RSS
122. zk., 2008ko ekainaren 27a, ostirala
- Bestelako formatuak:
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
Bestelako Xedapenak
Industria, Merkataritza eta Turismo Saila
3957
EBAZPENA, 2008ko apirilaren 14koa, Industria, Merkataritza eta Turismo Saileko Energia eta Meategien zuzendariarena, Arrasate eta Oñatiko udalerrietan, beherago zehaztutako instalazioak eraikitzeko, instalazioak baimendu, proiektua onartu eta haiek herritarrentzat onuragarri direla deklaratzeko dena: Arrasate-Eskoriatza TA airetiko linea eta Arrasate-Oñati TA airetiko linea lotzeko, airetiko eta lurpeko linea elektrikoa, 30 kV-koa (d/c). Erreferentzia: 24055/AT-H-2007-127. Beherago zehaztutako instalazio elektrikoak eraikitzeko, instalazioak baimendu, proiektua onartu eta haiek herritarrentzat onuragarri direla deklaratzeko galdeginez, Iberdrola Distribución Eléctrica S.A.U. enpresak eskatuta, Industria, Merkataritza eta Turismo Sailaren Gipuzkoako Lurralde Bulegoak irekitako espedientea ikusi da: Arrasate-Eskoriatza TA airetiko linea eta Arrasate-Oñati TA airetiko linea lotzeko, airetiko eta lurpeko linea elektrikoa, 30 kV-koa (d/c). Arrasateko udalari jakinarazpena egin zitzaion, eta eraikitako gasbidearekin bat egiten zuen airetiko linearen parte baten eta lurpeko linearen trazaduraz argibideak eskatu zituen. Oñatiko udalari jakinarazpena egin zitzaion, eta udalerrian energia elektrikoaren horniketa bermatzeko proiektatutako linea eraikitzearekiko adostasuna azaldu zuen hasiera baten. Goragoko jakinarazpenaz geroztik, Oñatiko udalak honako hauek adierazi zituen: proiektatutako lineak geroko industria-poligono baten partzela bat okupatzen zuela, eta, bestalde, proiektatutako linearen trazadura Keristui izeneko etxetik hurbilegi igarotzen zela, hain justu ere Santxolopategi auzuneko 18. zenbakian. Ingurumen eta Lurralde Antolamendu Saileko Uren Zuzendaritzari jakinarazpena egin zitzaion, eta honek erantzun egin zuen, baldintza orokor batzuk ipiniaz. Telefónica enpresari jakinarazpena egin zitzaion, eta erantzun egin zuen, adieraziaz eze, exekuzioari doakionez ez zuela erreparorik, baina baldintza orokor bat ipini zuen. Enagas enpresari jakinarazpena egin zitzaion, eta erantzun egin zuen, baldintza orokor bat ipiniaz. Espedientea jendaurrean erakusteko izapide beharrezkoa egin zen, honako hauetan argitara emenez: 2007-10-09n EHAA, 2007-09-06n GAO, 2007-09-12an Diario Vascon eta Oñatiko eta Arrasate-Mondragóneko udaletxeetako iragarki-oholetan. Ignacio Martínez de Irujok eta eraginpeko beste hamaseik sinatutako alegazio-idazki bat aurkeztu zen, eta bai Alfonso Mendia Saavedrak eta José Luis Gordoa Altolaguirrek sinatutako beste alegazio-idazki bat ere. “Ruiz de Arcaute Comunidad de Bienes” izenan bildutako Carmen Ruiz de Arcaute Sorarrain-en gainontzeko jaraunsleen hitzezko mandatari zenez, bere izenean Alfonso Mendia Saavedrak aurkeztutako alegazioetan eta José Luis Gordoa Altolaguirrek aurkeztutakoetan honakoak adierazten dira, laburpena: – Ondasun eta eskubideei dagokienez 5. zenbakiko partzelaren titularitatea zuzendu daitela, “Ruiz de Arcaute Comunidad de Bienes” delakoari pasatuaz. – Partzela beraren barruko ordezko trazadura baten arabera, linearen trazadura alda dadila; hartarako plano bat aurkezten da. – Desjabetzearen figura juridikoaren ordez, proiektua gauzatzeko beharrezko azaleren erabilera-lagapenak onar daitezela. – Aurreikusitako zuhaitzen mozketa eginda, harik eta neurketa bate gin arte, eraginpeko azalerekin bat datorren berariazko erreserba bat onar dadila. Ignacio Martínez de Irujok eta beste hamaseik aurkeztutako alegazioetan honakoak adierazten dira, laburpena: – Proiektatutako linean elektrikoa instalatzeko, ur zikinak ebakuatzeko eraikiko den tunela aprobetxatu beharko litzatekeela. – Aurreko proposamen hori egingarria ez bada, Arrasate-Oñati 30 kV-ko egungo linea egoki dadila oraingo eta geroko beharrizanei. – Aurreko proposamena egingarria ez bada, Goitikua, Keristui, Santuekua eta Balanzategi baserrietatik 100 metrotik gorako distantziara urrun dadila linearen trazadura. – Proiektatutako trazaduratik eraiki behar bada linea, lanak hasi baino lehen, instalaziorako sarbidearen azalera zehaztu dadila, eta balioespena finkatzerakoan kontuan izan dadila: Fagor eta Ulma enpresek eskatuta egiten den instalazioa dela; beraz, desjabetu beharreko azalera poligono horien urbanizazioaren beste elementu bat da, eta halaxe balioetsi behar da lurzoru hori. Ingurumen eta Lurralde Antolamendu Saileko Uren Zuzendaritzak eta Enagas eta Telefónica enpresek ezarritako baldintzak jakinarazi zitzaizkion Iberdrola Distribución, S.A. enpresa eskabidegileari, eta honek erantzun zuen adieraziaz eze, onartzen zituela Uren Zuzendaritzak eta Enagas eta Telefónica enpresek ezarritako baldintza orokorrak. Arrasateko Udalak egindako argibide-eskabidearen berri eman zitzaion Iberdrola Distribución Eléctrica S.A.U. enpresa eskabidegileari, eta honek erantzun egin zuen, honakoa adieraziaz: – Zegoen lineako 9003 zenbakiko euskarritik proiektatutako lineako 1 zenbakiko euskarri berrirainoko linea lurpekoaren trazadura argitu ziola Arrasateko Udalari, eta Ondasun eta Eskubideen zerrendako 5 zenbakiko partzela ez dela Arrasateko Udalaren jabetzakoa, ezpada “Ruiz de Arcaute Comunidad de Bienes” delakoaren jabetzako adela. Oñatiko Udalak adierazitakoak jakinarazi zitzaizkion Iberdrola Distribución Eléctrica S.A.U. enpresa-eskabidegileari, eta honek hauxe erantzun zuen: – Poligono industrialak eragiten dioan tartea geroko baten lurpeko izan dadin, linearen proiektua aldatu egingo da; eta beharrezkoa denean, linearen bukaeratzat balio dezan dorre metaliko bat instalatuko da. – Keristui baserritik linea elektrikoa aldentzeko aukera azterturik, enpresa eskabidegilea prest legoke aldaketa hori egiteko, betiere Udalak beharrezko baimenak lortzen baditu. Kontsiderazio horiek Oñatiko Udalari jakinarazi zitzaizkion, eta honek erantzun zuen eze, onartu egiten zituela Iberdrola Distribución Eléctrica S.A.U.k aurkeztutako konponbideak. Alfonso Mendia Saavedrak eta José Luis Gordoa Altolaguirrek aurkeztutako alegazioak jakinarazi zitzaizkion Iberdrola Distribución Eléctrica S.A.U. enpresa eskabidegileari, eta honako adieraziaz erantzun zuen: – Egiaztatu egin zela eze, 5 zenbakiko partzela “Ruiz Arcaute Comunidad de Bienes” delakoaren jabetzakoa dela, eta, beraz, zuzendu egin dela eraginpeko eskubide eta ondasunen zerrenda. – 3 zenbakiko eta 6 zenbakiko euskarrien artean linearen trazadura aldatu egingo dela, eta ez zaiola eragingo beste jabeei. – Eraginpeko laurak ez direla inola ere pasatuko Iberdrola Distribución Eléctrica S.A.U.ren izenekoak izatera; bide-zortasuneko alde bat ezarri besterik ez da egiten. – Argindarrari bide egiteko bakarrik sortzen da bide-zortasuna. – Iberdrola Distribución Eléctrica S.A.U. gertu dela eraginpekoekin berba egiteko, betiere elkar ulertu eta eraginpeko ondasunen gaineko nahitaezko desjabetze-tratamendua amaitzeko. – Eraginpeko azalerekiko adostasunari dagokionez, ez du adierazten eragozpenik, izan ere, behin lanak amaiturik, enpresaren ohiko jokabide baita eraginpeko aldeen egoeraz azterlan bat egitea, betiere, hartarako, aldeotako jabeek egindako errekerimenduak aintzat harturik. Eraginpekoekin akordio bat egiteko aukera baliatuaz, kasu honetan, arboladia moztea balioetsi liteke, akordio bidez ezarriaz unitate bakoitzaren prezioa, eta, behin linea instalatzeko beharrezko mozketa egin ostean, kalte-ordainaren guztizko zenbatekoa kalkulatuaz. Ignacio Martínez de Irujok eta beste hamaseik aurkeztutako alegazioak jakinarazi zitzaizkion Iberdrola Distribución Eléctrica S.A.U. enpresa eskabidegileari, eta honako adieraziaz erantzun zuen: – Confederación Hidrográfica del Norte-ren etorkizuneko tunelarentzat proiektatutako trazadura, ez datorrela bat linea elektrikoarenarekin. – Azpiegitura biok ez direla ez direla aldi beran eraikiko. – Etorkizuneko tunela burutzeko diseinatutako proiektuaK “Estanque de tormenta” titulua duela; beraz, euriteetan urez betea izango dela eta ez dela posible kable elektrikoak instalatzea. Horretaz gain, tunela 20 metroko sakonerako kotan eraikitzea aurreikusten da, eta horrek eragotzi egiten du kableak instalatzea. – 30 kV-ko egungo linea elektriko airetikoa hobetzeko, beharrezkoa izango dela orain diren euskarri guztiak aldatzea, eta hori ez da posible egitea, enpresentzako eta abonatu partikularrentzako energia elektrikoaren horniketari eutsiz gero. – Enpresa eskabidegilea prest legokeela linea elektrikoa Keristui baserritik aldentzeko, betiere Oñatiko Udalak beharrezko baimenak lortzen baditu. Baldintza hori onartu egin zuen udal horrek. – Jendaurrean erakutsitako ondasun eta eskubideen zerrendan jaso egiten dira bai linearen instalazioak artez eragiten dien aldeak, eta bai lanak dirautela materialak biltzeko eta sarbideetarako aldeak ere. – Gipuzkoako Foru Aldundiak katastroko partzela bakoitzari ematen dion sailkapenarekin bat etorriaz egiten dira baioespenak. Aurkeztutako proiektua ikusi da. Andoni Larrañaga Irastorza industria-ingeniari teknikoak izenpetu zuen (4112 zenbakiko kolegiatua) eta Gipuzkoako Ingeniari Tekniko Industrialen Elkargo Ofizialak 2008-08-02an bisatu zuen. Sektore Elektrikoari buruzko azaroaren 27ko 54/1997 Legea (1997-11-28ko BOE), eta abenduaren 3ko 282/2002 Dekretua (2002-12-23ko EHAA) ikusi dira. Dekretu horren bidez, honako instalazio hauek eraikitzeko, aldatzeko, ustiatzeko, eskualdatzeko eta ixteko administrazio baimenerako prozedurak arautu ziren: argindarra ekoitzi, garraiatu nahiz banatzeko instalazioak, bai eta kontsumitzaileekin konektatzeko hartuneak, zuzeneko lineak eta instalazioak ere. Halaber, azaroaren 28ko 3151/1968 Dekretua (1968-12-27ko BOE), Goi-tentsioko airetiko linea elektrikoen Araudia eta Nahitaezko Desjabetzeari buruzko 1957ko apirilaren 26ko Legea (1957-06-20ko BOE). Kontuan izanik, Iberdrola Distribución Eléctrica S.A.U. enpresa eskabidegileak, eraginpekoek egindako alegazioei egoki erantzun diela. Energia eta Meategien zuzendariak, Industria, Merkataritza eta Turismo Sailaren egitura organikoa eta funtzionala ezartzen duen urriaren 11ko 284/2005 Dekretuan (2005-10-27ko EHAA) aitortzen dizkion ahalmenen indarrez, hau EBATZI DU: 1.– Iberdrola Distribución Eléctrica S.A.U. baimena ematea beherago zehaztutako instalazio elektrikoak eraikitzeko eta exekuzio-proiektua onartzea: Arrasate-Eskoriatza TA airetiko linea eta Arrasate-Oñati TA airetiko linea lotzeko, airetiko eta lurpeko linea elektrikoa, 30 kV-koa (d/c). Hona hemen linea horren ezaugarriak: – Tentsioa 30 kV. – Eroaleak: airetikoan 6 (LA 280) eta lurpekoan 6 AL 240. – Euskarriak: altzairuzkoak. – Luzera: 3.490 m airetik eta 94 m lurpetik. – Linearen hasiera: Mondragón-Eskoriatza TA airetiko linearen 9003 zenbakiko euskarria. – Linearen bukaera: Mondragón-Oñati TA airetiko linearen 503 zenbakiko euskarria. – Ibiltartea: Arrasate-Mondragón eta Oñatiko udalerriak. 2.– Baimentzen diren instalazioak herri-onurakotzat deklaratzea eta deklarazioak, azaroaren 27ko 54/1997 Legeko 54. artikuluan xedatutakoaren indarrez, honako hauek dakartza: ondasunak okupatu eta eraginpeko eskubideak hartu behar direla eta okupazioa, gainera, presaz egin behar dela. Deklarazioak, halaber, Nahitaezko Desjabetzeari buruzko 1954ko abenduaren 16ko Legearen 52. artikuluak presaz okupatzeko deklarazioari dagokionez ezartzen dituen ondorioak ekartzen ditu, 53. artikuluan zehaztutako erregistro ondorioekin. Ebazpen hau abenduaren 3ko 282/2002 Dekretuan (2002-12-23ko EHAA) ezarritakoari eta ondorengo baldintza orokorrei jarraituz ematen da: 1) Onartutako proiektuarekin bat egin beharko dira instalazioak, eta, halakorik bada, eskatzen eta baimentzen diren aldakuntzekin bat. 2) Martxan jartzeko epea urte bikoa izango da, eraginpeko finkak okupatzeko Akta egiten denetik aurrera. 3) Behin betiko errekonozimenduari eta martxan jartzeko aktari dagokionez, lanak amaitu direla jakinarazi beharko dio Bizkaiko Lurralde Bulegoari instalazioen titularrak. 4) Obrak egiteko beharrezko diren udal edo probintzien eskumenpeko baimen edo lizentziak eta gainerakoenak errespetaturik ematen da baimen hau, eta ez du salbuesten eskatzailea haiek eskuratzeko obligaziotik. Halaber, inoren eskubideei kalterik egin gabe eta jabetza-eskubideari eutsiz ematen da. Ebazpen honek ez du administrazio-bidea amaitzen. Beraz, gora jotzeko errekurtsoa aurkez daiteke Berrikuntza eta Energia Sailburuordetzaren aurrean, ebazpena jakinarazten den egunaren biharamunetik hasi eta hilabeteko epean, hala agintzen baita 4/1999 Legean (lege horrek Herri Administrazioen Araubide Juridiko eta Administrazio Prozedura Erkidearen azaroaren 26ko 30/1992 Legea aldatu zuen). Vitoria-Gasteiz, 2008ko apirilaren 14a. Energia eta Meategien zuzendaria, TXABER LEZAMIZ CONDE.
