Euskal Herriko Agintaritzaren Aldizkaria

38. zk., 2010eko otsailaren 25a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Bestelako Xedapenak

Justizia eta Herri Administrazio Saila

987

AGINDUA, 2009ko abenduaren 11koa, Justizia eta Herri Administrazioko sailburuarena, «Fundación Jesús María de Leizaola Fundazioa» Euskal Autonomia Erkidegoko Fundazioen Erregistroan inskribatzeko dena.

Bilboko " Fundación Jesús María de Leizaola Fundazioa" Euskal Autonomia Erkidegoko Fundazioen Erregistroan inskribatzeko eskatuz aurkeztutako espedientea ikusi eta aztertu da.

AURREKARIAK

1.- Jesús María de Leizaola kultura-elkarteak, José Antonio Dorronsoro Barberena jaunak ordezkatuta, " Fundación Jesús María de Leizaola Fundazioa" eratu du, Bilboko notario Juan Benguría Cortabitarte jaunaren aurrean 2009ko maiatzaren 20an emandako eskritura publikoaren bidez (protokolo-zenbakia: 530).

2009ko ekainaren 29an eman zitzaion sarrera eskritura horri Euskal Autonomia Erkidegoko Fundazioen Erregistroan, eta 2009-09-09an zenbait alderdi zuzentzeko eskatu zitzaion. Idazki horri erantzunez dokumentazio osagarria aurkeztu zuten, non fundazioaren lehen ekitaldi ekonomikoko aurrekontuaren eta horren memoriaren azalpena egiten zen.

Euskal Autonomia Erkidegoko Fundazioen Babeslaritzaren Aholku Batzordea bildu zen fundazioaren helburuak zilegi eta guztiontzako onuragarri direla egiaztatzeko. Batzorde horrek fundazioa erregistroan inskribatzearen aldeko txostena eman zuen 2009ko azaroaren 16an.

2.- «Fundación Jesús María de Leizaola Fundazioa»ren helburua estatutuen 3. artikuluan dago jasota:

" Lendakari Zarra" , izenez ezagutzen zen Jesús María de Leizaola Sánchez jaunaren bizitzako oinarri izan ziren balioak zabaldu eta sustatzea ditu helburu Jesús María de Leizaola Fundazioak. Hona hemen balio horiek: euskara, kultura eta euskal usadioen sustapena, giza eskubideak errespetatzea, bakea gatazkak ebazteko bide bakartzat hartzea, erakunde demokratikoak indartu eta herritarrengana hurbiltzea, Euskadiko ehun sozioekonomikoa sustatzea, ondoko sektore eta jarduerei berariazko arreta jarrita: talentuak eta berrikuntza sortzen dituen ikerketa-sektoreari, euskal kultura hedatzeko eta aberastasuna sortzeko baliagarri den turismo sektoreari, etorkinei arreta eskaintzeari biztanleriaren sektore berria diren aldetik, eta ingurumena sustatu eta eremu horretan esku hartzeari etorkizuneko erronka gisa.

Helburu zabal horien barruan, honako ekintza garrantzitsu eta berehalako hauek gauzatuko ditu:

1) Euskal hizkuntza eta kultura sustatzeko ekintzetan parte hartzea, Euskal Herriko Unibertsitateak antolatutako Euskal Astean edo Euskara Bizia programan esaterako, aisiaren esparru berrietan euskara sustatzeko.

2) Pakea eta giza eskubideak sustatzeko jarduerak antolatzea, erakundeak euskal herritarrengana orokorrean eta gazteengana bereziki hurbiltzeko.

3) Era guztietako lehiaketa eta txapelketak antolatzea eta Leizaola Sariak deitzea, Jesús María de Leizaola jaunak bere bizitzan izan zituen balioekiko konpromisoa duten pertsona ospetsuei eta erakundeei esker ona adierazteko, hau da: zuzentasuna, euskal kultura defenditzeko konpromisoa eta horretan buru-belarri aritzea, Euskadiko ekonomia sustatzea, ingurumena zaintzea...

4) Euskararen erabilera sustatu eta hedatzeko aldizkari eta argitalpenak argitaratzea eta herritarrei prestakuntza eta informazioa ematea.

5) Besteak beste ondoko arloetan gailentzen diren gazteentzako bekak edo laguntzak sustatzea: kultura-ekoizpena, ikerketa, giza eskubideen defentsa edo ingurumenaren babesa.

6) Baliabideak biltzea.

7) Fundazioaren helburuak gauzatzeko lagungarri izan daitekeen beste edozein.

3.- Fundazioaren egoitza, fundazioaren estatutuetako 5. artikuluan adierazten denez, hau da: Zabalburu plaza 2 bis, eskuineko solairuartea 6. departamentua - Bilbao (Bizkaia).

4.- Hasierako diru-hornidura hogeita hamar mila (30.000) eurokoa da, eta kopuru hori ordaindu dela jasota geratu da erregistro-inskripzioan, hala agintzen baitu Euskal Autonomia Erkidegoko Fundazioen Erregistroaren Erregelamendua onartzen duen ekainaren 19ko 101/2007 Dekretuaren 37.1.c artikuluak.

Ondarea egokitzat eta askitzat jotzen da fundazioaren helburuak lortzeko, fundazioei buruzko abenduaren 26ko 50/2002 Legearen 12.1 artikuluaren arabera, lege hori aplikatzekoa baita azken xedapenetatik lehenengoaren indarrez.

5.- Patronatuari dagokio fundazioa ordezkatzea, administratzea eta gobernatzea. Patronatuko kideek dohainik beteko dituzte beren egitekoak, fundazioaren estatutuetako 9. eta 12. artikuluan jartzen duen moduan.

6.- Hasierako Patronatua, Estatutuetako 10. artikuluan ezarritakoaren haritik Fundazioaren eraketa-eskrituran xedatutakoaren arabera, honako hauek osatzen dute:

Kargua Iraupena

Lehendakaria José Antonio Dorronsoro Barberena jauna 2014-05-20ra arte.

Idazkaria: Francisco José Zubiaur Gallego jauna 2014-05-20ra arte.

Diruzaina María Concepción Manzanal Martín andrea 2014-05-20ra arte.

Guztiek onartu dituzte dagozkien karguak, Euskal Autonomia Erkidegoko Fundazioei buruzko ekainaren 17ko 12/1994 Legearen 12.1 artikuluan ezarritakoaren arabera.

ZUZENBIDEKO OINARRIAK

Lehenengoa.- Justizia eta Herri Administrazioko sailburuari dagokio fundazioaren eraketa inskribatzeko espedientea agindu bidez ebaztea. Hala agintzen da Euskal Autonomia Erkidegoko Fundazioei buruzko ekainaren 17ko 12/1994 Legearen 40. artikuluan; halaber, Euskal Autonomia Erkidegoko Fundazioen Erregistroaren Erregelamendua onartzen duen ekainaren 19ko 101/2007 Dekretuaren 4. artikuluan; eta Justizia eta Herri Administrazio Sailaren egitura organikoa eta funtzionala ezartzen duen abuztuaren 28ko 472/2009 Dekretuko 4. artikuluan.

Bigarrena.- Legitimazioa daukan pertsona batek sustatu du espediente hau. Espedienteari, bestalde, funtsezkotzat jotzen diren datu eta agiriak erantsi zaizkio, eta bereziki bete dira Euskal Autonomia Erkidegoko Fundazioei buruzko ekainaren 17ko 12/1994 Legearen 6., 7. eta 9. artikuluetan eta Euskal Autonomia Erkidegoko Fundazioen Erregistroaren Erregelamendua onartzen duen ekainaren 19ko 101/2007 Dekretuaren 36. artikuluan eta hurrengoetan ezarritako eskakizunak.

Aipatu arauak eta oro har aplika daitezkeen gainerako arauak ikusi dira.

Justizia eta Herri Administrazioko sailburuak

EBATZI DU:

Lehenengoa.- Gaurko egunez, F-255 zenbakiaz, Bilboko (Bizkaia) " Fundación Jesús María de Leizaola Fundazioa" Euskal Autonomia Erkidegoko Fundazioen Erregistroan inskribatzea, bai eta patronatuko hasierako osaera ere. Patronatuko kideak seigarren aurrekarian aipatzen dira eta guztiek modu adieraziz onartu dituzte beren karguak.

Bigarrena.- Fundazio hori, bere helburuak kontuan hartuta, Euskal Autonomia Erkidegoko Fundazioen Erregistroko 3. sekzioan inskribatzea, Euskal Autonomia Erkidegoko Fundazioen Erregistroaren Erregelamendua onartzen duen ekainaren 19ko 101/2007 Dekretuaren 2. artikuluan xedatutakoarekin bat etorriz.

Hirugarrena.- Agindu hau Euskal Herriko Agintaritzaren Aldizkarian argitaratzea.

Agindu honek administrazio-bidea amaitzen du; beraz, bere aurka aukerako berraztertzeko errekurtsoa aurkez dakioke Justizia eta Herri Administrazioko sailburuari, hilabeteko epean, agindua jakinarazten den egunaren biharamunetik aurrera; bestela, administrazioarekiko auzi-errekurtsoa aurkez daiteke, Euskal Autonomia Erkidegoko Auzitegi Nagusiko Administrazioarekiko Auzietako Salan, hil biko epean, agindua jakinarazten den egunaren biharamunetik aurrera.

Vitoria-Gasteiz, 2009ko abenduaren 11.

Justizia eta Herri Administrazioko sailburua,

IDOIA MENDIA CUEVA.

Azterketa dokumentala