Euskal Herriko Agintaritzaren Aldizkaria

209. zk., 2021eko urriaren 20a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

EUSKADIKO KIROL PORTUAK

5351

EBAZPENA, 2021eko urriaren 15ekoa, Euskadiko Kirol Portuak-eko zuzendariarena, zeinaren bidez jakinarazten baita 2021eko urriaren 13ko Agindua, Ekonomiaren Garapen, Jasangarritasun eta Ingurumeneko sailburuarena, 2021eko irailaren 1eko Ebazpenaren aurka jarritako gora jotzeko errekurtsoa ebazten duena. Ebazpen horrek Donostiako kirol-dartsenako amarralekuen deialdia ebazten du eta prozedura ebazteko epea luzatzen du.

Euskadiko Kirol Portuetako zuzendariaren 2021eko martxoaren 29ko Ebazpenaren bidez, hasiera eman zaio Donostiako kirol-dartsenan 7. zerrendako laketontzientzako amarralekuak erabiltzeko emakidak esleitzeko prozedurari. Deialdi publikoa denez, ebazpena 2021eko apirilaren 20ko Euskal Herriko Agintaritzaren Aldizkarian argitaratu da (76. zenbakia).

Deialdiaren helburua 7. zerrendako laketontzientzako amarralekuak erabiltzeko baimena ematea da.

Aplikatzekoa den prozedura Ekonomiaren Garapeneko eta Azpiegituretako sailburuaren 2017ko urriaren 19ko Aginduan jasotakoa da. Agindu horren bidez, aisia-ontzien titularrek amarralekuak erabiltzeko emakiden araubidea eta emateko prozedura arautzen dira (aurrerantzean, amarralekuei buruzko Agindua), bai eta Euskadiko Kirol Portuen zuzendariaren 2021eko martxoaren 29ko Ebazpenaren bidez onartutako deialdiaren oinarrietan ezarritakoa ere.

Euskadiko Kirol Portuetako zuzendariaren 2021eko irailaren 1eko Ebazpenaren bidez, Donostiako kirol-dartsenan 7. zerrendako ontzientzako amarralekuak emateko deialdia ebatzi da. Deialdi publikoa denez, ebazpena 2021eko irailaren 23ko Euskal Herriko Agintaritzaren Aldizkarian argitaratu da (191. zenbakia).

Ebazpen honek ez dio amaiera ematen administrazio-bideari, eta, 2021eko irailaren 1eko Ebazpenaren zortzigarren puntuan ezarritakoaren arabera, gora jotzeko errekurtsoa aurkez dakioke Ekonomiaren Garapen, Jasangarritasun eta Ingurumeneko sailburuari edo ebazpena eman duenari, hilabeteko epean, ebazpen hau argitaratu eta hurrengo egunetik aurrera.

2021eko irailaren 30ean, Eusko Jaurlaritzaren Erregistro Elektronikoan gora jotzeko errekurtsoa aurkeztu zuen Donostiako Kirol Dartsenan amarralekuen deialdia ebazten duen 2021eko irailaren 1eko Ebazpenaren aurka. Bertan, Donostiako portuan amarralekuen esleipena bertan behera uzteko eskatzen zen, deialdi honen oinarrietan ezarritakoa ez betetzeagatik eta berriz eskatzeagatik.

Urriaren 13an, Ekonomiaren Garapen, Jasangarritasun eta Ingurumeneko sailburuaren Aginduak gora jotzeko errekurtso hau ebatzi zuen 2021eko irailaren 1eko Ebazpenaren aurka, eta honako hau xedatu zuen:

1.– Aurkeztutako gora jotzeko errekurtsoa baiestea eta, ondorioz, errekurritutako ebazpena deuseztatzea.

2.– Agindu hau interesdunari jakinaraztea.

3.– Agindu hau Euskadiko Kirol Portuei jakinaraztea, xedaturikoa betez, deuseztatu egin dezan Euskadiko Kirol Portuak-eko zuzendariaren 2021eko irailaren 1eko Ebazpena, Donostiako kirol-dartsenan 7. zerrendan dauden laketontzientzako amarralekuak emateko deialdia ebazten duena.

Hauek dira Ekonomiaren Garapen, Jasangarritasun eta Ingurumeneko sailburuaren 2021eko urriaren 13ko Aginduak Euskadiko Kirol Portuetako zuzendariaren 2021eko irailaren 1eko Ebazpenaren aurka jarritako gora jotzeko errekurtsoaren ebazpenean errekurtso hori baiesteko eta Euskadiko Kirol Portuetako zuzendariaren 2021eko irailaren 1eko Ebazpena baliogabetzeko arrazoiak:

– Egiaztatu da eskabide batzuk ez direla agertu bazterketen zerrendan, esleipenen zerrendan, eta ez direla sartu dagozkien kategorietako itxaron-zerrendetan.

– Oker definitu dira amarraleku jakin batzuk, kategoria guztiei eragiten dietenak.

– Kategoria guztiei eragiten dieten eskabide batzuk gaizki kategorizatu dira.

– Aurrekoagatik, prozesu osoa berrikustea eskatzen duten akats orokorrak egon direla adierazten da.

Euskal Autonomia Erkidegoko Portuei eta Itsas Garraioari buruzko ekainaren 28ko 2/2018 Legearen 24. artikuluak Euskadiko Kirol Portuen xedea ezartzen du, eta, besteak beste, jasotzen du erabilera nautiko-aisialdiko portuen eta horiei lotutako erabilera-eremuen kudeaketa integrala dela Jaurlaritzak atxikitzen diona. Ildo beretik doa maiatzaren 12ko 58/2020 Dekretuaren bidez onartutako estatutuen 5. artikulua.

Era berean, Euskadiko Kirol Portuak erakundeari bere eginkizunak garatzeko behar dituen baliabideak atxikitzen dizkion maiatzaren 12ko 59/2020 Dekretuaren 1. artikuluak erakundeari esleitzen dio hainbat portutako kirol-portuen zerbitzu publikoaren kudeaketa, besteak beste, Donostiako kirol-portuarena. Beraz, Euskadiko Kirol Portuei dagokie Donostiako kirol-portuari dagokion portuko jabari publikoa kudeatzea, eta, horrekin batera, amarralekuak erabiltzeko emakidak esleitzea.

Horren arabera, maiatzaren 12ko 58/2020 Dekretuaren bidez onartutako Euskadiko Kirol Portuen estatutuetako 15-2 o) artikuluak zuzendaritza honi ematen dizkion ahalmenez baliatuz, honako hau

EBAZTEN DUT:

Lehenengoa.– Donostiako kirol-dartsenan 7. zerrendako laketontzientzako amarralekuak emateko deialdia ebazten duen Euskadiko Kirol Portuak-eko zuzendariaren 2021eko irailaren 1eko Ebazpena baliogabetzat jotzea.

Bigarrena.– 2021eko irailaren 1eko Ebazpenaren deuseztapena jakinaraztea Donostiako kirol-dartsenan 7. zerrendako laketontzientzako amarralekuak erabiltzeko emakidak esleitzeko prozeduran parte hartu eta interesa duten guztiei.

Hirugarrena.– Donostiako kirol-dartsenako amarralekuen esleipen berria egitea.

Laugarrena.– Aipatutako ondorioetarako, aisia-ontzien titularrek amarralekuak erabiltzeko emakiden araubidea eta emateko prozedura arautzen dituen Ekonomiaren Garapeneko eta Azpiegituretako sailburuaren 2017ko urriaren 19ko Aginduaren 15.5 artikuluan ezarritako epea luzatzea, 3 hilabetean, ebazpen hau Euskal Herriko Agintaritzaren Aldizkarian argitaratu eta hurrengo egunetik aurrera.

Bosgarrena.– Administrazio-bidea amaitzen duen ebazpen honen aurka administrazioarekiko auzi-errekurtsoa aurkez daiteke Euskal Autonomia Erkidegoko Auzitegi Nagusian, bi hilabeteko epean, ebazpen hau argitaratu eta hurrengo egunetik aurrera.

Seigarrena.– Ebazpen honek Euskal Herriko Agintaritzaren Aldizkarian argitaratu eta hurrengo egunetik aurrera izango ditu ondorioak.

Vitoria-Gasteiz, 2021eko urriaren 15a.

Euskadiko Kirol Portuak-eko zuzendaria,

EDURNE EGAÑA MANTEROLA.

Azterketa dokumentala