![Euskal Herriko Agintaritzaren Aldizkaria](/appcont/servibopvi/images/bopv_anuncio_e.png)
181. zk., 2023ko irailaren 21a, osteguna
- Bestelako formatuak:
- PDF (104 KB - 2 orri.)
- EPUB (101 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
BESTELAKO XEDAPENAK
SEGURTASUN SAILA
4361
AGINDUA, 2023ko irailaren 12koa, Jaurlaritzako lehenengo lehendakariorde eta Segurtasuneko sailburuarena, Zibersegurtasunaren Euskal Agentzia Zuzenbide Pribatuko Erakunde Publikoaren jardueren hasiera zehazten duena.
Ekainaren 29ko 7/2023 Legearen bidez, Zibersegurtasunaren Euskal Agentzia sortu zen, Euskal Autonomia Erkidegoko sektore publikoko zuzenbide pribatuko erakunde publiko gisa. Nortasun juridiko propioa du, bere jarduera ordenamendu juridiko pribatura egokitzen da, bere helburuak betetzeko jarduteko gaitasun osoa du, eta autonomia organikoa eta funtzionala du, eta segurtasunaren arloan eskumena duen sailari atxikita dago, Segurtasun Sailburuordetzaren titularraren bidez.
Agentziaren xedea da zibersegurtasuna sustatzea eta koordinatzea Euskal Sektore Publikoari buruzko maiatzaren 12ko 3/2022 Legean zehaztutako euskal sektore publikoan, sektore horren eskumeneko informazio-sistemen eta sare elektronikoen segurtasunaren esparruan, eta Euskal Autonomia Erkidegoaren, haren administrazio publikoaren, herritarren eta enpresa-sarearen zibersegurtasuneko gaikuntza eta garapen digital segurua bultzatzea.
Legearen azken xedapenetako lehenengoak Agentziaren eraketa arautzen du, eta martxan jartzea aurreikusten du. Agentziaren jarduerak abian jartzeko eta hasteko data haren estatutuak onartzen dituen dekretuan ezarritakoa izango da, eta, nolanahi ere, legea indarrean jarri eta sei hilabete igaro baino lehen, hau da, 2023ko uztailaren 20a baino lehen.
Gaineratu duenez, jardueren hasiera ez badator bat dagokion aurrekontu-legea indarrean jartzearekin, Eusko Jaurlaritzak agentziaren aurrekontua onartuko du, eta, horrekin batera, jarduerak hasten dituen ekitaldi ekonomikoari dagozkion aurreikusitako urteko kontuak aurkeztuko ditu. Aurrekontu horren berri emango zaio Eusko Legebiltzarreko Ekonomia, Ogasun eta Aurrekontu Batzordeari, hamabost eguneko epean.
Horretarako, aurrekontu-gaietan eskumena duen sailari baimena ematen zaio aurrekontu hori osatzeko behar diren aldaketak egiteko, baina aldaketa horiek ezin izango dute handitu erakunde publikoaren jardueren hasieran indarrean zeuden aurrekontu orokorretako partidetan esleitutako zenbateko globala.
Gaur egun, Agentziaren estatutuak presaz izapidetuko dira. Hala ere, epeak luzaezinak direnez, beharrezkoa da erakunde berri horren jardueren hasiera aurreratzea, legea indarrean jarri eta sei hilabeteko epea baino lehen bere eginkizunak osorik hartzeko moduan egon dadin.
Legegilea premiazkotasun horren jakitun izan da; horregatik, ekainaren 29ko 7/2023 Legeak, Zibersegurtasunaren Euskal Agentzia sortzekoak, azken xedapenetako lehenengoan ezartzen du Agentziaren jarduerak indarrean jarri eta sei hilabete igaro baino lehen has daitezkeela, estatutuak onartu ez badira. Xedapen horrek aukera ematen du erakundearen jarduerak hasteko, erakunde berriaren estatutuak onartu gabe eta gobernu-organoak eratu gabe ere, nahiz eta legeak berak arautzen dituen haren eginkizunak.
Beraz, legegileak dioen bezala, beharrezkoa da jardueren hasiera aurreratzea erakundearen estatutuak onartu aurretik, Zibersegurtasunaren Euskal Agentzia sortzeari buruzko ekainaren 29ko 7/2023 Legearen xedapen gehigarrian aipatzen diren aktibo materialak eta langileak lagatzeko eta abian jartzeko beharrezkoak diren jarduketak egiteko.
Agentziaren Administrazio Kontseiluko presidentea den aldetik, Jaurlaritzako lehenengo lehendakariorde eta Segurtasuneko sailburua gaituta dago Agentziaren erabateko funtzionamendurako beharrezkoak diren jarduketa guztiak egiteko. Gaikuntza hori garrantzitsua da erakunde berriaren Administrazio Kontseiluaren eginkizunak ordezteko, hura eratu arte.
Adibidez, Agentziaren Zuzendaritza bere gain hartuko duen pertsona izendatzeko Gobernu Kontseiluari zuzenean egindako proposamenean, Agentziaren ohiko funtzionamendurako beharrezko jarduera delako.
Horrenbestez, honako hau
EBAZTEN DUT:
Lehenengoa.– Zibersegurtasunaren Euskal Agentzia 2023ko irailaren 13an hasi zen lanean.
Bigarrena.– Agindu hau Euskal Herriko Agintaritzaren Aldizkarian argitaratzea.
Vitoria-Gasteiz, 2013ko irailaren 12a.
Jaurlaritzako lehenengo lehendakariorde eta Segurtasuneko sailburua,
JOSU IÑAKI ERKOREKA GERVASIO.