Euskal Herriko Agintaritzaren Aldizkaria

139. zk., 2023ko uztailaren 21a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

LAN ETA ENPLEGU SAILA

3562

EBAZPENA, 2023ko uztailaren 14koa, Lanbide-Euskal Enplegu Zerbitzuko zuzendari nagusiarena, zeinaren bidez argitaratzen baita langile kualifikatuen eskari altuko sektoreetan prestakuntza-jarduerak egiteko 2023. urterako dirulaguntza-deialdia, lehentasunez langile langabeei zuzenduta, Euskal Autonomia Erkidegoan Enplegurako Lanbide Heziketa arautzen duen maiatzaren 31ko 82/2016 Dekretuak ezarritako esparruan.

2023ko uztailaren 13ko bilkuran hartutako erabaki baten bidez, Lanbide-Euskal Enplegu Zerbitzuaren Administrazio Kontseiluak 2023. urterako dirulaguntza-deialdia onartu du langile kualifikatuen eskari altuko sektoreetan prestakuntza-jarduerak egiteko, lehentasunez langile langabeei zuzenduta, Euskal Autonomia Erkidegoan Enplegurako Lanbide Heziketa arautzen duen maiatzaren 31ko 82/2016 Dekretuak ezarritako esparruan. Maiatzaren 22ko 82/2012 Dekretuaren bidez onartutako Lanbideren Estatutuen 10.2 artikuluaren o) apartatuan xedatutakoaren arabera (ekainaren 29ko 156/2021 Dekretuak finkatutako testua), erakunde autonomo horretako zuzendari nagusiari dagokio deialdi hori argitaratzea.

Horrenbestez, honako hau

EBAZTEN DUT:

Lehenengoa.– 2023. urterako dirulaguntza-deialdia argitaratzea, langile kualifikatuen eskari altuko sektoreetan prestakuntza-jarduerak egiteko, lehentasunez langile langabeei zuzenduta, Euskal Autonomia Erkidegoan Enplegurako Lanbide Heziketa arautzen duen maiatzaren 31ko 82/2016 Dekretuaren esparruan, Lanbide-Euskal Enplegu Zerbitzuko Administrazio Kontseiluak onartu baitzuen 2023ko uztailaren 13ko bilkuran hartutako Erabakiaren bidez. Deialdia ebazpen honen eranskin moduan jasota dago.

Bigarrena.– Jakinaraztea Euskal Herriko Agintaritzaren Aldizkarian argitaratu eta hurrengo egunetik aurrera izango dituela ondorioak laguntza-deialdia onartzen duen Lanbide-Euskal Enplegu Zerbitzuko Administrazio Kontseiluaren Erabakiak.

Hirugarrena.– Ohartaraztea deialdia onartzen duen Lanbide-Euskal Enplegu Zerbitzuko Administrazio Kontseiluaren Erabakiaren aurka berraztertze-errekurtsoa aurkeztu ahal izango zaiola organo horri berari, hilabeteko epean, ebazpen hau Euskal Herriko Agintaritzaren Aldizkarian argitaratu eta hurrengo egunetik aurrera; edo administrazioarekiko auzi-errekurtsoa aurkeztu ahal izango dela zuzenean Vitoria-Gasteizko Administrazioarekiko Auzien Epaitegian, bi hilabeteko epean, ebazpena aldizkari horretan argitaratu eta hurrengo egunetik aurrera.

Vitoria-Gasteiz, 2023ko uztailaren 14a.

Lanbide-Euskal Enplegu Zerbitzuko zuzendari nagusia,

MARÍA GLORIA MÚGICA CONDE.

ERANSKINA

2023. URTERAKO DIRULAGUNTZA-DEIALDIA, LANGILE KUALIFIKATUEN ESKARI ALTUKO SEKTOREETAN PRESTAKUNTZA-JARDUERAK EGITEKO, LEHENTASUNEZ LANGILE LANGABEEI ZUZENDUTA, EUSKAL AUTONOMIA ERKIDEGOAN ENPLEGURAKO LANBIDE HEZIKETA ARAUTZEN DUEN MAIATZAREN 31KO 82/2016 DEKRETUAK EZARRITAKO ESPARRUAN

Deialdi honen helburua da prestatutako eta espezializatutako profesionalen eskari altuko sektoreetan prestakuntza-jarduera berritzaileak garatzen laguntzea, besteak beste sektore hauetan: logistikaren eta garraioaren sektorea (nazioarteko garraioaren adarrean eta garraio-kudeatzaileak eta aduanakoak diren enpresetan), programazioaren eta garapen informatikoaren eremua (Boot Camps metodologian oinarrituta), espezializazio-maila altuko sormenaren eta musikaren industriak, arreta soziosanitarioaren sektorea eta jarduera fisikoen eta kirol-jardueren sektorea.

Euskal Autonomia Erkidegoko garraio-kudeatzailetzako eta aduanako enpresen sektoreari dagokionez, Plangintza, Etxebizitza eta Garraio Saileko Garraio Plangintzaren Zuzendaritzak eta ATEIA Euskadik profesionalen beharrizanen diagnostiko bat egin dute. Diagnostiko horretan agerian geratu da, batetik, beharrezkoa dela prestatutako langileak sartzea eta, bestetik, bete gabeko lanpostu hutsak daudela. Horrenbestez, prestakuntza-ibilbide espezifikoak sortzeko beharrizana aipatu da. Ibilbide horiek hainbat prestakuntza-espezialitatez osatuta egon beharko dira, trafikoko operadorearen edo aduana-saileko langilearen (batez ere) profil profesionaletan lanpostu batera sartzeko behar diren eskumenak eskuratzeko. Era berean, azpimarratzen da garrantzitsua dela aduanako eta garraio-kudeatzailetzako jarduerarekin lotutako hiru profesionaltasun-ziurtagiri ematea.

Programazioaren eta garapen informatikoaren esparruan, azterketa askok adierazten dute eremu horretan behar diren lanpostu ugariak estali ahal izateko prestakuntza espezializatua nabarmen areagotu beharra dagoela. Kontuan hartuta enpresetako kudeaketa-prozeduren digitalizazioa eta harreman birtualaren orokortzea bezeroen, hornitzaileen eta enpresen artean, bai eta administrazioaren eta herritarren artean ere, eta gogoan izanda adimen artifiziala, datuen kudeaketa edo big data, machine learning edo zibersegurtasuna –beste arlo teknologiko batzuen artean–, beharrezkoa da lan handia egitea informatikako aplikazio seguruak eta kalitatezkoak garatzen, gailu elektroniko desberdinen bidez (esaterako, ordenagailuak, telefono mugikorrak edo tabletak). Aplikazio horiek ezarri ahal izateko, programazioko lengoaia desberdinak sakon ezagutu behar dira eta garatzaile informatikoen lanpostu ugari eduki behar dira. Gaur egun, talentu digitalean dagoen arrakala hori murrizteko, bete beharreko hainbat lanpostu huts daude.

Egungo metodo berritzaileetako bat, programatzaile eta garatzaile informatikoen prestakuntzan emaitza onak ematen ari dena, Boot Camps izenekoa da. Boot Camp deritzona prestakuntza- eta entrenamendu-programa espezializatu eta intentsibo bat da, parte-hartzaileak trebetasun jakin batzuk garatzea lor dezan diseinatua, trebetasun horiek oso azkar praktikan jartzeko; horretarako, erabateko murgiltze-giroan zuzendutako esperientzia baten bidez bereganatzen ditu ezagutzak. Prestakuntza hori oso praktikoa da, ez da zertan aldez aurretik programazioaren gaineko ezagutzarik izan, eta laneratze-maila altuak lortzen ditu. Ondorioz, oso egokia da profesionalki beren burua eraberritu nahi duten eta beren ibilbidea eremu digitalera bideratu nahi dutenentzat.

2021. urtea Garapen Jasangarrirako Ekonomia Sortzailearen Nazioarteko Urtea izendatu zuen NBEk, eta adierazi zuen sormen-industriak funtsezkoak direla garapen jasangarriko agendarako, berrikuntza eta ekonomiaren dibertsifikazioa sustatzen dituztela, eta faktore garrantzitsua direla zerbitzuen sektore indartsuan, enpresa-espiritua babesten dutelako eta kultura-aniztasunari laguntzen diotelako.

Pandemiak balioa eman zien kultura-ekonomia sortzailearen zerbitzu eta produktuei, online kultura-jardueren kontsumoa handituz, hala nola zinema, nahierako telebista, musika-kontzertuak Internet bidez eta musika-kontsumoa plataforma eta sare sozialetan, irakurketa-produktuak, joko digitalak, argazkiak, argitalpenak eta audio- eta bideo-artxiboak, baita zuzeneko irratia edo artxibo digitalen deskargak ere.

Merkatuak egungo eskasia arinduko duten edukien ekoizpena areagotzea eskatzen du, eta adi egoten da alor horretan aurkezten den edozein berritasunen aurrean. Horregatik, sormen-industriek, oro har, hazteko itxaropen handia dute epe labur eta ertainean. Gainera, balio erantsiko ekosistema sortzailea eratzen laguntzen duten eremuetan etorkizun onena duten jarduera ekonomikoetako bat dira, jabetza intelektualean eta egile-eskubideetan oinarrituta.

Enpleguaren Euskal Estrategia 2030 delakoak EAEko eta nazioarteko testuinguruan nagusitzen ari diren joera handiak identifikatzen ditu (horietako bat trantsizio teknologiko-digitala da), eta 2. bektore bat ezartzen du kalitatezko enplegu inklusiboan aurrera egiteko giltzarri estrategikoen artean, «produkzio-sistemara egokitzen den enplegu erresilientea» bultzatzea helburu duena.

2021-2024ko Enplegu Plan Estrategikoak bere ildo estrategikoen artean jasotzen du «trantsizio digitalerako enplegatuen eta langabeen enplegua eta prestakuntza», eta deialdi honetan planteatutako prestakuntzak eragin zuzena dauka ildo honetan aurreikusitako helburuak lortzeko orduan.

Enpleguaren Euskal Estrategia 2030 izenekoak hiru trantsizio global handik markatutako testuingurua deskribatzen du; besteak beste, trantsizio soziala eta sanitarioa ere jasotzen da, eta haren elementu nagusiak honako hauek dira: Osasun eta Arrisku Pandemikoen Sistema, zahartze osasuntsua eta zaintza-eredu berriak. EAEko gizartea bizi-itxaropen handieneko gizarteetako bat da. Hori erronka handia izango da datozen hamarkadetarako, eta eragin zuzena izango du zainketen ekonomian; izan ere, eskaria areagotuko du sektore horretan, eta agerian utziko ditu egungo gabezia handiak, batez ere kualifikazio- eta gaikuntza-premiak.

Horrela, adinekoen zaintzaren eremuan digitalizazioa oso garrantzitsua da erabiltzaileen bizi-kalitatea hobetzeko. Azken urteotan arlo horretan ezarri diren aurrerapen eta konponbide teknologikoek lagundu egiten dute mendeko pertsonak monitorizatzen eta galerei, despisteei, erorketei eta pertsona zaharrenen egunerokoan gerta daitezkeen gertaerei aurrea hartzen eta haien aurrean jarduten, pertsona horiei komunikazioa eta laguntza hobetzen lagunduz eta haien bakardadea murriztuz telelaguntza bezalako metodoen bidez. Era berean, adinekoen aisialdiaren eta entretenimenduaren esparruan, erabilera, joko, aplikazio eta formatu digital ugari daude, eta komeni da gizatalde horretakoen artean zabaltzea, narriadura kognitiboa moteltzeko, autonomia pertsonala indartzeko eta, oro har, bizitza entretenigarriagoa egiteko.

Jakina da biztanleria-piramidearen zahartzeak adinekoen beharrak asetzera bideratutako jarduera ekonomikoak ekarri dituela berekin. Adinekoek beren etxeetan modu independentean bizitzen jarraitzea dute helburu jarduera horiek. Ildo horretan, garrantzi berezia du etxez etxeko laguntza-zerbitzuak, esku-hartze pertsonalizatua eta etxearen eremurako egokia bermatu behar baitu, pertsonak egoitza-zentro batean sartzeak eragiten duen deserrotzea saihesteko. Horregatik, hainbat erronka jartzen dira, hala nola teknologia berriak aprobetxatzea prestazioan eta sektorearen profesionalizazioa.

Helburua da oinarriak jartzea zaintzaren sektorea profesionalizatzeko, kalitatezko eskaintza egituratzeko eta eskaria sendotzeko, bai eta aukerak eta palankak identifikatzeko lana egitea ere; horri esker, profil profesional berriak sortu ahal izango dira zaintzaren esparruan.

Susperraldiaren eta erresilientziaren euskal programan (Euskadi Next) trantsizio teknologikorako, pertsonen zaintzarako eta energia ekologikoetarako jasotako programez gain, gaur egun ekonomia sortzaileak zerbitzuen sektorearen bultzadan faktore garrantzitsu gisa duen indarra ere jasotzen du deialdi honek.

Jarduera fisikoen eta kirol-jardueren sektoreari dagokionez, pandemiak eragindako itxieren ondoren gimnasioetara itzulita (2022ko lehen seihilekoan ireki ziren berriro), sektoreko enpresak kezkatzen dituen zerbait gertatu da, hain zuzen ere, plaza huts asko egotea sektore horretako antzeko lanpostuetan lan egiteko.

Azterlan zientifiko ugarik egiaztatu dutenez, normaltasunera itzultzearekin batera areagotu egin dira pandemiako urteek eragindako sedentarismoaren eta estresaren ondoriozko osasun-arazo fisikoak eta emozionalak. Gainera, gimnasio berriak irekitzen ari dira, eta lehendik daudenei gehitzen zaizkie. Kirol-zentro horiek guztiek diziplina anitzeko eta balio anitzeko begiraleak, entrenatzaile pertsonalak, teknikariak eta entrenamendu pertsonalean edo fitnessean adituak direnak, bilatzen dituzte, besteak beste. Enplegu-atari askotan egiazta daiteke astero dozenaka eskaintza daudela lanpostu espezializatu horietarako.

Era berean, sektore hori oso maskulinizatuta dago, eta, hortaz, beharrezkoak ditu emakumeen artean gero eta gehiago hazten ari diren diziplinak emateko gai diren profesionalak. Espezialitate horiek oso eskari handia dute gimnasio, kiroldegi eta gainerako kirol-zentroetan. Nutrizioari eta ohitura osasungarriei buruzko ezagutzak ere gero eta gehiago eskatzen dira, diziplina anitzeko kirol-begirale batek menderatu behar dituen beste zutabeetako bat baitira. Elikadura, osasuna eta kirola estuki lotuta daude, eta halaxe erakusten du osasuna alderdi horietatik guztietatik lantzen duten zentroak irekitzeak.

Aurrekoaz gain, aintzat hartu beharra dago biztanleria-piramidea gero eta alderantzikatuago dagoela, eta zahartze aktiboari begira ariketa fisikoa oso onuragarria dela adindunentzat. Hain zuzen ere, ariketa horiek egiten laguntzeko ere langile kualifikatuak eta espezializatuak behar dira.

Horregatik guztiagatik, ibilbide horien helburua diziplina anitzeko profesionalak prestatzea izan behar da, gora egiten ari den eta gero eta baliabide gehiago eskatzen dituen sektore batean. Profesional horiek gai izan behar dute hainbat talderen beharrak asetzeko, haiek guztiek premia desberdinak baitituzte: bai erabiltzaile tradizionalenak, bai gimnasio eta kirol-zentroetara joaten diren gero eta emakume gehiagorenak, bai eta hirugarren adinekoenak edo beste kolektibo batzuenak ere.

Enplegurako lanbide-prestakuntza funtsezko tresna da lan-merkatuan laneratzen eta langileen enplegagarritasuna hobetzen laguntzeko. Horrenbestez, erabaki honetan arautzen diren finantzabideei esker egingo diren prestakuntza-ekintzen bidez Euskal Autonomia Erkidegoko langileei, eta, batez ere, langabeei prestakuntza-eskaintza espezializatua emango zaie. Horrela, beren enplegagarritasuna hobetu ahal izango dute modu eraginkorrean, eta, era berean, deskribatutako sektore horietan prestatutako profesionalen beharrei erantzungo zaie.

Euskal Autonomia Erkidegoan Enplegurako Lanbide Heziketa arautzen duen maiatzaren 31ko 82/2016 Dekretuak 2. artikuluan ezartzen duenez, Enplegurako Lanbide Heziketa da Lanbide Heziketaren sistemetako bat enpresen artean eta langileen artean (langabeak nahiz lanean ari direnak) lehiakortasun- eta kualifikazio-beharrizanei erantzuteko –hurrenez hurren–, prestakuntza bultzatzea eta zabaltzea xede duten tresna eta ekintzez osatua. Prestakuntza horrek, halaber, gizartea kohesionatzen eta ekonomia garatzen lagunduko du, ezagutzan oinarritutako ekonomiaren esparruan.

Lehendakariaren irailaren 6ko 18/2020 Dekretuak (zeinaren bitartez Euskal Autonomia Erkidegoko Administrazioko sailak sortu, ezabatu eta aldatzen baitira eta horien egitekoak eta jardun-arloak finkatzen) Lan eta Enplegu Sailari esleitzen dizkio enplegu-politika eta enplegurako lanbide-heziketa, Lanbide-Euskal Enplegu Zerbitzuaren lankidetzarekin –betiere hark dauzkan erantzukizunen barruan–, hargatik eragotzi gabe oro har Lanbide Heziketaren eremuan zuzendaritza, antolamendu eta plangintzan Hezkuntza Sailak dituen eginkizunak.

Bestalde, Lanbide-Euskal Enplegu Zerbitzua erakunde autonomoari (Lan eta Enplegu Sailari atxikita dago) dagokio, besteak beste, enplegu-programen, enplegurako prestakuntza-programen eta autoenplegua eta enpresen sorkuntza sustatzeko programen kudeaketa. Egiteko horren barruan dago dirulaguntzetarako deialdiak onestea eta izapidetzea, hala ezarrita baitago maiatzaren 22ko 82/2012 Dekretuak onetsiriko organismo autonomoaren estatutuen 3.b) artikuluan.

Eskari altuko sektoreetako prestakuntzara bideratutako laguntzak Lanbide-Euskal Enplegu Zerbitzuaren 2023ko ekitaldiko Dirulaguntza Plan Estrategikoan aurreikusita daude. Lanbideren Administrazio Kontseiluak onartu zuen plana, 2022ko abenduaren 21eko bilkuran hartutako Erabakiaren bidez, eta Lanbideren web-orrian dago argitaratuta (www.lanbide.euskadi.eus); hartara, bete egin zuen Dirulaguntzei buruzko azaroaren 17ko 38/2003 Lege Orokorraren 8.1 artikuluan xedatutakoa.

Horregatik guztiagatik, Lanbide-Euskal Enplegu Zerbitzuko zuzendari nagusiak proposatuta, erakunde autonomo horretako Administrazio Kontseiluak, 2023ko uztailaren 13ko bilkuran, onartu egin du langile kualifikatuen eskari altuko sektoreetako prestakuntza-jarduerak egiteko 2023. urterako dirulaguntza-deialdia, lehentasunez langile langabeei zuzenduta, Euskal Autonomia Erkidegoan Enplegurako Lanbide Heziketa arautzen duen maiatzaren 31ko 82/2016 Dekretuak ezarritakoaren esparruan. Hona deialdia:

1. artikulua.– Xedea eta baliabide ekonomikoak.

1.– Deialdi honen xedea da langile kualifikatuen eskari altuko sektoreetan prestakuntza-jarduerak egitea finantzatzeko 2023ko ekitaldian eman beharreko laguntzak arautzea, lehentasunez langile langabeei zuzenduta.

Langile kualifikatuen eskari altuko sektoreak, deialdi honen ondoreetarako, honako hauek dira:

– Garraio-kudeatzailetzako eta aduanako enpresen sektore logistikoa.

– Programazioa eta garapen informatikoa.

– Espezializazio-maila altuko industria sortzaile, kultural eta musikala.

– Jarduera fisikoak eta kirol-jarduerak.

– Arreta soziosanitarioa.

2.– Deialdi hau finantzatzera bideratuko diren diru-baliabideak 1.000.000 euro dira; haietatik 600.000 euro 2023ko ordainketa-kredituari dagozkio, eta 400.000 euro, 2024ko konpromiso-kredituari.

Baliabide horiek bost dirulaguntza-lerrotan banatzen dira, eskari altuko bost sektoreetako bakoitzeko bat, honelaxe:

– 100.000 euro, garraio-kudeatzailetzako eta aduanako enpresen sektore logistikoarekin lotutako prestakuntza-proiektuetarako,

– 300.000 euro, programazioaren eta garapen informatikoaren sektorearekin lotutako prestakuntza-proiektuetarako,

– 200.000 euro, espezializazio-maila altuko industria sortzaile, kultural eta musikalarekin lotutako prestakuntza-proiektuetarako,

– 300.000 euro, arreta soziosanitarioarekin lotutako prestakuntza-proiektuetarako,

– 100.000 euro, jarduera fisikoekin eta kirol-jarduerekin lotutako prestakuntza-proiektuetarako.

Banaketa hori aldatu egin ahal izango da, aurrekontu-kreditua agortzeko. Izan ere, dirulaguntza-lerroren batean kreditua agortzen ez bada, gainerako lerroetako laguntzak finantzatzera bideratu ahal izango da soberakina, eskabideak aurkeztu diren ordenaren arabera, betiere linea horretara aurkeztutako eskabide guztiak ebatzi ondoren eta eskaera egiteko epea amaitu ondoren.

3.– Deialdi honen xede diren dirulaguntzak Europako Gizarte Funtsarekin batera finantzatu ahal izango dira, osorik edo zati batean, 2021-2027 Euskal Autonomia Erkidegoko EGIF+ Programaren esparruan.

2. artikulua.– Entitate onuradunak.

1.– Deialdi honetako laguntzen onuradun izan ahalko dira prestakuntza-erakunde pribatu edo publikoak, baldin eta dirulaguntza argitaratu baino lehen akreditatuta edo/eta inskribatuta badaude Lanbide-Euskal Enplegu Zerbitzuak kudeatzen duen prestakuntza-erakundeen erregistroan, autonomia-erkidegoko enplegurako prestakuntza-erakundeen beste edozein erregistrotan edo Prestakuntza Erakundeen Estatuko Erregistroan.

Deialdi hau argitaratu baino lehen egiaztatu behar da, halaber, profesionaltasun-ziurtagiriak lortzeko prestakuntza-ekintzak ematen direla dirulaguntza eskatzen duten prestakuntza-proiektuaren barruan. Gainerako prestakuntza-ekintzei dagokienez, entitateak izena emanda egon beharko du eskabidea aurkezten denean.

2.– Deialdi honetako dirulaguntza eskuratzeko, prestakuntza-erakundeek laguntzaren xede diren prestakuntza-proiektuak egiteko giza baliabideak eta baliabide materialak eduki beharko dituzte, edo konpromisoa hartu beharko dute dirulaguntza adjudikatu ondoren edukiko dituztela, prestakuntza-jarduera hasten denerako.

Instalazio eta baliabide horiek entitatearenak edo hirugarren erakunde pribatu edo publikoenak izan daitezke; gainera, Euskal Autonomia Erkidegoaren lurraldean eduki beharko dira.

Ez dago baimenduta prestakuntza-jarduera azpikontratatzea. Ondorio horietarako, ez da azpikontrataziotzat joko prestakuntza emateko irakasleak (pertsona fisikoak) kontratatzea.

Informazio hori egiaztatzeko, erakundearen legezko ordezkaritzak erantzukizunpeko adierazpen bat egingo du (erantzukizunpeko adierazpena eskabide-orrian jasota dago). Nolanahi ere, entitate eskatzaileak Lanbide-Euskal Enplegu Zerbitzuaren esku eduki beharko ditu adierazpen horretan jasotako datuak egiazkoak direla frogatzen duten dokumentuak.

3.– Ezingo dira onuradun izan honako egoera hauetako batean diren entitateak:

a) Zerga-betebeharrak eta Gizarte Segurantzarekikoak egunean ez izatea, Ekonomia eta Ogasuneko sailburuaren 2023ko otsailaren 13ko Aginduan aurreikusitakoaren arabera.

Organo kudeatzaileak automatikoki egiaztatuko du zerga-betebeharrak eta Gizarte Segurantzarekikoak betetzen direla, dirulaguntza eman eta ordainketa bakoitza egin baino lehen. Hala ere, eskatzaileak berariaz aurka egin diezaioke egiaztatze horri, eta, halakorik egiten badu, baldintza hori betetzen duela frogatzen duten ziurtagiri eguneratuak aurkeztu beharko ditu.

b) Dirulaguntzak itzultzeko betebeharrak ordainduta ez edukitzea, Ekonomia eta Ogasuneko sailburuaren 2023ko otsailaren 13ko Aginduan aurreikusitakoaren arabera.

c) Administrazio-zehapena edo zigor-zehapena ezarrita badu, dirulaguntza edo laguntza publikoak eskuratzeko aukera kentzen diona, honako hauek barne:

– Sexu-bazterkeriagatik ezarritako zehapena, lege hauetan ezarritakoaren arabera: emakumeen eta gizonen berdintasunerako eta emakumeen aurkako indarkeria matxistarik gabe bizitzeko Legearen testu bategina (martxoaren 16ko 1/2023 Legegintzako Dekretuaren bidez onartua) edo Emakumeen eta Gizonen Berdintasun Eraginkorrerako martxoaren 22ko 3/2007 Lege Organikoa, edo

– Ebazpen irmo baten bidez zehapen osagarri bat jasotzeagatik, Lan-arloko arau-hausteei eta zehapenei buruzko Legearen testu bategina onartzen duen abuztuaren 4ko 5/2000 Legegintzako Errege Dekretuaren 46.1.b) eta 46 bis.1.b) artikuluetan xedatutakoaren arabera.

d) Legez ezarritako kausaren bat izatea, laguntzak edo dirulaguntzak jasotzea eragozten diona, Emakumeen eta gizonen berdintasunerako eta emakumeen kontrako indarkeria matxistarik gabeko bizitzei buruzko Legearen testu bateginean aurreikusitakoak barne direla (martxoaren 16ko 1/2023 Legegintzako Dekretuaren bidez onartu zen testu hori). Honako hauek:

– Ez izatea berdintasun-planik indarrean, Estatuaren araudiaren arabera horretara behartuta dagoen enpresa izanda.

– Ez edukitzea ezarrita neurririk sexu-jazarpena edo sexuan oinarritutako jazarpena prebenitu eta borrokatzeko, emakumeen eta gizonen berdintasunaren arloan Estatuak ezarrita dituen legeen arabera, 50 langile baino gehiago dituzten enpresen kasuan.

e) 30.000 euro baino gehiagoko dirulaguntzetarako, bete gabe edukitzea Merkataritza-eragiketetan berankortasunaren aurka borrokatzeko neurriak ezartzeko abenduaren 29ko 3/2004 Legean aurreikusitako ordainketetarako ezarritako epealdiak.

f) Dirulaguntzei buruzko azaroaren 17ko 38/2003 Lege Orokorraren 13. artikuluko 2. eta 3. apartatuetan xedatzen diren gainerako egoeretako batean egotea.

Lanbide-Euskal Enplegu Zerbitzuak ez badu egiaztatzen 3. apartatuan xedatutako eskakizunen bat, erantzukizunpeko adierazpenaren bidez frogatu beharko da; adierazpen hori eskabide-orrian jasota dago. e) apartatuari buruzko eskakizuna egiaztatzeko, galdu-irabazien kontu laburtuak aurkez ditzaketen sozietateek erantzukizunpeko adierazpena aurkeztu beharko dute. Gainerakoek, Kontu Auditoreen Erregistro Ofizialean inskribaturiko auditore batek egindako egiaztagiria aurkeztu beharko dute.

3. artikulua.– Diruz lagundu daitekeen jarduera.

1.– Dirulaguntza jaso ahal izango dute prestakuntza-proiektuek, baldin eta prestakuntza-ekintza bat egiteko edo partaide-talde berari eman beharreko hainbat ekintzaz osatutako prestakuntza-ibilbide batzuk garatzeko helburua badute, langile kualifikatuen eskari altuko sektoreetako gaitasun profesionalak eskuratzeko prestakuntza-espezialitateetan, 1.1 artikuluan aurreikusitakoaren arabera, betiere Prestakuntza Espezialitateen Euskal Katalogoan jasota badaude.

Prestakuntzako Espezialitateen Euskal Katalogoan jasota ez dauden espezialitate berriak emateko, alta eman beharko zaie katalogoan. Dirulaguntza-eskaria aurkezten den unean, eman nahi den prestakuntza-espezialitatea Katalogoan sartuta egon beharko da, eta prestakuntza-erakundeak dagokion erantzukizunpeko adierazpena aurkeztuta eduki beharko du, Euskal Autonomia Erkidegoko Prestakuntza Entitateen Katalogoan inskribatzeko.

2.– Prestakuntza-ekintza programagarriak honela sailkatzen dira:

a) Prestakuntza egiaztagarria: Lanbide Kualifikazioen Katalogo Nazionalari lotutako ekintzak, profesionaltasun-ziurtagiriak lortzera bideratutakoak, ibilbide osoen arabera –espezialitatearen ordu guztiengatik egiten dutenean– edo prestakuntza-moduluen arabera programatu daitezkeenak. 1., 2. edo 3. kualifikazio-mailakoak izan daitezke.

b) Prestakuntza egiaztaezina edo inskripziokoa: prestakuntza-espezialitateen katalogoko prestakuntza-ekintza hauek ez dute aukerarik ematen eskuratutako konpetentziak egiaztatzeko. Kualifikazio-emaileak edo ez kualifikazio-emaileak izan daitezke.

3.– Prestakuntza emateko modalitatea.

Prestakuntza-ekintzak aurrez aurre eman beharko dira.

Aurrez aurreko prestakuntzatzat jotzen da ikasgela batean irakasleek ikasle talde bati ezaguera berak eta aldi berean transmititzen dizkiotenean, edozein motatako baliabide didaktikoak erabilita.

Salbuespen moduan, eta Lanbidek aldez aurretik baimena emanda, gela birtuala erabili ahal izango da prestakuntza-saioren bat garatzeko, baldin eta programaren gairen batean aditua den irakasleren bat ezin bada ikasgelara joan.

4.– Irakasteko metodologia programazioaren eta garapen informatikoaren sektorean.

Programazioaren eta garapen informatikoaren sektoreko prestakuntza-proiektuak bideratzeko, Boot Camps metodologia baliatuko da, prestakuntza intentsiboko ezaugarriekin, aldez aurreko ezagutza behar izanik gabe, enplegurako esanguratsuak diren programazio informatikoko jarduerak garatzeko aski eskumen eskuratzeko.

5.– Prestakuntza-proiektuak dirulaguntza ematen duen ebazpena jakinarazi eta hurrengo egunetik 2024ko urriaren 14ra bitartean gauzatu beharko dira (lantokiko prestakuntza praktikoaren modulua edo lanekoak ez diren praktikak barne, halakorik egonez gero).

Prestakuntza-ekintzak 2023ko ekitaldian hasi beharko dira, eta, gehienez ere, dirulaguntza ematen duen ebazpena jakinarazi eta bi hilabete igaro baino lehen.

6.– Prestakuntza-ekintzak eta -ibilbideak onesteko, diruz lagundu beharreko gehieneko partaide kopurua 20 izango da, eta gutxienekoa, 10. Beraz, prestakuntza-ekintzak ezin izango dira hasi 10 partaidek baino gutxiagok eman badute izena.

Hala ere, laguntza jasoko dutenez gain, beste bi parte-hartzaile ere onartu ahal izango dira prestakuntza-ekintzetan, baldin eta prestakuntza-zentroak kopuru hori hartzeko egiaztatuta edo inskribatuta badaude. Parte-hartzaile gehigarri horiengatik ez da dirulaguntzarik emango.

7.– Prestakuntza-ekintzaren zati teoriko-praktikoa baino ez da diruz lagunduko. Ez dira diruz lagunduko lantokian egingo den prestakuntza praktikoaren modulua (profesionaltasun-ziurtagirien kasuan) eta lanekoak ez diren enpresa-praktikak (gainerako espezialitateetan).

8.– Prestakuntza-ekintza bakoitzaren iraunaldi osoaren % 25 betetzean, hasi diren parte-hartzaileen % 75ek bertan jarraitu beharko dute (onartzen diren bi parte-hartzaile gehigarriak kontuan hartu gabe). Ehuneko txikiagoak jarraitzen badu, ekintzak aurrera egin beharko du, eta amaitzean likidatu beharko da, deialdi honen 16.4 artikuluan adierazitakoaren arabera. Ondorio horietarako, prestakuntza hasi duten parte-hartzaileen kopurutzat hartuko da prestakuntza-ekintzaren lehen egunean prestakuntza hasi zuten pertsona guztien kopurua.

4. artikulua.– Prestakuntzaren hartzaileak.

Deialdi honen babespean diruz laguntzen diren prestakuntza-ekintzetan parte hartu ahal izango dute Lanbide-Euskal Enplegu Zerbitzuan enplegu-eskatzaile gisa izena emanda dauden langabeek edo Gazte Bermearen Sistema Nazionalaren fitxategian izena emanda daudenek. Era berean, beste autonomia-erkidego bateko enplegu-zerbitzu publikoan izena emanda dauden langabeek ere parte hartu ahal izango dute.

Halaber, lanean ari diren langileek ere parte hartu ahal izango dute prestakuntza-ekintza horietan, betiere prestakuntza-ekintza bakoitzean programatutako parte-hartzaile guztien ehuneko 30 gainditu gabe. Horretarako, ekintzetan parte hartzen dutenak langabetzat edo landuntzat hartzeko, prestakuntzaren hasieran duten lan-egoera hartuko da kontuan.

Aurrekoari begira, honako hauek sartuko dira langabeen taldean: lanaldi partzialeko kontratu batekin ari diren langileak, baldin eta haien lanaldia lanaldi osoz aritzen den langile batek duenaren herena baino laburragoa bada –konparagarriak izan behar dute–.

5. artikulua.– Dirulaguntzaren zenbatekoa.

1.– Prestakuntza-proiektuaren dirulaguntzaren zenbateko osoa prestakuntza-ekintzaren zenbatekoak zehaztuko du, edo prestakuntza-ibilbidea osatzen duten prestakuntza-ekintzetako bakoitzaren dirulaguntzaren zenbatekoaren baturak.

2.– Parte-hartzaileko eta prestakuntza-orduko kostuaren arabera finantzatuko da prestakuntza-ekintza bakoitza, prestakuntza-espezialitate bakoitzeko modulu ekonomikoen arabera.

Modulu ekonomiko bakoitzak hiru ditu: horietako bi zuzeneko kostuei dagozkie –langileak (A) eta funtzionamendua (B)– eta hirugarrena zeharkako kostuei (C) dagokie –kostu zuzenei dagozkien moduluen baturari % 10eko ehunekoa aplikatuz kalkulatua–.

A modulua: langileen kostua. Zuzeneko kostuaren kontzeptu honek honako hauen kostuak biltzen ditu: irakasleak, bitartekotza-tutorea eta ikasketa-burutza. A moduluaren kostu unitarioa 4,34 euro/orduko/ikasleko izango da, eta 15 ikasleko kopuru finkoari aplikatuko zaio. Horrela, moduluaren baremo estandarrak 65,03 euro/orduko balio finkoa izango du prestakuntza-talde bakoitzeko.

B modulua: funtzionamendu-gastuak. Modulu honetan, bi motatako zuzeneko kostuak sartzen dira:

– Mantentze-kostuak. Hauek biltzen ditu, besteak beste: altzariak ordeztea, konponketak, publizitatea, komunikazioak, batzarrak eta ikastaroak, enpresekin egin beharreko kudeaketak, liburuak eta argitalpenak, higiezinen alokairuak eta amortizazioak, eta ekipamenduak.

– Material didaktiko espezifikoaren kostuak. Prestakuntza-ekintzari dagokion familia profesionalaren eta kualifikazio-mailaren arabera kalkulatzen dira.

Prestakuntza-espezialitate bakoitzaren B modulu espezifikoaren zenbatekoa LanF kudeaketarako aplikazio informatikoan argitaratzen da.

C modulua: zeharkako kostuak. Modulu hau A eta B moduluen kostuen % 10 da, eta, besteak beste, kontzeptu hauek biltzen ditu: zuzendariaren pertsonal-gastuak, administrazio-langileen pertsonal-gastuak, berokuntza, argiztapena, garbitzea, instalazioen asegurua, itzalgailuak, alarmak, kanpoarekiko komunikazioak, batzarrak, hitzaldiak, ikastaroak eta bestelakoak, lokomozioa eta enpresekiko kudeaketa, fotokopiak (administrazio-arloa), bulegoko materiala eta informatikoa, ura, farmazia-produktuak, aholkularitzak eta gestoriak, telefonoa eta Internet, administrazio-sailerako softwarea, langileentzako mutuak, kalitate-sistemak eta igogailuak konpontzea.

Modulu honen zenbatekoak ezin du inola ere gainditu dirulaguntzaren guztizko zenbatekoaren % 10.

Prestakuntza-ekintza bakoitzerako onartutako guztizko dirulaguntza hauek batzearen emaitza izango da: A + B + (A+B)ren % 10. Azalpena:

A = A modulua x ordu kopurua x 15 ikasle.

B = B modulua x ordu kopurua x parte hartzen duten ikasleen kopurua.

Azkenean aplikatu beharreko modulu ekonomikoek ezin izango dituzte gainditu, inola ere, uztailaren 3ko 694/2017 Errege Dekretua garatzen duen martxoaren 28ko TMS/368/2019 Aginduan aurreikusitakoak. Profesionaltasun-ziurtagiriak lortzeko prestakuntza-ekintzen kasuan, gehieneko muga urriaren 10eko ESS/1897/2013 Aginduan jasotakoa da (haren bidez garatzen da 34/2008 Errege Dekretua, urtarrilaren 18koa, profesionaltasun-ziurtagiriak arautzen dituena). Horrenbestez, aplikatu beharreko azken modulua osatzen duten hiru moduluen batura handiagoa baldin bada aipatutako araudietan aurreikusitakoak baino (edo, hala badagokio, haien ordez ezartzen diren eta deialdi hau argitaratzen denean indarrean dauden araudietan aurreikusitakoak baino), azken horiek aplikatuko dira.

3.– Prestakuntza-erakundeek 1.1 artikuluan jasotako bost sektoreetako edozeini buruzko prestakuntza-proiektuak eskatu ahal izango dituzte. Prestakuntza-erakunde batek ere ezin izango ditu 150.000 euro baino gehiago jaso deialdi honen babesean onartzen diren proiektuengatik.

6. artikulua.– Eskabideak aurkeztea.

1.– Deialdi honen esparruko dirulaguntzak jasotzeko eskabideak Lanbide-Euskal Enplegu Zerbitzuko zuzendari nagusiari helaraziko zaizkio, eta elektronikoki izapidetuko dira, Lanbide-Euskal Enplegu Zerbitzuaren prestakuntzako aplikazio informatikoaren bidez (LanF).

Aplikazio horretarako sarbiderik ez duten entitateek Lanbide-Euskal Enplegu Zerbitzuaren web-orriaren bidez eskatu ahal izango dute: https://www.lanbide.euskadi.eus/prestakuntza/-/informazioa/erakundeen-erregistroa/

Honako helbide honetan eskuratu daiteke administrazio-prozeduraren informazio-fitxa, izapidetze elektronikorako jarraibideak ematen dituena: https://www.euskadi.eus/servicios/1217602

2.– Dirulaguntza-eskabidearekin batera honako dokumentu hauek aurkeztu beharko dira:

2.1.– Laguntzaren xede den prestakuntza-proiektua, eman beharreko prestakuntza-ekintza edo prestakuntza-ibilbidea zehaztuta.

2.2.– Proiektuaren memoria, LanF aplikazioan eskuragarri dagoen ereduaren arabera, gutxienez honako hau jasoko duena: xede duen eskari altuko sektorearen jarduerarekin lotutako prestakuntza egiteko beharrizana arrazoitzen duen txostena, sektore horietan dauden prestakuntza-beharrizanen diagnostikoetan babesten dena eta proiektuarekin lotutako langile kualifikatuen eskari altuko sektoreko enpresa eta elkarteen iritzi dokumentatuetan babesten dena.

3.– Eskabideak elektronikoki izapidetu ahal izango dira, ordezkari baten bidez. Horretarako, Euskal Autonomia Erkidegoko Administrazio Publikoaren ahalordeen erregistro elektronikoan inskribatu ahal izango da ordezkaritza hori, helbide honetan: https://www.euskadi.eus/ordezkariak

4.– Eskabideak ez baditu baldintza guztiak betetzen, erakunde interesdunari jakinaraziko zaio hamar egun balioduneko epea duela, jakinarazpena jaso eta hurrengo egunetik aurrera, hutsune edo akatsa konpontzeko, edo nahitaezko dokumentuak aurkezteko. Hori egiten ez badu, eskabideari uko egiten diola ulertuko da, horretarako beharrezkoa den ebazpena eman eta gero.

5.– Eskabideak aurkezteko epealdia deialdi hau Euskal Herriko Agintaritzaren Aldizkarian argitaratu eta hurrengo egunean hasiko da, eta 2023ko irailaren 11n amaituko da.

7. artikulua.– Prozedura eta ebazpena.

1.– Lanbide-Euskal Enplegu Zerbitzuko Enplegurako Lanbide Heziketako Zuzendaritza izango da prozedura izapidetu eta ebazteko organo eskuduna.

2.– Lehiarik gabeko konkurrentziaren prozedura erabiliko da dirulaguntzak emateko, eta, 1.2 artikuluan ezarritako dirulaguntza-lerro bakoitzean, eskabideak aurkezten diren hurrenkeraren arabera emango dira ebazpenak –diruz lagundu daitekeen jarduketaren konkurrentzia dagoela egiaztatu ondoren, eta proiektua (memorian jasotakoa) behar bezala arrazoitu dela eta eskatzen diren gainerako baldintzak betetzen direla egiaztatu ostean–, deialdian esleitutako aurrekontu-kreditua agortu arte, 1.2 artikuluan aurreikusitako baldintzetan.

Lanbide-Euskal Enplegu Zerbitzuko Enplegurako Lanbide Heziketako zuzendariaren ebazpen baten bidez, EHAAn argitaratuko da laguntza horiek finantzatzeko baliabide ekonomikoak agortu direla, eta, beraz, ukatu egingo dira ebazteke dauden eskabideak.

3.– Enplegurako Lanbide Heziketako zuzendariak laguntzak emateko edo ukatzeko ebazpena emango du, eta banan-banan jakinaraziko da, bitarteko telematikoen bidez.

Eskabideak ebazteko eta ebazpenak jakinarazteko gehieneko epea hiru hilabetekoa da, eskabidea Lanbide-Euskal Enplegu Zerbitzuaren erregistroan sartzen den egunetik aurrera; epe hori igarotakoan entitate interesdunari ebazpena jakinarazi ez bazaio, ezetsitzat hartu beharko da dirulaguntzaren eskaera.

4.– Lanbide-Euskal Enplegu Zerbitzuko Enplegurako Lanbide Heziketako zuzendariaren ebazpenek ez diote amaiera ematen administrazio-bideari, eta, haien aurka, gora jotzeko errekurtsoa jarri ahal izango zaio Lanbide-Euskal Enplegu Zerbitzuko zuzendari nagusiari, hilabeteko epean, ebazpena jakinarazi eta hurrengo egunetik aurrera.

5.– Erakunde onuradunei dirulaguntza horiek emateko eta ordaintzeko, ezinbestekoa izango da amaituta egotea Euskal Autonomia Erkidegoko Administrazioak eta haren erakunde autonomoek emanda dituzten izaera bereko laguntzen edo dirulaguntzen esparruan bideratzen hasi den eta oraindik izapidetzen ari den edozein itzulketa- edo zehapen prozedura.

6.– Dirulaguntzak ematen dituen ebazpenean berariaz adieraziko da finantzabideen zati bat Europako Gizarte Funtsetik datorrela, 2021-2027 Euskal Autonomia Erkidegoko EGIF+ Programaren esparruan.

7.– Publikotasunaren printzipioa betetzeko, Enplegurako Lanbide Heziketako zuzendariaren ebazpen baten bidez, Euskal Herriko Agintaritzaren Aldizkarian argitaratuko da zer erakundek jaso duten dirulaguntzaren bat deialdi honen babesean eta zenbateko laguntza jaso duten. Ebazpenean adieraziko da finantzabideen zati bat Europako Gizarte Funtsak ipini duela.

8. artikulua.– Prestakuntza-ekintzetan parte hartuko duten pertsonak hautatzea.

1.– Honako hauek izan daitezke prestakuntza-ekintza bakoitzean parte hartzeko hautagaiak:

a) Enplegu-eskatzaileak (eta diru-sarrerak bermatzeko errenta jasotzen dutenak), baldin eta Lanbide-Euskal Enplegu Zerbitzuko Orientazio Zerbitzuek prestakuntza-ekintza egitea preskribatu badiete haien prestakuntza-ibilbidearen barruan.

b) Nire Lanbidenet-en bitartez ikastaro batean izena eman duten enplegu-eskatzaileak, beren prestakuntza-kontuko prestakuntza-aholkularitzaren bidez.

c) Lanbide-Euskal Enplegu Zerbitzuak deitutako enplegu-eskatzaileak, prestakuntza-aholkularitzako edo ebaluazioko prozesu baten ondoren agindu zaien prestakuntza egiteko, lan-esperientziaren edo prestakuntzako bide ez-formalen bitartez eskuratutako konpetentzia profesionalak ebaluatzeko eta egiaztatzeko prozeduran.

d) Lanbide-Euskal Enplegu Zerbitzuak deitutako enplegu-eskatzaileak, lan-merkatuan eskaria duen profesionaltasun-ziurtagiri baten egiaztapena osatzeko falta dituzten prestakuntza-moduluez eratutako prestakuntza-ekintza batean esku hartzeko.

e) Lanbide-Euskal Enplegu Zerbitzuan izena emanda ez dauden landunak, baldin eta aurrez aurre Lanbideren sareko bulegoren batean eskaera aurkeztu badute, edo eskaera erakunde autonomo horren webgunean bete badute (www.lanbide.euskadi.eus). Prestakuntza-ekintzak, haietan izena emateko epea eta eskatzaileek bete behar dituzten sarbide-baldintzak adieraziko dira webgunean, bai eta prestakuntza-ekintza bakoitzaren xehetasunak eta ezaugarriak ere.

2.– Profesionaltasun-ziurtagiriak lortzeko prestakuntza-ekintzetan parte hartu nahi dutenek Profesionaltasun-ziurtagiriak arautzen dituen urtarrilaren 18ko 34/2008 Errege Dekretuaren 20. artikuluan xedatutako eskakizunak bete behar dituzte, lanbide-kualifikazioaren 2. eta 3. mailetarako. Era berean, prestakuntza-espezialitateen katalogoan jasotako prestakuntza-espezialitateren bateko prestakuntza-ekintzetan parte hartu nahi dutenek katalogoan espezialitate bakoitzerako ezarritako sarbide-baldintzak bete behar dituzte.

3.– Ikastaroetan parte hartuko duten ikasleen azken hautaketa erakunde onuradunak egingo du, aurrez izena eman duten hautagaien artean. Horretarako, prestakuntza emango duen entitateak sarbidea izango du inskribatutako hautagaien datuetara, Lanbide-Euskal Enplegu Zerbitzuaren prestakuntza-kudeaketarako aplikazioaren bidez (LanF). Prestakuntza-ekintzak hasi aurretik egingo du hautaketa-prozesua, behar besteko aurrerapenarekin eta behar diren bermeekin.

Behar duten prestakuntza-ekintza guztietan hautaproba bat ere egingo da aurretik, ekintza baliatuko dutela ziurtatzeko eta ekintza kualifikazio-emaileen helburuak lortzeko behar diren ezinbesteko ezagueren maila finkatzeko, bat etorriz honako printzipio hauekin:

– Aurretik Lanbideko teknikariekin adostu behar da.

– Beraren xedea izango da prestakuntzari etekina ateratzeko behar diren gutxieneko ezagutzak modu objektiboan ebaluatzea.

– Prestakuntza-zentroko instalazioetan egingo da. Ez da inolaz ere onartuko ezagutza-probatzat telefono bidezko elkarrizketa edo bestelako prozedura telematiko baten bidez egindakoa.

– Hautaketaren aurreko hautaproba ez da berez hautaketako prozedura. Izan ere, gainditzen duten parte-hartzaileak artikulu honen 5. puntuan ezartzen den lehentasunen hurrenkeran hautatuko dira.

– Prestakuntzaren xedea profesionaltasun-ziurtagiria bada, ziurtagiri horretako konpetentziaren bat egiaztatua dutenek ez dute egin beharko proba, ezta maila bereko edo goragoko mailako lanbide-arlo bereko ziurtagiria dutenek ere.

– Proba hori LanF aplikazioaren dagokion apartatuan erantsiko da, prestakuntza-ekintzak gauzatzeari buruz ematen diren jarraibideen arabera.

4.– Prestakuntza-ekintzara sartzeko eskakizunak betetzen dituzten eta, aurreko apartatuan deskribatu bezala, dagokien hautaproba gainditzen duten langabeen artean, kolektiboen araberako lehentasun batzuk ezarri dira, hurrenkera honetan:

1. Lehenik, eta lehentasun-maila berean, lan-merkatuan sartzeko zailtasun bereziak dituzten pertsona hauek:

– Kualifikazio-maila baxua dutenak.

– 30 urtera arteko gazteak, luzaroko langabeak, 45 urtetik gorakoak eta desgaitasuna dutenak.

– Gizarteratzeko Errenta Aktiboaren (GEA) eta Diru-sarrerak Bermatzeko Errentaren (DSBE) onuradun diren langabeak, eta langabezia-sorospen bereziaren (LSB) hartzaileak.

– Terrorismoaren eta genero-indarkeriaren biktimak.

– Arrazoi ekonomikoak, teknikoak, antolakuntzakoak edo ekoizpenekoak tarteko edo ezinbesteko kausen ondorioz aldi baterako enplegu-erregulazioko espedienteen, lan-kontratuaren etenduren edo lanaldi-murrizketen eraginpean dauden langileak; haiek langabetzat joko dira ondorio horietarako.

– Aukeraberri programan parte hartzen dutenak. Krisian dauden sektoreetako langileak birkualifikatu eta birkokatzea xede duen programa hori 2021eko uztailaren 13ko bilkuran onartu zuen Lanbideko Administrazio Kontseiluak.

Emakumeen ehunekoa langabeen artean duten pisuaren proportziozkoa izan behar da. Beraz, emakumeak langabeen % 55 direnez gero, prestakuntza-taldean ere emakumeak gutxienez % 55 izan behar dira, ahal dela.

2. Bigarrenik, gainerako langabeak, oro har.

5.– Landunek, lehentasunezkoak ez direnez, plaza hutsak daudenean bakarrik parte hartu ahal izango dute, ikastarora sartzeko baldintzak betetzen dituen langabe nahikorik ez badago.

6.– Pertsona berak ezin izango ditu bi ikastaro batera egin, baldin eta ikastaroan sartzeko eskakizunak betetzen dituen beste norbaiten eskabidea jaso bada.

7.– Hautaketa bukatu ondoren, entitate onuradunek hautaketaren emaitza jakinaraziko diote Lanbide-Euskal Enplegu Zerbitzuari, LanF kudeaketarako aplikazio informatikoaren bidez eta Lanbide-Euskal Enplegu Zerbitzuak berariaz emandako jarraibideak aintzat hartuz.

8.– Hautatutakoen zerrenda eta erreserba-egoeran gelditzen direnen zerrenda erakutsi behar dituzte prestakuntza-erakundeek beren instalazioetan, prestakuntza-ekintzak abiarazi baino 24 ordu lehenago gutxienez, hautagaiei aldez aurretik adierazi zaien leku batean. Hor, zehaztuta egon behar du non, zer egunetan eta zer ordutan hasiko diren prestakuntza-ekintzak.

Aurrekoa eragotzi gabe, prestakuntza-zentroek egoki iritzitako bestelako bitartekoak erabili ahal izango dituzte ikasleei ikastaroetan parte hartuko dutela jakinarazteko.

9. artikulua.– Prestakuntza-ekintzetan parte hartuko dutenen eskubideak eta betebeharrak.

1.– Prestakuntza-ekintzak doakoak dira ikasleentzat, eta Lanbide-Euskal Enplegu Zerbitzuak eta Europako Gizarte Funtsak lagunduko dituzte diruz.

2.– Ikasleek aseguru-estaldura izango dute ikastaroetan eta, behar denean, enpresako prestakuntza praktikoan, bai eta haietara joateko bidean dituzten arriskuetarako, Eusko Jaurlaritzak sinatutako aseguruak istripuak eta erantzukizun zibila estaliko baititu.

3.– Parte-hartzaileek ikastaroaren egutegia, prestakuntza-ekintzaren programa eta ikasleen eskubide eta betebeharrei buruzko dokumentua jasoko dituzte, lehen eskola-egunean, eta jaso izanaren dokumentua sinatuko dute.

4.– Ikasleek prestakuntza-ekintzetara joan beharko dute, eta haiei etekina atera beharko diete. Hori bermatzeko, erakunde onuradunak eguneroko bertaratze-partea egin beharko du, eta irakasleak zein parte-hartzaileek sinatu beharko dute. Profesionaltasun-ziurtagirien kasuan, eguneroko parte hori bereiz egingo da prestakuntza-modulu bakoitzeko.

5.– Ikasleek ezin izango dute ikastaro batean baja eman beste prestakuntza-ekintza bat hasteko. Ezin izango dute jarduera utzi harik eta bukatzen den arte, baina salbuespentzat hartuko dira honako kasu hauek: enplegua aurkitu badute, eta horrek prestakuntza-ekintzara joatea eta probetxua ateratzea galarazten badie, edo bat-bateko familia-egoera larriren bat sortzen bazaie (behar bezala justifikatu beharko dute). Jarduera justifikaziorik gabeko beste arrazoiren barengatik utziz gero, gerta liteke pertsona hori lehentasunezkoa ez izatea etorkizuneko deialdietako prestakuntza-ekintzetan sartzeko.

10. artikulua.– Ikasleak baztertzeko arrazoiak eta prozedura.

1.– Honako hauek izango dira ikasleak baztertzeko arrazoiak:

a) Justifikatu gabe hilean hirutan baino gehiagotan ez agertzea.

b) Prestakuntza-ekintzaren iraupen osoaren % 25etik gorako ez-bertaratzea biltzea, arrazoia edozein dela ere, justifikatua zein justifikatu gabea.

c) Prestakuntza-ekintzari probetxurik ez ateratzea, edo ekintza behar bezala garatzea eragozten duen jokabide desegokia izatea, higiene- eta osasungarritasun-arauak ere kontuan hartuta.

2.– Honako hau izango da ikasleak baztertzeko prozedura:

Prestakuntza-zentroak prestakuntzako teknikariari jakinaraziko dio baztertzeko arrazoietako bat gertatu dela, horretarako ezarri den eredua erabiliz. Lanbide-Euskal Enplegu Zerbitzuak arrazoi hori aztertuko du, eta ontzat ematen badu, Enplegurako Lanbide Heziketako zuzendariak baztertzeko prozedura hasteko erabakia hartuko du. Erabaki horretan, ikaslea baztertzeko proposamenaren arrazoia azalduko da, eta ikasleak bost egun balioduneko epea izango du alegazioak aurkezteko. Enplegurako Lanbide Heziketako zuzendariak gehienez hamabost egun balioduneko epean ebatziko du prozedura. Egoerak hala eskatzen badu, behin-behineko neurriak har daitezke baztertze-prozedurari ekiteko erabakian, prestakuntza-jardueraren jarraipen egokia bermatzeko. Neurri horietako bat ikaslea behin-behinean baztertzea izan daiteke, erabakia jakinarazten zaionetik prozedura ebazten den arte. Ebazpenean adieraziko da zein errekurtso aurkeztu daitekeen.

Aste batean ikasle baten hutsegiteak prestakuntza-ekintzaren ordu-kopuruaren % 25 baino gehiago badira, edo justifikatu gabeko hiru hutsegite baino gehiago egiten baditu hilean, eta ikasleak ekintzara joaten jarraitzen badu, prestakuntza-zentroak horren berri emango dio Lanbide-Euskal Enplegu Zerbitzuko Enplegurako Lanbide Heziketako Zuzendaritzari, ikaslea baztertzeko prozedura has dezan. Modulu oso bat geratzen bada egiteko, eta % 25etik gorako huts egiteak arrazoi justifikatu batengatik gertatu badira (adibidez, gaixotasuna edo lanean hastea), aztertu ahal izango da pertsona horri geratzen den modulua egiteko aukera ematea.

Ikasle batek prestakuntza-ekintzara joateari uzten badio eta asistentzia-falten % 25 gainditzen baldin badu, zentroak horren berri emango dio Lanbide-Euskal Enplegu Zerbitzuari, eta ofizioz emango zaio baja, baztertze-prozedura erabili beharrik gabe.

11. artikulua.– Prestakuntza-ekintzak gauzatzea eta lortutako konpetentziak egiaztatzea.

1.– Dirulaguntzaren onura jasotzen duen entitateak deialdi honetan ezarritakoari jarraikiz eta Lanbide-Euskal Enplegu Zerbitzuak ematen dituen ereduen arabera gauzatu beharko ditu prestakuntza-ekintzak, eta erakunde autonomo horren prestakuntzarako aplikazio informatikoa (Lan-F) baliatu beharko du jakinarazteko prestakuntza-ekintza bakoitza hasi dela (hasiera-eguna baino 7 egun baliodun lehenago, gutxienez), geroago aldaketak gertatu direla (gertatu eta berehala), eta amaitu dela. Halaber, parte-hartzaileen asistentzia kontrolatuko du. Oro har, eta aurkako jarraibiderik ematen ez bada, gehienez ere 7 egun balioduneko epealdiaren barruan egin beharko zaizkio jakinarazpenak Lanbide-Euskal Enplegu Zerbitzuari. Prestakuntza-ekintzak ezingo dira hasi, aldez aurretik Lanbidek ez badu LanF aplikazioan Hasierako komunikazioa baimentzen.

2.– Deialdi honen babesean diruz lagundutako prestakuntza ematen duten prestatzaileek Lanbide-Euskal Enplegu Zerbitzuaren baimena eduki beharko dute, eta prestatzaileen fitxategian sartu beharko dira, indarrean dagoen araudian ezarritako betekizunen arabera.

3.– Dirulaguntza jasotzen duten ikasleez gain, beste bi joan daitezke prestakuntza-ekintzara, haiengatik dirulaguntza jasotzeko eskubiderik gabe, hasierako komunikazioan hartarako eskabidea egiten duten prestakuntza-erakundeetan, betiere instalazioak eta ekipoak badituzte eta ikasle guztiek baldintza berak edukitzea bermatzen bada. Erabilgarri diren instalazioak eta ekipamenduak egiaztatutakoan emango da baimena; profesionaltasun-ziurtagirien kasuan, eskatutako parte-hartzaileen kopurua ere egiaztatuko da.

4.– Langile langabeek ezingo dituzte egunean 8 ordu baino gehiago eman prestakuntza-ekintzetan. Nolanahi ere, astean ez dira 40 ordu baino gehiago egingo. Muga horien barruan daude, hala egokitzen denean, bai profesionaltasun-ziurtagiri bakoitzean lantokietan egiten den prestakuntza praktikoaren moduluko orduak, bai profesionaltasun-ziurtagiriei ez dagozkien ekintzen praktiken orduak.

5.– Prestakuntza-erakundeak ahaleginduko dira prestakuntza-ekintzak ordutegi zentzuzkoetan programatzen, ikasleek prestakuntza eta bizitza pertsonala bateratzeko aukera izan dezaten.

Prestakuntza-ekintza hasitakoan, erregulartasunez emango da, eta prestakuntza-erakundeak ezin izango du aldi baterako eten, behar bezala justifikatutako eta Lanbidek onartutako ezinbesteko kasuetan izan ezik.

Lanbide-Euskal Enplegu Zerbitzuak prestakuntza-ekintza bat kautelaz eten ahal izango du, baldin eta prestakuntza emateko ohiko garapenean eragin nabarmena duten anomaliak hautematen badira.

6.– Ikastaroaren hasieran, erakunde onuradunek gutxienez material hau emango diote prestakuntza-ekintzetan parte hartzen duen ikasle bakoitzari:

– espezialitatearen eduki guztiak biltzen dituen eskuliburu bat, editatua edo euskarri informatikoan,

– ikastaroa behar bezala egiteko behar den idazmahaiko materiala eta

– beharrezkoak diren babes-elementuak.

Era berean, zer eskubide eta betebehar dituzten azalduko diete ikasleei, bai eta kanporatzeko arrazoiak eta prozedurak ere (9. eta 10. artikuluetan arautuak).

7.– Ikasleren batek prestakuntza-ekintza uzten badu, haren lekuan beste parte-hartzaile bat sartu ahal izango da. Prestakuntza-jardueraren iraupenaren ehuneko 25era iritsi baino lehen onartuko da ordezte hori, salbu eta profesionaltasun-ziurtagiriei loturiko prestakuntza-jarduerak badira; horrelakoetan, ordeztea prestakuntza-jarduera hasi eta lehen bost eskola-egunetan gertatzen bada onartuko da soilik, betiere ehuneko hori gainditu ez bada.

Hasita dagoen prestakuntza-ekintza batean sartzen diren ikasleek maila nahikoa izan beharko dute, hartara ikastaroari jarraitzeko eta etekina ateratzeko gai izan daitezen, hura normaltasunez gauzatzea oztopatu gabe. Hala, bada, prestakuntza-ekintzari etekina atera eta ekintza normaltasunez garatzearren, parte-hartzaileen hautaketa-prozesuak irizpide batzuk ezarri beharko ditu, ikasleek prestakuntza-ekintza behar bezala jarraitzeko eska daitekeen gutxieneko maila dutela bermatze aldera.

8.– Prestakuntza-jardueran parte hartzen duten langabeei dagokienez, batez ere langabeziako prestazioa edo subsidioa edo diru-sarrerak bermatzeko errenta jasotzen badute, prestakuntza emateko ardura duten erakunde onuradunek berehala eman beharko diote Lanbide-Euskal Enplegu Zerbitzuari parte-hartzaileen ukoen, ez-bertaratzeen eta uzteen berri, egoera horiek zergatik gertatu diren zehaztuta.

9.– Prestakuntzaren helburua ez bada profesionaltasun-ziurtagiriak eskuratzea, parte-hartzaile bakoitzari asistentzia-ziurtagiria edo diploma emango zaio, prestakuntza gainditu badu eta ebaluazioa positiboa izan bada, Lanbide-Euskal Enplegu Zerbitzuak ezarritako ereduaren arabera. Dokumentu horretan honako datu hauek adieraziko dira, gutxienez: prestakuntza-ekintzaren izena, prestakuntza-edukiak, zer modalitatetan eman den, zer egunetan hasi eta amaitu den, eta ikasleak zenbat prestakuntza-ordu jaso dituen guztira.

10.– Prestakuntzaren xedea profesionaltasun-ziurtagiriak lortzea bada, ikasleak egiten duen modulu bakoitza ebaluatuko da, ikasketaren emaitzak eta, horrenbestez, lanbide-konpetentziak eskuratu direla egiaztatzeko.

Ebaluazioa sistematikoki egingo da, aldez aurreko plangintza bati egokituta, eta bertan jasoko dira, gutxienez, modulu bakoitzerako, hura egiteko aurreikusitako egunen aurreikuspena, zein tokitan egingo den, erabiliko diren ebaluazio-tresnak eta horien aplikazioak iraungo duen denbora (LanF aplikazio informatikoan emandako ereduaren arabera). Ebaluazio-tresna horiek eta parte-hartzaile bakoitzak egindako probak eskaneatuko dira, eta aplikazio informatikoan gordeko dira.

Prestakuntza-moduluetan egiaztatu beharreko ikaskuntzaren emaitzak haien gaitasunetan eta ebaluazio-irizpideetan jasotako ezaguerei eta trebetasun praktikoei dagozkienak izango dira; horrela, osotasunean, lanbide-konpetentziak eskuratu direla egiaztatu ahalko dute.

Konpetentzia-unitateen egiaztapena jasotzeko, emaitza positiboarekin gainditu beharko dituzte haiekin lotutako prestakuntza-moduluak, «gai» direla adierazita.

Prestatzaileek dokumentuen bidez islatuko dituzte txosten batean prestakuntza-modulu bakoitzaren ebaluazioan ikasleek lorturiko emaitzak, eta bertan bilduko da aplikaturiko ebaluazio-tresnetan ikasle bakoitzak izandako jarduna, egindako zuzenketekin eta horietan lorturiko puntuazioekin. (LanF aplikazio informatikoan emandako ereduaren arabera).

Modulua eman eta gero, ebaluazio-akta bete beharko da, LanF aplikazio informatikoaren bidez, parte-hartzaile bakoitzak lortutako emaitzarekin: «gai», «gai, egiaztaezina» edo «ez gai».

Lantokiko prestakuntza praktikoko modulua egiten den bitartean, ikasleen jarraipena eta ebaluazioa batera egingo dituzte prestakuntza-zentroak eta enpresak izendatutako tutoreek. Modulu hori gainditzen duten ikasleek ziurtagiri bat jasoko dute LanF aplikazio informatikoaren bitartez.

Ikastaroa bukatutakoan, gainditutako prestakuntza-moduluei dagokien egiaztapen partzial metagarria (EPM) emango zaie parte-hartzaileei, eta profesionaltasun-ziurtagiria lortzeko prozedura hasiko da, hura osatu badute.

Ikasleak emaitza negatiboekin bukatzen badu ikastaroa, asistentzia-ziurtagiri bat emango zaio, eta, hala badagokio, gainditu dituen prestakuntza-moduluen egiaztapen partzial metagarriak edo prestakuntza-modulu baten barruan zer prestakuntza-unitate gainditu dituen zehazten duen ziurtagiria ere bai.

Profesionaltasun-ziurtagiriei dagozkien prestakuntza-ekintzak ematen dituen entitateak honako datu edo agiri hauek sartu beharko ditu Lanbide-Euskal Enplegu Zerbitzuaren LanF aplikazioan:

– Ikastaldia hasi aurreko 7 egun balioduneko epean:

• Ebaluazioaren plangintza, Lanbidek ezarritako ereduaren arabera (LanF informatika-aplikazioan eskuratu ahal izango da).

• Erabiliko diren ebaluazio-tresnak, eta haiek zuzentzeko eta puntuatzeko euskarriak.

– Ikastaldia bukatu ondoko 7 egun balioduneko epean:

• Ikasleen emaitzak biltzen dituzten dokumentuak LanF aplikazioan, Lanbidek ezarritako ereduaren arabera (LanF aplikazio informatikoan eskuratu ahal izango da).

• Ebaluazio-aktak betetzea.

11.– Dirulaguntzaren prestakuntza-erakunde onuradunek zuzenean egikarituko dituzte prestakuntza-ekintzak, eta ezin izango dute hirugarrenik azpikontratatu horretarako. Horri begira, ordea, ez da azpikontrataziotzat hartuko dirulaguntza jaso duen prestakuntza-ekintza emateko irakasleak kontratatzea. Irakasleak kontratatzea pertsona fisikoak kontratatzea baino ez da.

12. artikulua.– Lanekoak ez diren lanbide-praktikak.

1.– Prestakuntzaren helburua profesionaltasun-ziurtagiriak lortzea ez bada, lanekoak ez diren praktika profesionalek ezin izango dute 200 ordu baino gehiago iraun, oro har, eta prestakuntza-ekintza amaitu osteko bi hilabeteetan hasi beharko dira beranduenez. Epealdi hori 3.5 artikuluan ezartzen denak baldintzatuko du.

2.– Prestakuntzaren helburua profesionaltasun-ziurtagiria lortzea bada:

– Praktiken iraupena eta edukia bat etorriko dira lantokiko prestakuntza praktikoko moduluarekin, dagokion profesionaltasun-ziurtagiria arautzen duen Errege Dekretuaren II. eranskinean ezarritakoaren arabera. Enpresak uste badu iraupena eta eduki horiek ez direla nahikoak, praktikaldia luzatu ahal izango du, lanez kanpoko praktikaren akordio osagarri baten bitartez. Nolanahi ere, praktikaldi biek batera ezingo dute gainditu 200 orduko iraupena.

– Prestakuntza-erakundeek lantokiko prestakuntza-modulu praktikoa egitea aurreikusi beharko dute, ikasten ari diren moduluarekin lotutako lanetan, ikastaroetan parte hartzen duten ikasle guztientzat. Salbuespentzat hartuko dira urtarrilaren 18ko 34/2008 Errege Dekretuak, profesionaltasun-ziurtagiriak arautzen dituenak, 5 bis artikuluan xedatzen dituen salbuespen-egoera batean dauden ikasleak.

– Ahal dela, lanbide-praktikak gainerako prestakuntza-moduluak bukatutakoan egingo dira, aurrekoak emaitza positiboarekin gainditu badira, betiere; horrela, azken prestakuntza-modulua amaitu osteko lau hilabeteko epean hasi beharko dira lanbide-praktikak beranduenez. Epealdi hori 3.5 artikuluan ezartzen denak baldintzatuko du.

Salbuespenez eta justifikatuta baldin badago, Lanbide-Euskal Enplegu Zerbitzuak baimena eman ahal izango du lanbide-praktikak gainerako prestakuntza-moduluekin batera egin ahal izateko. Prestakuntza-ekintza emaitza positiboekin gainditu duten ikasle guztiek egin ahal izango dute prestakuntza praktikoko modulua lantokian, haien lan egoera administratiboa gorabehera (landuna zein langabea).

– Prestakuntza-ekintza egiten ari diren bitartean praktikak hasi dituzten ikasleek, azken ebaluazioan emaitza negatiboa lortuta ere, praktikak egiten jarraitzeko aukera izango dute. Prestakuntza-ekintza uzteak, berriz, hari lotutako lantokiko prestakuntza praktikoko modulua amaitzea ekarriko du.

– Profesionaltasun-ziurtagiri osoa ematen ez bada, lanekoak ez diren praktikak egin ahal izango dira, baina ez lantokiko prestakuntza-modulua, langileak gainerako prestakuntza-moduluak egiaztatuta izan ezean.

3.– Lanekoak ez diren praktikak egiteko, enpresaren eta prestakuntza-entitatearen arteko akordio bat sinatuko da, eta akordio horren berri emango zaio praktikak egingo dituen pertsonari. Hartan, honako hauek azaldu beharko dira: praktiken edukia, iraupena, praktikak egiteko tokia eta ordutegia, eta praktiken jarraipena eta ebaluazioa egiteko tutoretza-sistema. Praktikak hasi baino lehen, enpresako langileen legezko ordezkariei emango zaie akordio horren berri. Baldintza hori bete den egiaztatzeko, langileen legezko ordezkariek akordioari buruzko informazioa jaso dutela adierazteko agiria erantsi beharko da (eredu ofiziala erabili beharko da horretarako, LanF aplikaziotik hartuta). Gainera, parte hartzen duten ikasleen zerrenda ere erantsi beharko da.

4.– Praktikak Euskal Autonomia Erkidegoko lantokietan egin beharko dira, behar bezala justifikatutako arrazoiak daudenean izan ezik. Horretarako, Enplegurako Lanbide Heziketako zuzendariak baimena eman beharko du aldez aurretik.

5.– Ikasleek ezin izango dute inolako kontratu-harremanik izan praktikak egingo dituzten enpresa, instituzio edo erakunde publiko edo pribatuarekin, Lanbidek horretarako baimena eman ezean.

6.– Praktiken eguneko iraupena ezin izango da 8 ordutik gorakoa izan.

7.– Lanbide-Euskal Enplegu Zerbitzuak praktiken akordioa baliozkotzea ezinbesteko baldintza da, eta lantokietako prestakuntza-modulua hasi aurretik egin behar da. Hori betetzen ez bada, nahitaezko baimena ez duten praktikak baliogabetu ahal izango dira.

13. artikulua.– Prestakuntza-ekintzen jarraipena eta kontrola.

1.– Lanbide-Euskal Enplegu Zerbitzuak, prestakuntza ematen duen zentroarekin lankidetzan, prestakuntza-ekintzen jarraipena eta kontrola egingo ditu. Zeregin hori ez da mugatuko eskakizunak eta alderdi formalak betetzen direla egiaztatzera; aitzitik, barnean hartuko du prestakuntzaren emaitzen ebaluazioa, eta, hartara, kalitatea bermatzen lagunduko du.

2.– Jarduera-plan bat ezarriko da, deialdian ezarritako baldintzak betetzen diren eta prestakuntza-proiektuak erregulartasunez garatzen diren egiaztatzeko eta, beharrezkoa izanez gero, dagozkion neurri zuzentzaileak ezartzeko. Jarduera horiek barnean hartuko dute prestakuntza-jardueraren jarraipena, ematen den tokian eta toki horretatik kanpo, diruz lagundutako prestakuntza-ekintzak egiten diren bitartean edota amaitu ondoren, dokumentuen bidez eta frogagiri fisikoen bidez.

3.– Batasunaren arautegian ezartzen den bezala, eta prestakuntza-erakundeen egiaztatzea arautzen duen arautegiarekin bat etorriz, plan horretan in situ egiaztapen-bisitak sartuko dira, Europako Gizarte Funtsaren finantzabideen baldintzak betetzen direnez egiaztatzeko eta inskripzioa edo egiaztapena egiterakoan zentroak egiaztatu zituen baldintzak mantentzen diren ikusteko.

14. artikulua.– Prestakuntza-ekintzen ebaluazioa.

Lanbide-Euskal Enplegu Zerbitzuak deialdi honen kalitatea ebaluatuko du, kontuan hartuta ikasleek berek betetako galdetegietatik lortutako batez besteko emaitzak, enplegurako prestakuntza-ekintzen kalitatea ebaluatzeko galdetegiak argitaratzen dituen Estatuko Enplegu Zerbitzu Publikoaren 2009ko apirilaren 27ko Ebazpenean xedatutakoaren arabera (2009ko ekainaren 11ko BOE).

Horretarako, dirulaguntzen onuradunek burutzen duten prestakuntzaren kalitatea ebaluatu eta kontrolatu beharko dute, prestakuntza-proiektuan jasotako prestakuntza-ekintzak kudeatzeko jardueren artean.

Edonola ere, prestakuntza-ekintza bakoitza amaitu aurretik, parte-hartzaileek kalitateari buruzko galdetegia bete beharko dute; oro har, prestakuntza egiaztagarriko ekintza guztietan, amaierako azterketa egitean emango zaie, baita egiaztagarria ez den baina amaierako azterketa egitea eskatzen duen prestakuntzaren kasuan ere. Gainerako prestakuntza-ekintzetan, ikastaroaren azken bi egunetan beteko da galde-sorta.

Galdetegi horiek telematikoki beteko dituzte ikasleek. Ikastaroa ematen duen erakundearen ardura da ziurtatzea ikasleek kalitateari buruzko galdetegia betetzen dutela; horretarako, parte-hartzaileen eskura jarriko dituzte beharrezko baliabideak, diruz lagundutako ikastaroa amaitzen duten ikasleek galdetegia bide telematikoz betetzea ahalbidetzeko. Parte-hartzaileen % 67k baino gutxiagok erantzuten badiote galdetegiari, 16. artikuluko 3. eta 4. apartatuetan adierazten den bezala egingo da dirulaguntzaren likidazioa.

15. artikulua.– Dirulaguntza ordaintzea.

1.– Emandako dirulaguntza bi alditan ordainduko da, ordainketak eskatu eta gero, honela:

a) Lehen ordainketa, 2023ko ordainketa-kredituaren kargura, prestakuntza-proiektuaren dirulaguntza guztiaren % 60, prestakuntza-ekintzaren hasieraren edo prestakuntza-ibilbideko lehen ekintzaren hasieraren jakinarazpena jaso ondoren.

b) Bigarren ordainketa, 2024ko konpromiso-kredituaren kargura, prestakuntza-proiektuaren dirulaguntzaren gainerakoa, prestakuntza-ekintza edo prestakuntza-ibilbidea osatzen duten prestakuntza-ekintzak amaitutakoan, lanekoak ez diren praktikak barne, diruz lagundutako jarduerak justifikatu ondoren.

2.– Ordainketa bakoitza egin aurretik, Lanbide-Euskal Enplegu Zerbitzuak egiaztatuko du zerga-betebeharrak eta Gizarte Segurantzari dagozkionak bete direla.

Entitate onuraduna egiaztapen hori egitearen aurka agertzen bada, baldintza hori egiaztatzen duten ziurtagiri eguneratuak aurkeztu beharko ditu.

3.– Administrazioak laguntzak ordaindu ahal izan ditzan, entitate eskatzaileak Eusko Jaurlaritzako Ekonomia eta Ogasun Sailaren Kontrol Ekonomikoko Bulegoaren Hirugarrenen Erregistroan inskribatuta behar du.

Entitatea ez badago erregistratuta Ekonomia eta Ogasun Sailaren Hirugarrenen Erregistroan edo hango banku-datuak aldatu nahi baditu, inprimakia bete beharko du, honako helbide honetan eskuragarri dagoen ereduari jarraituz: https://www.euskadi.eus/hirugarrenak Eredu hori eskuragarri dago, halaber, Euskal Autonomia Erkidegoko Administrazio Publikoaren egoitza elektronikoan.

16. artikulua.– Dirulaguntzaren justifikazioa eta likidazioa.

1.– Ikastaroa amaitu duten parte-hartzaileen arabera eta benetan egin dituzten eskola-orduak kontuan hartuta egingo da prestakuntza-proiektuak gauzatzeko emandako dirulaguntzaren justifikazioa eta likidazioa, ezarritako modulu ekonomikoei jarraituz.

Likidazioak ez du inola ere gaindituko proiektua gauzatzeko hasieran onartu zen dirulaguntzaren zenbatekoa.

2.– Likidatu beharreko dirulaguntzaren zenbatekoa kalkulatzeko, ez da aintzat hartuko ezarritako epealdietan lantokian prestakuntza praktikoaren modulua amaitu ez duten ikasleek jaso duten prestakuntza.

3.– Oro har, likidazioa honela kalkulatuko da:

– A modulua bider 15 ikasle bider emandako prestakuntza-orduak egingo da.

– Aurrez aipatutako zenbatekoari gehituko zaio B moduluaren eta ekintzak dituen ordu-kopuruaren arteko biderketaren emaitza, ekintza amaitu duten ikasleen kasuan –prestakuntza-ekintza bukatu duten ikasletzat hartuko dira gutxienez ekintzaren % 75era joan direnak; ondorio horietarako, halakotzat joko dira enplegua aurkitu dutelako prestakuntza-ekintza utzi beharrean gertatzen diren langabeak, bai eta behar bezala egiaztatutako gaixotasun edo istripuagatik uzten dutenak ere, baldin eta, azken bi kasu horietan, gutxienez prestakuntza-ekintzaren % 25 egin badute–; eta prestakuntza-ekintzan parte hartu duten ordu-kopuru errealaren arteko biderketaren emaitza, ekintza amaitu ez duten ikasleen kasuan. Ekintza bakoitza ikasle kopuru batentzat onetsi da, eta kasuan kasuko muga errespetatuz egingo da kalkulua.

Ekintza amaitzen duten parte-hartzaileen (gai eta ez-gai) % 67k baino gutxiagok erantzuten badiote galdetegiari, ez da gehituko B modulua amaitu duten parte-hartzaileen kopuruaren zenbatekoa, hain zuzen ere betetakoen ehunekoaren eta gutxieneko % 67aren arteko aldeari dagokiona.

– Aurreko bi eragiketak eginda ateratzen den azken balioari % 10 gehituko zaio, zeharkako gastuei dagokiena.

4.– Ekintzaren iraupenaren % 25 betetzean hura hasi zuten parte-hartzaileen % 75ek jarraitzen ez badute, prestakuntza-ekintzak likidatzeko, oinarritzat hartuko da ekintzak amaitu dituzten ikasleen kopurutik abiatuta ateratako A + B + C moduluen zenbatekoa. Prestakuntza-ekintza bukatu duten ikasletzat hartuko dira gutxienez ekintzaren % 75era joan direnak; ondorio horietarako, halakotzat joko dira enplegua aurkitu dutelako prestakuntza-ekintza utzi behar izan duten langile langabeak, bai eta behar bezala egiaztatutako gaixotasun edo istripuagatik uzten dutenak ere, baldin eta, azken bi kasu horietan, prestakuntza-jardueraren % 25 gutxienez egin badute. Ekintza amaitzen duten parte-hartzaileen (gai eta ez-gai) % 67k baino gutxiagok erantzuten badiote galdetegiari, ez da gehituko B modulua amaitu duten parte-hartzaileen kopuruaren zenbatekoa, hain zuzen ere betetakoen ehunekoaren eta gutxieneko % 67aren arteko aldeari dagokiona.

5.– Dirulaguntza jasotzen duen entitateak prestakuntza-ekintza bakoitza justifikatzeko memoria ekonomikoa aurkeztu beharko du Lanbide-Euskal Enplegu Zerbitzuan, LanF aplikazio telematikoaren bitartez, prestakuntza-ekintza amaitutakoan prestakuntza-erakundeak ikasleei buruz egingo duen azken ebaluazioa Lanbidek baliozkotu eta 15 egun balioduneko epean beranduenez, honako dokumentazio honekin:

– Laburpen-koadro bat. Bertan jaso beharko dira ikasle bakoitzak benetan egindako eskola-orduak eta dagokien zenbatekoa, hots, ezarritako modulu ekonomikoak eta artikulu honetan aurreikusitako irizpideak aplikatuz lortutakoa.

– Prestakuntza-proiektua osorik edo zati batean finantzatu duten bestelako sarrerei edo dirulaguntzei buruzko aitorpena, zenbatekoa eta jatorria adierazita, edo halakorik ez dagoela dioen adierazpena.

– Bat etorriz Emakumeen eta Gizonen Berdintasunerako eta Emakumeen aurkako Indarkeria Matxistarik gabeko Bizitzetarako Legearen testu bategina onartzen duen martxoaren 16ko 1/2023 Legegintzako Dekretuaren 23.3.d) artikuluarekin, eta emakumeen eta gizonen egoeran zer eragin duen jakiteko, erakunde onuradunei eskatzen zaie emandako zerbitzuaren azken onuradunen edo erabiltzaileen, erakundearen titularren eta langileen informazioa sexuaren arabera banakatuta aurkezteko dirulaguntzak ematean ezarritako betebeharrak betetzen dituztela justifikatzen duten memorietan.

Ezarritako epealdian beharrezko agiriak aurkeztu ez baditu, organo eskudunak 15 eguneko epealdi luzaezina emango dio onuradunari agiri horiek aurkez ditzan. Azken epealdi horretan justifikaziorik aurkeztu ezean, itzulketa-prozedura hasiko da.

17. artikulua.– Entitate onuradunen betebeharrak. Jarraipena eta kontrola.

1.– Onuradunaren betebehar izango dira, deialdi honetako artikuluetan ezarritakoez gain, Dirulaguntzei buruzko azaroaren 17ko 38/2003 Lege Orokorraren 14. eta 46. artikuluetan oro har ezartzen direnak, Euskadiko Ogasun Nagusiaren Antolarauei buruzko Legearen testu bateginaren 50.2 artikuluan jasotakoak (azaroaren 11ko 1/1997 Legegintzako Dekretuaren bidez onetsia), eta enplegurako lanbide-heziketaren sistema arautzen duen araudian zehaztutakoak.

2.– Bereziki, laguntzen onuradunek egiaztatze- eta kontrol-jarduerak onartu beharko dituzte, zehazki honako erakunde hauek egingo dituztenak: Lanbide-Euskal Enplegu Zerbitzua, Ekonomia eta Ogasun Sailaren Kontrol Ekonomikoko Bulegoa, Lan eta Enplegu Saila eta Herri Kontuen Euskal Epaitegia. Halaber, erakunde horiei aukera emango diete lokal eta instalazioetara sartzeko, eta prestakuntza-ekintzetako parte-hartzaileekin eta elkarrizketatu nahi dituzten beste pertsonekin harremana izateko.

2021-2027 Euskal Autonomia Erkidegoko EGIF+ Programa finantzatzen lagundutako prestakuntza-ekintzek, Europar Batasuneko araudiaren ondorioz, arlo horretan eskumena duen ministerioak, Europako Batzordeak eta Europako Kontuen Auzitegiak egiten dituzten egiaztapen- eta kontrol-jarduerak onartu beharko dituzte.

3.– Kontrol-jarduera horiek onartzeko betebehar orokor honen esparruan, onuradunak honako hau bete beharko du:

– Finantzatutako ekimena gauzatu izanari edo haren bideragarritasunari buruzko informazio oro ematea eta jarraipena egiteko eskatzen zaizkion dokumentuak bete eta bidaltzea.

– Lanbide-Euskal Enplegu Zerbitzuari jakinaraztea beste erakunde batzuetatik dirulaguntzak edo laguntzak eskatu edo lortu direla, deialdi honetan diruz lagundutako jarduera osoari edo zati bati eragiten diotenak.

– Diruz lagundutako jardueraren xedea edo nondik norakoa funtsean aldatzen duen edozein gertaera jakinaraztea, bai eta dirulaguntza emateko orduan kontuan hartutako edozein inguruabarren aldaketa ere.

4.– Lanbide-Euskal Enplegu Zerbitzuak, ekintzaren jarraipena egiteaz gain, auditorien eta ikuskaritzen urteko plan bat ezarri ahal izango du deialdian ezarritako baldintzak betetzen direla egiaztatzeko eta diruz lagundutako ekintzak benetan zer baldintzatan gauzatzen diren aztertzeko.

5.– Era bereran, diruz lagundu daitezkeen gastuek Europako Gizarte Funtserako aukeratuak izateko baldintzak beteko badituzte, entitate onuradunak laguntzarekin zerikusia duten transakzioak identifikatu beharko ditu, kontabilitate-identifikazio bereizgarri bat edo kontabilitate-kode egoki bat baliatuta.

6.– Entitate onuradunaren ordezkariak edo ahaldunak sinatu egin beharko du, dirulaguntza onartzeko unean, izaera pertsonaleko datuei dagokien konpromisoa, datu horien tratamenduaren arduradun diren aldetik. Konpromiso hori nahitaez onartu beharko dute deialdiaren entitate onuradun guztiek, arlo hori arautzen duen indarreko legerian ezarritako baldintzen arabera.

7.– Laguntzen entitate onuradunek bost urtez gordeko dituzte batera finantzatutako gastuei buruzko egiaztagiri guztiak edo jatorrizkoen kopia ziurtatuak, oro har onartutako datu-euskarrien gainean, kudeaketa-agintaritzak onuradunari azken ordainketa egiten dion urteko abenduaren 31tik aurrera, Europako Parlamentuaren eta Kontseiluaren 2021eko ekainaren 24ko 2021/1060 (EB) Erregelamenduaren 82.1 artikuluaren arabera.

Agiri horien jatorrizkoak edo jatorrizkoen kopia konpultsatuak gordeko dira, edo eskuarki onartutako datu-euskarrietan, bereziki jatorrizko dokumentuen bertsio elektronikoak edo bertsio elektronikoan soilik dauden agiriak.

8.– Azkenik, parte-hartzaileen eskura jarriko dituzte beharrezko baliabideak, diruz lagundutako ikastaroa amaitzen duten ikasleek galdetegia bide telematikoz betetzea ahalbidetzeko.

18. artikulua.– Lanbide-Euskal Enplegu Zerbitzuaren finantzaketatik eta Europak lagundutako finantzaketatik eratorritako komunikazio-betebeharrak.

Diruz lagundutako jarduera guztietan Lanbide-Euskal Enplegu Zerbitzutik jasotzen duten finantzaketa berariaz adierazi beharko dute erakundeek, bai eta haien ondoriozko ekintzetan ere, eta Lanbide-Euskal Enplegu Zerbitzuaren komunikazio-eskuliburuan ezarritako baldintzak bete beharko dituzte (LanF prestakuntza-aplikazioaren bidez erakunde onuradunen eskura jarriko da eskuliburu hori).

Prestakuntza-ekintza guztiek Europak lagundutako finantzaketa jasoko dutela aurreikusita, erakundeek berariaz adierazi beharko dute Europako Gizarte Funtsak lagundutako finantzaketa hori, Lanbide-Euskal Enplegu Zerbitzuaren Komunikazio Eskuliburuan jasota dagoen 2021-2027 Euskal Autonomia Erkidegoko EGIF+ logoaren bidez, sortzen diren material didaktiko guztietan nahiz bestelako materialetan, bai eta diruz lagundutako jardueren berri emateko, hedatzeko eta/edo publizitatea egiteko ekintzetan ere.

Halaber, dirulaguntza jasotzen duten erakunde onuradunen zerrenda argitara emango da Europako Parlamentuaren eta Kontseiluaren 2021eko ekainaren 24ko 2021/1060 (EB) Erregelamenduaren 49. artikuluan adierazten den webgunean.

19. artikulua.– Dirulaguntza aldatzea.

Dirulaguntza emateko kontuan hartutako baldintzaren bat aldatuz gero, baliteke emandako dirulaguntza bera ere aldatzea, deialdi honetan dirulaguntzen onuradun izateko ezarritako gutxieneko eskakizunak betetzen badira, betiere. Baldintzen aldaketa horren ondorioz dirulaguntza osoa edo zati bat itzuli behar bada, itzulketa-prozedurari hasiera emango zaio.

20. artikulua.– Beste dirulaguntza edo laguntza batzuekiko bateragarritasuna.

Deialdi honen xede diren laguntzak bateragarriak izango dira beste edozein dirulaguntza edo laguntzarekin; nolanahi ere, hainbat finantzaketa-iturritatik jasotako laguntzen zenbateko osoak ezin izango du gainditu, diruz lagundutako aldian, diruz lagundutako prestakuntza-ekintzen benetako kostua. Kostu hori gaindituz gero, dirulaguntzaren zenbatekoa murriztuko da.

21. artikulua.– Dirulaguntzak itzultzea.

1.– Ezin izango da eskatu dirulaguntza ordaintzeko, eta, hala badagokio, jasotako kopuru osoak edo haien zati bat itzuliko dira, eta dirulaguntza ordaintzen den unetik aurrera dirulaguntzen arloan ezar daitezkeen berandutze-interesa eskatuko da, Dirulaguntzei buruzko azaroaren 17ko 38/2003 Lege Orokorraren 37. artikuluan, bai eta Euskal Autonomia Erkidegoko Ogasun Nagusiaren Antolarauei buruzko Legearen testu bateginaren (azaroaren 11ko 1/1997 Legegintzako Dekretuaren bidez onetsia) 53.1 artikuluan aurreikusten diren kasuetan. Bereziki, honako hauetan:

a) Jarduera gauzatu dela egiaztatzeko betebeharrak ez betetzea, edota laguntza emateko zein laguntzaz gozatzeko zehaztutako baldintzak eta eskakizunak ez betetzea.

b) Dirulaguntza lortzea horretarako eskatutako baldintzak bete gabe.

c) Jarraipen- eta kontrol-jarduketei uko egitea edo oztopoak jartzea.

d) Diruz lagundutako ekintzak gauzatzeko baldintzei buruzko datu faltsuak ematea, errealitatearekin bat ez datozenak.

e) Deialdi honen 18. artikuluan jasotako komunikazio-betebeharrak ez betetzea.

f) Deialdi honetan zehaztutako beste edozein betebehar, baldintza edo betekizun ez betetzea.

2.– Balizko ez-betetzeen maila honako irizpide hauen arabera zehaztuko da:

a) Erabateko ez-betetzea:

Emandako dirulaguntza osorik itzuli beharko da, honako kasu hauetan:

– Dirulaguntzaren helburua inola ere betetzen ez bada edo hura justifikatzen duen betebeharra erabat urratzen bada.

– Diruz lagundutako jarduerak ez baditu lortzen helburuen % 25, adierazle honen bidez neurtuta: prestakuntza-orduen kopurua bider amaitu duten ikasleen kopurua. Ondorio horietarako, justifikatutako hutsegiteengatik edo enpleguagatik zenbatu daitezkeen absentzia-orduak ere barne hartuko dira. Prestakuntza-ekintza bukatu duten ikasletzat hartuko dira ekintzaren % 75era gutxienez joan direnak; ondorio horietarako, halakotzat joko dira enplegua aurkitu dutelako prestakuntza-ekintza utzi beharrean gertatzen diren langabeak, bai eta behar bezala egiaztatutako gaixotasun edo istripuagatik uzten dutenak ere, baldin eta, azken bi kasu horietan, gutxienez prestakuntza-jardueraren % 25 egin badute.

– Profesionaltasun-ziurtagiriak lortzea xede duten prestakuntza-ekintzetan, praktiketan hasi ez diren ikasleak praktikak egin behar dituzten ikasle guztien % 30 baino gehiago badira. Prestakuntza-ibilbideen kasuan, ez-betetzea gertatu den prestakuntza-ekintzetara mugatuko da arrazoi horren ziozko itzulketa.

b) Ez-betetze partziala:

– Dirulaguntza emateko xedea edo hura justifikatzeko betebeharra hein batean ez betetzeak berekin ekarriko du emandako dirulaguntza aldatzea edo hein batean itzultzea.

– Aurreko a) apartatuan aipatutako adierazlea % 25 eta % 100 bitartean betetzen bada, bete gabe utzi den ehuneko berberean gutxituko da emandako dirulaguntza.

3.– Lanbide-Euskal Enplegu Zerbitzuak abiaraziko du itzultzeko prozedura, eta jakinarazpena helaraziko dio laguntzaren enpresa edo entitate onuradunari, ez-betetzea eragin duten gertaeren berri emateko. Era berean, adieraziko dio hamabost egun balioduneko epea duela egoki iritzitako alegazioak edo egiaztagiriak aurkezteko.

4.– Alegazioak aurkeztu ondoren edo alegazio horiek aurkezteko epea igaro ondoren, Lanbide-Euskal Enplegu Zerbitzuko Enplegurako Lanbide Heziketako zuzendariak ebazpena emango du.

Itzulketa-prozedura gehienez hamabi hilabeteko epean ebatzi beharko da.

5.– Ebazpenean ez-betetzeren bat izan dela iritziz gero, galdutzat emango da dirulaguntza jasotzeko eskubidea, eta, hala badagokio, dagozkion diru kopuruak Lanbide-Euskal Enplegu Zerbitzuari itzuli beharra ekarriko du, ebazpena jakinarazten denetik aurrera gehienez bi hilabeteko epean. Epe hori borondatezko epetzat hartuko da.

Dirulaguntza borondatezko aldian itzultzen ez bada, itzuli beharreko zenbatekoa premiamendu bidez berreskuratzeko izapideak hasiko dira.

22. artikulua.– Datuen babesari buruzko informazioa.

Datu pertsonalen babesaren arloan, Lanbide-Euskal Enplegu Zerbitzuaren jarduera honako bi xedapen hauen mende egongo da: Datuak Babesteko Erregelamendu Orokorra (EB 2016/679 Erregelamendua) eta Datu Pertsonalak Babesteko eta Eskubide Digitalak Bermatzeko 3/2018 Lege Organikoa. Biltzen diren datu pertsonalak «Enplegurako eta enpleguko prestakuntzarako dirulaguntzak» izeneko tratamendu-jardueraren barruan egongo dira. Jarduera horren arduraduna Lanbide-Euskal Enplegu Zerbitzua da, eta jardueraren helburua da Lanbideren eskumen diren enplegu-politika aktiboekin zerikusia duten dirulaguntzak kudeatu eta kontrolatzea, bai eta iruzurra jazartzea eta datuak estatistiketan erabiltzea ere. Eskuratzen diren datuak beharrezkoak dira Lanbide-Euskal Enplegu Zerbitzuari emandako botere publikoak gauzatzeko eta lege-betebeharrak betetzeko, eta arlo horretan eskumena duten administrazio publikoei komunikatu ahal izango zaizkie.

Datuen titularrek eskubidea dute datuak eskura izateko, zuzentzeko eta ezerezteko eta informazioaren tratamendua mugatzeko nahiz aurka egiteko tratamenduaren arduradunaren aurrean, datuen babesaren arloko eskubideak baliatzeko prozeduraren bidez. Prozedura hori www.euskadi.eus/servicios/10842/ helbidean argitaratu da.

Datuen babesari buruzko informazio osagarri eta zehatza kontsultatzeko: https://www.euskadi.eus/informazio-klausulak/web01-sedepd/eu/gardentasuna/074300-capa2-eu.shtml

23. artikulua.– Aplikatu beharreko araudia.

1.– Dirulaguntzen programa honi dirulaguntzen araubide juridikoa arautzen duten arau-xedapen hauek aplikatu behar zaizkio: Dirulaguntzei buruzko 38/2003 Lege Orokorra eta hura garatzen duen Erregelamendua (uztailaren 21eko 887/2006 Errege Dekretuaren bidez onartutakoa), oinarrizko legeria baitira; azaroaren 11ko 1/1997 Legegintzako Dekretuak onartutako Euskadiko Ogasun Nagusiaren Antolarauei buruzko Legearen testu bategineko VI. titulua eta VII. tituluko III. kapitulua eta abenduaren 17ko 698/1991 Dekretua, azken horrek arautu baitzuen Euskal Autonomia Erkidegoaren Aurrekontu Orokorren kargura ematen diren dirulaguntzen bermeei eta horiek itzultzeari buruzko erregimen orokorra eta horien kudeaketan parte hartzen duten erakunde laguntzaileek bete beharreko baldintzak, erregimena eta eginbeharrak.

2.– Laguntzek Europako Gizarte Funtsaren kofinantzaketa dutenez, Europako Parlamentuaren eta Kontseiluaren 2021eko ekainaren 24ko 2021/1060 (EB) Erregelamenduan xedatua aplikatu behar zaie. Hain zuzen ere, erregelamendu horren bitartez ezartzen dira Eskualde Garapeneko Europako Funtsari, Europako Plus Gizarte Funtsari, Kohesio Funtsari, Bidezko Trantsizio Funtsari eta Itsasoko, Arrantzako eta Akuikulturako Europako Funtsari buruzko xedapen komunak, bai eta funts horietarako finantza-arauak eta Asilo, Migrazio eta Gizarteratzeko Funtserako, Barne Segurtasuneko Funtserako eta Mugak eta Bisatuen Politika Kudeatzeko Laguntza Finantzariorako Tresnarako finantza-arauak ere. Era berean, laguntza hauek Europako Parlamentuaren eta Kontseiluaren 2021eko ekainaren 24ko 2021/1057 (EB) Erregelamenduaren mende ere badaude, eta, hain zuzen ere, erregelamendu horren bitartez ezartzen da Europako Plus Gizarte Funtsa (2021-2027 Euskal Autonomia Erkidegoko EGIF+) eta indargabetzen da 1296/2013 (EB) Erregelamendua.

3.– Deialdi honetan aurreikusi ez den guztian, xedapen hauek izango dira aplikagarri: 30/2015 Legea, irailaren 9koa, Lan-arloko enplegurako lanbide-heziketaren sistema arautzen duena; 694/2017 Errege Dekretua, uztailaren 3koa, zeinaren bitartez garatzen baita irailaren 9ko 30/2015 Legea, Lan-arloko enplegurako lanbide-heziketaren sistema arautzen duena; eta TMS/368/2019 Agindua, martxoaren 28koa, zeinaren bidez garatzen baita uztailaren 3ko 694/2017 Errege Dekretua, irailaren 9ko 30/2015 Legea garatzen duena.

Profesionaltasun-ziurtagiriak lortzea xede duten prestakuntza-ekintzei dagokienez, arau hauek aplikatuko dira: 34/2008 Errege Dekretua, urtarrilaren 18koa, Profesionaltasun-ziurtagiriak arautzen dituena, eta ESS/1897/2013 Agindua, urriaren 10ekoa, errege-dekretua garatzen duena, deialdi honetan ezarritako alderdi guztiei dagokienez, araudi horietan baldintza partikularrak ezartzen baitira.

24. artikulua.– Deialdi honetan jasotako ehunekoen kalkulua.

Deialdi honetako kalkuluen ondoriozko ehunekoren batean hamartarrik egonez gero, zati osoa baino ez da hartuko kontuan, hamartarrak alde batera utzita.

Azterketa dokumentala