Euskal Herriko Agintaritzaren Aldizkaria

175. zk., 2017ko irailaren 13a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

JUSTIZIA ADMINISTRAZIOA

BARAKALDOKO LEHEN AUZIALDIKO 5 ZENBAKIKO EPAITEGIA

4436

EDIKTUA, behin betiko neurriak aldatzeari buruzko 230/2016 prozeduraren ondoriozkoa.

Barakaldoko Lehen Auzialdiko 5 zenbakiko Epaitegia (Familia).

Judizioa: behin betiko neurriak aldatzea 230/2016.

Demandatzailea: Fernando Serna Martin.

Abokatua: Eunate Lopez Beraza.

Prokuradorea: Leire Fraga Areitio.

Demandatua: Laura Trueba Lopez.

Gaia: neurriak aldatzea.

Judizio horretan, epaia eman da 2017-03-17an. Hona hemen epaitza:

194/2017 EPAIA

Epailea: Ana Isabel Viaña Ranilla andrea.

Lekua: Barakaldo (Bizkaia).

Eguna: bi mila eta hamazazpiko martxoaren hamazazpia.

Alderdi demandatzailea: F.S.M.

Abokatua: Eunate Lopez Beraza.

Prokuradorea: Leire Fraga Areitio.

Alderdi demandatua: Laura Trueba Lopez.

Abokatua.

Prokuradorea.

Judizioaren helburua: neurriak aldatzea.

EPAITZA

Partez baiesten dut F.S.M. jaunak aurkeztu duen demanda, Laura Trueba López andrearen aurkakoa, eta, ondorioz, bidezkotzat jotzen dut aldatzea epaitegi honek emandako epaian onartutako neurriak; epai hura MHC 391/2007 prozeduraren autoetan eman zen, 2007ko irailaren 24an. Mantenu-pentsioari dagokionez, Getxoko Instrukzioko 5 zenbakiko Epaitegiak 190/2010 autoetan emandako 2010eko ekainaren hamazazpiko epaiak aldatu zuen; haren ordez, honako neurri hauek ezartzen dira:

I.– Seme adingabearen zaintza eta jagoletza aitari esleitzen dizkiot, eta guraso-ahala, berriz, guraso biek izango dute.

II.– Guraso bien arteko adostasunik ez dagoenez, jagoletza ez duen gurasoarentzako ordu eta erdiko bisita-, komunikazio- eta egonaldi-araubide bat ezarriko da, ordu eta erdi astean, eta Familia Elkargunean egingo da, bertako langileen begiradapean, elkargune horretan ordu librerik baldin badago.

Bigarren fase batean, hilabete bat pasata, elkargune horren txostenak aldekoak badira eta adostasunik ez bada, bisitaldiak astearte eta ostiraletan izango dira, 16:00etatik 20:00ra bitartean. Familia Elkargunean hartuko da adingabea, eta gero bertan utziko da.

Adingabearen oporretan, gurasoren batek justifikatzen badu ez dela etxean egongo, eten ahal izango dira bisitaldi horiek.

III.– Hileko 100,00 euroko mantenu-pentsioa ezartzen da amaren kargura.

Aurreratuta egin behar dira ordainketak, hileroko lehen bost egunetan, demandatzaileak horretarako izendatzen duen kontuan. Zenbateko hori, bestalde, urtero berrikusiko da, Estatistikako Institutu Nazionalak edo haren ordezko erakunde batek argitaratutako KPIren aldakuntzen arabera.

Adingabeen aparteko gastuak erdibana ordaindu beharko dituzte guraso biek. Aparteko gastutzat hartuko dira Kode Zibilaren 142. artikuluaren edukiarekin zerikusia duten ezusteko gastuak eta/edo egun aurreikusi ezineko gastuak, beharrezkoak direnak. Kontratatu baino lehen, jagoletza duen gurasoak jakinarazi beharko dio beste gurasoari –agiri sinesgarrien bidez– aparteko gastu bat sortu dela, beharrezkoa dela eta zenbatekoa den; adostasunik ezean, horretarako emandako epean berariaz adostasunik adierazten ez delako edo isilbidez desadostasuna adierazten delako, baimen judiziala eskatuko da.

Bidal bekio ofizioa Barakaldoko Familia Elkarguneari.

Sortutako kostuei buruzko berariazko erabakirik ez da hartzen.

Aurkaratzeko modua: Bizkaiko Probintzia Auzitegian aurkeztutako apelazio-errekurtsoaren bidez (PZLb, 455. artikulua). Errekurtsoa egiteko, idazkia aurkeztu behar da epaitegi honetan, hogei egun balioduneko epean, jakinarazpena egin eta biharamunetik aurrera. Idazki horretan, bestalde, honako hauek adieraziko dira: aurkaratzea zein alegaziotan oinarritzen den, eta zein diren apelatutako ebazpena eta aurkaratutako erabakiak (PZLb, 458.2 artikulua)

Errekurtsoa jarri ahal izateko, 50 euroko gordailua eratu beharko da, eta, egin ezean, ez da errekurtsoa izapidetzea onartuko. Gordailua egiteko, zenbateko hori zainpean jarri beharko da epaitegi honek Banco Santander banketxean duen Gordailuan eta Zainpean jartzeko Kontuan. Kontuaren zenbakia hauxe da: ..... Ordainagiriaren kontzeptua idazteko hutsunean, «errekurtsoa» dela adierazi beharko da (kodea: 02-Apelazioa). Diru-kopuru hori zainpean jarri izana egiaztatu beharko da errekurtsoa aurkeztean (BJLOko 15. xedapen gehigarria).

Errekurtsoa jartzeko, gordailua eratzetik salbuetsita daude aipatutako xedapenaren 5. paragrafoan aipatzen direnak, eta doako laguntza juridikorako eskubidea aitortua dutenak.

Eta epai honen bidez erabaki, agindu eta sinatzen dut.

Laura Trueba Lopez demandatuaren egungo helbidea ezezaguna denez, aipatutako ebazpena Euskal Herriko Agintaritzaren Aldizkarian ediktu bidez jakinaraztea erabaki da, Prozedura Zibilaren 1/2000 Legearen 497.2 artikuluan xedatutakoaren arabera (PZLb).

Ebazpen horren aurka, auzi-ihesean den demandatuak apelazio-errekurtsoa aurkez dezake.

Jakinarazten den ebazpenaren testu osoa eskuragarri du interesdunak, epaitegi honetako bulego judizialean.

Barakaldo (Bizkaia), 2017ko abuztuaren 24a.

JUSTIZIA ADMINISTRAZIOAREN LETRADUA.

Azterketa dokumentala