![Euskal Herriko Agintaritzaren Aldizkaria](/appcont/servibopvi/images/bopv_anuncio_e.png)
131. zk., 2023ko uztailaren 11, asteartea
- Bestelako formatuak:
- PDF (199 KB - 10 orri.)
- EPUB (109 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
XEDAPEN OROKORRAK
EUSKO LEGEBILTZARRA
3311
AKORDIOA, 2023ko ekainaren 27koa, Eusko Legebiltzarreko Mahaiarena, Eusko Legebiltzarraren barneko informazio sistema sortu eta erregulatzeko den Araua argitaratzen duena.
Mahaiak, 2023ko ekainaren 27ko bileran, agindu du Eusko Legebiltzarraren Aldizkari Ofizialean eta Euskal Herriko Agintaritzaren Aldizkarian argitara dadila Eusko Legebiltzarraren barneko informazio sistema sortzeko eta erregulatzeko araua.
Vitoria-Gasteiz, 2023ko ekainaren 27a.
Eusko Legebiltzarreko lehendakaria,
BAKARTXO TEJERIA OTERMIN.
EUSKO LEGEBILTZARRAREN BARNEKO INFORMAZIO SISTEMA SORTZEKO ETA ERREGULATZEKO ARAUA
Otsailaren 20ko 2/2023 Legeak, arau-hausteei eta ustelkeriaren aurkako borrokari buruzko informazioa ematen duten pertsonak babesteari buruzkoak, Batasuneko Zuzenbidearen arau-hausteei buruzko informazioa ematen duten pertsonak babesteari buruzko Europako Parlamentuaren eta Kontseiluaren 2019ko urriaren 23ko 2019/1937 (EB) Zuzentarauaren transposizioa egiten duenak, barne hartzen ditu, baita ere, barne-ordenamendu juridikoaren arau-hauste penal eta administratibo astunak eta oso astunak, Ogasun Publikoari eta Gizarte Segurantzari kalte ekonomikoa eragiten dietenak barne.
Lege horretan aurreikusitako neurrietako bat da administrazio publikoek betebeharra dutela barneko informazio-sistema bat sortzeko, 2. artikuluan jasotako ekintzen edo omisioen berri haiei emateko lehentasunezko bidea izango dena. Neurri horrek konstituzio-organoei, garrantzi konstituzionala duten organoei eta aurrekoen antzeko instituzio autonomikoei ere eragiten die, eta Eusko Legebiltzarra horietako bat da.
Arau honek obligazio hori bete nahi du, Eusko Legebiltzarraren Barneko Informazio Sistema sortuz eta informazio-kanal espezifikoaren bidez jasotzen diren informazioak izapidetzeko prozedura arautuz.
Aurrekoa ikusita, eta Langileen Batzordeari kontsulta egin ondoren, Eusko Legebiltzarreko Mahaiak Barneko Informazio Sistema sortu eta erregulatzen duen arau hau onartzen du.
I. KAPITULUA
XEDAPEN OROKORRAK
1. artikulua.– Xedea.
Arau honen xedea da Eusko Legebiltzarraren Barneko Informazio Sistema (aurrerantzean, ELBIS) sortzea eta arautzea, otsailaren 20ko 2/2023 Legeak, arau-hausteei eta ustelkeriaren aurkako borrokari buruzko informazioa ematen duten pertsonak babesteari buruzkoak (aurrerantzean, IBL), ezarritako ondorioetarako.
2. artikulua.– Barneko Informazio Sistema.
1.– ELBIS da lehentasunezko komunikazio-tresna Europar Batasuneko Zuzenbidearen arau-hauste izan daitekeen edozein ekintza edo omisiori buruzko, edo arau-hauste penal edo administratibo astuna edo oso astuna izan daitekeen edozein ekintza edo omisiori buruzko informazioa emateko, betiere IBLren 2. artikuluan aipatzen diren aurreikuspenak betetzen badira eta informazioa Eusko Legebiltzarraren jarduerarekin eta funtzionamenduarekin lotuta badago.
2.– Zehazki, arau hau honako egitate mota hauek komunikatzen direnean aplikatuko da:
a) Europar Batasuneko Zuzenbidearen arau-hauste izan daitekeen edozein ekintza edo omisio, baldin eta:
1) Batasuneko Zuzenbidearen arau-hausteei buruzko informazioa ematen duten pertsonak babesteari buruzko Europako Parlamentuaren eta Kontseiluaren 2019ko urriaren 23ko 2019/1937 (EB) Zuzentarauaren eranskinean zerrendatutako Europar Batasunaren egintzen aplikazio-eremuan sartzen badira, barne-ordenamendu juridikoak arau-hauste horiei buruz egiten duen kalifikazioa edozein dela ere.
2) Europar Batasunaren finantza-interesak kaltetzen badituzte, Europar Batasunaren Funtzionamenduari buruzko Tratatuaren (EBFT) 325. artikuluan aurreikusitakoaren arabera.
3) Barne-merkatuan eragina badute, EBFTren 26. artikuluaren 2. apartatuan jasotzen den bezala, lehiari eta estatuek emandako laguntzei buruzko Europar Batasunaren arauen arau-hausteak barne, bai eta barne-merkatuari buruzko arau-hausteak ere, sozietateen gaineko zergaren arauak urratzen dituzten egintzei dagokienez edo sozietateen gaineko zergari aplikatu beharreko legeriaren xedea edo helburua desitxuratzen duen zerga-abantaila lortzea xede duten jardunbideei dagokienez.
b) Arau-hauste penal edo administratibo astunak edo oso astunak izan daitezkeen ekintza edo omisioak. Nolanahi ere, barne hartuko dira Ogasunari eta Gizarte Segurantzari kalte ekonomikoak eragiten dizkieten arau-hauste penal edo administratibo astun edo oso astun guztiak.
3.– Arau honetan aurreikusitako babesetik kanpo geratzen dira, beren-beregi, honako eduki mota hauei buruzko informazioa ematen duten pertsonak:
a) Barneko informazio-kanaletako batengatik edo IBLren 18.2.a) artikuluan aurreikusitako arrazoiren batengatik onartu ez diren komunikazioetan jasotako informazioak.
b) Pertsonen arteko gatazkei buruzko erreklamazioei lotutako informazioak edo informatzaileari eta komunikazioan edo jakinarazpenean aipatzen diren pertsonei soilik eragiten dieten informazioak.
c) Dagoeneko jendearentzat erabat eskuragarri dauden informazioak edo zurrumurru hutsak direnak.
d) IBLren 2. artikuluan jasota ez dauden ekintza edo omisioei buruzko informazioak.
4.– Baldin eta Eusko Legebiltzarrak barneko informazio-kanalak gaitu baditu artikulu honetan ezarritako eremutik kanpoko beste edozein komunikazio edo informazio jasotzeko, komunikazio horiek eta haien igorleak eskainitako babes-eremutik kanpo geratuko dira.
3. artikulua.– Aplikazio-eremu pertsonala.
Arau hau Legebiltzarreko langile diren informatzaileei aplikatuko zaie, bai eta Legebiltzarraren jarduerarekin eta funtzionamenduarekin zerikusia duten beste pertsonei ere, baldin eta IBLren 3. artikuluan aipatzen diren kasuetakoren batean badaude.
4. artikulua.– Printzipio orokorrak.
1.– ELBISak bete beharko ditu IBLek ezarritako baldintzak eta bermeak eta, bereziki, honako printzipio hauek ezartzen dituztenak:
a) Segurtasuna, konfidentzialtasuna eta, hala badagokio, anonimotasuna, Barneko Informazio Sistema erabiltzeko.
b) Informatzaileen ukigabetasuna bermatzea eta haien aurkako errepresaliak berariaz debekatzea.
c) Egiaztapen-jarduketak errugabetasun-presuntzioaren eta igorritako informazioek eragindakoen ohorerako eskubidearen errespetuaren mende jartzea.
d) Datu pertsonalak babesteko eskubidea errespetatzea.
e) Barneko Informazio Sistemaren arduradunek autonomia eta independentzia izatea beren eginkizunak betetzeko, eta beren eginkizunaren ondorioz ezagutzen duten informazio guztia isilpean eta ezkutuan gorde behar izatea.
2.– ELBISak informazioa eta publizitatea eman beharko die bere sorreraren eta funtzionamenduaren oinarri diren printzipioei, eta, bereziki, informatzaileen defentsari buruzko aurreikuspenei, prestakuntza- eta dibulgazio-jarduerak antolatuz.
5. artikulua.– Barneko Informazio Sistemaren kudeaketa eta arduraduna.
1.– Eusko Legebiltzarraren Barneko Informazio Sistemaren Organo Arduraduna izeneko kide anitzeko organoa (aurrerantzean, BISOA) izango da ELBISaren arduraduna, IBLren 8. artikuluan aurreikusitakoaren arabera.
Honako hauek osatuko dute BISOA: Eusko Legebiltzarreko legelari nagusiak, Legelari Nagusiaren Idazkaritzako zerbitzuburua den funtzionarioak eta Eusko Legebiltzarreko Mahaiak izendatutako legelari batek.
2.– BISOAk independentzia funtzionalarekin beteko ditu bere eginkizunak, eta ezin izango du inolako jarraibiderik jaso. Legelari Nagusiaren Idazkaritzak, zerbitzu-maila izango duenak, behar den sostengu pertsonal eta materiala emango dio BISOAri, dagokion eginkizuna behar bezala bete dezan, eta informazio-sistemaren kudeaketaren ardura hartuko du, IBLren aurreikusitako bermeak betetzen direla segurtatuz beti.
3.– BISOAk bere funtzionamendurako barne-arauak ezarriko ditu eta, modu osagarrian, Sektore Publikoaren Araubide Juridikoaren urriaren 1eko 40/2015 Legean xedatutakoa beteko du.
6. artikulua.– Informazio-kanala eta eskuragarritasuna.
1.– ELBISak informazio-kanal bat izan beharko du, Eusko Legebiltzarraren web-orri instituzionalaren hasierako orritik eskuragarri egongo dena, 3. artikuluan aipatzen diren pertsonek informazioa komunikatu ahal dezaten.
2.– Kanal horretan, informazioa aurkezteko egin beharreko izapideen eta informazioa kudeatzeko prozeduraren oinarrizko printzipioen berri emango da, modu argi eta eskuragarrian.
3.– Kanalak informazio argia eta ulergarria emango du gaiaren arabera eskumena duten Estatuko edo Europako gainerako agintaritza independenteen aurrean erabil daitezkeen kanpoko informazio-kanalei buruz.
4.– Kanal horretan komunikazioak aurkeztu ahal izango dira idatziz zein ahoz, modu presentzialean arduradunaren aurrean edo horretarako prestatutako edozein bitarteko elektronikoren bidez edo telefonoz, bai eta ahots-mezularitzaren bidez ere.
5.– Ahozko komunikazioak dokumentatu egin beharko dira; horretarako, informatzaileak aldez aurretik baimenduta, elkarrizketa grabatuko da edo haren transkripzio osoa eta zehatza egingo da, eta informatzaileak hori egiaztatu eta onartu beharko du. Ahozko komunikazioa modu presentzialean egin beharko da BISOArekin, zazpi eguneko gehieneko epean, elkarrizketa eskatu den egunetik zenbatzen hasita.
6.– Era berean, informazio-kanalak aukera emango du komunikazio anonimoak aurkezteko eta ondoren izapidetzeko.
7.– Konfidentzialtasuna bermatu beharko da komunikazioa ezarritakoez bestelako salaketa-bideetatik bidaltzen denean edo haien tratamenduaren ardura ez duten Ganberako langileei bidaltzen zaienean. Langileei behar bezalako prestakuntza eman beharko zaie arlo horretan, eta ohartarazi beharko zaie arau-hauste oso astuntzat jotzen dela konfidentzialtasun-bermea urratzea. Orobat, ezartzen da komunikazioa jasotzen duenak berehala bidali behar diola BISOAri.
7. artikulua.– Erregistroa.
Jasotako informazioen eta informazio horiek egiaztatzeko egin diren lanen erregistro-liburu elektronikoa sortzen da, betiere segurtasun- eta konfidentzialtasun-baldintzak eta sarbide mugatuko baldintzak bermatuz, hori guztia IBLren 26. artikuluak ezarritako moduan.
8. artikulua.– Informatzaileen eskubideak eta bermeak.
1.– Informatzaileek eskubide hauek izango dituzte beren jarduketetan:
a) Informazioa modu anonimoan edo identifikatuta aurkeztea, betiere bere nortasuna ezkutuan gordetzea errespetatuz, hirugarrenei jakinarazi gabe, hori guztia komunikazio-kanalaren bitartez.
b) Informazioa ahoz edo idatziz ematea.
c) Komunikazioak jasotzeko helbidea, posta elektronikoaren helbidea edo leku seguru bat adieraztea edo, hala badagokio, komunikazio horiek jasotzeari uko egitea.
d) BISOAren aurrean azaltzea, bere kabuz eta abokatu batek lagunduta, hala nahi badute.
e) Datu pertsonalen babesaren arloko legeriak ematen dizkion eskubideak baliatzea.
f) Aurkeztutako informazioaren izapidetze-egoera eta egiaztapen-lanen emaitzak ezagutzea.
2.– Informatzaileek ezein kasutan ez dute errepresaliarik jasango, ikerketaren ondorioz IBLren aplikazio-eremuko egitate, ekintza edo omisiorik gertatu ez dela erabakitzen bada ere.
9. artikulua.– Eraginpekoen eskubideak eta bermeak.
Igorritako informazioak eragindakoek honako eskubide hauek izango dituzte:
a) Errugabetasun-presuntzioa eta ohorearen babesa.
b) Egozten zaizkien ekintzen edo omisioen berri jasotzea eta edozein unetan entzunak izatea.
c) Egiaztapen-prozesuan zehar defentsa-eskubidea baliatzea eta egokitzat jotzen duten guztia alegatzeko behar den informazioa jasotzea.
d) Espedienterako sarbidea izatea, betiere informatzailea identifikatzen lagun dezaketen elementuak azaltzen ez direla bermatuz.
e) Aurkeztutako informazioan azaldutako egitateekin bat datorren eta ados den ikerketa objektiboa egin dakien.
f) Beren eskubideak eta interesak defendatzeko egokitzat jotzen duten informazioa eta dokumentazioa aurkeztea eta frogabideak proposatzea.
g) Prozeduraren fase guztietan abokatuaren laguntza izatea, hala eskatzen badute.
10. artikulua.– Konfidentzialtasun-bermea.
1.– BISOAk isilpean gorde beharko du arau honetan xedatutakoaren ondorioz ezagutzen duen informazio oro, eta ezin izango du erabili ordenamendu juridikoan espresuki ezarritakoez bestelako helburuetarako.
2.– BISOAk konfidentzialtasuna gorde beharko du informatzailearen nortasunari dagokionez, zeina ez zaien hirugarrenei jakinaraziko, salbu eta informatzaileak beren-beregi horretarako baimena eman badu. Egiten diren komunikazio, egiaztatze-jarduketa edo dokumentazio-eskaera guztietan ezkutatu egingo dira informatzailearen nortasunari buruzko datuak, bai eta hura guztiz edo partzialki identifikatzeko balio dezakeen beste edozein datu ere.
3.– BISOAk eraginpekoen konfidentzialtasuna gorde beharko du, eta komunikazioetan nortasuna babestuko da, aurreko 2. apartatuan adierazitako moduan. Halaber, eskubide hori aplikatuko zaie igorritako informazioan aipatutako hirugarrenei.
4.– Aurreko apartatuetan ezarritakoa gorabehera, informatzaileen eta eraginpekoen nortasuna jakinarazi beharko zaie Agintaritza Judizialari, Fiskaltzari eta/edo administrazio-agintaritza eskudunari, legeek hala ezartzen dutenean, ikerketa penal, administratibo edo diziplinazko baten esparruan.
11. artikulua.– Errepresaliak debekatzea.
1.– Espresuki debekatuta daude arau honetan aurreikusitakoaren arabera informazioa aurkezten dutenen aurkako errepresalia-egintza guztiak, errepresalia-mehatxuak eta errepresalia-ahaleginak barne.
2.– Errepresaliatzat joko dira IBLren 36. artikuluan eta horrekin bat datozenetan jasotako egintza edo omisioak.
II. KAPITULUA
INFORMAZIOAK KUDEATZEKO PROZEDURA
12. artikulua.– Informazioa bidali eta jasotzea.
1.– Arau honen aplikazio-eremuan sartzen diren ekintza edo omisioei buruzko informazioa bidaltzeak ikerketa-prozedurari hasiera ematea dakar.
2.– Informazioa arau honen 6. artikuluan aipatzen den edozein bitartekoren bidez jasoko da.
3.– Informazioak egitateen deskribapen zehatza eta xehatua jasoko du, eta identifikatuko ditu, ahal denean, egitate horietan parte hartu duena edo hartu dutenak eta egitateen berri izan dezaketen gainerakoak; IBLren aplikazio-eremu materialaren barruko egitateak edo jokabideak, Eusko Legebiltzarraren jarduerarekin eta funtzionamenduarekin zerikusia dutenak, eta egitateak gertatu ziren data zehatza edo gutxi gorabeherakoa. Informatzaileak egitateak egiaztatzea erraztuko duen dokumentazioa aurkeztu edo gainerako froga-elementuak adierazi ahal izango ditu.
4.– Informazioa bidali ondoren edo, hala badagokio, aurrez aurreko bilera egin ondoren, ELBISean erregistratuko da, espedientea irekiko da eta identifikazio- eta jarraipen-kode bat esleituko zaio; horrez gain, informazioa jaso izanaren berri emango da hura jaso eta hurrengo zazpi egun naturalen barruan, salbu eta informatzaileak beren-beregi uko egin badio ELBISaren edozein komunikazio jasotzeari.
13. artikulua.– Informazioa izapidetzeko onartzea.
1.– BISOAk egiaztatuko du ea bidalitako informazioa IBLren aplikazio materialaren eremuan sartzen diren eta Eusko Legebiltzarraren jarduerarekin eta funtzionamenduarekin zerikusia duten egitate, ekintza edo omisioei dagokien. Izapide hori informazioa jaso eta gehienez ere hamar egun balioduneko epean egin beharko da, eta horren arabera erabakiko da informazioa onartu ala ez.
2.– Ez onartzeko arrazoiak honako hauek izango dira:
a) Azaldutako egitate edo jokabideek sinesgarritasunik edo oinarririk ez izatea, argi eta garbi.
b) Azaldutako egitate edo jokabideak IBLren eta arau honen aplikazio materialaren eremuan ez sartzea.
c) Azaldutako egitate edo jokabideek Eusko Legebiltzarraren jarduerarekin eta funtzionamenduarekin zerikusirik ez izatea; kasu horretan, izapidetzeko eskumena duen organo, agintaritza edo entitateari bidaliko zaio informazioa, informazioaren konfidentzialtasuna bermatzeko behar diren neurriak hartuta eta informatzaileari horren berri emanda.
d) Azaldutako egitate edo jokabideek amaitutako prozedurei buruzko informazio berri eta esanguratsurik ez izatea, non eta ez den ikusten beste prozedura bat justifikatzen duen egitatezko edo zuzenbidezko inguruabar berririk.
e) Azaldutako egitate edo jokabideei buruzko informazioa delitu bat eginez lortu izana. Kasu horretan, ez onartzeaz gain, Fiskaltzari igorriko zaio jasotako informazioa.
3.– Informatzaileari izapidetzeko onartu den ala ez jakinaraziko zaio erabakia hartu eta hurrengo bost egun baliodunen barruan, salbu eta informatzaileak espresuki uko egin badio ELBISaren edozein komunikazio jasotzeari.
4.– Azaldutako egitateek, zantzuen arabera, izaera penala izan dezaketen kasuetan, BISOAk berehala helaraziko dio informazioa Fiskaltzari.
14. artikulua.– Interes-gatazken prebentzioa.
Azaldutako ekintzak edo omisioak BISOAko arduradunetako bati buruzkoak badira, horrek berehala uko egin beharko dio prozeduran parte hartzeari, eta eraginpeko pertsona bihurtuko da prozedura honen ondorioetarako.
15. artikulua.– Egiaztatze-fasea.
1.– BISOAren eskumena da egitateak egiaztatzea. Fase horretarako, dagokion gaian adituak diren Legebiltzarreko langileen laguntza izan dezake, bai eta, hala badagokio, kanpoko adituen laguntza ere, zeinak arau honetan jasotako konfidentzialtasun-betebeharraren mende egongo baitira.
2.– Egiaztatze-fasearen barruan sartzen dira informazioan adierazitako egitateak eta jokabideak egiaztatzeko jarduketa guztiak, 2. artikuluan aipatzen diren kasuetako bat edo batzuk gertatzen diren zehazteko.
3.– Ikerketa-lanak osatzeko, BISOAk egokitzat jotzen duen dokumentazio edo informazio gehigarria eskatu ahal izango die informatzaileari eta informazio hori duten pertsona eta organoei.
4.– BISOAk elkarrizketa bat izatera gonbidatu dezake informatzailea, anonimotasuna eskatu ez badu, eta egitateen berri izan dezaketen beste pertsona batzuk ere gonbidatu ditzake, baldin eta elkarrizketa hori ikerketa-lanetarako baliagarria izan daitekeela uste badu.
5.– Ikerketa-fasearen hasieraren berri emango zaie eraginpekoei, 9. artikuluan aitortutako eskubideak baliatu ahal izan ditzaten. Jakinarazpenean egitateen zerrenda labur bat jaso beharko da. Datu pertsonalen tratamenduaren bermeen berri ere eman beharko zaio.
6.– Alde batera utzi gabe 9. artikuluan aitortutako eskubideak, eta ahal den guztietan, eraginpekoa gonbidatu beharko da BISOArekin elkarrizketa bat izatera. Elkarrizketa horretan, errugabetasun-presuntzioa erabat errespetatuz, egitateen bertsioa azaldu ahal izango du eta egokitzat jotzen dituen frogabideak aurkeztu ahal izango ditu.
7.– Azaldutako egitateak dagozkion pertsonari ez zaio inola ere informatzailearen nortasunaren berri emango.
16. artikulua Prozedura amaitzea eta jarduteko erabakia.
1.– Egiaztatze-lanak amaituta, BISOAk txosten bat egingo du, non, ikertutako egitate edo jokabideen azalpenaz, egindako egiaztapen-lanez, balorazioaz eta 2. artikuluan ezarritako ondorioetarako ateratako ondorioez gain, erabaki hauetakoren bat hartuko duen:
a) Espedientea artxibatzea, baldin eta jarraitutako prozeduratik ondorioztatzen bada ez dela egon IBLren aplikazio-eremu materialaren barruan dagoen egitate edo jokabiderik, edo Eusko Legebiltzarraren jarduerarekin eta funtzionamenduarekin zerikusirik ez dutela, edo prozedura honetan aurreikusita dauden ez onartzeko arrazoietako bat gertatzen dela.
b) Informazioa eta amaierako txostena organo eskudunari bidaltzea, IBLren aplikazio-eremu materialaren barruan egitateak edo jokabideak jazartzeko.
c) Egitateak, zantzuen arabera, delitu izan badaitezke eta prozeduraren aurreko faseetan detektatu eta bidali ezin izan badira, berehala Fiskaltzari bidaltzea; hala badagokio, eraginpekoari aldez aurretik entzutea baloratuko da. Egitateek Europar Batasuneko interes finantzarioei eragiten badiete, informazioa Europako Fiskaltzari igorriko zaio.
2.– Baldin eta, BISOAren iritziz, egindako jarduketen ondorioz bidezkoa balitz Eusko Legebiltzarreko enplegatu publiko baten aurka zehapen- eta/edo diziplina-neurriak hartzea, txostena Ganberako organo eskudunari igorriko zaio, balora dezan eta dagokion zehapen-prozedura ireki dezan, behar den konfidentzialtasuna bermatuta.
3.– Amaierako txostenean hartutako erabakia, hala badagokio, informatzaileari eta eraginpeko pertsonari edo pertsonei jakinaraziko zaie.
4.– Artikulu honen 1. paragrafoetako b) eta c) letretan eta 2. paragrafoan aurreikusitako kasuetan, Eusko Legebiltzarreko Mahaiari jakinaraziko zaio, Ganberako organo gorena den aldetik, betiere arau honen 10. artikuluan aurreikusitako konfidentzialtasun-betebeharra gordez.
17. artikulua.– Ebazteko gehieneko epea.
Ikerketa-jarduerei erantzuteko gehieneko epea ez da hiru hilabetetik gorakoa izango, barneko informazio-kanalaren bidez komunikazioa jasotzen denetik zenbatzen hasita.
Hala eta guztiz ere, konplexutasun bereziko kasuetan epea luzatzea beharrezkoa bada, epea beste hiru hilabetez luzatu ahal izango da, gehienez, BISOAren erabaki arrazoituaren bidez eta informatzaileari jakinarazita.
18. artikulua.– Errekurtsoak.
BISOAren erabakien aurka ezin izango da errekurtsorik jarri administrazio-bidean, ezta administrazioarekiko auzibidean ere. Nolanahi ere, adierazitako egitateen ondorioz ireki daitekeen zehapen-prozedurari amaiera ematen dion ebazpenaren aurka administrazio-errekurtsoa edo administrazioarekiko auzi-errekurtsoa jar daiteke.
19. artikulua.– Datu pertsonalen tratamendua.
Barneko informazio-kanalaren bidez jasotako informazioak izapidetzeko prozedurak datu pertsonalak babesteari buruzko xedapenak errespetatu beharko ditu, IBLren VI. tituluan eta aplikatzekoak diren gainerako arauetan aurreikusitakoaren arabera. Bereziki, eta ondorio horietarako:
a) Ez da datu pertsonalik bilduko, baldin eta horien egokitasuna ez bada agerikoa informazio espezifiko bat tratatzeko, edo, nahigabe bildu badira, bidegabeko atzerapenik gabe ezabatuko dira.
b) Datu pertsonalen tratamendua, barne-komunikazioen kasuan, zilegitzat joko da Europako Parlamentuaren eta Kontseiluaren 2016ko apirilaren 27ko 2016/679 (EB) Erregelamenduaren 6.1.c) artikuluak, Datu pertsonalak babesteari eta eskubide digitalak bermatzeari buruzko abenduaren 5eko 3/2018 Lege Organikoaren 8. artikuluak eta Arau-hauste penalak prebenitzeko, detektatzeko, ikertzeko eta epaitzeko eta zehapen penalak betearazteko tratatutako datu pertsonalak babesteari buruzko maiatzaren 26ko 7/2021 Lege Organikoaren 11. artikuluak xedatutakoaren arabera.
c) Komunikazioan azaldutako egitateak dagozkion pertsonak aurka egiteko eskubidea baliatzen badu, bere datu pertsonalen tratamendua legitimatzen duten arrazoi legitimo larriak daudela ulertuko da, kontrako frogarik ez baldin badago.
d) Honako hauek bakarrik izango dute ELBISean jasotako datu pertsonaletarako irispidea, betiere bere eskumen eta eginkizunen eremuan:
1.– ELBISaren arduradunek.
2.– Eusko Legebiltzarrak izendatuko dituen tratamenduaren arduradunek.
3.– Eusko Legebiltzarreko datuak babesteko ordezkariak.
e) Zilegi izango da beste pertsona batzuek datuak tratatzea, edo hirugarrenei jakinaraztea ere, baldin eta beharrezkoa bada Eusko Legebiltzarrean neurri zuzentzaileak hartzeko edo, hala badagokio, bidezko diren zehapen- edo zigor-prozedurak izapidetzeko. Kasu horretan, BISOAk Eusko Legebiltzarreko datuak babesteko ordezkariaren aholkularitza eskatuko du.
f) Jasotako informazioak izapidetzean lortutako datuak gordetzeari eta ezabatzeari dagokionez, IBLren 35. artikuluan eta horrekin bat datozenetan xedatutakoa beteko da.
LEHENENGO XEDAPEN GEHIGARRIA.– Ordezko araubidea.
Arau honek aurreikusten ez duen guztian, aplikatzekoa izango da arau-hausteei eta ustelkeriaren aurkako borrokari buruzko informazioa ematen duten pertsonak babesteari buruzko otsailaren 20ko 2/2023 Legeak edo etorkizunean hura ordeztuko duen arauak xedatutakoa.
BIGARREN XEDAPEN GEHIGARRIA.– ELBISaren urteko txostena.
BISOAk arau honen jarraipenari buruzko urteko txostena prestatu eta Eusko Legebiltzarreko Mahaiari helaraziko dio.
Urteko txostenak ELBISaren funtzionamenduarekin eta hura arautzen duen araudiarekin lotutako hobekuntza- eta eguneratze-proposamenak jaso ahal izango ditu.
HIRUGARREN XEDAPEN GEHIGARRIA.– Prestakuntza eta zabalkundea.
Informazioaren edo komunikazioaren kultura interes publikoaren aurkako mehatxuak prebenitzeko eta detektatzeko mekanismo gisa sustatze aldera, Eusko Legebiltzarrak bere langileak IBLren xede diren gaietan prestatzeko ekintzak programatuko ditu aldian-aldian.
LAUGARREN XEDAPEN GEHIGARRIA.– Legelari Nagusiaren Idazkaritza birmoldatzea.
Arau hau indarrean jartzen denean, Legelari Nagusiaren Idazkaritzaren zerbitzua birmoldatuko da eta lanpostuen zerrenda aldatuko da, arlo hori erregulazio honetan aurreikusitako eginkizunetara egokitzeko.
AZKEN XEDAPENETAKO LEHENENGOA.– Araugintza-garapena.
Legelari nagusiari ahalmena ematen zaio arau hau garatzeko beharrezkotzat jotzen dituen xedapen guztiak eman ditzan. Xedapen horien berri eman beharko dio Eusko Legebiltzarreko Mahaiari, indarrean sartu aurretik.
AZKEN XEDAPENETAKO BIGARRENA.– Argitaratzea eta indarrean jartzea.
Arau hau Eusko Legebiltzarraren Aldizkari Ofizialean argitaratu eta biharamunean jarriko da indarrean.
Orobat, Euskal Herriko Agintaritzaren Aldizkarian argitaratuko da eta Eusko Legebiltzarraren Gardentasunaren Atarian eskuragarri egongo da.