Euskal Herriko Agintaritzaren Aldizkaria

Epaitegi honen iritziz, 1 eta 2. idatz-zatietan azaleratutako mugaketek eta 3. eta 4. paragrafoetako salbuespenen eragina salbuetsita, Sopuertako Udalaren Kontu Orokorrak alderdi esanguratsu guztietan 2005eko ekitaldiaren jarduera ekonomikoa, ondarearen eta 2005eko abenduaren 31ko finantza egoeraren isla leiala eta ekitaldian bere eragiketen emaitzak erakusten ditu.

Ondoren honako hauek gertatu ziren:

Sotako Industri poligonoan 16 lursail besterentzeari dagokionez:

– EAEANren 2006ko martxoaren 10eko epaiaren indarrez, 2006ko uztailaren 18an Alkatetza Dekretu bitartez 45.812 euroan esleitutako hiru lursail salerosteko kontratua suntsitzea onetsi zen; txosten hau idatzi dugun datan atal bakoitzari emandakoa bihurtzeke dago, egiaztatutako interes eta kalteekin batera, aipatu Dekretuak agintzen duen legez.

– Gainerako 13 lursailei dagokienez, horietako biren esleipendunak, salerosketa kontratua eskritura publiko bihurtzen ez zela ikusita, 2007ko urtarrilaren 22an kontratua suntsitu eta prezioa itzultzeko eskea aurkeztu zuen; baita, aipatutako lursailen gainean obra-baimena izapidetzen gauzatutako gastuak, 39.412 eurokoak, gehi zegozkion interesak itzultzekoa ere. Alkatetzaren 2007ko maiatzaren 14ko Dekretu bitartez, lizentzia izapidetzeari zegokion erreklamazioa gaitzetsi egin zen eta horren aurrean, esleipen hartzaileak administrazioarekiko auzi-errekurtsoa aurkeztu zuen, txosten hau idatzi dugun datan ebazteko dagoena.

II.– Barne kontrolerako sistemei eta kudeaketa prozedurei buruzko gogoetak.

Atal honetan jaso dira bai ekonomia-finantza jarduera arautzen duten printzipioen betetzea nabarmen eragiten ez duten hutsak, bai prozedurazko alderdiak ere, kudeaketa hobetzeko azaleratu ditugunak.

II.1.– Aurrekontua eta kontabilitatea.

– 2005eko ekitaldirako aurrekontua 2005eko otsailaren 17ko Osoko Bilkurak onetsi zuen hasiera batean eta Bizkaiko Aldizkari Ofizialean 2005eko otsailaren 28an eman zen argitara. 2005eko martxoaren 22an behin betiko onetsi zen aurrekontu hori. Behin betiko onetsitako aurrekontua 2005eko apirilaren 7an argitaratu zen. Aurrekontu Orokorraren behin betiko onespena ezarri beharreko ekitaldiaz aurreko urteko abenduaren 31 baino lehenago onetsi behar da, lanabes erabilgarri eta eraginkorra izan dadin, 10/2003 FAren 15. artikuluak agintzen duen moduan.

– Udalaren aurrekontuko Inbertsio errealen kapituluak obra kontzeptuko gastuak zenbateko osoarekin jasotzen ditu; horiek, ordea, urte anitzeko izaeradun gastu modura hartu behar lirateke.

– Eusko Jaurlaritzatik eta Bizkaiko Foru Aldunditik (BFA) guztira jasotako 33.193 euroko konpentsazio finantzarioak, Jarduera Ekonomikoen gaineko Zergaren erreformatik eratorritako udalaren diru-bilketaren murrizketa arintzera zuzenduak, Zerga zuzenak kapituluan erregistratu dira; ordea, sarrera horien izaera aintzat hartuta, Transferentzia eta diru-laguntza arrunten kapituluan erregistratu behar ziratekeen.

– Udalak transferentzia eta diru-laguntza arruntak kapituluan 29.388 euroko gastuak erregistratu ditu, Sopuertako Parroki-Batzordeari udalerriko tenpluetan konponketak egiteko emandako diru-laguntza bati dagozkionak. Eragiketa hau egoki erregistratzeko gastu hau Transferentziak eta kapitalezko diru-laguntzak kapituluan kontuetaratu behar da.

– Udalak argiteria eta saneamenduko sareetan egindako 72.883 euroko inbertsioak Erabilera orokorreko ondarearen kapituluan erregistratu ditu. Honez gainera, zerbitzuen funtzionamenduari lotutako Inbertsioan 51.736 euro kontuetaratu ditu, hiri-altzariak eta bide eta plazak urbanizatzeko hainbat proiekturen obra-zuzendaritza eta proiektuen kontzeptuan. Eragiketa hauek egoki erregistratzeko lehenengo kopurua zerbitzuen funtzionamenduari lotutako Inbertsio modura erregistratu behar da eta bigarrena, Erabilera orokorreko ondare modura.

II.2.– Sarrerak.

Hiri Izaerako Lursailen Balioaren Igoerari buruzko Zerga ez da likidatzen hasi 2005eko ekitaldira arte, nahiz Udalaren Osoko Bilkurak zerga honen ezarpena eta dagokion ordenantza fiskal arautzailea 1997ko urriaren 30ean onetsi zituen. 2002ko ekitaldia baino lehenago egindako eskualdaketak ezin kitatu izan dira preskribitu dutelako. 2005ean 9.923 euroko diru-sarrerak erregistratu dira, 2002an egindako eskualdaketei dagozkienak. Berebat, 2006 eta 2007an 30.570 euroko sarrerak erregistratu dira, 2002an (905 euro), 2003an (10.401 euro), 2004an (7.158 euro) eta 2005ean (12.106 euro) egindako eskualdaketei dagozkienak.

Honek, beste hainbat gertakarirekin batera, Udalak

idazkari-azterkariari diziplina espedientea ireki eta dagokion zehapena ezartzea eragin du. Zehapen hau baliogabe utzi da lehen auzialdian eta ebazteko dago Auzitegi Nazionaleko Administrazioarekiko Auzietako Salaren aurrean aurkeztutako gora jotzeko errekurtsoa.

II.3.– Langileria.

– 2005eko ekitaldiari dagokion Lanpostuen Zerrendak aldi baterako kontratuak dituzten lau langile barne hartzen ditu, Euskal Funtzio Publikoaren 6/1989 Legearen 14. artikuluari jarraiki bertan egon beharko ez luketenak.

II.4.– Diru-Laguntzak.

– Udalak 21.000 euroko zenbatekoarekin emandako diru-laguntza batean, erakunde onuradunak ez du behar bezala egiaztatu diruz lagundutako gastua egin duenik.

– Udalak ez digu 2005ean emandako 12.000 euroko diru-laguntza bati dagokion gastua egin izanaren agiri egiaztagarririk eskuratu, nahiz horri dagokion espedientean 2006ko ekainaren 5eko txosten bat ageri den; bertan adierazten da onuradunak dokumentazio hori aurkeztu duela eta hala dago jasoa, gainera, Udalaren sarrera-erregistroan.

II.5.– Kontratazioa.

Udalaren kontratazio administratiboa aztertu dugu eta iritziaren atalean aipatu ditugun ez betetzeak alde batera, honako alderdi hauek bereizi behar ditugu:

– Kontratazio espedientea.

Kontratu bati dagokion kontratazio espedientea, 48.006 euroan prozedura negoziatu bidez esleitu zena, ez da APKLTBren 67. artikuluan agindutakoari jarraiki izapidetu, izan ere, klausula administratibo partikularren eta preskripzio tekniko berezien pleguetan beretan ez baitaude jasoak ez krediturik badagoela dioten egiaztagiriak, ez Artekaritzaren fiskalizazioa ere (5. espedientea).

– Lana gauzatzeko ezintasunari edo baliabide ezari buruzko txostena.

186.354 euroan esleitutako aholkularitza eta laguntza emateko kontratu batean ez da ageri zerbitzu sustatzailearen txosten justifikagarririk, lana gauzatzeko ezintasuna edo behar hainbateko baliabide eza eta/edo baliabide egoki eza, edota administrazioak eskura dituen baliabideak ez ugaritzeko komenigarritasunari buruzkorik, APKLTBren 202 artikuluak eskatzen duen moduan (1. espedientea).

– Proiektua gainbegiratzeko txostena.

1.398.814 euroan esleitutako bi obra kontratutan, ez dago proiektuaren gainbegiraketa txostenik, APKLTBren 128. artikulua urratuz (10. eta 11. espedienteak).

– Proiektuaren aldez aurreko zuinketa.

237.956 euroan esleitutako obra espediente batean, arazorik gabeko exekuzioa gauzatu ahal izateko, errealitate geometrikoa eta lursailen erabilgarritasuna egiaztatuko duen proiektuaren aurretiazko birplanteaketarik ez da egin, APKLTBren 129. artikulua urratuz (8. espedientea).

– Administrazio klausula partikularren pleguak.

470.638 euroan esleitutako hiru espedientetan ez da barne hartu administrazio klausula partikularren pleguak onetsi aurretiko txosten juridikoa, APKLTBren 49.4 artikulua urratuz (1., 3. eta 8. espedienteak).

232.682 euroan esleitutako aholkularitza eta laguntza emateko 2 kontraturi eta 1.906.386 euroan esleitutako 4 kontraturi dagozkien pleguek, besteak beste, lehiatzaileen esperientzian eta/edo kaudimenean oinarritutako irizpideak barne hartzen dituzte eta ez eskaintzaren ezaugarri teknikoetan oinarritutakoak, APKLTBren 15. artikuluak eta hurrengoek agintzen duten moduan (1, 3, 6, 10, 11 eta 13. espedienteak). Gainera, 4 obra kontraturen pleguek objektiboa ez den esleipen irizpidea ezartzen dute, hau da, udalerrikoak bertakoak diren langileak kontratatzea, APKLTBren 86. artikuluak ezarritakoa urratuz (6, 10, 11 eta 13. espedienteak).

Zerbitzu kontratu bati dagozkion pleguek, 79.470 euroan esleitutakoan, ez dute prezioen berrikusketari ezargarria zaion formula edo indize ofiziala adierazten, 1098/2001 Errege Dekretuaren 67.2 artikuluak, Herri Administrazioen Kontratuen Legearen Erregelamendu Orokorrak, aurrerantzean HAKLEO (2. espedientea) agintzen duen moduan.

– Eratutako bermea.

810.170 euroan esleitutako 5 kontratutan, eratutako behin betiko bermeak ez du APKLTBren 36. artikuluak agindutako ehunekoa osatzen (esleipen zenbatekoaren % 4a). Hiru kontratutan aholkularitza eta laguntza kontratuak dira edota 2 urtetarako esleitutako zerbitzuak, zeinetan zerbitzua eman den lehenengo ekitaldiari dagokion gastuari ezarri zaion ehunekoa, eta ez esleitutako zenbateko guztiari (1., 2. eta 3. espedienteak). Beste bi kasuetan, ehunekoa esleipen zenbatekoari ezarri zaio, BEZ barne hartu gabe (6. eta 8. espedienteak).

Guztira 1.222.217 euroan esleitutako 4 kontratutan ez da kontratuaren esleipen zenbatekoaren % 6ko berme osagarria eratu, APKLTBren 36.3 artikuluan jasotakoa, nahiz pleguak hala aurreikusten zuen (6., 7., 10. eta 13. espedienteak).

– Agintaritza aldizkarian iragarkiak kobratzea.

Guztira 1.840.713 euroan esleitutako 4 espedientetan ez zaizkio kontratistari agintaritzako iragarkiak kobratu, nahiz administrazio klausula partikularren pleguek kontratistari betebehar hau egozten zioten (6., 7., 10. eta 11. espedienteak).

– Zuinketa egiaztapen akta.

260.062 euroan esleitutako obra espediente batean, ez da zuinketa egiaztatzeko akta gauzatu, APKLTBren 142. artikuluak agindutakoa urratuz (6. espedientea).

– Kontratu aldaketak.

1.267.100 euroan esleitutako 3 obra kontratutan ez dago kontratuak aldatu aurreko txosten juridikorik, APKLTBren 59.2 artikuluak agintzen duen legez. Ez eta, aldaketak APKLTBren 101.2 artikuluan agindutako dagokion administrazioko agirian gauzatu direnik ere, ez APKLTBren 42. artikuluan finkatutako behin betiko bermearen egokitzapena egin denik (6., 11. eta 12. espedienteak).

– Exekuzio erritmoari egokitzen ez zaion finantzaketa.

1.398.814 euroan esleitutako bi obra kontratutan, finantzaketa ez zaio obren exekuzio erritmoari egokitu, APKLTBren 14.3 artikuluan agindutakoa urratuz (10. eta 11. espedienteak).

III.– Finantzen analisia.

Etorkizunean Udal Administrazioek egingo dituzten inbertsioen balizko finantzaketa iturriak honako hauek dira: ekitaldi bakoitzean sortzeko gai diren aurrezki garbia (emaitza arrunta ken finantza pasiboen aldaketak eragindako gastuak), diruzaintza geldikinak eta diru-laguntza bidez edo zorpetze berri baten bidez eskura dezaten kanpoko finantzaketa.

Udalak azken ekitaldietan likidatutako magnitude nagusien bilakaera ondoko taulan dago zehaztua. Konparazio ondorioetarako, 1.000 eta 5.000 biztanle bitarteko (geruza honetan baitago udala) Gipuzkoako eta Euskal Autonomia Erkidegoko (EAE) udalen batez bestekoen 2004ko ekitaldiari buruzko datuak barne hartu dira (eskuragarri dauden azken datuak).