrengo egunetik aurrera.

AZKEN XEDAPENETAKO BIGARRENA

Agindu honek Euskal Herriko Agintaritzaren Aldizkarian argitaratu eta hurrengo egunetik aurrera izango ditu ondorioak.

Vitoria-Gasteiz, 2024ko irailaren 10a.

Osasuneko sailburua,

ALBERTO MARTÍNEZ RUIZ.

(Ikus .PDF)

Azterketa dokumentala