RSS
249. zk., 2021eko abenduaren 15a, asteazkena
- Bestelako formatuak:
- PDF (317 KB - 10 orri.)
- EPUB (228 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
AGINTARIAK ETA LANGILERIA
Oposaketak eta lehiaketak
OSAKIDETZA-EUSKAL OSASUN ZERBITZUA
6214
1486/2021 EBAZPENA, azaroaren 25ekoa, Osakidetza-Euskal osasun zerbitzuko zuzendari nagusiarena, zeinaren bidez onartzen diren estatutupeko lotura finkoa lortzeko hautaketa-probak arautuko dituzten oinarri espezifikoak Teknikari Espezialista Sanitarioak lanbide-taldeko Audioprotesiko Teknikari Espezialista kategorian, Osakidetzako zerbitzu sanitarioetako erakundeetako destinoetan.
Osakidetzako zuzendari nagusiaren azaroaren 25eko 1473/2021 Ebazpenaren bidez, onartu egin dira Osakidetzan estatutupeko lotura finkoa lortzeko 2018 eta 2019an iragarritako hautaketa-prozesuak arautuko dituzten oinarri orokorrak.
Hautaketa-prozesu bakoitza gauzatzeko, beharrezkoa da kategoria bakoitzeko destinoen deialdia arautuko duten oinarri espezifikoak argitaratzea.
Horregatik, kontuan izanda Euskadiko Antolamendu Sanitarioaren ekainaren 26ko 8/1997 Legea, Osasun-zerbitzuetako estatutupeko langileen esparru-estatutuaren abenduaren 16ko 55/2003 Legea, Enplegatu Publikoaren Oinarrizko Estatutuaren testu bategina onartzen duen urriaren 30eko 5/2015 Legegintzako Errege Dekretua, Osakidetza Ente Publikoaren lanpostu funtzionalak arautzen dituen uztailaren 19ko 186/2005 Dekretua, Osakidetza Ente Publikoaren Estatutu Sozialak ezartzen dituen azaroaren 11ko 255/1997 Dekretua, eta indarrean dauden eta aplikagarriak diren gainerako xedapenak, honako hau
EBAZTEN DUT:
Lehenengoa.– Oinarri hauen xede diren hautaketa-probetarako deia egitea.
Bigarrena.– Osakidetzan estatutupeko lotura finkoa lortzeko hautaketa-probak arautuko dituzten oinarri espezifikoak onartzea (I. eranskina) Teknikari Espezialista Sanitarioak lanbide-taldeko Audioprotesiko Teknikari Espezialista kategorian, Osakidetzako zerbitzu sanitarioetako erakundeetako destinoetan.
Hirugarrena.– Ebazpen honen II. eranskinaren bidez eskainitako destinoen zerrenda onartzea.
Laugarrena.– Ebazpen honen III. eranskinean agertzen den merezimenduen baremoa onartzea.
Bosgarrena.– Ebazpen honen IV. eranskinean dagoen gai-zerrenda onartzea.
Seigarrena.– Deialdi honetan parte hartzeko eskaera aurkezteko epea 2022ko urtarrilaren 25etik 2022ko otsailaren 24ko 14:00ak arte ezartzea, oinarri orokorrak onartzen dituen Osakidetzako zuzendari nagusiaren azaroaren 25eko 1473/2021 Ebazpenaren 9.3 oinarrian ezarritakoaren arabera.
Zazpigarrena.– Ebazpen honen aurka gora jotzeko errekurtsoa jarri ahal izango zaio Osakidetzako Administrazio Kontseiluari; horretarako, hilabeteko epea egongo da, Ebazpena EHAAn argitaratzen den egunaren hurrengo egunetik hasita, Administrazio Publikoen Administrazio Prozedura Erkidearen urriaren 1eko 39/2015 Legean, Euskadiko Antolamendu Sanitarioari buruzko ekainaren 26ko 8/1997 Legean eta Osakidetzaren estatutu sozialak ezartzeko azaroaren 11ko 255/1997 Dekretuan ezarritakoaren arabera.
Vitoria-Gasteiz, 2021eko azaroaren 25a.
Osakidetza-Euskal osasun zerbitzuko zuzendari nagusia,
MARÍA ROSA PÉREZ ESQUERDO.
I. ERANSKINA
ESTATUTUPEKO LOTURA FINKOA LORTZEKO HAUTAKETA-PROBAK ARAUTUKO DITUZTEN OINARRI ESPEZIFIKOAK TEKNIKARI ESPEZIALISTA SANITARIOAK LANBIDE-TALDEKO AUDIOPROTESIKO TEKNIKARI ESPEZIALISTA KATEGORIAN, OSAKIDETZAKO ZERBITZU SANITARIOETAKO ERAKUNDEETAKO DESTINOETAN
1.– Deialdiaren xede diren destinoak.
1.1.– Deialdi honen xede izango dira Teknikari Espezialista Sanitarioak lanbide-taldeko Audioprotesiko Teknikari Espezialista kategoriako Osakidetzako zerbitzu sanitarioetako erakundeetako destinoak, II. eranskinean jasota daudenak alegia.
1.2.– Deialdian sartutako destinoen % 7 desgaitasunen bat duten langileek betetzeko gordeko dira, II. eranskinean jasotako oinarri orokorretako 1.3. oinarrian ezarritako banaketaren arabera.
2.– Izangaien betekizunak.
Honen bidez araututako prozesuan parte hartzeko, izangaiek, oinarri orokorretan ezarritako salbuespenak kenduta, aurkezteko epearen azken egunean bete beharreko eskakizunez gain, oinarri orokorretan jasota daudenak ere bete beharko dituzte, eta horiek kasuan kasu esleitzen den destinoa jabetzan hartu arte bete beharko dira:
a) Oinarri orokorretako 6.2.c) apartatuan xedatutakoarekin bat, Audioprotesiko Goi Mailako Teknikariaren titulua edo baliokidea izatea, Hezkuntza eta Zientzia Ministerioak emana, lortu nahi den lanpostu funtzionalean aritzeko eskatzen dena, Osakidetza Ente Publikoaren lanpostu funtzionalak arautzen dituen uztailaren 19ko 186/2005 Dekretuaren I. eranskinean zehaztutakoa betez.
b) Edonola ere, lortu nahi den lanpostuaren baldintzak betetzea, Osakidetza Ente Publikoaren lanpostu funtzionalak arautzen dituen uztailaren 19ko 186/2005 Dekretuak xedatutakoaren arabera, bai eta indarrean dagoen araudiak eskatzen duen beste edozein eskakizun betetzea ere.
c) Eskabideak aurkezteko epearen barruan, izena emateko eskubideengatik dagokion tasa ordaindu izana, eskainitako destinoen lanbide-taldearen arabera:
C1 taldea (C talde zaharra): 15 euro.
3.– Lehiaketaldiaren garapena.
3.1.– Oposizioaldia.
Epaimahai kalifikatzaileari dagokio probaren edukia eta kalifikazioa zehaztea, eta, horretarako, hautaketa-prozesua behar bezala garatzeko beharrezkotzat jotzen dituen neurriak hartuko ditu, eta prozesuaren gardentasuna eta objektibotasuna bermatuko du.
Epaimahaiak Osakidetzari eskatu ahal izango dio aholkulariek parte har dezatela hautaketa-prozesuaren fase guztietan, bai probak prestatzean, bai lehiaketaldian. Epaimahaikideei eskatzen zaien titulu-eskakizuna bete beharko dute pertsona horiek.
Epaimahaiak Osakidetzari kanpoko aholkularitza-erakundeetara jotzea eskatu ahal izango dio ere bai, probak prestatzeko eta oposizioaldian probekin zerikusia duten gai guztietarako. Horretarako, Osakidetzak behar diren neurriak jarriko ditu kanpo-erakunde aholkularien parte-hartzea gauzatzeko.
Probari idatziz erantzun beharko zaio, ematen den gehieneko denboraren barruan, eta galderak IV. eranskinean jasotako gaiei buruzkoak izango dira.
Halaber, proba prestatzeko bibliografia ere eranskin horretan jasoko da.
3.2.– Oinarri orokorretako 14. apartatuan zehaztutako puntuazio-hurrenkeraren araberako izangaien behin-behineko zerrenda argitaratu ondoren, I. eranskinean agertzen diren proposatutako izangaiek honako dokumentu hauen fotokopia konpultsatua aurkeztu beharko dute, 14.2. oinarrian zerrendatzen den dokumentazioaz gain:
– Hezkuntza eta Zientzia Ministerioak emandako Audioprotesiko Goi Mailako Teknikariaren tituluaren edo baliokidearen fotokopia konpultsatua edo notarioaren testigantza, lortu nahi den lanpostu funtzionalean aritzeko eskatzen dena, Osakidetza Ente Publikoaren lanpostu funtzionalak arautzen dituen uztailaren 19ko 186/2005 Dekretuaren I. eranskinean zehaztutakoa betez.
3.3.– Lehiaketaldia.
Egiaztatutako merezimenduak III. eranskineko merezimenduen baremoaren arabera balioztatuko dira, oinarri orokorretan ezarritako irizpideen arabera.
II. ERANSKINA
DESTINOEN ZERRENDA KATEGORIA HONETAN: AUDIOPROTESIKO TEKNIKARI ESPEZIALISTA
Osakidetzako zuzendari nagusiaren 1473/2021 Ebazpenaren bidez onartutako oinarri orokorretako 1. oinarrian xedatutakoaren arabera, destino hauek betetzeko deialdia egiten da:
Txanda askeko deialdia: 1 destino.
Sarbide orokorra: 1.
Erreserba-kupoa desgaitasunen bat duten pertsonentzat: 0.
– Adimen-desgaitasuna duten pertsonentzako kupoa: 0.
– Bestelako desgaitasunak dituzten pertsonentzako kupoa: 0.
Adimen-desgaitasuna duten langileentzako destinoak (adimen-desgaitasuna duten pertsonentzako kupoa) ez badira betetzen ez dagoelako hautaketa-prozesua gainditzen duen izangai nahikorik, destino horiek desgaitasunen bat duten langileentzako erreserba-kupoan gehituko dira (bestelako desgaitasunak dituzten pertsonentzako kupoa).
Desgaitasunen bat duten langileentzako destinoak ez badira betetzen ez dagoelako hautaketa-prozesua gainditzen duen izangai nahikorik, destino horiek dagokion txandako sarbide orokorreko lanpostuetan gehituko dira; hots, barne-sustapenean edo txanda irekian.
2. oinarrian ezarritakoaren arabera, deialdi honen xede diren zerbitzu sanitarioetako erakundeetako destinoak Osakidetzako zuzendari nagusiaren ebazpen bidez zehazten direnean zehaztuko dira. Ebazpen hori Osakidetzaren webgunean eta Euskal Herriko Agintaritzaren Aldizkarian argitaratuko da, aldizkari horretan Osakidetzako Lekualdatze-lehiaketa ireki eta iraunkorreko indarreko zikloko destinoen behin betiko esleipenaren ebazpena argitaratu ondoren.
III. ERANSKINA
MEREZIMENDUEN BAREMOA TEKNIKARI ESPEZIALISTA SANITARIOAK LANBIDE-TALDEKO AUDIOPROTESIKO TEKNIKARI ESPEZIALISTA KATEGORIAN, OSAKIDETZAKO ZERBITZU SANITARIOETAKO ERAKUNDEETAKO DESTINOETAN
1) Lan-esperientzia (gehienez, 60 puntu).
Eskabideak aurkezteko epearen azken egunera arte hautagaiei aitortu zaien zerbitzaldia hartuko da kontuan.
Zenbaketa osoa lan egindako egun naturaletan oinarrituko da, eta baztertu egingo dira hilabetetik beherako soberakinak. Horretarako, 30 egun naturaleko multzoa hartuko da hilabetetzat.
1.– Osakidetzako zerbitzu sanitarioetako erakundeetan, Gizarte Segurantzakoetan edo autonomia-erkidegoetako osasun-zerbitzuetan edo edozein administrazio publikotan edo Europar Batasuneko gainerako kideen sare publikoko zerbitzu sanitarioetan dagokion espezialitatean teknikari espezialista gisa emandako zerbitzuen hilabete bakoitzeko: 0,22 puntu.
Barne-sustapeneko txandaren bidez sartzen diren langileei ondoren zehazten den moduan zenbatuko zaizkie aldez aurreko zerbitzuak:
a) E taldean eskainitako zerbitzuak: 0,08 puntu hilabete bakoitzeko.
b) D taldean eskainitako zerbitzuak: 0,10 puntu hilabete bakoitzeko.
c) C taldean eskainitako zerbitzuak: 0,12 puntu hilabete bakoitzeko.
d) Lehiatzen den lanpostu berean emandako zerbitzuak: 0,22 puntu hilabete bakoitzeko.
Zerbitzu-eginkizunetan edo goragoko kategoriako eginkizunetan emandako zerbitzuak benetan betetako lanpostuan zenbatuko dira.
Halaber, jatorrizko lanpostuan zenbatuko dira zerbitzu berezietan emandako zerbitzuak.
2) Prestakuntza, irakaskuntza eta ikerketa (gehienez, 20 puntu).
Apartatu honetan, honako hauen arabera egiaztatzen den prestakuntza baloratuko da:
a) Graduaurreko prestakuntza:
Dagokion espezialitateko edo baliokideko goi-mailako teknikariaren ikasketetan ateratako ohorezko matrikula edo bikain bakoitzeko (honako ikasgai hauek ez dira kontuan hartuko: erlijioa, etika, prestakuntza politikoa, heziketa fisikoa eta hizkuntzak):
– ohorezko matrikula bakoitzeko: 0,6 puntu.
– bikain bakoitzeko: 0,4 puntu.
d) Etengabeko prestakuntza:
Eskatutako destinoaren kategoriarekin zerikusia duten ikastaroetara joateagatik:
– 9 ordura arte: 0,50 puntu.
– 10 eta 19 ordu bitartean: 1 puntu.
– 20 eta 29 ordu bitartean: 2 puntu.
– 30 eta 49 ordu bitartean: 3 puntu.
– 50 eta 99 ordu bitartean: 4 puntu.
– 100 eta 199 ordu bitartean: 5 puntu.
– 200 ordu edo gehiago: 6 puntu.
Ikastaroen egiaztagirian kreditu kopurua bakarrik jasota dagoenean, puntuazioa emateko baliokidetasun hau egingo da:
– Kredituen Europako Sistemaren (ECTS) 1 kreditu: 25 ordu.
– Etengabeko Prestakuntza Batzordeko 1 kreditu: 10 ordu.
Ikastaroaren ordu kopurua eta kreditu kopurua adierazten ez duten egiaztagirien kasuan, edo kredituak izan bai baina horiek aurreko paragrafoan zehaztutakoak ez direnean edo kredituen beste ordu-baliokidetasun bat ezartzen denean, epaimahaiak, aurkeztutako egiaztagiriak eta ikastaroaren edukia ikusita, dagokion puntuazioa emango du, eta kasu horretan ez du inolaz ere 0,50 puntu baino gutxiago emango.
Erakunde ofizialek, unibertsitateek, erakunde sanitarioek eta, hala badagokio, elkargo profesionalek eta elkarte zientifikoek egiaztatutako/akreditatutako ikastaroak balioztatuko dira, baita edozein administrazio publikok hitzartutako etengabeko prestakuntzako akordioen arabera egiaztatutako/akreditatutako ikastaroak ere, betiere titulu ofizial bat lortzeko ikasketa-plan baten barrukoak ez badira.
e) Irakaskuntza-jarduerak:
– Irakaskuntza, etengabeko prestakuntzako programa ofizialetan (ordu bakoitzeko): 0,050 puntu.
f) Jarduera zientifikoa eta ezagutzaren hedapena:
Eskatutako destinoko lanpostu funtzionalarekin zerikusia duten lan zientifikoak argitaratzearren, txostenak aurkeztearren, komunikazioak aurkeztearren, hitzaldiak ematearren edo mahai-inguruetan parte hartzearren:
– Txosten bakoitzeko: 2 puntu.
– Ahozko komunikazio/poster bakoitzeko: 1 puntu.
– Mahai-inguru bakoitzeko: 1 puntu.
– Argitalpen bakoitzeko (lehenengo egilea): 2 puntu.
– Argitalpen bakoitzeko (beste egile batzuk): 1 puntu.
Ez da baloratuko apartatu honetan zehaztu ez den merezimendurik.
h) Informatikako ezagutzak (gehienez, 2 puntu).
3) Euskara:
– 2. HE: 18 puntu.
– 1. HE: 9 puntu.
IV. ERANSKINA
AUDIOPROTESIKO TEKNIKARI ESPEZIALISTA
I.– GAI-ZERRENDA OROKORRA
1.– Entzumeneko ezaugarri anatomosentsorialak. Hipoakusia duen erabiltzailearen preskripzio fakultatiboaren interpretazioa. Anatomofisiologia orokorra. Entzumen-galerarekin edo egokitzapen protesikoarekin lotutako patologia orokorra. Entzumen- eta bestibulu-aparatuaren anatomia eta patologia. Entzumenaren nerbio-sistemaren eta orekaren funtzionamendua. Entzumen-aparatuaren patologiak.
2.– Entzumen-miaketak eta -probak egitea helduei. Miaketa egiteko tresnak. Otoigorpen akustikoen ekipoa. Entzumeneko potentzial ebokatuen ekipoa. Audiometroa. Inpedantziometroa. Kabina audiometrikoa. Eremu libreko aretoa. Otoskopia. Akumetria. Audiometria tonal liminarra. Maskaratzeko teknikak. Audiometria supraliminarra. Logoaudiometria. Maskaratzeko teknikak. Proba psikoakustikoak. Inpedantziometria, inpedantzia, konpliantzia, suszeptantzia eta admitantzia. Entzumeneko potentzial ebokatuak. Otoigorpen akustikoak. Proba bestibularrak.
3.– Haurren entzumeneko azterketak egitea. Audiometria jolas bidezko eta ikus-errefortzuarekin. Entzumeneko screeningeko probak. Baldintzatu gabeko erreflexuak. Proba objektiboak egitea. Haurren anatomiako elementu bereizleak. Txostenak egitea. Haurraren garapen kognitiboaren ezaugarri fisikoak. Haur-baldintzapeneko eta ikus-errefortzuko berariazko tresneria.
4.– Entzumen-galerak zuzentzeko aukerak dauden erabakitzea. Entzumen-galera motak. Entzumen-urritasunen sailkapena. Entzumen-galera mota bakoitzaren patroi audiologikoak. Entzumen-zuzenketako pronostikoak galera-mota bakoitzerako. Proba audiologikoen integrazioa. Grafiko audiometrikoak.
5.– Audiofonoa konpontzea eta entzumen-tekniken laguntzak. Protesiak. Protesi-motak. Protesien osagaiak: sarrera-transduktoreak, anplifikazio- eta kontrol-blokea, irteera-transduktorea eta kontrol-elementuak. Matxuren detekzioa eta arrazoiak. Osagaiak aldatzea. Entzumen-protesiak eta laguntza teknikoak konpontzeko teknikak. Funtzionamendua egiaztatzea. Laneko segurtasun eta osasunari buruzko araudia.
6.– Akustika eta soinu-babesaren elementuak. Soinuaren parametro fisikoak neurtzea: bibrazioen analisia Mugimendu harmoniko sinpleak. Ondulazio-mugimendua. Maila akustikoak. Uhin geldikorrak. Iragazki akustikoak. Soinu-eremuko aretoen diseinua: soinu-eremuko areto audiometrikoen ezaugarri akustikoak. Araudia. Areto baten zuzenketa akustikoa. Areto audiometrikoak: ezaugarri fisikoak eta akustikoak. Kalibrazioa.
7.– Entzumen-moldeak eta -babesak egitea. Kontramoldea egitea: material motak, ekipoa, prozesua eta teknikak. Egokigailu anatomikoak eta entzumen-babesak egitea.
8.– Entzumen-protesiak hautatzea eta egokitzea. Ezarri ezin daitezkeen entzumen-protesiak. Ezaugarri teknikoak eta efektu akustikoak. Ezarri ezin daitekeen entzumen-protesia egokitzea. Ekipoak eta aplikazio informatikoak. Ezarritako entzumen-protesien erregulazioa. Ezarri daitezkeen entzumen-protesiak. Egokitzapen protesikoaren emaitza baieztatzea: baieztapen subjektiboko probak haurrekin eta helduekin. Baieztapen objektiboko proba. Erabiltzailearen asebetetzearen ebaluazioa: haurrak ebaluatzeko eskalak. Helduak ebaluatzeko eskala espezifikoak.
9.– Hipoakustikoaren arreta. Jarrera eta egoera emozionalak detektatzea entzumen-galeran: entzumen-galeraren ondorio psikologikoak paziente gorrarekiko komunikazioan. Gor dagoen pazientearekiko komunikazioa. Audioprotesistaren komunikazio-gaitasunak. Entzumen-galeraren errehabilitazioko diziplina-arteko ekipoetan esku-hartzea: errehabilitazioa, gaikuntza eta desgaitasuna. Audioprotesistaren funtzioa errehabilitazioan. Profesionalen arteko komunikazioa.
Audioprotesikoen txostenen protokoloak helduentzat eta haurrentzat. Txostenak idaztea. Sekretu profesionala.
10.– Entzumena eta hitzezko komunikazioa. Fonazio-aparatuaren osagaiak ezagutzea: laringearen anatomia. Laringearen fisiologia. Aparatu fonoartikularraren anatomia eta fisiologia. Ahotsaren ekoizpenaren teoriak. Artikulazio-organoak. Ahots-korden ekintza. Ahotsaren ezaugarri akustikoak. Mingainaren egitura-elementuen deskribapena. Hizkuntza eta komunikazioa. Zeinu linguistikoaren ezaugarriak. Hizkuntzaren garapenaren identifikazioa hipoakusia duen haurrarengan.
II.– GAI-ZERRENDA KOMUNA
1.– Euskadiko Antolamendu Sanitarioaren Legearen Xedapen Orokorrak. Euskadiko osasun-sistema: antolamendua eta herritarren eskubide eta betebeharrak.
2.– Osakidetza Ente Publikoaren definizioa. Xedeak. Zuzendaritza-antolakuntza: zerrendatzea. Zuzendaritza Nagusia: eraketa. Zerbitzu-erakundeak: lege-aitorpena.
3.– Pertsonen eskubideak eta betebeharrak Euskadiko osasun-sisteman.
4.– Eusko Legebiltzarraren 7/2002 Legea, abenduaren 12koa, osasun arloko aurretiazko borondateena.
5.– 3/2018 Lege Organikoa, abenduaren 5ekoa, Datu Pertsonalak Babestekoa eta Eskubide Digitalak Bermatzekoa. Datuak babestearen printzipioak.
6.– Emakumeen eta Gizonen Berdintasunerako Legearen xedea. Printzipio orokorrak. Jazarpen sexista.
7.– Marko Estrategikoa. Osasun Saila. 2021-2024.
8.– Osasun Plana. Euskadiko Osasun Politikak 2013-2020.
9.– Pazientearen Segurtasun Estrategia Osakidetzan 20 20.
10.– Arreta Soziosanitarioko Lehentasun Estrategikoak 2017-2020.
11.– Osakidetzan euskararen erabilera normalizatzeko jardun-eremuak eta neurriak: Osakidetzan euskararen erabilera normalizatzeko 2. Planeko (2013-2019) Irudia eta Komunikazioa eta Kanpo-harremanak.
GAI-ZERRENDA OROKORRAREN BIBLIOGRAFIA
1.– Tratado de audiología. E. Salesa. Elsevier. 2. edizioa. 2013.
2.– Audiología. Teoría y práctica. Antonio Angulo. Egea argitaletxea. 2017.
3.– Atención al hipoacúsico. D. León. Síntesis argitaletxea.
4.– Elección y adaptación de prótesis auditivas. R. Torrejón. Síntesis argitaletxea.
5.– Acústica y sistemas de sonido. Miyara, F. 2010.
6.– Otoplástica. Elaboración de moldes y protectores auditivos. Reyes, Alberto. 2014. Gami argitaletxea.
7.– 41/2002 Oinarrizko Legea, azaroaren 14koa, pazientearen autonomiari eta informazio eta dokumentazio klinikoaren arloko eskubide eta betebeharrei dagokiena.
8.– 147/2015 Dekretua. Osakidetzako pazienteen eta erabiltzaileen eskubideei eta betebeharrei buruzko adierazpena.
GAI-ZERRENDA KOMUNAREN BIBLIOGRAFIA
1.– 8/1997 Legea, ekainaren 26koa, Euskadiko Antolamendu Sanitarioari buruzkoa (1., 2., 3., 4., 5., 6., 7., 8., 9., 10. eta 11. artikuluak).
2.– 255/1997 Dekretua, azaroaren 11koa, Osakidetza Ente Publikoaren Estatutu Sozialak ezartzen dituena (1., 3., 6., 9. eta 13. artikuluak).
3.– 147/2015 Dekretua, uztailaren 21ekoa, Euskadiko osasun-sisteman pertsonen Eskubideei eta Betebeharrei buruzko Adierazpena onartzen duena (1., 2., 3., 4., 5., 6., 7., 8., 9., 10., 11., 12., 13., 14., 15., 16., 17., 18., 19., 20. eta 21. artikuluak).
4.– Eusko Legebiltzarraren 7/2002 Legea, abenduaren 12koa, osasun arloko aurretiazko borondateena (1., 2., 3., 4., 5., 6. eta 7. artikuluak).
5.– 3/2018 Lege Organikoa, abenduaren 5ekoa, Datu Pertsonalak Babestekoa eta Eskubide Digitalak Bermatzekoa (4., 5., 6., 7., 8., 9., 10. eta 11. artikuluak).
6.– 4/2005 Legea, otsailaren 18koa, Emakumeen eta Gizonen Berdintasunerakoa (1., 3. eta 43. artikuluak).
7.– Marko Estrategikoa. Osasun Saila. 2021-2024.
8.– Osasun Plana. Euskadiko Osasun Politikak 2013-2020.
9.– Pazientearen Segurtasun Estrategia Osakidetzan 20 20.
10.– Arreta Soziosanitarioko Lehentasun Estrategikoak 2017-2020.
11.– Osakidetzan Euskararen erabilera normalizatzeko II. Plana 2013-2019.
