Euskal Herriko Agintaritzaren Aldizkaria

133. zk., 2024ko uztailaren 8a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

XEDAPEN OROKORRAK

GIPUZKOAKO FORU ALDUNDIA

3292

2/2024 FORU ARAUA, maiatzaren 10ekoa, kultura sustatzeko zerga-pizgarriak eguneratu eta zabaltzen dituena.

GIPUZKOAKO DIPUTATU NAGUSIAK

Jakinarazten dut Gipuzkoako Batzar Nagusiek onetsi dutela «2/2024 Foru Araua, maiatzaren 10ekoa, kultura sustatzeko zerga-pizgarriak eguneratu eta zabaltzen dituena»; eta nik aldarrikatu eta argitara dadin agintzen dut, aplikagarria zaien herritar guztiek, partikularrek nahiz agintariek, bete eta betearazi dezaten.

Donostia, 2024ko maiatzaren 10a.

Gipuzkoako diputatu nagusia,

EIDER MENDOZA LARRAÑAGA.

HITZAURREA

Otsailaren 11ko 1/2019 Foru Arauak, sozietateen gaineko zergan kultura sustatzeko pizgarriak aldatzen dituenak, eta abenduaren 27ko 57/2019 Foru Dekretuak, zeinaren bidez Sozietateen gaineko Zergaren Erregelamendua aldatzen baita kultura sustatzea helburu duten pizgarriak garatzeko, Gipuzkoako Lurralde Historikoko Sozietateen gaineko Zergari buruzko urtarrilaren 17ko 2/2014 Foru Arauaren hamabosgarren xedapen gehigarrian aurreikusitako erregulazioa egokitu zuten, estatuak obra zinematografikoei eta ikus-entzunezkoen sektoreko beste ekoizpen batzuei ematen dien laguntzari buruz Europako Batzordeak argitaratutako 2013/C 332/01 Komunikazioarekin bat etor zedin.

Komunikazio horren arabera, «Ikus-entzunezko lanak ondasun ekonomikoak dira, aberastasuna eta enplegua sortzeko aukera handiak eskaintzen dituztelako, baina baita kultur ondasunak ere, gure gizarteak islatzen eta eratzen dituztelako».

Premisa horretatik abiatuta, bere onespenaren unean berritzailea eta aurreratua gertatu zen erregulazio bat ezarri zen, zeina geroago egokituz joan baita zenbait aldaketa tarteko. Aldaketa guztien artean azpimarragarriena 2022. urterako zenbait zerga aldaketa onetsi zituen martxoaren 10eko 1/2022 Foru Arauaren bidez egindakoa da, arau horren bidez, 5 puntu gehitu baitziren kenkari portzentajeak, kenkariaren muga igotzeaz gainera.

Une honetan, etengabeko berrikuspen eta azterketa prozesu horri segida emate aldera, dagokiona da kultura sustatzeko pizgarriei beste bultzada bat ematea zergen foru ordenamenduan, gure lurraldean hain errotuta dagoen kulturaren sektoreak eta bertan diharduten operadoreek laguntza jasotzen jarraitu dezaten, are gehiago «España, Hub Audiovisual de Europa» izena duen planaren onarpena kontuan hartuta, 2025aren amaieran Espainian egindako ikus-entzunezko ekoizpena % 30 handitzea baitu helburu.

Testuingurua hori delarik, azken urteotan eraldaketa handia gertatu da ikus-entzunezkoen sektorean, streaming plataformen agerpena duena ezaugarri, eta bi ondorio izan dituena: sektorea dinamizatzea eta teknologia eta negozio eredu berrietara zabaltzea; horrek exijitzen du lurraldeko industria sarearen sendotasuna areago finkatzea, haren lehiakortasuna eta profesionalizazioa sustatuz eta sektorea eszenatoki berri horretara egokituz.

Bere aktiboen izaera ukiezinetik eta arriskuak esperimentatu eta hartzeko premia intrinsekotik ondorioztatzen diren erronka ekonomikoei egin behar die aurre ikus-entzunezkoen sektoreak, prototipoak sortzea eta horien eskubideak ustiatzea baitu jarduera nagusi. Horregatik, une honetan pizgarri fiskalak funtsezko tresna dira sektoreak muskulu finantzarioa izateko eta bere eskubideen ustiapenetik datozen etekinak lortzeak dakarren erronkari aurre egiteko, hori baita, azken finean, sektoreari egonkortasun finantzario iraunkor bat emango diona.

Helburu horrekin onesten da foru arau hau, 2 artikuluz eta azken xedapen batez osatuta dagoena.

1. artikuluak Sozietateen gaineko Zergari buruzko urtarrilaren 17ko 2/2014 Foru Araua aldatzen du, haren barruan 66 bis eta 66 ter artikulu berriak sartzeko, «Kultura sustatzeko pizgarriak» eta «Ikus-entzunezko lanen eta arte eszeniko eta musikalen zuzeneko ikuskizunen finantzaketan parte hartzea» izenekoak, hurrenez hurren. Artikulu horiek Europako Batzordeari komunikatu zaizkio, aginduta dagoen bezala, Europar Batasunaren Funtzionamenduari buruzko Tratatuaren 108.3 artikuluan aurreikusitakoaren ondorioetarako, eta haren baimen espresua jaso dute SA 107200 gaian emandako 2023ko azaroaren 24ko C (2023) 8103 Erabakiaren bidez, zeinean Batzordeak erabaki baitu ez jartzea inolako eragozpenik laguntzari, Europar Batasunaren Funtzionamenduari buruzko Tratatuaren 107. artikuluko 3. apartatuaren d) letraren arabera barne merkatuarekin bateragarria dela iritzita.

Artikulu horietako lehenengoak kultura sustatzeko kenkarien baldintza berriak jasotzen ditu. 66 bis artikuluan hiru pizgarri diferente arautzen dira. Lehen apartatuak kenkari bat ezartzen du ikus-entzunezko lanen ekoizpenetan egiten diren inbertsio eta gastuetarako, eta hamabosgarren xedapen gehigarrian jasotzen zen kenkaria ordezten du (edukirik gabe uzten da xedapen hori). Bigarren apartatuak arte eszeniko eta musikalen zuzeneko ikuskizunengatik aplikatuko den kenkari berria jasotzen du. Eta, azkenik, hirugarren apartatuak liburuak argitaratzeagatik ezarritako kenkaria arautzen du.

Zehazki, 66 bis artikuluko lehen apartatuan esaten da ikus-entzunezko lanen ekoizpenetan egindako inbertsio eta gastuetarako kenkariaren kasuan, haren oinarria ekoizpenaren kostua izango dela, baita ekoizlearen kargura izandako publizitate eta sustapen gastuak eta kopietarako gastuak ere. Kenkari hori entitate ekoizle exekutiboak aplikatu ahal izango du bakar-bakarrik baldin eta ikus-entzunezko lanaren ekoizlea ez bada egoiliarra lurralde espainiarrean eta lurralde horretan establezimendu iraunkorraren bidez jarduten ez badu, eta, kasu horretan, entitate horrek jasandako ekoizpen kostuak soilik osatuko du kenkariaren oinarria.

Kenkariaren portzentajeari dagokionez, 100eko 60 edo 100eko 50 aplikatuko da aintzat hartuta kenkariaren oinarria osatzen duten inbertsio eta gastuak zein portzentajetan egin diren Euskal Autonomia Erkidegoko Lurralde Historikoetan. Horrela, 100eko 50eko kenkaria aplikatzeko, exijituko da inbertsio eta gastu horien zenbateko osoaren gutxienez 100eko 35 lurralde historikoetan egitea, eta 100eko 60 aplikatzeko, 100eko 50 gainditu beharko du lurralde horietan guztira inbertitu eta gastatutakoak. Jatorrizko bertsio bakarra euskara hutsean duten obren kasuan, kenkariaren portzentajea 10 puntu igoko da. Alde horretatik, ez da bereizketarik egiten Espainiako eta atzerriko ekoizpenen artean, eta kenkari portzentaje bera ezartzen da ekoizpen mota guztietarako.

Gainera, kontuan hartu beharreko elementu garrantzitsu bat da inbertsio eta gastuen lurraldetasunari buruzko eskakizuna ez dela mugatzen Gipuzkoako Lurralde Historikora. Esan bezala, Euskal Autonomia Erkidegoko hiru Lurralde Historikoak hartzen dira orain kontuan, eta, beraz, kenkari portzentajea eta haren aplikagarritasuna zehazteko garaian, Euskal Autonomia Erkidegoan egindako gastu eta inbertsioaren portzentajeari erreparatuko zaio.

Bestalde, aurreko araubidearekiko elementu bereizgarri gisa, adierazi behar da kenkaria sortutzat joko dela eta aplikatu egingo dela ordainketak egiten diren zergaldietan eta horien zenbatekoagatik, eta, beraz, ez da itxaron beharko ekoizpena kalifikatu arte edo produkzioa amaitu arte kenkaria aplikatzeko.

Azkenik, esan behar da kenkari horrek ezingo duela gainditu, oro har, 10 milioi euroko zenbatekoa produkzio bakoitzeko, eta ikus-entzunezko serieen kasuan, muga hori 3 milioi eurokoa izango da atal bakoitzeko.

66 bis artikuluko bigarren apartatuan kenkari berri bat ezartzen da arte eszeniko eta musikalen zuzeneko ikuskizunen ekoizpena eta erakusketa sustatzeko; zehazki, izandako gastuen 100eko 30eko kenkaria aplikatzen da, eta kenkari hori 100eko 40koa izango da ikuskizuna euskaraz egiten denean.

Zergaldi bakoitzean sortutako kenkaria ezin izango da milioi bat eurotik gorakoa zergadun bakoitzeko, eta hura aplikatzeko eskubidea finkatze aldera, zergadunak ezinbestean bideratu behar du jarduera horien garapenean lortutako etekinen gutxienez 100eko 50 kenkari horretarako eskubidea ematen duten jarduerak egiteko.

«66 bis artikuluko hirugarren apartatuan, arautzen da liburuen argitalpenean inbertitzeagatik aplikatzen den kenkaria kuota likidoaren 100eko 5ekoa dela hasiera batean. Hala ere, kenkari hori 100eko 15era igoko da baldin eta aurreko zergaldian euskaraz argitaratutako eta euskaratik itzulitako liburuak edo aleak guztira argitaratutako liburuen gutxienez 100eko 50 badira.»

Gainera, aipatu behar da 66 bis artikuluko kenkariak kuota likidoaren 100eko 50eko mugaren barruan sartzen direla, eta haien tratamendua parekatu egiten dela garapen jasangarria, ingurumenaren zaintza eta hobekuntza eta energia iturrien aprobetxamendu eraginkorragoa lortzea bilatzen duten proiektuetan egindako inbertsio eta gastuen kenkariak jasotzen duenarekin; horrez gain, kenkari horiek gutxieneko tributazioaren erregelaren aplikaziotik kanpo geratzen dira.

Araubide berria 66 ter artikuluan aurreikusten den kenkari berritzaile batekin osatzen da, eta ikus-entzunezko lanen eta arte eszeniko eta musikalen zuzeneko ikuskizunen finantzaketan parte hartzeagatik aplikatzen da.

Zehazki, kenkari berriak ahalbidetzen du 66 bis artikuluko lehen eta bigarren apartatuetan aipatutako kenkari fiskala osorik edo zati batean transferitzea ikus-entzunezko obren eta arte eszeniko eta musikalen zuzeneko ikuskizunen kenkariaren oinarria osatzen duten inbertsio eta gastuen finantzaketan parte hartzen duten inbertitzaile pribatuei.

Era horretan, lankidetza publiko-pribatua errazten da ikus-entzunezkoen sektorean, horrekin ahalbidetzen baita ekoizleak behar duen momentuan lortzea finantzaketa, ekoizpenaren edo ikuskizunaren gastua edo inbertsioa ordaintzeko unea iritsi baino lehen. Eta finantzaketa hori lortzen du kasuan kasuko zergaren aitorpena aurkeztu arte aplikatuko ez zuen kenkari baten transferentzia dela medio.

Ondorio horietarako, inbertitzaile pribatuak dira sozietateen gaineko zergaren zergadunak eta establezimendu iraunkor bidez jarduten duten ez-egoiliarren errentaren gaineko zergaren zergadunak.

Kenkari hau aplikatzeko, exijitzen da zergadunak (inbertitzaile pribatua) eta pertsona edo entitate ekoizleak (finantzaketaren hartzailea) finantzaketa kontratu bat formalizatzea elkarren artean, eta kontratu horrek zenbait baldintza formal eta material betetzea.

Beharrezkoa da kontratua sinatzen dutenen artean loturarik ez egotea. Gainera, inbertitzaile pribatuek ezin dute jabetza intelektualeko edo beste ezein eratako eskubiderik eskuratu ekoizpen edo ikuskizunaren emaitzei dagokienez.

Bukatzeko, finantzaketan parte hartzen duen zergadunak kuotan gehienez aplikatu dezakeen kenkaria zergadunak berak proiektua finantzatzeko ordaindutako zenbatekoa 1,20rekin biderkatuz ateratzen den zenbatekoa izango da. Soberakina 66 bis artikuluko lehen eta bigarren apartatuetan aurreikusitako kenkariak aplikatzeko eskubidea sortzen duten zergadunek aplikatu ahal izango dute.

Araubide berria araubide iragankor batekin osatzen da, eta bertan ezartzen da zer tratamendu aplikatuko zaien foru arau honek ondorioak izan baino lehen hasi eta data horretara arte bukatu ez diren ikus-entzunezko lanen produkzioei.

Kasu horietan, zergadunak bi aukera izango ditu: Sozietateen gaineko Zergaren Foru Arauaren 66 bis artikulu berrian xedatutako kenkaria aplikatzea, edo arau horren hamabosgarren xedapen gehigarria aplikatzea, 2022ko abenduaren 31n indarrean zegoen idazketa aintzat hartuta.

66 bis artikulu berria aplikatzea aukeratzen badu, sortuta dauden kenkariak artikulu horrek ondorioak dituen lehen zergaldiari egotziko zaizkio. Aldiz, 2022ko abenduaren 31n indarrean zegoen idazketa aplikatzea aukera-tuz gero, foru arau honek ondorioak izan aurretik indarrean zegoen idazketan aurreikusi-tako gehieneko kenkariak eta gutxieneko tributazioaren mugak aplikatuko dira.

2. artikuluak urtarrilaren 17ko 3/2014 Foru Araua aldatzen du, Gipuzkoako Lurralde Historikoko Pertsona Fisikoen Errentaren gaineko Zergarena, eta helburua da bertan aldaketa tekniko bat besterik ez sartzea Sozietateen gaineko Zergaren Foru Arauaren hamabosgarren xedapen gehigarriari egiten zaion erreferentzia ezabatzeko.

Azkenik, foru arauak bi xedapen gehigarri ditu bukaeran, xedapen iragankor bat eta azken xedapen bat, foru araua indarrean noiz jarriko den eta zer ondorio izango dituen arautzen duena.

1. artikulua.– Aldatzea urtarrilaren 17ko 2/2014 Foru Araua, Gipuzkoako Lurralde Historikoko Sozietateen gaineko Zergarena.

Aldaketa hauek sartzen dira Gipuzkoako Lurralde Historikoko Sozietateen gaineko Zergari buruzko urtarrilaren 17ko 2/2014 Foru Arauan:

Bat.– 39. artikuluko 9. apartatua honela geratzen da idatzita:

«9.– Foru arau honen 64 bis edo 66 ter artikuluan xedatutakoaren ondorioz aplikatutako kenkariak handiagoak badira zergadunak ikerketa, garapen eta berrikuntza teknologikoko proiektuak, film zinematografiko luze eta laburren ekoizpenak eta ikus-entzunezko beste lan batzuk egiteko inbertitutako zenbatekoak baino, edo ekoizpen industrial seriatuari ekin aurretik euskarri fisiko bat egitea ahalbidetzen duten fikziozko, animaziozko edo izaera dokumentaleko ikus-entzunezko serieak produzitzeko edo arte eszeniko eta musikalen zuzeneko ikuskizunak produzitu eta erakusteko inbertitutakoa baino (artikulu horietan aipatzen diren horiek guztiak), aplikatutako kenkarien eta aipatutako proiektu edo ekoizpenak finantzatzeko ordaindutako zenbatekoen arteko diferentzia positiboa integratuko da zergadunaren zerga oinarrian.»

Bi.– 59. artikuluaren 3. apartatuko lehen paragrafoa honela geratzen da idatzita:

«3.– Zerga oinarri positiboak lortzen dituzten zergadunen kuota efektiboa kalkulatzeko kuota likidoari aplikatzen zaizkion kenkariek, foru arau honen 62tik 64ra bitarteko artikuluetan eta 65. eta 66 artikuluetan jasotakoak kanpoan utzita, ezingo dute berekin ekarri kuota efektiboa, oro har, zerga oinarriaren zenbatekoaren 100eko 17 baino txikiagoa izatea. Foru arau honen 56.1 artikuluko c) letran aipatzen diren entitateen kasuan, portzentaje hori 100eko 13koa izango da.»

Hiru.– 66 bis artikulu berria gehitzen da, honako hau dioena:

«66 bis artikulua. Kultura sustatzeko pizgarriak.

Bat.– Ikus-entzunezko obrak produzitzeko inbertsio eta gastuak.

1.– Film zinematografiko luze eta laburren eta beste ikus-entzunezko obra batzuen produkzioetan egindako inbertsio eta gastuek, bai eta ekoizpen industrial seriatuari ekin aurretik euskarri fisiko bat egitea ahalbidetzen duten fikziozko, animaziozko edo izaera dokumentaleko ikus-entzunezko serieak produzitzeko egindakoek ere, eskubidea emango diote entitate ekoizleari apartatu honetan aipatzen den kenkariaren oinarriaren gainean hurrengo 2. apartatuan kasu bakoitzerako ezartzen den portzentajea kentzeko kuota likidotik.

Kenkariaren oinarria ekoizpenaren kostua izango da, baita ekoizlearen kargura izandako publizitate eta sustapen gastuak eta kopietarako gastuak ere.

Ondare elementuak funtzionamenduan mantentzeari buruz foru arau honen 67. artikuluko 5. apartatuan aurreikusten den beharkizuna betetzat joko da baldin eta ekoizleak 3 urtez mantentzen badu obraren gainean titulartasun portzentaje bera, obratik ondorioztatzen diren ustiapen eskubideak hirugarren bati edo gehiagori osorik edo partez merkaturatzeko duen ahalmena hargatik eragotzi gabe.

Ekoizle exekutiboak kenkaria aplikatu ahal izango du bakar-bakarrik baldin eta ikus-entzunezko obraren ekoizlea ez bada Espainiako lurraldean egoiliarra eta lurralde horretan establezimendu iraunkor bidez jarduten ez badu. Kenkaria ekoizle exekutiboak aplikatzen duenean, zergadunak jasandako ekoizpenaren kostuak soilik osatuko du kenkariaren oinarria, eta foru arau honen 67. artikuluko 5. apartatuan xedatutakoa ez da aplikatuko.

Koprodukzioen kasuan, Bat apartatu honetan adierazitako zenbatekoak koproduktore bakoitzarentzat zehaztuko dira, koprodukzioan duten partaidetza portzentajearen arabera.

Kenkari hau ordainketak egiten diren epealdietan sortutakoa dela joko da, eta epealdi horietan aplikatuko da, ordainketa horien zenbatekoagatik.

2.– Kenkariaren portzentajea honako hau izango da:

a) 100eko 60, Euskal Autonomia Erkidegoko Lurralde Historikoetan egindako produkzioetan kenkariaren oinarria osatzen duten inbertsio eta gastuen zenbatekoak inbertsio eta gastu horien zenbateko osoaren 100eko 50 gainditzen duenean.

b) 100eko 50, Euskal Autonomia Erkidegoko Lurralde Historikoetan egindako produkzioetan kenkariaren oinarria osatzen duten inbertsio eta gastuen zenbatekoa inbertsio eta gastu horien zenbateko osoaren 100eko 35 eta 100eko 50 bitartekoa denean.

Jatorrizko bertsio bakarra euskara hutsean duten obren kasuan, apartatu honetan aurreikusitakoetatik aplikatzekoa den portzentajea 10 puntu portzentual igoko da.

Kenkariaren oinarria osatzen duten inbertsio eta gastuak zein portzentajetan egin diren Euskal Autonomia Erkidegoko Lurralde Historikoetan zehazteko, kalkulua modu globalean egingo da kenkaria aplikatzen den zergaldi guztietarako. Horretarako, zergadunak, kenkaria aplikatzen duen lehen zergaldian, zenbatetsi beharko du kenkariaren oinarria osatzen duten inbertsio eta gastu horiek zer portzentaje hartzen duten.

Ikusten bada kenkariaren oinarria osatzen duten inbertsio eta gastuetatik Euskal Autonomia Erkidegoko Lurralde Historikoetan egindakoen portzentajea, inbertsio eta gastu osoekin alderatuta, txikiagoa edo handiagoa dela kenkaria lehen aldiz aplikatu zen ekitaldian aitortutakoa baino, kenkari hori erregularizatu beharko da hura aplikatzen den azken ekitaldian, behin betiko kenkari portzentajea aplikatuz.

3.– Kenkari honen zenbatekoa ezingo da izan 10 milioi eurotik gorakoa, egindako ekoizpen bakoitzeko.

Ikus-entzunezko serieen kasuan, kenkaria denboraldiko zehaztuko da, baina aurreko paragrafoan aipatutako muga 3 milioi eurokoa izango da ekoitzitako atal bakoitzeko.

Kenkariaren zenbatekoak, zergadunak ikus-entzunezko lan bakoitzagatik jasotako gainerako laguntzekin batera, ezin izango du produkzioaren aurrekontu osoaren 100eko 50 gainditu, salbu eta Europar Batasuneko estatu kide batek baino gehiagok finantzatutako mugaz gaindiko ekoizpen bat bada eta Europar Batasuneko estatu kide bateko baino gehiagoko ekoizleek partaidetuta badago, kasu horretan, ezin izango baitu produkzioaren aurrekontu osoaren 100eko 60 gainditu.

Kenkaria ekoizle exekutiboak aplikatzen duenean, aurreko paragrafoan aipatutako portzentajeak zergadunak jasandako gastuei soilik aplikatuko zaizkie.

3. apartatu honetako hirugarren paragrafoan aipatzen diren portzentajeak ez dira aplikatuko artikulu honetako 5. apartatuan xedatutakoaren arabera zailtzat jotzen diren ikus-entzunezko obren kasuan, ezta Ekonomia Lankidetza eta Garapenerako Antolakundearen Garapenenerako Laguntzeko Batzordearen zerrendako herrialdeek parte hartzen duten koprodukzioen kasuan ere.

4.– Kenkari hau aplikatzeko, baldintza hauek bete beharko dira:

a) Produkzioak honako hauek egiaztatzen dituen ziurtagiria lortu behar du: obrak kultur izaera duela edukiari dagokionez, badaukala lotura errealitate kulturalarekin edo kultur aniztasuna aberasteko ekarpena egiten duela. Ziurtagiri hori Zinematografia eta Ikus-entzunezko Arteen Institutuak, Autonomia Erkidegoan edo Gipuzkoako Lurralde Historikoan gai horretan eskumena duen erakundeak, edo Europar Batasuneko edo Europako Esparru Ekonomikoko beste estatu kide bateko erakunde baliokide batek eman behar du.

b) Euskadiko Filmategian edo ikus-entzunezko lanak bildu, katalogatu, kontserbatu, zaharberritu edo jendearen eskura jartzeko eskumena duten instituzio edo erakundeetan kopia berri bat uztea, egoera ezin hobean. Emanaldian erabilitako euskarri berean entregatuko da kopia hori.

Baldintza hori ez da aplikatuko kenkaria ekoizle exekutiboak aplikatzen duenean edo Espainiako nazionalitatea duen obra bat ez denean.

5.– Ikus-entzunezko obra bat zailtzat hartuko da kenkari honen ondorioetarako, era honetakoak direnean:

a) Jatorrizko bertsio bakarra euskara hutsean duten obrak.

b) Hasberri batek egina denean. Zehazki, baldintza hori beteko da produkzio egilea zinema aretoetan erakusteko kalifikatutako bi film luze baino gehiago zuzendu ez dituenean, berak zuzenean edo beste batzuekin batera, ikus-entzunezko bi lan baino gehiago zuzendu ez dituenean, gutxienez 60 minutukoa bakoitza, edo 200 minutuko serie bat, betiere ikus-entzunezko komunikazio zerbitzuen bitartez zabaldu badira.

c) Emakumeek bakarrik zuzendutako film luzeak.

d) 100eko 33 edo hortik gorako desgaitasuna duten zuzendariek bakarrik egindako ikus-entzunezko lanak.

e) Aurrekontu txikiko obrak, hau da, gehienez 1.000.000 euroko ekoizpen kostua dutenak.

f) Dokumentalak.

g) Animazio lanak.

h) Film laburrak.

i) Gaiagatik edo ekoizpenak dakartzan beste arrazoi batzuengatik merkatuan sartzeko zailtasunak dituzten obrak.

i) letra honetan aurreikusitako kasuan, zergadunak frogatu beharko du obrak zailtasunak dituela merkatuan sartzeko, eta obra zailtzat jotzeko eskatu beharko dio Zerga Administrazioari zergadunak kenkarirako eskubidea egiaztatzen duen lehen zergaldia amaitu baino lehen.

6.– Lehen apartatu honetan xedatutakoaren ondorioetarako, Zinemari buruzko abenduaren 28ko 55/2007 Legearen 4. artikuluan aurreikusitako definizioei jarraituko zaie.

7.– Gipuzkoako Lurralde Historikoko Zergei buruzko martxoaren 8ko 2/2005 Foru Arau Orokorraren 92. artikuluan xedatutakoa gorabehera, kenkarirako eskubidea frogatzen duten zergadunek baimena ematen dute frogatutako kenkariaren datuak zabaldu daitezen obra zinematografikoei eta ikus-entzunezkoen sektoreko beste ekoizpen batzuei emandako estatu laguntzari buruz Europako Batzordeak argitaratutako 2013/C 332/01 Komunikazioaren 52. apartatuko 7. zenbakian ezarritako eran, Batzordearen 2014/C 198/02 Komunikazioak gerora emandako idazkeran. Komunikazio horren bidez, Batzordeak hainbat komunikazio aldatu ditu, denak ere Europar Batasunaren jarraibide hauei buruzkoak: banda zabala azkar hedatzeko estatu laguntzen arauak aplikatzeko jarraibideak; 2014-2020 aldirako eskualde xedeko estatu-laguntzei buruz eta obra zinematografikoetarako eta ikus-entzunezkoen sektoreko beste produkzio batzuetarako estatu laguntzei buruzko jarraibideak, arriskua finantzatzeko estatu laguntzei buruzko jarraibideak, eta aireportuei eta hegazkin konpainiei ematen zaizkien estatu laguntzei buruzko gidalerroak.

Ondorio horietarako, Gipuzkoako Foru Aldundiak Komunikazio horretan ezarritako informazioa argitaratuko du, bertan exijitutako baldintzetan.

Bi.– Arte eszeniko eta musikalen zuzeneko ikuskizunengatik aplikatu beharreko kenkaria.

1.– Arte eszeniko eta musikalen zuzeneko ikuskizunen ekoizpenean eta emankizunetan egindako gastuek 100eko 30eko kenkaria izango dute kuota likidoan, eta 100eko 40koa ikuskizuna euskaraz denean.

Kenkariaren oinarria jarduera horietan zuzenean izandako kostu artistiko, tekniko, publizitate eta sustapen arlokoek osatuko dute.

Zergaldi bakoitzean sortzen den kenkariak ezingo du 1.000.000 euroko zenbatekoa gainditu zergadun bakoitzeko.

Kenkariaren zenbatekoak, zergadunak jasotako gainerako dirulaguntzekin batera, ezingo du gastu horien 100eko 80 gainditu.

2.– Kenkari hori aplikatzeko, bi baldintza hauek bete beharko dira: zergadunak ziurtagiri bat eskuratzea erregelamenduz ezarriko diren terminoetan, eta, kenkarirako eskubidea sortzen den ekitaldian jarduera horietan lortutako mozkinetatik, zergadunak gutxienez 100eko 50 erabiltzea apartatu honetan aurreikusitako kenkarirako eskubidea ematen duten jarduerak egiteko. Azken betebehar hori betetzeko epea mozkin horiek lortu diren ekitaldia hasten denetik ekitaldi hori itxi ondorengo 4 urtera bitartekoa izango da.

Hiru.– Liburuak argitaratzeagatik aplikatu beharreko kenkaria.

Produkzio industrial seriatuari ekin aurretik euskarri fisiko bat egitea ahalbidetzen duten liburuak argitaratzeko inbertsioek eskubidea emango dute kuota likidoan 100eko 5eko kenkaria aplikatzeko.

Hala ere, kenkari hori 100eko 15ekoa izango da baldin eta aurreko zergaldian euskaraz argitaratutako eta euskaratik itzulitako liburuak edo aleak guztira argitaratutako liburuen gutxienez 100eko 50 badira.

Lau.– Arau komunak.

1.– Foru arau honen 67. artikuluan xedatutakoa gorabehera, kenkariaren oinarritik gutxituko da artikulu honetan aurreikusitako kenkarietarako eskubidea ematen duten inbertsio eta/edo gastuak finantzatzeko jasotako dirulaguntzen zenbatekoa.

2.– Artikulu honetako bat eta bi apartatuetan aurreikusitako kenkariak aplikatuz aurkezten duen autolikidazioarekin batera, zergadunak jaso dituen gainerako laguntza edo dirulaguntza publikoen zerrenda aurkeztu beharko du, aurreko bat.3 eta bi.1 apartatuetan aipatutako gehieneko kenkari mugak betetzen diren zehazteko.

3.– Artikulu honetan aipatzen diren kenkarietako edozein aplikatzeko baldintzak ez badira betetzen eta horiek bete beharrekoak badira kenkaria aplikatu behar den ekitaldia amaitu ondorengo batean, horrek berekin ekarriko du egindako kenkariengatik bere garaian ordaindu ez diren kuotak ordaintzea, dagozkien berandutze interesekin batera. Bai kuotak eta bai interesak, ez-betetzea gertatu den ekitaldiko autolikidaziotik ondorioztatzen den kuotari gehitu beharko zaizkio.

4.– Erregelamendu bidez, baldintza gehigarriak ezarri ahal izango dira artikulu honetan ezarritako kenkariak aplikatzeko, eta, bereziki, obraren kreditu tituluetan ageri behar duen informazioarekin eta material grafikoaren eta ikus-entzunezkoaren erabilera lagatzearekin lotutakoak. Lagapen horrek ez du erabilera komertzialik izango, eta lurraldea sustatzeko baino ez da egingo.»

Lau.– 66 ter artikulu berria gehitzen da, honako hau dioena:

«66 ter artikulua. Ikus-entzunezko lanen eta arte eszeniko eta musikalen zuzeneko ikuskizunen finantzaketan parte hartzea.

1.– Zerga honen edo establezimendu iraunkor bidez jarduten duten ez-egoiliarren errentaren gaineko zergaren zergadunek, parte hartzen badute film zinematografiko luze eta laburren eta ikus-entzunezkoen sektoreko beste lan batzuen produkzioaren finantzaketan, edo produkzio industrial seriaturi ekin aurretik euskarri fisiko bat egitea ahalbidetzen duten fikziozko, animaziozko edo izaera dokumentaleko ikus-entzunezko serieen produkzioaren edo arte eszeniko eta musikalen zuzeneko ikuskizunen produkzio eta emankizunen finantzaketan, eta horiek aurreko 66 bis artikuluko lehen eta bigarren apartatuetan ezarritako kenkarietarako eskubidea sortzeko baldintzak betetzen dituzten beste zergadun batzuek eginak badira, kenkari bat aplikatu ahal izango dute kuota likidoan, artikulu honetan ezarritako baldintzetan eta betekizunekin. Kenkari hori bateraezina izango da, osorik edo zati batean, aipatutako 66 bis artikuluan xedatutakoa aplikatzearen ondorioz zergadun horiek aplika litzaketen kenkariekin.

Kenkari hori ez da aplikatuko ekoizpenaren finantzaketan parte hartzen duen zergaduna ekoizpena egiten duen zergadunarekin lotuta dagoenean foru arau honen 42. artikuluan ezarritako terminoetan.

2.– Zergadun batek beste zergadun batek produzitutako ikus-entzunezko lan baten edo arte eszeniko eta musikalen zuzeneko ikuskizun baten finantzaketan parte hartzen duela ulertuko da, baldin eta itzuli beharrik gabeko zenbatekoak jartzen baditu aurreko 66 bis artikuluko bat eta bi apartatuetan aipatutako kenkarien oinarria osatzen duten inbertsio eta gastuak osorik edo partez ordaintzeko.

Ez da onartuko finantzaketan parte hartzen duen zergadunaren posizioan subrogatzea, oinordetza unibertsaleko kasuetan izan ezik.

3.– Artikulu honetan xedatutakoa aplikatzeko, beharrezkoa izango da finantzaketa kontratu bat sinatzea eta bertan honako alderdi hauek zehaztea:

a) Ikus-entzunezko lanaren edo arte eszeniko eta musikalen zuzeneko ikuskizunaren produkzioan parte hartzen duten zergadunen nortasuna.

b) Ikus-entzunezko lanaren edo arte eszeniko eta musikalen zuzeneko ikuskizunaren deskribapena.

c) Produkzioaren edo arte eszeniko eta musikalen zuzeneko ikuskizunaren aurrekontua, gastuak zehatz deskribatuz, eta, bereziki, Euskal Autonomia Erkidegoko Lurralde Historikoetan egingo direnena, bai eta denbora egozpena ere.

d) Finantzatzeko modua, honako hauek bereizita: zer kantitate jartzen dituen ikus-entzunezko obra edo arte eszeniko eta musikalen zuzeneko ikuskizuna produzitzen duen zergadunak, zer kantitate jartzen dituen finantzaketan parte hartzen duen zergadunak, eta zein zenbateko dagozkien finantza entitateen kredituei, dirulaguntzei eta bestelako laguntza neurriei.

e) Erregelamendu bidez zehazten diren gainerako kontuak.

4.– Finantzaketan parte hartzen duten zergadunek ezingo dute jabetza intelektualeko edo bestelako eskubiderik eskuratu produkzioaren edo ikuskizunaren emaitzei dagokienez.

5.– Zergadunek artikulu honetan ezarritako araubidea aplikatzea aukeratzen dutenean, aurreko artikuluko bat eta bi apartatuetan aipatzen diren zergadunek ez dute eskubiderik izango artikulu horietan ezarritako kenkaria osorik edo partez aplikatzeko, eta, horren ordez, finantzaketan parte hartzen duen zergadunak bere autolikidazioan aplikatu ahal izango du artikulu honetan aurreikusitako kenkaria. Aipatutako Bat eta Bi apartatuetan aurreikusitako kenkariak aplikatzeko eskubidea emango luketen zergadunei aplikatuko zitzaizkien baldintza berberetan zehaztuko da zenbatekoa.

Aurrekoa gorabehera, finantzaketan parte hartzen duen zergadunak kuotan gehienez ere aplika dezakeen kenkaria honako hau izango da: zergadunak berak finantzaketarako emandako kantitateen zenbatekoa bider 1,20 eginez ateratzen den zenbatekoa. Aurreko artikuluko Bat eta Bi apartatuetan aurreikusitako kenkariak aplikatzeko eskubidea sortzen duten zergadunek aplikatu ahal izango dute soberakina, betiere horietan jasotzen diren mugak aintzat hartuta.

Kenkari honetara biltzen diren zergadunek aplikatutako kenkariek gehi aurreko artikuluko lehen apartatuko kenkaria aplikatzen dutenek ezin izango dituzte muga hauek gainditu: 10 milioi euro ekoizpen bakoitzeko edo 3 milioi euro atal bakoitzeko, ikus-entzunezko serieen ekoizpen kasuan.

6.– Finantzaketan parte hartzen duen zergadunak urtero aplikatuko du artikulu honetan ezarritako kenkaria, zergaldi bakoitzean zenbateko ekarpenak egin diren eta aurreko artikuluko bat edo bi apartatuetako zer kenkari egiaztatu den kontuan hartuta.

Hala ere, finantzaketan parte hartzen duen zergadunak zergaldian jarri dituen zenbatekoek aurreko artikuluko bat edo bi apartatuen arabera egiaztatutakoa baino kenkari handiagoa aplikatzea ahalbidetu badute, soberakina hurrengo zergaldietan aplikatu ahal izango da, aurreko apartatuan aurreikusitako mugekin.

7.– Ikus-entzunezko lanen eta arte eszeniko eta musikalen zuzeneko ikuskizunen finantzaketan parte hartzen duen zergadunari dagokion kenkariaren aplikazioa kontuan hartu beharko da foru arau honen 59. artikuluko 3. apartatuan ezarritakoaren ondorioetarako. Orobat, haren zenbatekoa ere aintzat hartu beharko da foru arau honen 67. artikuluko 1. apartatuan aipatzen den baterako muga (100eko 35) aplikatzeko.

8.– Artikulu honetan aurreikusitako kenkaria aplikatu nahi duten zergadunek artikulu honetako 3. apartatuan aipatzen den finantzaketa kontratua aurkeztu beharko diote Zerga Administrazioari, kontratuko alderdi guztiek sinatuta, gehienez ere kenkaria sortzen den zergaldia amaitu eta hurrengo hilabetean, eta erregelamendu bidez ezartzen diren baldintzetan.

Era berean, beharrezkoa izango da obraren izaera kulturala egiaztatzen duen ziurtagiria aurkeztea (erregelamenduz ezartzen den moduan luzatutako ziurtagiria), eta horrelakorik oraindik eman ez bada, orduan eskaera egin izanaren frogagiria aurkeztuko da.»

Bost.– 67. artikuluaren 1. apartatuko b) letra honela geratzen da idatzita:

«b) 65. eta eta 66 bis artikuluetan jasotakoak, zeinen muga kuota likidoaren 100eko 50 izango baita.»

Sei.– Edukirik gabe uzten da 128. artikuluaren 1. apartatuko u) letra.

Zazpi.– Edukirik gabe uzten da hamabosgarren xedapen gehigarria.

Zortzi.– Beste xedapen iragankor bat gehitzen da, hogeita hamaikagarrena, honela dioena:

«Hogeita hamaikagarren xedapen iragankorra. Hasitako film zinematografiko luzeen eta ikus-entzunezko serieen produkzioetan inbertitzeagatik aplikatu beharreko kenkariak.

1.– Kultura sustatzeko zerga-pizgarriak eguneratzen eta zabaltzen dituen maiatzaren 10eko 2/2024 Foru Arauak ondorioak sortu aurretik hasitako ikus-entzunezko lanen produkzioak data hori iritsita bukatu gabe badaude, aukeran izango dute aplikatzea foru arau honen 66 bis artikuluan xedatutakoa, arau horrek emandako idazkera berriari jarraituta, edo hamabosgarren xedapen gehigarrian jasotakoa, 2023ko abenduaren 31n indarrean zegoen idazkera aintzat hartuta.

Ondorio horietarako, 66 bis artikuluan xedatutakoa aplikatzea hautatzen bada, foru arau honen hamabosgarren xedapen gehigarriko Bat.6 apartatuak indarrean duen azken idazkeraren arabera aplikatu gabe dauden kenkariak kultura sustatzeko zerga-pizgarriak eguneratu eta zabaltzen dituen maiatzaren 10eko 2/2024 Foru Arauak ondorioak sortzen dituen lehen zergaldiari egotziko zaizkio.

Era berean, hamabosgarren xedapen gehigarrian xedatutakoa aplikatzea hautatuz gero, 2023ko abenduaren 31n indarrean zegoen idazkerari jarraituta, hurrengo 2. apartatuan xedatutakoa ere aplikatuko da.

2.– Kultura sustatzeko zerga-pizgarriak eguneratzen eta zabaltzen dituen maiatzaren 10eko 2/2024 Foru Arauak ondorioak sortu aurretik bukatu diren produkzioei kuota likidoan dagozkien kenkariak oraindik aplikatu gabe badaude aldaketa horrek ondorioak sortzen dituen lehen zergaldia hasten denean, foru arau honen 59. eta 67. artikuluetan xedatutakoaren arabera kenduko dira, data hori baino lehen indarrean zuten idazkerari jarraituta.

2. artikulua.– Aldatzea urtarrilaren 17ko 3/2014 Foru Araua, Gipuzkoako Lurralde Historikoko Pertsona Fisikoen Errentaren gaineko Zergarena.

Aldaketak sartzen dira Gipuzkoako Lurralde Historikoko Pertsona Fisikoen Errentaren gaineko Zergari buruzko urtarrilaren 17ko 3/2014 Foru Arauaren 88. artikuluko 1. apartatuan, eta honela geratzen da idatzita:

«1.– Zerga honen zergadunek portzentaje eta muga berdinekin aplikatu ahal izango dituzte Sozietateen gaineko Zergaren Foru Arauaren V. tituluko III. kapituluan aktibo ez-korronte berrietan inbertsioak pizteko eta zenbait jarduera egitea sustatzeko aurreikusten diren kenkariak.»

XEDAPEN GEHIGARRIA.– Kultura sustatzeko pizgarri fiskalen eragina ebaluatzea.

Gipuzkoako Lurralde Historikoan ikus-entzunezko industria oso errotuta dago, bertan badira eragile asko ibilbide luzea egin dutenak hainbat arlotan (prestakuntzan, ekoizpenean, sustapenean eta banaketan, esaterako), eta kualifikazio handiko langile tekniko eta artistikoak dituzte ikus-entzunezko sektorearekin lotuta.

Kultura sustatzeko pizgarri fiskal horien helburua, hain zuzen ere, da Gipuzkoako Lurralde Historikoko ikus-entzunezkoen industria indartzea, eta sektore horren autosufizientzia finantzarioa suspertu eta bultzatzea etorkizunari begira.

2024 eta 2028 bitarteko zergaldietan, foru arau honek ezarritako zerga-pizgarrien eragina ebaluatuko da, lortutako helburuei dagokienez. Zehazki, sektorearen autosufizientzia finantzarioa ebaluatzeko, kontuan hartuko da zer partaidetza duten ekoizleek ekoizten diren obren ustiapen eskubideetatik eratorritako diru-sarreretan.

Helburu horrekin, Foru Aldundiak urtero emango die Batzar Nagusiei kulturarako pizgarri fiskalen emaitzen eta horien eraginaren berri, beharra ikusiz gero, araudiaren balizko moldaketak burutu ahal izateko.

AZKEN XEDAPENA.– Indarrean jartzea eta ondorioak izatea.

Foru arau hau Gipuzkoako Aldizkari Ofizialean argitaratzen den egunean jarriko da indarrean, eta sortzapena data 2024ko urtarrilaren 1etik aurrera duten zergaldietarako izango ditu ondorioak.

Azterketa dokumentala