Euskal Herriko Agintaritzaren Aldizkaria

249. zk., 2022ko abenduaren 30a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

AGINTARIAK ETA LANGILERIA

Oposaketak eta lehiaketak

HEZKUNTZA SAILA

5782

AGINDUA, 2022ko abenduaren 19koa, Hezkuntzako sailburuarena, zeinaren bidez iragartzen baita Hezkuntza Sailaren mendeko unibertsitateaz kanpoko ikastetxeetako zuzendariak hautatzeko merezimendu-lehiaketa, 2023ko ekainaren 30ean kargua hutsik geratuko den ikastetxeetan.

Agindu honen xedea da Hezkuntza Sailaren mendeko Euskal Autonomia Erkidegoko unibertsitateaz kanpoko ikastetxe publikoetako zuzendarien hautaketa-prozesuko deialdia egitea, hain zuzen, agintaldia 2023ko ekainaren 30ean amaituko duten zuzendaritza-taldeena, salbu eta Lanbide Heziketako Lanbide Heziketako Ikastetxe Integratuak eta Lanbide Heziketako Erreferentzia Nazionaleko ikastetxeak, zeinak salbuetsita baitaude 22/2009 Dekretuaren 2. artikuluan ezarritakoaren arabera (22/2009 Dekretua, otsailaren 3koa, Hezkuntza, Unibertsitate eta Ikerketa Sailaren mendeko Euskal Autonomia Erkidegoko unibertsitateaz kanpoko ikastetxeetako zuzendariak aukeratzeko, eta pertsona bakarreko gainerako gobernu-organoak izendatzeko eta kargugabetzeko prozedura ezartzen duena), eta salbu Urrutiko Hezkuntzako Euskal Institutua (salbuespena Urrutiko Hezkuntzako Euskal Institutuaren antolamendu, funtzionamendu eta autonomiari buruzko ekainaren 19ko 93/2018 Dekretuaren azken xedapenetako lehenengoan txertatu da) eta Eibarko Egoitza Zentroa.

Kontuan hartu behar da Estatuko oinarrizko legerian gai horri buruz ezarritakoa, bereziki Hezkuntzari buruzko maiatzaren 3ko 2/2006 Lege Organikoan (133. artikulua eta hurrengoak) (aurrerantzean, LOE), hura aldatzen duen abenduaren 29ko 3/2020 Lege Organikoak (aurrerantzean, LOMLOE) arlo horretan ekarritako berrikuntza garrantzitsuekin.

Bestalde, Estatuko oinarrizko araudiari dagokionez, aipatzekoa da urriaren 17ko 894/2014 Errege Dekretua, zuzendaritza-eginkizunaren garapenari buruzko prestakuntza-ikastaroaren ezaugarriak garatzen dituena, bai eta zuzendaritza-eskumenak eguneratzeko ikastaroena ere. Hala ere, LOMLOEren 134.1.c artikuluaren arabera, zuzendaria hautatzeko merezimendu-lehiaketan parte hartu ahal izateko ezinbesteko baldintza izatetik, hezkuntza-administrazio bakoitzaren aukerako baldintza izatera igaro da prestakuntza hori. Kasu honetan, Hezkuntza Sailak uste du prestakuntza hori ez dela zuzendaritzarako hautagai izateko baldintza bat, baina bai zuzendari-lanetan aritzeko baldintza bat. Horregatik, agindu honen bidez deitutako hautaketa-prozedura gainditzen dutenek zuzendaritza-eginkizuna betetzeko konpetentziei buruzko prestakuntza-programa bat gainditu beharko dute, izendatu aurretik. Prestakuntza-programa horren ezaugarriak Ikaskuntzako eta Hezkuntza Berrikuntzako zuzendariaren 2022ko urriaren 28ko Ebazpenean daude araututa, zeinaren bidez ezartzen baita zuzendaritza-eginkizuna betetzeko hasierako eta etengabeko prestakuntzaren esparrua, eta arautzen baitira zuzendaritza-eginkizuna betetzeko prestakuntza-programa espezifikoa eta zuzendaritza-eginkizuna betetzeko gaitasunak eguneratzeko programa espezifikoa 2022-2023 eta 2023-2024 ikasturteetarako.

Bestalde, Euskal Eskola Publikoari buruzko otsailaren 19ko 1/1993 Legeak (33. artikulua eta hurrengoak) eta, batez ere, 22/2009 Dekretuak (otsailaren 3koa, Hezkuntza, Unibertsitate eta Ikerketa Sailaren mendeko Euskal Autonomia Erkidegoko unibertsitateaz kanpoko ikastetxeetako zuzendariak aukeratzeko, eta pertsona bakarreko gainerako gobernu-organoak izendatzeko eta kargugabetzeko prozedura ezartzen duena) arautzen dute, besteak beste, ikastetxeetako zuzendaria hautatzeko eta pertsona bakarreko gainerako gobernu-organoak izendatzeko eta kargugabetzeko prozedura.

Era berean, nabarmendu behar da Hezkuntza Saila dekretu-proiektu berri bat izapidetzen ari dela, besteak beste, zuzendaritza-eginkizunerako sarbidea arautuko duena. Dekretu berri horrek aurreikusten du indarrean dagoen dekretua indargabetzea eta erregulazio berri bat ezartzea, baina dekretu hori ez dago indarrean agindu hau argitaratzen den egunean. Alde horretatik, kontuan hartuta agindu honetan araututako merezimendu-lehiaketa ebatzi baino lehen sartuko dela indarrean dekretu berria, dekretu horretan xedapen iragankor bat sartu da, berariaz ematen duena atzeraeraginez aplikatuko zaizkiela indarrean jartzen den unean abian diren hautaketa-prozesuei.

Deialdiaren egokitasunari berari dagokionez, 22/2009 Dekretuaren 7. artikuluak xedatzen duenez, «Hezkuntza Sailak zehazten dituen ikasturteetan, sailburuaren aginduz zehaztutako ikasturteetan, merezimendu-lehiaketa deituko da sail horretako unibertsitateaz kanpoko ikastetxeetako zuzendariak aukeratzeko, hain zuzen, ikasturte hori amaitzean kargua hutsik geratuko den postuetarako».

Hezkuntza Sailaren mendeko unibertsitateaz kanpoko ikastetxe publiko askotan zuzendaritza-taldeek 2023ko ekainaren 30ean amaitzen dute agintaldia. Beraz, bidezkoa da ikastetxe horietako zuzendariak hautatzeko eta izendatzeko hautaketa-prozesua egitea, bai eta eragindako ikastetxeetako gainerako kide bakarreko gobernu-organoak izendatzea ere, indarrean dagoen araudian ezarritakoaren arabera.

Ondorioz, eta eman dizkidaten eskumenak erabiliz, honako hau

EBAZTEN DUT:

1. artikulua.– Deialdia.

Merezimendu-lehiaketarako deialdia egiten da Hezkuntza Sailaren mendeko Euskal Autonomia Erkidegoko unibertsitateaz kanpoko ikastetxe publikoetako zuzendariak hautatzeko, hain zuzen, agintaldia 2023ko ekainaren 30ean amaituko dute zuzendaritza-taldeena, honako hauek izan ezik: Urrutiko Hezkuntzako Euskal Institutua, Lanbide Heziketako Ikastetxe Integratuak, Erreferentzia Nazionaleko Lanbide Heziketako Ikastetxeak eta Eibarko Egoitza Zentroa.

2. artikulua.– Araudi aplikagarria.

Hautaketa-prozesua Hezkuntzari buruzko maiatzaren 3ko 2/2006 Lege Organikoan (abenduaren 29ko 3/2020 Lege Organikoak aldatua) xedatutakoaren arabera egingo da, eta, oinarrizko araudia urratzen ez duten alderdietan, Euskal Eskola Publikoari buruzko otsailaren 19ko 1/1993 Legean eta 22/2009 Dekretuan (otsailaren 3koa, Euskal Autonomia Erkidegoan hezkuntzaren arloan eskumena duen sailaren mendeko unibertsitateaz kanpoko ikastetxeetako zuzendariak aukeratzeko, eta pertsona bakarreko gainerako gobernu-organoak izendatzeko eta kargugabetzeko prozedura arautzen duena) xedatutakoaren arabera, eta agindu honetan ezarritakoaren arabera.

3. artikulua.– Izangaien baldintzak.

1.– Hezkuntzari buruzko maiatzaren 3ko 2/2006 Lege Organikoaren (abenduaren 29ko 3/2020 Lege Organikoak aldatua) 134.1 artikuluan eta otsailaren 3ko 22/2009 Dekretuaren 4. artikuluan xedatutakoaren arabera, irakasle orok honako baldintza hauek bete beharko ditu merezimendu-lehiaketan parte hartzeko:

a) Gutxienez bost urteko antzinatasuna izatea irakaskuntzako funtzio publikoan karrerako funtzionario gisa.

b) Gutxienez bost urtez irakasle lanetan aritu izana karrerako funtzionario gisa aukeratutako ikastetxeak eskaintzen duen irakaskuntzaren batean.

c) Ez izatea ikastetxeko zuzendari gisa izendapenik deialdi honetan karguaz jabetzeko aurreikusten den datatik haragokorik, salbu eta izendapen hori ezohikoa izan bada dekretu honen 16. eta 17. artikuluetan xedatutakoa aplikatuz.

d) Zuzendaritza-proiektu bat aurkeztea, helburuak, jardun-ildoak eta proiektuaren ebaluazioa jasoko dituena, besteak beste.

2.– Haur Hezkuntzako ikastetxe espezifikoetan, Haur eta Lehen Hezkuntzako osatu gabeetan, zortzi unitate baino gutxiagoko Bigarren Hezkuntzakoetan, baita arte-irakaskuntza profesionalak, kirol-irakaskuntzak, hizkuntza-irakaskuntzak edo zortzi irakasle baino gutxiago dituzten helduentzako irakaskuntzak eskaintzen dituztenetan ere, honako baldintza hauek bete beharko ditu irakasle orok merezimendu-lehiaketan parte hartzeko:

a) Gutxienez urtebeteko antzinatasuna izatea irakaskuntzako funtzio publikoan karrerako funtzionario gisa.

b) Gutxienez urtebetez irakasle lanetan aritu izana karrerako funtzionario gisa aukeratutako ikastetxeak eskaintzen duen irakaskuntzaren batean.

c) Ez izatea ikastetxeko zuzendari gisa izendapenik deialdi honetan karguaz jabetzeko aurreikusten den datatik haragokorik, salbu eta izendapen hori ezohikoa izan bada dekretu honen 16. eta 17. artikuluetan xedatutakoa aplikatuz.

d) Zuzendaritza-proiektu bat aurkeztea, helburuak, jardun-ildoak eta proiektuaren ebaluazioa jasoko dituena, besteak beste.

3.– Deialdia Euskal Herriko Agintaritzaren Aldizkarian argitaratzen den egunean, izangaiak kasu bakoitzean bete behar dituen baldintza guztiak eduki beharko ditu.

4. artikulua.– Hautaketa-prozesuko printzipio orokorrak.

1.– Hezkuntza-komunitateak eta hezkuntza-administrazioak parte hartuko duten prozesu baten bidez hautatuko da zuzendaria.

2.– Ikastetxeari esleitutako irakaskuntzaren bat ematen duten karrerako irakasle funtzionarioen arteko merezimendu-lehiaketa bidez hautatuko da zuzendaria. Hautaketak berdintasun, publikotasun, merezimendu eta gaitasunen printzipioak izango ditu oinarri.

3.– Merezimendu-lehiaketak bi fase izango ditu. Lehenengo fasean zuzendaritza-proiektua (hautagaiaren zuzendaritza-proposamena jasoko duena ikastetxeko hezkuntza-proiektuarekin lotuta) eta haren defentsa balioetsiko dira. Bigarren fasean, ikastetxeko zuzendaritzarako hautagaitza aurkeztu duten pertsonek alegatutako merezimenduak balioetsiko dira.

4.– Hautaketa egiteko irizpide objektiboak eta prozedura, baldintza eta merezimendu akademikoak eta profesionalak egiaztatzeko modua, eta hautagaiek akreditatutako merezimenduen eta aurkeztutako proiektuen balioespen-irizpideak agindu honen hurrengo xedapenetan ezartzen dira.

5.– Hautaketa egiteko, ikastetxeko irakasleen hautagaitzei emango zaie lehentasuna. Ikastetxean behin betiko edo behin-behineko destinoa duen karrerako izangai funtzionarioren batek gutxieneko puntuazioa lortzen badu, hautaketa-batzordeak ez ditu balioetsiko ikastetxean destinorik ez duten hautagaien zuzendaritza-proiektuak.

6.– Izangai bakoitza gehienez hiru ikastetxetan aurkeztu ahal izango da hautagai gisa.

7.– Zuzendaria hautaketa-batzordeko kideek hautatuko dute, bat etorriz agindu honetan ezarritako irizpideekin. Horretarako, kontuan hartuko dituzte izangaiek egiaztatutako ikasketa-merezimenduen eta lanbide-merezimenduen balioespen objektiboa eta ikasle guztien eskola-arrakasta lortzera bideratutako zuzendaritza-proiektuaren eta haren defentsaren balioespena.

Aurkeztutako proiektuak, besteak beste, emakumeen eta gizonen berdintasunari, diskriminaziorik ezari eta genero-indarkeriaren prebentzioari buruzko edukiak jaso beharko ditu, bai eta hizkuntza-normalizazioari buruzkoak ere.

8.– Hautaketa-prozedura gainditzen dutenek, izendatu aurretik, egiaztatu beharko dute zuzendaritza-eginkizunean jarduteko konpetentziei buruzko berariazko prestakuntza-programan jasotako prestakuntza. Programa hori Ikaskuntzako eta Hezkuntza Berrikuntzako zuzendariaren 2022ko urriaren 28ko Ebazpenean dago araututa, zeinaren bidez ezartzen baita zuzendaritza-eginkizuna betetzeko hasierako eta etengabeko prestakuntzaren esparrua, eta arautzen baitira zuzendaritza-eginkizuna betetzeko prestakuntza-programa espezifikoa eta zuzendaritza-eginkizuna betetzeko gaitasunak eguneratzeko programa espezifikoa 2022-2023 eta 2023-2024 ikasturteetarako.

9.– Hautagaitzarik ez dagoenean, ikastetxe berriak direnean edo dagokion batzordeak pertsona bakar bat ere aukeratu ez duenean, dagokion lurralde historikoko Hezkuntzako lurralde-ordezkariak, Hezkuntzako Ikuskaritzaren txostena aztertu eta Ordezkaritza Organo Gorena (OOG) entzun ondoren, irakasle funtzionario bat izendatuko du zuzendari, ohiz kanpo, urtebeterako.

10.– Ohiz kanpo izendatutako zuzendariak zuzendaritza-eginkizunaren garapenari buruzko prestakuntza-programa gainditu beharko du izendapenaren lehenengo urtea amaitu baino lehen, Ikaskuntzako eta Hezkuntza Berrikuntzako zuzendariaren 2022ko urriaren 28ko Ebazpenean jasotzen den bezala, eta, prestakuntza-programa amaitzean, izendatu duten ikasturteari dagokion jarduera-plana aurkeztu beharko du, ikastetxearen hezkuntza-proiektuarekin bat datorrena.

5. artikulua.– Hautaketa-prozesuaren garapena.

Hautaketa-prozesua agindu honen I. eranskinean ezarritako egutegiaren eta prozeduraren arabera egingo da.

6. artikulua.– Eskabideak eta dokumentazioa.

Eskabidean, dokumentazio hau jasoko da:

a) Hautaketa-prozesuan onartzeko eskabidea eta zuzendariak, II. eranskinean jasotako ereduaren arabera (interesdunak online inprimakia beteko du Hezigunea atarian sartu ondoren). Eskabide horretan, hautagaitza aurkezteko aukeratutako ikastetxeaz edo ikastetxeez gain, prozeduraren bigarren faserako alegatutako merezimendu guztiak zehaztuko dira. Eskabideak aurkezteko epea bukatzen den egunera arte burutu diren alegatutako merezimenduak bakarrik barematuko dira. Eskatzaileek merezimenduen lehiaketaren bigarren faseko baremoko merezimenduak justifikatzeko aurkeztu behar dituzten dokumentuak agindu honen IV. eranskinean daude jasota.

b) Zuzendaritza-proiektuaren ale bat aukeratu den ikastetxe bakoitzeko, III. eranskinean xedatutakoaren araberakoa.

c) Eskabide-eredua, PEFI_EFD prestakuntza-programako jarduera jakin batzuk egitetik eta ebaluatzetik salbuesteko, V. eranskineko ereduaren arabera.

7. artikulua.– Deitutako ikastetxeak.

Agindu honen I. eranskinean zehaztutako ikastetxeetan deitzen da prozesua. Prozesuaren garapenaren uneren batean, eta zuzendaria izendatu aurretik, deitutako ikastetxeren bat Lanbide Heziketako Ikastetxe Integratu edo Lanbide Heziketako Erreferentzia Nazionaleko Ikastetxe bihurtzen bada, ikastetxe hori zuzendariaren hautaketa-prozesutik kanpo geratuko da, eta ondoriorik gabe geratuko dira ordura arte egindako izapide guztiak.

AZKEN XEDAPENETAKO LEHENENGOA.– Ondorioak.

Agindu honek Euskal Herriko Agintaritzaren Aldizkarian argitaratu eta hurrengo egunetik aurrera izango ditu ondorioak.

AZKEN XEDAPENETAKO BIGARRENA.– Errekurtsoak.

Agindu honen aurka, aukerako berraztertze-errekurtsoa aurkeztu ahal izango zaio Hezkuntzako sailburuari, hilabeteko epean, agindua Euskal Herriko Agintaritzaren Aldizkarian argitaratu eta hurrengo egunetik aurrera; bestela, administrazioarekiko auzi-errekurtsoa aurkeztu ahal da Euskal Autonomia Erkidegoko Auzitegi Nagusian, bi hilabeteko epean, agindua Euskal Herriko Agintaritzaren Aldizkarian argitaratu eta hurrengo egunetik aurrera.

Vitoria-Gasteiz, 2022ko abenduaren 19a.

Hezkuntzako sailburua,

JOKIN BILDARRATZ SORRON.

I. ERANSKINA

HAUTAKETA-PROZESUAREN EGUTEGIA ETA PROZEDURA

1.– Eskabideak aurkeztea. Eskabidea telematikoki aurkeztea, dokumentazioa eta epeak.

1.1.– Eskabideak aurkezteko eta deialdi hau arautzen duen dokumentazioa izapidetzeko atari gisa, hau izango da webgunea: https://hezigunea.euskadi.eus/, aurrerantzean, Hezigunea. Prozedura honetan parte hartzeko, izangaiek aipatutako atariaren bidez egin beharko dute eskabidea. Bertan, agindu honen VI. eranskinean zerrendatutako 3 ikastetxe eskatu ahal izango dituzte gehienez, lehentasun-ordenaren arabera.

1.2.– Hezigunea atarira sartzeko, beharrezkoa izango da aldez aurretik eskatzailea identifikatzea (NAN/AIZ + pasahitza, edo XLNets erabiltzailea, lehendik izanez gero). Eskabidea betetzeko, «Zuzendariak hautatzea» bannerrera sartu behar da, eta sistemak identifikazio-zenbaki bat sortuko du, prozedurari balioa eta bakartasuna emango diona.

Hainbat arrazoi direla medio, izangaiek parte hartzeko eskabide telematiko bat baino gehiago aurkezten badute, aurkeztutako azken eskabidea bakarrik hartuko da kontuan; beraz, parte-hartzaile bakoitzeko eskabide telematiko bat baino ez da onartuko.

Ez dira kontuan hartuko bide horretatik aurkeztutako eskabideak, baldin eta ezarritako aurkezpen-prozesua osatzen ez badute. Prozesu horretatik, eskabide-zenbaki bat lortuko da pdf formatuan deskargatu daitekeen dokumentu batean, eta interesdunak gorde egin beharko du epean eta behar bezala aurkeztu izana egiaztatzeko.

1.– 3.– Eskabidean, dokumentazio hau jasoko da:

a) Hautaketa-prozesuan onartzeko eskabidea eta zuzendariak, II. eranskinean jasotako ereduaren arabera (interesdunak online inprimakia beteko du Hezigunea atarian sartu ondoren). Eskabide horretan, hautagaitza aurkezteko aukeratutako ikastetxeaz edo ikastetxeez gain, prozeduraren bigarren faserako alegatutako merezimendu guztiak zehaztuko dira. Eskabideak aurkezteko epea bukatzen den egunera arte burutu diren alegatutako merezimenduak bakarrik barematuko dira. Eskatzaileek merezimenduen lehiaketaren bigarren faseko baremoko merezimenduak justifikatzeko aurkeztu behar dituzten dokumentuak agindu honen IV. eranskinean daude jasota.

b) Zuzendaritza-proiektuaren ale bat aukeratu den ikastetxe bakoitzeko, III. eranskinean xedatutakoaren araberakoa.

c) Eskabide-eredua, PEFI_EFD prestakuntza-programako jarduera jakin batzuk egitetik eta ebaluatzetik salbuesteko, V. eranskineko ereduaren arabera.

Eskabide horrekin batera, agindu honen 3. artikuluan ezarritako baldintzak betetzen dituela egiaztatzen duen dokumentazioa aurkeztu beharko du eskaneatuta, baldin eta dagoeneko Hezkuntza Sailaren esku ez badago. Modu berean jokatuko da alegatutako merezimenduak egiaztatzeko dokumentazioarekin.

1.4.– VI. eranskinean jasotako ikastetxeek, agindu hau argitaratu eta hurrengo egunetik aurrera, ikastetxearen dokumentuak kontsultatzeko aukera emango diete hala eskatzen dutenei, bereziki hezkuntza-proiektua, antolamendu- eta funtzionamendu-araudia eta datu pertsonalik ez duten urteko planeko elementuak. Horretarako, ikastetxeko jardueren garapen normala oztopatuko ez duen espazio eta ordutegi bat prestatuko dute. Kasu guztietan, ikastetxeetako idazkaritzak zainduko du kontsulta-prozesu horrek betetzen duela datuak babesteari buruz indarrean dagoen araudia.

1.5.– Eskabideak aurkezteko aldia 2023ko urtarrilaren 16tik 27ra bitartekoa izango da, biak barne. Zuzendaritza-proiektua aurkeztuz gero, epe hori 2023ko otsailaren 10era arte luzatuko da, egun hori barne, hautagaiek Hezkuntza Saileko laguntza-zerbitzuen beharrezko prestakuntza eta laguntzarekin egin ahal izan ditzaten proiektu horiek.

2.– Izangaiak onartzea.

2.1.– Izangaiek baldintzak betetzeari buruzko informazio-eskabidea.

2023ko urtarrilaren 30etik 31ra bitartean, biak barne, Hezkuntzako lurralde-ordezkari bakoitzak Hezkuntza Saileko Langileak Kudeatzeko Zuzendaritzako lurralde-zerbitzuei eskatuko die egiazta dezatela hautagai bakoitzak betetzen dituela agindu honen 3. artikuluan ezarritako prozesuan parte hartu ahal izateko eskatzen diren baldintzak.

Baldintzak egiaztatzeko, Haur eta Lehen Hezkuntzako ikastetxe osatugabetzat hartuko da lehen hezkuntzako etapako maila bakoitzeko gutxienez unitate bat ez duena. Bigarren Hezkuntzako ikastetxetzat hartuko da gutxienez irakaskuntza hauetako bat ematen duena: Derrigorrezko Bigarren Hezkuntza, Batxilergoa edo Lanbide Heziketako heziketa zikloak.

Hezkuntza Saileko Langileak Kudeatzeko Zuzendaritzako lurralde-zerbitzuek Hezkuntzako lurralde-ordezkariek eskatutako datuak eman beharko dituzte. Datu horiek emateko epea 2023ko otsailaren 2an amaituko da.

2.2.– Eskabideak onartzeari edo ezesteari buruzko behin-behineko ebazpenak, eta Ikaskuntzaren eta Hezkuntza Berrikuntzaren Zuzendaritzaren behin-behineko ebazpena, Berariazko Prestakuntza Programako zenbait jarduera egitetik eta ebaluatzetik salbuesteari buruzkoa, zuzendaritza-eginkizunean hasteko (PEFI_EFD).

Dagokion lurralde historikoko Hezkuntzako lurralde-ordezkariak, eman zaizkion datuak kontuan hartuta, behin-behineko ebazpenak emango ditu aurkeztutako eskabideak onartu edo ezetsiz. Ebazpen horiek emateko epea 2023ko otsailaren 3an amaituko da. Ebazpenetan zehaztuko da hautagaiak zein ikastetxetan onartu diren, eta, baztertuak izan badira, baztertzeko arrazoiak ere adieraziko dira. Onartuen kasuan, zehaztuko da, halaber, zuzendarigaiak destinoa duen ala ez 2022-2023 ikasturtean onartutako ikastetxean edo ikastetxeetan.

Egun berean, Ikaskuntza eta Hezkuntza Berriztatzeko Zuzendaritzak behin-behinean ebatziko ditu PEFI_EFD prestakuntza-programako prestakuntza jarduera batzuk egitetik eta ebaluatzetik salbuesteari buruz hautagaiek egindako eskabideak. Programa hori Ikaskuntzako eta Hezkuntza Berrikuntzako zuzendariaren 2022ko urriaren 28ko Ebazpenean dago araututa, zeinaren bidez ezartzen baita zuzendaritza-eginkizuna betetzeko hasierako eta etengabeko prestakuntzaren esparrua, eta arautzen baitira zuzendaritza-eginkizuna betetzeko prestakuntza-programa espezifikoa eta zuzendaritza-eginkizuna betetzeko gaitasunak eguneratzeko programa espezifikoa 2022-2023 eta 2023-2024 ikasturteetarako.

Horiek Hezkuntza Sailaren webgunean argitaratuko da.

– Prozesuan onartutako hautagaitzen behin-behineko ebazpenerako: «Irakaskuntzak eta ikastetxeak» lan-arloaren barruan – «Unibertsitateaz kanpoko ikastetxeen antolamendua. Gobernu-organoak» – «Ikastetxe publikoak» – «Zuzendarien hautaketa-prozesuko deialdia».

– Hautagaiek PEFI_EFD prestakuntza-programako prestakuntza-jarduera jakin batzuk egitetik eta ebaluatzetik salbuesteari buruz egin ahal izan dituzten eskaerak behin-behinean ebazteko: «Hezkuntza-berrikuntza» lan-arloaren barruan – «Jarduera-eremuak» – «Zuzendaritzen prestakuntza».

Hezigunea atarian ere argitaratuko dira.

Argitalpen horiekin, interesdunekiko jakinarazpenak egintzat joko dira.

Hezkuntza-komunitateak zuzendaritzarako hautagaitzak ezagutu ahal izatea bermatzeko, Hezkuntzako lurralde-ordezkari bakoitzak dagokion ebazpena jakinaraziko dio eragindako ikastetxe bakoitzeko zuzendariari, ikastetxeko iragarki-taulan argitara eman dadin.

2.3.– Behin-behineko ebazpenei erreklamazioak eta zuzendaritza-proiektua edo -proiektuak eransteko gehieneko epea.

Aurreko ebazpenen aurka, interesdunek erreklamazioa aurkeztu ahal izango diote dagokion Hezkuntzako lurralde-ordezkariari edo, hala badagokio, Ikaskuntzako eta Hezkuntza Berrikuntzako zuzendariari. Erreklamazio horiek Hezigunea atariaren bidez egingo dira, eta aurkezteko epea 2023ko otsailaren 10ean amaituko da, egun hori barne.

Halaber, otsailaren 10a izango da izangaiek egindako eskabideari zuzendaritza-proiektua edo -proiektuak eransteko izango duten gehieneko epea, eranskin honen 1.5 puntuan jasotzen den bezala.

2.4.– Eskabideak onartzeari edo ezesteari buruzko behin betiko ebazpenak, eta Ikaskuntzaren eta Hezkuntza Berrikuntzaren Zuzendaritzaren behin betiko ebazpena, Berariazko Prestakuntza Programako zenbait jarduera egitetik eta ebaluatzetik salbuesteari buruzkoa, zuzendaritza-eginkizunean hasteko (PEFI_EFD).

Dagokion lurralde historikoko Hezkuntzako lurralde-ordezkariak ebatziko ditu aurkeztutako erreklamazioak, eta prozeduran parte hartzeko eskaerak onartzeko edo ez onartzeko behin betiko ebazpenak emango ditu.

Ebazpen horiek emateko epea 2023ko otsailaren 17an amaituko da.

Ebazpen horietan zehaztuko da hautagaiak zein ikastetxetan onartu diren, eta, baztertuak izan badira, baztertzeko arrazoiak ere adieraziko dira. Onartuen kasuan, zehaztuko da, halaber, zuzendarigaiak onartutako ikastetxean edo ikastetxeetan destinoa duen ala ez 2022-2023 ikasturtean.

Egun berean, Ikaskuntzaren eta Hezkuntza Berrikuntzaren Zuzendaritzak behin betiko ebatziko ditu hautagaiek PEFI_EFD prestakuntza-programako prestakuntza-jarduera jakin batzuk egitetik eta ebaluatzetik salbuesteari buruz egin ahal izan dituzten eskaerak.

Ebazpenak behin-behineko ebazpenen antzera argitaratuko dira.

Hala ere, zuzendaritza-proiektua aurreko puntuan ezarritako epean aurkezten ez bada, ezin izango da zuzendu, eta prozeduratik kanpo geratuko da. Bestalde, aurkeztutako zuzendaritza-proiektuak ez badu betetzen III. eranskineko «Proiektuaren ezaugarriak» lehenengo apartatuan adierazitako ezaugarrietako bat, ez da pertsona onartuen behin betiko zerrendatik kanpo geratuko.

Onartutakoen zerrendan agertzeak ez du esan nahi agindu honen 3. artikuluan ezarritako baldintzak betetzen dituela aitortzen zaionik. Prozesuaren edozein unetan, lortu nahi duen karguaren baldintzak betetzen dituela egiaztatzeko balio duen dokumentazioa eskatu ahal izango zaio. Berrikuspenetik ondorioztatzen bada hautagai batek ez duela betetzen baldintzaren bat, interesdunari entzun ondoren, galdu egingo ditu hautaketa-prozesuan parte hartzetik erator daitezkeen eskubide guztiak.

Onartutakoen zerrendan agertzeak ez du esan nahi PEFI_EFD eta/edo PEAC_EFD prestakuntza-programa gainditu izanaren ziurtagiria duela aitortzen zaionik.

2.5.– Onartutako hautagaitzak eta aurkeztutako proiektuak jakinaraztea eragindako ikastetxeetako hezkuntza-komunitateei.

Hezkuntza-komunitateak aurkeztutako proiektuak eta zuzendaritzarako hautagaitzak ezagutu ahal izatea bermatzeko, Hezkuntzako lurralde-ordezkari bakoitzak dagokion ebazpena jakinaraziko dio eragindako ikastetxe bakoitzeko zuzendariari, dagokion ikastetxeko iragarki-taulan argitara eman dadin. Aldi berean, ikastetxeari dagokion zuzendaritza-proiektuaren edo -proiektuen ale bana bidaliko die Hezkuntzako lurralde-ordezkariak ikastetxe bakoitzari, behin betiko ebazpenak emateko epea amaitu eta bost egun balioduneko epean. Epe hori amaituta, eta hezkuntza-komunitateak proiektu horietarako sarbidea izango duela bermatzeko, ikastetxeko zuzendaritzak 24 orduko epean jakinaraziko du zer espazio fisiko edo birtualetan egongo diren eskuragarri dokumentu horiek.

2.6.– Hautagaitzarik aurkeztu ez den edo onartu ez den ikastetxeetan esku hartzea.

2023ko otsailaren 17tik aurrera, agindu honen 4.8 artikuluan aipatzen diren nahitaezko txostenak egiten hasiko da Hezkuntza Ikuskaritza, hautagaitzarik aurkeztu ez den edo onartu ez den ikastetxeetako zuzendaria izendatzeko. Txosten horiek 2023ko maiatzaren 5a baino lehen amaitu beharko dira.

Nahitaezko ikuskaritza-txostenak, besteak beste, zuzendaritzaren egoera eta ikastetxean egindako esku-hartzea jasoko ditu, zuzendariei hezkuntza-lidergo egonkorra lortzen laguntzeko. Egindako esku-hartzearen barruan, bermatuko da Ikuskaritzak ikastetxeko OOGren ezohiko bilkura batean gutxienez parte hartuko duela. Bilkura horren gai-zerrendak puntu bakar bat izango du, eta honako gai hauei buruzkoa izango da: ikastetxeko zuzendaritzaren eta lidergo pedagogikoaren egoerari buruzko hausnarketa, eta gobernu-organo horretan ordezkaritza duten hezkuntza-komunitateko kolektiboen iritziak eta proposamenak jasotzea. Ezohiko OOG horren akta hezkuntzako ikuskaritzak aurkeztutako nahitaezko txostenari erantsiko zaio.

3.– Hautaketa-batzordeak.

3.1.– Hautaketa-batzorde bat eratuko da hautaketa-prozesua egin behar den eta gutxienez hautagaitza bat onartu den ikastetxe bakoitzean.

3.2.– Hautaketa-batzordeko kideak.

Ikastetxe bakoitzeko hautaketa-batzordea honako kide hauek osatuko dute:

a) Hezkuntzako ikuskatzaile batek, lehentasunez ikastetxeko erreferentziako ikuskatzailea, zeina ikastetxeko ikuskatzaile buruak edo lurraldeko ikuskatzaile buruak proposatuko baitu. Batzordeburu arituko da.

b) Lau kide, ikastetxearen ordezkari:

i) Bi kide irakasle klaustroak aukeratuko ditu, horretarako egindako ezohiko bilkuran.

ii) Bi kide OOGko irakasle ez diren kideek aukeratuko dituzte haien artetik, organoko buruak horretarako deitutako bilkuran.

c) Zuzendari bat, bokal gisa, hezkuntza-administrazioaren ordezkari gisa, honako baldintza hauek betetzen dituena:

i) Hautaketa-prozedura garatzen den ikastegiaren irakaskuntza berdinak ematen dituzten ikastetxeetako zuzendaria, edo, hala badagokio, antzeko ezaugarriak dituzten ikastetxeetakoa.

ii) Egindako lanaren ebaluazio positiboa duen ekitaldi bateko edo gehiagoko zuzendaria. Hori ziurtatu ezin den kasuetan, beren eginkizunak betetzeko gutxienez hiru urteko ezohiko izendapena duten zuzendariak izendatuko dira.

3.3.– Hautaketa-batzorde hori, kide anitzeko organo gisa, Sektore Publikoaren Araubide Juridikoaren urriaren 1eko 40/2015 Legearen 16. artikulutik 18. artikulura ezarritakoak arautuko du. Gainera, batzordekideei urriaren 1eko 40/2015 Legearen 23. eta 24. artikuluetan ezarritako abstentzio- eta errekusazio-arrazoiak aplikatuko zaizkie. Erabakiak hartzean berdinketarik badago, lehendakariak ebatziko ditu, kalitatezko botoarekin.

3.4.– Izangaien hizkuntza-eskubideak errespetatzeko eta Euskararen Erabilera Normalizatzeko azaroaren 24ko 10/1982 Oinarrizko Legean ezarritakoa betetzeko, bermatuko da hautaketa-batzordeko kideen artean Euskal Autonomia Erkidegoko hizkuntza ofizialen nahikoa ezagutza dituztenak egongo direla. Hautaketa-batzordeko kide guztiek bete beharreko baldintza izango da, OOGren ordezkarientzat izan ezik, haientzat gomendio bat izango baita.

3.5.– Batzorde horien osaerak, ahal den guztietan, emakume eta gizonen ordezkaritza orekatua izango du, Euskal Funtzio Publikoari buruzko ekainaren 6ko 6/1989 Legearen 31. artikuluak (Emakumeen eta Gizonen Berdintasunerako otsailaren 18ko 4/2005 Legeak aldatua) arautzen duen moduan.

3.6.– Hautaketa-batzordeen eginkizunak.

Hautaketa-batzordeek honako eginkizun hauek izango dituzte:

a) Ikastetxeko zuzendaritza aukeratzeko prozesua egiteko prozedurak agindu eta garatzea.

b) Dagozkion prozedurak gauzatzeko egutegia ezarri eta argitaratzea, agindu honetan ezarritako epeen arabera.

c) Hautagaiak deitzea zuzendaritza-proiektuak ahoz defendatzeko.

d) Hautagaiek aurkeztutako zuzendaritza-proiektuak era arrazoituan balioestea.

e) Hautagaiek aurkeztutako merezimendu akademikoak, prestakuntzakoak eta profesionalak barematzea.

f) Erreklamazioak ebaztea, beren eskumenen esparruan.

g) Zuzendaritza-proiektuari emandako kalifikazioa onartu eta argitaratzea, bai eta, hala badagokio, hautagaiek merezimendu-baremoan eskuratutako behin-behineko puntuazioa ere.

h) Aurkeztutako hautagaien behin betiko zerrenda onartu eta argitaratzea, apartatu bakoitzean lortutako puntuazioa zehaztuta.

i) Amaierako guztizko puntuazio handiena eskuratu duen ikastetxe bakoitzeko hautagaia aukeratzea.

j) Dagokion lurralde historikoko Hezkuntzako lurralde-ordezkariari igortzea aukeratutako pertsonaren izena, ikastetxeko zuzendari izendatzeko proposamenarekin batera.

k) Dagokion Hezkuntzako lurralde-ordezkaritzan entregatzea aurkeztutako dokumentazioa eta hautaketa-prozesutik eratorritakoa, hautagaia aukeratu ondoren.

3.7.– Beren eginkizunak betetze aldera, hautaketa-batzordeek behar duten informazioa bildu ahal izango dute Hezkuntzako lurralde-ordezkaritzetatik, hautagaiei bidezko dokumentazioa eskatu ahal izango diete, eta, halaber, ikastetxean eskuragarri dauden baliabide eta bitarteko telematikoak erabili ahal izango dituzte hezkuntza-komunitateari zuzendaritzaz arduratuko den pertsonaren hautaketa-prozesuari buruzko alderdi guztiak jakinarazteko eta beren eskumenetatik eratorritako ekintza guztiak deialdian zehaztutako epeetara egokitzeko.

3.8.– Hautaketa-batzordean klaustroa eta OOG ordezkatuko dituzten pertsonak aukeratzea.

Zuzendariak, 2023ko otsailaren 27tik martxoaren 7ra bitartean (biak barne), klaustroaren ezohiko bilkura bat deituko du, eta, ondoren, OOGren beste bilkura bat, onartutako hautagaitzen berri emateko eta dagozkien zuzendaritza-proiektuen berri emateko, dagozkien aktak eman ditzaten (ikus VII. eranskina eta VIII. eranskina).

Deialdi horretan, ikastetxeko zuzendaritzak jakinarazi beharko du zer espazio fisiko edo birtualetan egongo den eskuragarri hautagai bakoitzak aurkeztutako zuzendaritza-proiektua, kide anitzeko organo horietako kideek kontsultatu ahal izan ditzaten. Bilkura berean, bi organoetako kide egokiak eta bokal bakoitzeko ordezko bat aukeratuko dira, zeinak hautaketa-batzordeko kide izango baitira.

Klaustroaren eta OOGren buru ikastetxeko zuzendaria edo haren ordezkoa izango da, honako irizpide hauek aplikatuz:

– Beren ikastetxeko zuzendaritza aukeratzeko merezimendu-lehiaketara aurkezten diren jarduneko zuzendariek ezin izango dituzte bete hautaketa-prozesuan ikastetxeko zuzendariari esleitutako eginkizunak. Eginkizun horiek ikastetxeko zuzendariordeak eta/edo zuzendaritzako ondokoak beteko ditu, edo, ondoren, ikasketaburuak, ikasketaburuaren ondokoak, ikastetxeko idazkariak edo idazkariaren ondokoak, baldin eta dagokion pertsonak ere bere hautagaitza aurkeztu ez badu, betiere.

– Lehen aipatutako karguak betetzen dituzten pertsona guztiek ere ikastetxeko zuzendaritzarako hautagaitza aurkeztu badute, irakaskuntza-sektoreko kide ordezkari zaharrena izango da kide anitzeko organoaren buru.

a) Hautaketa-batzordean klaustro ordezkatuko duen pertsona hautatzea:

Hautaketa-batzordean klaustroa ordezkatuko duten pertsonak aukeratzeko, isilpeko bozketa egingo da, eta, bertan, boto-eskubidea duen pertsona bakoitzak pertsona bati eman ahal izango dio botoa. Izen bat baino gehiago duten botoak baliogabeak izango dira. Ikastetxeko zuzendaritzarako hautagaitza aurkeztu duten irakasleek ezohiko klaustro horretan egoteko, parte hartzeko eta botoa emateko eskubidea izango dute. Zuzendaritza-taldeko kide gisa aurkeztutako zuzendaritza-proiektuetan agertzen diren pertsonekin ere berdin jokatuko da.

Ikastetxeko zuzendaritzarako hautagaitza aurkeztu duten irakasleek boto baliogabeak jasoko dituzte, bai eta zuzendaritza proiektuetan zuzendaritza-taldeko kide gisa agertzen diren pertsonenak ere.

Boto baliodun gehien lortzen dituzten bi pertsonak aukeratuko dira. Berdinketarik badago, bigarren bozketa bat egingo da, eta, behar izanez gero, hirugarren bat. Bozketa horietan berdinduta geratu direnei eman ahal izango zaie botoa. Hirugarren bozketa egin ostean, berdinketarik badago, zozketa publikoa egingo da.

Klaustroko bi ordezkariak aukeratu ondoren, ordezkoen zerrenda osatuko da. Botoren bat jaso duten pertsonek osatuko dute zerrenda hori, eta boto gehien jaso dituenetik hasi eta boto gutxien jaso dituenera ordenatuta. Ordezkoen zerrendan berdinketarik badago, zozketa publiko bidez erabakiko dira.

b) Hautaketa-batzordean OOG ordezkatuko duen pertsona hautatzea:

OOGean ikasleen ordezkaritza duten ikastetxeetan, Derrigorrezko Bigarren Hezkuntzako hirugarren kurtsotik gorako ikasleak baino ez dira deituak izango bilkura horretara.

OOGren ordezkariak aukeratzeko, bozketa bat egingo da, eta, bertan, ikastetxeko irakasle izan gabe ikastetxeko OOGko kide den bakoitzak pertsona bakar bati eman ahal izango dio botoa. Izen bat baino gehiago duten botoak baliogabeak izango dira. Boto baliodun gehien lortzen dituzten bi pertsonak aukeratuko dira. Berdinketarik badago, bigarren bozketa bat egingo da, eta, behar izanez gero, hirugarren bat. Bozketa horietan berdinduta geratu direnei baino ezingo izango zaie botoa eman. Hirugarren bozketa egin ostean, berdinketarik badago, zozketa publikoa egingo da.

OOGko bi ordezkariak aukeratu ondoren, ordezkoen zerrenda osatuko da. Botoren bat jaso duten pertsonek osatuko dute zerrenda hori, eta boto gehien jaso dituenetik hasi eta boto gutxien jaso dituenera ordenatuta. Ordezkoen zerrendan berdinketarik badago, zozketa publiko bidez erabakiko dira.

Irakasleen klaustroko irakasleen eta OOG osatzen duten ordezkarien botoa zuzena, sekretua eta eskuordeezina izango da.

Irakasleen klaustroko edo OOGko ordezkariak hautaketa-batzorderako aukeratzen edo izendatzen ez badira ere, horiek eratu egingo dira.

2023ko martxoaren 8an, ikastetxeko zuzendariak edo haren ordezkoak, apartatu honetan ezarritakoa aplikatuz, dagokion lurralde historikoko Hezkuntzako lurralde-ordezkariari igorriko dio aipatutako partaidetza-organo bakoitzaren bilkuraren aktaren kopia, Hezigunea aplikazioaren bidez («Nire egunerokoa» apartatua. Ikastetxeko Hezkuntza Ikuskaritzaren informazioa. Dokumentuak). (ikus VII. eranskina, klaustroaren akta-eredua, eta VIII. eranskina, OOGren akta-eredua).

3.9.– Hezkuntza-administrazioak hautaketa-batzordeetan izango dituen ordezkariak izendatzea.

Ikastetxe bakoitzari dagokion lurraldeko ikuskari buruak Hezkuntzako lurralde-ordezkariari proposatuko dio Hezkuntzako ikuskari baten izena, hautaketa-batzordeko buru izenda dezaten. Proposamen horiek egiteko epea 2023ko martxoaren 3an amaituko da. Era berean, dagokion Hezkuntzako ordezkariak ikastetxe publiko bateko zuzendari bat izendatuko du hautaketa-batzorde bakoitzean parte hartzeko, eranskin honetako 3.2.c apartatuan jasotzen den bezala. Pertsona horiek Euskal Autonomia Erkidegoko hizkuntza ofizialak behar bezala ezagutzen dituztela bermatzeko moduan egingo dira proposamen eta izendapen horiek.

3.10.– Hautaketa-batzordeetako kideen izendapenak.

Hezkuntzako lurralde-ordezkariek izendatuko dituzte dagokion lurralde historikoan eratu behar diren hautaketa-batzordeetako kide guztiak. Izendapen horiek egiteko epea 2023ko martxoaren 10ean amaituko da.

2023ko martxoaren 10etik 17ra, dagozkion hautaketa-batzordeak eratuko dira. Batzorde horiek eratzen diren egunean, hautaketa-batzordeko buruak hautaketa-prozesua azalduko die batzordekide guztiei, eta merezimenduen lehiaketaren lehenengo eta bigarren faseetan balioetsi beharreko alderdien berri emango die.

Dagokion lurralde historikoko Hezkuntzako lurralde-ordezkariak hautagaitza bat baino gehiago onartu den ikastetxeetako batzorde bakoitzeko burutzari emango dizkio hautagaitza onartu zaion pertsona bakoitzaren lehiaketako bigarren faseko merezimenduak egiaztatzeari buruzko datuak. Datu eta dokumentu horiek emateko epea 2023ko martxoaren 14an amaituko da.

3.11.– Hautaketa-batzordeen funtzionamendua.

Hautaketa-batzordeek zentro berean izango dute egoitza ofiziala, eta eratu diren prozedura amaitzen denean amaituko da haien jarduna. Hautaketa-prozesu honetan parte hartzen duten irakasle funtzionarioek ezin izango dute, inola ere, hautaketa-batzordeetan parte hartu; aurkeztutako zuzendaritza-proiektuetan agertzen diren pertsonek ere ezin izango dute hautaketa-batzordeetan parte hartu.

Hautaketa-batzordearen eraketa eta funtzionamendua baliozkoa izan dadin, ezinbestekoa izango da kideen erdia gehi bat bertan egotea, baldin eta haien artean batzordeburua eta idazkaria badaude. Erabakiak gehiengoz hartuko dira.

4.– Hautaketa-prozesuaren lehenengo fasea.

Lehenengo fasean, zuzendaritza-proiektua balioetsiko da, non, ikastetxeko hezkuntza-proiektuarekin lotuta, hautagaiaren helburuak eta jardun-lerroak jasoko baitira. Zuzendaritza-proiektuak ikasle guztien eskola-arrakasta lortzea izan beharko du helburu, eta, besteak beste, hezkuntza-inklusioari, gizonen eta emakumeen berdintasunari eta diskriminaziorik ezari eta genero-indarkeriaren prebentzioari buruzko edukiak jaso beharko ditu, baita hizkuntza-normalizazioari buruzko edukiak ere.

4.1.– Zuzendaritza-proiektuak klaustroan eta OOGn aurkeztea.

Eranskin honetako 3.8 apartatuan adierazitako irakasleen klaustroaren ezohiko bilkura berean, hautagai bakoitzak bere zuzendaritza-proiektuaren aurkezpena egingo du, eta horri buruz egiten zaizkion galderei erantzungo die. Jarraian, akta egingo da, non jasoko baitira egindako esku-hartzeak.

Era berean, eranskin honetako 3.8 apartatuan jasotako OOGren ezohiko bilkuran, hautagaiek beren proiektua azalduko dute, eta egiten zaizkien galderei erantzungo, zuzendaritza-proiektuak aztertuko dira, eta klaustroaren akta kontuan hartuko da. Jarraian, akta egingo da, non jasoko baitira egindako esku-hartzeak.

Gogoeta horiek klaustroaren eta OOGaren aktan jasoko dira (ikus VII. eta VIII. eranskinak).

4.2.– Hautaketa-batzordeak zuzendaritza-proiektuaren balioestea.

Hautaketa-batzordeak, lehenik eta behin, 2022-2023 ikasturtean aukeratutako ikastetxean destinoa duten izangaien zuzendaritza-proiektua balioetsiko du. Hautagaitzarik ez badago edo pertsona horietako batek ere ez badu prozeduraren lehenengo fasea gainditzen, hautaketa-batzordeak destinoa beste ikastetxe batean duten hautagaien proiektuak balioetsiko ditu.

Hautaketa-batzordeak hautagaiek aurkeztutako eta defendatutako zuzendaritza-proiektuak balioetsiko ditu, agindu honen III. eranskinean jasotako ebaluazio-irizpideak aplikatuz. Lan hori egiteko epea martxoaren 20tik 31ra bitartekoa izango da, biak barne.

Apartatu honetan aipatutako zuzendaritza-proiektua aurkeztu ez bada edo plagioa duela frogatzen bada, osorik edo zati batean, 0 puntu emango zaizkio.

Hautaketa-batzorde bakoitzak, alfabetikoki, ikastetxeko zuzendaritzarako hautagaiak zitatuko ditu, zuzendaritza-proiektua azaldu eta defendatzeko. Zitazioa bakarra izango da hautagai guztientzat, eta ikastetxeko iragarki-taulan eta web-orrian argitaratuko da, gutxienez 48 ordu lehenago, eta hautagaiak non, noiz eta zer ordutan aurkeztu behar diren adieraziko da.

Hautagaiek beren burua identifikatu beharko dute hautaketa-batzordearen aurrean, beren nortasuna egiaztatzen duen agiria aurkeztuz: nortasun-agiri nazionala edo pasaportea eta, hala badagokio, atzerritarraren nortasun-txartela.

Ekitaldi horretan agertzen ez diren hautagaiak prozeduratik kanpo geratuko dira, behar bezala justifikatutako eta hautaketa-batzordeak balioetsitako ezinbesteko kasuetan izan ezik. Alegatutako arrazoia baiesten bada, presidenteak beste egun eta ordu bat ezarriko du eragindako hautagaiaren bigarren eta azken deialdirako, eta batzordearen egoitzako iragarki-taulan eta ikastetxearen webgunean argitaratuko du.

Hautagaiak gehienez 30 minutu izango ditu proiektuaren ezaugarri garrantzitsuenak azaltzeko. Ondoren, eta gehienez 15 minutuz, hautagaiak proiektua defendatuko du, galderei erantzunez eta batzordeko kideek eskatzen dizkioten argibideak emanez.

Ahozko ahozko azalpena egiteko, hautagaiak ordenagailu bat, proiektagailu bat eta interneterako konexioa izango ditu. Bere aldetik, hautagaiak egokitzat jotzen duen material osagarria erabili ahalko du.

Hautaketa-batzordeko kide bakoitzak balioetsiko du zuzendaritza-proiektua, 0 eta 70 puntu artean emanez. Kide bakoitzak emandako puntuazioak zenbaki oso bat izan beharko du. Batzordeko kide bakoitzak emandako puntuazioaren batezbesteko aritmetikoa atzemanez lortuko da proiektuaren puntuazioa. Hala ere, proiektu horren guztizko kalifikazioan batzordekideek emandako puntuazioen artean 15 puntu oso edo gehiagoko aldea badago, gehieneko eta gutxieneko kalifikazioak baztertu egingo dira, eta puntuazioak baztertzen jarraituko da harik eta alde hori desagertu arte. Azkenik, gainerako kalifikazioen batez besteko puntuazioa kalkulatuko da.

Lehenengo fase honetan hautagaiek, gutxienez, 35 puntu lortu beharko dituzte. Gutxieneko puntuaziora iristen ez diren izangaiak hautaketa-prozesutik kanpo geratuko dira.

Beraz, zuzendaritza-proiektuak kalifikatuta, haietako bakarra balioesten bada gutxienez 35 punturekin, izangaia hautagai hautatu gisa proposatuko da. Zuzendaritza-proiektu batek baino gehiagok lortzen badute 35 puntu edo gehiagoko kalifikazioa, kasuan kasuko hautagaien merezimenduak barematuko dira prozeduraren bigarren fasean.

5.– Hautaketa-prozesuaren bigarren fasea.

a) Zuzendaritza-proiektuaren balioespena amaitu ondoren, merezimendu-lehiaketaren lehenengo fasea gainditu duen hautagaitza bat baino gehiago dagoen ikastetxeetan, hautaketa-batzordeak, Hezkuntzako Lurralde Ordezkaritzatik jasotako informazioa kontuan hartuta, lehenengo fasean eskatutako gutxieneko puntuazioa lortu duen izangai bakoitzaren prozesuaren bigarren faseko merezimenduak balioetsiko ditu. Balioespen hori egiteko, jarraibide hauen IV. eranskinean jasotako baremoa aplikatuko da.

b) Merezimenduen balioespenaren gehieneko puntuazio orokorra ez da, inola ere, 30 puntutik gorakoa izango.

Datu horiek sartzeko epea apirilaren 19an amaituko da.

6.– Hautagaitza bakoitzak lortutako puntuazioei buruzko ebazpena eta zuzendari-lanposturako hautatutako pertsonaren proposamena.

Izangaien merezimenduak balioetsi ondoren, hautaketa-batzordeak puntuazioa lortuko du, zuzendaritza-proiektuan eta merezimenduen ebaluazioan lortutako puntuazioaren batura izango dena.

Berdinketarik badago, irizpide hauek bata bestearen ondoren aplikatuz ebatziko dira:

a) Zuzendaritza-proiektuan puntuaziorik handiena.

b) Merezimenduen baremoko apartatu bakoitzean lortutako puntuazio handiena, agindu honen IV. eranskinean agertzen den hurrenkeraren arabera.

Batzordeek 2023ko apirilaren 21ean argitaratuko dituzte izangaiek merezimendu-lehiaketaren fase bakoitzean lortutako behin-behineko puntuazioak, dagozkien jarduera-egoitzetan. Argitalpen honekin, interesdunekiko jakinarazpena egintzat joko da.

2023ko apirilaren 24tik 27ra bitartean, egoki iritzitako erreklamazioak aurkeztu ahal izango dituzte izangaiek dagozkien ikastetxeetako idazkaritzetan, hautaketa-batzordeari zuzendutako idazki baten bidez.

Behin-behineko puntuazioen aurka aurkeztutako erreklamazioak aztertu ondoren, hautaketa-batzordeek horiei buruzko ebazpena emango dute, eta behin betiko puntuazioak behin-behinekoen antzera argitaratuko dituzte. Argitalpen honekin, interesdunekiko jakinarazpena egintzat joko da. Argitalpen hori egiteko epea 2023ko maiatzaren 5ean amaituko da.

Hautagai batek ikastetxe baterako baino gehiagorako lortzen badu puntuaziorik handiena, parte hartzeko eskabidean lehenengo jarri duen ikastetxerako proposatuko da.

2023ko maiatzaren 5ean bertan, batzordeburuak behin betiko puntuazioak eta, hala badagokio, zuzendari-lanposturako hautatutako pertsonaren proposamena helaraziko dizkio dagokion lurralde historikoko Hezkuntzako lurralde-ordezkariari.

Ikastetxe bakoitzeko hautaketa-batzordearen jarduketa guztiak 2023ko maiatzaren 8a baino lehen egin eta amaitu beharko dira.

7.– Hezkuntzako lurralde-ordezkarien ebazpenak.

Hautaketa-batzordeek egindako proposamenak ikusita, eta haiekin bat etorriz, prozedura urratu ezean, hautatutako pertsonak adierazteko ebazpenak emango eta argitaratuko ditu dagokion lurralde historikoko Hezkuntzako lurralde-ordezkariak. Ebazpen horiek emateko eta argitaratzeko epea 2023ko maiatzaren 12an amaituko da.

Aurreko paragrafoan aipatzen diren ebazpenak Hezkuntza Sailaren webgunean argitaratuko dira («Irakaskuntzak eta Ikastetxeak» lan-arloaren barruan – «Unibertsitateaz kanpoko ikastetxeen antolamendua. Gobernu-organoak» «Ikastetxe publikoak» «Zuzendariak hautatzeko prozesuaren deialdia» eta «Hezigunea» atarian. Argitalpen honekin, interesdunekiko jakinarazpena egintzat joko da.

Ebazpen horien aurka, interesdunek gora jotzeko errekurtsoa aurkeztu ahal izango diote Hezkuntzako sailburuordeari.

Izendatutakoak ez badu destinorik zuzendari hautatua izan den ikastetxean, 2023ko ekainaren 1a baino lehen horren berri emango zaio irakasleen arloan eskumena duen zuzendaritzari, eta ikastetxe horretan zerbitzu-eginkizunak emateko ebazpena onartuko du hark, izendapenak irauten duen artean.

8.– Atzera egitea eta uko egitea.

Merezimendu-lehiaketan onartutakoen behin betiko ebazpenak argitaratzeko epea amaitu baino lehen soilik egin ahal izango da atzera lehiaketan parte hartzeko eskabidean.

Era berean, izangaiak lehiaketan parte hartzeari uko egin ahal izango dio edo esleitutako lanpostuari uko egin ahal izango dio hamabi hilabete baino gehiago igarotzen direnean deialdiaren eta lehiaketaren ebazpenaren artean.

9.– Hautatutako izangaien izendapena.

9.1.– Dagokion lurralde historikoko Hezkuntzako lurralde-ordezkariak ikastetxeko zuzendari izendatuko du hautatutako pertsona, zuzendaritza-eginkizunean jarduteko konpetentziei buruzko berariazko prestakuntza-programan jasotako prestakuntza gainditu duena. Programa hori Ikaskuntzako eta Hezkuntza Berrikuntzako zuzendariaren 2022ko urriaren 28ko Ebazpenean dago araututa, zeinaren bidez ezartzen baita zuzendaritza-eginkizuna betetzeko hasierako eta etengabeko prestakuntzaren esparrua, eta arautzen baitira zuzendaritza-eginkizuna betetzeko prestakuntza-programa espezifikoa eta zuzendaritza-eginkizuna betetzeko gaitasunak eguneratzeko programa espezifikoa 2022-2023 eta 2023-2024 ikasturteetarako.

9.2.– 2023ko ekainaren 1etik 8ra bitartean, biak barne, Hezkuntza Saileko Ikaskuntzako eta Hezkuntza Berrikuntzako Zuzendaritzak ofizioz emango du, hautatutako izangaien kasuan, zuzendaritza-eginkizunean hasteko prestakuntza-programa espezifikoa edo, hala badagokio, zuzendaritza-eginkizunean jarduteko gaitasunak eguneratzeko programa espezifikoa gainditu izanaren ziurtagiria, aurreko paragrafoan aipatutako ebazpenean araututakoaren arabera.

Aipatutako ebazpenaren 5. artikuluko 1. apartatuan jasotzen den bezala, salbuespenezko kasuetan, Ikaskuntzaren eta Hezkuntza Berrikuntzaren Zuzendaritzak luzapena baimendu ahal izango du, gehienez ere 2023-2024 ikasturteko lehenengo hiruhilekora arte, hautatutako zuzendariak PEFI_EFD programa edo, hala badagokio, PEAC_EFD prestakuntza-programa egiaztatzeko beharrezkoa den prestakuntza-ibilbidea osa dezan. Nolanahi ere, hautatutako zuzendariak dagokion programaren ordu-kopuruaren erdia osatzeko beharrezkoak diren prestakuntza-jarduerak ziurtatuta baditu emango dira luzapen horiek (60 ordu PEFI_EFDren kasuan eta 30 ordu PEAC_EFD prestakuntza-programaren kasuan).

Ikaskuntza eta Hezkuntza Berriztatzeko zuzendariaren behin-behineko ebazpenaren bidez jakinaraziko zaie interesdunei. Ebazpen hau eranskin honen 2.1 apartatuan ezarritakoen antzera argitaratuko da.

Ebazpen horretan, honako hauek zehaztuko dira:

a) PEFI_EFD prestakuntza-programa edo, hala badagokio, PEAC_EFD programa gainditu izanaren ziurtagiria lortzen duten zuzendariak.

b) Salbuespenez, prestakuntza-ibilbidea osatzeko luzapena ematen zaien zuzendariak.

c) Dagokion prestakuntza-programa espezifikoa gainditu ez duten zuzendari hautatuak, eta, hala badagokio, ez gainditzeko arrazoiak.

Aurreko ebazpenaren aurka, interesdunek erreklamazioa aurkeztu ahal izango diote Ikaskuntzako eta Hezkuntza Berrikuntzako zuzendariari. Erreklamazio horiek Hezigunea atariaren bidez egingo dira, eta aurkezteko epea 2023ko ekainaren 12an amaituko da, egun hori barne.

Ikaskuntzaren eta Hezkuntza Berrikuntzaren Zuzendaritzak ebatziko ditu aurkeztutako erreklamazioak, eta behin betiko ebazpena emango du. Ebazpen hori emateko epea 2023ko uztailaren 14an amaituko da.

Behin betiko ebazpenaren c apartatuan jasotzen diren zuzendarien kasuan, dagokion lurralde historikoko Hezkuntzako lurralde-ordezkariak egindako izendapena ezohikoa izango da automatikoki.

9.3.– Izendapenak eta kargu-hartzeak 2023ko uztailaren 1etik aurrera izango ditu ondorioak. Zuzendari kargua betetzen ari zenak aurreko egunean utziko du bere kargua, ondore guztietarako, baita zuzendaritza-taldeko gainerako kideek ere.

9.4.– Agintaldia lau urtekoa izango da, ezohiko izendapenen kasuan izan ezik, kasu horretan agintaldia urtebetekoa izango baita.

10. artikulua.– Ezohiko izendapena.

10.1.– Hautagaitzarik ez dagoenean, ikastetxe berriak direnean edo dagokion batzordeak pertsona bakar bat aukeratu ez duenean, dagokion lurralde historikoko Hezkuntzako lurralde-ordezkariak, Hezkuntzako Ikuskaritzaren txostena aztertu eta ordezkaritza-organo gorena entzun ondoren, irakasle funtzionario bat urtebeterako izendatuko du zuzendari, ohiz kanpo. Ebazpen horiek emateko eta argitaratzeko epea 2023ko maiatzaren 12an amaituko da.

10.2.– Pertsona horrek ez badu destinorik zuzendari izendatu den ikastetxean, 2023ko ekainaren 1a baino lehen horren berri emango zaio irakasleen arloan eskumena duen zuzendaritzari, eta ikastetxe horretan zerbitzu-eginkizunak emateko ebazpena onartuko du hark, izendapenak irauten duen artean.

10.3.– Zuzendariek PEFI_EFD prestakuntza-programa espezifikoa egin eta gainditu beharko dute izendapenaren lehenengo urtea amaitu baino lehen. Izendatuak izan diren ikasturteari dagokion jarduera-plana ere aurkeztu beharko dute, ikastetxearen hezkuntza-proiektuarekin bat datorrena.

11.– Zuzendaritza-taldeko gainerako kideen izendapena eta kargu-uztea.

11.1.– Agindu honetan aurreikusitako zuzendariaren izendapenetan, ikastetxeko zuzendari izendatu den edo izendatuko denak, klaustroa eta haren ordezkaritza-organo gorena entzun ondoren, ikastetxeko pertsona bakarreko gainerako gobernu-organoen izendapenaren proposamena egingo dio dagokion lurralde historikoko Hezkuntzako lurralde-ordezkariari. Izendapen hori ikastetxean destinoa duten irakasleen artean egin beharko du, eta emakumeen eta gizonen ordezkaritzak haztatua edo, halakorik ezean, orekatua izan beharko du. Proposamena egiteko epea 2023ko maiatzaren 19an amaituko da.

11.2.– Proposamen hori bat etorri beharko da, hala badagokio, prozeduraren hasieran aurkeztutako zuzendaritza-proiektuarekin, baldin eta ezohiko inguruabarrik ez badago. Azken kasu horretan, inguruabarrak dagokion lurralde historikoko Hezkuntzako lurralde-ordezkariak balioetsiko ditu, eta, hala badagokio, baietsiko.

11.3.– Dagokion lurralde historikoko Hezkuntzako lurralde-ordezkariak izendatuko ditu zuzendaritza-taldeko gainerako kideak, proposatzen dien zuzendariaren agintaldiaren epealdi bererako. Izendapen hau 2023ko maiatzaren 30a baino lehen egingo da.

11.4.– Zuzendariak dagozkion proposamenak egiten ez baditu edo proposatutako pertsonek ezarritako baldintzak betetzen ez badituzte, dagokion lurralde historikoko Hezkuntzako ordezkariak pertsona egokienak izendatuko ditu, ikastetxeko zuzendaritzaren eta Hezkuntza Ikuskaritzaren txostena jaso ondoren.

11.5.– Salbuespenezko egoeretan, dagokion lurralde historikoko Hezkuntzako ordezkariak ikastetxeko behin betiko destinorik gabeko irakasleak izendatu ahal izango ditu zuzendariaz bestelako zuzendaritza-taldeko kide gisa. Kasu horietan, zuzendariak proposamen arrazoitu bat egin beharko du, eta proposamen horrek hezkuntza-ikuskaritzaren eta langileen zuzendaritzaren aldeko txostena izan beharko du. Kasu horietan, irakasleen arloan eskumena duen zuzendaritzak ikastetxe horretan zerbitzu-eginkizun bat emateko ebazpena onartuko du izendapenak irauten duen bitartean.

(Ikus .PDF)

Azterketa dokumentala