RSS
12. zk., 2024ko urtarrilaren 16a, asteartea
- Bestelako formatuak:
- PDF (95 KB - 1 orri.)
- EPUB (101 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
BESTELAKO XEDAPENAK
EKONOMIAREN GARAPEN, JASANGARRITASUN ETA INGURUMEN SAILA
204
EBAZPENA, 2023ko abenduaren 1ekoa, Arrantza eta Akuikulturako zuzendariarena, zeinaren bidez aldatzen baita 2023ko irailaren 26ko Ebazpena, aisialdirako ontziak gobernatzeko tituluak eskuratzeko 2024ko azterketa arruntetarako deialdia egiten duena.
Arrantza eta Akuikulturako zuzendariaren 2023ko irailaren 26ko Ebazpenaren bidez aisialdirako ontziak gobernatzeko tituluak eskuratzeko 2024ko azterketa arruntetarako deialdia egin da (2023ko urriaren 9ko EHAA, 193. zk.)
Zailtasunak agertu direnez 1. deialdiko azterketa teorikoak egingo diren instalazioen erabilgarritasunari dagokionez, beharrezkoa da ebazpen hori aldatzea, azterketak egiteko data berriak eta eskabideak aurkezteko epe berriak ezartzeko.
Arrantza eta Akuikultura Zuzendaritzak, Ekonomiaren Garapen, Jasangarritasun eta Ingurumen Sailaren egitura organikoa eta funtzionala ezartzen duen otsailaren 23ko 68/2021 Dekretuaren 18.1.o artikuluak ematen dizkion ahalmenak erabiliz, honako hau
EBAZTEN DUT:
Lehenengo artikulua.– Aisialdirako ontziak gobernatzeko tituluak eskuratzeko 2024ko azterketa arruntetarako 1. deialdia aldatzea. Arrantza eta Akuikulturako zuzendariaren 2023ko irailaren 26ko Ebazpenak ezarri zuen aisialdirako ontziak gobernatzeko tituluak eskuratzeko 2024ko azterketa arruntetarako deialdia. Aldaketa honela egingo da:
«1. deialdia.– 2024ko martxoaren 11tik aurrera, honako titulu hauek eskuratzeko:
a) Oinarrizko nabigazioko patroia.
b) Aisialdirako ontzietako patroia.
c) Yateko patroia.
d) Yateko kapitaina.»
Bigarren artikulua.– Arrantza eta Akuikulturako zuzendariaren 2023ko irailaren 26ko Ebazpenaren lehenengo oinarriko 6. paragrafoa aldatzea, azterketa teorikoen 1. deialdian parte hartzeko eskabideak aurkezteko epeari dagokionez. Ebazpen horren bidez, 2024an aisialdirako ontziak gobernatzeko titulazioak lortzeko ohiko azterketetarako deialdia egiten da. Seigarren paragrafoa honela geratuko da:
«– 1. deialdia, 2024ko martxoan: 2024ko urtarrilaren 29tik otsailaren 16ra arte.»
Vitoria-Gasteiz, 2023ko abenduaren 1a.
Arrantza eta Akuikulturako zuzendaria,
LEANDRO AZCUE MUGICA.
