RSS
97. zk., 2022ko maiatzaren 20a, ostirala
- Bestelako formatuak:
- PDF (143 KB - 4 orri.)
- EPUB (158 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
BESTELAKO XEDAPENAK
LAN ETA ENPLEGU SAILA
2174
EBAZPENA, 2022ko apirilaren 11koa, Laneko eta Gizarte Segurantzako zuzendariarena, zeinaren bidez erregistratzen, argitaratzen eta gordailutzen baita Osakidetza-Euskal osasun zerbitzuko garbiketa-zerbitzuaren enpresa emakidadunen hitzarmen kolektiboko Batzorde Paritarioak egindako akordioa (hitzarmenaren kodea: 86002115012003).
AURREKARIAK
2022ko apirilaren 7an, aipatu hitzarmen kolektiboaren Batzorde Paritarioak egindako akordioaren dokumentazioa aurkeztu da REGCONen. Enpresaren eta sindikatuen ordezkariek sinatuta egon da dokumentazioa.
ZUZENBIDEKO OINARRIAK
Lehenengoa.– Lehendakariaren irailaren 6ko 18/2020 Dekretuak (Euskal Autonomia Erkidegoaren Administrazioko sailak sortu, ezabatu eta aldatzen dituena eta sail bakoitzaren egitekoak eta jardun-arloak finkatzen dituena) 2. artikuluan Lan eta Enplegu Saila sortzen du, eta 6. artikuluan ezartzen du sail horrek egikarituko duela lan-arloko legeek lan-harremanei buruz ezartzen dutena. Bestalde, Lan eta Enplegu Sailaren egitura organikoa eta funtzionala ezartzeko urtarrilaren 19ko 7/2021 Dekretuak 10.1.j) artikuluan ezartzen du Laneko eta Gizarte Segurantzako Zuzendaritzak Euskadiko Lan Hitzarmen eta Akordio Kolektiboen Erregistro telematikoa zuzendu eta kudeatuko duela, erregistroa arautzen duen dekretuan eta indarrean dagoen gainerako araudian xedatutakoari jarraikiz.
Bigarrena.– ISS., Ferrovial Servicios S.A., Garbialdi S.A. eta CCOO, LAB eta UGT sindikatuek sinatu dute akordioa, Langileen Estatutuari buruzko Legeak 85., 87., 88., 89. eta 90. artikuluetan ezarritako betekizunekin bat etorriz.
Hori dela-eta, honako hau
EBAZTEN DUT:
Lehenengoa.– Akordioa Euskadiko Hitzarmen eta Akordio Kolektiboen Erregistroan inskribatu eta gordailutzeko agintzea, eta alderdiei jakinaraztea.
Bigarrena.– Akordioa Euskal Herriko Agintaritzaren Aldizkarian argitara dadila agintzea.
Vitoria-Gasteiz, 2022ko apirilaren 11.
Laneko eta Gizarte Segurantzako zuzendaria,
ANGEL LAPUENTE MONTORO.
Leire Idirin Requetak, Osakidetzako garbiketa-zerbitzuaren enpresa emakidadunen hitzarmen kolektiboko Batzorde Paritarioak emandako baimena baliatuz, honako hau.
Adierazten du: Batzordea 2022ko apirilaren 5ean, asteartean, bildu zen, eta LABek eskatuta, beherago azaltzen den gaia aztertu zuen. Bileraren aktan dago transkribatuta zein izan zen ebazpena.
Azaldutako gaia: 2022rako hitzarmen kolektiboaren soldata-taulak eguneratzea proposatu zaio Batzorde Paritarioari, Jaurlaritzaren Idazkaritzako eta Legebiltzarrarekiko Harremanetarako zuzendariaren martxoaren 1eko 29/2022 Ebazpena argitaratu denean. Ebazpen horren bidez, hain zuzen, Euskal Autonomia Erkidegoko Administrazioaren sektore publikoaren zerbitzuko langileen ordainsarien 2022rako igoerak onartzeko erabakia argitaratzea xedatu da.
Ebazpena: Batzordeak honako hau erabaki du aho batez:
Osakidetzako garbiketa-zerbitzuaren enpresa emakidadunen sektoreko hitzarmen bakarrean jasotzen diren soldata-taulak onartzen dira. Sinatu egin dira, eta akta honi erantsi zaizkio. Taula horietan % 2 eguneratu dira soldaten kontzeptuak, 2022ko urtarrilaren 1etik aurrerako ondorioekin, honako hauetan ezarritakoa betez: 11/2021 Legea, abenduaren 23koa, Euskal Autonomia Erkidegoko 2022. urteko Aurrekontu Orokorrak onartzen dituena, eta 29/2022 Ebazpena, martxoaren 1ekoa, Jaurlaritzaren Idazkaritzako eta Legebiltzarrarekiko Harremanetarako zuzendariarena, Euskal Autonomia Erkidegoko Administrazioaren sektore publikoaren zerbitzuko langileen ordainsarien 2022rako igoerak onartzeko erabakia argitaratzeko dena.
Soldata-taulak Euskal Herriko Agintaritzaren Aldizkarian argitaratzen direnetik aurrera ordainduko dira.
Eta hala ziurtatzen du, dagozkion ondorioetarako, Bilbon, 2022ko apirilaren 6an.
