Euskal Herriko Agintaritzaren Aldizkaria

41. zk., 2009ko otsailaren 27a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Bestelako Xedapenak

Industria, Merkataritza eta Turismo Saila

1090

EBAZPENA, 2009ko urtarrilaren 30ekoa, Energia eta Meategien zuzendariarena, zeinaren bitartez onartu eta herri-onurako deklaratzen baita ondokoaren exekuzio-proiektua: Maruri-Jatabe eta Mungia udalerrietan, 1 eta 14 zenbakietako euskarrien artean, Basordas 1-L Ekialdea 3 Zirkuitua eta Markosene-Bakio 3 Zirkuitua lotzeko airetiko eta lurpeko 13,2 kV-ko linea elektrikoa.

Erref.: L-6802 -AS-BMR.

Esp.: AT-H-2007-125.

AURREKARIAK

1.- 2007ko uztailaren 9an, Iberdrola Distribución Eléctrica SAk (Gardoki kalea 8, Bilbao) ondoko linea elektrikoari doakionez exekuzio-proiektua onartzea, herri-onurako deklaratzea eta administrazio-baimena eskatu zituen: Maruri-Jatabe eta Mungia udalerrietan, 1 eta 14 zenbakietako euskarrien artean, Basordas 1-L Ekialdea 3 Zirkuitua eta Markosene-Bakio 3 Zirkuitua lotzeko airetiko eta lurpeko 13,2 kV-ko linea elektrikoa. Hartarako, Anizeto Onandia Usategi industria-ingeniari teknikoak sinatutako eta Bizkaiko Industri Ingeniarien Elkargo Ofizialak 2007-07-05ean 5234 zenbakiz bisatutako proiektu teknikoa aurkeztu zuen, eskabidearekin batera.

2.- Eusko Jaurlaritzaren abenduaren 3ko 282/2002 Dekretuko 10. artikuluan eta abenduaren 1eko 1955/2000 Errege Dekretuko 144. artikuluan aurreikusitako ondorioetarako, Iberdrola Distribución Eléctrica SAren aipatu eskabidea jendaurrean erakusteko iragarkia argitaratu zen, 2007-08-09an BAOn, 2007-09-06an EHAAn eta 2007-08-01ean Deia egunkarian.

3.- 2007ko uztailaren 23an, Maruri-Jatabe eta Mungiako udalei ofizio bat bidali zitzaien, hain justu ere euren udaletxeetan iragarki-oholetan aipatu iragarkia erakuts zezaten; instalazioa herri-onurako izateaz edo ez izateaz txostena emateko ere eskatu zitzaien, bai eta, egoki bada, baldintza teknikoak azaltzeko ere. Horretaz gain, Bizkaiko Foru Aldundiari eta Telefonicari ere eskatu zitzaion aipatu txostena emateko.

4.- 2008ko irailaren 30ean, Maruri-Jatabe eta Mungiako udalei txostena berriz eskatu zitzaien, ezarritako epean ez baitzen erantzunik jaso. Maruri-Jatabeko Udalak bere adostasuna bidali zuen, eta Mungiakoak, ordea, ez zuen erantzun. Bizkaiko Foru Aldundiak eta Telefonicak ez zuten inolako eragozpenik jarri proiektua egiteko.

5.- Jendaurrean egoteko ezarritako epearen barruan berariazko alegazio hauek sartu ziren Bizkaiko Lurralde Bulegoan:

a) Concepción Zubiaur Urrutia andreak, proiektuko 28. eta 37. finken titularrak, honakoa adierazten du:

- Proiektuaren planoan ez dira islatu partzelariaren zenbait xehetasun 34. eta 38. finken artean, Yanduri izeneko otadi-mendira joateko bide moduan erabili nahi direnak.

b) María Angeles Larrazabal Aguirre andreak, proiektuko 36. finkaren titularrak, honakoa adierazten du:

- Proiektatutako linearen trazatuak kalte handia egiten dio haren hondasunari; kalte hori txikiagoa izango litzateke, auzo-bidera hurbilduko balitz.

c) Antonio Chamorro Calleja jaunak, proiektuko 39. finkaren titularrak, honakoa adierazten du:

- Haren jabetzako lursailak ez du muga egiten Beraza jaunarenarekin, bi zortasun baititu bere finkan; hala balitz, murriztu egingo litzateke inpaktu hori, eta linea bat marraztuko litzateke, dagoen errepidearen paraleloa dena, eta errepide horretara ahalik eta hurbilen dagoena.

d) Juan Antonio Arruza Fullaondo eta Juan José Arruza Laraudogoitia jaunek, proiektuko 1., 2., 5., 7. eta 42. finken titularrek, honakoa adierazten dute:

- Linea lur azpikoa izan liteke 3. euskarriraino, finkaren aprobetxamendua ez litzateke-eta % 30era iritsiko.

e) Juan José Beraza Rola jaunak, proiektuko 18. eta 34. finken titularrak, honakoa adierazten du:

- Linearen linea proiektatuak kalte handia eragiten dio haren hondasunari. Hori dela eta, aldatu beharko litzateke, euskarriak auzo-bidera eramanez, lur zati bakar bat ere hartua izan ez dadin.

f) José Luis eta Angel Plaza Landaluce eta Pedro María Arrieta Garai jaunek honako hau adierazten dute:

- 8. euskarria mugitu egin dela José Luis Plaza Landaluceren lursailaren mugarriraino, eta 9. euskarria, ordea, José Luis Plaza Landaluceren lursailaren mugarriraino.

6.- Alegazioak Iberdrola Distribución Eléctrica SAri helarazi zaizkio, eta honakoa adierazten du, 2008ko uztailaren 23ko bisatuaren planoak aurkeztuta:

- Arruza jaun-andreen alegazioari dagokionez, kalte ekonomikoak espedientearen beste fase batean ebaluatuko dira, eta zure eskura geratzen da, 1. euskarria 1. partzelaren hego muturrera aldatzeko.

- Concepción Zubiaur Urrutia, María Angeles Larrazabal Aguirre, Antonio Chamorro Calleja eta Juan José Beraza Rola jaun-andreen alegazioei dagokienez, guztiak bat datozenez auzo-bidearen trazatuaren hurbilketaren inguruan, eta beste partzela batzuetan sartzearen kontra, onartu egin du biderako hurbilketa hori, udal eskakizunengatik haren ertzetik 3 metrora gehienez.

- Arrieta Garai jaunak eta Plaza Landaluce jaun-andreek batera aurkeztutako alegazioari dagokionez, onartu egiten da alegazioa.

ZUZENBIDEKO OINARRIAK

A) Espedientean arauzko izapideak bete dira, hau da, Sektore Elektrikoari buruzko azaroaren 27ko 54/1997 Legean, argindarra garraiatu, banatu, merkaturatu eta zuzkitzeko jarduerak eta instalazioak baimentzeko prozedurak arautzen dituen abenduaren 1eko 1955/2000 Errege Dekretuan, Eusko Jaurlaritzaren abenduaren 3ko 282/2002 Dekretuan eta gai horretan aplikagarriak diren gainerako legeetan ezarritakoak.

B) Sektore Elektrikoari buruzko 54/1997 Legearen 52. artikuluak herri-onurakotzat deklaratzen ditu argindarra banatzeko instalazioak, horiek instalatzeko beharrezko diren ondasun eta eskubideen nahitaezko desjabetzea egiteko eta igarobide zorra ezarri eta erabiltzeko, eta, deklarazio horrek berez berarekin dakar ondasun eta eskubide horien hartu beharra eta presaz okupatu beharra, Nahitaezko Desjabetzeari buruzko Legearen 52. artikuluaren ondorioetarako.

C) Trazadura-aldaketa aztertzerakoan kontuan hartu behar da herri-onurako lehentasuna interesatuen komenientziaren gainean dagoela eta ponderatu behar dela, instalazioak izan behar dituen segurtasun-baldintzei eta trazaduraren arrazionaltasun orokorrari lehentasunezko balioa emanez.

D) Norbanakoen alegazioei dagokionez, eta Iberdrola Distribución Eléctrica SAk erantzuna eman dienez alegazio horiei, bidezkoa da onartzea trazatua auzo-bidera hurbiltzea bidearen ertzetik 3 metrora gehienez ere, eta desplazamenduaren aldetik, 8. eta 9. euskarrietako mugarrietaraino, horrela hobetuko baitira linearen emaitza ekonomikoa eta bideragarritasun teknikoa, uste baita kalte ekonomikoak espedientearen tramitazioaren beste fase batean baloratu behar direla.

Industria, Merkataritza eta Turismo Sailaren egitura organikoa eta funtzionala ezartzen duen urriaren 11ko 284/2005 Dekretuan (2005-10-27ko EHAA) aitortzen dizkion ahalmenen indarrez, Energia eta Meategien zuzendariak hau

EBATZI DU:

Iberdrola Distribución Eléctrica SAri baimena ematea eta ondoko exekuzio-proiektu hau onartzea: lurpeko eta airetiko linea elektrikoa, 13,2 kV-koa, Basordas 1-L Ekialdea 3 zirkuitua eta Markosene-Bakio 3 zirkuitua lotzeko dena, 1. eta 14. euskarrien artean, Maruri-Jatabe eta Mungia udalerrietan. Exekuzio-proiektuak ezaugarri hauek ditu:

Airetiko linea elektrikoa:

- Zerbitzu-tentsioa: 13,2 kV.

- Eroaleak: AL-AC tipoko 3 (116,2 mm2).

- Euskarriak: metalikoak.

- Luzera: 1.940 m.

- Hasiera: Basordas 1-L Ekialdea 3 zirkuitua eta Markosene-Fruniz 1 zirkuitua lineak konektatzea, 1. euskarrian.

- Amaiera: Basordas 1-L Ekialdea 3 zirkuitua eta Markosene-Fruniz 3 zirkuitua konektatzea, 14. euskarrian.

Lurpeko linea elektrikoa:

- Zerbitzu-tentsioa: 13,2 kV.

- Eroaleak: 3 (1x240 mm2), aluminiozkoak.

- Luzera: 460 m.

- Hasiera: Basordas 1-L Ekialdea 3 zirkuitua eta Markosene-Fruniz 1 zirkuitua lineak konektatzea, 5302 Bis euskarria berrian.

- Amaiera: Basordas 1-L Ekialdea 3 zirkuitua eta Markosene-Fruniz 1 zirkuitua lineak konektatzea, 1. euskarria berrian.

Baimentzen den instalazioa herri-onurakotzat deklaratzea, eta deklarazio horrek, azaroaren 27ko 54/1997 Legearen 54. artikuluan xedatutakoaren arabera, honako hauek dakartza: ondasunak okupatu eta eraginpeko eskubideak hartu beharra eta okupazioa, gainera, presaz egin beharrekoa izatea. Deklarazioak, halaber, Nahitaezko Desjabetzeari buruzko 1954ko abenduaren 16ko Legearen 52. artikuluak presaz okupatzeko deklarazioari dagokionez ezartzen dituen ondorioak ekartzen ditu, lege honen 53. artikuluan zehaztutako erregistro ondorioekin.

Abenduaren 1eko 1955/2000 Errege Dekretuan eta abenduaren 3ko 282/2002 Dekretuan xedatutakoarekin bat etorriaz eta ondoko baldintza orokorrekin ematen da ebazpen hau:

1.- Anizeto Onandia Usategi industria-ingeniari teknikoak sinatutako eta 2007-07-05ean eta 2008-07-23an eta 5234 eta 5446 zenbakiekin Bizkaiko Industri Ingeniarien Elkargo Ofizialak bisatutako proiektuarekin eta dokumentazioarekin bat burutu beharko dira obrak.

2.- Martxan jartzeko epea bi urtekoa izango da, ebazpen honen datatik hara.

3.- Instalazioen titularrak obrak amaitu direla jakinarazi beharko dio Bizkaiko Lurralde Bulegoari, betiere behin betiko errekonozimenduaren ondorioetarako eta martxan jartzeko akta emateko.

4.- Obrak egiteko beharrezko diren udal edo probintzien eskumenpeko baimen edo lizentziak eta gainerakoenak errespetaturik, ematen da baimen hau, eta ez du salbuesten eskatzailea haiek eskuratzeko obligaziotik. Halaber, inoren eskubideei kalterik egin gabe eta jabetza-eskubideari eutsiz ematen da.

Ebazpen honek ez du administrazio-bidea amaitzen. Beraz, gora jotzeko errekurtsoa aurkez daiteke Berrikuntza eta Energia sailburuaren aurrean, ebazpena jakinarazten den egunaren biharamunetik hasi eta hilabeteko epean, hala agintzen baita 4/1999 Legean (lege horrek Herri Administrazioen Araubide Juridiko eta Administrazio Prozedura Erkidearen azaroaren 26ko 30/1992 Legea aldatu zuen).

Vitoria-Gasteiz, 2009ko urtarrilaren 30a.

Energia eta Meategien zuzendaria,

TXABER LEZAMIZ CONDE.

Azterketa dokumentala