Euskal Herriko Agintaritzaren Aldizkaria

133. zk., 2011ko uztailaren 13a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

Hezkuntza, Unibertsitate eta Ikerketa Saila

3549

AGINDUA, 2011ko ekainaren 22koa, Hezkuntza, Unibertsitate eta Ikerketako sailburuarena, ordainketa eskuordetuaren eraginpean dauden eta erretiro partziala hartu duten langileei lanaldi partzialeko kontratuak egiteko itunpeko ikastetxe pribatuetara zuzendutako laguntzak deitzen dituena.

Agindu honetan aintzat hartzen diren laguntzen erregulazioa onartzen duen abenduaren 21eko 439/1999 Dekretuaren -azaroaren 25eko 287/2003 Dekretuak eta apirilaren 19ko 93/2005 Dekretuak aldatzen dutenaren- 4.4. artikuluak ezartzen duenez, eta argitara ematearen printzipioa betetzera begira, Hezkuntza, Unibertsitate eta Ikerketa Sailak urtero bidezko deialdia egingo du dekretu horretan aurreikusten diren laguntzak ezagutarazteko.

XEDATU DUT:

1. artikulua.- Ordainketa eskuordetuaren eraginpean dauden eta erretiro partziala hartu duten langileei lanaldi partzialeko kontratuak egiteko itunpeko ikastetxe pribatuetara zuzendutako laguntzak deitzea. Laguntza horien erregimena abenduaren 21eko 439/1999 Dekretuan araututa dago -azaroaren 25eko 287/2003 Dekretuak eta apirilaren 19ko 93/2005 Dekretuak aldatzen dute Dekretu hori-.

2. artikulua.- 2011ko urtarrilaren 1etik Agindu hau indarrean jartzen denera arte egin diren kontratazioak diruz lagundu ahal izango dira, formalizatu ziren datarako atzeraeragineko ondorioekin, baldin eta dagokien eskaera Agindu hau Euskal Herriko Agintaritzaren Aldizkarian argitaratu eta hilabeteko epean aurkezten bada.

3. artikulua.- Agindu berria indarrean jartzen denetik aribideko urteko irailaren 1era bitartean -data hori barne- egin diren kontratazioetarako, eredu ofizialaren (eranskina) araberako eskabidearen bidez eskatuko du diru-laguntza ikastetxe kontratatzaileak. Hezkuntza, Unibertsitate eta Ikerketa Sailaren Administrazio eta Dirubideen Zuzendaritzari aurkeztuko dio eskaera, kontratazioak egin eta bi hilabeteko epean.

4. artikulua.- Era berean, agindu honen bitartez, 2011ko urtarrilaren 1aren aurretik egindako kontratazioei dagozkien eskaerak ebatziko dira, betiere ezarritako baldintzak betetzen zituztenak baina aurreko deialdian erantzun ahal izan ez zirenak.

5. artikulua.- 1. artikuluan aipatzen den dekretuaren esparruan, 2011. urtean ebatziko diren laguntzak finantzatzeko 3.607.052,52 euroko zenbatekoa bideratu da. Deialdi hau medio eman beharreko diru-laguntzen guztizko kopurua ezin izango da artikulu honetan ezarritako kopurua edo kopuru eguneratua baino handiagoa izan, beti ere eguneratze hori, kredituen atxikidurari edo aurrekontu-aldaketari buruz indarrean dagoen legerian ezarritako araubidearen arabera egingo delarik. Horregatik, zenbateko hori amaitzen denean, ez da beste laguntzarik emango, eta une horretatik aurrera eten egingo da xedapen honen eragina. Horietan Administrazio eta Zerbitzuen sailburuordearen ebazpenaren bidez emango da egoera honen berri.

Datu Pertsonalak Babesteari buruzko abenduaren 13ko 15/1999 Lege Organikoan eta Datu Pertsonalen Fitxategi Publikoei eta Datuak Babesteko Euskal Agentzia sortzeari buruzko otsailaren 25eko 2/2004 Legean ezarritakoarekin bat etorriz, deialdiko parte-hartzaileek baimena ematen dute deialdi hau izapidetzean jasotako datu pertsonalak tratatu eta argitaratzeko. Datuok, bestalde, Finantziazioa deritzan eta 10 zenbakia duen fitxategi batean sartuko dira 2010eko urriaren 4ko Aginduan ezartzen den moduan (EHAA: 2010eko azaroaren 5ekoa). Fitxategi horren helburua izango da diru-laguntzen deialdi hau kudeatzea eta deialdira biltzen direnei deialdiaren garapenaren berri ematea. Fitxategiaren arduraduna Eusko Jaurlaritzako Hezkuntza, Unibertsitate eta Ikerketa Sailaren Administrazio eta Dirubideen Zuzendaritza da. Datu horiek eskuratzeko, zuzentzeko, ezeztatzeko edo aurka egiteko eskubideak Eusko Jaurlaritzako Hezkuntza, Unibertsitate eta Ikerketa Sailaren Etengabeko Ikaskuntzako Zuzendaritzaren aurrean balia daitezke. Horretarako, honako helbide honetara jo beharko da: Donostia-San Sebastián, 1, 01010 Vitoria-Gasteiz.

AZKEN XEDAPENAK

Lehenengoa.- Agindu honetan aurreikusten ez den guztian, abenduaren 21eko 439/1999 Dekretuan xedatutakoa izango da aplikatzekoa -439/1999 Dekretua, abenduaren 21ekoa. Honen bidez arautzen dira itunpeko ikastetxe pribatuentzako diru-laguntzak, ikastetxe horietan ordainketa eskuordetuaren menpeko langileek erretiro partziala hartuz gero, langile horiei lanaldi partzialeko lan-kontratuak egiteko-. Nolanahi ere, Dekretu hori azaroaren 25eko 287/2003 Dekretuak eta apirilaren 19ko 93/2005 Dekretuak aldatzen dute, baita Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legeak ere -urtarrilaren 13ko 4/1999 Legeak aldatua-.

Bigarrena.- Agindu honen kontra aukerako berraztertzeko errekurtsoa aurkez dakioke Hezkuntza, Unibertsitate eta Ikerketako sailburuari, hilabeteko epean, agindua Euskal Herriko Agintaritzaren Aldizkarian argitaratu eta biharamunetik aurrera; bestela, administrazioarekiko auzi-errekurtsoa aurkez daiteke Euskal Autonomia Erkidegoko Auzitegi Nagusian, bi hilabeteko epean, agindua Euskal Herriko Agintaritzaren Aldizkarian argitaratu eta biharamunetik aurrera.

Hirugarrena.­ Agindu hau Euskal Herriko Agintaritzaren Aldizkarian argitaratu, eta biharamunean jarriko da indarrean.

Vitoria-Gasteiz, 2011ko ekainaren 22a.

Hezkuntza, Unibertsitate eta Ikerketako sailburua,

MARÍA ISABEL CELAÁ DIÉGUEZ.

(Ikus .PDF)

Azterketa dokumentala