Euskal Herriko Agintaritzaren Aldizkaria

73. zk., 2024ko apirilaren 12a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

LURRALDE PLANGINTZA, ETXEBIZITZA ETA GARRAIO SAILA

1773

EBAZPENA, 2024ko martxoaren 21ekoa, Garraio Azpiegituren zuzendariarena, zeinaren bidez ontzat ematen da «Bediako geltokiko trenbide-pasagunea kentzeko eta aparkaleku berria egiteko eraikuntza-proiektua».

Euskal Autonomia Erkidegoko egungo trenbide-sarea bi zabalera (1.668 eta 1.000 mm) dituzten lineek osatzen dute. Lau konpainiak ustiatzen dituzte (RENFE, FEVE, Euskotren eta Metro Bilbao). Bilboko, Gasteizko eta Donostiako zerbitzuak RENFEk eskaintzen ditu Madril-Irun eta Castejon-Bilbo lineen bidez, eta Euskotrenek Bilbo-Donostia linearen bidez.

Euskotrenen Bilbo-Donostia linean, linearen tarte guztietan dauden trenbide-pasaguneak kentzeko helburua dago. Bediako geltokian, proiektu honen xede den jarduketa dagoen lekuan, hegoaldeko nasara sartzeko aukera ematen duen trenbide-pasagune bat dago mendebaldera.

2017an, Girderrek «Bediako geltokiaren irisgarritasuna hobetzeko Proiektua» idatzi zuen. Proiektu hori 2020an gauzatu zen, geltokirako sarbideak hobetuz. Hala ere, jarduketa horretan ez zen konpondu trenbide-pasagunearen arazoa, geltokiaren birmoldaketa, ezta ibilgailuak geltokira iristeko modua ere.

Gaur egun, Bediako geltokia erabiltzen duten bidaiarien eguneroko kopurua 40-50 erabiltzaile ingurukoa da. Aparkalekua eta geltokirako sarbideak diseinatu baino lehen, eskari-azterlan bat egingo da, Bediako udalerriko eta inguruko herrietako, Lemoako eta Usansoloko, erabiltzaileak autoz eta trenez mugitzea ahalbidetuko lukeen aparkaleku bat eginez gero geltokiak izango lukeen bidaiari-gehikuntza aztertzeko. Horregatik, proiektu honetan Bilbo-Donostia lineako trenbide-pasagunea (14+091 KP) kentzea, geltokirako irisgarritasuna hobetzea eta geltokiaren ondoan aparkaleku bat egitea aztertzen da.

«Bediako geltokiko trenbide-pasagunea kentzeko eta aparkaleku berria egiteko eraikuntza-proiektua» idazteko behar diren lan guztiak egingo dira kontratuaren xede diren lanetan.

Egungo trenbidearen deskribapenak alderdi hauek biltzen ditu:

– Aparkalekua.

– Oinezkoentzako sarbidea.

– Bidaiarien eraikina.

– Fabrikako obrak.

– Oinezkoentzako pasabidea.

– Instalazioak.

Gaur egun, errepidearekiko elkargunea Barroetako zubiaren hegoaldean dago. Puntu horretan, zubi hori ibaiaren hegoaldeko ertzetik igarotzen den errepidearekin gurutzatzen da. Aparkalekura sartzeko bidea elkargune horretatik % 7ko arrapala paralelo batekin proiektatu da, 80 metro inguruko luzeran, errekarekiko paraleloan, aparkalekuaren kotara iritsi arte.

Proiektuak zazpi euste-horma egitea barne hartzen du. Egitura horiek, aparkalekua nasetako kotan egon dadin behar den betelaneko lursaila eduki behar delako justifikatzen dira.

Geltokiaren hegoaldeko nasara iristeko trenbidearen gainetik igarotzen den oinezkoentzako pasabide bat proiektatzen da. Egituraren taula nasaren sestratik 5 metro inguruko kotan egongo da.

Egitura altzairuz proiektatuta dago hein handian. Igogailuetako dorreek profil metaliko ijeztuzko egitura dute. Igogailuen sarbideak dauden fatxadak kristalezkoak dira, eta beste biak opakuak dira.

Eskailerak hormigoizko bi eskailera-buruen gainean daude, eta handik altzairuzko bi barra irteten dira. Euspenerako egitura profil tubular angeluzuzenen eta xafla grekatuaren bidez eginda dago. Xafla horren gainean harlausazko zoladura bat jarriko da, gres akaberarekin.

Pasabide osoan zehar metalezko zutoinak eta altuera bikoitzeko eskudelak dituen baranda jarriko da; halaber, baranda barruan argiztapen integratua jarriko da.

Geltoki berriko bidaiarientzako eraikina solairu bakarreko eraikina da, bi isurkiko teilatua du, eta teilatu horretatik, fatxadaren lerroan limahoiak eratzen dituzten alboko hegalak irteten dira.

Eraikinak 15,00 x 7,50 metro inguruko neurriak ditu oinplanoan, hiru gela nagusitan banatuta. Sarrera ekialdeko fatxadatik egiten da, eta nasarako eta oinezkoen pasabiderako irteera, mendebaldetik.

Horietako bat behe-tentsioko koadroa, komunikazio-armairua eta teleaginteko beste ekipo batzuk eta geltokiko instalazioak hartzeko erabiliko da. Bestea geltokiko buruaren egoitza izango da.

Eraikineko gelaren gainerakoa txartelak saltzeko eta balioztatzeko makinak hartzen dituen atariak osatuko du. Eraikinaren atzealdean, oinezkoentzako pasabideko igogailua dago. Eraikinaren barrualdetik sartzen da bertara.

Proiektua egikaritzeko aurrekontua bi milioi seiehun eta hogeita sei mila berrehun eta berrogeita bederatzi euro eta hogei zentimokoa da (2.626.249,20). Horrek esan nahi du lizitaziorako oinarrizko aurrekontua hiru milioi zazpiehun eta laurogeita bat mila bostehun eta hogeita hamasei euro eta hogeita hiru zentimokoa da (3.781.536,23) dela, BEZ barne; eta Administrazioak horren berri izateko aurrekontua: hiru milioi berrehun eta hirurogeita hamaika mila, laurehun eta hirurogeita hamasei euro eta berrogeita hamabost zentimokoa da (3.271.476,55), BEZik gabe.

Obrak egiteko hamabi (12) hilabeteko epea aurreikusten da.

Euskal Trenbide Sareko (ETS) Zerbitzu Teknikoek egiaztatu dute proiektu honek bere xedeari erantzuten diola eta Sektore Publikoko Kontratuen Legeak eta Administrazio Publikoen Kontratuen Legearen Erregelamendu Orokorrak eskatutako baldintzak betetzen dituela, kontrata bidez egikaritzeko behar diren alderdi nahikoak jasotzen baititu; halaber maila formalean berrikusi du proiektua eta berresten du bete egiten duela Sektore Publikoko Kontratuen Legean eta Herri Administrazioen Kontratuen Legearen Erregelamendu Orokorrean ezarritakoa, maila formalean, beharrezko dokumentuak eta indarrean dagoen araudia sartzeari dagokionez, edukiari, sinadurei eta alderdi formalei, beharrezko kalkulu-oinarri eta -hipotesiei eta Sektore Publikoko Kontratuen Legearen 233.1 artikuluan zerrendatutako edukiari dagokienez.

Organo honek eskumena du trenbide sareko proiektuak egiteko eta onartzeko, Lurralde Plangintza, Etxebizitza eta Garraio Sailaren egitura organikoa eta funtzionala ezartzen duen 2021eko urtarrilaren 19ko 11/2021 Dekretuaren 16.2.b) artikuluan xedatutakoaren arabera.

Aipatutako xedapenak, horiekin bat datozenak eta oro har aplikatu beharrekoak ikusita, hau

EBAZTEN DUT:

Lehenengoa.– «Bediako geltokiko trenbide-pasagunea kentzeko eta aparkaleku berria egiteko eraikuntza-proiektua» onartzea. Lizitazioaren oinarrizko aurrekontua, BEZ barne, hiru milioi zazpiehun eta laurogeita bat mila bostehun eta hogeita hamasei euro eta hogeita hiru zentimokoa da (3.781.536,23), eta obrak egiteko epea hamabi (12) hilabetekoa izango dela aurreikusi da.

Bigarrena.– Eraikuntza proiektu hau onartzeak berarekin dakar obrak onura publikokoak edo interes sozialekoak direla deklaratzea, okupatzeko beharra adieraztea eta dagokion Eraikuntza proiektuaren beraren eranskinean zerrendatuta dauden erasandako ondasunak eta eskubideak lehenbailehen okupatu behar direla adieraztea.

Ebazpen hau ez da behin betikoa administrazio-bidean, eta, beraren aurka, interesdunek gora jotzeko errekurtsoa aurkez diezaiokete Azpiegitura eta Garraioetako sailburuordeari, hilabeteko epean, ebazpena jakinarazi edo argitaratu eta hurrengo egunetik aurrera. Idazki hori organo honi edo Azpiegitura eta Garraioetako sailburuordeari bidali beharko zaio.

Administrazio publikoek administrazioarekiko auzi-errekurtsoa jarri ahal izango dute, bi (2) hilabeteko epean, Euskal Autonomia Erkidegoko Justizia Auzitegi Nagusiko administrazioarekiko auzien aretoan, hargatik eragotzi gabe aldez aurretik errekerimendua egitea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan zehaztutako moduan eta epean.

Vitoria-Gasteiz, 2024ko martxoaren 21a.

Garraio Azpiegituren zuzendaria,

MARÍA DOLORES DE JUAN DE MIGUEL.

Azterketa dokumentala