RSS
103. zk., 2024ko maiatzaren 28a, asteartea
- Bestelako formatuak:
- PDF (135 KB - 3 orri.)
- EPUB (109 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
BESTELAKO XEDAPENAK
LURRALDE PLANGINTZA, ETXEBIZITZA ETA GARRAIO SAILA
2560
EBAZPENA, 2024ko maiatzaren 7koa, Garraio Azpiegituren zuzendariarena, zeinaren bidez ontzat ematen baita «Topoaren saihesbidearen komunikazio proiektua».
Eusko Jaurlaritzak, bai Garraio eta Trenbide arloan eskumena duten sailen bitartez, bai gai horiekin zerikusia duten bere baltzu publikoen bitartez, trenbideko garraio publikoa hobetzeko jarduera ugari burutu eta bultzatu ditu.
Bilboko Metroaren Eraikuntza Plana 1987an formalizatu zenetik (1995ean 1. linea martxan jartzea ekarri zuena), elkarren segidan egungo sareari buruzko Trenbide Jarduera Planak (1989-1992 eta 1994-1999) heldu ziren, 2000. eta 2002. urteen artean Bilbo Metropolitarra, Donostialdea eta Araba Nagusiaren eremuetan egindako trenbide-sareen azterketa orokorrekin jarraitzeko.
Lan horien ondorio nagusiak Euskotren XXI Planaren barruan jaso ziren hainbat jardueratan islatu ziren, une bakoitzeko aurrekontu aukeren barruan.
Bestalde, azken hamarkadetan (egungo krisiarekin lotutako azken urteetan izan ezik), nabarmen hazi da motordun mugikortasuna, urteko tasa metagarriak % 3,5 eta % 5 bitartekoak izanez, eremuen arabera. Tamalez, eremu askotan, mugikortasun-gehikuntza hori ia esklusiboki ibilgailu pribatuan oinarritu da, eta garraio publikoak sinbolikoki baino ez du lagundu.
Garraio publikoa Donostialdea inguruan ez da gai izan mugikortasun-gehikuntza hori atzemateko; izan ere, eremuko autobusek eta trenbideek geldituta dute bidaiari-kopurua. Egoera horren arrazoiak askotarikoak dira, «Donostiako Hiri Mugikortasun Iraunkorreko Plana» sostengatzen duten dokumentuetan azaltzen den bezala, eta hainbat jarduera eskatzen ditu, plan honetan adierazten den bezala.
Eremuari dagokionez, mugikortasunaren hazkundea Donostialdeko Trenbide Sarearen Azterlanean hasieran aurreikusitakoa baino askoz handiagoa izan da; beraz, hasieran proposatutakoak baino anbizio handiagoko irtenbideak hartzea komeni dela dirudi.
Horren arabera, aurreko Etxebizitza, Garraio eta Herri Lan Sailak ETSri eskatu zion trenbideak prestazio handiko metro-sistema bihurtzeko egin beharreko jarduerak zehazteko.
Premisa horiekin, ETSk 2009ko urrian Donostiako Metroaren Informazio Azterlana esleitu zuen. Kontratu horren barruan, lanak hainbat azterketa independentetan banatu ziren:
• Donostiako Metroaren funtzionaltasunaren eta eskariaren azterketa.
• Lugaritz-Anoeta tartearen informazio-azterlana.
• Loiolako Erriberako trukagailuaren informazio-azterlana.
• Irun-Hondarribia tartearen informazio-azterlana.
Alde batetik, bideragarritasun ekonomikoa eta soziala eta, bestetik, funtzionala eta teknikoa justifikatu ondoren, ETSk agindu zuen Lugaritz-Mirakontxa eta Mirakontxa-Morlans zatietan zatituta dauden eta Informazio Azterlanean definitutako soluzio teknikoa garatzen zuten eraikuntza-proiektuak idazteko.
Ondoren, Ingurumen eta Lurralde Politika Sailak Lugaritz eta Morlans arteko linea berriaren oinarrizko diseinua berriz aztertzeko erabakia hartu zuen. Aldaketa horren ondorioz, Lugaritz-Easo tarteari buruzko informazio-azterlan berria idatzi eta izapidetu behar zen. Obra zibileko kontratu horrek ez ditu instalazioak barne hartzen, eta proiektuak idatzi behar dira horiek definitzeko.
Ondorioz, tren-instalazioetako hiru (3) proiektu idaztea beharrezkoa da:
1.– Seinaleztapena.
2.– Komunikazioak.
3.– Elektrifikazioa.
Euskal Trenbide Sareak (aurrerantzean, ETS) eskatuta idatzi den proiektuaren xedea da Topoaren saihesbidearen tartean komunikazio-instalazioak definitzea, gauzatzeko, instalatzeko eta zerbitzuan jartzeko. Tarte hori Lugaritzeko geltokian hasten da, eta Bentaberri, Concha eta Easo geltokiak hartzen ditu, gela teknikoei dagokienez, bai eta ibilbideko kanalizazioak eta geltokirako sarbideak ere. Topoaren saihesbidearen helburua ETSren linea berri bat hornitzea da, Donostialdeko eremu osorako irisgarritasuna eman dezan, Lugaritzen linea bikoiztuz, Anoetako geltokira iritsi aurretik antzinako ibilbidera itzultzeko. Tarte horretan, haitzulo-motako hiru lurpeko estazio berri jarriko dira. Topoaren saihesbidearen trazadura berriak 4.230 metroko luzera du.
Hurrengo proiektuaren helmenak Topoaren saihesbidea izeneko tarte berriko Komunikazio Sistemen instalazioa eta martxan jartzea hartzen ditu kontuan. Hauek dira proiektu honetan kontuan hartzen diren komunikazio-sistemak:
– Datuak transmititzeko sistemak.
• Datuak transmititzeko Sare Nagusia.
• Tetra Komunikazio-Sarea.
– Ezarritako sistemak.
• Bideozaintza-sistema.
• Sarbideak kontrolatzeko sistema.
• Telefonia-sistema.
• Interfonia-sistema.
• Megafonia-sistema.
• Erabiltzailearentzako Informazio Bisualaren Sistema.
Proiektua egikaritzeko aurrekontua milioi bat laurehun eta hamabi mila zazpiehun eta sei euro eta hirurogeita hiru zentimokoa da (1.412.706,73). Horrek esan nahi du lizitaziorako oinarrizko aurrekontua bi milioi hogeita hamalau mila ehun eta berrogeita hamasei euro eta berrogeita bi zentimokoa (2.034.156,42) dela, BEZa barne; eta Administrazioak horren berri izateko aurrekontua: bi milioi hogeita hamalau mila ehun eta berrogeita hamasei euro eta berrogeita bi zentimokoa (2.034.156,42) BEZa barne.
Obrak egiteko hamalau (14) hilabeteko epea aurreikusten da.
Euskal Trenbide Sareko (ETS) Zerbitzu Teknikoek egiaztatu dute proiektu honek bere xedeari erantzuten diola eta Sektore Publikoko Kontratuen Legeak eta Administrazio Publikoen Kontratuen Legearen Erregelamendu Orokorrak eskatutako baldintzak betetzen dituela, kontrata bidez egikaritzeko behar diren alderdi nahikoak jasotzen baititu; halaber maila formalean berrikusi du proiektua eta berresten du bete egiten duela Sektore Publikoko Kontratuen Legean eta Herri Administrazioen Kontratuen Legearen Erregelamendu Orokorrean ezarritakoa, maila formalean, beharrezko dokumentuak eta indarrean dagoen araudia sartzeari dagokionez, edukiari, sinadurei eta alderdi formalei, beharrezko kalkulu-oinarri eta -hipotesiei eta Sektore Publikoko Kontratuen Legearen 233.1 artikuluan zerrendatutako edukiari dagokienez.
Organo honek eskumena du trenbide sareko proiektuak egiteko eta onartzeko, Lurralde Plangintza, Etxebizitza eta Garraio Sailaren egitura organikoa eta funtzionala ezartzen duen 2021eko urtarrilaren 19ko 11/2021 Dekretuaren 16.2.b) artikuluan xedatutakoaren arabera.
Aipatutako xedapenak, horiekin bat datozenak eta oro har aplikatu beharrekoak ikusita, hau
EBAZTEN DUT:
Lehenengoa.– «Topoaren saihesbidearen komunikazio proiektua» onartzea. Lizitazioaren oinarrizko aurrekontua, BEZa barne, bi milioi hogeita hamalau mila ehun eta berrogeita hamasei euro eta berrogeita bi zentimokoa (2.034.156,42) da, eta obrak egiteko epea hamalau (14) hilabetekoa izango dela aurreikusi da.
Bigarrena.– Eraikuntza proiektu hau onartzeak berarekin dakar obrak onura publikokoak edo interes sozialekoak direla deklaratzea, okupatzeko beharra adieraztea eta dagokion Eraikuntza proiektuaren beraren eranskinean zerrendatuta dauden erasandako ondasunak eta eskubideak lehenbailehen okupatu behar direla adieraztea.
Ebazpen hau ez da behin betikoa administrazio-bidean, eta, beraren aurka, interesdunek gora jotzeko errekurtsoa aurkez diezaiokete Azpiegitura eta Garraioen sailburuordeari, hilabeteko epean, ebazpena jakinarazi edo argitaratu eta hurrengo egunetik aurrera. Idazki hori organo honi edo Azpiegitura eta Garraioen sailburuordeari bidali beharko zaio.
Administrazio publikoek administrazioarekiko auzi-errekurtsoa jarri ahal izango dute, bi (2) hilabeteko epean, Euskal Autonomia Erkidegoko Justizia Auzitegi Nagusiko administrazioarekiko auzien aretoan, hargatik aldez aurretik errekerimendua egitea eragotzi gabe, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan zehaztutako moduan eta epean.
Vitoria-Gasteiz, 2024ko maiatzaren 7a.
Garraio Azpiegituren zuzendaria,
MARÍA DOLORES DE JUAN DE MIGUEL.
