Euskal Herriko Agintaritzaren Aldizkaria

246. zk., 2017ko abenduaren 28a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

JUSTIZIA ADMINISTRAZIOA

AZPEITIKO LEHEN AUZIALDIKO ETA INSTRUKZIOKO 2 ZENBAKIKO ZUZENEKO LAGUNTZA EMATEKO UNITATE PROZESALA

6273

EDIKTUA, ezkontzaz kanpoko seme-alabentzako neurrietarako 344/2015 prozeduraren ondoriozkoa.

JAKINARAZPEN-ZEDULA

Azpeitiko Lehen Auzialdiko 2 zenbakiko Epaitegian (Gipuzkoa), ezkontzaz kanpoko seme-alabentzako neurriei buruzko 344/2015 prozedura bideratu da, Fatima Zhara Morsli-k eskatuta, Yassine Sadik-en aurka. Prozedura horren gainean epaia eman da. Hona hemen idazpurua eta epaitza:

74/2017 EPAIA

Epailea: Maria de Blas Piñeiro.

Lekua: Azpeitia (Gipuzkoa).

Eguna: bi mila eta hamazazpiko uztailaren seia.

Alderdi demandatzailea: Fatima Zhara Morsli.

Abokatua: Lander Beobide Carracedo.

Prokuradorea: Juan Jose Gonzalez Belmonte.

Alderdi demandatua: Yassine Sadik.

Abokatua.

Prokuradorea.

Judizioaren xedea: zaintza eta jagoletza, bisita-araubidea eta mantenu-pentsioa zehazteko jarritako demanda.

ERABAKITZEN DUT:

Partez baiesten dut González Epiategietako prokuradoreak Fatima Zhara Morsli-ren izenean eta ordezkaritzan sustatutako eskabidea, Yassine Sadik-en aurkakoa. gaia gurasoen eta sema-alaben arteko neurriak. Horrenbestez, neurri hauek ezartzea erabakitzen dut:

1.– Zaintza- eta jagoletza-araubidea. Amak izango du XXXXX semearen gaineko zaintza eta jagoletza.

2.– Guraso-ahalaz baliatzea. Guraso-ahala erdibana izaten jarraituko dute aitak eta amak. Gurasoek guraso-ahala elkarrekin baliatzeak dakar seme adingabeari dagozkion erabaki garrantzitsu guztiak guraso biek elkarrekin adostuta hartu beharra. Erabakiak hartzeko, egokien zaien komunikazio-bidea hautatu beharko dute; komunikazio-bide hori errespetatzera eta betetzera behartuta daude. Besterik adierazi ezean, komunikazioa posta elektronikoz edo burofaxez gauzatuko da, eta, hortaz, beste gurasoak ere bide horiek baliatuta erantzun beharko du. Hala egiten ez badu, ados dagoela ulertuko da. Adostasunik ez badago, Epaitegiak erabakiko du Kode Zibilaren 156. artikuluan ezarritako izapidearen arabera. Guraso-ahalaren arloan hartu beharreko erabakien artean, honako hauek daude, besteak beste:

a) Adingabearen egoitza hark ohiko bizileku duen udalerritik kanpora aldatzea; adingabea atzerrira joatea, oporraldiko bidaietan ez bada.

b) Ikastetxea aukeratzea eta, hala behar denean, ikastetxea aldatzea.

c) Eskolaz kanpoko jarduerak edo jarduera osagarriak zehaztea.

d) Gizarte- eta erlijio-ospakizun garrantzitsuak (bataioa, lehen jaunartzea eta beste erlijio batzuetako antzeko ekitaldiak).

e) Premiazkoak ez diren ekintza medikoak, ebakuntza egitea edo tratamendu mediko luzea dakartenak, edo tratamendu psikologikoak.

Guraso biei aitortzen zaie adingabearen eskola-bilakaerari buruzko informazioa jasotzeko eskubidea, bai eta ikastetxeko jarduera tutorialetan parte hartzekoa ere. Halaber, semearen tratamenduei buruzko argibide medikoak ere eskatu ahal izango dituzte guraso biek.

Seme-alabekin dagoen gurasoak haiei buruzko erabakiak hartzerik izango du beste gurasoari aldez aurretik galdetu gabe, baldin eta urgentziako egoerarik gertatu bada, edo erabakiak adingabeen eguneroko bizimoduko gorabehera arrunt eta ohikoei buruzkoak eta garrantzirik gabekoak badira.

3.– Bisita-araubidea. Alderdien arteko akordiorik ezean, bi larunbatetik behin egon ahal izango da aita adingabearekin, goizeko 10:00etatik 20:00etara.

Yassine jaunak astebete lehenago jakinarazi beharko dio amari XXXXX ikusteko interesa duela.

Bisitak Zumaiako udalerrian egingo dira, han bizi baita adingabea.

4.– Mantenu-pentsioa. Yassine jaunak 200 euroko mantenu-pentsioa ordainduko du hilero hilabete bakoitzeko lehenengo 5 egunen barruan; diru hori Morsli andreak Epaitegiari bideratutako idazki baten bidez izendatzen duen kontuan sartuko du, KPIaren arabera dagozkion eguneratzeak aintzat hartuta.

Aitak zuzenean ordaindu behar dituen era horretako gastuak ez dira kenduko ebazpen honen arabera ordaindu behar duen pentsiotik.

Ekonomikoki burujabeak ez diren seme-alabek euren bizimoduan izaten dituzten ezohiko gastuak erdibana ordaindu beharko dituzte gurasoek. Kontzeptu horretatik kanpo utziko dira, esaterako,uniformearen, eskola-matrikularen, jantokiaren, garraioaren, eskola-liburuen edo ikasleen gurasoen elkarteko gastuak (urtero errepikatzen dira); bestelako gastuak, berriz, sartu egingo dira apartekoen kontzeptuan, eta katalogo posible osoa adierazteko asmorik gabe, honako hauek sar daitezke: gastu medikoak, kirurgikoak, ospitalekoak, ortopedikoak, dentistarenak, psikologikoak, farmazeutikoak, ortodontziakoak, logopediakoak, eta, oro har, osasun-sistema publikoan edo dagokion mediku-erakundean sartzen ez diren gaixotasun fisiko edo mentalei lotutakoak, baita, prestakuntza-arloan, eskolan atzeratuta egonez gero, derrigorrezko ikasgaiei buruzko klase partikularretakoak ere. Egin beharreko gastua medikoa bada eta Gizarte Segurantzak edo dagokion erakunde medikoak ordaintzen ez badu eta beharrezkoa bada, erdibana ordainduko dute aitak eta amak; horretaz gain, fakultatiboa eta tratamendua bi gurasoek elkarrekin adostutakoak izango dira.

Aurreko paragrafoan azaldutako ezohiko gastuak aitak eta amak adostu beharko dituzte, gastua egin aurretik betiere; horrela, bada, gastu hori egin edo ez egin desadostasunik egonez gero, organo judizialaren pean jarriko da gaia; izan ere, organo horrek erabakiko du gastu hori ea bi gurasoek ordaindu behar duten ebazpen honetan ezarritako proportzioan. Ebazpena aldekoa izango da, baldin eta seme-alabentzako beharrezkoa eta egokia bada gastua eta familiaren zirkunstantziekin bat badator. Erregimen horretatik kanpo uzten dira behar-beharrezkoak diren presako gastuak; izan ere, aldez aurretik ezin bada, aski izango da beste gurasoari ondoren jakinaraztea.

Aparteko gastuak ordaintzeko obligazioa amaitu egingo da seme-alaba bakoitza, adin nagusikoa edo legez emantzipatuta egonik, ekonomikoki independentea denean, hartara eragotzi gabe 150. eta 152. artikuluetan adierazten diren obligazioa amaitzeko kausak.

5.– Espainiako lurraldetik ateratzeko debekua. Yassine jaunari berariaz debekatzen zaio XXXXX bere semea Espainiatik kanpo eramatea aurretik Morsli andrearen baimena jaso gabe, edo, hala badagokio, horretarako baimen judizialik ez badu.

Alderdi bati ere ez zaio ezartzen prozesuko kosturik.

Aurkaratzeko modua: apelazio-errekurtsoa, Gipuzkoako Probintzia Auzitegian (PZLb, 455. artikulua). Errekurtsoa egiteko, idazkia aurkeztu behar da epaitegi honetan, hogei egun balioduneko epean, jakinarazpena egin eta biharamunetik aurrera. Idazki horretan, bestalde, hauek adieraziko dira: aurkaratzea zein alegaziotan oinarritzen den eta apelatutako ebazpena eta aurkaratutako erabakiak zein diren (PZLb, 458.2 artikulua).

Errekurtsoa jarri ahal izateko, 50 euroko gordailua eratu beharko da, eta baldintza hori bete ezean, ez da hura izapidetzea onartuko. Gordailua egiteko, zenbateko hori zainpean jarri beharko da epaitegi honek Banco Santander banketxean duen Gordailuan eta Zainpean jartzeko Kontuan (1832 0000 31 0344 15). Ordainagiriaren kontzeptua idazteko hutsunean, «Errekurtsoa» dela adierazi beharko da (kodea: 02-Apelazioa). Diru-kopuru hori zainpean jarri izana egiaztatu beharko da errekurtsoa aurkeztean (BJLO, 15. xedapen gehigarria).

Errekurtsoa jartzeko, gordailua eratzetik salbuetsita daude aipatutako xedapenaren 5. paragrafoan aipatzen direnak, eta doako laguntza juridikorako eskubidea aitortua dutenak.

Eta Yassine Sadik demandatuari behar bezalako jakinarazpena egiteko balio dezan, ematen eta sinatzen dut ediktu hau, Azpeitian (Bizkaia), bi mila eta hamazazpiko azaroaren hogeita lauan.

JUSTIZIA ADMINISTRAZIOAREN LETRADUA.

Azterketa dokumentala