Euskal Herriko Agintaritzaren Aldizkaria

111. zk., 2024ko ekainaren 7a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

AGINTARIAK ETA LANGILERIA

Oposaketak eta lehiaketak

HEZKUNTZA SAILA

2771

EBAZPENA, 2024ko maiatzaren 28koa, Hezkuntzako sailburuordearena, zeinaren bidez iragartzen baita UHEIko zuzendariaren lanpostua izendapen askeko sistema bidez hornitzeko deialdi publikoa.

Urrutiko Hezkuntzako Euskal Institutuko zuzendariaren postua hutsik geratzekotan denez, Urrutiko Hezkuntzako Euskal Institutuaren antolamendu, funtzionamendu eta autonomiari buruzko ekainaren 19ko 93/2018 Dekretuak gobernu- eta partaidetza-organoei buruzko 12. artikuluan eta pertsona bakarreko gobernu-organoak izendatzea eta kargugabetzeari buruzko 14. artikuluan dioena kontuan hartuta, sail honek erabaki du UHEIko zuzendariaren lanpostua izendapen askearen sistema erabiliz betetzeko deialdi publikoa iragartzea. Hona hemen deialdiaren oinarriak.

Lehenengoa.– Deialdiaren xedea.

Urrutiko Hezkuntzako Euskal Institutuaren zuzendariaren lanpostua izendapen askeko sistemaren bidez betetzeko deialdia egitea.

Bigarrena.– Parte hartzeko baldintzak.

Deialdi honetan parte hartu ahal izango dute urrutiko hezkuntzaren arloan esperientzia egiaztatuta daukaten irakasle funtzionarioek.

Aipatutako langileek edozein administrazio-egoeratan egonda har dezakete parte deialdi honetan, honako egoera hauetan izan ezik:

a) Eginkizun-gabetze irmoa ezarrita duten funtzionarioek ezingo dute parte hartu, egoera horrek dirauen bitartean.

b) Norbere kontuetarako edo familia elkartzeko borondatezko eszedentzian egonik, lanera itzuli baino lehen, eszedentzian egon beharreko denbora bete ez duten langileek.

Hirugarrena.– Eskabideak.

Eskatzaileek, Hezigunean izango duten online inprimakiaren bidez bideratuko dituzke eskabideak. Inprimaki hori bitarteko elektronikoen bidez bidaliko da Hezkuntza Saileko Araubide Juridikoaren eta Zerbitzuen Zuzendaritzara. Eskabideak 5 egun balioduneko epean bidaliko dira, ebazpen hau Euskal Herriko Agintaritzaren Aldizkarian argitaratu eta hurrengo egunetik aurrera.

Laugarrena.– Betekizunak eta merezimenduak.

Parte hartzeko eskabideari «curriculum vitae» erantsiko zaio, eta, hor, datu pertsonalak eta zein kidegokoa den zehazteaz gain, beste hauek ere jasoko dira:

a) Tituluak.

b) Administrazio publikoan zein, hala badagokio, enpresa pribatuan betetako lanpostuak, batez ere lehiatzen den lanpostuaren antzeko funtzioak dituztenak.

c) Egiaztatutako hizkuntza-eskakizuna.

d) Jasotako edo emandako prestakuntza-ikastaroak.

e) Hizkuntza-ezagupenak.

f) Eskatutako lanpostuari esleitutako funtzioekin lotuta, jakinaraztea egoki jotzen diren bestelako merezimendu guztiak.

Eskabidearekin batera, eskatzen diren betekizunen eta aurkeztutako merezimenduen egiaztagiriak aurkeztu beharko dituzte hautagaiek, Langileen Erregistroan ez badaude.

Hautagaia deitutako lanpostuaren funtzioetara ongi egokitzen dela bermatze aldera, deialdia egin duen organoari aukera ematen zaio hautagaiak alegatu dituen merezimenduak egiaztatzeko egoki jotzen dituen bitartekoak erabil ditzan; elkarrizketa pertsonala edo proba egin dezake horretarako, edo Giza Baliabideen Zerbitzuko organo teknikoen txostenak eskatu.

Deialdi hau Hezkuntza Sailaren web orrialdean argitaratzen den datan bete behar dira eskatutako betekizunak, eta esleitutako lanpostuaz jabetu arte eutsi behar zaie. Parte hartzeko baldintzak betetzen jarraitzen ez duten parte-hartzaileek ezin izango dute esleitutako lanpostua jabetzan hartu.

Bosgarrena.– Lanpostua esleitzea eta izendatzea.

Deialdi hau Hezkuntzako sailburuordearen ebazpen baten bidez ebatziko da eskabideak aurkezteko epea bukatu eta hurrengo egunetik aurrera gehienez hilabeteko epean. Hori Hezkuntza Saileko web orrialdean argitaratuko da.

Lanpostua lortzen duen pertsonak, ezarritako epearen barruan hartu beharko du jabetzan lanpostua, eta, hala badagokio, aurreko lanpostuaren titulartasuna galduko du.

Ebazpen hori arrazoitzeko, azalduko da, batetik, aukeratutako hautagaiak betetzen dituela deialdian eskatutako betekizunak eta zehaztapenak eta baduela izendapenerako behar den gaitasuna, eta, bestetik, aukeratutako hautagaia egokia dela beste hautagaien aldean (baldin badaude), merezimenduak konparatuta (eta, hala badagokio, elkarrizketaren edo probaren emaitza ikusita), betiere lanpostuari esleitutako zereginen ikuspegitik.

Deialdia hutsik geratu dela deklaratu ahal izango da, hautagaietatik batek ere ez badu kasuan kasuko lanpostua betetzeko merezimendu nahikorik.

Seigarrena.– Errekurtsoa.

Ebazpen honen aurka aukerako berraztertzeko errekurtsoa aurkez dakioke Hezkuntzako sailburuordeari, hilabeteko epean, ebazpena Euskal Herriko Agintaritzaren Aldizkarian argitaratu eta biharamunetik aurrera; bestela, administrazioarekiko auzi-errekurtsoa aurkez daiteke, dagokion epaitegian, hil biko epean, ebazpena Euskal Herriko Agintaritzaren Aldizkarian argitaratu eta biharamunetik aurrera.

Vitoria-Gasteiz, 2024ko maiatzaren 28a.

Hezkuntzako sailburuordea,

MARÍA BEGOÑA PEDROSA LOBATO.

Azterketa dokumentala