![Euskal Herriko Agintaritzaren Aldizkaria](/appcont/servibopvi/images/bopv_anuncio_e.png)
199. zk., 2019ko urriaren 18a, ostirala
- Bestelako formatuak:
- PDF (271 KB - 3 orri.)
- EPUB (242 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
AGINTARIAK ETA LANGILERIA
Oposaketak eta lehiaketak
LAN ETA JUSTIZIA SAILA
4825
EBAZPENA, 2019ko irailaren 30ekoa, Justizia Administrazioko zuzendariarena, zeinaren bidez iragartzen baita Euskal Autonomia Erkidegoko Bulego Fiskalean «Goi-kargudunaren idazkariaren» lanpostu bat izendapen askeko sistema erabiliz betetzeko deialdi publikoa.
Euskal Autonomia Erkidegoko Bulego Fiskalean, hutsik dago goi-kargudunaren idazkariaren lanpostu bat (lanpostua: 580012; dotazioa: 1). Hori dela-eta, Justizia Administrazioaren zerbitzuko langile funtzionarioen sarrerari, lanpostuak betetzeari eta lanbide-sustapenari buruzko Erregelamendua onartzen duen 1451/2005 Errege Dekretuaren 57. artikuluan ezarritakoarekin bat etorriz, aditzera ematen da lanpostu hori izendapen askearen sistemaren bidez betetzeko deialdia. Lanpostu horretan, eginkizun hauek bete beharko dira: kudeaketan lagundu eta agendez arduratzea; dokumentuak transkribatzea; bilerak, bidaiak eta joan-etorriak antolatu eta prestatzea; eta, oro har, laguntza ematea EAEko fiskal gorenari, beste edozein egiteko edo zeregin betetzen. Bestalde, lanpostu horren izena, kokalekua eta ordainsariak ebazpen honen eranskinean daude zehaztuta.
OINARRIAK
Lehenengoa.– Parte hartzeko baldintzak.
Izapidetze Prozesal eta Administratiboko Kidegoko karrerako funtzionarioek eskatu ahal izango dute deialdi honetako lanpostua, baldin eta, eskabideak aurkezteko epea bukatzen den unean, jarduneko zerbitzuan edo lanpostua gordetzea dakarren beste edozein egoeratan badaude.
Bigarrena.– Eskabideak.
Eskabideak aurkezteko, interesdunek hamar egun naturaleko epea izango dute, ebazpen hau Euskal Herriko Agintaritzaren Aldizkarian edo Estatuko Aldizkari Ofizialean argitaratu eta hurrengo egunetik aurrera. Eskabideetan, datu pertsonalak eta gaur egun betetzen duten lanpostua adieraziko dituzte. Ebazpena BOEn eta EHAAn aldi berean argitaratzerik ez badago, Estatuko Aldizkari Ofizialean argitaratu eta hurrengo egunean hasiko da epea.
Eskabideak Justizia Administrazioko zuzendariari zuzendu behar zaizkio eta Vitoria-Gasteizko, Donostiako edo Bilboko EATetako sarrera-erregistroetan, Eusko Jaurlaritzako Lan eta Justizia Saileko Erregistro Nagusian (Donostia kalea 1, 01010 Vitoria-Gasteiz) edo indarrean dagoen administrazio-prozeduraren arautegiak ezarritako moduan aurkeztu behar dira.
Eskabidearekin batera, curriculum vitae bat aurkeztu beharko dute, eskatzen diren betekizunen eta azaldutako merezimenduen egiaztagirien fotokopia konpultsatuez gain. Curriculum vitaean hauek adieraziko dira:
a) Titulu akademikoak.
b) Zer lanpostu bete diren, bai Administrazioan, bai enpresa pribatuan.
c) Egindako ikasketak eta ikastaroak, argitaratutako lan zientifikoak, aurkeztutako txostenak, hizkuntzak, eta hautagaiek egoki iritzitako gainerako merezimenduak.
Hirugarrena.– Ebazpena eta destinoa esleitzea.
1.– Justizia Administrazioaren zerbitzuko langile funtzionarioen sarrerari, lanpostuak betetzeari eta lanbide-sustapenari buruzko Erregelamendua onartzen duen abenduaren 7ko 1451/2005 Errege Dekretuaren 59. artikuluan ezarritakoarekin bat etorriz, izendapena egin ahal izateko, lanpostu-zerrendetan lanpostuak daukan arduradunak txostena egin behar du, aurrez.
2.– Deialdi hau Justizia Administrazioko zuzendariaren ebazpen baten bidez ebatziko da. Euskal Herriko Agintaritzaren Aldizkarian eta Estatuko Aldizkari Ofizialean argitaratuko da, gehienez ere bi hileko epean eskabideak aurkezteko epea amaitu eta hurrengo egunetik aurrera. Epea luzatu ahal izango da, salbuespenez, hilabetez gehien jota. Ebazpena BOEn eta EHAAn aldi berean argitaratzerik ez badago, Estatuko Aldizkari Ofizialean argitaratu eta hurrengo egunean hasiko da epea.
3.– Izendatutako hautagaia destino berriaz jabetzeko, Justizia Administrazioaren zerbitzupeko funtzionarioen sarrerari, Justizia Administrazioaren zerbitzuko langile funtzionarioen lanpostuak betetzeari eta lanbide-sustapenari buruzko Erregelamenduaren 52. artikuluan xedatutakoa bete beharko da. Destinoaz jabetu aurretik, interesdunak modu frogagarrian adierazi beharko du ez dagoela araudian ezarritako bateraezintasun-egoera bakar batean ere.
4.– Izendapena egin zuen agintariak berak modu diskrezional batean kendu dezake lanpostutik izendatutakoa. Izendatutakoak ere uko egin diezaioke lanpostuari, eskabide arrazoitu baten bidez egin ere, betiere lanpostuan gutxienez urtebetez jardun ostean. Eskabidean, bestalde, ukoaren arrazoi profesional eta pertsonalak adierazi beharko ditu. Lanpostutik kendu den edo lanpostuari uko egin dion funtzionarioa, behin betiko beste lanpostu bat lortu bitartean, behin-behinean atxikiko zaio bere kidegoko beste lanpostu bati, udalerri berean. Atxikitze horrek kargugabetze-ebazpena edo ukoa onartzekoa eman eta hurrengo egunetik aurrera izango ditu ondorioak. Lanpostutik kendu den edo lanpostuari uko egin dion funtzionarioak lehentasuna izango du, jardunean aritzen zen herriko lanpostu generikoak betetzeko, lehiaketara deitzen diren lehenengo aldian; gainera, herri horretan deitutako lanpostu guztiak eskatu beharko ditu. Lehiaketa horretan parte hartu ezean, edo lanposturik lortu ezean, behin betiko esleituko zaio esleitu gabeko edozein lanpostu.
Laugarrena.– Errekurtsoak.
Ebazpen honek ez dio amaiera ematen administrazio-bideari. Honen aurka, gora jotzeko errekurtsoa jar dakioke Justiziako sailburuordeari hilabeteko epean, ebazpena Estatuko Aldizkari Ofizialean argitaratu eta hurrengo egunetik aurrera.
Gora jotzeko errekurtsoa ezarri zenetik hiru hilabete igaro badira, eta ebazpenik eman ez bada, ezetsitakotzat joko da, eta administrazioarekiko auzietako bidea zabalik geratuko da.
Vitoria-Gasteiz, 2019ko irailaren 30a.
Justizia Administrazioko zuzendaria,
MARÍA ISABEL GABRIEL BELLIDO.