RSS
146. zk., 2016ko abuztuaren 2a, asteartea
- Bestelako formatuak:
- PDF (216 KB - 3 orri.)
- EPUB (211 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
BESTELAKO XEDAPENAK
SEGURTASUN SAILA
3441
AGINDUA, 2016ko uztailaren 11koa, Segurtasuneko sailburuordearena. Horren bidez, Ogasun eta Finantzetako sailburuari eskuordetzan ematen zaio Segurtasun Sailaren mende dauden administrazio-zentroetan gas naturalaren hornidura 2017. eta 2018. urteetarako kontratatzeko eskumena.
Ekainaren 5eko 136/1996 Dekretuaren V. kapituluaren eta lehen xedapen gehigarriaren arabera eta apirilaren 9ko 192/2013 Dekretuaren 12.d) artikuluaren arabera, Baliabide Orokorren Zuzendaritzari dagokio kudeaketa zentralizatuko eraikinetan erabilera orokorreko materiak eta zerbitzuak kontratatzea, baldin eta Baliabide Orokorren Zuzendaritzari esleituta badaude (136/1996 Dekretua Euskal Autonomia Erkidegoko Administrazioaren kontratazio-araubideari buruzkoa da. 192/2013 Dekretua (2013ko apirilaren 18ko EHAA, 74 zk.) Ogasun eta Finantza Sailaren egitura organiko eta funtzionala ezartzekoa da).
192/2013 Dekretuaren 12.a) artikuluan zuzendaritza berari ematen zaio era zentralizatuan eskuratu behar diren ondasunak eta zerbitzuak kontratatzeko prozedurak garatzeko proposamena.
Gaur egun jotzen da Baliabide Orokorren Zuzendaritzaren mende dauden eraikinetan, Ogasun eta Finantza Sailaren gainerako eraikinetan eta Eusko Jaurlaritzaren gainerako sailei, beraren erakunde autonomoei edo sozietate publikoei atxikitako eraikinetan gas naturalaren hornidura era zentralizatuan kontratatzeak zerbitzuen kudeaketa hobetzen duela eta gastu publikoa arrazionalizatzen laguntzen duela.
136/1996 Dekretuaren 19. artikuluan ezarritakoaren arabera, Baliabide Orokorren Zuzendaritzaren eskumenak kudeaketa zentralizatuko beste eraikin batzuetara hedatu ahal dira. Eskumenen hedatze hori honela gauzatzen da: hitzarmenaren bidez, administrazio-klausula berezien agirietan jasotako xedapen zehatzen bidez edo Herri Administrazioen Araubide Juridikoaren eta Administrazio Prozedura Erkideari buruzko legean ezarritako formulen bidez.
Azaroaren 26ko 30/1992 Legearen 13.1 artikuluan eskumenak eskuordetzeko ezarri den formula da gas naturalaren hornidura arestian aipatutako eremuan era zentralizatuan kontratatzeko formula egokia (30/1992 Legea, Herri Administrazioen Araubide Juridikoaren eta Administrazio Prozedura Erkideari buruzkoa).
«1.– Herri-administrazioetako organoek beste organo batzuei beren eskumenak eskuordetzan eman diezazkiekete, baldin eta organo horiek administrazio berekoak badira, nahiz eta bata bestearen mendekoa ez izan, edo administrazio horiei lotuta edo administrazio horien mendean dauden zuzenbide publikoko erakundeetakoak badira».
Hori dela eta, apirilaren 9ko 194/2013 Dekretuaren 4.2.b) artikuluan ezarritako eskumenekin bat etorrita –194/2013 Dekretua, Segurtasun Sailaren egitura organikoari eta funtzionalari buruzkoa (2013ko apirilaren 18ko EHAA, 74. zk.)–, Segurtasuneko sailburuordeari dagozkio sailaren kontratazio-organoaren egitekoak, dekretu horretan bestelako organoei esleitu ez bazaizkie.
EBAZTEN DUT:
I.– Ogasun eta Finantzetako sailburuari eskuordetzan ematea eranskinean zerrendatuta dauden eraikinetan 2017. eta 2018. urteetan gas naturalaren hornidura kontratatzeko eskumena.
Eskumenaren eskuordetza hedatuko da Sektore Publikoko Kontratuen Legearen testu bategina onartzen duen 3/2011 Errege Lege Dekretuan, irailaren 14koan, ezarritako gaietara, baldin eta kontratuari aplikatu ahal bazaizkio. Honako hauek dira:
– Kontratua prestatzea (II. liburua).
– Kontratua esleitzea (III. liburua, I. titulua, I. kapitulua).
– Administrazioak dituen prerrogatibak; aldatzea, azkentzea, lagatzea eta azpikontratatzea; IV. liburuko I. tituluko I. kapituluan orokorrean ezarrita, eta IV. liburuko II. tituluko IV. kapituluan era berezian ezarrita.
– Kontratua sinatzea (III. liburua, I. titulua, I. kapitulua)
II.– Kontratazio-organoari dagozkion gainerako eskumenek eta, zehatz-mehatz, emandako zerbitzuei adostasuna emateko ahalmenak eta zerbitzuen ordainketa agintzekoak organo eskuordetza-emailearenak izaten jarraituko dute.
III.– Eskuordetza hau sinatu eta hurrengo egunean sartuko da indarrean.
Vitoria-Gasteiz, 2016ko uztailaren 11.
Segurtasuneko sailburua,
ESTEFANÍA BELTRÁN DE HEREDIA ARRONIZ.
ERANSKINA
Segurtasun Sailak gas naturalez hornitu behar ditu honako eraikin hauek:
