RSS
127. zk., 2017ko uztailaren 5a, asteazkena
- Bestelako formatuak:
- PDF (226 KB - 2 orri.)
- EPUB (194 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
BESTELAKO XEDAPENAK
LAN ETA JUSTIZIA SAILA
3395
EBAZPENA, 2017ko ekainaren 13koa, Lan eta Justizia Saileko Zerbitzu zuzendariarena, Gobernantza Publiko eta Autogobernu Saileko Administrazioko eta Zerbitzu Orokorretako sailburuordeari delegatzen diona 2017., 2018. eta 2019. urteetarako posta-zerbitzuen kontratazioa (2020-2021ra luza daiteke) Lan eta Justizia Sailaren mendeko zentro eta egoitza judizialetan.
Kudeaketa bateratuko eraikinetan, Baliabide Orokorren Zuzendaritzari dagokio ondasun eta zerbitzuak eskuratzea eta hornitzea, hala ezarrita baitago Euskal Autonomia Erkidegoko Sektore Publikoaren Kontratazioaren araubidea ezartzeko uztailaren 27ko 116/2016 Dekretuaren I. tituluko III. kapituluaren (Kontratazioaren arrazionalizazio teknikoa) I. sekzioan (Kudeaketa bateratua) eta Gobernantza Publiko eta Autogobernu Sailaren egitura organikoa eta funtzionala ezartzen duen apirilaren 11ko 71/2017 Dekretuaren 21.d) artikuluan.
Azken urteetan, Ogasun eta Finantzetako sailburuak zenbait erakundetarako zerbitzuak eta hornidurak lizitatu eta kontratatu ditu, eta egiaztatu da teknika horrek ahalbidetu duela eskala-ekonomiez baliatzea eta horrek emaitza onak izan dituela, bai arlo ekonomikoari dagokionez bai kontratuen betearazpenari dagokionez.
Posta-zerbitzuak kontratazio bateratuko teknika horren bidez kontratatu izan dira, eta teknika hori, gaur egun, berariaz jasota dago Kontratazio publikoari buruzko Europako Parlamentuaren eta Kontseiluaren 2014ko otsailaren 26ko 2014/24/EE Zuzentarauan, eta bateragarria da Sektore Publikoko Kontratuen Legearen testu bategineko 1. artikuluan jasotako printzipioekin, eta, bereziki, funts publikoen erabilera eraginkorrarekin.
Kontratazio bateratua egin aurretik, eskumenak esleitu behar dira, esleipena egitea dagokion kontratazio-organoak behar den prozedura egin dezan; horretaz gainera, egiaztatu beharko da kontratua kofinantzatuko duten ekarpen guztiak eskuragarri daudela oso-osorik.
Ildo horretan, aipatutako eremuan posta-zerbitzuak era bateratuan kontratatzeko bide edo formula egokia da Sektore Publikoaren Araubide Juridikoaren urriaren 1eko 40/2015 Legearen 9.1 artikuluan eskumenak delegatzeko jasotakoa, eta honako hau xedatzen du:
«1.– Administrazio publikoetako organoek beste organo batzuei delegatu diezazkiekete beren eskumenak, baldin eta organo horiek administrazio berekoak badira, nahiz eta hierarkikoki bata bestearen mendekoa ez izan, edo administrazio horiei lotuta edo administrazio horien mendean dauden organismo publikoak edo zuzenbide publikoko entitateak badira.»
Horregatik, Lan eta Justizia Saileko egitura organikoa eta funtzionala ezartzen duen apirilaren 11ko 84/2017 Dekretuaren 6.2 artikuluak kontratazioaren arloan Zerbitzu zuzendariari esleitzen dizkion eskumenei jarraikiz, eta Gobernantza Publiko eta Autogobernu Sailaren egitura organikoa eta funtzionala ezartzen duen apirilaren 11ko 71/2017 Dekretuaren 19.2 artikuluan ezarritakoaren arabera, Administrazioko eta Zerbitzu Orokorretako Sailburuordetzari dagokio –titularraren bitartez–, kontratazio-organoari kudeaketa bateratuko esparruetan esleitutako ahalmenak baliatzea. Horrenbestez, honako hau
EBAZTEN DUT:
I.– Gobernantza Publiko eta Autogobernu Sailaren Administrazioko eta Zerbitzu Orokorretako sailburuordeari delegatzea 2017., 2018. eta 2019. urteetarako Lan eta Justizia Saileko zentro eta egoitza judizialen posta-zerbitzuak kontratatzeko eskumena (2020. eta 2021. urteetara luza daiteke).
Haren esku utzitako eskumena Sektore Publikoko Kontratuen Legearen testu bategina onartzen duen irailaren 14ko 3/2011 LEDen aurreikusitako eta kontratuari aplikagarriak zaizkion honako gai hauek bideratzeko ere bada:
– Kontratua prestatzea (II. liburua).
– Kontratua esleitzea (III. liburua, I. titulua, I. kapitulua).
– Administrazioaren eskuduntzak, aldaketa, iraungitzea, lagapena eta azpikontratazioa, izaera orokorrarekin IV. liburukiko I. tituluko I. kapituluan aurreikusten direnak, eta izaera partikularrarekin –hornidura-kontratuetarako– IV. liburukiko II. tituluko IV. kapituluan aurreikusten direnak.
– Kontratua formalizatzea (III. liburua, I. titulua, I. kapitulua).
III.– Organo delegatzailearen baitan jarraituko dute kontratazio-organoari dagozkion gainerako eskumenek, eta, bereziki, egindako zerbitzuen betetzeari onespena emateko eta haien ordainketa agintzeko eskumenek.
III.– Delegatze hau sinatu eta hurrengo egunean jarriko da indarrean.
Vitoria-Gasteiz, 2017ko ekainaren 13a.
Zerbitzu zuzendaria,
JUAN IGNACIO URRESOLA ARECHABALA.
