RSS
143. zk., 2022ko uztailaren 26a, asteartea
- Bestelako formatuak:
- PDF (157 KB - 3 orri.)
- EPUB (136 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
BESTELAKO XEDAPENAK
ENERGIAREN EUSKAL ERAKUNDEA
3379
EBAZPENA, 2022ko uztailaren 8koa, Energiaren Euskal Erakundeko zuzendari nagusiarena, energia-iturri berriztagarrien bidezko autokontsumoari eta biltegiratzeari eta bizitegi-sektorean sistema termiko berriztagarriak ezartzeari lotutako pizgarri-programaren aurrekontu-zuzkidura aldatzen duena eta ondoriozko aurrekontu-zuzkidura aditzera ematen duena, Energiaren Euskal Erakundeko zuzendari nagusiaren 2021eko irailaren 22ko Ebazpenaren bidez ezarritako Suspertze, Eraldatze eta Erresilientzia Planaren esparruan.
Ekainaren 29ko 477/2021 Errege Dekretuak (Suspertze, Eraldatze eta Erresilientzia Planaren esparruan energia-iturri berriztagarrien bidezko autokontsumoari eta biltegiratzeari eta bizitegi-sektorean sistema tekniko berriztagarriak ezartzeari lotutako pizgarri-programak egikaritzeko autonomia-erkidegoei eta Ceutako eta Melillako hiriei laguntzak zuzenean ematea onartzen duena; 2021eko ekainaren 30eko BOE, 155. zk.) ezarri zituen energia-iturri berriztagarrien bidezko autokontsumoari eta biltegiratzeari eta bizitegi-sektorean sistema tekniko berriztagarriak ezartzeari lotutako pizgarriak emateko oinarri arautzaileak, Suspertze, Eraldatze eta Erresilientzia Planaren esparruan. 477/2021 EDaren bidez adostu zen aurreikusitako laguntzak zuzenean ematea banaketa-irizpideei jarraikiz, baita dagozkion funtsen ondoriozko banaketa jarduketa diruz lagungarriak finantzatzeko ere, 660 milioi euroko zenbatekoaz, Euskal Autonomia Erkidegoaren kasurako 37.173.437 euroko zenbatekoaz zehazki.
Energiaren Euskal Erakundeko zuzendari nagusiaren 2021eko irailaren 22ko Ebazpenak (2021eko urriaren 1ean EHAA, 197. zk.), energia berriztagarrien bidezko autokontsumoari eta biltegiratzeari eta bizitegi-sektorean sistema termiko berriztagarriak ezartzeari lotutako pizgarri-programa arautzen duten oinarriak onartu, deitu eta argitaratu zituen, Suspertze, Eraldatze eta Erresilientzia Planaren esparruan.
Europako Suspertze, Eraldatze eta Erresilientzia Planaren esparruan energia-iturri berriztagarrien bidezko autokontsumo eta biltegiratzearekin eta bizitegi-sektorean sistema termiko berriztagarriak ezartzearekin lotutako pizgarri-programaren 3. oinarrian aurreikusitakoaren arabera, programa horretarako bideratutako zuzkidura ekonomikoa 34.558.233,89 euro da, Eusko Jaurlaritzaren aurrekontuetan ezarritako kredituaren arabera.
477/2021 Errege Dekretuan ezarritakoari jarraikiz eta horretarako aldez aurretik egindako eskaerarekin, Energia Dibertsifikatzeko eta Aurrezteko Institutuko presidentearen 2022ko ekainaren 10eko Ebazpenaren bidez, Euskal Autonomia Erkidegoari 37.173.436,99 euroko zenbateko gehigarria ematea adostu zen, energia-iturri berriztagarrien bidezko autokontsumoari eta biltegiratzeari eta bizitegi-sektorean sistema termiko berriztagarriak ezartzeari lotutako pizgarri-programarako.
Horrekin batera, lehengaien hornidura-merkatuetan bizi dugun egoera ekonomiko konplexuak eta, zehazki, 2021eko azken hiruhilekoko energia-merkatuetan bizi izan dugunak –intzidentzia bereziarekin 2022ko lehen hiruhilekoan–, pizgarri-programan ezarritako helburuak are gehiago indartzera garamatza. Hala, egungo egoera hain larria izanik eta orain arte jasotako eskaera-bolumen handia aintzat hartuta, premiazkoa da, aurrekontuek ahalbidetzen duten neurrian, sektore kontsumitzaile guztietan energia berriztagarri termiko zein elektrikoen zabalkundea azeleratzen ahalegintzea, kontagailuaren atzeko biltegiratze-sistemak garatuz kontsumoa hobeto kontrolatzea, eta Euskal Autonomia Erkidegoko lurraldeko industria eta lotutako enpresa-sektorea bultzatzea, horrek aukera emango digulako erregai fosilen mendekotasuna murrizteko eta sektore kontsumitzaileek aurre egin beharreko energia-kostua gutxitzeko. Horretarako, EEEk berak hartu ditu beharrezko neurriak, beharrezkoa bada eta hemen deskribatutako Suspertze, Eraldatze eta Erresilientzia Planeko funtsetatik datozen baliabideekiko izaera osagarriarekin, 20.000.000 euroko zenbatekoaz indartzeko erakundearen baliabide propioak.
Horregatik guztiagatik, eta aurkeztu direnen artean ahalik eta eskari gehieni erantzuteko helburuarekin,
EBAZTEN DUT:
Lehenengoa.– Energiaren Euskal Erakundeko zuzendari nagusiaren 2021eko irailaren 22ko Ebazpenaren (Suspertze, Eraldatze eta Erresilientzia Planaren esparruaren barruan energia berriztagarrien bidezko autokontsumoari eta biltegiratzeari eta bizitegi-sektorean sistema termiko berriztagarriak ezartzeari lotutako pizgarri-programa arautzen duten oinarriak onartzen, deitzen eta argitaratzen dituena; 2021eko urriaren 1eko EHAA, 197. zk.) 3. oinarria aldatzea. Aldaketa horrek laguntzen programa honi hasiera batean bideratutako zuzkidura ekonomikoa igotzea dakar, honako hauei jarraikiz:
a) 32.226.080,39 euroko igoera (behin dagozkion zeharkako gastuak eta zuzeneko inbertsioak egiteko 3.926.161,47 euroko erreserba kenduta), Suspertze eta Erresilientzia Mekanismoaren kontura emandako funtsetatik datorrena, 477/2021 EDaren 10.3 artikuluan bildutakoa aplikatuz eta Energia Dibertsifikatzeko eta Aurrezteko Institutuko presidentearen 2022ko ekainaren 10eko Ebazpenean aurreikusitakoari jarraikiz.
Suspertze eta Erresilientzia Mekanismoaren konturako pizgarri-programa honetara bideratutako igoera horren ondorengo zuzkidura ekonomikoa (66.784.314,28 euro) zenbateko honen arabera banatuta geratzen da pizgarri-programa bakoitzerako:
(Ikus .PDF)
b) Zuzkidura gehigarri hori, eta betiere ebazpen honen bigarren puntuan jasotakoari jarraikiz, 20.000.000 euroko gehieneko zuzkidura gehigarri eta osagarri batez gehituko da, EEEk zenbateko hori deialdian aurreikusitako pizgarri-programen xedera bideratzen duelarik, EEEren aurrekontuan kontsignatutako funts propioekin.
Bigarrena.– Ebazpen honen lehenengo puntuan aurreikusitako bi aurrekontu-igoeren arteko osagarritasun-araubidea zein 477/2021 Errege Dekretuaren 10.3 artikuluan jasotakoa aplikatuz lortu litekeen beste edozein igoeraren artean osagarritasun-araubidea antolatzeko xedearekin, honako hauek erabakitzen dira.
– 20.000.000 euroko gehieneko aurrekontu-zuzkidura gehigarri horren konturako laguntzak emango dira, soil-soilik, honako zirkunstantzia hauek metatzen direnean:
• Suspertze eta Erresilientzia Mekanismoaren kontura emandako funtsetatik datorren egungo zuzkidura (66.784.314,28 euro) agortu izana, edo, 477/2021 Errege Dekretuaren 10.3 artikuluan jasotakoa aplikatuz, Suspertze eta Erresilientzia Mekanismoaren kontura eman zitezkeen funts berrien igoeren ondoriozko zuzkidura agortu izana.
• Deialdia egin duenaren eskaera edo akordio bat ere ebatzi gabe ez egotea, Suspertze eta Erresilientzia Mekanismoaren kontura emandako funts berriak igotzeko 477/2021 Errege Dekretuaren 10.3 artikuluan jasotakoa aplikatuz.
• Deialdian aurreikusitako edozein pizgarri-programatan egiaztatzea zenbait eskaera, epean eta forman formalizatu badira ere, laguntza emateko zain daudela, oraindik erantzunik jaso gabe Suspertze eta Erresilientzia Mekanismo horren zuzkiduren aurrekontua agortu izanaren ondorioz.
– 20.000.000 euroko aurrekontu-zuzkidura gehigarri horren kontura ematen diren laguntzen kasuan, eskaerei erantzungo zaie, hurrenez hurren, baldin eta, laguntzak eskuratzeko oinarri erregulatzaileetan aurreikusitako betekizunak betez, hasierako deialdian gaur egun jasotako aurrekontu-zuzkidurarekin (66.784.314,28 euro) erantzunik eman ez bazaie, edota, 477/2021 Errege Dekretuaren 10.3 artikuluan jasotakoa aplikatuz Suspertze eta Erresilientzia Mekanismoaren kontura izan zitekeen funts-igoeraren ondoriozko zuzkidurarekin ere erantzunik eman ez bazaie.
Horrenbestez, 20.000.000 euroko gehieneko zuzkidura gehigarriarekin erantzuten zaien eskaerak ebatziko dira, bata bestearen ondoren, formalizatu ziren dataren arabera, eta hasierako deialdian aurreikusita zeudenen artean edozein pizgarri-programari lotuta egonik ere, gehieneko zuzkidura gehigarri hori guztiz agortu arte.
Deialdi honi lotutako edozein aurrekontu-zuzkidura agorturik, gainerako eskaerak atzera botako dira aurrekontu-baliabideak agortzearen ondorioz.
– 20.000.000 euroko gehieneko zuzkidura gehigarriaren konturako laguntza jasotzen duten eskaerei, oinarri erregulatzaileetan aurreikusitako araubide orokorra ezarriko zaie, Suspertze eta Erresilientzia Mekanismotik eratorritako funtsen bidezko finantzaketaren harira Estatu Administrazioko organoei informatzeko betebehar espezifikoak eta Energia Dibertsifikatzeko eta Aurrezteko Institutuari eta Trantsizio Ekologikorako eta Erronka Demografikorako Ministerioari datuak lagatzearen inguruko aurreikuspenak izan ezik.
Bilbao, 2022ko uztailaren 8a.
Energiaren Euskal Erakundeko zuzendari nagusia,
IÑIGO ANSOLA KAREAGA.
