Euskal Herriko Agintaritzaren Aldizkaria

14. zk., 2024ko urtarrilaren 18a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

EUSKAL TRENBIDE SAREA

262

EBAZPENA, 2023ko abenduaren 28koa, Red Ferroviaria Vasca -Euskal Trenbide Sarea erakunde publikoaren kontrataziorako ordezko batzordearena, zeinaren bidez adjudikatzen baita «Burtzeña-Barakaldoko Vega de Tapia kaleko lurzatian dauden lursail eta nabeen okupatzeko eta partzialki erabiltzeko jabari publikoko emakida» (Burtzeñako emakida).

AURREKARIAK

Lehenengoa.– ETSko Ondare Sailak, interesdunak hala eskatuta, Burtzeña-Barakaldo (Bizkaia) Vega de Tapia kaleko lurzatian kokatutako lursail eta nabeak okupatzeko eta partzialki erabiltzeko jabari publikoko emakida izapidetzen hasi zuen ofizioz, apirilaren 13ko 475/2007 Errege Dekretuaren eranskineko 49.4 taldeko 49. dibisioan aurreikusitako jarduera bat garatzeko.

Bigarrena.– 2023ko azaroaren 7an egiaztatu da Euskadiko Ondareari buruzko Legearen testu bategina onartzen duen azaroaren 6ko 2/2007 Legegintzako Dekretuaren 74.3 artikuluan aurreikusitako aurretiazko aldeko txostena eman dela.

Hirugarrena.– Emakidaren aurrekontua 277.063,20 eurokoa da, BEZik gabe, kanon gisa; hilean 2.308,86 euro ordainduko dira (BEZik gabe), eta ETSk egindako euskarri-tasazio ofizialaren arabera zehaztuko da. Egikaritzeko hasierako epea hamar (10) urtekoa da, eta bi alderdiak ados jarrita luzapenak egin daitezke, gehienez ere beste hamar (10) urte, Euskadiko Ondareari buruzko Legearen testu bategina onartzen duen azaroaren 6ko 2/2007 Legegintzako Dekretuaren 80.2 artikuluan xedatutakoaren arabera.

Laugarrena.– 2023ko azaroaren 24an, EHAAn argitaratu zen Red Ferroviaria Vasca-Euskal Trenbide Sarearen Kontratarako Batzorde Delegatuaren lehendakariaren 2023ko azaroaren 9ko Ebazpenaren iragarkia. Ebazpen horren bidez, «Burtzeña-Barakaldoko Vega de Tapia kaleko lurzatian dauden lursail eta nabeak okupatzeko eta partzialki erabiltzeko jabari publikoko emakidaren» espedientea eta gastua onartu ziren. Bertan, 30 eguneko epea ezartzen zen, EHAAn argitaratu eta hurrengo egunetik aurrera, ondasun bera okupatzeko beste eskaera batzuk aurkezteko, interesdunak nahi zuen helburu berarekin.

Epe hori igaro da, eta ez da horri buruzko eskaerarik jaso.

OINARRI JURIDIKOAK

Lehenengoa.– Aurrekarietan aipatutako hasitako espedientearen xedea da jabari publikoko emakida bat arautzea erabilera pribatiborako, Euskadiko Ondareari buruzko Legearen testu bategina onartzen duen azaroaren 6ko 2/2007 Legegintzako Dekretuaren 68.b) artikuluan aurreikusitakoaren arabera, Burtzeña-Barakaldoko (Bizkaia) Vega de Tapia kaleko lurzatian kokatutako lursailen barruan 3.609,46 m²-ko azalera partzialki okupatzeko eta erabiltzeko, salgaien errepideko garraioaren merkataritza-jarduera bat garatzeko.

Bigarrena.– Higiezin hori herri-jabariko ondasuna da, Euskal Autonomia Erkidegoko Administrazio Orokorraren (EAEAO) titulartasunekoa, eta Euskal Trenbide Sarea-Red Ferroviaria Vasca (aurrerantzean, ETS) ente publikoari atxikita dago. Emakidadunak proposatutako jarduera garatzeko erabiliko da zati batean, eta, horretarako, behar diren espedienteak izapidetu beharko ditu, emakida ustiatzeko eta bere jarduera gauzatzeko eska daitezkeen mota guztietako baimenak eta lizentziak bere kontura eta arriskura lortzeko.

Hirugarrena.– Erreferentziako espedientean jasotako dokumentazioa eta informazioa aztertuta, behar bezala betetzen da Euskadiko Ondareari buruzko Legearen testu bategina onartzen duen azaroaren 6ko 2/2007 Legegintzako Dekretuan jabari publikoko emakidei buruz aurreikusitakoa.

Laugarrena.– Euskadiko Ondareari buruzko Legearen testu bateginaren 70.2 artikuluan xedatutakoaren arabera, ETSri dagokio, ondasuna atxikita duen erakundea den aldetik, administrazio-baimenei buruzko espedienteak izapidetzea.

Bosgarrena.– Emakida-erabakian jaso beharreko edukiari dagokionez, espedientean jasotako dokumentazioan eta informazioan honako hauek daude jasota.

– Ondasuna edo eskubidea erabiltzeko araubidea.

– Baimenak edo emakidak bete beharreko ekonomia-araubidea.

– Jarri beharreko bermea, hala badagokio.

– Kontserbazio- eta mantentze-gastuak, zergak, tasak eta gainerako tributuak bere gain hartzea, bai eta ondasuna bere izaeraren arabera erabiltzeko eta jasotzen den egoeran entregatzeko konpromisoa ere.

– Ondasunaren erabilerak edo haren gainean egin beharreko jarduerak eskatzen dituen lizentzia eta baimen guztiak bere kontura eskuratzeko konpromisoa.

– Okupazioaren ondoriozko erantzukizuna bere gain hartzea, eta, hala badagokio, dagokion aseguru-poliza formalizatzeko betebeharra aipatzea.

– Lagatzaileak emakidaren xede den ondasuna ikuskatzeko ahalmena gordetzea, emakidaren baldintzen arabera erabiltzen dela bermatzeko.

– Epea eta, hala badagokio, luzapen- eta subrogazio-araubidea; nolanahi ere, aldez aurreko baimena beharko da.

Seigarrena.– Hautatutako esleipen-prozedura Euskadiko Ondareari buruzko Legearen testu bateginaren 74.3 artikuluan araututako konkurrentzia-prozedura da, eta hori emateko, lege-testu beraren 74.4 artikuluan ezarritakoari jarraituko zaio.

EHAAn iragarki bat argitaratu beharko da, interesdunak aurkeztutako eskaerari erantzuteko emakida emateko baldintzak jasotzen dituena. Hona hemen xehetasunak:

– Eskatzailea: Enkarpack Logistics, S.L.

– Xedea: Burtzeña-Barakaldo inguruan 3.609,46 m²-ko azalera okupatzea eta erabilera pribatiboa egitea, N9516599H, U3013723E eta 013-1104-05001 erreferentziadun pabiloietatik eta jatorrizko lurzatitik hartuta, hurrenez hurren.

– Hasierako okupazio-epea: 10 urte, okupazio hori berritzeko aukerarekin, bi alderdiak ados jarrita, gehienez 10 urte gehiagoz.

– Enpresak proposatutako aldez aurreko lanak eta bere jarduera garatzeko kokalekua egokitzeko eta/edo gaitzeko beharrezkoak izan daitezkeen gainerako lan osagarriak enpresaren kontura izango dira, eta haren kontura izango dira kontserbazio- eta mantentze-lanek, zaintzak eta segurtasunak, zergek, tasek eta gainerako tributuek eragindako gastuak, bai lursailaren titulartasunari lotutakoak, bai bertan garatu beharreko jarduerari lotutakoak, bai eta okupazio horren xede diren ondasunak izaeraren arabera erabiltzeko eta jasotzen dituen egoeran itzultzeko konpromisoa ere.

– Sarbidea, lurrak dauden tokira sartzeko gune komun bakarra den aldetik, libre, hutsik eta kontserbazio- eta segurtasun-egoera onean mantendu beharko da, esleituta duen aurreikusitako helmugarako erabilgarria eta eraginkorra dela ziurtatzeko, eta egiazko bide-zorra eskatutako okupazioarekin zerikusirik ez duen gainerako lursailaren aldekoa izango da.

– Okupatuko diren lursailak kokatuta dauden lurzatiaren barruko igarotze- eta/edo zirkulazio-araubideari dagokionez, kokalekuan dauden gainerako okupatzaileekin eta/edo jarduerekin koordinatu beharko da, bateragarri egin ahal izateko, interesdun guztiek jarduera normaltasunez garatu ahal izan dezaten.

– Eskatzaileak berak hartuko du lursailen erabilerak eta/edo horien gainean egin beharreko jarduerak eskatzen dituen lizentzia eta baimen guztiak bere kontura lortzeko konpromisoa.

– Behar ez bezala sartzea eta tren-instalazioei edozein kalte edo galera eragitea eskatzailearen erantzukizuna izango da, eta okupazio-aldian sortzen diren konponketa-gastuak eta erantzukizunak eskatzailearen kontura izango dira.

– Aldi baterako okupazio horrek ez dio inolako erantzukizunik ekarriko ETSri, eta eskatzailea izango da ezarritako epean mantentzearen eta segurtasun-baldintzen arduraduna.

– ETSk eta Euskal Autonomia Erkidegoko Administrazio Orokorrak ez dute inolako erantzukizunik izango instalazioen aldi baterako okupazioaren eta erabileraren ondorioz interesdunek (okupatzaileek eta, oro har, eraginpean egon daitezkeen hirugarrenek) jasan ditzaketen kalteengatik.

– Era berean, ETSk eta Euskal Autonomia Erkidegoko Administrazio Orokorrak ez dute inolako erantzukizunik izango okupatzaileak edo hirugarren erabiltzaileek trenbide-instalazioetan eta lursailetan eragin ditzaketen kalteengatik.

– Une oro, lursailean doazenek Trenbideko teknikariek emandako jarraibideak bete beharko dituzte, hala eskatuz gero.

– Instalazio horietan egin beharreko edozein obra, lan eta/edo egokitzapen-jarduketa, txosten honetan aipatutakoez gain, aldez aurretik jakinaraziko zaio ETSri, teknikariek adostasuna eman dezaten eta gauzatzeko beharrezkoak diren baldintzak zehaztu ditzaten.

– Eskatzaileak erantzukizun zibileko aseguru-poliza bat entregatuko du ETSn, prima ordaindu izanaren dagokion frogagiriarekin batera, aipatutako kontingentziak estaltzeko; poliza horrek frankizia bat ezarria badu, eskatzaileak edo haren izenean jarduten duenak pertsonalki erantzungo dio frankiziaren zenbatekoari.

– Ez da beharrezkotzat edo nahitaezkotzat jotzen interesdunak fidantza gehigarria eratzea.

– Hasieran, emakida honi dagokion zenbatekoa honako hau izango da: hileko alokairua 2.308,86 euro hilean (BEZik gabe).

– Zenbateko hori urtero handituko da okupazioaren indarraldiko urte bakoitzean, eta eguneratu egingo da Estatistikako Institutu Nazionalak, EUSTATek edo Euskal Autonomia Erkidegoan hura ordezka dezakeen antzeko erakundeak onartzen duen Euskal Autonomia Erkidegoan aplikatu beharreko kontsumoko prezioen indizeak izandako aldakuntzaren arabera, aurreko urte arteko aldiari dagokionez.

– Okupazio hori, ematen denetik ondorioak izatea alde batera utzi gabe, Irauregi-Lutxana lineako trenbide-garraioa martxan jartzeak baldintzatuko du, ETSrentzat lehentasunezkoa izango baita. Ildo horretan, trenbideko garraioari berriro ekin zaiola egiaztatzen bada, eta garraioa garatzeko beharrezkoa eta/edo komenigarria bada, okupazioaren baldintzak berrikusi egingo dira (eta, hala badagokio, okupazioa ebazteko eta/edo amaitzeko aukera ere izango da), inolako kontraprestaziorik eta/edo konpentsaziorik sortu gabe. Era berean, interesdunak, okupazio hau dagoen lursailean kokatutako gainerako garraio-operadoreen konkurrentzia-erregimenean eta baldintza berberetan, trenbide-garraioko salgaien azken garraioa –instalazioetatik entrega-puntuetaraino– trenbide-operadorearekin hitzartu beharreko egintza edo negozio juridikoaren bidez egiteko prest egon beharko du.

– ETSk berariaz gordeko du emakidaren xede den ondasuna edozein unetan ikuskatzeko ahalmena, baliozkotutako xedearen eta/edo xedearen arabera erabiltzen dela bermatzeko eta, era berean, baimendutako termino eta baldintzen arabera erabiltzen dela bermatzeko.

Interesdunek 30 eguneko epea izango dute, EHAAn argitaratu eta hurrengo egunetik aurrera, ondasun bera okupatzeko beste eskaera batzuk aurkezteko, interesdunak nahi duen helburu berarekin. Epea amaitzeko eguna balioduna ez bada, hurrengo egun baliodunera luzatuko da automatikoki.

Aurrekarietan ut supra ezarritakoaren arabera (iragarkia EHAAn argitaratu zen), epea igaro ondoren, ez da jaso «Burtzeña-Barakaldoko Vega de Tapia kaleko lurzatian dauden lursail eta nabeen okupatzeko eta partzialki erabiltzeko jabari publikoko emakidan» interesa duen pertsona juridiko edo fisiko baten proposamenik.

Horiek horrela, ETSren Kontratazio Batzorde Delegatuak honako hau

EBAZTEN DU:

Lehenengoa.– Enkarpack Logistics, S.L.ri esleitzea «Burtzeña-Barakaldoko Vega de Tapia kaleko lurzatian dauden lursail eta nabeak okupatzeko eta partzialki erabiltzeko jabari publikoko emakida (3.609,46 m2)». Aurrekontua 277.063,20 eurokoa da, BEZik gabe, kanon gisa, hilean 2.308,86 euro ordainduko dira (BEZik gabe), eta hamar (10) urteko epea du lanak egiteko, gehienez ere beste hamar (10) urtez luzatzeko aukerarekin.

Emakidaren xedea da Burtzeña-Barakaldo eremuan 3.609,46 m²-ko azalera okupatzea eta erabilera pribatiboa egitea. Azalera hori N9516599H, U3013723E eta 013-1104-05001 erreferentziadun pabiloietatik eta jatorrizko lurzatitik dator, hurrenez hurren.

Bigarrena.– Euskal Herriko Agintaritzaren Aldizkarian argitaratzeko agintzea.

Bilbao, 2023ko abenduaren 28a.

ETS-RFVko zuzendari nagusiaren ordez.

Kontratazio Batzordeko lehendakaria,

MARÍA DOLORES DE JUAN DE MIGUEL.

Azterketa dokumentala