RSS
243. zk., 2023ko abenduaren 22a, ostirala
- Bestelako formatuak:
- PDF (145 KB - 3 orri.)
- EPUB (127 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
BESTELAKO XEDAPENAK
EKONOMIAREN GARAPEN, JASANGARRITASUN ETA INGURUMEN SAILA
5690
EBAZPENA, 2023ko azaroaren 5ekoa, Proiektu Estrategikoen eta Industria Administrazioaren zuzendariarena, zeinaren bidez ondasun eta eskubideen zerrenda onartzen baita, «Ampliación Buruntza» (4.729 zenbakia) ustiatzeko emakidan jasotzen diren lurren desjabetze-espedientea prozedura arruntaren bidez hasteko. Lur horien titulartasuna Sociedad Financiera y Minera, SArena da.
I.– Sociedad Financiera y Minera SA merkataritza-sozietateak, «Ampliación Buruntza» izeneko C) Ataleko baliabideak ustiatzeko emakidaren titular gisa, Ekonomiaren Garapen, Jasangarritasun eta Ingurumen Sailari eskatu dio desjabetze-espedientea hasteko, Andoaingo udalerrian dagoen «Ampliación Buruntza» meatze-ustiategiko lanek, instalazioek eta zerbitzuek ukitzen dituzten ondasunak eta eskubideak okupatu ahal izateko.
II.– Meategien Legeak 105.3 artikuluan, bere Erregelamenduaren 131.3 artikuluarekin lotuta, ezartzen duenaren arabera, gaur egun «Ampliación Buruntza» izenekoarekin bat datorren harrobiaren ustiapen-proiektua eta urteko lan-planak onartzearekin batera lursailak okupatu beharra ezartzen da; alabaina, Nahitaezko Desjabetzeari buruzko Legearen 17.2 artikuluan xedatutakoaren arabera, desjabetu beharrekotzat jotzen diren ondasun edo eskubideen zerrenda zehatza eta banakakoa egin beharko du onuradunak. Merkataritza-sozietateak desjabetzeari ekiteko eskatu du zerrenda hori, idatziz.
III.– Indarrean dagoen 1954ko abenduaren 16ko Nahitaezko Desjabetzeari buruzko Legearen 17. artikuluaren eta hurrengoen arabera, 2023ko martxoaren 6an, desjabetu beharreko ondasun eta eskubideen zerrendari buruzko iragarkia eman zen, interesdunek hamabost eguneko epean alegazioak egin zitzaten ondasunak okupatu edo erabiltzeko bidezkotasunari buruz, ondasun horien egoera material edo legalari buruz eta egoki iritzitako beste edozein egoerari buruz. Iragarki hori Euskal Herriko Agintaritzaren Aldizkarian eta Gipuzkoako Lurralde Historikoaren Aldizkari Ofizialean argitaratu zen, martxoaren 15ean, eta Diario Vascon, martxoaren 9an. Halaber, interesdunei bidali zitzaien, eta 2023ko martxoaren 6an Andoaingo udaletxeko iragarki-oholean jarri zen.
Aipatu diren lege-xedapenak eta oro har eta kasu honi aplika dakizkiokeen arauak aztertu dira.
EBAZTEN DUT:
Lehenengoa.– Onartzea ebazpen honen eranskinean agertzen diren ondasunen eta eskubideen zerrenda, Sociedad Financiera y Minera SA merkataritza-sozietatearen titulartasunpeko «Ampliación Buruntza» (4.729 zenbakia) izeneko ustiapen-emakidan zerrendatzen diren lurren desjabetze-espedientea prozedura arruntaren bidez hasteko.
Bigarrena.– Ustiapenak ukituko dituen ondasunen eta eskubideen deskribapena behean zehaztutakoa da, Ekonomiaren Garapen, Jasangarritasun eta Ingurumen Saileko Proiektu Estrategikoen eta Industria Administrazioaren Zuzendaritzan dagoen espedientearen arabera (Donostia kalea 1 – Lakua 1, 01010 Vitoria-Gasteiz):
Hala ere, 2023ko martxoaren 6ko iragarkian finkaren datuak eta katastroko erreferentzia hartu ziren abiapuntutzat, onuradunak desjabetze-eskabidean aurkeztutakoa (Katastroko erref.: 341212; Azpikola Abaloz errekaren ondoan. Andoaingo 1. poligonoko 1. partzela, 564.849 m2-ko azalerarekin) baina partzela hori, Gipuzkoako katastroaren ondorengo eguneraketaren arabera, katastroko erreferentzia bereko eta Azpikola lursaila izeneko lurzatian banandu da, 271.482 m2-ko azalerarekin. Bestalde, Tolosako Jabegoaren Erregistroari finka horri dagokion erregistro-ohar soila eskatu zitzaion eta, bertan, honako datu hauek jasotzen dira:
Liburukia: 2038.
Liburua: 204 Andoaingoa.
Folioa: 83.
Finka: 39/T.
CRU: 20005000054026.
Titularra: Azpikola,2004,SL.
Deskribapena:
Landakoa: 287.356,78 m2-ko azalera.
Ondorioz, desjabetu beharreko azalera aipatzen eta berregokitzen da, desjabetu beharreko ondasunak onartzeko.
Hirugarrena.– Nahitaezko Desjabetzeari buruzko Legearen 20. eta 21. artikuluetan eta haren Erregelamenduaren 19. eta 20. artikuluetan ezarritakoa betez, Euskal Herriko Agintaritzaren Aldizkarian eta Gipuzkoako Lurralde Historikoaren Aldizkari Ofizialean, «Diario Vasco» egunkarian eta Andoaingo Udaleko iragarki-oholean argitaratzea, eta interesdunei banan-banan jakinaraztea.
Laugarrena.– Ebazpen honen aurka gora jotzeko errekurtsoa aurkeztu ahalko zaio Industria Sailburuordetzari, hilabeteko epean, hura jakinarazten denetik hasita, Administrazio Publikoen Administrazio Prozedura Erkideari buruzko Legean (urriaren 1eko 39/2015 Legean) ezarritakoaren arabera.
Vitoria-Gasteiz, 2023 azaroaren 5a.
Proiektu Estrategikoen eta Industria Administrazioaren zuzendaria,
ZIGOR URQUIAGA URQUIZA.
