Euskal Herriko Agintaritzaren Aldizkaria

Apirilaren 16ko 86/2002 Dekretuak Lanpostuen Zerrendak, ikasturtez ikasturte, Bigarren Mailako Lanbide Heziketako Berariazko Institutuetako zein irakaslerengan duen eragina zehazteko irizpideak ezarri eta irakasleak zentroetan berriro atxikitzeko prozesua arautzen zuen. Eta ondoko xedapen hauetan ezarritakoa garatzen zuen: otsailaren 19ko 2/1993 Legea, Euskal Autonomia Erkidegoko unibertsitateaz kanpoko irakaskuntzako irakasleen kidegoei buruzkoa; maiatzaren 9ko 47/1993 Dekretua, irakaskuntzako lanpostuen hizkuntza-eskakizunak eta derrigortasun-datak ezartzeko irizpideak ezarri zituena; langile horiei aplikatzeko beste arau juridiko batzuk.

Urriaren 10eko 198/2006 Dekretuak aldatu zuen aipatutako Dekretua, irakaskuntzako funtzio publikoaren arlo batzuetan gertatzen ari ziren lege-aldaketetara egokitzeko.

Ordutik hona, urterik urte aplikatu da Dekretua, hain zuzen ere, plaza finkoa duten langileen egoera juridiko-administratiboa lanpostuen aldaketetara egokitzeko. Izan ere, lanpostuak aldatuz joan dira ikasleen matrikulazioa aldatuz joan den heinean, eta ikuspegi orokorrago batetik, gizarteko eskaera berrien ondoriozko premiak —ikastetxeen erantzuna eskatzen dutenak— aldatu diren heinean.

Momentu honetan, sistemaren egoeraren analisiak erakutsi du adierazitako Dekretuan zenbait aldaketa egitea komeni dela, hain zuzen ere, araudiak egungo elementu guztiak barne hartzen dituela ziurtatzeko, eta horrela, arautzen den prozesuaren ahalik eta eraginkortasunik handiena bermatzeko.

Lehenik eta behin, prozesuan zehar kontuan izan behar diren lanpostuen definizioari eragiten dio aldaketa horrek, ezaugarri berezi batzuk zituzten postuei buruzko atal orokor bat erantsiz, atal hori orain arte ez baitzen ageri.

Bestalde, postu ibiltari eta mistoei buruzko aipamena egiten da, postu horiek II. Faseko III. Txandan bakarrik jasota baitzeuden, baina pertsona titularrei eragingo dieten aldaketak eta kenketak jasan ditzakete, eta beraz, horretarako bakarrik bada ere, prozesu honetan sartu behar dira, eta horrela, haien administrazio-egoerak erregularizatu ahal izango dira.

Bestalde, postu berezien irudia sortu da, zeren eta, Haur eta Lehen Hezkuntzako zentroetarako bezala, Institutuetarako ere aurreikus baitezakete Lanpostuen Zerrendek irudi hori. Lanpostu horiek normalean lehiaketa berezi bidez betetzen dira. Hori dela eta, berriro atxikitzeko fasean eskuratu ahal izango dira lanpostu horiek, nahiz eta, nolanahi ere, prozesuan kontuan hartu behar diren, aldaketarik gertatzen bada ere, eta aldaketa horiek beren titularrei eragiten badiete.

Multzo honen azken atal gisa, ingeleseko espezialitateak emateko beharrezkoa den titulazioa eskatzen duten lanpostuei egiten zaien erreferentzia dago. Datozen urteetan gero eta horrelako lanpostu gehiago jasoko dira Lanpostuen Zerrendetan, ikastetxeek irakaskuntza eleaniztunaren premia berriei erantzun beharko baitiete. Kasu hauetan, espezialitate/hizkuntza-eskakizun/derrigortasun datari dagokionez ezaugarri berberekoak diren gainerako lanpostuena ez bezalako talde gisa osatzen dira lanpostuak; hala ere, berratxikitze fasean erabili ahal dira, eta horrela, lanpostu horietara klaustrokoak diren pertsonak sartu ahal izango dira, programa horien ezarpenean zentroak nahitaez inplikatu behar dira-eta.

Bigarrenik, Dekretua aldatuta, zentroen egitura eraldatzeko irudi berri bat aurreikusi da: ikastetxeen banatzea. Ikastetxeen banatzea orain arteko bateratzearen aurkako fenomenoa da, eta zera esan nahi du: ikastetxe bakar bat ikastetxe berri bitan edo gehiagotan banatzen da, eta prozesu horretan bertan, ikastetxe bakar hori desagertu egiten da.

Horren eragina jasan duten pertsonak ikastetxe berrietako lanpostuetara berratxikitzeko, ikastetxe zaharreko behin betiko lanpostu bakoitzaren espezialitatea/hizkuntza-eskakizuna/derrigortasun data ezaugarriak hartuko dira kontuan, baita ikastetxe zaharrarengandik sortu diren ikastetxe guztietako lanpostuak ere. Horrela, pertsona baten atxikipena egiterakoan, ikusi beharko da pertsona horren behin betiko lanpostuaren ezaugarri berberak dituen lanpostua zein zentrok eskaintzen duen. Antzeko lanpostuak zentro batek baino gehiagok eskainiz gero, bata edo bestea aukeratu ahal izango da, baremoaren hurrenkera nagusiari jarraiki.

Baina berratxikitze-fasean pertsona batek izango dituen aukera bakarrak ez dira izango atxikitze-fasean esleitu zaion zentroak dituen gainerako lanpostuak. Aitzitik, araudiak eskatutako baldintzei jarraiki, eta bakar-bakarrik banatzeari dagokion prozesuarentzat, edozein lanpostu huts betetzeko aukera ere badute, baldin eta lanpostu horren baldintzak betetzen badituzte.

Irudi horren ondorioetarako, prozesu honetan lekuz aldatutako langileek eta lehenago aldatu zirenek adierazi beharko dute sortzen diren zentroetako zeinetan eutsi nahi dioten beren egoerari, zeren eta bakar-bakarrik horietako baten erreferentzia gorde baitezakete. Hala ere, hautatutako ikastetxean bere espezialitateko irakasgaiak ematen jarraitu behar dute, kontuan harturik, definizioz, lekuz aldatutako langileek zentroko behin betiko langileak direla oraindik, nahiz eta hor ordurik ez izan. Hori dela eta, ez luke zentzurik izango egoera horretan jarraitzeak, bera atxikita zegoen irakasgaiak dagoeneko eskaintzen ez dituen zentro batean.

Dekretuaren zirriborroa ordezkaritza sindikalarekin negoziatu da, Plangintzako Batzorde Teknikoaren barruan.

Bestalde, Euskadiko Eskola Kontseiluak, Funtzio Publikoko Zuzendaritzak, Kontrol Ekonomikoko Bulegoko Zuzendaritzak, Lege Garapen eta Arau Kontrolerako Zuzendaritzak eta Hezkuntza, Unibertsitate eta Ikerketa Sailaren Aholkularitza Juridikoak emandako nahitaezko txosten guztiak eskuratu dira.

Horregatik, Hezkuntza, Unibertsitate eta Ikerketa sailburuaren proposamenez, eta Jaurlaritzaren Kontseiluak 2008ko uztailaren 29an egindako bilkuran aztertu eta onartu ondoren, honako hau