Euskal Herriko Agintaritzaren Aldizkaria

107. zk., 2018ko ekainaren 5a, asteartea

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

XEDAPEN OROKORRAK

GIPUZKOAKO FORU ALDUNDIA

2926

1/2018 FORU ARAUA, maiatzaren 10ekoa, zerga arau batzuetan aldaketak sartzen dituena.

Gipuzkoako diputatu nagusiak,

Jakinarazten dut Gipuzkoako Batzar Nagusiek onartu dutela «1/2018 Foru Araua, maiatzaren 10ekoa, zerga arau batzuetan aldaketak sartzen dituena»; eta nik aldarrikatu eta argitara dadin agintzen dut, aplikagarria zaien herritar guztiek, partikularrek nahiz agintariek, bete eta betearazi dezaten.

Donostia, 2018ko maiatzaren 10a.

Diputatu nagusia,

HITZAURREA

Dagoeneko lau urte igaro dira zuzeneko zergen eredu berria Gipuzkoan indarrean jarri eta 2014ko ekitalditik aplikatzen denetik, batik bat errenta zergan, sozietateen gaineko zergan eta ez-egoiliarren errentaren gaineko zergan zentratuta. Erreforma horren emaitzak aztertu ondoren, eta kontuan izanik zein den lurraldeak gaur egun bizi duen testuinguru ekonomikoa, jarduera ekonomikoa indarra hartzen hasita dagoela atzematen baita, egokitzat jo da aldaketak sartzea zenbait figura tributariotan, fiskalitateak ekonomiaren suspertze horretan lagundu dezan, inoiz ere ahaztu gabe beharrezkoa dela behar besteko finantza baliabideak izatea gaurko ongizatearen estatuaren gastuei eta zerbitzu publikoei eusteko. Hori guztia garai batean jarritako helburuak betetzeko egiten da: Gipuzkoa modernoago, solidarioago, jasangarriago eta lehiakorrago bat lortzea, zerga sistema justuago, progresiboago eta efizienteago bat dela medio.

Hortaz, foru arau honen xedea da gure lurraldeko jarduera ekonomikoa suspertzen eta enpresa-sarea indartzen laguntzea, eta, era horretan, aberastasunaren eta enpleguaren sorrera bultzatzea, inbertsiorako erakargarriak diren neurriak ezarriz, start-up enpresetarako batik bat, betiere jarduera ekintzailea sustatzeko eta enpresa proiektu berriak gauzatzea errazteko. Gorago adierazi bezala, hori guztia egin nahi da kontuan izanik zergapetze mailak behar den zerga-bilketa ziurtatu behar duela zerbitzu publikoek dakartzaten konpromisoei aurre egiteko.

Era berean, foru arau honen bidez jarraitu nahi da zerga araudia egokitzen Euskal Zuzenbide Zibilaren Legean xedatutakora, eta neurriak ezarri nahi dira zerga elusioari, zerga oinarrien higadurari eta mozkin enpresarialen lekualdaketa maltzurrari buruzko zerga esparruko obligazioak bete daitezen. Esparru hori nazioarteko foroetan bultzatua da, ELGAn eta Europar Batasunean, esate baterako.

Foru arauak bi titulu ditu, bi xedapen iragankor, xedapen indargabetzaile bat, eta azken xedapen bat. Azpimarratzekoa da bi tituluetan hainbat figura tributario aldatzen direla, eta, zenbait kasutan, figura horiek bietan agertzen direla: II. tituluak zerga araudia Euskal Zuzenbide Zibilari buruzko ekainaren 25eko 5/2015 Legera egokitzeko aldaketak biltzen ditu, eta I. tituluan, berriz, gainerako aldaketak jasotzen dira.

I. tituluan pertsona fisikoen errentaren gaineko zerga, sozietateen gaineko zerga, kooperatiben araubide fiskala, eta ondare eskualdaketen eta egintza juridiko dokumentatuen gaineko zerga aldatzen dira, baita Zergen Foru Arau Orokorra ere.

Pertsona fisikoen errentaren gaineko zergan, arau aipamen batzuk eguneratzeaz gainera, jarraian zerrendatzen diren aldaketak nabarmentzen dira.

Lekualdatutako langileen araubidea, orain arte 4. artikuluan jasotzen zena (zerga derrigorrez ordaintzeko kasu bereziei buruzkoan), tokiz aldatu eta 56 bis artikulu berrian arautzen da orain, IV. tituluko VI bis kapitulu berriaren barruan. Aldaketa horrekin, zabaldu egiten da araubidearen aplikazio eremua, orain ezartzen baita araubidea aplikagarria izango dela Gipuzkoako lurraldera lekualdatzeko arrazoia ikerketa eta garapen jarduerak egitea ez ezik –orain arte bezala– jarduera zientifiko, tekniko edo finantzarioak ere egitea denean. Araubidea ere aldatzen da, arauan bertan tributazio erregela nagusiak berariaz ezartzeko. Erregela horien artean, nabarmentzekoa da 100eko 15eko salbuespena aplikatzen dela lekualdaketa eragiten duen lan harremanetik ondorioztatzen diren etekin osoetarako.

Errenta salbuetsien artean, Gizarte Segurantzak aitortu eta salbuetsita dauden familia prestazioen barruan sartzen dira funtzionario publikoek lanaldia murrizteagatik jasotzen dituzten ordainsariak, murrizketa hori minbiziak edo beste gaixotasun larri batek ukitutako seme-alaba adingabeak zaintzeko eskatzen denean. Gizarte Segurantzak kontzeptu horregatik aitortzen duen prestazioaren gehieneko zenbatekoa izango da beti muga. Horrez gain, aitatasun prestazioei amatasun prestazioetarako araututa dagoen salbuespen bera aitortzen zaie. Zabaldu egiten da eskola adineko kirolarientzako jarduerak egitean edo lurraldeko kirol federazioen jarduerak egitean eginkizun jakin batzuk betetzeagatik jasotako etekinen salbuespena, errenta salbuetsien artean sartu baitira Euskal Autonomia Erkidegoko kirol federazioen jarduerak. Azkenik, doikuntza teknikoak sartzen dira langileak kaleratu edo kargugabetzeagatik ematen diren kalte-ordainen salbuespenean, araudira egiten diren igorpenak eguneratzeko eta dagoeneko desagertu diren ordezkotza-kontratuei buruzko aipamenak ezabatzeko.

Aldatu egiten dira kapital higiezinaren etekin garbia zehazteko erregelak, Errentamendu Hiritarren azaroaren 24ko 29/1994 Legearen 2. artikuluan etxebizitza errentamendutzat hartutakoetatik eratorritakoez besteko etxebizitzetatik datozen etekinei buruzkoak. Izan ere, orain arte, etekin garbia kalkulatzeko, diru sarreretatik beharrezko gastuak eta erabilpenaren edo denboraren poderioz eragindako narriaduraren zenbatekoa kendu behar zen. Aurrerantzean, berriz, 29/1994 Legearen 2. artikuluan aipatutako etxebizitzetatik eratorriak diren etekinen modu berean kalkulatuko dira. Dena den, horrela kalkulatu den etekin garbiak zergaren zerga oinarri orokorrean konputatzen jarraituko du, errenta orokortzat hartzen jarraituko baita.

Hamabostetik hogeita hamar urtera zabaltzen da jarduera ekonomikoetatik datozen etekinen saldo negatiboa iturri bereko saldo positiboekin konpentsatzeko epea, sozietateen gaineko zergan zerga oinarri negatiboak konpentsatzeko epe berriarekin bat eginez.

Desgaitasunaren edo mendetasunaren kenkarian, orain ez zaio aipurik egiten odolkidetasunari egoitzetan bizi diren pertsonekiko ahaidetasuna aipatzen denean, eta horren helburua da kenkariaren arauketan familia harremanei buruzko erreferentziak homogeneizatzea eta nahasketak ez sortzea. Gainera, desgaitua edo mendeko pertsona zergadunarekin lotuta badago entitate publiko eskudunaren aurrean formalizatutako tutoretza edo harrera arrazoiak direla medio, argitzen da kenkaria aplikatzeko nahitaezkoa dela artikuluan jasota dauden baldintza guztiak betetzea, eta ez, soil-soilik, desgaitasuna edo mendetasuna duen pertsonaren errenta mailari dagokiona.

Aldatu egiten da 30 urtetik beherako zergadunek ohiko etxebizitza errentan hartzeagatik ezarritako kenkaria, aurrerantzean 100eko 25etik 30era igoko baita; era berean, kenkari muga 2.000 eurotik 2.400 eurora igotzen da.

Jarduera ekonomikoen etekinen saldo negatiboaren konpentsazioan bezala, hamabostetik hogeita hamar urtera zabaltzen da inbertsioengatik eta beste jarduera batzuengatik ezarritako kenkariak aplikatzeko epea, sozietateen gaineko zergan kuota nahikoa ez izateagatik aplikatu gabeko kenkariak egiteko epe berriarekin bat eginez.

Enpresa berrietan edo sortu berrietan inbertitzeagatik aplikatzen den kenkarian, ahalbidetzen da inbertsiogileak bere ezagutza enpresarial edo profesionalak jartzea zergadunaren eta entitatearen arteko akordioarekin inolako loturarik eduki gabe; sorrera berriko enpresaren kontzeptua birdefinitzen da, hiru urtetik bost urtera zabaltzen baita aintzat hartzen den denbora tartea; eta, azkenik, erregela bat ezartzen da inbertsioaren pizgarriak ez daitezen bateragarriak izan inbertsiogilearen eta entitate partaidetuaren artean egon daitekeen beste harreman ordaindu batekin, izan entitate hori laborala izan merkataritzakoa, salbuespen batzuk eginda.

Kenkari berri bat sortzen da hazkunde ahalmen handiko entitateak finantzatzeagatik aplikatzeko. Mikroenpresak edo enpresa txiki edo ertainak diren eta merkatu antolatuetan negoziatzen ez diren entitateak finantzatzea hobaritzen da haren bidez. Kenkari horren barruan bi motatako inbertsioak hobaritzen dira, betiere baldin eta zergadunak ez badu aldez aurretik parte hartu inbertsioa jasotzen duen entitatean:

– Batetik, kenkari bat aplikatzen da sorrera berriko entitate berritzaileen akzio edo partaidetzak lehen mailako merkatuan harpidetzeagatik, eta kenkari hori zergaldian zehar dirutan ordaindutako kopuruen 100eko 30ekoa izango da. Ondorio horietarako, entitate bat berritzailetzat hartzen da produktu, zerbitzu edo prozesu berriak edo hobetuak garatu behar dituenean, porrot teknologiko edo industrialaren arriskua inplizitua duela, edo akzio edo partaidetzak harpidetu aurreko hiru zergaldietako batean behintzat, ikerketa eta garapen jarduerak eta berrikuntza teknologikokoak egiteak eragin dizkion gastu eta inbertsioak gutxienez ustiapen gastu guztien 100eko 10 direnean. Bestetik, entitate bat sorrera berrikotzat hartzen da zergadunak entitatearen akzioak edo partaidetzak harpidetu aurreko bost urteen barruan eratu denean. Pizgarri hau start-up enpresei zuzenduta dago.

– Bestetik, kenkari bat aplikatzen da hazkunde prozesuan dauden entitateen akzio edo partaidetzak lehen mailako merkatuan harpidetzeagatik, eta kenkari hori zergaldian zehar dirutan ordaindutako kopuruen 100eko 15ekoa izango da. Ondorio horietarako, ulertzen da entitate bat hazkunde prozesuan dagoela, merkatu geografiko berri batean edo produktu merkatu batean sartzeko negozio plan bat behin prestatu duenean eta arriskuaren finantzaketari aurre egiteko behar duen hasierako inbertsioak urteko eragiketa bolumenak azken bost urteetan izan duen batez bestekoaren 100eko 50 gainditzen duenean.

Bi kontzeptuengatik gehienez kendu daitekeen oinarria milioi bat eurokoa da. Urteko kenkaria mugatzen da, eta ezartzen da kenkariak ezin duela berekin ekarri urteko kuota likidoa kuota osoaren 100eko 30etik beherakoa izatea. Orobat, ezartzen da kuota nahikoa ez izateagatik kentzen ez diren kopuruak hurrengo bost zergaldietako autolikidazioetan aplikatu ahal izango direla, betiere aurreko muga errespetatuz.

Batera tributatzeko aukeran, areago mugatzen da haren aplikazioa, ezartzen denean bananduta edo dibortziatuta dauden senar-emazteek ezingo dutela hura aplikatu elkarrekin bizitzen jarraitu arren. Muga horretan izatezko bikotearen desegite kasuak ere sartzen dira.

Autolikidazioa aurkeztearekin batera egin behar diren aukerei buruzko artikuluan, ezartzen da hazkunde ahalmen handiko entitateak finantzatzeagatik arautzen den kenkari berria aplikatzeko ezinbestekoa dela aplikazio hori aukeratzea.

Hogeita bigarren xedapen gehigarriak, non arautzen baitira zuzeneko zenbatespenaren modalitate erraztua lehen sektorean aplikatzeko erregela bereziak, nekazaritza eta abeltzaintza jarduerei aplikagarriak zaizkien erregela bereziak aldatzen ditu. Aldaketa horren ondorioz, jarduera horien titularrek modalitate erraztuan kalkulatzen badute beren etekin garbia eta aurreko ekitaldian izan duten eragiketa bolumena ez bada izan 30.000 euro baino handiagoa, beren etekin garbia kalkulatzeko 100eko 75eko gastu forfaita aplikatuko dute lortutako sarreren gainean, eta ezingo dute beste ezein gasturik kendu. Gainera, zergadun horien kontabilitate betebeharrak murrizten dira. Bestalde, aurreko ekitaldian eragiketa bolumen hori gainditzen duten zergadunek 100eko 35eko forfaita jarraituko dute aplikatzen sarreren eta gastuen arteko diferentziaren gainean.

Sozietateen gaineko zergan, jarraian aipatzen diren aldaketak nabarmendu ditzakegu.

Kontseiluaren 2016ko uztailaren 12ko 2016/1164/EB Zuzentarauak, barne merkatuaren funtzionamenduan zuzeneko eragina duen zerga ihesaren aurkako arauak ezartzen dituenak, xedatutakoa aintzat hartuta, ezartzen da finantza gastu garbiak ekitaldiko mozkin operatiboaren 100eko 30eraino izango direla kengarriak. Edozein kasutan ere, 3 milioi euroko finantza gastu garbiak izango dira kengarriak zergaldiko. Ahalbidetzen da kenkari gisa aplikatu ez diren finantza gastu garbiak hurrengo zergaldietan kentzea, kasuan kasuko zergaldikoekin batera, lehen aipatutako muga kontuan hartuta. Gainera, xedatzen da ezen, zergaldiko finantza gastu garbiak muga horretara iristen ez direnean, ondorengo lehen 5 urte jarraituetan amaitzen diren zergaldietako mugari muga horren eta zergaldiko finantza gastu garbien arteko diferentzia gehitu behar zaiola, diferentzia hori kendu arte.

Kontseiluaren 2016ko uztailaren 12 2016/1164/EB Zuzentarau horretan ere aipatzen diren asimetria hibridoen esparruan, ezartzen da ezen pertsona edo entitate lotuekin egindako eragiketetatik datozen gastuak ez direla kengarriak izango, baldin eta, kalifikazio fiskal desberdina izateagatik, eragiketa horiek diru-sarrerarik sortzen ez badute, edo sortzen duten diru-sarrera salbuetsita edo 100eko 10etik beherako karga tasa nominalaz zergapetuta badago.

Gastuen arau bereziei dagokienez, zerga oinarri positiboaren 100eko 20tik 10era murrizten da mikroenpresek beren tamainak eragiten dituen zailtasunen zerga konpentsazio gisa aplikagarri duten gastu kengarria. Dena den, araubide iragankorrean jasotakoari jarraituz, murriztapena 100eko 15ekoa izango da, 2018ko urtarrilaren 1etik abenduaren 31ra bitartean hasitako zergaldietarako.

Dibidenduen eta mozkin-partaidetzen zergapetze bikoitza ezabatzeko araubide orokorrari dagokionez, zeina zergaren foru arauko 33. artikuluan aurreikusten baita, desagertzen da dibidenduen eta mozkin-partaidetzen zergapetze bikoitza ezabatzeko aukera, baldin eta horiek banatzen dituzten entitateek 100eko 10etik beherako karga tasan tributatu badute sozietateen gaineko zergan edo berdina edo antzekoa den beste zerga batean, eta horren arrazoia bada entitate partaidetuaren egoitzako herrialdeak informazioa trukatzeko klausulaz hornitutako hitzarmena sinatu duela Espainiarekin, nazioarteko zergapetze bikoitza saihesteko. Gainera, argitzen da aipatzen den 100eko 10eko tasa tasa nominala dela.

Entitateetako partaidetzak eskualdatzeagatik lortutako errentetan zergapetze bikoitza ezabatzeko araubide orokorrari dagokionez –zergaren foru arauko 34. artikuluan aipatzen da araubide hori–, antzeko neurri bat ezartzen da, eta, beraz, sozietateen gaineko zergan edo berdina edo antzekoa den beste zerga batean 100eko 10etik beherako karga tasa nominalaren arabera tributatu duten entitateetako partaidetzak eskualdatzeagatik agerian jartzen diren errentei ez zaie aplikatuko araubide hori.

Atzerrian kokatutako establezimendu iraunkorren bidez lortutako errenta positiboak zergadunaren zerga oinarrian ez integratzeari buruz 35. artikuluan jasotzen den erregelan, aurreikuspen gisa ezartzen da erregela hori ez dela aplikatuko baldin eta establezimendu iraunkorrak lortu dituen errentak establezimendu hori kokatuta dagoen estatuan salbuetsita badaude edo sozietate zergaren pareko edo antzeko zerga batean 100eko 10etik beherako karga tasa nominalaren arabera tributatu badute.

Aparteko mozkinen berrinbertsioan, desagertzen da entitateen kapitalaren edo funts propioen partaidetzak eskuratuz gauzatu ahal izatea berrinbertsioa. Aldaketa hori aplikatzeko, foru arau honen xedapen iragankorrean araubide iragankor bat ezartzen da lehendik indarrean zegoen araubidera bildutako zenbatekoak 2018ko urtarrilaren 1ean berrinbertitu ez dituzten zergadunentzat.

Aldaketak sartzen dira jabetza intelektual edo industrialaren ustiapenetik datozen errenten tributazioan, «patent box» araubidea Europako erakundeetatik datozen jarraibideetara egokitzeko. Horrela, ezartzen da etekinak murriztu ahal izango direla baldin eta errenten iturria patenteak, erabilgarritasun ereduak, sendagai eta produktu fitosanitarioen babesari buruzko ziurtagiri osagarriak, edo ikerketa eta garapen proiektuetan lortutako software aurreratu eta erregistratua erabiltzeko edo ustiatzeko eskubidea lagatzea bada. Bestalde, aldaketak sartzen dira araubidea ez aplikatzeko eremuan, eta, besteak beste, nabarmentzekoa da «know how» delakoa araubidetik kanpo geratzen dela.

Aktibo eta pasiboen baloraziorako erregela bereziak ezartzen dira, konkurtso prozeduren barruan produkzio unitateak eskualdatzen direnean, aktiboen balioaren eta hartutako pasiboen balioaren arteko diferentzia negozio konbinazioaren kostua baino handiagoa denean.

Kontseiluaren 2016ko uztailaren 12ko 2016/1164/EB Zuzentarauak, lehenago aipatuak, xedatutakoarekin bat etorriz, aldaketak sartzen dira irteerako zergapetze araubidean bai egoitza aldaketen kasurako bai establezimendu iraunkorren amaierarako. Horrela, kuotaren ordainketa geroratu beharrean, orain aurreikusten da ordainketa zatikatzea irteera hori gertatu ondorengo lehen 5 urte jarraituetan amaitzen diren zergaldietan.

Finantza gastuen kengarritasunari zergan ezartzen zaion muga dela-eta, orain arautzen da zergadunek ezingo dutela azpikapitalizazio erregela aplikatu finantza gastuen muga hori aplikatzen dutenean.

Nazioarteko gardentasun fiskalaren esparruan, Kontseiluaren 2016ko uztailaren 12ko 2016/1164/EB Zuzentaraura egokitzen da haren erregulazioa, eta lurralde espainiarrean egoitzarik ez duen entitatearen gehieneko tributazioa aldatzen da gardentasunaren erregela aplikatu ahal izateko. Orobat, aldatzen da entitate ez-egoiliarrak lortutako errentak denboran egozteko erregela, aukera bakar gisa finkatzen baita aintzat hartuko den zergaldia lurralde espainiarrean egoiliar ez den entitateak ekitaldi soziala amaitzen duen egunari dagokiona izango dela.

Aldatzen da zer baldintzatan erabili daitezkeen ekintzailetza sustatzea eta jarduera produktiboa sendotzea helburu duen erreserba berezirako kopuruak hazkunde ahalmen handiko mikroenpresen edo enpresa txiki eta ertainen enpresa proiektu berri baten kapitalean parte hartzeko, dela hasierako etapan dela garapen fasean. 100.000 eurotik 300.000 eurora gehitzen da proiektuko inbertitu daitekeen gehieneko zenbatekoa, eta zenbait muga eta beharkizun jartzen dira inbertsioa gauzatzeko.

Zerga oinarri negatiboak konpentsatzeko garaian, muga gisa ezartzen da haien konpentsazioak ezingo duela urte bakoitzean gainditu haiek konpentsatu aurretik dagoen zerga oinarri positiboaren 100eko 50. Mikroenpresen eta enpresa txikien kasuan, muga hori 100eko 70ekoa izango da. Era berean, hamabostetik hogeita hamarrera zabaltzen da zerga oinarri negatibo horiek errenta positiboekin konpentsatzeko aukera emango duten zergaldien kopurua.

Gutxitu egiten dira sozietateen gaineko zergaren karga tasak: zergaren tasa orokorrak lau puntu portzentual murrizten dira; halere, behin-behinekoz, ezartzen den araubide iragankorraren arabera, 2018ko urtarrilaren 1etik abenduaren 31ra bitarteko zergaldietarako, gutxipena bi puntu portzentualekoa izango da. Dena den, murriztapen horretatik kanpo gelditzen dira kreditu entitateak eta haiek parte hartzen duten talde fiskalak, zergak baterakuntza fiskaleko araubidean ordaintzen dituztenean; haiek 100eko 28an zergapetuta jarraituko dute.

100eko 21ean zergapetuta zeuden entitateei, bestetik, karga tasa bi puntu gutxituko zaie; halere, behin-behinekoz, ezartzen den araubide iragankorraren arabera, 2018ko urtarrilaren 1etik abenduaren 31ra bitarteko zergaldietarako, gutxipena puntu portzentual batekoa izango da.

Era berean, hidrokarburoen sorguneak eta lurrazpiko biltokiak miatu, ikertu eta ustiatzen dituzten entitateei karga tasa lau puntu portzentual murrizten zaie, 100eko 35etik 31ra; halere, behin-behinekoz, ezartzen den araubide iragankorraren arabera, 2018ko urtarrilaren 1etik abenduaren 31ra bitarteko zergaldietarako, gutxipena bi puntu portzentualekoa izango da.

Era berean, aldaketak sartzen dira zergaren kuota likidoaren gainean kenkariak –salbu ikerketa eta garapen jarduerak eta berrikuntza teknologikokoak egiteagatik ezarritako kenkariak– aplikatzearen ondorioz ateratzen den gutxieneko tributazioan: gutxieneko tributazio portzentaje orokorra 100eko 13tik 17ra igotzen da, nahiz eta araubide iragankor bat ezartzen den, zeinaren arabera, 2018ko urtarrilaren 1etik abenduaren 31ra bitarteko zergaldietarako, gutxieneko kuota orokorra 100eko 15 izango baita. Dena den, kreditu entitateek eta haiek parte hartzen duten talde fiskalek aplikagarri duten gutxieneko kuotak 100eko 13 izaten jarraituko du, baterakuntza fiskaleko araubidea zergapetuta daudenean.

Era beran, gehitu egiten dira berariaz enpresa txikientzat eta mikroenpresentzat eta beste entitate batzuentzat aurreikusitako gutxieneko tributazioko portzentajeak; halere, gehikuntza hori pixkanaka ere aplikatzen da, 2018ko urtarrilaren 1etik abenduaren 31ra bitartean hasitako zergaldietarako araubide iragankor bat ezartzen baita. Gauza bera gertatzen da aurreikusitako gutxieneko tributazioko portzentajeei dagokienez, entitateak langile plantillaren batez bestekoa behin betiko izaeraz mantendu edo gehitzen duenean.

Hobetzen da aktibo ez-korronte berrietan inbertitzeagatik aplikatzen den pizgarria, kenkariaren aplikazioa errazten baita baldin eta inbertsioaren xede diren aktiboen zenbateko osoa 5 milioi euro baino handiagoa bada urtean.

Aldatzen da zer kasutan aplikatuko den ikerketa eta garapen proiektuen edo berrikuntza teknologikokoen finantzaketan parte hartzeagatik 64 bis artikuluan aurreikusten den pizgarria, eta, horrela, esaten da finantzaketa hori hobarituko dela bakar-bakarrik baldin eta proiektu horiek Gipuzkoako Lurralde Historikoko Pertsona Fisikoen Errentaren gaineko Zergari buruzko urtarrilaren 17ko 3/2014 Foru Arauaren 89 ter artikuluan aipatzen diren entitate berritzaileak gauzatuak badira. Bestalde, zehazten da finantzaketa hori itzuli beharrik gabe egin beharko dela, eta entitate finantzatuak ez duela izango zertan itzuli jasotako kopuruak. Era berean, hainbat kautela eta muga ezartzen dira, kenkariaren kopuruarekin eta finantzatutako zenbatekoarekin lotuta, besteak beste.

Aldaketak sartzen dira enplegua sortzeagatik aplikatzen den kenkariaren arauketan, sortzen diren lanpostuak kalitatekoak eta behar bezalako ordainduak izan daitezen. Horrela, kenkari hau aplikatzeko, ezinbestekoa da mugarik gabe kontratatzen den pertsonaren soldata 100eko 170 handiagoa izatea kontratazioaren unean indarrean dagoen lanbidearteko gutxieneko soldata baino. Bestalde, kenkariaren zenbatekoa langilearen soldatarekin lotzen da, eta oro har ezartzen da urteko soldata gordinaren 100eko 25ekoa izango dela, 5.000 euroko mugarekin. Kontratatzen den pertsona lan merkatuan sartzeko zailtasun bereziak dituzten taldeetakoa bada, erregela horien arabera kalkulatzen den kenkaria bikoitza izango da. Aldaketa hori aplikatzeko, foru arau honen xedapen iragankor batean araubide iragankor bat aurreikusten da 2018ko urtarrilaren 1a baino lehen formalizatutako kontratuetarako.

Kenkarien aplikazioaren mugari dagokionez, hainbat nobedade daude. Alde batetik, ikerketa eta garapenarekin edo berrikuntza teknologikoarekin zer ikusirik ez duten kenkarien baturarako aurreikusitako muga kuota likidoaren 100eko 45etik 100eko 35era jaisten da muga. Bestetik, muga bat jartzen zaie ikerketa eta garapeneko edo berrikuntza teknologikoko jarduerengatik ezarritako kenkariei: 100eko 35eko kenkarien muga bateratua aplikatu ondoren ateratzen den kuota likidoaren soberakinaren gaineko 100eko 70. Gainera, hamabostetik hogeita hamarrera zabaltzen da kuota osoa nahikoa ez izateagatik kendu ez diren diru zenbatekoak kendu ahal izateko zergaldien kopurua. Era berean, epea zabaltzen da zergapetze bikoitza saihesteko kenkariari dagokionez ere. Azkenik, aldatu egiten da kuota likidoaren kenkarien aplikazio ordena, kontuan hartuta aurrerantzean kenkari guztiak mugatuta egongo direla, muga hori 100eko 35 izan edo 100eko 70 izan.

Finantza gastuei dagokienez onartzen den muga dela-eta, doikuntzak sartzen dira bai Espainiako eta Europako interes ekonomikoko taldeen araubide berezian, bai aldi baterako enpresa elkarteen araubide berezian bai zerga baterakuntzaren araubidean.

Zergaren foru araudian, ordainketa zatikatu bat egiteko betebeharra sartzen da; obligazio horretatik salbuetsita gelditzen dira mikroenpresatzat edo enpresa txikitzat hartutako entitateak eta 56. artikuluaren 4. apartatuan (inbertsio kolektiboko erakundeak) eta 5. apartatuan (borondatezko gizarte aurreikuspeneko entitateak) jasotako karga tasetan zergapetuta dauden entitateak. Ordainketa zatikatua urte bakoitzeko urriaren lehendabiziko 25 egun naturaletan, eta aitorpen epea urriaren 1ean amaituta duen azken zergaldiko zerga oinarriaren 100eko 5 izango da.

Inbertsio kolektiboko erakundeetako bazkide edo partaideen tributazioan, eguneratu egiten dira Europako zuzentarauetara egiten diren igorpenak.

Zerga honi dagokionez ere, hainbat xedapen iragankor gehitzen dira. Haien bitartez, finkatu egiten dira karga tasen pixkanakako aldaketa, gutxieneko tributazioa eta mikroenpresei konpentsazioagatik dagokien gastu kengarriak eta zerga oinarri negatiboak, eta ezarri egiten da 2018ko urtarrilaren 1aren aurretik aplikatu gabe dauden kenkariak orain onartzen den araudi berriari jarraituz aplikatuko direla.

Kooperatiben araubide fiskalari dagokionez, aldatu egiten da 1997ko maiatzaren 22ko 2/1997 Foru Araua. Izan ere, aldaketaren asmoa da sozietate kooperatiboentzat ordainketa zatikatuak egiteko betebeharra ezartzea, salbu eta mikroenpresak edo enpresa txikiak badira.

Ondare eskualdaketen eta egintza juridiko dokumentatuen gaineko zergan, ezarri egiten da konkurtso prozeduren barruan egindako produkzio unitateen eskualdaketak «kostu bidezko ondare eskualdaketak» kontzeptuari ez lotzea, eskuratzailea produkzio unitate horietan sartutako ondasun higiezinen entregen kuotaren kenkari osoa egiteko eskubidea duen balio erantsiaren gaineko zergaren zergadun bat denean, baldin eta eskualdaketa horiek zerga horri lotuta eta salbuetsi gabe badaude.

Gainera, salbuetsita geratzen dira elkarren bermerako sozietateen alde emandako bermeak berritzeko eragiketak, eta elkarren bermerako sozietateek berek beren bazkideen alde emandakoak berritzen dituztenak. Salbuetsita daude, halaber, alde bakarreko hipotekak herri administrazioen alde berritzeko egiten diren notariotzako eskrituren lehen kopiak.

Zergen foru arau orokorrari dagokionez, errekurritutako egintzaren exekuzioa eteteko erregulazioan zuzenketa bat sartzeaz gainera, ikuskapen prozeduretan ahalbidetzen da kautelazko neurrien ondorioak urtebetetik gora zabaltzea kasu jakin batzuetan. Gainera, autolikidazio bidez hasitako prozedura amaitzeari buruzko erregulazioan, zehazten da autolikidazioen zuzenketek eta epez kanpoko likidazioengatik ezartzen diren errekarguen likidazioek ez dutela bukatzen prozedura.

Gorago adierazi dugun bezala, II. tituluak osatu nahi du Gipuzkoako zerga sistema Euskal Zuzenbide Zibilari buruzko ekainaren 25eko 5/2015 Legera egokitzeko lana. Hain zuzen ere, lan hori abenduaren 23ko 7/2015 Foru Arauarekin hasi zen, zerga alorreko aldaketa jakin batzuk onartzen dituen foru arauarekin, eta azaroaren 14ko 4/2016 Foru Arauak eman zion jarraipena, Gipuzkoako Lurralde Historikoko zerga sistema Euskal Zuzenbide Zibilari buruzko ekainaren 25eko 5/2015 Legera egokitzen duenak. Titulu honek dakartzan aldaketak lotuta daude, bereziki, eskubideei uko egiteko oinordetza-itunek eta komisario bidezko oinordetzek jasotzen duten zerga tratamenduarekin, eta eragina dute pertsona fisikoen errentaren gaineko zergan, aberastasunaren eta fortuna handien gaineko zergan, oinordetzen eta dohaintzen gaineko zergan, eta hiri-lurren balio gehikuntzaren gaineko zergan.

Foru arau honekin egiten den egokitzapenak oinordetzen eta dohaintzen gaineko zergan du, bereziki, eragina. Hona hemen zer aldaketa nagusi sartu diren figura tributario horretan.

Bi egitate zergapegarri berri sartzen dira zergan: oinordetza-titulu bidez eskuratzen diren ondasun eta eskubideen kasuan, eskubideei uko egiteko oinordetza-itunak, betiere baldintza jakin batzuk betetzen direnean; eta inter vivos egindako doako beste edozein negozio juridikoren bidez eskuratzen diren ondasun eta eskubideen kasuan, uko egileak ondasun eta eskubideak eskuratzea hirugarren baten herentziako oinordetza-eskubideak xedatzearen ondorioz. Horrez gain, foru arauan jasotzen da zer negozio juridiko hartzen diren, dohaintzaz aparte, inter vivos egindako doako negozio juridikotzat, oinordetzen eta dohaintzen gaineko zergaren ondorioetarako.

Aprobetxatuta ezen, aberastasunaren eta fortuna handien gaineko zergan salbuetsita dauden enpresa indibidualak, negozio profesionalak edo entitateetako partaidetzak senide jakin batzuek mortis causa eskuratzeko araubidean, sartu egin dela eraginkortasuna unean bertan duten oinordetza-itunekin edo testamentu-ahalordea erabiliz egindako eskurapenen erregulazioa, oinarri likidagarria arautzen duen artikulua berregituratzen da, eta 3. apartatua ezabatzen da, haren edukia ez baita orain beharrezkoa, artikuluko beste apartatuetan jasota egoteagatik. Likidazio erregelak ezartzen dira bi kasu hauetan aplikatzeko: oinordetzari uko egitearen onuradunak eskubide eta ondasunak eskuratzen dituenean hirugarren baten herentziako oinordetza-eskubideak xedatzeagatik eta izendatutakoaren eskubideak seme-alaben edo ondorengo ahaideen alde xedatzeagatik.

Sortzapen erregelak ezartzen dira eskubideei uko egiteko oinordetza-itunetarako, izan itun horiek oinordetza-tituluak izan inter vivos egindako doako negozio juridikoak. Orobat, sortzapen erregelak ezartzen dira bi kasu hauetan aplikatzeko: oinordetzari uko egitearen onuradunak eskubide eta ondasunak eskuratzen dituenean hirugarren baten herentziako oinordetza-eskubideak xedatzeagatik, edo izendatutakoaren oinordetza-eskubideak dohainik xedatzen direnean, inter vivos edo mortis causa egintzen bidez, izendatzailea bizirik dagoela. Berriro diseinatzen da oinordetza-ahalordearen menpe dauden herentzien gozamenari buruzko tributazioa, bai biziarteko gozamenetan eta bai oinordetza-ahalordea erabiltzean iraungitzen diren gozamenetan: lehen kasuan, likidazio bakarra egingo da; eta gainerakoetan, bi.

Herentzien eskurapenen metaketari dagokionez, aurreikusita dago oinordetza-itunen ondorioz jasotako ondasun eta eskubideen eskurapen guztiak metatzea, eta ez bakarrik eraginkortasuna unean bertan duten oinordetza-itunen ondorioz jaso direnak.

Bestetik, ezarri egiten da dohaintzak eta horien pareko gainerako kosturik gabeko eskualdaketetan gertatzen den bezala, edozein titulu bidezko oinordetza eskualdaketak eskurapen bakartzat hartuko dira, zerga kuota zehazteko, baldin eta haien arteko denbora tartea lau urtetik gorakoa ez bada. Kasu horietan, zerga kuota lortzeko, zerga oinarri guztien baturatik abiatuko da kalkulua. Metatutako eskurapenengatik lehendik ordaindutako kuotak metaketaren emaitzatik kendu ahal izango dira, eta, hala behar denean, ordaindutako zenbateko osoa edo haren zati bat itzuliko da.

Zehaztu egiten da testamentu-ahalordearen menpeko herentzietan komisarioak Zerga Administrazioari egin behar dion komunikazioaren edukia, herentzia osatzen duten ondare elementuen inbentarioan izandako aldaketei dagokienez, bai aldaketa horiek testamentu-ahalordearen erabilpenaren ondorio direnean eta bai ahalordearen erabilpenaz besteko kausak gertatzen direnean.

Bestetik, kendu egiten da aipatutako obligazioa ez betetzeagatik jarritako zehapenarekin adostasuna dagoenean murriztapena aplikatzeko aukera.

Informaziorako obligazio berri bat ezartzen da notarioentzat. Hori dela eta, haiek baimendutako dokumentu guztien zerrenda igorri behar diote Ogasun eta Finantza Departamentuari, komisarioak Euskal Zuzenbide Zibilari buruzko ekainaren 25eko 5/2015 Legearen 43. artikuluan aipatutako testamentu-ahalordea erabili gabe duen herentziako ondasunak xedatzeko egintzei dagokienez, azken horiek zerga honen sortzapena ez dakartenean.

Gipuzkoako Lurralde Historikoko zerga sistema Euskal Zuzenbide Zibilaren Legera egokitzeko foru arauan, testamentu-ahalorde bat erabili gabe herentzien zerga araubideari buruzko II. titulua berregituratzeaz gain –hainbat kapitulu sartuta–, aldatu egiten dira pertsona fisikoen errentaren gaineko zerga eta hiri-lurren balio gehikuntzaren gaineko zerga. Besteak beste, aldaketa hauek egiten dira:

Aurrerantzean, pertsona fisikoen errentaren gaineko zergan, testamentu-ahalorde bat erabili gabe duten herentziak zergaren arau orokorrei jarraituz zergapetuko dira, ondare elementuak eta herentzia osatzen duten besteren kapitalen erakarpena eta erabilpena ordezkatzen duten aktiboak eskualdatzearen ondorioz lortu diren kapital higigarriaren ondare irabazi eta galerengatik eta etekinengatik. Era berean, kalkulurako behar diren datak eta eskurapen balioak finkatzen dira. Gainera, ezarri egiten da ohiko etxebizitza eskualdatzeagatik izandako ondare irabazietarako aurreikusitako salbuespenak aplikatzeko aukera, bai berrinbertsioa dela-eta, eskualdatutako higiezina bertan kausatzailearekin batera hura hil aurreko bi urteetan bizi izan den ezkontide alargunaren edo izatezko bikote kidearen ohiko etxebizitza izan denean, bai menpetasun ertaina edo handia duten pertsonek, 65 urtetik gorakoek eta finantza entitate batek bultzatutako prozedura judizial baten barruan egindako eskualdaketa dela-eta, betiere salbuespen horiek aplikatzeko gainerako baldintzak betetzen badira.

Hiri-lurren balio gehikuntzaren gaineko zergan, ezarri egiten da xedapen egintzen ondorioz testamentu-ahalorde bat erabili gabe duten herentziei dagozkien terreno eskualdaketen tributazioaren erregulazioa, eskualdaketa horiek berekin ez dakartenean oinordetza eta dohaintzen gaineko zergaren sortzapena: haien tributazioa zergaren foru arauan jasotakoaren araberakoa izango da, berezitasun batzuk ezarrita.

Pertsona fisikoen errentaren gaineko zergaren artikuluen barruan egindako aldaketen artean, honako bi hauek nabarmentzekoak dira:

Errenten indibidualizazioari dagokionez, sartu egiten dira ondare irabazi eta galeren eta kapital higigarriaren etekinen tributazioari dagozkion indibidualizazio erregelak, horiek guztiak lortzen direnean ondare elementuak eta herentzia osatzen duten besteren kapitalaren erakarpena eta erabilpena ordezkatzen duten aktiboak eskualdatzearen ondorioz. Gipuzkoako Lurralde Historikoko zerga sistema Euskal Zuzenbide Zibilaren Legera egokitzeko foru arauan sartutako aldaketak azaltzean lehenago adierazitakoaren arabera, haien tributazioa salbuetsita egotetik zergapetuta egotera igaro da, oro har.

Kosturik gabeko eskualdaketen erregulazioan, haien idazkera oinordetza eta dohaintzen gaineko zergan izandako aldaketetara egokitzen da. Gainera, zehaztu egiten da komisarioak testamentu-ahalordea modu ezeztaezinez erabiltzen duenean erabilpen horren momentuaren data hartuko dela kontuan.

Hiri-lurren balio gehikuntzaren gaineko zergaren artikuluetan, berriro diseinatzen da testamentu-ahalordearen menpeko herentzien gozamenaren tributazioari buruzko erregulazioa, bai biziarteko gozamenetan, bai oinordetza-ahalordea erabiltzean iraungitzen diren gozamenetan eta bai aldi baterako gozamenetan: lehen kasuan, likidazio bakarra egingo da; gainerakoetan, bi.

I. TITULUA

ZERGA ALDAKETAK

1. artikulua.– Pertsona fisikoen errentaren gaineko zerga aldatzea.

Lehena. 2016ko urtarrilaren 1etik aurrerako ondorioekin, Gipuzkoako Lurralde Historikoko Pertsona Fisikoen Errentaren gaineko Zergari buruzko urtarrilaren 17ko 3/2014 Foru Arauaren 9. artikuluko 30. zenbakia honela geratzen da idatzita:

«30.– Askatasuna eta eskubide demokratikoak defendatuz eta aldarrikatuz heriotza edo lesio ezgaitzaileak pairatzeagatik jasotzen diren kalte-ordainak, abenduaren 26ko 52/2007 Legean aurreikusitakoak. Lege horren bidez, gerra zibilean eta diktaduran jazarpena edo indarkeria pairatu zutenen eskubideak aitortzen eta zabaltzen dira, eta haien aldeko neurriak ezartzen dira.

Orobat, salbuetsita egongo da Bigarren Mundu Gerran basakeriak pairatu zituztenen umezurtzen sufrimenduaren aitorpen gisa ematen den laguntza finantzarioa, Frantziako Errepublikako Gobernuak uztailaren 27ko 2004/751 Dekretuan aitortua.»

Bigarrena.– 2017ko urtarrilaren 1etik aurrerako ondorioekin, aldaketa hauek sartzen dira Gipuzkoako Lurralde Historikoko Pertsona Fisikoen Errentaren gaineko Zergari buruzko urtarrilaren 17ko 3/2014 Foru Arauan:

Bat.– 9. artikuluaren 12. zenbakia honela geratzen da idatzita:

«12.– Urriaren 30eko 8/2015 Legegintzako Errege Dekretuak, Gizarte Segurantzaren Lege Orokorraren testu bategina onartzen duenak, II. tituluko X. eta XV. kapituluetan eta VI. tituluko I. kapituluan arautzen dituen familia prestazioak, eta, orobat, umezurtzen pentsioak eta hartzeko pasiboak eta hogeita bi urtetik beherakoak diren edo lan guztietarako ezinduak dauden biloben edo anai-arreben aldekoak, Gizarte Segurantzaren eta klase pasiboen erregimen publikoetatik jasotakoak.

Era berean, salbuetsita egongo dira norbere konturako langileen edo autonomoen Gizarte Segurantzako araubide berezian sartu gabeko profesionalei aitortutako prestazioak, baldin eta Gizarte Segurantzako araubide bereziaren ordez jarduten duten gizarte aurreikuspeneko mutualitateek ordainduak badira, eta, orobat, borondatezko gizarte aurreikuspeneko entitateek kooperatibetako bazkideei aitortutakoak, betiere, Gizarte Segurantzak aurreko paragrafoan aurreikusten dituen egoeretarako prestazioak badira. Gizarte Segurantzak zeinahi den kontzeptuagatik onartzen duen gehieneko prestazioa izango da zenbateko salbuetsiaren muga. Soberakinak lan etekin moduan tributatuko du, eta Gizarte Segurantzaren prestazioekin batera borondatezko gizarte aurreikuspeneko mutualitate edo entitateenak jasotzen badira, soberakina azken horien prestazioetan gertatu dela ulertuko da.

Salbuetsita egongo dira, baita ere, funtzionarioek beren zerbitzuengatik jasotzen dituzten ordainsariak, lanaldiaren murrizketarekin zer ikusia dutenean aurretik baimena eskatu dutelako minbiziak edo beste gaixotasun larri batek ukitutako seme-alaba adingabeak zaintzeko. Baimen hori 49. artikuluaren e) letran aurreikusten du Enplegatu Publikoaren Oinarrizko Estatutuaren Legearen testu bateginak, urriaren 30eko 5/2015 Legegintzako Errege Dekretuaren bidez onartuak. Salbuetsitako zenbatekoaren muga minbiziak edo beste gaixotasun larri batek jotako adingabeak zaintzeagatik Gizarte Segurantzak aitortzen duen gehieneko prestazioaren zenbatekoa izango da, hain zuzen ere Gizarte Segurantzako Lege Orokorraren testu bateginaren II. tituluko X. kapituluan aurreikusitakoa.

Orobat, salbuetsita egongo dira jaiotzagatik, erditze anitzagatik, adopzioagatik, adopzio anitzagatik, kargupeko seme-alabengatik eta zurztasunagatik jasotzen diren gainerako prestazio publikoak.

Salbuetsita daude, halaber, amatasuna dela-eta autonomia erkidegoetatik edo toki entitateetatik jasotzen diren prestazio publikoak.»

Bi.– Hogeita bigarren xedapen gehigarria honela geratzen da idatzita:

«Hogeita bigarrena.– Zuzeneko zenbatespen erraztuaren araubidea lehen sektorean aplikatzeko arauak.

Jarraian aipatzen diren jarduera ekonomikoen etekin garbia zuzeneko zenbatespenaren modalitate erraztuaren arabera kalkulatzeko, erregela berezi hauek aplikatuko dira:

1) Nekazaritza eta abeltzaintza jardueren kasuan, lehen eraldaketa barne, hauek bereiziko dira:

a) Zergadunak edo errenten esleipeneko entitateak egindako nekazaritza eta abeltzaintza jarduera guztien eragiketa bolumena ez bada izan, aurreko lehen urtean, 30.000 euro baino handiagoa, sarrerei, kanpoan utzita jarduerari atxikitako ondare elementuen galerak eta irabaziak, 100eko 75eko gutxipena aplikatuko zaie gastu justifikagaitzen kontzeptupean, eta ezingo da beste ezein gasturik kendu.

Letra honetako erregela berezia aplikatzen duten zergadunek eta errenten esleipeneko entitateek ez dute izango foru arau honen 113. artikuluan ezartzen diren erregistro liburuak eramateko obligaziorik, salmenten eta sarreren erregistro liburua izan ezik. Haien obligazioa izango da, ordea, enpresaburu eta profesionalek fakturak egin eta emateko betebeharrari buruzko araudiaren arabera egindako eta jasotako fakturak zenbakituta gordetzea, daten arabera ordenatuta eta hiruhilekotan multzokatuta.

b) Zergadunak edo errenten esleipeneko entitateak egindako nekazaritza edo abeltzaintza jarduera guztien eragiketa bolumena 30.000 euro baino handiagoa izan bada aurreko lehen urtean, foru arau honen 28. artikuluko 1. apartatuaren b) letran aipatzen den portzentajea ehuneko 35ekoa izango da.

Errenten esleipeneko entitateek egindako nekazaritza eta abeltzaintza jardueren kasuan, aurreko a) eta b) letretan jasotakoa aplikatzean ez dira kontuan hartuko bazkide, oinordeko, komunero edo partaideengan banaka gertatzen diren zirkunstantziak, jarduera horiek zergadun horien banakako jardueren tributazioan izan dezaketen eragina eragotzi gabe.

Lehen erregela honetan jasotakoaren ondorioetarako, jarduera ekitaldiaren barruan egiten hasi bada, aurreko a) eta b) letretan aipatu den eragiketa bolumena konputatzeko, ekitaldi horretan egindako eragiketa bolumena hartuko da kontuan. Jarduera hasi den ekitaldia urtebetea baino laburragoa bada, aurreko kopurua konputatzeko, egindako eragiketak urtebetera eramango dira.

2) Basogintza jardueretako sarrerei gastu justifikagaitzengatik aplikatuko zaien gutxipen portzentajea –kanpoan utzita jarduerari atxikitako ondare elementuen irabaziak eta galerak–, ezingo da izan 100eko 65 baino txikiagoa, eta ez da beste ezein gasturik kenduko.

3) Baxurako arrantza jardueretako sarrerei gastu justifikagaitzengatik aplikatuko zaien gutxipen portzentajea –kanpoan utzita jarduerari atxikitako ondare elementuen irabaziak eta galerak–, ezingo da izan 100eko 90 baino txikiagoa, eta ez da beste ezein gasturik kenduko.

Ondorio hauetarako, sarrera horien barruan arrantzako eskubideen transferentziatik eratorritakoak ere konputatuko dira.

4) Foru arau honen 25. artikuluko 1. apartatuaren b) letran aurreikusitako magnitudea ez zaie aplikatuko xedapen gehigarri honetan aipatzen diren jarduerei.»

Hirugarrena.– 2018ko urtarrilaren 1etik aurrerako ondorioekin, aldaketa hauek sartzen dira Gipuzkoako Lurralde Historikoko Pertsona Fisikoen Errentaren gaineko Zergari buruzko urtarrilaren 17ko 3/2014 Foru Arauan:

Bat.– Indarrik gabe geratzen da 4. artikuluko 3. apartatua.

Bi.– 9. artikuluaren 12. zenbakia honela geratzen da idatzita:

«12.– Urriaren 30eko 8/2015 Legegintzako Errege Dekretuak, Gizarte Segurantzaren Lege Orokorraren testu bategina onartzen duenak, II. tituluko X. eta XV. kapituluetan eta VI. tituluko I. kapituluan arautzen dituen familia prestazioak, eta, orobat, umezurtzen pentsioak eta hartzeko pasiboak eta hogeita bi urtetik beherakoak diren edo lan guztietarako ezinduak dauden biloben edo anai-arreben aldekoak, Gizarte Segurantzaren eta klase pasiboen erregimen publikoetatik jasotakoak.

Era berean, salbuetsita egongo dira norbere konturako langileen edo autonomoen Gizarte Segurantzako araubide berezian sartu gabeko profesionalei aitortutako prestazioak, baldin eta Gizarte Segurantzako araubide bereziaren ordez jarduten duten gizarte aurreikuspeneko mutualitateek ordainduak badira, eta, orobat, borondatezko gizarte aurreikuspeneko entitateek kooperatibetako bazkideei aitortutakoak, betiere, Gizarte Segurantzak aurreko paragrafoan aurreikusten dituen egoeretarako prestazioak badira. Gizarte Segurantzak zeinahi den kontzeptuagatik onartzen duen gehieneko prestazioa izango da zenbateko salbuetsiaren muga. Soberakinak lan etekin moduan tributatuko du, eta Gizarte Segurantzaren prestazioekin batera borondatezko gizarte aurreikuspeneko mutualitate edo entitateenak jasotzen badira, soberakina azken horien prestazioetan gertatu dela ulertuko da.

Salbuetsita egongo dira, baita ere, funtzionarioek beren zerbitzuengatik jasotzen dituzten ordainsariak, lanaldiaren murrizketarekin zer ikusia dutenean aurretik baimena eskatu dutelako minbiziak edo beste gaixotasun larri batek ukitutako seme-alaba adingabeak zaintzeko. Baimen hori 49. artikuluaren e) letran aurreikusten du Enplegatu Publikoaren Oinarrizko Estatutuaren Legearen testu bateginak, urriaren 30eko 5/2015 Legegintzako Errege Dekretuaren bidez onartuak. Salbuetsitako zenbatekoaren muga minbiziak edo beste gaixotasun larri batek jotako adingabeak zaintzeagatik Gizarte Segurantzak aitortzen duen gehieneko prestazioaren zenbatekoa izango da, hain zuzen ere Gizarte Segurantzako Lege Orokorraren testu bateginaren II. tituluko X. kapituluan aurreikusitakoa.

Orobat, salbuetsita egongo dira jaiotzagatik, erditze anitzagatik, adopzioagatik, adopzio anitzagatik, kargupeko seme-alabengatik eta zurztasunagatik jasotzen diren gainerako prestazio publikoak.

Salbuetsita daude, halaber, amatasun eta aitatasunagatik autonomia erkidegoetatik edo toki entitateetatik jasotzen diren prestazio publikoak.»

Hiru.– 9. artikuluko 5. zenbakiaren bigarren paragrafoa eta 33. zenbakia honela geratzen dira idatzita:

«Aurreko paragrafoan xedatutakoa eragotzi gabe, Langileen Estatutuaren Legearen testu bateginak, urriaren 23ko 2/2015 Legegintzako Errege Dekretuaren bidez onartuak, 51. artikuluan xedatutakoaren arabera egiten diren kaleratze kolektiboen kasuan, edo Estatutu horren 52. artikuluko c) letran aurreikusitako arrazoiengatik amaitutako kontratuetan, betiere bai kasu batean bai bestean arrazoiak ekonomikoak, teknikoak, antolaketakoak, produkziokoak edo ezinbestekoak badira, eta, orobat, sektore publikoko lan kontratupeko langileei dagokionez Estatutu horren hamaseigarren xedapen gehigarrian aurreikusitako kaleratzeetan, jasotako kalte-ordaina salbuetsita geratuko da estatutu horretan bidegabeko kaleratzeetarako nahitaez ezarritako mugak gainditzen ez dituen zatian.»

«33.– Gipuzkoako Foru Aldundiak baimendutako eskola kiroleko programa edo eskola adineko kirolarientzako jarduerak egitean edo Eusko Jaurlaritzako 2006ko urriaren 31ko 16/2006 Dekretuan araututako kirol federazioen jarduerak egitean begirale, arbitro, epaile, ordezkari, kirol arduradun, federazio zuzendari tekniko edo entrenatzaile eginkizunak betetzeagatik jasotako etekinak, betiere lanbide arteko gutxieneko soldataren mugapean.»

Lau.– 27. artikuluko 1. erregela honela geratzen da idatzita:

«1.– Gipuzkoako Lurralde Historikoko Sozietateen gaineko Zergari buruzko urtarrilaren 17ko 2/2014 Foru Arauak 31. artikuluaren 5. apartatuan aipatzen dituen kontzeptuak eta enpresaburu edo profesionalak berak gizarte aurreikuspeneko mutualitateei egindako ekarpenak ez dira gastu kengarriak izango, nahiz eta horrek ez duen eragotziko foru arau honen 70. artikuluan jasotakoa. Hala ere, norberaren konturako langileen edo autonomoen Gizarte Segurantzako araubide berezian sartu gabeko profesionalek diru kopuruak ordaintzen dituztenean gizarte aurreikuspeneko mutualitateekin sinatutako aseguru kontratuengatik, ordaindutako kopuru horiek gastu kengarritzat joko dira, araubide berezi horrek estaltzen dituen kontingentziak hartzen dituen zatian, baldin eta, mutualitate horiek, urriaren 30eko 8/2015 Legegintzako Errege Dekretuaren bidez onartutako Gizarte Segurantzaren Lege Orokorraren testu bateginak hemezortzigarren xedapen gehigarrian ezartzen duen obligazioa betetze aldera, Gizarte Segurantzako araubide berezi horren ordez jarduten badute. Araubide berezi horretan kontingentzia arruntengatik ekitaldi ekonomiko bakoitzerako ezarrita dagoen gehieneko kuota izango da muga.»

Bost.– 32. artikuluko 1. apartatua honela geratzen da idatzita:

«1.– Etxebizitzetatik datozen kapital higiezinaren etekinen kasuan, betiere haietan jarduera ekonomiko bat egiten ez bada, higiezin bakoitzeko lortutako etekin osoen 100eko 20ko hobaria aplikatuko da.

Era berean, bakar-bakarrik kengarria izango da etekinen sorburu diren ondasunak, eskubideak edo erabilera nahiz gozamen ahalmenak eskuratu, birgaitu edo hobetzeko inbertitutako besteren kapitalen interesen zenbatekoa, bai eta gainerako finantzaketa gastuak ere.

Higiezin bakoitzeko hobariaren eta gastu kengarriaren arteko baturak ezingo du, higiezin bakoitzarentzat, etekin garbi negatiborik eman.»

Sei.– Beste kapitulu bat gehitzen zaio IV. tituluari, VI bis kapitulua, honako edukia duena:

«VI BIS.– KAPITULUA. LEKUALDATUTAKO LANGILEEN ARAUBIDE BEREZIA

56 bis artikulua.– Lekualdatutako langileen araubide berezia.

1.– Lurralde espainiarrera aldatzeagatik zerga egoitza Gipuzkoan kokatzen duten pertsona fisikoek aukera izango dute artikulu honetan ezarritako araubide bereziaren arabera tributatzeko, egoitza aldatzen den zergaldian eta hurrengo bost zergaldietan, honako baldintzak betetzen direnean erregelamenduz ezarriko den eran:

a) Batik bat ikerketa eta garapenarekin, zientziarekin, edo arlo tekniko edo finantzarioarekin zuzenean lotuta dauden lan bereziki kualifikatuak egiteko etortzea lurralde espainiarrera, erregelamenduz ezarriko diren baldintza eta beharkizunekin.

b) Lurralde espainiarrera etorri aurreko 5 urteetan Espainian bizi ez izana.

c) Lekualdaketa hori lan kontratu baten ondorioz gertatzea. Baldintza hori betetzen dela ulertuko da lan harremana, arrunta zein berezia, edo harreman estatutarioa Espainian enplegatzen duen pertsona edo entitate batekin hasten denean, edo leku aldaketa enplegu-emaileak aginduta eta hari buruzko gutun bat emanda egiten denean, baldin eta zergadunak ez baditu lortzen lurralde espainiarrean kokatutako establezimendu iraunkorraren bidez lortutakotzat joko liratekeen errentak.

d) Lanak Espainian egitea. Baldintza hori betetzat joko da, nahiz eta lanen zati bat atzerrian egin, baldin eta lan horiei dagozkien ordainsarien batura urte natural bakoitzean jasotako lan kontraprestazio guztien 100eko 15etik gorakoa ez bada. Horri begira, alde batera utziko da Ez-egoiliarren Errentaren gaineko Zergaren Legearen Testu Bateginak 13. artikuluaren 1. apartatuko c) letran jasotakoari jarraituta ordainsari horiek lurralde espainiarrean lortutako errentatzat hartzen diren edo ez. Lan kontratuan ezarritakoagatik, zergadunak funtzio batzuk hartzen baditu bere gain taldeko beste enpresa batean Espainiako lurraldetik kanpo, Merkataritza Kodearen 42. artikuluan jasotako moduan, aurreko muga 100eko 30era igoko da.

Atzerrian egindako lanei dagozkien ordainsarien zenbatekoa ezin denean frogatu, langileak atzerrian emandako egunak hartuko dira kontuan lan horiei dagokien ordainsaria kalkulatzeko.

e) Lan horiek egitea egoitza Espainian duen enpresa edo entitate batentzat, edo Espainiako lurraldean egoitzarik ez duen entitate batek Espainian duen establezimendu iraunkor batentzat. Baldintza hori betetzen dela ulertuko da zerbitzu horien onuradunak honako hauek direnean: egoitza Espainian duen enpresa edo entitate bat edo, bestela, lurralde espainiarrean egoiliarra ez den entitate batek bertan kokatua duen establezimendu iraunkorra. Lekualdaketa enpresa talde baten barruan gertatzen bada, Merkataritza Kodearen 42. artikuluan ezarritako eran, eta ondorio horietarako bakarrik, beharrezkoa izango da egoitza Espainian duen taldeko enpresak kontratatzea langilea edo pertsona edo entitate enplegatzaileak aginduta etortzea lurralde espainiarrera.

2.– Artikulu honetan ezarritako araubidea aukeratzen duten zergadunek foru arau honetan jasotakoari jarraituz kalkulatu behar dute zerga zorra, hurrengo berezitasunak kontuan hartuta.

a) Salbuetsita egongo da aurreko 1. apartatuan definitutako lan harremanetik ondorioztatzen diren etekin osoen 100eko 15.

b) Aurreko letran aipatzen den salbuespena behin aplikatuta, lan pertsonalaren etekin garbia kalkulatzeko garaian, gastu kengarritzat hartuko dira foru arau honen 22. artikuluan aurreikusitakoak eta, gainera, erregelamenduz ezartzen diren bestelakoak, azken horiek lanpostu horretan jarduteagatik lortutako etekin osoen 100eko 20ko mugarekin.

Gastu horiek aplikatzeko, ezinbestekoa izango da beti haiek agiri bidez frogatzea.

Pertsona edo entitate enplegatzaileak kopuruak ordaintzen baditu b) letra honetan aipatzen diren gastu gehigarriei aurre egiteko, kopuru horiek ez dira hartuko gauza bidezko ordainketatzat lanpostuan jarduteagatik lortutako etekin osoen 100eko 20raino.

c) Zergadunak atzerrian dituen ondare elementuetatik eratortzen diren errentak salbuetsita egongo dira baldin eta errenta horiei zerga honen berdina edo antzekoa den beste bat aplikatu bazaie atzerrian, eta herrialdea edo lurraldea ez badago hartuta paradisu fiskaltzat edo tributazio deusezekotzat martxoaren 8ko 2/2005 Foru Arauak, Gipuzkoako Lurralde Historikoko Zergen Foru Arau Orokorrak, hamargarren xedapen gehigarrian ezarritako eran.

Letra honetan aurreikusitako salbuespena aplikatzen duten zergadunek ezingo dute aplikatu foru arau honen 91. artikuluan errenta berdinetarako aurreikusten den kenkaria.

d) Aurreko c) letran xedatutakoa berdin aplikatuko zaie araubide berezi hau aukeratzen duen zergadunaren ezkontideari edo izatezko bikote-lagunari eta familia unitateko kideei, baldin eta lekualdaketaren ondorioz Gipuzkoara aldatzen badute zerga egoitza eta lurralde espainiarrera etorri aurreko 5 urteetan Espainian bizi izan ez badira.»

Zazpi.– 63. artikuluaren a) letra honela geratzen da idatzita:

«a) Foru arau honetako 32. artikuluaren 1. apartatuan jasotako kapital higiezinaren etekinen artean Hiri Errentamenduen azaroaren 24ko 29/1994 Legearen 2. artikuluan etxebizitza errentamendutzat hartutako etekinetatik eratorriak direnak.»

Zortzi.– 65. artikuluko b) letra honela geratzen da idatzita:

«b) Jarduera ekonomikoetatik sorturiko etekinak, zergaldi bakoitzean eta inolako mugarik gabe, elkarrekin integratu eta konpentsatuz ateratzen den saldo positiboa. Emaitza saldo negatiboa bada, horren zenbatekoa ondorengo hogeita hamar urteetako jarduera ekonomikoetatik lorturiko etekinen saldo positiboarekin konpentsatu behar da, Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 55. artikuluaren arabera.

Gipuzkoako Lurralde Historikoko Zergen Foru Arau Orokorraren 115. artikuluaren 3. apartatuan ezarritakoaren ondorioetarako, zergadunak adierazi behar du ea aplikatu nahi duen saldo negatiboen konpentsaziorako aurreko paragrafoan adierazten den aukera hori; konpentsazioa aplikatu nahi duen ekitaldiko autolikidazioa aurkezterakoan egin behar du adierazpen hori. Zergaldi baterako egiten den aukera geroago aldatu daiteke, hain zuzen ere, zergaren autolikidazioa egiteko borondatezko epea amaitu ondoren, baina zerga administrazioak ez badu aurretiazko errekerimendurik egin.»

Bederatzi.– 82. artikuluko 2. apartatua honela geratzen da idatzita:

«2.– Kenkari hori bera aplikatuko da, era berean, ondorengo edo aurreko ahaide bakoitzeko edo laugarren gradura arteko zeharkako ahaide bakoitzeko, hura barne, haren adina edozein dela ere, baldin eta pertsona hori, zergadunarekin bizi izanik eta haren urteko errentak, salbuetsiak kanpoan utzita, lanbidearteko gutxieneko soldata bi halakoak izan gabe, desgaitua edo mendekoa bada.

Kenkari hau bateragarria izango da aurreko artikuluetan esandakoaren arabera egin daitezkeen kenkariekin.

Egoitzetan bizi diren aurreko ahaideen, ondorengo ahaideen eta laugarren gradura arteko zeharkako ahaideen kasuan, kenkaria gradurik hurbileneko ahaideek aplikatuko dute, betiere ahaidearen egoitzako egonaldi gastuak ordaintzeko kopuruak eman dituztela frogatzen badute. Gastuak gradu bereko hainbat ahaidek ordaindu badituzte, kenkaria zati berdinetan hainbanatuko da haien artean.

Orobat, kenkari hau aplikatu ahal izango da desgaitasuna edo mendetasuna daukan pertsona zergadunarekin lotuta badago tutoretza edo harrera arrazoiak direla medio, eta apartatu honetan jasota dauden gainerako zirkunstantziak betetzen badira. Esandako tutoretza edo harrera adingabeak babesteko gaietan eskudun den entitate publikoarekin formalizatua izan behar da.»

Hamar.– 86. artikuluko 1. apartatua honela geratzen da idatzita:

«1.– Zergaldian ohiko etxebizitzaren alokairua ordaintzen duten zergadunek zergaldian ordaindutako kopuruen 100eko 20ko kenkaria egin dezakete, eta urtean 1.600 euro gehienez.

Dena den, zergadunak familia ugariaren titularrak badira, aurreko paragrafoan jasotako kenkaria 100eko 25ekoa izango da, eta urtean 2.000 euro gehienez.

Aurreko paragrafoetan jasotakoa jasota ere, zergadunek 30 urte baino gutxiago badituzte, kenkaria 100eko 30ekoa izango da, eta urtean 2.400 euro gehienez.

Horretarako, ordaindutako zenbatekoari kendu egin beharko zaio, hala badagokio, zergadunak etxearen alokairurako jasotako diru laguntzen zenbatekoa, diru laguntza horiek zerga honen araudiari jarraituz salbuetsita daudenean.»

Hamaika.– 88. artikuluko 3. apartatua honela geratzen da idatzita:

«3.– Kuota osoa txikiegia izateagatik aplikatzen ez diren kenkariak ondorengo lehen hogeita hamar urte jarraituetan amaitzen diren zergaldietako autolikidazioetan aplikatu daitezke, baina muga berdinak errespetatuz.»

Hamabi.– 89 bis artikuluaren 1. apartatuko lehen paragrafoa, artikulu horren 2. eta 3. apartatuetako a) letra eta artikulu bereko 4. apartatua berridatzi egiten dira jarraian datorren eran, eta orain arteko 4., 5. eta 6. apartatuak 5., 6. eta 7. apartatu bihurtzen dira hurrenez hurren:

«1.– Zergadunek zilegi izango dute zergaldian ordaindutako kopuruen 100eko 20ko kenkaria aplikatzea enpresa berrien edo sortu berrien akzioak edo partaidetzak harpidetzeagatik, baldin eta hurrengo 2. eta 3. apartatuetan xedatutakoa betetzen bada. Kapitalari aldi baterako ekarpena egiteaz gainera, beren ezagupen enpresarial eta profesional egokiak ere jarri ahal izango dituzte inbertitzen duten entitatea garatzeko.»

«a) Sozietate anonimo, erantzukizun mugatuko sozietate, lan sozietate anonimo edo erantzukizun mugatuko lan sozietatea izan behar dute, Kapital Sozietateen Legearen testu bategina onartzen duen uztailaren 2ko 1/2010 Legegintzako Errege Dekretuan eta Lan sozietateei eta partaidetutako sozietateei buruzko urriaren 14ko 44/2015 Legean ezarritako baldintzetan, eta ezin dira egon negoziatzeko onartuta ezein merkatu antolatutan. Baldintza hori akzioa edo partaidetza edukitzen den urte guztietan bete beharko da.»

«a) Entitatea eratzen den unean bertan eskuratu behar ditu zergadunak akzioak edo partaidetzak, edo, bestela, hura eratu ondorengo bost urteetan egindako kapital zabalkuntza bidez. Ezinbestekoa da eskuratutako akzio eta partaidetzak haren ondarean mantentzea hiru urtetik hamabi urte bitarteko epean.»

«4.– Zergadunak ezin du eduki entitate partaidetuarekin ordainpeko harreman bat, izan laborala izan merkataritzakoa, kenkari hau aplikatzea dakarrena baino, salbu eta mailegu kontratuetatik eta kontseilari edo administratzaile karguengatik eratortzen dena, betiere baldin eta azken hori lan harreman baten bidez gauzatzen ez bada. Baldintza hau aurreko 3. apartatuko a) letran aipatzen den edukitze-aldian bete beharko da.»

Hamahiru.– 89 ter artikulua gehitzen zaio VII. tituluko V. kapituluari, honela dioena:

«89 ter artikulua.– Kenkaria hazkunde ahalmen handiko entitateak finantzatzeagatik.

1.– Zergadunek 100eko 30eko kenkaria aplikatu ahal izango dute sorrera berriko entitate berritzaileen akzio edo partaidetzak lehen mailako merkatuan harpidetzeagatik –zergaldian zehar dirutan ordaindutako kopuruengatik–, baldin eta entitate horiek apartatu honetan eta hurrengo 4. eta 5. apartatuetan xedatutakoa betetzen badute.

Ondorio horietarako, hauxe ulertuko da:

a) Entitate bat berritzailea dela baldintza hauetako edozein betetzen duenean:

a») Etorkizun hurbilean produktu, zerbitzu edo prozesu berriak garatzea edo, sektoreko teknikaren egoerarekin alderatuta, horiek nabarmen hobetzea, eta inplizituki porrot teknologiko edo industrialaren arriskua eramatea.

Baldintza hori betetzen dela frogatzeko, erregelamenduz ezartzen den organoaren txosten arrazoitua beharko da.

b») Gipuzkoako Lurralde Historikoko Sozietateen gaineko Zergari buruzko urtarrilaren 17ko 2/2014 Foru Arauak 62. artikulutik 64.ra bitartean definitutako ikerketa eta garapen jarduerak eta berrikuntza teknologikokoak egiteko gastu eta inbertsioak gutxienez ustiapen gastu guztien 100eko 10 izatea akzio edo partaidetzak harpidetu aurreko hiru zergaldietako batean behintzat. Zergaldia urtebetekoa baino laburragoa denean, esandako portzentajea kalkulatzeko, urtebetera eramango dira ustiapen gastuak.

Baldintza hau betetzen dela justifikatzeko, beharrezkoa izango da aipatutako foru arauaren 64.2 artikuluan aipatzen den txosten arrazoituaren bidez frogatzea entitateak egindako jarduerak ikerketa eta garapen jarduerak direla edo berrikuntza teknologikoaren arloari dagozkiola.

b) Entitate bat sorrera berrikoa izango da apartatu honetan aipatzen den harpidetza egin aurreko bost urteen barruan eratu denean, betiere baldin eta haren bitartez ez bada egiten lehenago beste titulartasun batekin egiten zen jarduera bera.

Entitateak ez dira inoiz hartuko sorrera berrikotzat, eragiketa hauetako bat egiteagatik sortu direnean: bat-egiteak, zatiketak, aktiboen ekarpenak, aktibo eta pasibo osoaren lagapenak, jarduera adarren ekarpenak, interes ekonomikoko taldeak, aldi baterako enpresa elkarteak, eta jarduera ekonomiko berri bat benetan eta eraginkortasunez agertzea eragiten ez duen beste edozein eragiketa.

2.– Zergadunek 100eko 15eko kenkaria aplikatu ahal izango dute hazkunde prozesuan dauden entitateen akzio edo partaidetzak lehen mailako merkatuan harpidetzeagatik –zergaldian zehar dirutan ordaindutako kopuruengatik–, baldin eta entitate horiek apartatu honetan eta hurrengo 4. eta 5. apartatuetan xedatutakoa betetzen badute.

Ondorio horietarako, ulertuko da entitate bat hazkunde prozesuan dagoela, merkatu geografiko berri batean edo produktu merkatu batean sartzeko negozio plan bat behin prestatu duenean eta arriskuaren finantzaketari aurre egiteko behar duen hasierako inbertsioak urteko eragiketa bolumenak azken bost urteetan izan duen batez bestekoaren 100eko 50 gainditzen duenean.

Apartatu honetan aurreikusitako kenkaria aplikatzeko zergadunak aukeratzen duen zergaldia amaitu baino lehen, entitate partaidetuak administrazioa aurrez lotesteko prozedura bat abiatu behar du martxoaren 8ko 2/2005 Foru Arauak, Gipuzkoako Lurralde Historikoko Zergen Foru Arau Orokorrak, 82. artikuluan eta haren hurrengoetan ezartzen duen eran. Prozedura horretan zehaztu beharko dira prestatutako negozio plana, merkatu geografiko berri batean edo produktu merkatu batean sartzeko aurreikuspena, eta horretarako beharko den inbertsioa. Horrez gain, justifikatu beharko da hazkunde prozesuan dagoen entitate bat dela.

Administrazioa aurrez lotesteko prozeduraren aldeko ebazpena ezinbesteko baldintza izango da apartatu honetan jasotako kenkaria aplikatzeko.

Erregelamenduz ezarriko da zer baldintza bete behar diren administrazioa aurrez lotesteko prozedura abiatu dadin eta gutxienez zer elementu frogatu beharko diren prozedurak aldeko ebazpena izan dezan.

3.– Artikulu honetako 1. eta 2. apartatuetan aurreikusitako kasuetarako, urtean batera aplika daitekeen kenkariaren gehieneko oinarria 1.000.000 eurokoa izango da, eta harpidetutako akzio edo partaidetzen balioak eratuko du oinarri hori.

Kenkari hau aplikatzeak ezingo du berekin ekarri urteko kuota likidoa zerga honen kuota osoaren 100eko 30 baino txikiagoa izatea. Ondorio horietarako, artikulu honetan jasotako kenkaria azken tokian aplikatuko da gainerako kenkariekiko.

Kuota nahikoa ez izateagatik kendu ez diren kopuruak hurrengo bost zergaldietan aplikatu ahal izango dira, betiere aurreko muga errespetatuz.

4.– Harpidetutako akzio edo partaidetzen jabe den entitateak baldintza hauek bete behar ditu:

a) Sozietate anonimoa, erantzukizun mugatuko sozietatea, lan sozietate anonimoa edo erantzukizun mugatuko lan sozietatea izatea, Kapital Sozietateen Legearen testu bategina onartzen duen uztailaren 2ko 1/2010 Legegintzako Errege Dekretuan eta Lan sozietateei eta partaidetutako sozietateei buruzko urriaren 14ko 44/2015 Legean ezarritako baldintzetan.

b) Akzio edo partaidetzak harpidetzen diren zergaldian, mikroenpresa edo enpresa txiki edo ertaina izatea, Gipuzkoako Lurralde Historikoko Sozietateen gaineko Zergari buruzko urtarrilaren 17ko 2/2014 Foru Arauak 13. artikuluan ezarritakoaren arabera.

c) Akzio edo partaidetzak harpidetzen edo ordaintzen diren unean, konkurtso egoeran ez egotea edo, bestela, araudiak ezartzen dituen baldintzak ez betetzea hartzekodunek eskatutako konkurtso-prozedura batean sartzeko.

d) Ez egotea ezein merkatu antolatutan negoziatzeko onartuta.

e) Gipuzkoako Lurralde Historikoko Sozietateen gaineko Zergari buruzko urtarrilaren 17ko 2/2014 Foru Arauaren 14.1 artikuluko a) letran ezarritako baldintzak ez betetzea.

f) Jarraian zerrendatzen diren jarduerak ez egitea:

– Nekazaritza, arrantza eta akuikultura.

– Esportazioarekin lotutako jarduerak. Kenkarirako eskubidea sortzen duten kopuru ordainduak ezingo dira erabili banaketa sare bat beste herrialde batean ezarri eta funtzionatzea finantzatzeko. Alabaina, erabilgarriak izango dira merkataritza azoketan parte hartzeak edo aholkularitza azterlan zein zerbitzuak egiteak dakartzan gastuak ordaintzeko, horiek beharrezkoak direnean produktu berri bat merkaturatzeko edo jada dagoen produktu bat beste estatu kide baten edo hirugarren herrialde baten merkatuan zabaltzeko.

– Lurren, salgaien, aukera eta gerokoen, eta akzio, balore edo beste finantza tresna batzuen salerosketa.

– Ondasunen salerosketa, handizkako edo txikizkako salmenta jarduera arrunta ez denean.

– Finantza jarduerak, hala nola banka, aseguruak, maileguak edo factoring-a.

– Aktiboen alokairua edo lagapena.

– Royalty edo lizentzien ustiapena, salbu eta ustiatzen den aktiboa entitateak sortu duenean.

– Lege edo kontabilitate zerbitzuen prestazioa.

– Higiezinen sustapena.

– Basoak ustiatzeko jarduerak.

– Itsasontzien eraikuntza.

– Ikazkintza.

– Altzairugintza.

– Hotelen edo antzekoen ustiapena edo zuzendaritza, jarduera horietara bideratutako higiezinena barne.

– Zahar egoitzen edo pertsonak zaintzeko zentroen ustiapena edo zuzendaritza, jarduera horietara bideratutako higiezinena barne.

– Elektrizitatearen produkzioa edo ustiapena.

Apartatu honetan ezarritako baldintzak hurrengo 5. apartatuko d) letran aipatzen den gutxieneko edukitze-aldian bete beharko dira, salbu eta b) eta c) letretan jasotakoak, horiek letra horietan ezarritakoaren arabera arautuko baitira.

5.– Aurreko 1. eta 2. apartatuetan xedatutakoa aplikatzeko, baldintza hauek ere bete beharko dira:

a) Negozio plan bat prestatzea.

b) Entitate onuradunak lortutako finantzaketaren zenbateko osoak ez gainditzea Batzordearen 2014ko ekainaren 17ko 651/2014 (EB) Erregelamenduak 21. artikuluaren 9. apartatuan ezarritako zifra. Erregelamendu horren bidez, laguntza kategoria jakin batzuk barne merkatuarekin bateragarri deklaratzen dira Tratatuaren 107. eta 108. artikuluak aplikatuz. Ondorio horietarako, entitate onuradunak lortutako finantzaketatzat hartuko da haren akzio edo partaidetza multzoa, zeinaren harpidetzak ahalbidetzen baitu artikulu honetan eta aurrekoan jasotako pizgarriak eta, orobat, Gipuzkoako Lurralde Historikoko Sozietateen gaineko Zergari buruzko urtarrilaren 17ko 2/2014 Foru Arauaren 53. artikuluan jasotakoak aplikatzea, haren 2. apartatuko c) eta d) letretan ezarritako helburuei dagokienez.

c) Zergadunak, haren ezkontide edo izatezko bikote-lagunak, edo harekin bigarren gradura arteko zuzeneko zein alboko ahaidetasun harremana – odolkidetasunezkoa edo ezkontza bidezkoa– duten pertsonek, entitatean parte hartu gabeak izan behar dute, dela zuzenean dela zeharka, harpidetza egin aurretik.

d) Harpidetzen diren akzio edo partaidetzak gutxienez bost urtez mantendu behar dira zergadunaren ondarean, haiek ordaintzen direnetik aurrera, salbu eta zergaduna epe horretan hiltzen denean edo partaidetutako entitatea konkurtso-prozedura baten ondorioz likidatzen denean.

e) Zergadunaren zuzeneko zein zeharkako partaidetza, eta ezkontideak edo izatezko bikote-lagunak, edo zergadunarekin bigarren gradura arteko zuzeneko edo alboko ahaidetasun harremana –odolkidetasunezkoa edo ezkontza bidezkoa– dutenek izan dezaketena, ezin da izan, batera hartuta, entitatearen kapital sozialaren edo boto eskubideen 100eko 40 baino handiagoa. Baldintza hau aurreko d) letran aipatzen den gutxieneko edukitze-aldian bete beharko da.

f) Zergadunak ezin du eduki entitate partaidetuarekin ordainpeko harreman bat, izan laborala izan merkataritzakoa, kenkari hau aplikatzea dakarrena baino, salbu eta mailegu kontratuetatik eta kontseilari edo administratzaile karguengatik eratortzen dena, betiere baldin eta azken hori lan harreman baten bidez gauzatzen ez bada. Baldintza hau aurreko d) letran aipatzen den gutxieneko edukitze-aldian bete beharko da.

g) Sorrera berriko entitate berritzaileen kasuan –aurreko 1. apartatuan aipatu dira horiek–, entitate horiek, aurreko d) letran aipatzen den bost urteko epearen barruan, zergadunak ordaindutako zenbatekoaren 100eko 50 erabili behar dute Gipuzkoako Lurralde Historikoko Sozietateen gaineko Zergari buruzko urtarrilaren 17ko 2/2014 Foru Arauaren 62tik 64ra bitarteko artikuluetan definitutako ikerketa eta garapen jarduerekin edo berrikuntza teknologikokoekin zuzenean erlazionatutako gastu edo inbertsioak ordaintzeko, edo jarduera horien emaitza produzitu edo merkaturatzeko. Entitatearen jarduerak ikerketa eta garapen jarduerak edo berrikuntza teknologikokoak direla justifikatzeko, aipatutako foru arauaren 64. artikuluko 2. apartatuan aipatzen den txosten arrazoitua lortu beharko du entitateak.

h) Hazkunde prozesuan dauden entitateen kasuan –aurreko 2. apartatuan aipatutakoak–, entitate horiek, aurreko d) letran aipatzen den bost urteko epearen barruan, zergadunak ordaindutako zenbatekoaren 100eko 50 erabili behar dute merkatu geografiko berri batean sartzea edo produktu merkatu berri bat zabaltzea helburu duen negozio plana gauzatzeko. Negozio plana zerga administrazioari aurkeztu eta gero sortutakoak bakarrik hartuko dira plana gauzatzeko erabilitako gastu eta inbertsiotzat.

Ondorio horietarako, aurreikuspena aldatu eta negozio plana ukitu beharra badago, beste negozio plan bat prestatu ahal izango da, baina entitateak hilabeteko epea izango du, onartzen denetik aurrera, zerga administrazioari aurkezteko. Kasu horretan, h) letra honetan jasotakoaren ondorioetarako, ulertuko da negozio plan berrira egokitutako gastu eta inbertsioak negozio plana gauzatzeko erabiltzen direla, baldin eta horiek egiten badira plana zerga administrazioari aurkeztu eta gero, betiere ezertan eragotzi gabe lehendik aurkeztutako negozio planengatik halakotzat hartutakoak eta plan horien aurkezpenetik ordezkoak aurkeztu arte gertatutakoak.

6.– Aurreko apartatuetan ezarritako baldintzak ez betetzeak berekin ekarriko du bidegabeki aplikatutako kenkariak itzuli behar izatea, bidezko berandutze interesak ere ordainduta. Egin behar den ordainketa ateratzen den emaitzaren eta baldintza bete ez den zergaldiko kuota diferentzialaren arteko batura izango da. Hala ere, zergadunak beti egin ahal izango du ordainketa lehenago.

7.– Jarraipen inbertsioek artikulu honetako 1. apartatuan jasotako kenkarirako eskubidea emango dute, artikulu honetan ezarritako moduan, apartatu honetan jasotako berezitasunekin.

Artikulu honetan xedatutakoaren ondorioetarako, jarraipen inbertsiotzat hartuko dira hasierako negozio plan batean jasota dauden eta, entitatearen eraketatik bost urteko epean, sorrera berriko entitate berritzaile batek egindakoei gehitzen zaizkienak, baldin eta lehenagotik entitate berean finantzaketa inbertsio bat edo gehiago egin bada eta harengatik edo haiengatik artikulu honetako 1. apartatuan jasotako kenkaria aplikatu bada. Halakotzat hartuko dira, halaber, zergadunak, harpidetza behin egin ondoren eta bost urteko epe beraren barruan, egindako ordainketak, baldin eta sorrera berriko entitate berritzaile batean partzialki ordaindutako akzio eta partaidetzen harpidetzak badira.

Jarraipen inbertsioei berezitasun hauek aplikatuko zaizkie:

a) 3. apartatuan jasotako kenkariaren gehieneko oinarrian sartuko da bai hasierako inbertsioa bai zergadunak egindako jarraipen inbertsioen multzoa.

b) Ez zaie aplikatuko 4. apartatuko b) letran ezarritako baldintza. Hala ere, baldintza hori aplikagarria izango da zergadunak entitatean egiten duen lehen inbertsioa denean.

c) Ez zaie aplikatuko 5. apartatuko c) letran jasotako baldintza. Hala ere, baldintza hori aplikagarria izango da zergadunak entitatean egiten duen lehen inbertsioa denean.

8.– Akzio edo partaidetzen harpidetza batek ezin du berekin ekarri, zergadun berberarentzat, kapitulu honetan araututako beste kenkarietako bat aplikatzea.

9.– Kenkaria aplikatzeko, zergadunak hurrengo a) eta b) letra hauetan aipatzen den dokumentazioa aurkeztu beharko du:

a) Finantzaketaren entitate onuradunak luzatutako ziurtagiria, zeinak adierazi behar baitu akzio edo partaidetzak harpidetzeko unean aurreko 4. apartatuko baldintzak betetzen zirela.

b) Aurreko 1. apartatuko a) letran jasotakoetatik dagokion txosten arrazoitua, edo 2. apartatuan aipatzen den administrazioa aurrez lotesteko prozeduraren aldeko ebazpena, dagokionaren arabera.

10.– Gipuzkoako Lurralde Historikoko Zergen Foru Arau Orokorrak 115. artikuluaren 3. apartatuan jasotakoaren ondorioetarako, artikulu honetan aurreikusitako kenkaria aplikatu ahal izateko, ezinbestekoa da zergadunak, dagokion ekitaldiko autolikidazioa aurkezten duenean, berariaz adieraztea kenkaria aplikatu nahi duela.

115. artikuluaren 3. apartatuan xedatutakoa gorabehera, zergaren autolikidazioa aurkezteko epea amaitzen den egunean txosten arrazoitua lortu gabe badago edo aurreko 9. apartatuko b) letran aipatzen den aldeko ebazpena jaso ez bada, zergadunak hilabeteko epea izango du, horietako bat lortu duela jakinarazten zaion unetik aurrera, zergaren autolikidazio osagarria aurkezteko, eta haren bidez artikulu honetan aurreikusitako kenkaria aplikatzea aukeratzeko. Kasu horretan, ulertuko da zergadunak zerga aitortzeko borondatezko epearen barruan egiten duela hautua, 115. artikuluan jasotakoaren ondorioetarako.

11.– Artikulu honen 1. eta 2. apartatuetan xedatutakoaz gain, erregelamendu bidez garatu ahal izango dira artikuluan bertan jasotzen diren beste gai batzuk, eta betebehar formalak ere ezarri ahal izango dira.»

Hamalau.– 96. artikuluaren 1. apartatuko azken paragrafoa honela berridazten da:

«Behin senar-emazteen legezko banaketa gertatu, ebazpen judizial batek haien arteko loturarik ez dagoela deklaratu, edo izatezko bikotea deseginda, gurasoek ezingo dute inoiz baterako tributazioa aukeratu, elkarrekin bizitzen jarraitu arren.»

Hamabost.– 104. artikuluaren e) letra honela geratzen da idatzita:

«e) Jarduera ekonomikoak sustatzeko kenkariak, 88., 89., 89 bis eta 89 ter artikuluetan arautuak.»

Hamasei.– 106.1 artikuluko azken-aurreko paragrafoa honela geratzen da idatzita:

«Europar Batasuneko beste estatu batean helbideratuta dauden pentsio funtsek Espainian garatzen badituzte Espainiako legeriari lotuta dauden enpleguko pentsio planak, Europako Parlamentuaren eta Kontseiluaren 2003ko ekainaren 3ko 2003/41/EE Zuzentarauak, enpleguko pentsio funtsen jarduerei eta ikuskapenari buruzkoak, ezarritakoari jarraituz, pentsio funts horiek edo, kasua bada, haien entitate kudeatzaileek, atxikipena eta konturako sarrera egin behar dute Espainian egiten diren eragiketei dagokienez.»

Hamazazpi.– Hogeita hamaikagarren xedapen iragankorra, langileek enpresan parte hartzeagatik 2016ko urtarrilaren 1a baino lehen aplikatutako kenkaria arautzen duena, hogeita hamabigarren xedapen iragankor bihurtzen da.

2. artikulua.– Sozietateen gaineko zerga aldatzea.

Lehena. 2016ko urtarrilaren 1etik aurrera hasitako zergaldietan ondorioak izateko, berridazten dira 43. artikuluko 10. eta 11. apartatuak, eta honela geratzen dira idatzita:

«10.– Lurralde espainiarrean egoiliar diren entitateak artikulu honen 3. apartatuan jasotako eran definitutako talde bateko entitate nagusi badira, eta aldi berean ez badira beste entitate egoiliar edo ez-egoiliar baten menpekoak, artikulu honen hurrengo apartatuan aipatzen den herrialdez herrialdeko informazioa aurkeztu beharko dute.

Era berean, informazio hori aurkeztu beharko dute lurralde espainiarrean egoiliar diren entitateek, Espainian egoiliar ez den eta beste baten menpe ez dagoen entitate baten menpekoak badira zuzenean edo zeharka, eta, orobat, taldeko entitateek lurralde espainiarrean dituzten establezimendu iraunkorrek, baldin eta zirkunstantzia hauetako bat gertatzen bada:

a) Entitate ez-egoiliar horri dagokionez, haren egoitza fiskaleko herrialde edo lurraldean ez egotea informazioa herrialdez herrialde emateko obligaziorik apartatu honetan ezarritako moduan.

b) Entitate ez-egoiliarraren egoitza fiskaleko herrialde edo lurraldearekin ez egotea, informazio horri dagokionez, informazioa automatikoki trukatzeko akordiorik.

c) Entitate ez-egoiliar horren egoitza fiskaleko herrialde edo lurraldearekin informazio hori automatikoki trukatzeko akordiorik egonda ere, akordio hori sistematikoki ez betetzea, eta, apartatu honetan aurreikusitako epean, zerga Administrazioak ez-betetze horren berri ematea lurralde espainiarrean egoiliar diren menpeko entitateei edo establezimendu iraunkorrei.

Aurrekoa gorabehera, menpeko entitate horiek edo lurralde espainiarrean kokatutako establezimendu iraunkor horiek ez dute izango informazio hori zertan aurkeztu, talde multinazionalak, esandako informazioa aurkezteari begira, Europar Batasuneko estatu batean egoiliartuta dagoen talde bateko entitate menpeko bat izendatu duenean. Orobat, informazio hori ez dute aurkeztu beharko beste entitate ez-egoiliar batek –taldeko entitate nagusiak aurkezpenaren ondorioetarako subrogatu bezala izendatuak– dagoeneko haien egoitza fiskaleko lurraldean aurkeztu duenean. Entitate subrogatuaren egoitza fiskala Europar Batasunetik kanpo kokatutako lurralde batean badago, aplikagarriak izango dira 2011ko otsailaren 15eko 2011/16/EB Zuzentarauak, fiskalitatearen esparruko lankidetza administratiboari buruzkoak, III. eranskinaren 22. sekzioko 2. apartatuan ezarritako baldintzak. Zuzentarau horrek 77/799/EEE Zuzentarau indargabetu zuen.

Lurralde espainiarrean egoiliar diren menpeko entitateak bat baino gehiago badira, eta talde multinazionalak haietako bat izendatu badu informazio aurkezteko, entitate hori bakarrik egongo da informazioa aurkeztera behartuta.

Apartatu honetan xedatutakoaren ondorioetarako, lurralde espainiarrean egoiliar diren entitateak hemen ezarritako informazioa aurkeztera behartutako talde bateko kide badira, informazio hori prestatu behar duen entitatearen identifikazioa eta haren egoitzako herrialde edo lurraldea jakinarazi behar dizkiote zerga administrazioari. Komunikazio hori informazioan aipatzen den zergaldia amaitu aurretik egin beharko da.

Orobat, apartatu honetako bigarren paragrafoan jasotako kasuan, gertatzen bada entitate ez-egoiliarrak ez diola ematen lurralde espainiarrean egoiliartutako entitateari edo bertan dagoen establezimendu iraunkorrari taldeari buruz behar duten informazioa, osoa edo haren zati bat, azken horiek eskuan duten informazioa aurkeztu beharko dute, eta gertatutakoaren berri eman beharko diote zerga Administrazioari.

Erregelamenduz ezarriko da nola eta zein epetan aurkeztu apartatu honetan aipatzen den informazioa.

11.– Entitateek herrialdez herrialdeko informazioa aurkeztu beharko dute, artikulu honen aurreko apartatuan ezarritakoaren arabera, baldin eta taldeko pertsona edo entitate multzoaren negozio bolumenaren zenbateko garbia, zergaldia hasi aurreko 12 hilabeteetan, 750 milioi eurokoa bada gutxienez.

Herrialdez herrialdeko informazioan honako eduki hauek sartu behar dira, entitate nagusiaren zergaldiari dagokionez, modu bateratuan eta herrialde edo jurisdikzio bakoitzeko:

a) Taldearen sarrera gordinak, betiere entitate lotuekin edo hirugarrenekin lortutakoak bereizita.

b) Sozietateen gaineko zerga edo izaera bera edo antzekoa duten beste zerga batzuk aplikatu aurreko emaitzak.

c) Ordaindu diren sozietateen gaineko zergak edo izaera bera edo antzekoa duten beste zerga batzuk, jasandako atxikipenak barne.

d) Sortutako sozietateen gaineko zergak edo izaera bera edo antzekoa duten beste zerga batzuk, atxikipenak barne.

e) Zergaldia bukatzen den egunean dagoen kapital zifraren eta banatu gabe dauden beste emaitza batzuen zenbatekoa.

f) Batez besteko plantilla.

g) Diruzaintza eta kreditu eskubideak ez diren aktibo materialak eta higiezinetako inbertsioak.

h) Entitate egoiliarren zerrenda, barruan sartuta establezimendu iraunkorrak eta haietako bakoitzak egindako jarduera nagusiak.

i) Garrantzitsutzat jotzen den beste edozein informazio, eta, hala badagokio, informazioan jasotako datuen azalpena.

Apartatu honetan ezarritako informazioa eurotan aurkeztu behar da.»

Bigarrena.– 2018ko urtarrilaren 1etik aurrera hasten diren zergaldietan ondorioak izateko, aldaketa hauek sartzen dira Gipuzkoako Lurralde Historikoko Sozietateen gaineko Zergari buruzko urtarrilaren 17ko 2/2014 Foru Arauan:

Bat.– 25 bis artikulu berria gehitzen da, honako edukia duena:

«25 bis artikulua.– Finantza gastuen kengarritasuna mugatzea.

1.– Finantza gastu garbiak kengarriak izango dira, ekitaldiko mozkin operatiboaren 100eko 30eko muga aplikatuta.

Ondorio horietarako, honako hauek hartuko dira finantza gastu garbitzat: zergaldian zehar sortutako finantza gastuek kapital propioak hirugarrenei lagatzeagatik lortzen diren diru-sarrerekiko ageri duten soberakina, foru arau honen 31. artikuluko 1. apartatuaren g) eta j) letretan aipatutako gastuak kanpoan utzita.

Mozkin operatiboa kalkulatzeko abiapuntua ekitaldiko irabazi eta galeren kontuaren ustiapen emaitza izango da, foru arau honen 15.3 artikuluan aipatzen den araudiari jarraituz zehaztua. Kalkulu horretatik, ezabatuko dira ibilgetuaren amortizazioa, ibilgetu ez-finantzarioko diru-laguntzen eta bestelakoen egozpena, eta ibilgetua besterentzeagatik izandako narriadura eta emaitza; aldiz, kalkulu horretan ondare tresnetako partaidetzen sarrera finantzarioak gehituko dira, baldin eta sarrera horiek entitateen dibidenduak edo mozkin partaidetzak badira, eta entitate horietako partaidetza portzentajea, zuzenekoa nahiz zeharkakoa, gutxienez hauetako bat bada: 100eko 5, oro har, edo 100eko 3, sozietate partaidetuaren akzioek bigarren mailako merkatu antolatu batean kotizatzen dutenean. Guztiarekin ere, zergaren zerga oinarrian integratu gabe uzten diren sarrerak eta gastuak ez dira inoiz izango mozkin operatiboaren parte.

Edozein kasutan ere, 3 milioi euroko finantza gastu garbiak izango dira kengarriak zergaldiko.

Kenkari gisa aplikatu ez diren finantza gastu garbiak hurrengo zergaldietan kendu ahal izango dira, kasuan kasuko zergaldikoekin batera, apartatu honetan ezarritako muga kontuan hartuta.

2.– Zergaldiko finantza gastu garbiak ez badira iristen artikulu honen 1. apartatuan ezarritako mugara, ondorengo lehen 5 urte jarraituetan amaitzen diren zergaldietako finantza gastu garbiak kentzeko garaian, artikulu honen 1. apartatuan aurreikusitako mugari muga horren eta zergaldiko finantza gastu garbien arteko diferentzia gehituko zaio, harik eta diferentzia hori kendu arte.

3.– Foru arau honen VI. tituluko III. kapituluan ezarritakoaren arabera tributatzen duten entitateetako bazkideek beraiei egotzitako finantza gastu garbiak izan beharko dituzte kontuan, artikulu honetan jasotako muga aplikatzearen ondorioetarako.

4.– Entitatearen zergaldia urtebete baino laburragoa bada, artikulu honen 1. apartatuko laugarren paragrafoan aipatutako zenbatekoa kalkulatzeko eragiketa hau egingo da: 3 milioi euro bider zergaldiaren iraupenak urtearekiko duen proportzioa.

5.– Artikulu honetan aurreikusitako ondorioetarako, edozein motatako entitateen kapitalean edo funts propioetan partaidetzak eskuratzeko hartutako zorretatik datozen finantza gastuak kengarriak izango dira entitate eskuratzailearen mozkin operatiboaren 100eko 30eko muga gehigarria aplikatuta, baina mozkin operatibo horretan ez da sartuko eskurapen hori egin eta hurrengo 4 urteetan harekin bat egiten duten entitateei dagokiena, bat-egite horretan foru arau honen VI. tituluko VII. kapituluan aurreikusitako zerga araubide berezia aplikatzen ez bada. Finantza gastu horiek artikulu honen 1. apartatuan aipatzen den mugan ere hartuko dira kontuan.

Apartatu honetan xedatutakoagatik kengarriak ez diren gastuak hurrengo zergaldietan kendu ahal izango dira, betiere apartatu honetan eta artikulu honen 1. apartatuan ezarritako muga kontuan hartuta.

Apartatu honetan ezarritako muga ez da aplikagarria izango entitateen kapitalaren edo funts propioen partaidetzak eskuratu diren zergaldian, baldin eta eskurapen hori zor bidez finantzatzen bada gehienez ere eskurapen prezioaren 100eko 70ean. Era berean, muga hori ez da aplikatuko hurrengo zergaldietan, baldin eta, eskurapenaren unetik, zor horren zenbatekoa, gutxienez, hurrengo 8 urteetako bakoitzari dagokion zati proportzionalean murrizten bada, zorra eskurapen prezioaren 100eko 30era iritsi arte.

6.– Artikulu honetan ezarritako muga ez zaie aplikatuko honako hauei:

a) Kreditu entitateei eta aseguru etxeei.

Ondorio horietarako, entitateek kreditu entitateen tratamendua jasoko dute boto eskubide guztiak, zuzenean edo zeharka, haiei dagozkienean, eta haien jarduera bakarra finantza tresnak jaulkitzea eta merkaturatzea denean entitate horien kapital erregulatzailea eta finantzaketa indartzeko.

Tratamendu bera aplikatuko da, halaber, mota hauetako funtsak direnean: titulizazio hipotekarioko funtsak, uztailaren 7ko 19/1992 Legean, Higiezinetako Inbertsio Sozietate eta Funtsen Araubideari eta Titulizazio Hipotekarioko Funtsei buruzkoan, arautuak; orobat, aktiboen titulizazio funtsak, apirilaren 14ko 3/1994 Legeak, kreditu-erakundeen Espainiako legeria banku-koordinaziorako Bigarren Zuzentaraura egokitu eta finantza sisteman beste aldaketa batzuk sartzen dituenak, bosgarren xedapen gehigarriaren 2. apartatuan aipatuak; eta, azkenik, Enpresa finantzaketaren sustapenari buruzko apirilaren 27ko 5/2015 Legearen III. tituluan araututako titulizazio funtsak.

b) Hiru baldintza hauek betetzen dituzten entitateei: ez izatea sozietate talde bateko kidea Merkataritza Kodearen 42. artikuluaren arabera, ez egotea beste entitate batzuei lotuta foru arau honen 42. artikuluan xedatutako eran, eta establezimendu iraunkorrik ez edukitzea atzerrian.

c) Entitatea iraungi den zergaldian, entitatea berregituratze-eragiketa baten ondorioz iraungi den kasuetan salbu.

7.– Zergadunak sozietate talde bateko kide badira Merkataritza Kodearen 42. artikuluan xedatutakoaren ondorioetarako, zilegi izango dute artikulu honetan xedatutakoa ez aplikatzea frogatzen dutenean beren funts propioen eta aktibo guztien arteko arrazoia taldeko arrazoi baliokidearen berdina edo handiagoa dela. Dena den, horretarako, ezinbesteko baldintza izango da aktibo eta pasibo guztiak baloratzeko erabiltzen den metodoa irailaren 17ko 1159/2010 Errege Dekretuak Urteko Kontu Bateratuen formulaziorako onartutako arauei jarraituz prestatutako finantza egoera-orriei aplikatutako berbera izatea.

Ondorio horietarako, zergadunaren funts propioen eta haren aktibo guztien arteko arrazoia taldeko arrazoi baliokidearen berdina dela jo ahal izango da, baldin eta zergadunaren funts propioen eta haren aktibo guztien arteko arrazoia gehienez taldeko arrazoi baliokidea baino bi puntu portzentual txikiagoa bada.

8.– Artikulu honen aurreko apartatuan aipatutako zergadunek zerga administrazioari proposatu ahal izango diote beren finantza gastu garbien kenkariaren muga artikulu honen 1. apartatukoa baino handiagoa izatea, eta muga hori kalkulatzea kontuan hartuta zer koefiziente adierazten duten, hirugarrenekiko, taldearen finantza gastu garbiek sozietate taldearen mozkin operatiboaren aldean.

Kasu horretan, artikulu honen 1. apartatuan aipatutako muga kalkulatuko da zergadunaren mozkin operatiboari aurreko paragrafoan adierazitako koefizientea aplikatuta.

Apartatu honetan adierazitako proposamenak egiteko, foru arau honen 45. artikuluko 3. eta 5. apartatu bitartean araututako prozedura arauei jarraituko zaie.»

Bi.– 31. artikuluko 1. apartatuari j) letra gehitzen zaio, honela dioena:

«j) Pertsona edo entitate lotuekin egindako eragiketei dagozkien gastuak, baldin eta, kalifikazio fiskal desberdina izateagatik, diru-sarrerarik sortzen ez badute, edo sortzen duten diru-sarrera salbuetsita edo 100eko 10etik beherako karga tasa nominalaz zergapetuta badago.»

Hiru.– 32. artikuluaren 4. apartatua honela idatzita geratzen da:

«4.– Foru arau honetako 13. artikuluko 1. apartatuan aipatutako mikroenpresek euren zerga oinarritik kendu ahal izango dute, beren tamainak eragiten dituen zailtasunen zerga konpentsazio gisa, honako eragiketa hauek egin aurretik zehaztutako beren zerga oinarri positiboaren 100eko 10:

– apartatu honetan jasotako zerga konpentsazioa egin,

– foru arau honetako 48. artikuluan jasotako errenta positiboak sartu,

– foru arau honetako hogeigarren xedapen gehigarrian jasotako errentak, eta

– foru arau honetako 55. artikuluan jasotako zerga oinarri negatiboak konpentsatu.

Apartatu honetan xedatutakoa ez da aplikatuko, mikroenpresa ekonomia intereseko espainiar edo europar taldea denean edo aldi baterako enpresa elkartea denean, betiere VI. tituluko III. kapituluan jasotako araubide berezian zergapetuta badago.

Apartatu honetan xedatutakoa aplikatzea bateraezina izango da titulu honetako V. kapituluan ezarritako zuzenketak egitearekin.»

Lau.– 33. artikuluaren 3. apartatuko a) letra honela geratzen da idatzita:

«a) Sozietateen gaineko zergan edo berdina edo antzekoa den beste zerga batean 100eko 10etik beherako karga tasa nominalaren arabera tributatu duten entitateek banatutako errentak.»

Bost.– 34. artikuluaren 7. apartatua honela geratzen da idatzita:

«7.– Artikulu honen aurreko apartatuetan xedatutakoa ez zaie aplikatuko honako errenta hauei:

a) Sozietateen gaineko zergan edo berdina edo antzekoa den beste zerga batean 100eko 10etik beherako karga tasa nominalaren arabera tributatu duten entitateetako partaidetzak eskualdatzeagatik agerian jarritakoei.

Partaidetza edukitzen den zergaldietakoren batean entitate partaidetuari karga tasa diferente bat aplikagarri bazaio, artikulu honen 2. apartatuan xedatutakoa aplikatuko da kontuan hartuta zer ekitalditan betetzen den letra honetan gutxieneko tributazioari buruz ezarritakoa eta zer ekitalditan ez den betetzen.

b) Foru arau honen 14. artikuluan aipatzen diren ondare sozietateetako partaidetzak eskualdatzeagatik agerian jarritakoei, salbu eta entitate partaidetuak ondare sozietate izan ez den ekitaldietan eta partaidetza eduki duen bitartean izandako mozkin banatugabeen gehikuntza garbiari dagokionez.

c) Foru arau honen 14. artikuluan aipatzen diren ondare sozietateek lortutako errentei, entitateen kapitalean edo funts propioetan parte hartzea adierazten duten baloreen eskualdaketatik baldin badatoz.»

Sei.– Paragrafo bat gehitzen zaio 35. artikuluari 1. apartatuaren amaieran, honela dioena:

«Artikulu honetan xedatutakoa ez zaie aplikatuko establezimendu iraunkorrak lortutako errentei, baldin eta establezimendu hori kokatuta dagoen estatuan errenta horiek salbuetsita badaude edo sozietate zergaren pareko edo antzeko zerga batean 100eko 10etik beherako karga tasa nominalaren arabera tributatu badute.»

Zazpi.– 36. artikuluko 1. apartatua honela geratzen da idatzita:

«1.– Zerga oinarrian sartu gabe utzi daitezke ustiapen ekonomikoei lotuta dauden ibilgetu materialeko, ukiezineko edo higiezinen inbertsioetako ondare elementuen kostu bidezko eskualdaketan lortutako errentak, edo eskualdaketa egin aurretik saltzeko mantendutako aktibo ez-korronte gisa sailkatutako elementuen kostu bidezko eskualdaketatik datozenak, betiere foru arau honen 40. artikuluko 9. apartatuan araututako moneta-baliogalera aplikatuz zuzendu ondoren, hala dagokionean.

Foru arau honek 31. artikuluaren 3. apartatuan aipatutako ibilgailuak eskualdatzen badira, ez-integrazioa haren e) letran aipatutako ibilgailuei dagokienez bakarrik aplikatu ahal izango da. Era berean, aipatutako 31. artikuluko 4. apartatuan jasotako garraio elementuak eskualdatzen badira, ez-integrazioa haren hirugarren paragrafoan aipatutako elementuei dagokienez bakarrik aplikatu ahal izango da.

Errentak zerga oinarritik kanpo utzi ahal izateko, ezinbestekoa da eskualdaketa horietan lortutako zenbatekoa lehen aipatutako ondare elementuetako edozeinetan berrinbertitzea, ondare elementua entregatu edo eskura jarri aurreko urtetik hurrengo hiru urte bitarteko epean.

Berrinbertsioaren ondorioetarako, haren xede diren aktiboekin lotuta egiten diren eraispen edo erretiratze betebeharrengatik bere gain hartzen diren kostuak ez dira aintzat hartuko, nahiz eta horrek ez duen kentzen horiek aintzat hartzea aktiboak baloratzeko.

Hala ere, berrinbertsiorik ez dela izan ulertuko da eskurapena foru arau honen 42. artikuluan ezarritako eran lotuta dagoen pertsona edo entitate bati egiten zaionean, ibilgetu materialeko elementu berriak direnean izan ezik.

Berrinbertsioa ondare elementuak eskura jartzen diren egunean gauzatutzat joko da.

Ondare elementuak finantza-errentamenduko kontratuen xede direnean, berrinbertsioa kontratua egiten den egunean joko da egindakotzat, eta haren zenbatekoa ondare elementuaren kontabilitate balioa izango da. Berrinbertsioak ondorioak izan ditzan, erosteko aukera baliatzea baldintza suntsiarazlea izango da.»

Zortzi.– 37. artikuluaren 1. apartatuko azken bi paragrafoak honela berridazten dira:

«Patenteak, erabilgarritasun ereduak, sendagai eta produktu fitosanitarioen babesari buruzko ziurtagiri osagarriak, edo ikerketa eta garapen proiektuetan lortutako software aurreratu eta erregistratua erabiltzeko edo ustiatzeko eskubidea lagatzetik datozen errentek bakarrik emango dute artikulu honetan araututako murriztapenerako eskubidea.

Zehazki, errentek ez dute inola ere murriztapenerako eskubiderik emango honako hauek erabili edo ustiatzeko eskubidea lagatzetik datozenean: markak, literatura, arte edo zientzia lanak, film zinematografikoak barne, laga daitezkeen eskubide pertsonalak –hala nola irudi eskubideak–, industria, merkataritza edo zientzia arloko ekipoak, planoak, formulak edo prozedura sekretuak, industria, merkataritza edo zientziako esperientziei buruzko informazioen gaineko eskubideak, marrazkiak, ereduak edo aurreko paragrafoan adierazitakoez besteko programa informatikoak, edo bertan adierazita ez dagoen beste edozein eskubide edo aktibo.»

Bederatzi.– 12. apartatu berri bat gehitzen zaio 40. artikuluari, eduki hau duena:

«12.– Konkurtso prozeduren barruan produkzio unitateak eskualdatzen direnean, baldin eta aktibo identifikagarrien balioaren eta hartutako pasiboen balioaren arteko diferentzia negozio konbinazioaren kostua baino handiagoa bada, eskuratzaileak batzuk eta besteak baloratu beharko ditu, ondorio fiskaletarako. Horretarako, transakzio kostua haien guztien artean banatuko du, haien arrazoizko balio erlatiboen arabera.»

Hamar.– 41. artikuluko 2. apartatua honela geratzen da idatzita:

«2.– Dena den, egoitza Europar Batasuneko beste estatu kide batera aldatzen denean edo Espainiako lurraldean dagoen establezimendu iraunkorrari atxikitako elementuak Europar Batasuneko beste estatu kide batera lekualdatzen direnean, zergadunak beti aukeratu ahal izango du aurreko apartatuan xedatutakoa aplikatzetik ondorioztatzen den kuotaren ordainketa geroratzea eta ondorengo lehen 5 urte jarraituetan amaitzen diren zergaldietan zatikatzea, betiere baldintza hauek betetzen badira:

a) Zerga honengatik aurkeztu behar duen autolikidazioarekin batera, edo aurreko 1. apartatuko c) letran aipatutako zirkunstantzia betetzen den zergaldiagatik aurkeztu beharrekoarekin batera, zergadunak aurreko 1. apartatuan xedatutakoa aplikagarri duten ondare elementuen zerrenda indibidualizatu bat aurkeztu behar du, eta bertan adierazi zein den elementu horien kontabilitate balioa, zer alde dagoen haietako bakoitzaren merkatuko balio normalaren eta kontabilitate balioaren artean, eta, azkenik, zer zati dagokion elementu bakoitzari kuota osoaren zenbatekoan.

b) Kuota ez kobratzeko arrisku frogagarri eta benetako bat dagoen guztietan, kreditu entitatearen edo elkarren bermerako sozietatearen abal solidario bidez edo kauzio aseguruko ziurtagiri bidez, bermatu behar da kuota kobratuko dela zergadunak apartatu honetako baldintzetan zatikatu duen ordainketaren zenbatekoraino.

Apartatu honetan ezarritako kasuetan, zergadunak, apartatu honetako lehen paragrafoan aipatutako zergaldietako bakoitzari dagokion autolikidazioarekin batera, ordaindu beharko du kuota zatikatuaren bostena gehi dagozkion berandutze interesak.

Zergadunak eskatu ahal izango du apartatu honetako b) letran xedatutakoaren arabera emandako bermea murriztu dadila ordaindutakoak kuota geroratu osoarekiko adierazten duen proportzioan. Aurreko paragrafoetan jasotakoa hala izanik ere, gainerako kuota zatikatua bere osoan ordaintzea exijituko da, berandutze interesak ere barne, ondare elementuak hirugarren bati eskualdatu zaizkionean, Europar Batasunetik kanpo kokatutako establezimendu iraunkor bati atxiki zaizkionean, edo entitatearen balantzean baja eman zaienean.

Horrelakoetan, zergadunak, aurreko paragrafoan aipatutako zirkunstantziak gertatzen diren zergaldiko autolikidazioarekin batera, gainerako kuota zatikatuen zenbatekoa ere ordaindu beharko du, berandutze interesak barne, eta zenbateko hori aipatutako zergaldian esandako zirkunstantziak gertatu diren ondare elementuei dagokiena izango da.

Apartatu honetan xedatutakoa berdin aplikatuko da egoitza aldaketa edo Espainiako lurraldean kokatutako establezimendu iraunkorrari atxikitako elementuen transferentzia Europako Esparru Ekonomikoko beste estatu batera egiten denean, baldin eta estatu horren eta Espainiako Erresumaren edo Europar Batasunaren artean kreditu tributarioen kobrantzarekin zer ikusia duen elkar laguntzari buruzko akordio bat izenpetu bada, eta elkar laguntza hori zuzentarau honek aurreikusten duenaren baliokidea bada: Kontseiluaren 2010eko martxoaren 16ko 2010/24/EB Zuzentaraua, zergei, eskubide jakin batzuei eta bestelako neurriei dagozkien kredituak kobratzeko orduan elkarri laguntzeari buruzkoa.»

Hamaika.– Bigarren paragrafo bat gehitzen zaio 47. artikuluko 3. apartatuari, honela dioena:

«Orobat, artikulu honetan xedatutakoa ez zaie aplikatuko foru arau honen 25 bis artikuluaren arabera finantza gastuen kenkaria mugatua duten zergadunei.»

Hamabi.– Honela geratzen dira idatzita 48. artikuluaren 1. apartatuko b) letra eta artikulu horren 7. apartatua:

«b) Lurralde espainiarren egoitzarik ez duen entitateak ordaindutako zenbatekoa, zerga honen berdina edo antzekoa den karga batengatik 2. apartatuan jasotako errenta motetako bati egotzi dakiokeena, txikiagoa izatea diferentzia hau baino: zerga honen arauei jarraituz ordaindu beharko litzatekeenaren eta entitate ez-egoiliarrak benetan ordaindutakoaren arteko diferentzia.»

«7.– Lurralde espainiarrean egoiliar ez den entitateak bere ekitaldi soziala amaitu duen egunari dagokion zergaldian sartu beharko ditu errentak. Horretarako, ekitaldi sozialaren iraupena ezin da izan hamabi hilabete baino luzeagoa.»

Hamahiru.– 53.2 artikuluko d) letra honela geratzen da idatzita:

«d) Inbertsioa egitea, kapitaleko partaidetzaren bitartez, hazteko ahalmen handia duten mikroenpresa edo enpresa txiki eta ertainen enpresa-proiektu berriren bat garatzeko hasierako etapan edo garapen etapan. Inbertsio hori egiteaz gainera, norberaren lanbide esperientziaren ekarpena egin daiteke, epe ertaineko errentagarritasuna lortze aldera, bussiness angel edo inbertsiogile pribatu informalaren figura dela medio.

Aurreko paragrafoan jasotakoaren ondorioetarako, ulertuko da enpresa proiektu berri bat dagoela baldintza hauek betetzen direnean:

a») Entitate partaidetua eratu denetik bost urte baino gutxiago igaro direnean.

b») Entitate horren bitartez ez denean egitea lehenago beste titulartasun batekin egiten zen jarduera bera.

Merkatu arautuetan kotizatzen ez duten baloreak lehen mailako merkatuan harpidetuz gauzatu beharko da erreserba.

d) letra honetan aipatzen den erreserba gauzatzeko garaian, muga hauek ezingo dira gainditu:

– 300.000 euro inbertsiogile eta zergaldi bakoitzeko.

– 300.000 euro enpresa proiektu berri bakoitzeko, aurreko a») letran aipatutako epe osoan zehar.

Aurreko muga kuantitatiboak gainditzen badira, inbertsiogile eta zergaldi horren kasuan, edo proiektu horretan, bakarrik 300.000 euroko erreserba gauzatu dela ulertuko da.

Erreserba behin gauzatuta, inbertsioa egin duen entitateak, foru arau honen 42. artikuluko 3. apartatuan aipatzen diren pertsona edo entitate lotuekin batera, ezingo du eduki, ez zuzenean ez zeharka, 100eko 40tik gorako partaidetzarik entitate partaidetuaren kapital sozialean edo boto eskubideetan, partaidetza edukitzen duen zergaldietako ezein egunetan.

Inbertsiogileak, enpresaren akzio edo partaidetzak harpidetzeaz gainera, bere esperientzia profesionalaren ekarpena egin nahi badio enpresaren kudeaketari inbertsiogile pribatu informalak edo «business angels» deitutako formulak erabiliz, ekarpen hori ezingo da gauzatu ordainpeko harreman baten bitartez.

Apartatu honetako d) letran xedatutakoa ez da aplikagarria izango baldin eta eskurapena foru arau honen 42. artikuluko 3. apartatuan ezarritako moduan lotuta dagoen entitate bati egiten bazaio, edo entitate partaidetua eragiketa hauetako bat egiteagatik sortu bada: bat-egiteak, zatiketak, aktiboen ekarpenak, aktibo eta pasibo osoaren lagapenak, jarduera adarren ekarpenak, interes ekonomikoko taldeak, aldi baterako enpresa elkarteak, eta jarduera ekonomiko berri bat benetan eta eraginkortasunez agertzea eragiten ez duen beste edozein eragiketa.»

Hamalau.– 55. artikuluko 1. apartatua honela geratzen da idatzita:

«1.– Likidatu edo autolikidatu diren zerga oinarri negatiboak hurrengo hogeita hamar urte jarraituetan amaitzen diren zergaldietako errenta positiboekin konpentsatu ahal izango dira, muga hau aplikatuta beti: konpentsazioa egin aurretik dagoen zerga oinarri positiboaren 100eko 50. Foru arau honen 13. artikuluan definitutako mikroenpresen eta enpresa txikien kasuan, muga hori 100eko 70ekoa izango da.

Zerga oinarri negatiboen konpentsazioak duen muga ez da aplikagarria izango zergadunaren hartzekodunekin adostutako kitei edo itxaronaldiei dagozkien errenten zenbatekoan.

Apartatu honetan aurreikusitako mugak ez dira aplikatuko entitatea desagertzen den zergaldian, salbu eta desagerpen hori foru arau honen VI. tituluko VII. kapituluan ezarritako zerga araubide berezia aplikagarri duen berregituratze baten ondorio bada.

Sorrera berriko entitateek zerga oinarri positiboa ematen duen lehen zergalditik aurrera konputatu ahal izango dute apartatu honetan aipatzen den konpentsazio epea. Halaber, arau bera aplikatu ahal izango da autobide, tunel eta ordainpeko bide berrien emakida lortzen duten sozietateek jarduera horien ustiapenagatik dituzten zerga oinarri negatiboei dagokienez.»

Hamabost.– Aldatu egiten dira 56. artikuluaren 1., 3. eta 6. apartatuak, eta honela geratzen dira idatzita:

«1.– Karga tasa orokorra hauxe izango da:

a) Oro har, 100eko 24.

b) Foru arau honetako 13. artikuluko mikroenpresentzat eta enpresa txikientzat, 100eko 20.

c) Kreditu entitateentzat eta foru arau honen VI. tituluaren VI. kapituluan jasotako erregelei jarraituz zergapetuta dagoen talde fiskal baten barruan dauden entitateentzat taldearen barruan dauden entitateetako bat kreditu entitatea denean, 100eko 28.»

«3.– 100eko 19ko karga tasa jasango dute:

a) Foru arau honetako 12. artikuluko 2. apartatuan aipatutako entitateek, salbuespen partziala dutenek.

b) Aseguru orokorretako mutuek eta borondatezko gizarte aurreikuspeneko entitateek, hurrengo 5. apartatuko tasa aplikatzen ez bazaie.

c) Elkarrekiko berme sozietateek eta birfinkapeneko sozietateek, Espainiako Bankuaren erregistro berezian inskribatuta badaude.

d) Balore burtsetako sozietate artezkariek eta agentziek eta Balore Merkatuari buruzko Legeak ezarritakoaren arabera Bilboko Balore Burtsako legezko kide diren balore eta burtsa sozietateek eta agentziek.»

«6.– 100eko 31ko tasarekin tributatuko dute hidrokarburoen sorguneak eta lurrazpiko biltokiak miatu, ikertu eta ustiatzen dituzten entitateek, Hidrokarburoen Sektoreari buruzko urriaren 7ko 34/1998 Legeak jasotakoaren arabera.

Birfintzeari loturik dauden jarduerak eta ikerkuntza, ustiapen, garraio, biltegiratze, arazketa eta ateratako hidrokarburoen salmentaz ateko bestelako jarduera guztiak, bai eta gainerakoen jabetzapeko hidrokarburoen lurrazpiko biltegiratze-jarduera ere, karga tasa orokorraren pean jarriko dira.

Hirugarrenen jabetzako hidrokarburoak biltegiratzen soilik aritzen diren entitateei ezin zaie aplikatu foru arau honetako 20. artikuluko 3. apartatuan, 29. artikuluan eta 55. artikuluko 4. apartatuan xedatutakoa, eta artikulu honetako 1. apartatuan ezarritako tasa orokorraren arabera ordaindu behar dute zerga.»

Hamasei.– 59. artikulua honela geratzen da idatzita:

«59. artikulua.– Kuota efektiboa eta gutxieneko tributazioa.

1.– Kuota efektiboa kuota likidotik titulu honetako III. kapituluan ezarritako kenkarien zenbatekoa kenduta geratzen den kopurua da.

2.– Kuota efektiboa ezin da izan negatiboa.

3.– Zerga-oinarri positiboak eduki dituzten zergadunen kuota efektiboa, hau da, kuota likidoari kenkariak (foru-arau honetako 62.etik 64.era bitarteko artikuluetakoak ez beste guztiak) aplikatzearen ondorioko kopurua ezin da izan zerga oinarriaren 100eko 17 baino gutxiago, oro har. Foru arau honetako 56.1 artikuluaren c) letran aipatutako entitateen kasuan, aldiz, portzentaje hori 100eko 13 izango da.

Hala ere, kuota likidoa kenkariak aplikatuta murriztearen ondoriozko kuota efektiboa ezin da izan ondoko kasu hauetako ehunekoa baino gutxiago:

a) Enpresa txikiak edo mikroenpresak: zerga oinarriaren 100eko 15.

b) Foru arau honetako 56. artikuluko 3. apartatuan ezarritako karga tasa jasaten duten entitateak: zerga oinarriaren 100eko 11,75.

c) Foru arau honetako 56. artikuluko 6. apartatuan ezarritako karga tasa jasaten duten entitateak: zerga oinarriaren 100eko 20,25.

4.– Entitateak aurreko ekitaldiko plantillako lan kontratu dunen batez besteko kopurua mantentzen badu edo gehitzen badu, aurreko apartatuko ehunekoak ondoko hauek aplikatuko dira, hurrenez hurren: 100eko 15, 100eko 11, 100eko 13, 100eko 9,75 eta 100eko 18,25.

5.– Aurreko bi apartatuetan xedatutakoa ez zaie aplikatuko foru arau honetako 56. artikuluko 2., 4. eta 5. apartatuetan ezarritako karga tasetako bat jasaten duten entitateei.»

Hamazazpi.– 60. artikuluko 8. apartatua honela idatzita geratzen da.

«8.– Kuota osoa nahikoa izan ez eta kendu ez diren zenbatekoak ondorengo lehen hogeita hamar urte jarraituetan amaitzen diren zergaldietako kuota osoetatik kendu ahal izango dira.

Apartatu honetan xedatutakoa ez zaie aplikatuko artikulu honetako 5. apartatuan ezarritakoaren arabera kentzen diren kopuruei.»

Hemezortzi.– 61.3 artikuluko d) letra honela geratzen da idatzita:

«d) Inbertsioaren xede diren aktiboen zenbateko osoak aktibo ez-korrontearen kontabilitate balio garbien baturaren 100eko 10 baino handiagoa izan behar du ekitaldi bakoitzean, kontabilizatutako amortizazioak eta balio-narriaduragatik izandako galerak kendu ondoren. Aktibo ez-korronte horrek ibilgetu materialaren, higiezinetako inbertsioen eta aplikazio informatikoek eta artikulu honetako 1.d) apartatuan aipatutako inbertsioek osatzen duten ibilgetu ukiezinaren parte izan behar du. Beste edozein kasutan, aktibo horien zenbateko osoak 5 milioi eurotik gorakoa izan behar du urtean.

Kontabilitate balioa zehazteko, inbertsioa egin den ekitaldia hasi aurreko lehen zergaldiko azken egunari dagokion balantzea hartuko da kontuan, baina egun horretan inbertsio bat dagoeneko martxan badago, ez da konputatuko inbertsioaren xede den aktibo ez-korronte horri dagokion balioa.

Betekizun hau betetzeari begira, artikulu honen 1. eta 2. apartatuetan aipatzen diren aktiboetan egindako inbertsioak baino ez dira konputatuko, betiere apartatu honetako aurreko letretako betekizunak betetzen badituzte; beraz, artikulu honetan xedatutakoaren arabera hobaritu daitezkeen inbertsioak soilik konputatu beharko dira.»

Hemeretzi.– 64 bis artikulua honela geratzen da idatzita:

«64 bis artikulua.– Sorrera berriko entitate berritzaileek egindako ikerketa eta garapeneko edo berrikuntza teknologikoko proiektuetan parte hartzea.

1.– Zerga honen zergadunek edo establezimendu iraunkorrarekin diharduten ez-egoiliarren errentaren gaineko zergaren zergadunek parte hartzen badute beste zergadun batzuek egindako ikerketa, garapen edo berrikuntza teknologikoko proiektuen finantzaketan eta proiektu horiek bete egiten badituzte foru arau honetako 62tik 64ra bitarteko artikuluetan ezarritako kenkarietarako eskubidea izateko artikulu horietan bertan ezartzen diren baldintzak, bada, orduan, zergadun horiek eskubidea izango dute kenkaria egiteko beren kuota likidoan, artikulu honetan ezarritako baldintza eta betekizunekin; nolanahi ere, kenkari hori bateraezina izango da, osorik edo zati batean, zergadunok artikulu horietan ezarritakoaren ondorioz aplika litezkeen kenkariekin.

Ondorio horietarako, ulertuko da zergadun batek beste zergadun baten ikerketa, garapen edo berrikuntza teknologikoko proiektu baten finantzaketan parte hartzen duela proiektuko kostu osoak edo haien zati bat ordaintzeko diru-kopuruak jartzen dituenean, eta proiektua egiten duen zergadunak diru-kopuru horiek itzultzea aurreikusten ez denean.

Ez da onartuko ikerketa, garapen edo berrikuntza teknologiko proiektu baten finantzaketan parte hartzen duen zergadunaren posizioan subrogatzea, oinordetza unibertsalaren kasuetan izan ezik.

2.– Artikulu honetan xedatutakoa aplikatzeko, baldintza hauek bete beharko dira:

a) Proiektuaren finantzaketan parte hartzen duen zergadunak eta foru arau honen 42. artikuluko 3. apartatuaren arabera hari lotuta dauden pertsonek edo entitateek, parte hartu gabeak izan behar dute, zuzenean edo zeharka, proiektua egiten duen entitatean, kenkari hau aplikatu baino lehen.

b) Proiektuaren finantzaketan parte hartzen duen zergadunak eta foru arau honen 42. artikuluko 3. apartatuaren arabera hari lotuta dauden pertsonek edo entitateek, ezin dute eduki zuzeneko edo zeharkako partaidetzarik proiektua egiten duen entitatean, ez proiektua egiten den bitartean ez hura amaitu ondorengo hiru urteetan.

c) Ikerketa, garapen edo berrikuntza teknologikoko proiektua egiten duen zergadunak beharkizun hauek ditu:

a») Sorrera berriko entitate berritzailea izatea, urtarrilaren 17ko 3/2014 Foru Arauak, Gipuzkoako Lurralde Historikoko Pertsona Fisikoen Errentaren gaineko Zergarenak, 89 ter artikuluko 1. apartatuan xedatutako eran.

b») Aipatutako artikuluko 4. apartatuan aipatzen diren baldintzak betetzea. Ondorio horietarako, apartatu horretan jasotako baldintzak bete beharko dira proiektua garatzen den denboran zehar, salbu eta b) eta c) letretan aipatutakoak, horiek kontratua formalizatzen den unean bete beharko dira-eta.

d) Bai ikerketa, garapen edo berrikuntza teknologikoko proiektua egiten duen zergadunak bai haren finantzaketan parte hartzen duen zergadunak finantzaketa kontratu bat izenpetu behar dute, eta bertan honako datuok zehaztu behar dira, besteak beste:

a») Proiektuan parte hartzen duten zergadunen identitatea.

b») Ikerketa, garapen edo berrikuntza teknologikoko proiektuaren deskripzioa.

c») Proiektuaren aurrekontua.

d») Proiektua finantzatzeko modua, bereizita adieraziz zer kopuru jarriko dituen proiektua egiten duen zergadunak, zeintzuk jarriko dituen proiektuaren finantzaketan parte hartzen duenak, eta zeintzuk dagozkien finantza erakundeen kredituei, diru-laguntzei eta bestelako laguntza neurriei.

e») Erregelamendu bidez zehazten diren gainerako guztiak.

d) letra honetan aipatzen den finantzaketa kontratua proiektua exekutatzen hasi aurretik formalizatu beharko da.

Dena den, finantzaketa kontratua proiektua hasi ondorengo lehen hiru hilabeteetan ere formalizatu ahal izango da, baldin eta proiektua exekutatzen hasi aurretik artikulu honen 7. apartatuan aipatzen den txostena eskatu bada, eta proiektua garatzen hasi den zergaldia artean amaitu gabe badago. Kasu horretan, finantzaketa kontratuari hurrengo 7. apartatuan aipatzen den txostena eskatu izanaren kopia erantsi beharko zaio, eta aurreko 1. apartatuan xedatutakoa aplikatu gabe geratuko da txosten hori jaso arte.

3.– Proiektuaren finantzaketan parte hartzen duen zergadunak ezingo du eskuratu jabetza intelektualeko edo industrialeko eskubiderik, ez eta beste modu bateko eskubiderik ere, proiektuaren emaitzei dagokienez; izan ere, haien jabetza proiektua egiten duen zergadunarena izango da beti.

4.– Zergadunak artikulu honetan ezarritako araubidea aplikatzea aukeratzen badu, ikerketa, garapen edo berrikuntza teknologikoko proiektua egiten duen zergadunak ez du eskubiderik izango foru arau honetako 62tik 64ra bitarteko artikuluetan ezarritako kenkariak osorik edo zati batean aplikatzeko. Haren ordez, proiektuaren finantzaketan parte hartzen duen zergadunak izango du artikulu horietan aurreikusitako kenkaria bere autolikidazioan aplikatzeko eskubidea, eta kenkari horren zenbatekoa kalkulatuko da proiektua egiten duen zergadunari aplikatuko litzaizkiokeen baldintza berdinetan.

Aurretik jasotakoa jasota ere, proiektuaren finantzaketan parte hartzen duen zergadunak kuotan gehienez ere aplika dezakeen kenkariaren zenbatekoa hau da: zergadunak berak proiektua finantzatzeko ordaindutako zenbatekoa bider 1,20 eginez ateratzen den zenbatekoa.

Soberakina egonez gero, ikerketa garapen edo berrikuntza teknologikoko proiektua egiten duen zergadunak aplikatu ahal izango du.

Apartatu honetan ezarritako muga ikerketa, garapen edo berrikuntza teknologikoko proiektua garatzen den zergaldi guztietarako aplikatuko da.

5.– Zergadun batek bere taldearekin batera artikulu honi jarraituz zehaztutako kenkarien batura ezin izango da izan 200.000 eurotik gorakoa hiru zergaldi jarraituetan. Horretarako, kontuan hartuko dira bai ikerketa, garapen edo berrikuntza teknologikoko proiektuaren finantzaketan parte hartzen duen zergadunak aplikatutako kenkariak eta bai Merkataritza Kodearen 42. artikuluari jarraituz zergadun taldeko kide diren entitateek aplikatutakoak.

Ikerketa, garapen edo berrikuntza teknologikoko proiektua egiten duen zergadunak aplikatutako kenkariak eta Merkataritza Kodearen 42. artikuluari jarraituz zergadun taldeko kide diren entitateek artikulu honetan xedatutakoa aplikatzeagatik jaso duten finantzaketa ezin izango da 200.000 eurotik gorakoa izan hiru zergaldi jarraituetan.

Enpresa eskurapenetan eta foru arau honen VI. tituluko VII. kapituluan ezarritako araubide berezira bildutako bat-egiteetan, apartatu honetan ezarritako mugak aintzat hartuko dira enpresa eskuratzaileari edo entitate berriari artikulu honetan aipatu diren geroko proiektuetan zer partaidetza dagokion zehazteko.

6.– Ikerketa, garapen edo berrikuntza teknologikoko proiektuaren finantzaketan parte hartzen duen zergadunak kenkaria aplikatzen badu, aplikazio hori kontuan hartu beharko da bai foru arau honen 59. artikuluko 3. apartatuan gutxieneko tributazioari buruz ezarritako erregelaren ondorioetarako, bai foru arau honen 67. artikuluko 1. apartatuan ezarrita dagoen 100eko 35eko baterako muga aplikatzeko.

Zergaldi batean zenbateko batzuk aplikatu gabe geratu badira apartatu honetan aipatutako mugaren ondorioz, aplikatu ez diren zenbateko horiek hurrengo zergaldietan aplikatu ahal izango dira, betiere esandako muga errespetatuz.

7.– Artikulu honetan xedatutakoa aplikatzeko, nahitaezkoa izango da aurreko 2. apartatuan aipatu den finantzaketa kontratua sinatu baino lehen foru arau honen 64. artikuluko 2. apartatuan aipatzen den txosten arrazoitua lortu izana. Txosten hori, aipatutako kontratuarekin batera, komunikazio baten bitartez aurkeztu beharko zaio zerga administrazioari, bai ikerketa, garapen edo berrikuntza teknologikoko proiektua egiten duen zergadunak, bai finantzaketan parte hartzen duenak izenpetuta. Proiektuaren garapena hasten den zergaldia amaitu baino lehen aurkeztu beharko da komunikazioa, erregelamenduz ezartzen diren baldintzetan.

Alabaina, aurreko 2. apartatuko d) letraren azken paragrafoan jasotako kasuan, komunikaziori txostena eskatu izanaren kopia erantsi beharko zaio, eta zergadunak behin txostena jasotakoan, beste komunikazio osagarri bat aurkeztu beharko da, txosten hori erantsita duela, txostena jaso eta hiru hilabeteko epearen barruan.»

Hogei.– 66. artikulua honela geratzen da idatzita:

«66. artikulua.– Kenkaria enplegua sortzeagatik.

1.– Zergaldian zehar kontratatzen den pertsona bakoitzeko, hurrengo paragrafoan ezarritako kopurua kendu ahal izango da kuota likidotik, betiere pertsona horrek lan kontratu mugagabea badu, eta haren soldata kontratazioaren unean indarrean dagoen lanbidearteko gutxieneko soldata baino 100eko 70 handiagoa bada.

Aurreko paragrafoan esandako kenkaria, urteko soldata gordinaren 100eko 25ekoa izango da kontratatutako pertsona bakoitzeko, 5.000 euroko mugarekin.

Kontratatzen den pertsona lan merkatuan sartzeko zailtasun bereziak dituzten taldeetakoa bada Euskal Autonomia Erkidegoan indarrean dagoen araudian xedatutakoaren arabera, kopuru kengarria goian esandakoari jarraituz kendu daitekeenaren bikoitza izango da.

Lanaldi partzialeko kontratua duten langileen kasuan, kenkariaren muga langileak lanaldi osoarekiko egiten duen lanaldiaren proportzioan joango da.

2.– Aurreko apartatuan ezarritako kenkaria aplikatzeko, bi baldintza bete behar dira: lan kontratu mugagabea duten langileen kopurua ez murriztea kontratazioa egiten den zergaldiaren amaieran ez hurrengo hiru urteetan amaitzen diren zergaldietan, eta langile kopuru hori kenkaria sortu den zergaldiaren hasierakoa baino handiagoa izatea, kenkarirako eskubidea ematen duten kontratuen kopuru berean gutxienez.

Gainera, aurreko apartatuan aipatzen den langile kopuruak (azken ekitaldian lan kontratu mugagabea duten langileenak) handiagoa izan behar du kontratazio horiek egin aurreko zergaldikoa baino, kenkarirako eskubidea eman zuten kontratuen kopuru berean gutxienez.

Apartatu honetan xedatutakoa bete beharko da bai lan kontratu mugagabea duten langileei dagokienez, bai aurreko 1. apartatuko bi langile taldeei dagokienez, erregelamenduz ezartzen diren baldintzetan.

Lan harremana eten edo lanaldia murrizten bada langileen estatutuko 47. artikuluan jasotakoaren arabera, apartatu honetan ezarritako betekizunak ez dira bete beharko harik eta lan harremanaren etenak edo lanaldiaren murrizketak ondorioak izateari utzi arte.

Lan kontratu mugagabea duten langileen murrizketa konputatu gabe utziko da, baita ere, baldin eta, lan harreman bakoitza amaitu eta bi hilabeteko epean, enpresak langile kopuru bera kontratatzen badu. Kontratu berriei hurrengo apartatuko azken paragrafoan ezarritakoa aplikatuko zaie.

Era berean, kontratazioaren zergaldia amaitu ondorengo lehen hiru urteetan bukatzen diren zergaldietan, ezinbestekoa izango da kenkarirako eskubidea sortu duen pertsonari egotzi dakiokeen soldata mantentzea edo handiagoa izatea.

3.– Artikulu honen 2. apartatuan ezarritako betekizunak betetzen ez badira, zergadunak kenkaritik ondorioztatzen den kuota gehi berandutze interesak sartu beharko ditu ez-betetzea gertatzen den zergaldiko autolikidazioan.

Lan kontratu mugagabea duten langileen kopurua mantentzeari buruz ezarritakoa bere osoan betetzen ez den kasuetan, zirkunstantzia hori gertatzen den zergaldiko kuotari hauxe gehitu beharko dio zergadunak: mantendu ez diren langileen kopuruari edo zatikiari dagokion kenkariaren zati proportzionala gehi dagozkion berandutze interesak.

Langile kopurua kalkulatzearen ondorioetarako, lanaldi partziala duten lan kontratu mugagabedunak haien lanaldiak lanaldi osoarekiko adierazten duen proportzioan konputatuko dira.

Kenkarirako eskubidea ematen duen kontratua formalizatu den zergaldia bukatu ondorengo hiru urteetan hasitako zergaldietan zergapekoak lan kontratu berri bat formalizatzen badu, kontratu horrek kenkarirako eskubidea sortzeko betekizunak betetzen baditu, eta beharrezkoa gertatzen bada aurreko ekitaldi batean sortutako kenkarirako eskubidea finkatzeko, orduan lan kontratu horrek ez du kenkarirako eskubiderik sortuko aipatutako eskubidea finkatzeko beharrezkoa den zatian.

4.– Sozietateak eta enpresa indibidualak bat egin, banandu eta eraldatzeko eragiketak egiteak sozietate berriak sortzeko, ez du ekarriko, bere horretan, artikulu honetan araututako kenkaria aplikatzea.

5.– Foru arau honen 42. artikuluko 3. apartatuan jasotzen diren kasuetan, kenkari hau aplikatzeko garaian kontuan eduki beharko da lotutako entitateek batera duten egoera.»

Hogeita bat.– 67. artikuluko 1., 2., 3. eta 7. apartatuak honela geratzen dira idatzita:

«1.– Kapitulu honetan aurreikusitako kenkarien batura ezingo da izan kuota likidoaren 100eko 35etik gorakoa, salbu aurreko 62.etik 64.era bitarteko artikuluetan jasotakoen kasuan, haien muga kuota likidoaren 100eko 70 izango baita. Muga horietako bakoitzak eragindako kenkariak aldi berean gertatzekotan, 100eko 70eko muga kenkarien 100eko 35eko muga bateratua aplikatuta ateratzen den kuota likidoaren soberakinaren gainean aplikatuko da.

2.– Kuota nahikoa izan ez eta kentzen ez diren kopuruak ondorengo lehen hogeita hamar urte jarraituetan amaitzen diren zergaldietako likidazioetan aplikatu ahal izango dira, muga bera errespetatuta.

Kapitulu honetako kenkariak aplikatzeko epealdien konputua emaitza positiboak gertatzen diren lehen ekitaldira arte atzeratu ahal izango da preskripzio aldiaren barruan.

3.– Hitzartutako kontraprestazio osoa sartuko da kenkariaren oinarrian, salbu eta interesak, zeharkako zergak eta haien errekarguak, eraikuntza marjina eta lizitazioaren gastu teknikoak. Aurreko horiek ez dira kenkarian konputatuko, baina kontuan hartu ahal izango dira aktiboak edo gastuak baloratzeko.

Aurreko paragrafoan xedatutakoa hala izanik ere, sortzen diren kostuak baldin badatoz aipatutako kenkariak aplikatzeko eskubidea ematen duten aktiboak eraitsi edo desagerrarazteko obligazioengatik, kostu horiek ez dira sartuko kapitulu honetan aurreikusitako kenkarien oinarrian, aktiboak baloratzeko aintzat hartu badaitezke ere.

Errentamendu operatiboen kasuan, errentan eman edo laga den elementuan errentatzaileak inbertsio bat egiteagatik agerian jartzen diren aktiboei ez zaizkie aplikatuko kapitulu honetan jasotako kenkariak, berariaz hala ezartzen denean izan ezik.

Foru arau honen 31. artikuluko 3. apartatuan aipatutako ibilgailuen kasuan, kenkariak apartatu horren e) letran aipatutako ibilgailuei dagokienez bakarrik aplikatuko dira. Era berean, 31. artikuluaren 4. apartatuan aipatzen diren garraio elementuak direnean, kenkariak haren hirugarren apartatuan aipatutako elementuei dagokienez bakarrik aplikatuko dira.

Kenkariaren oinarria, horrela kalkulatua, ezingo da izan subjektu independentek merkatuko baldintza normaletan adostuko luketen prezioa baino handiagoa.

Inbertsioak ondasun higiezinetan egiten badira, lurzoruaren balioa kenkariaren oinarritik kanpo utziko da beti.

Halaber, behar den kasuetan, aipatutako oinarritik murriztuko da kapitulu honetako kenkariak eragiten dituzten inbertsioetarako edo jardueren sustapenerako jaso diren diru-laguntzei – kapitalekoei zein ustiapenekoei– hurrengo portzentajea aplikatzearen emaitza: 100 eta entitateari aplikatu beharreko zerga tasaren arteko diferentziatik ateratzen dena.

Kapitulu honetan araututako kenkarien oinarrian sartzen diren zenbateko guztiak ibilgetu moduan edo, hala badagokio, gastu moduan egon behar dute kontabilizatuta, Kontabilitate Plan Orokorreko arauei jarraituz.»

«7.– Kuota likidoko kenkariak aplikatzerakoan, honako hurrenkera hau jarraitu behar da:

a) Lehendabizi, aurreko ekitaldietan sortu diren eta artikulu honen 1. apartatuan ezarritako 100eko 35eko muga aplikagarri zaien kenkariak aplikatuko dira.

b) Bigarrenik, ekitaldian sortu diren eta artikulu honen 1. apartatuan ezarritako 100eko 35eko muga aplikagarri zaien kenkariak aplikatuko dira

c) Hirugarrenik, aurreko ekitaldietan sortu diren eta artikulu honen 1. apartatuan ezarritako 100eko 70eko muga aplikagarri zaien kenkariak aplikatuko dira.

d) Azkenik, ekitaldian sortu diren eta artikulu honen 1. apartatuan ezarritako 100eko 70eko muga aplikagarri zaien kenkariak aplikatuko dira.»

Hogeita bi.– 68. artikuluaren 1. apartatua honela idatzita geratzen da:

«1.– Kuota efektibotik kendu ahal izango dira:

a) Atxikipenak, salbu eta foru arau honetako 39. artikuluko 3. apartatuan xedaturikoa aplikatuta zerga oinarrian sartzen ez diren errentei dagozkienak.

b) Konturako sarrerak.

c) Ordainketa zatikatuak.»

Hogeita hiru.– 73. artikuluaren 1. apartatuko b) letra eta artikulu horren 3. apartatuko azken paragrafoa honela geratzen dira idatzita:

«b) Espainiako lurraldean bizi diren bazkideei hauek egotziko zaizkie:

a») Foru arau honen 25 bis artikuluaren arabera, zergaldian entitate horiek kenkari gisa aplikatu ez dituzten finantza gastu garbiak. Bazkideei egozten zaizkien finantza gastu garbiak ez dira kengarriak izango entitatearentzat.

b») Entitate horiek lortutako zerga oinarri positibo zein negatiboak. Bazkideei egozten zaizkien zerga oinarri negatiboak ez dira konpentsagarriak izango haiek lortu zituen entitatearentzat.

c») Entitateak kuotan aplika ditzakeen kenkariak. Kenkarien oinarriak bazkideen likidazioan sartuko dira, eta kuota gutxituko dute zerga honen edo pertsona fisikoen errentaren gaineko zergaren arauei jarraituz.

Nolanahi dela ere, bazkideek ekonomia intereseko taldeei egiten dizkieten ekarpenak ezaugarri bereziko ondare tresna gia kalifikatu behar badira kontabilitate irizpideen arabera, foru arau honen 62. eta 64. artikulu bitartean jasotzen diren kenkariak ez dira sartuko bazkideen likidazioan.

d») Entitateari dagozkion atxikipenak eta konturako sarrerak.

Nolanahi ere, bazkideek ekonomia intereseko taldeei egindako ekarpenak ezaugarri bereziko ondare tresna gisa kalifikatu behar badira kontabilitate irizpideen arabera, finantza gastu garbien, zerga oinarri negatiboen eta kuotako kenkarien egozpenak ezingo du gainditu, kuota terminoetan, bazkideak taldearen kapitalari egindako ekarpenen zenbatekoa bider 1,20 eginez ateratzen den zenbatekoa. Soberakina ez zaie inoiz ere egotziko bazkideei.»

«Era berean, eskurapen baliotik bazkideei egotzi zaizkien galera sozialen zenbatekoa gutxituko da. Nolanahi ere, kontabilitate irizpideek hala ezartzen dutenean, eskurapen baliotik gutxituko dira bazkideei eskurapenaren unetik eskualdaketara bitartean egotzitako finantza gastu garbiak, zerga oinarri negatiboak eta egotzi zaizkien kenkariak, harik eta eskurapen balio hori baliogabetu arte. Dagokion finantza sarrera ere zerga oinarrian sartu beharko da.»

Hogeita lau.– 79. artikuluko 3. apartatua honela geratzen da idatzita:

«3.– Inbertsio kolektiboko erakundeen bazkide edo partaideek aplikagarri izango dute artikulu honen 2. apartatuan aipatutako araubidea, baldintza hauek betetzen direnean: inbertsio erakunde horiek araututa egotea Europako Parlamentuaren eta Kontseiluaren 2009ko uztailaren 13ko 2009/65/EE Zuzentarauan, balio higigarrien inbertsio kolektiboko erakunde batzuei buruzko lege, erregelamendu eta administrazio xedapenak koordinatzeari buruzkoan, foru arau honen 81. artikuluan aurreikusitako erakundeak ez izatea, Europar Batasuneko estatu kideren batean eratuta eta helbideratuta egotea, eta Balore Merkatuko Batzorde Nazionalaren erregistro berezian inskribatuta egotea, egoitza Espainian duten entitateek merkaturatzearen ondorioetarako.»

Hogeita bost.– 89 bis artikulu berria gehitzen da, eduki hau duena:

«89 bis artikulua.– Finantza gastuen kengarritasuna mugatzea.

1.– Talde fiskalaren zerga oinarria zehaztearen ondorioetarako, foru arau honen 25 bis artikuluan finantza gastuen kengarritasunari dagokionez ezartzen den muga talde fiskal osoarekiko aplikatuko da. Muga hori ez da aplikatuko entitatea iraungitzen den kasuan, salbu eta iraungipena talde fiskalaren barruan gertatzen bada eta iraungitako entitateak, taldean sartzeko unean, oraindik kendu gabeko finantza gastuak baditu.

Hala ere, zerga baterakuntzaren araubidean dauden eta izaera horretakoak ez diren beste entitate batzuekin batera tributatzen duten kreditu entitateen edo aseguru etxeen kasuan, foru arau honen 25 bis artikuluan ezarritako muga kalkulatuko da azken entitate horien mozkin operatiboa eta gastu finantzarioak aintzat hartuta, baita talde osoari dagozkion ezabaketak eta txertaketak kontuan hartuta ere.

2.– Entitate bat talde fiskal batean sartzen bada, arau hauek aplikatuko dira talde fiskalaren zerga oinarria zehazteko:

a) Talde fiskalean sartzean kendu gabe dituen finantza gastu garbiak, foru arau honen 25 bis artikuluan aipatuak, entitatearen beraren mozkin operatiboaren 100eko 30eko mugarekin kenduko dira, betiere entitate horri dagozkion ezabaketak eta txertaketak kontuan hartuta, foru arau honen 90. eta 91. artikuluetan aurreikusten den moduan. Finantza gastu horiek 25 bis artikuluaren 1. apartatuan aipatzen den mugan ere hartuko dira kontuan.

Era berean, foru arau honen 25 bis artikuluko 2. apartatuan aurreikusitako diferentzia entitate batek talde fiskalean sartu aurretik sortu denean, entitateak berak sortutako finantza gastuei dagokienez izango da aplikagarria.

b) Foru arau honen 25 bis artikuluan ezarritakoaren ondorioetarako, zerga baterakuntzako talde batean sartzen diren edozein motatako entitateen kapitalaren edo funts propioen partaidetzak eskuratzeko zorretatik eratorritako finantza gastuak entitate edo talde fiskal eskuratzailearen mozkin operatiboaren 100eko 30eko muga gehigarriarekin kenduko dira, betiere dagozkion ezabaketak eta txertaketak kontuan hartuta, foru arau honen 90. eta 91. artikuluetan aurreikusten den moduan. Mozkin operatibo horretan ez da sartuko ez eskuratutako entitateari dagokiona ez eskurapena egin ondorengo 4 urteetan hasten diren zergaldietan talde fiskalean sartzen den beste ezein entitaterena. Finantza gastu horiek 25 bis artikuluaren 1. apartatuan aipatzen den mugan ere hartuko dira kontuan.

Letra honetan xedatutakoagatik kengarriak ez diren finantza gastuak hurrengo zergaldietan kendu ahal izango dira, betiere letra honetan eta foru arau honen 25 bis artikuluko 1. apartatuan ezarritako muga kontuan hartuta.

Letra honetan ezarritako muga ez da aplikagarria izango entitateen kapitalaren edo funts propioen partaidetzak eskuratzen diren zergaldian, baldin eta eskurapen hori zor bidez finantzatu bada eskurapen prezioaren 100eko 70ean gehienez. Era berean, muga hori ez da aplikatuko hurrengo zergaldietan, baldin eta, eskurapenaren unetik, zor horren zenbatekoa, gutxienez, hurrengo 8 urteetako bakoitzari dagokion zati proportzionalean murrizten bada, zorra eskurapen prezioaren 100eko 30era iritsi arte.»

Hogeita sei.– 99. artikuluaren 1. apartatuko lehen paragrafoa eta apartatu horretako c) letra honela geratzen dira idatzita:

«1.– Zerga baterakuntzaren araubidea galtzen den edo talde fiskala iraungitzen den zergaldian gertatzen bada badaudela txertatu gabeko ezabaketak, foru arau honen 51.4 artikuluaren arabera zerga oinarrian integratu beharreko zuzenketak, kendu edo konputatu ez diren finantza gastu garbiak, talde fiskalaren zerga oinarri negatiboak, edo kuotan konpentsatu gabeko kenkariak, ondoren zehazten den eran jokatuko da:»

«c) Zerga baterakuntzaren araubidea galtzen edo iraungitzen den zergaldian talde fiskaleko kide diren entitateek eskubidea bereganatuko dute talde fiskalak kendu gabe dituen finantza gastu garbiak kentzeko –foru arau honen 25 bis artikuluan aipatuak–, foru arau honen 25 bis artikuluko 2. apartatuan ezarritako diferentzia beren alde egozteko, eta talde fiskalean konpentsatu ez diren zerga oinarri negatiboak konpentsatzeko, betiere haien osaketan esku hartu duten proportzioan.

Konpentsazioa banakako tributazio erregimenean zehaztutako zerga oinarri positiboekin egingo da, foru arau honen 55. artikuluko 1. apartatuan aipatzen den epea osatu arte falta diren zergaldietan, talde fiskalaren zerga oinarri negatiboak zehaztu diren azken zergalditik edo zergaldietatik aurrera kontatuta.

Aurreko a) letrako bigarren edo hirugarren paragrafoan xedatutakoa aplikagarria den kasuetan, foru arau honen 89 bis artikuluko 2. apartatuan eta 92. artikuluko 2. apartatuan ezarritako arauak talde fiskaleko entitate guztiei aplikatuko zaizkie, izaera hori galdu duen entitate nagusia buruan dela; aldiz, talde fiskalak foru arau honen 85. artikuluko 1. apartatuaren bigarren paragrafoan ezarritako moduan eratu badira, taldea osatzen zuten entitateen multzoari aplikatuko zaizkio arauak.»

Hogeita zazpi.– 130 bis artikulu bat gehitzen da, eduki hau duena:

«130 bis artikulua.– Ordainketa zatikatua.

1.– Urte bakoitzeko urriaren lehen 25 egun naturalen barruan, zergadunek ordainketa zatikatu bat autolikidatu eta egin beharko dute urriaren 1ean hasita dagoen zergaldiko likidazioaren kontura.

Ordainketa zatikatu hori ez dute egin beharko foru arau honetako 13. artikuluari jarraituz mikroenpresatzat edo enpresa txikitzat hartutako entitateek, ezta foru arau honetako 56. artikuluaren 4. eta 5. apartatuetan ezarritako karga tasetan zergapetuta daudenek ere.

2.– Artikulu honetan aipatutako ordainketa zatikatua kalkulatzeko oinarria autolikidazio epea urriaren 1ean amaitua duen azken zergaldiko zerga oinarria izango da.

Sozietateen gaineko zergaren autolikidazio aurkeztu ez bada, eta horretara behartuta egonez gero, oinarritzat hartuko da aurkeztutako azken autolikidazioaren edo, hala badagokio, egindako azken likidazioaren zerga oinarria.

Autolikidazio epea lehen esandakoaren arabera amaitua duen azken zergaldia urtebetetik beherakoa denean, zerga oinarria urtebetera eramango da 12 hilabete osatu arte.

3.– Ordainketa zatikatuaren zenbatekoa kalkulatzeko, aurreko apartatuan adierazitako oinarriari 100eko 5eko portzentajea aplikatuko zaio. Hortik ateratzen den zenbatekotik, kendu egingo dira aurreko apartatuan aipatutako zergaldian zergadunak izan dituen diru-sarreren gainean egindako atxikipenak eta konturako sarrerak.

4.– Ordainketa zatikatua zerga zortzat hartuko da, eta zergaren kuota efektibotik kendu ahal izango da.

5.– Erregelamenduz ezarri ahal izango da Foru Aldundiak ofizioz likidatzea ordainketa zatikatua, eta, horretarako, finkatuko da zein kasutan erabiliko den likidatzeko modu hori.»

Hogeita zortzi.– Hogeita batgarren xedapen gehigarria honela geratzen da idatzita:

«Hogeita batgarren xedapen gehigarria. Bestelako araudi baten pean dauden ekonomia intereseko taldeetako bazkideak.

Foru arau honen 2. artikuluko 4. apartatuan ezarritakoagatik ekonomia intereseko taldeak ez badaude Gipuzkoako Lurralde Historikoko foru araudiaren pean, eta, hala ere, talde horietako bazkideei Gipuzkoako Lurralde Historikoko foru araudia aplikagarri bazaie bai zerga honetan bai pertsona fisikoen errentaren gaineko zergan, bazkide horiei foru arau honen 73. artikuluko 1. apartatuaren c») letraren bigarren paragrafoan eta b) letraren azken paragrafoan xedatutakoa aplikatuko zaie beti.»

Hogeita bederatzi.– Hogeita laugarren xedapen iragankor bat gehitzen da, eduki hau duena:

«Hogeita laugarren xedapen iragankorra. Kenkaria aldi baterako neurrien lehengoratzeagatik.

Foru arau honetako 56. artikuluaren 1. apartatuko a) eta b) letretan eta 6. apartatuan jasotako karga tasetan zergapetuta daudenek, baldin eta Balantzeen eguneratzeari buruzko otsailaren 5eko 1/2013 Foru Dekretu Arauan jasotako balantzeen eguneratzera bildu badira, kuota osotik kendu ahal izango dute zergaldiko zerga oinarria osatzen duten eta eguneratze horretatik ateratako balioaren gehikuntza garbiari dagokion amortizaziotik eratorriak diren kopuruen 100eko 4.

Era berean, foru arau honetako 56. artikuluaren 3. apartatuan jasotako karga tasan zergapetuta daudenek, baldin eta Balantzeen eguneratzeari buruzko otsailaren 5eko 1/2013 Foru Dekretu Araun jasotako balantzeen eguneratzera bildu badira, kuota osotik kendu ahal izango dute zergaldiko zerga oinarria osatzen duten eta eguneratze horretatik ateratako balioaren gehikuntza garbiari dagokion amortizaziotik eratorriak diren kopuruen 100eko 2.

Xedapen iragankor honetan jasotako kenkariei aplikagarri izango zaizkie foru arau honetako 60. artikuluaren 8. apartatuan jarritako arauak.»

Hogeita hamar.– Hogeita bosgarren xedapen iragankor bat gehitzen da, eduki hau duena:

«Hogeita bosgarren xedapen iragankorra. 2018ko urtarrilaren 1aren aurreko zerga oinarri negatiboak.

2018ko urtarrilaren 1etik aurrera hasten den lehen zergaldiaren hasietan konpentsatzeko dauden zerga oinarri negatiboak foru arau honetako 55. artikuluan xedatutakoaren arabera konpentsatuko dira; nolanahi ere, konpentsazio epea hogeita hamar urtekoa izango da.»

Hogeita hamaika.– Hogeita seigarren xedapen iragankor bat gehitzen da, eduki hau duena:

«Hogeita seigarren xedapen iragankorra. 2018ko urtarrilaren 1aren aurretik hasitako zergaldietan sortuak diren eta aplikatzeko dauden kuotako kenkariak.

Aurreko zergaldietan sortuak diren eta 2018ko urtarrilaren 1etik aurrera hasten den lehen zergaldiaren hasieran aplikatzeko dauden kuotako kenkariei dagozkien zenbatekoak foru arau honetako 60. artikuluaren 8. apartatuan eta 67. artikuluaren 1 eta 7 apartatuetan xedatutakoaren arabera aplikatuko dira; nolanahi ere, xedapen horietan jarritako hogeita hamar urteko epean aplikatuko dira.»

Hogeita hamabi.– Hogeita zazpigarren xedapen iragankor bat gehitzen da, eduki hau duena:

«Hogeita zazpigarren xedapen iragankorra. 2018ko zergaldirako aldi baterako neurriak.

Bakar-bakarrik 2018ko urtarrilaren 1etik abenduaren 31ra bitartean hasitako zergaldietarako, berezitasun hauek aplikatuko dira:

1.– 32. artikuluaren 4. apartatua honela idatzita geratzen da:

«4. Foru arau honetako 13. artikuluko 1. apartatuan aipatutako mikroenpresek euren zerga oinarritik kendu ahal izango dute, beren tamainak eragiten dituen zailtasunen zerga konpentsazio gisa, honako eragiketa hauek egin aurretik zehaztutako beren zerga oinarri positiboaren 100eko 15:

– apartatu honetan jasotako zerga konpentsazioa egin;

– foru arau honetako 48. artikuluan jasotako errenta positiboak sartu;

– foru arau honetako hogeigarren xedapen gehigarrian jasotako errentak; eta

– foru arau honetako 55. artikuluan jasotako zerga oinarri negatiboak konpentsatu.

Apartatu honetan xedatutakoa ez da aplikatuko, mikroenpresa ekonomia intereseko espainiar edo europar taldea denean edo aldi baterako enpresa elkartea denean, betiere VI. tituluko III. kapituluan jasotako araubide berezian zergapetuta badago.

Apartatu honetan xedatutakoa aplikatzea bateraezina izango da titulu honetako V. kapituluan ezarritako zuzenketak egitearekin.»

2.– 56. artikuluaren 1., 3. eta 6. apartatuak honela idatzita geratzen dira:

«1. Karga tasa orokorra hauxe izango da:

a) Oro har, 100eko 26.

b) Foru arau honetako 13. artikuluko mikroenpresentzat eta enpresa txikientzat, 100eko 22.

c) Kreditu entitateentzat eta foru arau honen VI. tituluaren VI. kapituluan jasotako erregelei jarraituz zergapetuta dagoen talde fiskal baten barruan dauden entitateentzat taldearen barruan dauden entitateetako bat kreditu entitatea denean, 100eko 28.»

«3. 100eko 20ko karga tasa jasango dute:

a) Foru arau honetako 12. artikuluko 2. apartatuan aipatutako entitateek, salbuespen partziala dutenek.

b) Aseguru orokorretako mutuek eta borondatezko gizarte aurreikuspeneko entitateek, hurrengo 5. apartatuko tasa aplikatzen ez bazaie.

c) Elkarrekiko berme sozietateek eta birfinkapeneko sozietateek, Espainiako Bankuaren erregistro berezian inskribatuta badaude.

d) Balore burtsetako sozietate artezkariek eta agentziek eta Balore Merkatuari buruzko Legeak ezarritakoaren arabera Bilboko Balore Burtsako legezko kide diren balore eta burtsa sozietateek eta agentziek.»

«6. 100eko 33ko tasarekin tributatuko dute hidrokarburoen sorguneak eta lurrazpiko biltokiak miatu, ikertu eta ustiatzen dituzten entitateek, Hidrokarburoen Sektoreari buruzko urriaren 7ko 34/1998 Legeak jasotakoaren arabera.

Birfintzeari loturik dauden jarduerak eta ikerkuntza, ustiapen, garraio, biltegiratze, arazketa eta ateratako hidrokarburoen salmentaz ateko bestelako jarduera guztiak, bai eta gainerakoen jabetzapeko hidrokarburoen lurrazpiko biltegiratze-jarduera ere, karga tasa orokorraren pean jarriko dira.

Hirugarrenen jabetzako hidrokarburoak biltegiratzen soilik aritzen diren entitateei ezin zaie aplikatu foru arau honetako 20. artikuluko 3. apartatuan, 29. artikuluan eta 55. artikuluko 4. apartatuan xedatutakoa, eta artikulu honetako 1. apartatuan ezarritako tasa orokorraren arabera ordaindu behar dute zerga.»

3.– 59. artikulua honela idatzita geratzen da:

«59. artikulua.– Kuota efektiboa eta gutxieneko tributazioa.

1.– Kuota efektiboa kuota likidotik titulu honetako III. kapituluan ezarritako kenkarien zenbatekoa kenduta geratzen den kopurua da.

2.– Kuota efektiboa ezin da izan negatiboa.

3.– Zerga-oinarri positiboak eduki dituzten zergadunen kuota efektiboa, hau da, kuota likidoari kenkariak (foru-arau honetako 62.etik 64.era bitarteko artikuluetakoak ez beste guztiak) aplikatzearen ondorioko kopurua ezin da izan zerga oinarriaren 100eko 15 baino gutxiago, oro har. Foru arau honetako 56.1 artikuluaren c) letran aipatutako entitateen kasuan, aldiz, portzentaje hori 100eko 13 izango da.

Hala ere, kuota likidoa kenkariak aplikatuta murriztearen ondoriozko kuota efektiboa ezin da izan ondoko kasu hauetako ehunekoa baino gutxiago.

a) Enpresa txikiak edo mikroenpresak: zerga oinarriaren 100eko 13.

b) Foru arau honetako 56. artikuluko 3. apartatuan ezarritako karga tasa jasaten duten entitateak: zerga oinarriaren 100eko 10,75.

c) Foru arau honetako 56. artikuluko 6. apartatuan ezarritako karga tasa jasaten duten entitateak: zerga oinarriaren 100eko 18,25.

4.– Entitateak aurreko ekitaldiko plantillako lan kontratudunen batez besteko kopurua mantentzen badu edo gehitzen badu, aurreko apartatuko ehunekoak barik ondoko hauek aplikatuko dira, hurrenez hurren: 100eko 13, 100eko 11, 100eko 11, 100eko 8,75 eta 100eko 16,25.

5.– Aurreko bi apartatuetan xedatutakoa ez zaie aplikatuko foru arau honetako 56. artikuluko 2., 4. eta 5. apartatuetan ezarritako karga tasetako bat jasaten duten entitateei.»

6.– Hogeita laugarren xedapen iragankorra honela idatzita geratzen da:

«Hogeita laugarren xedapen iragankorra. Kenkaria 2018ko aldi baterako neurrien lehengoratzeagatik.

Foru arau honetako 56. artikuluaren 1. apartatuko a) eta b) letretan eta 6. apartatuan jasotako karga tasetan zergapetuta daudenek, baldin eta Balantzeen eguneratzeari buruzko otsailaren 5eko 1/2013 Foru Dekretu Arauan jasotako balantzeen eguneratzera bildu badira, kuota osotik kendu ahal izango dute zergaldiko zerga oinarria osatzen duten eta eguneratze horretatik ateratako balioaren gehikuntza garbiari dagokion amortizaziotik eratorriak diren kopuruen 100eko 2.

Era berean, foru arau honetako 56. artikuluaren 3. apartatuan jasotako karga tasan zergapetuta daudenek, baldin eta Balantzeen eguneratzeari buruzko otsailaren 5eko 1/2013 Foru Dekretu Arauan jasotako balantzeen eguneratzera bildu badira, kuota osotik kendu ahal izango dute zergaldiko zerga oinarria osatzen duten eta eguneratze horretatik ateratako balioaren gehikuntza garbiari dagokion amortizaziotik eratorriak diren kopuruen 100eko 1.

Xedapen iragankor honetan jasotako kenkariei aplikatuko zaizkie foru arau honetako 60. artikuluaren 8. apartatuan jarritako arauak.»»

3. artikulua.– Kooperatiben araubide fiskalaren aldaketa.

2018ko urtarrilaren 1etik aurrera hasitako zergaldietarako ondorioekin, aldatu egiten da Kooperatiben Araubide Fiskalari buruzko maiatzaren 22ko 2/1997 Foru Arauaren 22. artikuluaren 1. apartatua, eta honela idatzita geratzen da:

«1.– Sozietate kooperatiboek indarrean dagoen ordenamenduak agintzen dituen atxikipenak egin beharko dizkiete beren bazkideei eta hirugarrenei, bai eta bidezkoak gertatzen diren konturako beste ordainketa guztiak gauzatu ere.

Gertatzen bada, hain zuzen, bazkideak lankide kooperatibetako bazkide langile direla edo beste edozein kooperatibatako lan-bazkide modura ari direla, lan pertsonalaren etekinak kapital higiezinaren etekinetatik bereiziko dira. Lan aurrerakinen zenbatekoa lan etekinak direla joko da, baina dagokion jarduera sektorerako zonan ematen diren ordainsari arrunten zenbatekoa gainditu gabe.

Era berean, Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauak 130 bis artikuluan aipatutako ordainketa zatikatuak egitera behartuta egongo dira, salbu eta aipatutako foru arauaren 13. artikuluan mikroenpresatzat edo enpresa txikitzat hartzeko jasotako beharkizunak betetzen dituzten sozietate kooperatiboak badira.»

4. artikulua.– Ondare eskualdaketen eta egintza juridiko dokumentatuen gaineko zerga aldatzea.

Aldaketa hauek sartzen dira Ondare Eskualdaketen eta Egintza Juridiko Dokumentatuen gaineko Zergaren abenduaren 30eko 18/1987 Foru Arauan:

Bat.– 7. artikuluaren 5. apartatuko b) letrari amaierako paragrafo berri bat gehitzen zaio, eduki hau duena:

«Letra honetan jasotakoa ez zaie aplikatuko konkurtso prozeduren barruan egindako produkzio unitateen eskualdaketei, eskuratzailea produkzio unitate horietan sartutako ondasun higiezinen entregen kuotaren kenkari osoa egiteko eskubidea duen balio erantsiaren gaineko zergaren zergadun bat denean, baldin eta eskualdaketa horiek zerga horri lotuta eta salbuetsi gabe badaude.»

Bi.– 41. artikuluaren I. apartatuko B) letraren 21. eta 40. zenbakiak honela idatzita geraten dira:

«21.– Espainiako Bankuko Erregistro Berezian izena emanda dauden elkarren bermerako sozietateen kapitala eratzea, gehitzea edo murriztea, eta hori formalizatzeko beharrezkoak diren egintzak eta agiriak.

Salbuespen bera aplikatuko zaio Espainiako Bankuko Erregistro Berezian izena emanda dagoen elkarren bermerako sozietatearen eta bermearen onura jaso duen bazkidearen arteko harreman juridikoari, bai eta harreman hori formalizatzeko egiten den agiriari ere.

Era berean, ondare eskualdaketen eta egintza juridiko dokumentatuen gaineko zergatik salbuetsita egongo da Espainiako Bankuko Erregistro Berezian izena emanda dagoen elkarren bermerako sozietatearen alde edozein berme ematea, aurreko paragrafoan aipatutako harreman juridikoari dagokionez, bai eta berme horiek formalizatzeko egiten diren agiriak ere.

Aurreko bi paragrafoetan aipatutako salbuespenen barruan sartzen dira haietan aurreikusitako bermeak berritzea eta deuseztatzea.»

«40.– Alde bakarreko hipotekak eratu, berritu edo deuseztatzeko, artikulu honen I.A.a) apartatuan aipatutako herri administrazioetako edozeinen alde egiten diren notariotzako eskrituren lehen kopiak.»

5. artikulua.– Zergen Foru Arau Orokorra aldatzea.

Aldaketa hauek sartzen dira Gipuzkoako Lurralde Historikoko Zergei buruzko martxoaren 8ko 2/2005 Foru Arau Orokorrean:

Bat.– 78. artikuluko 6. apartatua honela geratzen da idatzita:

«6.– Kautelazko neurrien ondorioak sei hilabeteko epean iraungiko dira, neurriak hartzen direnetik aurrera, honako kasuotan izan ezik:

a) Premiamenduzko prozeduran enbargo forma hartzen dutenean, edo artikulu honen 8. apartatuko neurri edo kautelazko neurri judizial bihurtzen direnean; horrelakoetan, kautelazko neurria hartzen den egunetik izango dituzte ondorioak.

b) Neurria hartzeko arrazoiak desagertu direnean.

c) Interesa duen pertsonak edo entitateak eskatuta, neurriaren ordez nahikotzat jotzen den beste berme bat aplikatzea erabakitzen denean.

Nolanahi dela ere, kautelazko neurriak kendu egin beharko dira baldin eta zergapekoak, neurriaren zenbatekoa kobratuko dela bermatzearren, kreditu entitate baten edo elkarren bermerako sozietate baten abal solidarioa edo kauzio aseguruaren ziurtagiria aurkezten badu.

Behartutako pertsonak edo entitateak borondatezko epean ordaintzen badu kautelazko neurriak ziurtatzen zuen zerga obligazioa, ordainketaren etendurarik gabe, zerga administrazioak aurkeztu den bermearen gastuak ordaindu beharko ditu.

d) Epe hori arrazoitutako erabaki baten bidez luzatzen denean, baina ez sei hilabete baino gehiago.

Dena den, kautelazko neurria ikuskapen prozedura baten barruan hartzen bada eta prozedura horretan jarduten duen zerga administrazioak modu arrazoituan eta nahikoan frogatu badezake 1. apartatuan jasotako kasuak gertatzen direla, epea honela luzatu ahal izango da:

a») zorra ordaindu arte.

b») apartatu honetako a) edo c) letretan jasotako kasuak gertatu arte, baldin eta zorra ez bada ordaintzen.

Neurri horiek indargabetu egingo dira, ikuskapen prozedura iraungiz gero.

e) Neurriak hartzen direnean foru arau honen 251. artikuluan aipatzen den prozedura izapidetzen den bitartean edo hura amaitutakoan. Horrelakoetan, neurriek hogeita lau hilabetez izango dituzte ondorioak, hartzen direnetik aurrera.

Neurriak hartu badira foru arau honen 251. artikuluan deskribatutako tramitazioa hasi baino lehen, behin foru arau honen 248.2 artikuluan aipatzen den likidazioa egin ondoren, epea luzatu ahal izango da arrazoitutako erabaki bidez, baina hartutako neurrien luzapena 18 hilabetekoa izango da gehienez.

Apartatu honetako e) letra honetan aipatzen diren neurriak egindako likidazioa kobratzeko hasitako premiamenduzko prozedurako enbargo bihurtu ahal izango dira.

Neurriak hartu ondoren, zigor arloko organo judizial eskudunari Zigor Kodearen 305.5 artikuluan jasota dagoen etendura eskatzen bazaio, hartutako neurriak Fiskaltzari eta aipatutako organo judizialari jakinaraziko zaizkie, eta bere horretan mantenduko dira harik eta organo judizialak haiek kontserbatzea edo kentzea erabaki arte.»

Bi.– 121. artikuluko 1. apartatua honela geratzen da idatzita:

«1.– Foru arau honen 65. artikuluan ezarritako preskripzio epearen barruan, autolikidazio bidez hasten den prozedura amaituko da behin-behineko likidazio batengatik, egiaztapen mugatuko prozedura bat hasteagatik edo ikuskapen prozeduretako batengatik, egiaztapen murriztua alde batera utzita.

Aurrekoa hala izanik ere, autolikidazioak zuzentzeko prozeduretatik eratortzen diren behin-behineko likidazioek eta foru arau honen 126.1 artikuluko h) letran aipatutakoek ez dute amaituko autolikidazio bidez hasitako prozedura.»

Hiru.– 222.2. artikuluko c) letraren euskarazko testua honela geratzen da idatzita:

«c) Gipuzkoan kaudimen aitortua duten beste zergadun batzuek emandako fidantza pertsonal eta solidarioa, zorrak zerga araudian propio ezarritako kopurutik gorakoak ez badira.»

II. TITULUA

EUSKAL ZUZENBIDE ZIBILAREKIN LOTUTAKO ALDAKETAK

6. artikulua.– Oinordetzen eta dohaintzen gaineko zerga aldatzea.

Xedapen hauek aldatzen dira Oinordetzen eta Dohaintzen gaineko Zergari buruzko urtarrilaren 11ko 3/1990 Foru Arauan:

Bat.– 3.1 artikuluari g») letra berria gehitzen zaio a) letran, honako edukia duena:

«g») Uko egiteko oinordetza-itunak, Euskal Zuzenbide Zibilari buruzko ekainaren 25eko 5/2015 Legearen 100. artikuluko 2. apartatuko lehen tartekian araututakoak.

Hala ere, uko egileak oinordetza-eskubideen zati bati uko egiteko itun baten ondorioz eskuratzen baditu ondasun eta eskubideak, eskurapena kasu batean bakarrik hartuko da oinordetza-titulutzat: ondasun eta eskubideen esleipen hori xedapen zabalago baten parte denean eta xedapen horretan, gutxienez, badagoenean beste elementu bat oinordekoen izendapenari lotuta tresna itundu batean, beste ondare elementu batzuei dagokienez. Beste kasu guztietan, eskurapena inter vivos egindako doako negozio juridikotzat hartuko da.

Oinordetza-eskubide guztiei uko egiteko oinordetza-itunetan, uko egileak ondasun eta eskubidek eskuratzen baditu are izendatzailea hil ondoren ere, eskurapen hori inter vivos egindako doako negozio juridikotzat hartuko da hurrengo b) letran ezarritakoarekin bat, oinordekoei legokiekeen tributazioa ezertan eragotzi gabe.»

Bi.– 3.1. artikuluko b) letra honela geratzen da idatzita:

«b) Ondasun eta eskubideak eskuratzea dohaintzaz edo inter vivos egindako doako beste edozein negozio juridikoren bidez.

Dohaintzaz gainera, honako hauek hartzen dira, besteak beste, inter vivos egindako doako negozio juridikotzat, zerga honen ondorioetarako:

a») Zorra eskuzabal izateko asmoz barkatzea, osorik zein zati batean.

b») Pertsona jakin baten alde egitea uko eskubideei.

c») Beste baten zorra kitatzeko betebeharra kontraprestaziorik gabe bereganatzea, zergaren foru arauak 16. artikuluan aurreikusitako kasuan izan ezik.

d») Epaiketa edo arbitraje batean bestearen alde atzera egin edo amore ematea, eskuzabal izateko asmoz, eta, orobat, transakzio bat egitea eta hortik asmo berberaz egindako uko egite bat, atzera egite bat edo amore emate bat etortzea.

e») Bizitzaren gaineko aseguru kontratua, aseguratuak bizirik iraunez gero, eta banakako aseguru kontratua, kontratugilea ez den aseguratua hilez gero, baldin eta, kasu batean eta bestean, onuraduna kontratugilea ez bada.

f») Uko egileak ondasun eta eskubideak eskuratzea hirugarren baten herentziako oinordetza-eskubideak xedatzearen ondorioz, Euskal Zuzenbide Zibilari buruzko ekainaren 25eko 5/2015 Legearen 100. artikuluko 2. apartatuko bigarren tartekian ezarritakoarekin bat.»

Hiru.– 5. apartatua gehitzen zaio 11. artikuluari, honako hau dioena:

«5.– Eraginkortasuna unean bertan duten oinordetza-itunen kasuan, artikulu honetan ezarritako presuntzioak aplikatzearren artikulu honetan bertan aipatzen diren epeak konputatzeko, eskualdaketa gertatzen den unea hartuko da erreferentziatzat.»

Lau.– 19. artikulua honela geratzen da idatzita:

«19. artikulua.– Oinarri likidagarria.

1.– Etxebizitzaren jabari osoa, gozamena, jabetza soila, azalera eskubidea edo erabiltze eta biztantze eskubidea kosturik gabe eskuratzen bada inter vivos edo mortis causa dela medio, eta eskualdaketa egin aurreko bi urteetan eskuratzailea bertan bizi izan bada eskualdatzailearekin batera, eskurapen horrek 100eko 95eko murriztapena izango du zerga oinarrian, 220.000 euroko mugarekin.

Bizikidetzaren beharkizuna frogatzeko, errolda agiria eta epe horretan elkarrekin etenik gabe bizi izanaren ziurtagiria aurkeztu beharko dira, betiere zuzenbidean onartutako beste edozein frogabide erabiltzea eragotzi gabe.

2.– Aurreko apartatuan xedatutakoa gorabehera, mortis causa eskurapenetan oinarri likidagarria kalkulatuko da zerga oinarriari 20. artikuluko 1. zenbakian jasotako ahaidetasun mailei dagokien murriztapena aplikatuta, honako hau, zehazki:

a) 400.000 euro, I. taldekoentzat.

b) 16.150 euro, II. taldekoentzat.

c) 8.075 euro, III. taldekoentzat.

Eskurapenak minusbaliotasun fisiko, psikiko edo zentzumenezkoa duten edo mendetasun egoeran dauden pertsonek egindakoak direnean, kausatzailearekiko ahaidetasun mailaren arabera zilegi izan daitekeenaz gain 80.000 euroko murriztapena aplikatuko da.

Ondorio horietarako, ulertuko da pertsona minusbaliatuek edo mendetasun egoeran daudenek murriztapenerako eskubidea dutela, pertsona fisikoen errentaren gaineko zergan kenkaria aplikatzeko eskubidea sortzen dutenean zerga horren legeriaren arabera.

3.– Hildakoaren ezkontideak, maiatzaren 7ko 2/2003 Legearen arabera eratutako izatezko bikote-lagunak, aurreko ahaideek edo adoptatzaileek, ondorengo ahaideek edo adoptatuek, edo hirugarren gradurainoko zeharkako ahaideek mortis causa eskuratzen badituzte banakako enpresa bat, negozio profesional bat, entitateetako partaidetzak edo haien gaineko gozamen eskubideak, eta eskurapen horiei Aberastasunaren eta Fortuna Handien gaineko Zergari buruzko abenduaren 18ko 10/2012 Foru Arauak 6 bis artikuluan araututako salbuespena aplikagarri bazaie, eskurapenak 100eko 95eko murriztapena izango du zerga oinarrian, betiere eskuratutakoari 5 urtez eusten bazaio, kausatzailea hiltzen denetik aurrera, salbu eta eskuratzailea epe horretan hiltzen denean edo enpresa edo entitatea konkurtso-prozedura baten ondorioz likidatzen denean.

Eskurapenak eraginkortasuna unean bertan duten oinordetza itunen ondorioz egiten badira kausatzailea oraindik bizirik dela, aurreko paragrafoan aipatu den 5 urteko epea eskualdaketa gertatzen den unetik aurrera zenbatuko da.

Testamentu-ahalordeaz baliatuta egiten diren eskurapenetan, aurreko lehen paragrafoan aipatu den 5 urteko epea ahalordea baliatzen den unetik aurrera zenbatuko da.

Aurreko paragrafoetan aipatutako entitateetako partaidetzak eta horien gaineko gozamen eskubideak eskuratzen direnean, murriztapena kalkulatzeko, kontuan hartuko da zer proportzio duten elkarren artean jarduera ekonomikoari lotutako aktiboen balioak –jardueratik eratorritako zorren zenbatekoarekin gutxituta– eta entitatearen ondare garbiaren balioak; hala behar denean, erregela horiek berak aplikatuko dira partaidetutako entitateen partaidetzen balorazioan ere, haien entitate edukitzailearen partaidetzen balioa zehazteko.

Apartatu honetako lehen hiru paragrafoetan aipatutako eskurapenari eusteko baldintza ez bada betetzen, ordaindu beharko dira murriztapenagatik zergan ordaindu ez den zatia gehi berandutze-interesak.

Apartatu honetan jasotako murriztapena aplikatzeko, dohaintza-emaileak oinordetzen eta dohaintzen gaineko zergaren sortzapena gertatzen den unean bete behar ditu abenduaren 18ko 10/2012 Foru Arauak, Aberastasunaren eta Fortuna Handien gaineko Zergarenak, 6 bis artikuluan aurreikusten dituen beharkizunak. Zehazki, 6 bis artikuluaren 2. apartatuko d) letran aipatzen den baldintza kausatzailearen edo, hala badagokio, 2. apartatu horretako c) letran aipatutako ahaidetasun taldeko pertsonaren edo pertsonen errenta zergaren autolikidazioan bete beharko da, eta autolikidazio horrek kausatzailea hil den zergaldikoa izan beharko du beti.

4.– Ezkontideak edo izatezko bikote-lagunak (maiatzaren 7ko 2/2003 Legearen arabera eratuak), aurreko ahaideek edo adoptatzaileek, edo ondorengo ahaideek edo adoptatuek inter vivos eskuratzen badute banakako enpresa bat, negozio profesional bat edo entitate-partaidetza bat, eta eskurapenari aplikagarri bazaio Aberastasunaren eta Fortuna Handien gaineko Zergari buruzko abenduaren 18ko 10/2012 Foru Arauak 6 bis artikuluan araututako salbuespena, orduan eskurapen horrek 100eko 95eko murriztapena izango du zergaren zerga oinarrian, betiere baldintza hauek betetzen badira:

a) Dohaintza-emaileak hirurogei urte edo gehiago eduki behar ditu, edo ezintasun iraunkorreko egoeran egon, dela absolutua dela baliaezintasun handikoa.

b) Dohaintza-emailea zuzendaritza lanak egiten ari bada, eskualdaketaren unetik beretik lan horiek egiteari utzi behar dio eta ez du ordainsaririk jasoko lan horietan jarduteagatik.

Ondorio horietarako, sozietatearen administrazio kontseiluko kide izate hutsa ez da hartuko zuzendaritza lantzat.

c) Dohaintza-hartzaileari dagokionez, dohaintzaren eskritura publikoa egin ondorengo 5 urteetan bere esku mantendu behar du eskuratutakoa, eta Aberastasunaren eta Fortuna Handien gaineko Zergari buruzko abenduaren 18ko 10/2012 Foru Arauaren 6 bis artikuluan araututako salbuespenerako eskubidea izango du, non eta epe horretan ez den hiltzen edo enpresa edo entitatea ez den likidatzen konkurtso-prozedura baten ondorioz. Halaber, dohaintza-hartzaileak ezin izango du egin erabilpen egintzarik edo sozietate eragiketarik, zuzenean edo zeharka eskurapenaren balioa nabarmen murriztu dezaketenean.

Entitateetako partaidetzen eskurapenetan, murriztapena kalkulatuko da kontuan hartuta zer proportzio gordetzen duten elkarren artean jarduera ekonomikoari atxikitako aktiboen balioak –jardueratik eratorritako zorren zenbatekoarekin gutxitua– eta entitatearen ondare garbiaren balioak; hala behar denean, erregela horiek berak aplikatuko dira partaidetutako entitateen partaidetzen balorazioan ere, haien entitate edukitzailearen partaidetzen balioa zehazteko.

Apartatu honetan aipatzen diren baldintzak betetzen ez badira, ordaindu beharko dira murriztapenagatik zergan ordaindu ez den zatia gehi bidezkoak diren berandutze-interesak.

Apartatu honetan jasotako murriztapena aplikatzeko, dohaintza-emaileak oinordetzen eta dohaintzen gaineko zergaren sortzapena gertatzen den unean bete behar ditu Aberastasunaren eta Fortuna Handien gaineko Zergari buruzko abenduaren 18ko 10/2012 Foru Arauak 6 bis artikuluan aurreikusten dituen beharkizunak. Dena den, 6 bis artikuluaren 2. apartatuko d) letrako baldintza bete beharko da dohaintza-emailearen edo, hala badagokio, 2. apartatu horretako c) letran aipatutako ahaidetasun taldeko pertsonaren edo pertsonen errenta zergaren autolikidazioan, eta autolikidazio horrek eskualdaketa egin aurreko lehen zergaldikoa izan beharko du beti.

5.– Bizitza aseguruak direla-eta jasotako kopuruen eskurapenetan, oinarri likidagarria lortzeko honako murriztapen hauek aplikatuko dira zerga oinarrian:

A) Aseguruaren kontratatzaileak edo hartzaileak eta haren onuradunak elkarren artean duten ahaidetasunaren arabera:

a) 400.000 euro, I. taldekoentzat.

b) 16.150 euroko murriztapena, bai eta gainerako kopuruaren 100eko 25ekoa ere, II. taldeko ahaidetasun maila denean.

c) 8.075 euroko murriztapena, ahaidetasun maila III. taldekoa denean.

Aseguru kolektiboetan edo enpresek beren enplegatuen alde kontratatutako aseguruetan, aurreko murriztapenak aplikatuko dira aseguratuaren eta onuradunaren arteko ahaidetasuna kontuan hartuta.

Murriztapen horretaz gozatzeko, polizan aurreikusitako ezbeharra gertatu baino gutxienez bi urte lehenago hitzartua behar du izan aseguruak, hura modu kolektiboan hitzartu ez bada behintzat.

B) Murriztapena 100eko 100ekoa izango da jasotako kopuruak bizitza aseguruen ondorioz jasotzen direnean dela terrorismo ekintzengatik dela nazioarteko bake misioetan edo misio humanitarioetan egindako zerbitzu publikoengatik.»

Bost.– 20. artikuluari 3. eta 4. apartatuak gehitzen zaizkio, honako eduki hauek dituztenak:

«3.– Uko egitearen onuradunak eskubide eta ondasunak eskuratzen baditu hirugarren baten herentziako oinordetza-eskubideak xedatzearen ondorioz, Euskal Zuzenbide Zibilari buruzko ekainaren 25eko 5/2015 Legearen 100. artikuluko 2. apartatuko bigarren tartekian ezarritakoarekin bat, eskurapen horrek hirugarren hori hiltzen denean tributatuko du, kausatzailearen eta onuradunaren arteko ahaidetasunaren arabera, betiere, uko-egileari emandako eta entregaren unean baloratutako eskubide eta ondasunen balioa kenduta, hala badagokio.

4.– Ondasun eta eskubideak eskuratzen badira Euskal Zuzenbide Zibilari buruzko ekainaren 25eko 5/2015 Legearen 106. artikuluan araututako eskubide xedapenen ondorioz, eskurapen horrek tributatuko du izendatzailearen eta izendatutakoaren ondorengoen arteko ahaidetasun mailaren arabera.»

Sei.– 23. artikulua honela geratzen da idatzita:

«23. artikulua.– Sortzapena.

1.– Mortis causa eskurapenetan eta bizitza-aseguruetan, zerga sortuko da kausatzailea edo aseguratua hiltzen den egunean edo, bestela, absentearen heriotza-adierazpenak Kode Zibilaren 196. artikuluan aipatzen den irmotasuna hartzen duenean.

Testamentu-ahalorde bidez gauzatzen diren herentzietan, zerga sortuko da ahalordea modu ezeztaezinez erabiltzen denean edo ahalordea azkentzeko arrazoietako bat gertatzen denean.

Oinordetza-itunek unean bertan dutenean eraginkortasuna edo herentziari uko egiteko oinordetza-tituluak direnean –foru arau honen 3.1.a) artikuluan aipatuak–, izendatzailea bizirik dagoela gertatuko da zergaren sortzapena, eskualdaketa egiten den unean.

2.– Inter vivos egiten diren doako eskualdaketetan, kontratua gertatzen edo egiten den egunean sortuko da zerga.

Ondasun eta eskubideen eskurapenak inter vivos egindako doako negozio juridikotzat hartzen badira foru arau honen 3.1 artikuluko a) letran ezarritako salbuespenekin eta 3.1.b) artikuluko f») letran xedatutakoarekin bat, eskurapen horietan zerga sortuko da eskualdaketa egiten den egunean.

3.– Izendatutakoaren oinordetza-eskubideak izendatzailea bizirik dagoela xedatzen badira dohainik, inter vivos edo mortis causa egintzen bidez, Euskal Zuzenbide Zibilari buruzko ekainaren 25eko 5/2015 Legearen 106. artikuluan ezarritakoarekin bat, zerga ez da sortuko izendatzailearen heriotza egunera arte.

4.– Ondasunen eskurapen batek etenda badu eraginkortasuna tartean baldintza bat, epemuga bat, fideikomiso bat edo beste edozein muga ezarri delako, mugapen horiek desagertzen diren egunean gauzatutzat joko da eskurapena.»

Zazpi.– 25. artikulua honela geratzen da idatzita:

«25. artikulua.– Gozamena eta beste instituzio batzuk.

1.– Gozamen eskubidearen eraketa eta iraungipena eta ordezpenak, erreserbak eta fideikomisoak zergapetzean, hurrengo letretan jasotzen diren arauak aplikatuko dira:

a) Aldi baterako gozamenaren balioa ondasunen balio osoarekiko proportzioa izango da, hots, 100eko 5 urtebete bakoitzeko, 100eko 70 gainditu gabe.

Biziarteko gozamenetan, haien balioa ondasunen balio osoaren 100eko 70 izango da gozamendunak hogei urte baino gutxiago dituenean. Alabaina, adina aurrera joan ahala, balioa 100eko 1eko proportzioan gutxituko da urte bakoitzeko, eta balio osoaren 100eko 10 izango da gutxieneko muga.

Jabetza soileko eskubidearen balioa gozamenaren balioaren eta ondasunen balio osoaren arteko diferentzia izango da. Aldi baterakoak ere badiren biziarteko gozamenetan, berriz, jabetza soila baloratuko da aurreko erregeletatik baliorik txikiena esleitzen diona aplikatuta.

Jabetza soila eskuratzen denean, likidazioa egingo da hari dagokion balioa kontuan hartuta, betiere, zergadunak aplika ditzakeen murriztapen guztien zenbatekoarekin gutxituta, hala badagokio.

b) Erabiltzeko eta biztantzeko eskubide errealen balioa kalkulatuko da eskubideok eratzen dituzten ondasunen balioaren 100eko 75ari aldi baterako edo biziarteko gozamenak (kasuan kasukoak) baloratzeko erregelak aplikatuta.

c) Gozamena iraungitzen denean, eraketa-tituluaren arabera ordainaraziko da zerga.

d) Eskuratzaileak ondasunak baliatzeko ahalmena duen guztietan, jabari osoari dagokion zerga likidatuko da, bidezkoa izan daitekeen itzulketa eragotzi gabe.

e) Ordezpen arruntetan, ulertuko da ordezkoak kausatzaileren jaraunsle dela, eta ordezpen pupilar eta kuasipupilarretan ordeztutakoaren jaraunsle izango da.

2.– Kausatzailearen xedapenengatik edo oinordetzaren arau zibilen aplikazioagatik, pertsona bati esleitzen bazaio herentzia bateko ondasunak osorik edo partez gozatzeko eskubidea, dela aldi baterako dela bizi artean, zerga ondorioetarako ulertuko da erabilera edo gozamen eskubide bat dagoela, eta eskubide hori, izena zeinahi duela ere, baloratuko da aldi baterako edo biziarteko gozamen edo erabilera-eskubideetarako ezarritako arauen arabera.

Aurreko apartatuko d) letran xedatutakoa gorabehera, Euskal Zuzenbide Zibilari buruzko ekainaren 25eko 5/2015 Legean araututako testamentu-ahalordeetatik ondorioztatzen diren gozamen eskubideak foru arau honetako 25 bis artikuluan berariaz ezartzen diren arauei jarraituz arautuko dira.»

Zortzi.– 25 bis artikulua honela geratzen da idatzita:

«25 bis artikulua.– Gozamena testamentu-ahalordearen menpeko herentzietan.

1.– Testamentu-ahalordean pertsona jakin bati eman bazaio herentziako ondasunez bizi artean gozatzeko eskubidea, gozamen horrengatik likidazio bakarra egingo da gozamendunak kausatzailearekin duen ahaidetasunaren arabera eta biziarteko gozamenen arauak aplikatuta.

2.– Testamentu-ahalordean gozamena ahalorde hori erabiltzen denean azkentzen bada, gozamen horrengatik bi likidazio egingo dira gozamendunak kausatzailearekin duen ahaidetasunaren arabera:

a) Lehen likidazio bat, kausatzailea hiltzen denean, biziarteko gozamenaren arauak aplikatuta.

Alabaina, testamentu-ahalordea erabiltzeko epea zehaztuta badago, lehen likidazio hori aldi baterako gozamenaren arauak aplikatuta egingo da, ahalordea erabiltzeko ezarrita dagoen gehieneko epeagatik.

b) Beste likidazio berri bat, testamentu-ahalordea erabiltzen denean, aldi baterako gozamenaren arauekin bat, kausatzailearen heriotzatik igarotako denboragatik. Aurreko likidazioagatik ordaindu dena konturako sarreratzat joko da, eta diferentzia gozamendunari itzuliko zaio, haren aldekoa bada.

Letra honetan aipatzen den autolikidazioa aurkeztuko da testamentu-ahalordea baliatzeagatik edo hura azkentzeko gainerako arrazoiengatik oinordeko gertatzen direnen autolikidazioa aurkeztearekin batera, kausatzailea hiltzean ondasunek zuten balioa kontuan hartuta.

3.– Artikulu honetan aipatutako gozamenak kalkulatzeko, foru arau honen 25.1 artikuluan biziarteko gozamenari eta aldi baterako gozamenari buruz ezarritako arauak aplikatuko dira.»

Bederatzi.– 25 ter artikuluko 1. eta 2. apartatuak honela geratzen dira idatzita:

«1.– Ahalordea erabiltzean komisarioak, ezkontide alargunak edo maiatzaren 7ko 2/2003 Legearen arabera eratutako izatezko bikote-lagunak irabazpidezko sozietatearen ondasun komun bat adjudikatzen badio komisarioak eta kausatzaileak komunean duten ondorengo bati, herentzia banatu eta likidatu gabe, ezkontide alargunaren edo izatezko bikote-lagunaren zatia dohaintza moduan likidatuko da, eta kausatzaileari dagokion zatia oinordetza moduan.

2.– Testamentu-ahalordearen menpeko oinordetzetan, likidazio hauek egin beharko dira, hala behar denean: bat, kausatzailea hil eta berehala, ahalordeak ukitzen ez duen herentziaren zenbatekoagatik, eta, beste bat, edo beste batzuk, ahalordea modu ezeztaezinean erabili edo hura azkentzeko gainerako arrazoietako bat gertatu ondoren, ahalordeak ukitzen duen herentziaren zenbatekoagatik.»

Hamar.– 25 quater artikuluko 2. apartatua honela geratzen da idatzita:

«2.– Hori dela-eta, jasotzen diren ondasun eta eskubide eskurapen guztiak metatu egingo dira, hau da, bai oinordetza-itunen ondorio direnak, testamentu-ahalordea osorik edo partez erabiltzeagatik edo hura azkentzeko beste arrazoiengatik gertatutakoak, eta bai testamentugileak berak testamentuan zuzenean xedatutakoak, edo haren faltan, legean ezarritakoak.»

Hamaika.– 25 quinquies artikuluko 1. apartatua honela geratzen da idatzita:

«1.– Izendatzaileari itzultzen bazaizkio mantenuaren kargapean egindako oinordetza-itunen bidez eskualdatutako ondasunak –Euskal Zuzenbide Zibilari buruzko ekainaren 25eko 5/2015 Legearen 107.3 artikuluan aipatzen den oinordetza-itun mota hori–, autolikidazio bat egingo da aldi baterako gozamenei buruzko arauen arabera, eta autolikidazio horretan soberan ordaindutako zenbateko bat ateratzen bada itzulitako ondasunen eskualdaketagatik hasiera batean egindako autolikidazioaren aldean, soberakin hori itzuli egingo zaio zergadunari.»

Hamabi.– Bigarren paragrafo bat gehitzen zaio 27.1 artikuluari, honela xedatzen duena:

«Apartatu honetan xedatutakoa ez da aplikatuko foru arau honen 3.1.a) artikuluko g») letrak aipatzen dituen uko egiteko oinordetza-itunetan.»

Hamahiru.– Bigarren paragrafo bat gehitzen zaio 27.2 artikuluari, honela xedatzen duena:

«Hala ere, hirugarren baten herentziari uko egiteko itunak egiten direnean Euskal Zuzenbide Zibilari buruzko ekainaren 25eko 5/2015 Legearen 100. artikuluko 2. apartatuko bigarren tartekian ezarritakoarekin bat, uko-egileari ez zaio zerga exijituko, foru arau honen 3.1.b) artikuluko f») letraren arabera egongo baita, hala behar denean, zergapetuta, uko-egitearen onuradunari dagokion tributazioa eragotzi gabe.»

Hamalau.– 29. artikulua honela geratzen da idatzita:

«29. artikulua.– Dohaintzak, kosturik gabeko gainerako eskualdaketa parekagarriak, eta mortis causa eskurapenak metatzea.

1.– Dohaintza-emaile berberak dohaintza-hartzaile berberari hiru urteko epearen barruan -dohaintza eta eskualdaketa bakoitzaren egunetik aurrera zenbatuta- egindako dohaintzak eta parekagarriak diren kosturik gabeko gainerako inter vivos eskualdaketak salbuetsita ez badaude eta II. eta III. taldeei badagozkie, eskualdaketa bakartzat hartuko dira zergaren likidazioaren ondorioetarako, eta, beraz, zerga kuota lortzeko, zerga oinarri guztien baturatik abiatuko da kalkulua. Metatutako dohaintzengatik eta kosturik gabeko gainerako eskualdaketa parekagarriengatik lehendik ordaindutako kuotak kengarriak izango dira metaketaren ondorioz egiten den likidaziotik.

2.– Aurreko apartatuan aipatutako dohaintzak eta parekagarriak diren kosturik gabeko gainerako eskualdaketak eta dohaintza-emaileak edo kausatzaileak dohaintza-hartzailearen edo oinordekoaren alde edozein titulu bidez egindako oinordetza-eskualdaketak, salbu eta foru arau honetan salbuetsitzat jotzen diren ondasunen mortis causa eskurapenak badira, eskurapen bakartzat hartuko dira zerga kuota zehaztearen ondorioetarako, betiere baldin eta horien arteko epea ez bada lau urtekoa baino handiagoa.

Zerga kuota zerga oinarri guztiak batuz lortuko da. Metatutako eskurapenengatik lehendik ordaindutako kuotak ordaindutakotik kendu ahal izango dira, eta, hala behar denean, ordaindutako zenbateko osoa edo haren zati bat itzuliko da.»

Hamabost.– 31. artikulua honela geratzen da idatzita:

«31. artikulua.– Autolikidazioa.

1.– Subjektu pasiboak behartuta egongo dira foru arau honetan aipatutako zerga egitateak hartzen dituen autolikidazioa aurkeztera, eta, behar denean, zerga zorra ordaintzera, erregelamenduz ezartzen diren modu eta epeetan.

2.– Testamentu-ahalordearen menpeko herentzietan, komisarioak zerga aitorpen bat aurkeztu behar du, bertan kausatzailearen heriotza adierazita. Aitorpen horretan, foru arau honen 31 bis artikuluan ezarritakoa bete beharko da.

Komisarioak gozamen eskubideagatik foru arau honen 25 bis artikuluan xedatutakoaren arabera autolikidatzeko duen obligazioa eragotzi gabe, apartatu honetan aipatzen diren herentzietan ezingo da autolikidaziorik aurkeztu harik eta testamentu-ahalordea modu ezeztaezinean erabiltzen den arte -hala partzialki nola osorik-, edo hura iraungitzeko beste arrazoietako bat gertatzen ez den arte.»

Hamasei.– 31 bis artikulua honela geratzen da idatzita:

«31 bis artikulua.– Komisarioaren betebeharrak testamentu-ahalordearen menpeko herentzietan.

1.– Testamentu-ahalordearen menpeko herentzietan, komisarioak 6 hilabeteko epea du, kausatzailea hiltzen den egunetik edo heriotza-adierazpenak Kode Zibilaren 196. artikuluan aipatutako irmotasuna hartzen duenetik aurrera, herentziako ondasunen inbentarioa eta ahalordearen frogagiriak aurkezteko. Gainera, zerga Administrazioak, egoki iritziz gero, beste edozein agiri aurkezteko eskatu diezaioke komisarioari.

Epe hori luzatu daiteke, erregelamenduz ezartzen denari jarraituz.

Komisarioak zerga Administrazioari jakinarazi behar dizkio testamentu-ahalordea erabili gabe duen herentziako ondare elementuen inbentarioan izandako aldaketak, baldin eta aldaketa horiek oinordetzen eta dohaintzen gaineko zergaren sortzapenik ez badakarte. Komunikazioa hilabeteko epean egin behar da, ondare aldaketa gertatzen denetik aurrera, eta harekin batera aldaketaren frogagirien kopiak aurkeztu behar dira.

Aipatutako komunikazioan identifikatu beharko da zer ondasun eta eskubide eskualdatzen diren eta, halakorik bada, zeintzuk eskuratzen diren haien ordez.

2.– Era berean, hilabeteko epean, testamentu-ahalordea modu ezeztaezinean erabiltzen den egunetik –partzialki edo osorik– edo hura azkentzeko arrazoietako bat gertatzen den egunetik aurrera, komisarioak aurreko alderdi horien berri eman behar dio zerga Administrazioari, eta ahalordea erabili dela egiaztatzen duen dokumentazioa ere aurkeztu behar dio, edo, bestela, ahalordea azkendu dela justifikatu.

Komunikazio horretan berariaz identifikatu behar da testamentu-ahalordea erabiltzeak edo hura azkentzeko beste arrazoietako bat gertatzeak zer ondasun edo eskubideri eragin dien, zein kausaduni adjudikatu zaizkien ondasun eta eskubideok, eta zer egunetan gertatu den herentzia-eskurapen horiei dagokien zergaren sortzapena.»

Hamazazpi.– Azken paragrafo bat gehitzen zaio 32.3. artikuluari, honela dioena:

«Orobat, notarioek, aurreko paragrafoan ezarritako epe berean, beraiek baimendutako dokumentu guztien zerrenda igorri behar diote Ogasun eta Finantza Departamentuari, komisarioak Euskal Zuzenbide Zibilari buruzko ekainaren 25eko 5/2015 Legearen 43. artikuluan aipatutako testamentu-ahalordea erabili gabe duen herentziako ondasunak xedatzeko egintzei dagokienez, azken horiek zerga honen sortzapena ez dakartenean.»

Hemezortzi.– Indarrik gabe geratzen da 40. artikuluko 4. apartatua.

7. artikulua.– Gipuzkoako Lurralde Historikoko zerga sistema Euskal Zuzenbide Zibilari buruzko ekainaren 25eko 5/2015 Legera egokitzen duen foru araua aldatzea.

2018ko urtarrilaren 1etik aurrerako ondorioekin, aldaketa hauek sartzen dira Gipuzkoako Lurralde Historikoko zerga sistema Euskal Zuzenbide Zibilari buruzko ekainaren 25eko 5/2015 Legera egokitzen duen azaroaren 14ko 4/2016 Foru Arauan:

Bat.– II. tituluaren barruan I. kapitulu berri bat sartzen da, II. tituluko oraingo 11., 12. eta 13. artikuluak biltzen dituena. Honela du izenburua:

«I. KAPITULUA. PERTSONA FISIKOEN ERRENTAREN GAINEKO ZERGA ETA ABERASTASUNAREN ETA FORTUNA HANDIEN GAINEKO ZERGA»

Bi.– 11. artikulua honela geratzen da idatzita:

«11. artikulua.– Arau orokorrak.

1.– Kapitulu honetan arautzen da zer tributazio araubide berezi aplikatzen den pertsona fisikoen errentaren gaineko zergan eta aberastasunaren eta fortuna handien gaineko zergan, testamentu-ahalordea erabili gabe duten herentzien kasuan.

2.– Herentziaren kausatzaileak, heriotzaren unean, Gipuzkoan baldin bazuen ohiko bizilekua, Gipuzkoako Foru Aldundiari egokituko zaio aipatutako bi zergak ordainaraztea kapitulu honetan jasotako xedapenak aplikatuta.»

Hiru.– 12. artikulua honela geratzen da idatzita:

«12. artikulua.– Pertsona fisikoen errentaren gaineko zerga.

1.– Testamentu-ahalordea erabili gabe duten herentzietatik datozen errentetan aplikatuko dira Gipuzkoako Lurralde Historikoko Pertsona Fisikoen Errentaren gaineko Zergari buruzko urtarrilaren 17ko 3/2014 Foru Arauan ezarritako xedapenak eta hura erregelamenduz garatzen duten gainerakoak, artikulu honetako hurrengo apartatuetan jasotzen diren berezitasunekin.

2.– Ezkontide alarguna edo izatezko bikote-laguna kausatzailearekin batera bizi izan bada ohiko etxebizitzan kausatzailea hil aurreko bi urteetan, eta etxebizitza hori testamentu-ahalordea erabili gabe duen herentzia baten parte bada, etxebizitza horren eskualdaketan lortutako ondare irabaziak salbuetsita egongo dira, baldin eta eskualdaketa horrek oinordetzen eta dohaintzen gaineko zergaren sortzapena ez badakar, eta eskualdaketan lortutako zenbatekoa ezkontide alargunaren edo izatezko bikote-lagunaren ohiko etxebizitza berria eskuratzeko berrinbertitzen bada, pertsona fisikoen errentaren gaineko zergaren araudian ezarritakoari jarraituz. Berrinbertitutako zenbatekoa txikiagoa bada eskualdaketan jasotako zenbateko osoa baino, lortutako ondare irabazian berrinbertitutako zenbatekoari dagokion zati proportzionala baino ez da utziko zergapetu gabe.

Era berean, salbuetsita egongo dira ohiko etxebizitza kostu bidez eskualdatzeagatik edo hura zorren ordainez emateagatik lortzen diren ondare irabaziak –Pertsona Fisikoen Errentaren Zergari buruzko urtarrilaren 17ko 3/2014 Foru Arauaren 42. artikuluko b), c) eta e) letretan aipatzen diren eragiketa horiek–, baldin eta, etxebizitza hori testamentu-ahalorde bat erabili gabe duen herentzia baten parte izanik, eskualdaketa horrek oinordetzen eta dohaintzen gaineko zergaren sortzapena ez badakar, eta, betiere, baldin eta ezkontide alarguna edo izatezko bikote-laguna kausatzailearekin batera bizi izan bada ohiko etxebizitzan kausatzailea hil aurreko bi urteetan, eta hura aplikatzeko letretan ezarritako betekizunak betetzen baditu.

Apartatu honen ondorioetarako, ohiko etxebizitzatzat hartuko da urtarrilaren 17ko 3/2014 Foru Arauak, Gipuzkoako Lurralde Historikoko Pertsona Fisikoen Errentaren gaineko Zergarenak, 87.8 artikuluan ezartzen dituen baldintzak betetzen dituena.

3.– Zerga oinarria kalkulatzeko, erregela hauek aplikatuko dira:

a) Testamentu-ahalordea erabili gabe duen herentziako ondasun eta eskubideak eskualdatzearen ondorioz lortzen diren ondare irabazi eta galerak, eskualdaketa horrek oinordetzen eta dohaintzen gaineko zergaren sortzapena ez dakarrenean, herentziak lortutakotzat joko dira beti, eta Pertsona Fisikoen Errentaren gaineko Zergari buruzko urtarrilaren 17ko 3/2014 Foru Arauak kostu bidezko eskualdaketetarako ezartzen dituen arauekin bat zehaztuko dira. Eskualdatzen diren ondasun eta eskubideen eskurapen data eta balio gisa kausatzaileak edo herentziak berak horiek eskuratutako uneari dagozkionak hartuko dira.

b) Urtarrilaren 17ko Foru Arauak, Gipuzkoako Lurralde Historikoko Pertsona Fisikoen Errentaren gaineko Zergarenak, 35. artikuluan aipatutako kapital higigarriaren etekinak, besteren kapitalak hartu eta erabiltzea adierazten duten aktiboak eskualdatzeagatik lortutakoak, testamentu-ahalordea erabili gabe duen herentziaren parte badira, eta eskualdaketa horrek oinordetzen eta dohaintzen gaineko zergaren sortzapena ez badakar, herentziak lortutakotzat joko dira beti, eta foru arau horretan ezarritako arauei jarraituz kalkulatuko dira. Eskualdatzen diren aktiboen eskurapen data eta balio gisa kausatzaileak edo herentziak berak horiek eskuratutako uneari dagozkionak hartuko dira.

c) Jarduera ekonomikoen etekinak testamentu-ahalordea erabili gabe duen herentziak lortutakotzat joko dira beti, kontuan hartu gabe Gipuzkoako Lurralde Historikoko Pertsona Fisikoen Errentaren gaineko Zergari buruzko urtarrilaren 17ko 3/2014 Foru Arauaren 24. artikuluko 1. apartatuan ezarritako beharkizuna betetzen duen edo ez.

4.– Oinarri likidagarria kalkulatzeko, testamentu-ahalordea erabili gabe duen herentziaren kargura epailearen erabakiz ordaindutako urteko mantenuaren murriztapena bakarrik aplikatuko da, hala dagokionean, zerga oinarri orokorrean eta aurrezpenaren zerga oinarrian, Gipuzkoako Lurralde Historikoko Pertsona Fisikoen Errentaren gaineko Zergari buruzko urtarrilaren 17ko 3/2014 Foru Arauko 67. eta 69. artikuluetan eta Euskal Zuzenbide Zibilari buruzko Legean xedatutakoari jarraituz.

5.– Zergaren kuota likidoa kalkulatzeko kuotan aplikatuko diren kenkari bakarrak Gipuzkoako Lurralde Historikoko Pertsona Fisikoen Errentaren gaineko Zergari buruzko urtarrilaren 17ko 3/2014 Foru Arauak 51.8., 88. eta 91. artikuluetan ezarritakoak izango dira.

6.– Testamentu-ahalordea erabili gabe duten herentziei dagozkien oinarri likidagarri orokor negatiboak, aurrezpenaren zerga oinarriko etekinen saldo negatiboak, jarduera ekonomikoetatik datozen etekinen saldo negatiboak, ondare galerak, eta kuota nahikoa ez izateagatik aplikatu ez diren kuotako kenkariak bakar-bakarrik konpentsatu daitezke, zerga araudiak baimentzen duenean, herentzia horiei dagozkien oinarri likidagarri orokor positiboekin, aurrezpenaren zerga oinarriko etekinen saldo negatiboekin, jarduera ekonomikoen etekinetatik datozen saldo positiboekin, ondare irabaziekin eta positiboak diren kuota osoekin.

7.– Testamentu-ahalordea erabili gabe duen herentziak zerga ordaintzeko obligazioa du, eta haren betebeharra da, baita ere, foru arau honetan, Gipuzkoako Lurralde Historikoko Pertsona Fisikoen Errentaren gaineko Zergari buruzko urtarrilaren 17ko 3/2014 Foru Arauan, eta hura garatzen duten erregelamenduzko xedapenetan ezartzen diren gainerako obligazioak betetzea.

8.– Zergaldia urtebete naturala baino laburragoa izango da, testamentu-ahalordea osorik eta modu ezeztaezinean erabiltzen denean abenduaren 31 ez den beste egun batean, edo hura azkentzeko beste edozein arrazoietako bat gertatzen denean. Horrelakoetan, zergaldia egun horretan amaituko da, eta zerga une horretan sortuko da.»

Lau.– II. tituluari II. kapitulu berri bat gehitzen zaio, eta haren barruan 13 bis artikulua sartzen da. Hona hemen edukia:

«II. KAPITULUA. HIRI-LURREN BALIO GEHIKUNTZAREN GAINEKO ZERGA.

13 bis artikulua.– Hiri-lurren balio gehikuntzaren gaineko zerga.

1.– Lurren eskualdaketak testamentu-ahalordea erabili gabe duten herentziei dagozkienean, eta xedapen egintzen ondorioz gertatzen direnean Euskal Zuzenbide Zibilari buruzko ekainaren 25eko 5/2015 Legearen 43. artikuluan xedatutakoari jarraituz, eskualdaketa horiek oinordetzen eta dohaintzen gaineko zergaren sortzapena ez badakarte, Hiri-lurren Balio Gehikuntzaren gaineko Zergari buruzko uztailaren 5eko 16/1989 Foru Arauan ezarritako xedapenak aplikatuko zaizkie, artikulu honetako hurrengo apartatuetan biltzen diren berezitasunekin.

2.– Aurreko apartatuan aipatzen diren eskualdaketetan, testamentu-ahalordea erabili gabe duen herentzia izango da zergaren subjektu pasiboa, eta zergaren sortzapena eskualdaketaren unean gertatuko da.

3.– Zerga kuota zehazteko, likidazio bat egingo da kausatzaileak terrenoa eskuratu zuenetik igarotako denboragatik, eta hortik deskontatu beharko da Hiri-lurren Balio Gehikuntzaren gaineko Zergari buruzko uztailaren 5eko 16/1989 Foru Arauaren 6. artikuluko 5. apartatuan xedatutakoaren arabera egindako autolikidazioan gozamendunak ordaindutakoa.

Testamentu-ahalordea erabili gabe duen herentziak eskuratutako lurren eskualdaketak egiten direnean Euskal Zuzenbide Zibilari buruzko ekainaren 25eko 5/2015 Legearen 43. artikuluko xedapen egintzen ondorioz, likidazio bat egingo da herentziak lurra eskuratu zuenetik igarotako denboragatik.

4.– Biziarteko gozamen kasuetan edo gozamen horren erreserba kasuetan, testamentu-ahalordea modu ezeztaezinean erabiltzen bada edo heriotzaz besteko arrazoiren bat gertatzen bada hura azkentzeko, eta testamentu-ahalordea erabili gabe duen herentziak eskuratutako lurrak eskualdatzen badira Euskal Zuzenbide Zibilari buruzko ekainaren 25eko 5/2015 Legearen 43. artikuluko xedapen egintzen ondorioz, gozamendunari likidazio bakarra egingo zaio biziarteko gozamenaren arauen arabera, testamentu-ahalordea erabili gabe duen herentziak lurra eskuratu zuenetik igarotako denboragatik.

Gozamena testamentu-ahalordearen erabilerarekin azkentzen den kasuetan, gozamendunari likidazio bat egingo zaio aldi baterako gozamenaren arauen arabera, testamentu-ahalordea erabili gabe duen herentziak lurra eskuratu zuenetik igarotako denboragatik.

Aurreko bi paragrafoetan aipatzen diren likidazioak eta testamentu-ahalordea erabiltzeagatik edo hura azkentzeko gainerako arrazoiengatik oinordeko gertatzen direnenak aldi berean egin beharko dira.»

Bost.– II. tituluaren barruan III. kapitulu berri bat sartzen da, II. tituluko oraingo 14., 15. eta 16. artikuluak biltzen dituena. Honela du izenburua:

«III. KAPITULUA. Alderdi komunak eta beste batzuk»

Sei.– 14. artikulua honela geratzen da idatzita:

«14. artikulua.– Xedapen komunak.

1.– Testamentu-ahalordea erabili gabe duen herentziari buruz aurreko bi artikuluetan ezarritako obligazio formal eta materialak betetzea herentziaren administratzaileari dagokio.

2.– Orobat, testamentu-ahalordea erabili gabe duen herentziaren administratzaileak erantzukizun subsidiarioa izango du pertsona fisikoen errentaren gaineko zergan, aberastasunaren eta fortuna handien gaineko zergan, eta hiri-lurren balio gehikuntzaren gaineko zergan sortzen diren zorrak ordaintzeari dagokionez.

3.– Testamentu-ahalordea erabili gabe duen herentziako ondasun eta eskubideak aurreko apartatuan aipatutako zergen pean geratuko dira, pertsona edo entitate edukitzailea zeinahi dela ere, salbu eta edukitzaile hori erregistroko fede publikoak babestutako hirugarren bat denean, edo, inskribatu ezin diren ondasun higigarrien kasuan, onustez eta titulu zuzenarekin justifikatzen denean ondasunok merkataritza edo industria establezimendu batean eskuratu direla.

Horretarako, aurreko paragrafoan aipatutako ondasun eta eskubideen eskualdaketan, ondasun eta eskubide horiek testamentu-ahalordea osorik edo partez eta modu ezeztaezinean erabiltzeagatik edo ahalorde hori azkentzeagatik eskualdatzen badira, esku hartzen duten notarioek, beraiek eskuetsitako agirietan, ohartarazi behar dute ezen ondasun horiek titulu honetan aipatzen diren eta eskualdaketa baino lehen sortutako zergen kuotak ordaintzeari lotuta geratzen direla, obligazio hori preskribatzen ez den artean. Era berean, jabetzako edo merkataritzako erregistratzaileek orri-bazterreko ohar baten bidez adierazi behar dute ondasun eta eskubideak eskualdaketa baino lehen zerga horiengatik sortutako kuotak ordaintzeari lotuta geratzen direla, obligazioa preskribatzen ez den artean.»

Zazpi.– 16. artikulua honela geratzen da idatzita:

«16. artikulua.– Ondare sozietateen araubidea.

Gipuzkoako Lurralde Historikoko Sozietateen gaineko Zergari buruzko urtarrilaren 17ko 2/2014 Foru Arauak 14. artikuluaren 1. apartatuko b) letran aurreikusitako baldintza betetzearen ondorioetarako, ondare entitateek ez dute ondare sozietateen izaera galduko testamentu-ahalordea erabili gabe duten herentziek partaidetuta badaude eta herentzia horiei titulu honetan xedatutakoa aplikagarri bazaie.»

8. artikulua.– Pertsona fisikoen errentaren gaineko zerga aldatzea.

2018ko urtarrilaren 1etik aurrerako ondorioekin, aldaketa hauek sartzen dira Gipuzkoako Lurralde Historikoko Pertsona Fisikoen Errentaren gaineko Zergari buruzko urtarrilaren 17ko 3/2014 Foru Arauan:

Bat.– 10. artikuluko 3. apartatua honela geratzen da idatzita:

«3.– Orobat, zerga honen zergadunak izango dira testamentu-ahalordea erabili gabe duten herentziak, hain zuzen ere, azaroaren 14ko 4/2016 Foru Arauak, Gipuzkoako Lurralde Historikoko zerga sistema Euskal Zuzenbide Zibilaren berezitasunetara egokitzen duenak, II. tituluko I. kapituluan aurreikusitakoak.»

Bi.– 12. artikuluko 6. apartatua honela geratzen da idatzita:

«6.– Testamentu-ahalordea erabili gabe duen herentziako ondasun eta eskubideen gainean gozamen eskubide bat eratuta dagoenean, ondasun eta eskubide horietatik datozen etekinak, ondare irabazi eta galerak eta errenta esleipenak gozamendunari egotziko zaizkio, haien jatorria edo iturria kontuan hartuta. Zehazki, eta aurreko 3. apartatuan xedatutakoa gorabehera, ulertuko da jarduera ekonomikoen etekinak haien gozamendunak lortu dituela jarduera ekonomikoen kontzeptupean.

Aurreko paragrafoan xedatutakoa hala izanik ere, ondasun eta eskubideak eskualdatzeagatik lortutako ondare irabazi eta galerak, eta foru arau honetako 35. artikuluan aipatzen diren kapital higigarriaren etekinak –besteren kapitalak eskuratu eta erabiltzea adierazten duten aktiboak eskualdatzeagatik lortutakoak–testamentu-ahalordea erabili gabe duen herentziaren parte badira, eta eskualdaketa horiek oinordetzen eta dohaintzen gaineko zergaren sortzapena ez badakarte, herentziari berari egotziko zaizkio beti, eta Gipuzkoako Lurralde Historikoko zerga sistema Euskal Zuzenbide Zibilari buruzko ekainaren 25eko 5/2015 Legera egokitzen duen azaroaren 14ko 4/2016 Foru Arauak II. tituluko I. kapituluan ezarritako erregela berezien arabera zergapetuko dira.

Gozamen eskubideak ezarriak ez dituzten ondasun eta eskubideetatik datozen etekinak eta errenta esleipenak, eta, orobat, haietatik datozen ondare irabazi eta galerak, herentziari berari egotziko zaizkio, eta Gipuzkoako Lurralde Historikoko zerga sistema Euskal Zuzenbide Zibilari buruzko ekainaren 25eko 5/2015 Legera egokitzen duen azaroaren 14ko 4/2016 Foru Arauak II. tituluko I. kapituluan ezarritako erregela berezien arabera zergapetuko dira.»

Hiru.– 36.1. artikuluko d) eta e) letrak honela geratzen dira idatzita:

«d) Errenta geroratuak, biziartekoak edo aldi baterakoak jasotzen diren kasuetan, horiek ez badira eskuratu herentzia, legatu edo beste edozein oinordetza-tituluren bidez, kapital higigarriaren etekintzat hartuko da aurreko b) eta c) letretan jasotako portzentajeak urteko zenbateko bakoitzari aplikatuz ateratzen den emaitza. Emaitza horri gehituko zaio errenta sortu arte lortutako errentagarritasuna, erregelamenduz erabakitzen den eran kalkulatua. Errentak dohaintzaz edo inter vivos egindako doako beste edozein negozio juridiko erabiliz eskuratu direnean –Oinordetzen eta Dohaintzen gaineko Zergari buruzko urtarrilaren 11ko 3/1990 Foru Arauaren 3.1 artikuluko b) letran aipatuak–, kapital higigarriaren etekina kalkulatuko da, bakar-bakarrik, urteko zenbateko bakoitzari aurreko b) eta c) letretan jasotako portzentajeetatik dagokiona aplikatuta.

Aurreko paragrafoan ezarritakoa horrela izan arren, bizitza edo baliaezintasun aseguru-kontratuen onuradunek errenta moduan jasotzen dituzten erretiro edo baliaezintasun prestazioak ezin badira lan etekintzat hartu foru arau honen 15etik 18ra bitarteko artikuluetan jasotakoagatik, eta aseguru-kontratu horien indarraldian zehar haien horniduretan ez bada izan inolako mobilizaziorik, zergaren zerga oinarrian integratuko dira, kapital higigarriaren etekin gisa, haien zenbatekoa kontratuagatik ordaindutako primak baino handiagoa den momentutik aurrera. Errentak dohaintzaz edo inter vivos egindako doako beste edozein negozio juridiko erabiliz eskuratu badira –Oinordetzen eta Dohaintzen gaineko Zergari buruzko urtarrilaren 11ko 3/1990 Foru Arauaren 3.1 artikuluko b) letran aipatuak–, prestazio horiek zerga oinarrian integratuko dira errentek eraketaren unean duten balio aktuariala gainditzen dutenean. Horrelakoetan, ez dira aplikatuko aurreko b) eta c) letretako portzentajeak. Araubide hori erretiro prestazioen kasuan aplikatzeko, behar-beharrezkoa izango da aseguru kontratua gutxienez erretiro data baino bi urte lehenago hitzartu izana.

e) Aldi baterako edo biziarteko errentak azkentzen diren kasuetan, horiek ez badira eskuratu herentziaz, legatuz edo beste edozein negozio juridikoren bidez, eta errentak azkentzeko arrazoia erreskate eskubidea erabiltzea bada, kapital higigarriaren etekina kalkulatzeko, erreskatearen zenbatekoari gehitu beharko zaizkio ordura arte ordaindutako errentak, eta emaitzari kendu beharko zaizkio apartatu honetako aurreko letren arabera kapital higigarriaren etekin gisa zergapetu diren kopuruak. Errentak eskuratu badira dohaintzaz edo inter vivos egindako doako beste edozein negozio juridiko erabiliz –Oinordetzen eta Dohaintzen gaineko Zergari buruzko urtarrilaren 11ko 3/1990 Foru Arauaren 3.1 artikuluko b) letran aipatuak–, errentak eratu arte metatutako errentagarritasuna ere kenduko da.»

Lau.– 46. artikulua honela geratzen da idatzita:

«46. artikulua.– Kostu gabeko eskualdaketak.

Eskurapena edo eskualdaketa kostu gabekoa izan bada, aurreko artikuluko arauak izango dira aplikagarriak, eta balio bakoitzaren benetako zenbatekotzat oinordetzen eta dohaintzen gaineko zergaren arauak aplikatzetik ateratako balioak hartuko dira.

Kostu gabeko eskualdaketak eraginkortasuna unean bertan duten oinordetza-titulu bidez egiten direnean, eskurapen balioa hauxe izango da, geroko eskualdaketei begira, ondasunak edo eskubideak eskuratzen dituenarentzat: izendatzaileak ondasunak edo eskubideak izendatutakoari emateko unean duten balioa, salbu eta izendatutakoak ondasunak edo eskubideak eskualdatzen baditu izendatzailea hil aurretik. Izan ere, horrelako kasuetan, izendatutakoa izendatzailearen lekuan subrogatuko da ondasun edo eskubide horien eskurapen balio eta datei dagokienez, eta uneko eraginkortasuna duen oinordetza-itunaren aurretik hark zituen eskurapen data eta balioa gordeko dira.

Testamentu-ahalordea erabiliz komisarioak modu ezeztaezinean egiten dituen kostu gabeko eskualdaketak ahalorde hori erabiltzen den unean egindakotzat joko dira.

Foru arau honen 41. artikuluko 2. apartatuaren c) eta f) letretan aipatzen diren kostu gabeko eskurapenetan, dohaintza-hartzailea dohaintza-emailearen lekuan subrogatuko da ondasunen edo eskubideen eskurapen balio eta datei dagokienez. Aipatutako c) letran aipatzen diren eskurapenetan, aurrekoa ez da aplikagarria izango letra horretako azken-aurreko paragrafoan aurreikusitakotik ateratzen den eskurapen balio proportzionalari dagokionez.»

9. artikulua.– Aberastasunaren eta fortuna handien gaineko zerga aldatzea.

2018ko urtarrilaren 1etik aurrerako ondorioekin, aldaketak sartzen dira Aberastasunaren eta Fortuna Handien gaineko Zergari buruzko abenduaren 18ko 10/2012 Foru Arauaren 9.6 artikuluko bigarren paragrafoan, eta honela geratzen da idatzita:

«Jabetza soilaren balioari dagokionez, edo gozamendunik ez dagoen kasuetan, testamentu-ahalordea erabili gabe duten herentziak zergapetuko dira azaroaren 14ko 4/2016 Foru Arauak, Gipuzkoako Lurralde Historikoko zerga sistema Euskal Zuzenbide Zibilari buruzko ekainaren 25eko 5/2015 Legera egokitzen duenak, II. tituluko I. kapituluan ezarritakoaren arabera.»

10. artikulua.– Hiri-lurren balio gehikuntzaren gaineko zerga aldatzea.

2018ko urtarrilaren 1etik aurrerako ondorioekin, aldaketak sartzen dira Hiri-lurren Balio Gehikuntzaren gaineko Zergari buruzko uztailaren 5eko 16/1989 Foru Arauaren 6. artikuluaren 5. apartatuan, eta 6. apartatu berria gehitzen zaio:

«5.– Testamentu-ahalordean pertsona jakin bati eman bazaio herentziako ondasunez bizi artean gozatzeko eskubidea, gozamen horrengatik likidazio bakarra egingo da, gozamendunak kausatzailearekin duen ahaidetasunaren arabera eta biziarteko gozamenen arauak aplikatuta.

Gozamena azkentzen denean testamentu-ahalordea erabiltzean, bi likidazio egingo dira gozamen horrengatik, gozamendunak kausatzailearekin duen ahaidetasunaren arabera:

a) Lehen likidazio bat, kausatzailea hiltzen denean, biziarteko gozamenaren arauak aplikatuta.

Alabaina, testamentu-ahalordea erabiltzeko epea zehaztuta badago, lehen likidazio hori aldi baterako gozamenaren arauak aplikatuta egingo da, ahalordea erabiltzeko ezarrita dagoen gehieneko epeagatik.

b) Beste likidazio berri bat, testamentu-ahalordea erabiltzen denean, aldi baterako gozamenaren arauekin bat, kausatzailearen heriotzatik igarotako denboragatik. Aurreko likidazioagatik ordaindu dena konturako sarreratzat joko da, eta diferentzia gozamendunari itzuliko zaio, haren aldekoa bada.

b) letra honetan aipatzen den likidazioa aurkeztuko da testamentu-ahalordea baliatzeagatik edo hura azkentzeko gainerako arrazoiengatik oinordeko gertatzen direnen likidazioa aurkeztearekin batera.

6.– Lurren eskualdaketak testamentu-ahalordea erabili gabe duten herentziek egiten dituztenean Euskal Zuzenbide Zibilari buruzko ekainaren 25eko 5/2015 Legearen 43. artikuluko xedapen egintzen ondorioz, eskualdaketa horiek oinordetzen eta dohaintzen gaineko zergaren sortzapena ez badakarte, aplikagarria izango da azaroaren 14ko 4/2016 Foru Arauak, Gipuzkoako Lurralde Historikoko zerga sistema Euskal Zuzenbide Zibilari buruzko ekainaren 25eko 5/2015 Legera egokitzen duenak, II. tituluko II. kapituluan, eta badagokio, III. kapituluan, xedatutakoa.»

LEHEN XEDAPEN IRAGANKORRA.– Aparteko mozkinak berrinbertitzea.

2018ko urtarrilaren 1a iritsita zergadunek ez badituzte berrinbertitu Gipuzkoako Lurralde Historikoko Sozietateen gaineko Zergari buruzko urtarrilaren 17ko 2/2014 Foru Arauaren 36. artikuluan xedatutakora bildutako zenbatekoak, artikulu horretan xedatutakoa aplikatu ahal izango dute 2017ko abenduaren 31n indarrean dagoen idazkera kontuan hartuta.

BIGARREN XEDAPEN IRAGANKORRA.– Kenkaria enplegua sortzeagatik.

Urtarrilaren 17ko 2/2014 Foru Arauak, Gipuzkoako Lurralde Historikoko Sozietateen gaineko Zergarenak, enplegua sortzeagatik 66. artikuluan arautzen duen kenkaria 2018ko urtarrilaren 1a baino lehen kontratatutako langileei badagokie, erregulazio horretan eta hura garatzen duten arauetan ezarritakoaren arabera arautuko da, 2017ko abenduaren 31n indarrean dagoen idazkera kontuan hartuta.

HIRUGARREN XEDAPEN IRAGANKORRA.– Aldatzea 2016. urtean zerga aldaketa jakin batzuk onartzen dituen azaroaren 14ko 5/2016 Foru Araua.

2014 eta 2015eko zergaldiei ere aplikatuko zaie 2016. urtean zerga aldaketa jakin batzuk onartzen dituen azaroaren 14ko 5/2016 Foru Arauaren 1. artikuluaren lehen ordinaleko bat apartatuaren bidez egindako aldaketa.

Aurkeztu diren autolikidazioak eta egin diren likidazioak aldaketa honek eraginda daudenean, aldatu egingo ditu Zerga Administrazioak, interesdunek eskatuta, kontuan hartuta xedapen iragankor honetan sartutako aldaketa.

Xedapen indargabetzaileA

Indarrik gabe geratzen dira foru arau honetan xedatutakoarekin bat ez datozen maila bereko edo txikiagoko xedapen guztiak.

AZKEN XEDAPENA.– Indarrean jartzea eta ondorioak izatea.

Foru arau hau Gipuzkoako Aldizkari Ofizialean argitaratu eta biharamunean jarriko da indarrean, bere xedapenetan berariaz jasotako ondorioak eragotzi gabe. Guztiarekin ere, foru arau honen I. tituluko 4. artikuluaren lehen apartatuan xedatutakoak 2018ko urtarrilaren 1etik aurrera izango ditu ondorioak.

Azterketa dokumentala