Euskal Herriko Agintaritzaren Aldizkaria

245. zk., 2023ko abenduaren 27a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

BERDINTASUN, JUSTIZIA ETA GIZARTE POLITIKETAKO SAILA

5744

187/2023 DEKRETUA, abenduaren 13koa, Minbiziaren aurkako Espainiako Elkartea gizarte-interesekotzat aitortzeko.

Zerbitzu Sozialei buruzko abenduaren 5eko 12/2008 Legearen 74. artikuluak xedatzen duenez, gizarte-intereskotzat deklaratu ahal izango dira zerbitzu sozialak ematen dituzten irabazi-asmorik gabeko erakundeak –arauz zehaztutako baldintzak betetzen dituztenak–, hain zuzen, Gizarte-Ekintzako Hirugarren Sektoreak Autonomia Erkidegoan gizarte-zerbitzuak garatzen egiten duen ibilbidea eta ekarpena aitortzeko.

Gizarte-zerbitzuetako irabazi-asmorik gabeko erakundeak gizarte-intereseko deklaratzeari buruzko urriaren 7ko 424/2013 Dekretuak arautzen ditu gizarte-intereseko deklarazioa lortzeko bete behar diren baldintzak eta aplikatu beharreko prozedura, eta adierazten du Euskal Autonomia Erkidegoan gizarte-zerbitzuen esparruan jarduten duten irabazi-asmorik gabeko erakundeei aplikatuko zaiela, edozein dela ere haien forma juridikoa, baldin eta, halakotzat hartuta, dagokien Gizarte Zerbitzuen Erregistroan inskribatuta badaude, autonomia-erkidegokoa zein foru-aldundikoa izan, jarduera-eremuaren arabera.

Hala, Minbiziaren aurkako Espainiar Elkarteari dagokionez, gizarte-intereseko hiru aitortza egin dira, Euskal Autonomia Erkidegoko Lurralde Historiko bakoitzeko bana. Hara: Bizkairako, gizarte-intereseko deklaratu zen 137/2014 Dekretuaren bidez (ekainaren 24koa, Minbiziaren aurkako Espainiako Elkartearen Bizkaiko Batzordea gizarte-interesekotzat aitortzeko); Gipuzkoarako, 153/2015 Dekretuaren bidez (uztailaren 27koa, Minbiziaren aurkako Espainiako Elkartea, Gipuzkoako Batzordea, gizarte-intereseko aitortzeko.); eta Arabarako, 209/2015 Dekretuaren bidez (azaroaren 10ekoa, Minbiziaren aurkako Espainiako Elkartea (AECC), Arabako Probintzia Batzordea, gizarte-interesekotzat aitortzeko).

Kontuan hartuta Minbiziaren aurkako Espainiako Elkartea pertsona juridiko bakarra dela, bere barne-antolaketa edozein dela ere, eta interes sozialeko jarduerak egiten dituela euskal lurralde-eremu osoan, egokitzat jotzen da Minbiziaren Aurkako Espainiako Elkartea interes sozialekotzat jotzea, adierazpen bakar batean jasota gera dadin, erregistroko desadostasunak edo bikoiztasunak saihesteko.

Urriaren 7ko 424/2013 Dekretuan xedatutakoaren arabera, gizarte-intereseko deklarazioa Gobernu Kontseiluak erabakitako Dekretu bidez egingo da, dagokion espedientea izapidetu duen gizarte-politiken arloko eskumena duen sailburuak proposatuta.

Ondorioz, Berdintasun, Justizia eta Gizarte Politiketako Sailburuaren proposamenez, eta 2023ko abenduaren 13ko Gobernu Kontseiluak proposamena aztertu eta onartu ondoren, hau

XEDATZEN DUT:

1. artikulua.– Minbiziaren aurkako Espainiako Elkartea gizarte-interesekoa dela deklaratzea, burutzen dituen gizarte-ekintzen bidez Euskal Autonomia Erkidegoan gizarte-zerbitzuak garatzen laguntzeagatik.

2. artikulua.– Minbiziaren aurkako Espainiako Elkarteari aitorpen honen berezko eskubideak aitortzea, Gizarte Zerbitzuei buruzko abenduaren 5eko 12/2008 Legearen 74. artikuluan xedatutakoak.

Vitoria-Gasteizen, 2023ko abenduaren 13an.

Lehendakaria,

IÑIGO URKULLU RENTERIA.

Berdintasun, Justizia eta Gizarte Politiketako sailburua,

NEREA MELGOSA VEGA.

Azterketa dokumentala