RSS
172. zk., 2017ko irailaren 8a, ostirala
- Bestelako formatuak:
- PDF (403 KB - 20 orri.)
- EPUB (579 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
BESTELAKO XEDAPENAK
LAN ETA JUSTIZIA SAILA
4376
AGINDUA, 2017ko abuztuaren 30ekoa, Lan eta Justiziako sailburuarena, uztailaren 29ko 191/2003 Dekretuan aurreikusitako laguntzen deialdia egiteko dena. Dekretu horrek enpresaburuen elkarteei eta erakunde sindikalei diru-laguntzak emateko modua arautzen du, enpresa-elkarteen eta sindikatuen giza baliabideen kualifikazioa haien jarduera-eremuen berezko gaietan hobetzera zuzendutako prestakuntza-planak garatzeko.
Uztailaren 29ko 191/2003 Dekretuak (2003ko irailaren 1eko EHAA, 169. zk.) enpresaburuen elkarteei eta erakunde sindikalei diru-laguntzak emateko aukera arautzen du, enpresaburuen elkarteen eta erakunde sindikalen giza baliabideen kualifikazioa haien jarduera-eremuen berezko gaietan hobetzera zuzendutako prestakuntza-planak garatzeko. Dekretu horren helburua Justizia, Lan eta Gizarte Segurantza Sailak 1996ko urriaren 29an 244/1996 Dekretuarekin hasitako laguntza-neurriei jarraipena ematea da. Adierazitako neurriak prestakuntza-jarduerak gauzatzen laguntzeko dira, enpresaburuen elkarteen eta erakunde sindikalen berezko helburuen barnean. Dekretu horren bitartez, enpresaburuen elkarteen eta erakunde sindikalen prestakuntzako barne-programak indartzera, integratzera eta koherentzia ematera zuzendutako finantzaketa publikoko sistema bat ezartzen da, horiek beren koadroen eta langileen prestakuntzarako tresna egoki izan daitezen, modu horretan egoera soziolaboralari beharrezko laguntza emanez.
Aipatutako arauak indarraldi mugagabea du. Hain zuzen ere, arauaren 9.3 artikuluak ezartzen du Justizia, Lan eta Gizarte Segurantzako sailburuaren agindu baten bidez urtero egingo dela aipatutako Dekretuan aurreikusitako laguntzen deialdia, laguntza horiek finantzatzeko erabiliko diren eskabideak eta gehienezko kopuru globala aurkezteko epea adieraziz, entitate onuradunen bi kategorien artean banatuta.
Xedapen honen bidez iragarritako diru-laguntza lerroa Lan eta Justiziako sailburuaren 2017ko maiatzaren 17ko Aginduan (Lan eta Justizia Saileko 2017. urterako Diru-laguntza Plan Estrategikoa onartzen duena) dago xedatuta, Diru-laguntzen Lege Orokorrak (azaroaren 17ko 38/2003 Lege Orokorra) 8.1 artikuluan ezartzen duen moduan, eta manu horretan aipatutako edukiarekin.
Lan eta Justizia Sailaren egitura organikoa eta funtzionala ezartzeko apirilaren 11ko 84/2017 Dekretuaren 9.1 w) artikuluarekin bat etorrita, Lan eta Gizarte Segurantza Zuzendaritzari dagokio gizarte-eragileek dituzten giza baliabideen kualifikazioa sustatzea, zenbait prestakuntza-planen bitartez, zehazki giza baliabide horiek gizartearen garapen ekonomikoaren eta ongizatearen alde egin dezaten sustatuko duten prestakuntza-planen bitartez.
191/2003 Dekretuaren 16. artikuluak ezartzen duenez, Euskal Autonomia Erkidegoko Aurrekontu Orokorretan propio ezarritako aurrekontu-kredituetatik aterako dira Dekretuaren helburua betetzeko behar diren aurrekontu-baliabideak.
Azaroaren 11ko 1/1997 Legegintzako Dekretuaren 49.5 artikuluan ezarrita dagoenez - dekretu horren bidez, Euskal Autonomia Erkidegoko Ogasun Nagusiaren Antolarauei buruzko Legearen testu bategina onartu zen-, Euskal Autonomia Erkidegoaren ekonomia-ekitaldi bakoitzeko aurrekontu orokorrak indarrean jartzen direnean, diru-laguntzak arautzeko behar diren xedapenak emango dira, eta egon daudenak gaurkotu edo aldatu egingo dira; orobat, bere garaian indarraldi mugagabekotzat jo ziren diru-laguntzak iragarriko dira.
Euskal Autonomia Erkidegoko 2017ko Aurrekontu Orokorretan –apirilaren 11ko 2/2017 Legeak onartutakoak– esleitu da 3112 Lana, 11 zerbitzua, Lan eta Gizarte Segurantza Zuzendaritza programan, 45499 azpikontzeptua, Transferentziak eta diru-laguntzak irabazteko asmorik gabeko beste instituzioei, 005 partida, 191/2003 izenekoa, Formakuntza-planak enpresa-elkarteak eta sindikatuentzat; guztira, zenbatekoa 710.000 eurokoa da.
Diru-laguntza horiek ez zaizkio aldez aurretik Europako Batzordeari jakinarazi behar, Europar Batasunaren Funtzionamenduari buruzko Tratatuaren 107. artikuluko betekizunak betetzen ez direlako; izan ere, emandako diru-laguntza publikoak, bere izaera dela eta, ez du abantaila ekonomikorik ekartzen, ez ditu lehia edo estatu kideen arteko merkataritza-trukeak faltsutzen eta ezin du halakorik faltsutu.
Hori guztia dela-eta, eta aipatutako uztailaren 29ko 191/2003 Dekretuaren 9.3 artikuluan aurreikusitako gaikuntza baliatuz, honako hau
EBAZTEN DUT:
Lehenengoa.– Helburua
Uztailaren 29ko 191/2003 Dekretuan xedatutako laguntzak eskuratzeko 2017ko deialdia egitea. Dekretu horren bidez, enpresarien elkarteei eta erakunde sindikalei beren jarduera-eremuetako berezko gaiei dagokienez, giza baliabideen trebakuntza hobetzeko prestakuntza-planak egiteko emango zaizkien diru-laguntzak arautu ziren.
Bigarrena.– Eskabideak aurkezteko epea.
Eskabideak aurkezteko epea hilabetekoa izango da agindu honek ondorioak dituenetik aurrera.
Hirugarrena.– Diru-baliabideak.
Deialdi honen helburua den finantzaketarako baliabide ekonomikoak, 2017rako, 710.000 eurokoak dira; horietatik 497.000 euro 2017. urteko aurrekontu arruntetik ordainduko dira eta 213.000 euro 2018erako konpromisoko aurrekontutik, 3112 Lana 11 zerbitzua, Lan eta Gizarte Segurantza Zuzendaritza programaren kontura.
Zenbateko hori entitate onuradun izan daitezkeen kategoria bien artean banatuko da, banaketarako formula honakoa izango dela:
a) Enpresaburuen elkarteei gehienezko kopuru globalaren % 40 emango zaie, hau da, 284.000 euro.
b) Erakunde sindikalei gainerako % 60a emango zaie, hau da, 426.000 euro.
Laugarrena.– Diru-laguntzak emateko eta eskuratzeko baldintzak
Aipatutako laguntzak eskuratu eta emateko baldintzak aipatutako dekretuan eta agindu honetako xedapen gehigarri bakarrean jasota daude.
Diru-laguntzen Lege Orokorrak (azaroaren 17ko 38/2003 Lege Orokorra) 13. artikuluan xedatutako debekuren bat urratzen duten erakundeek ezingo dute diru-laguntzarik eskuratu.
Bosgarrena.– Ebaluazio-batzordea.
Agindu honetan ezarritakoaren babesean aurkeztutako proiektuak analizatu eta ebaluatzeko, ebaluazio-batzorde bat sortuko da. Batzorde hori Lan eta Gizarte Segurantzako Zuzendaritzako hiru teknikarik osatuko dute, eta teknikari horiek titularrak izendatuko ditu.
Batzorde horrek ebazpen-proposamena egingo dio Lan eta Gizarte Segurantzako zuzendariari, uztailaren 29ko 191/2003 Dekretuaren 12.1 artikuluan ezarritakoaren arabera.
Seigarrena.– Laguntzen ebazpena, izapideketa eta prozedura eta erakunde onuradunen obligazioak.
1.– Diru-laguntza eskaera I. eranskinean argitaratutako formatuaren arabera egingo da, eta horrekin batera II. eranskinean adierazitako dokumentazioa aurkeztuko da. Halaber, erantsiko zaio diru-laguntza eskatzen den jardueren xehetasuna, III. eranskinean ezarritakoaren arabera.
2.– Diru-laguntza jasotzeko eskabideak Lan eta Justiziako Saileko Lan eta Gizarte Segurantza Zuzendaritzara bidaliko dira, eta Lan eta Justiziako Saileko Erregistro Orokorrean aurkez daitezke, bai eta Lan eta Gizarte Segurantzako edozein lurralde-ordezkaritzatako erregistroan edo Administrazio Publikoen Administrazio Prozedura Erkidearen urriaren 1eko 39/2015 Legearen 16.4 artikuluan ezarritako edozein lekutan ere.
3.– Lan eta Justiziako Saileko Lan eta Gizarte Segurantza Zuzendaritza da eskabideak kudeatzeko eta izapidetzeko ardura duen organoa, eta Lan eta Gizarte Segurantzako zuzendariak du ebazteko eskumena.
4.– Diru-laguntza jasotzeko eskabidea aurkeztean baimena emango diote organo kudeatzaileari, zerga-betebeharretan eta Gizarte Segurantzarekikoetan egunean egon behar duela dioen betekizuna betetzen duela egiaztatzeko behar beste ziurtagiri eskatzeko. Horretarako, ez da beharko erakunde eskatzailearen oniritzirik. Kasu horretan, ziurtagiri horiek aurkeztu beharko ditu, araudian aurreikusitako terminoetan.
5.– Halaber, onuradunek bete beharko dituzte azaroaren 17ko diru-laguntzen 38/2003 Lege Orokorraren14. eta 46. artikuluetan ezarritako betebeharrak.
XEDAPEN GEHIGARRIA
1.– Gizon eta Emakumeen Berdintasunerako otsailaren 18ko 4/2005 Legeko azken xedapenetako seigarrenean xedatutakoa betez –lege horren bidez aldatu da azaroaren 11ko 1/1997 Legegintzako Dekretuak onartutako Euskal Autonomia Erkidegoko Ogasun Nagusiaren Antolarauei buruzko Legearen testu bateginaren 50. artikulua–, ezin izango dute deialdi honetan parte hartu sexuarengatik egindako diskriminazioa dela-eta administrazio-zehapena edo zehapen penala jaso duten pertsona fisiko edo juridikoek, ez eta Gizon eta Emakumeen Berdintasunerako Legea dela-eta debeku honekin zigortutakoek ere, dagokion zigorra indarrean dagoen bitartean.
2.– Era berean, zigor- eta administrazio-arloan diru-laguntza edo laguntza publikoak lortzeko aukera galtzearekin zehatuta dauden enpresaburuen elkarteek eta erakunde sindikalek ezin izango dute laguntzarik jaso, ezta hartarako ezgaitzen dituen legezko debekuaren eraginpean daudenek ere.
3.– Uztailaren 29ko 191/2003 Dekretuaren 10. artikuluaren arabera, eskabide-orriarekin eraman behar den dokumentazioarekin batera, erakunde eskatzaileak erantzukizunpeko adierazpen bat aurkeztu beharko du, aurreko paragrafoetan adierazitako baldintzak betetzen direla egiaztatzen duena.
AZKEN XEDAPENETATIK LEHENENGOA
Uztailaren 29ko 191/2003 Dekretuan (dekretu horren bidez, beren jarduera-eremuetako gaiei dagokienez giza baliabideen trebakuntza hobetzeko prestakuntza-planak gara ditzaten, enpresa-elkarteentzako eta sindikatuentzako diru-laguntzen emakida arautzen da) ezarritakoari ez ezik honako hauek xedatutakoari ere men egingo diote agindu honek hizpide dituen diru-laguntzek: Administrazio Publikoen Administrazio Prozedura Erkidearen Legea (urriaren 1eko 39/2015 Legea); Sektore Publikoaren Araubide Juridikoaren Legea (urriaren 1eko 40/2015 Legea); Euskadiko Ogasun Nagusiaren Antolarauei buruzko Legearen testu bateginaren (azaroaren 11ko 1/1997 Legegintzako Dekretuaren bidez onartua) VI. titulua eta VII. tituluko III. kapitulua; eta Diru-laguntzen Lege Orokorrean (38/2003 Legea) eta 887/2006 Errege Dekretuan (azken horren araudia onartzen duena) jasotako oinarrizko arauketa.
AZKEN XEDAPENETATIK BIGARRENA
Agindu honek amaiera ematen dio administrazio-bideari, eta, beraren aurka, aukerako berraztertze-errekurtsoa jarri ahalko diote interesdunek Lan eta Justiziako sailburuari, hilabeteko epean, Euskal Herriko Agintaritzaren Aldizkari Ofizialean argitaratu eta hurrengo egunetik hasita, edo zuzenean administrazioarekiko auzietarako errekurtsoa Euskal Autonomia Erkidegoko Justizia Auzitegiaren Administrazioarekiko Auzietarako Salan, bi hilabeteko epean, aldizkari ofizial berean argitaratu eta hurrengo egunetik hasita, Administrazio Publikoen Administrazio Prozedura Erkidearen urriaren 1eko 39/2015 Legearen 123. eta 124. artikuluek ezarritakoaren arabera.
AZKEN XEDAPENETATIK HIRUGARRENA
Euskal Herriko Agintaritzaren Aldizkarian argitaratu eta biharamunetik aurrera izango ditu ondorioak agindu honek.
Vitoria-Gasteiz, 2017ko abuztuaren 30a.
Lan eta Justiziako sailburua,
MARÍA JESÚS CARMEN SAN JOSÉ LÓPEZ.
