Euskal Herriko Agintaritzaren Aldizkaria

237. zk., 2023ko abenduaren 14a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

EKONOMIAREN GARAPEN, JASANGARRITASUN ETA INGURUMEN SAILA
EKONOMIA ETA OGASUN SAILA

5554

179/2023 DEKRETUA, azaroaren 28koa, zeinaren bidez SPRI-Enpresen Garapenerako Euskal Agentziari baimena ematen baitzaio Sociedad Parque Científico y Tecnológico de Gipuzkoa – Gipuzkoako Zientzia eta Teknologia Parkea SA sozietatearen kapital-zabalkuntzan parte hartzeko, eta, halaber, baimena ematen baitzaie Euskal Autonomia Erkidegoko Administrazio orokorraren eta instituzionalaren zuzeneko eta zeharkako titulartasuneko akzioen ordezkariei onespena eman dezaten sozietate horren estatutuen 2. artikulua aldatzeko.

SPRI-Enpresen Garapenerako Euskal Agentziak Gipuzkoako Zientzia eta Teknologia Parkea SA sozietate publikoaren kapital sozialean parte hartzen du, eta haren akziodun nagusia da.

Gipuzkoako Zientzia eta Teknologia Parkea SA sozietatearen xedea da industria-arloko ekimenak eta inbertsioak bultzatzea eta sustatzea. Horretarako, zenbait eraikin eraikiko ditu, eta lursail-multzoak egokituko, zeinen ustiaketa kudeatuko baitu errentamendu-formulen bidez, jabetza-eskualdatze bidez edo beste edozein bide erabiliz, prekarioko lagapena barne. Sozietateak, halaber, lokal eta zerbitzuak sustatu eta merkaturatuko ditu, teknologia zabaldu eta eskualdatzeko jarduerak gauzatuko ditu, eta parkean ezartzekoak diren enpresa hautagaiak gonbidatu eta aukeratuko ditu, hau da, teknologia aurreratuan jarduerak egingo dituzten enpresak.

Gipuzkoako Zientzia eta Teknologia Parkea SA sozietateak kapitala handitu behar du espazioa berrantolatzeko; izan ere, hainbat bulego eta garaje eskuratu behar ditu, okupazio-maila handia baita.

SPRI-Enpresen Garapenerako Euskal Agentziaren Administrazio Kontseiluak baimena eskatu du Gipuzkoako Zientzia eta Teknologia Parkea SA sozietatearen kapital-zabalkuntzan parte hartzeko. Baimen hori beharrezkoa da Euskadiko Ondareari buruzko Legearen 110.1 artikuluan xedatutakoaren arabera (azaroaren 6ko 2/2007 Legegintzako Dekretuaren bidez onartu zen lege horren testu bategina); izan ere, artikulu horrek ezartzen du enpresa-ondarea osatzen duten ondasunak eta eskubideak eskuratzeko, aurretiaz, Gobernu Kontseiluaren baimena behar dela, dekretu bidez emana.

Aurreikusitako eragiketan, SPRI-Enpresen Garapenerako Euskal Agentziak, guztira, 1.200.000 euroko zenbatekoarekin parte hartuko luke kapital-zabalkuntza horretan, hau da, proposatutako zabalkuntzaren % 100. Horren ondorioz, % 68,11ra igoko litzateke Gipuzkoako Zientzia eta Teknologia Parkea SAren kapitalean duen partaidetza.

Kapital-zabalkuntzak berarekin dakar kapital-sozietateen estatutuen artikulua berridatzi beharra. Hori dela eta, Euskadiko Ondareari buruzko Legearen testu bateginaren 111.2 artikulua aplikatu behar da, zeinak hau baitio: zuzenean nahiz zeharka Euskal Autonomia Erkidegoko Administrazio orokorraren edo instituzionalaren titulartasunpekoak diren akzioen ordezkariek sozietate-estatutuak onartzeko edo aldatzeko onarpena emateko, Gobernu Kontseiluaren baimena beharko dute, ondareari buruzko eskumenak dituen sailburuak eta sozietatea loturik duen sailburuak biek batera proposaturik.

Ondorioz, Ekonomiaren Garapen, Jasangarritasun eta Ingurumeneko sailburuak eta Ekonomia eta Ogasuneko sailburuak batera proposaturik, eta Gobernu Kontseiluak 2023ko azaroaren 28ko bileran proposamena aztertu eta onartu ondoren, honako hau

XEDATZEN DUT:

1. artikulua.– SPRI-Enpresen Garapenerako Euskal Agentziari baimena ematea Gipuzkoako Zientzia eta Teknologia Parkea SA sozietatearen kapital-zabalkuntzan parte hartzeko. Milioi bat eta berrehun mila (1.200.000) eurokoa izango da parte-hartzea, hau da, zabalkuntzaren % 100. Eragiketa horren ostean, % 68,11ko partaidetza izango du SPRI-Enpresen Garapenerako Euskal Agentziak sozietate horretan.

2. artikulua.– SPRI-Enpresen Garapenerako Euskal Agentziaren titulartasunekoak diren akzioen ordezkariei baimena ematea onespena eman dezaten kapital-zabalkuntzaren ondorioz Gipuzkoako Zientzia eta Teknologia Parkea SA sozietatearen estatutuen 2. artikulua aldatzeko. Artikulu horren idazketan jasoko da sozietatearen kapitalaren zenbateko berria.

AZKEN XEDAPENA

Dekretu honek onartzen den egunetik aurrera izango ditu ondorioak.

Vitoria-Gasteizen, 2023ko azaroaren 28an.

Lehendakaria,

IÑIGO URKULLU RENTERIA.

Ekonomiaren Garapen, Jasangarritasun eta Ingurumeneko sailburua,

MARÍA ARANZAZU TAPIA OTAEGUI.

Ekonomia eta Ogasuneko sailburua,

PEDRO MARÍA AZPIAZU URIARTE.

Azterketa dokumentala