Euskal Herriko Agintaritzaren Aldizkaria

55. zk., 2012ko martxoaren 16a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

EUSKAL HERRIKO UNIBERTSITATEA

1296

EBAZPENA, 2012ko otsailaren 27koa, Universidad del País Vasco / Euskal Herriko Unibertsitateko Gipuzkoako Campuseko errektoreordearena, atzerriko enpresetan praktikak egiteko Elkano mugikortasun bekak (2011-2012 edizioa) ematen dituena.

UPV/EHUren Estatutuen (2011ko otsailaren 24ko EHAA, 38 zk.) 197. artikuluan eta ondorengoetan ezarritako eskumenak egikarituz, UPV/EHUko Gipuzkoako Campuseko errektoreordearen 2011ko irailaren 28ko Ebazpenaren bidez (2011ko urriaren 19ko EHAA, 199. zk.) deituriko atzerriko enpresetan praktikak egiteko mugikortasun beken Elkano (2011-2012 edizioa) programaren baitan, 1. aldia bukatu ondoren, Elkano programako Hautaketa Batzordearen proposamena kontuan izanda, eta aipatutako deialdiko 12. oinarrian ezarritakoari jarraiki, honakoa

EBAZTEN DUT:

2011-2012 edizioko Elkano mugikortasun beken adjudikaziodunen behin betiko zerrenda Euskal Herriko Agintaritzaren Aldizkarian argitaratzea, jende orok jakin dezan:

(Ikus .PDF)

Mugikortasun beken iraupena 6 hilabetekoa izango da. Hala eta guztiz ere, 2012ko lehenengo seihilekoan zehar Elkano programako antolatzaileek (UPV/EHU – Gaia) baliabide ekonomiko berriak lortzen badituzte beken hasierako zenbatekoa handitzeko, beraien iraupena luzatu ahal izango da gehienez guztira 12 hilabete arte. Horrela balitz, aldaketa hori Gipuzkoako Campuseko errektoreordearen ebazpen batean jasoko da eta interesdunei komunikatuko zaie (atzerriko enpresak eta bekadunak).

Bekadunari bekaren zenbatekoa hiru zatitan ordainduko zaio zuzenean:

a) Bekaren lehenengo zatia zenbateko osoaren % 30ekoa izango da, eta bekadunak bekaren onarpena sinatu eta helarazi ondoren, eta dagokion herrialdera joan aurretik ordainduko zaio.

b) Bekaren zenbateko osoaren % 60, kopuru berdinetan, tokatzen zaien hilabeteetan zatituko da, eta praktiketako hilabete bakoitzeko lehen astean ordainduko da diru hori, baldin eta betekizunak betetzen ari bada.

c) Bekaren azken zatia % 10 izango da. Zati hori atzerrian kokaturiko enpresan Elkano praktikak amaitu eta gero egingo da. Aurrez, onuradunak Elkano programaren antolakuntzari (UPV/EHU – Gaia) dagokion azken txostena eman beharko dio.

Bekaren zenbatekoa gordina da eta dagozkion zerga-atxikipenak aplikatuko zaizkio, indarrean dagoen legediaren arabera. Beken ordainketa Espainian helbideraturiko kontu batean egingo da beti.

Adjudikaziodunek agindutako lanak ezarritako epeetan aurkeztu, eta bereziki, beka amaitutakoan aipatutako azken txostena eman behar dute.

Aipatutako deialdiaren 25. oinarrian ezarritakoari jarraiki, administrazio bidea amaitzen ez duen ebazpen honen aurka, gorako errekurtsoa aurkeztu ahal izango da UPV/EHUren errektorearen aurrean. Gorako errekurtsoa aurkezteko epea hilabetekoa izango da, Gipuzkoako Campuseko Errektoreordetzaren iragarki-oholean eta Interneteko http://www.sc.ehu.es/elkano helbidean argitaratzen den egunaren biharamunetik kontatzen hasita. Errekurtso hori beren-beregi ebazten ez bada, gaitzetsi egin dela ulertuko da.

Donostia-San Sebastián, 2012ko otsailaren 27a.

UPV/EHUko Gipuzkoako Campuseko errektoreordea,

CRISTINA URIARTE TOLEDO.

Azterketa dokumentala