Euskal Herriko Agintaritzaren Aldizkaria

48. zk., 2008ko martxoaren 7a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Agintariak eta Langileria

Euskal Herriko Unibertsitatea

1446

EBAZPENA, 2008ko otsailaren 29koa, Universidad del País Vasco / Euskal Herriko Unibertsitateko errektoretzarena, administrazio eta zerbitzuetako pertsonalaren administrarien eskalan sartzeko barne-promoziorako prozesu espezifikorako deialdia argitaratzeko agindua ematen duena, Euskal Funtzio Publikoaren 6/1989 Legearen hamaseigarren xedapen gehigarrian ezarritakoa jarraituz.

Goi mailako hezkuntza-zerbitzu publikoaren gaineko ardura duen administrazio publiko honen langile-beharrei erantzuteko, UPV/EHUko Gobernu Kontseiluak, 2008ko otsailaren 28an egindako bileran, erabaki du UPV/EHUko administrazio eta zerbitzuetako pertsonalaren administrarien eskalan sartzeko proba-deialdia egitea, honako hauetan ezarritakoari jarraituz: Unibertsitateei buruzko abenduaren 21eko 6/2001 Legea, 75. artikulua; Langile Publikoaren Oinarrizko Estatutuaren apirilaren 12ko 7/2007 Legea, eta Euskal Funtzio Publikoaren uztailaren 6ko 6/1989 Legea.

Horregatik guztiagatik,

EBATZI DUT:

Lehenengoa.– UPV/EHUko Gobernu Kontseiluak 2008ko otsailaren 28ko bileran erabaki bezala, Euskal Herriko Unibertsitateko administrazio eta zerbitzuetako pertsonalaren administrarien eskalan sartzeko prozesu espezifikorako deialdia Euskal Herriko Agintaritzaren Aldizkarian argitaratzeko agindua ematea.

Bigarrena.– Argitaratutako erabakiaren aurka administrazioarekiko auzi-errekurtsoa jarri ahal izango da Euskal Herriko Justizi Auzitegi Gorenaren aurrean, erabaki hori Euskal Herriko Agintaritzaren Aldizkarian argitaratu eta biharamunetik kontatzen hasita bi hileren epean.

Leioa, 2008ko otsailaren 29a.

UPV/EHUko errektorea,

JUAN IGNACIO PÉREZ IGLESIAS.

UPV/EHUKO AZPKO ADMINISTRARIEN ESKALAN BARNE PROMOZIORAKO TXANDATIK SARTZEKO HAUTAPEN PROBETARAKO DEIALDIAREN OINARRIAK

1.– Deialdiaren xedea.

1.1.– Oinarri hauen helburua da administrarien eskalan karrerako funtzionario gisa eta barne promoziorako txandatik lehiaketa-oposizioaren sistemaren bidez sartzeko hautaprobetarako deialdia egitea, I. eranskinean zehazten diren plazak hornitzeko.

I. eranskineko zerrendako plaza hutsen kopurua, behar izanez gero, handitu egingo da hautaketa-prozesua gainditzen duten lehiakide guztiek barne-promoziorako aukera izan dezaten; gehienez ere, deialdia argitaratzerakoan D taldean dauden karrerako funtzionario-kopuru berdinean handituko da, behin-behinean, plaza huts horien kopurua.

1.2.– Aukeratutakoen kopurua I. eranskinean agertzen den plaza-kopurua baino altuagoa bada, egun duten plaza esleituko zaie edo bestela, administrazioak plantilako premien arabera erabakitzen duena.

1.3.– Nolanahi ere, derrigorrezko hizkuntz eskakizuna duen lanpostuari loturiko plazak ezin izango dituzte bete eskakizun horiek oinarri hauetan aurreikusi bezala erdietsi ez dituzten lehiakideek.

1.4.– Halaber, sexuen arteko aukera-berdintasunaren printzipioarekiko konpromisoa agertu nahi da, Euskal Herriko Unibertsitatearen zerbitzura sartzeko prozeduraren beraren oinarri baita.

2.– Hautagaiek bete beharreko baldintzak:

2.1.– Probak egiteko onartua izateko baldintzak hauek dira:

a) Europar Batasuneko hiritarra edo haren ezkontidea izatea, betiere zuzenbidez banaturik ez badaude; edo hiritar horren zein bere ezkontidearen (betiere zuzenbidez banaturik ez badaude) 21 urtetik beherako ondorengoa (edo haien kargura bizi den ondorengo zaharragoa) izatea, Europar Batasuneko gainontzeko estatu kideetako hiritarrak funtzio publikoaren zenbait sektoretara sartzeko modua arautzen duen abenduaren 23ko 17/1993 legearen 1.1 artikuluan ezarritakoarekin bat etorrita.

b) Hamasei (16) urte beteta izatea eta derrigorrezko erretiro-adinera iritsi ez izatea.

c) Eginkizunak burutu ahal izateko gaitasun funtzionala izatea, minusbaliatuak gizarteratzeko apirilaren 7ko 30/1982 legearen aplikazioa ezertan ukitu barik. Gaitasun funtzionala hautaketa-prozesua gainditu eta gero egiaztatuko da, medikuaren egiaztagiri edota azterketaren bidez, kargu-hartzea betebehar honen menpe geratuko litzatekeelarik, 10.1.1.e) oinarriak xedaturikoaren arabera.

d) Goi Batxilergoa, Bigarren Mailako Lanbide-Heziketa edo parekoa izatea. Atzerriko titulazioen kasuan, horren homologazioa egiaztatuko lukeen kredentziala izatea.

Halaber, parte hartu ahal izango dute UPV/EHUko administrari-laguntzaileen eskalan karrerako funtzionario gisa 10 urtetako antzinatasuna aitortua dutenak.

e) Administrari-laguntzaileen eskalako karreradun funtzionario moduan UPV/EHUn zerbitzuak betetzen aritzea, eta jatorrizko eskalan bi urteko zerbitzu-harremana beteta izatea.

Ondorio horietarako, zerbitzu bereziengatik edo seme-alabak zaintzeagatik eszedentzian daudenak ere langile aktibo moduan zerbitzuak betetzen ari direla ulertuko da.

f) Eginkizun publikoak betetzeko ezgaiturik ez izatea, eta diziplina-espedientearen bidez edozein administrazio publikoren zerbitzuetatik bereizita ez egotea.

g) Indarrean dauden arauen arabera, ezgaitasun edo bateraezintasuneko lege-kausaren batean sarturik ez izatea; arauek aitortzen dioten aukerarako eskubidea osorik errespetatuz.

h) Lehiaketaren xede den titulazio-taldeari dagokion azterketa egiteko eskariaren tasa ordaintzea (zenbatekoa 4.4 oinarrian zehazten da), bat etorriz Euskal Autonomia Erkidegoko Adminstrazioaren Tasa eta Prezio Publikoei buruzko Legearen Testu Bategina onartzeko irailaren 11ko 1/2007 Lege-Dekretuarekin (2007ko abenduaren 27ko EHAA, 248. zk.).

2.2.– Eskariak aurkezteko epea amaitzen den egunean bete egin beharko dira adierazitako baldintza guztiak, eta baita hautapen prozesu osoan ere, izendapenaren egunera arte.

2.3.– Lanpostuen zerrendan C taldera edo administrazio-eskalara irekita dauden lanpostuetako titularrek, eskarian horrela adierazten badute, behin administrarien eskalan sartu ondoren, beren lanpostuan jarraitu ahal izango dute, lanpostuen zerrendak lanpostuak betetzeko aurreikusten duen sistemaren arabera aitortzen dien izaerarekin. Kasu horretan, abuztuaren 2ko 30/1984 Legearen 22.1 artikuluko azken-aurreko paragrafoan ezarritakoekin bat etorriz, lanpostuak esleitzeko sistematik kanpo geratuko lirateke hautapen-prozesuan lortutako puntuazio-ordenaren arabera.

Funtzionario batek bere eskarian adierazten badu ez duela jarraitu nahi gaur egun titular gisa betetzen duen lanpostuan, lanpostu hori lanpostuen esleipenean eskainiko da, betiere funtzionarioak hautapen-prozesua gainditzen badu. Era berean, funtzionario horrek prozesuaren ondorengo puntuazio-ordena errespetatuz hautatuko du lanpostu berria.

3.– Eskaerak.

3.1.– Eskariak deialdi honekin batera argitaratutako eredu ofizial eta normalizatuaren arabera egin beharko dira; halaber, internet bidez aurkez daitezke www.ehu.es helbidean.

3.2.– Onartua izateko eta, hala badagokio, hautapen probetan parte hartu ahal izateko, nahikoa izango da eskarian adieraztea eskariak aurkezteko epea amaitzen den egunean betetzen direla eskatutako baldintza guztiak.

3.3. Elbarritasuna duenak adierazi egin behar du hori, eta probak egokitzea eskatzen badu, eskaera arrazoitu behar du.

4.– Eskaerak aurkeztea.

4.1.– Eskaerak aurkezteko epea eta tokia:

Deialdi honen ondorengo hautaketa-prozesuetan parte hartu nahi duten pertsonek eskabidea aurkeztu ahal izango dute 20 egun naturalen epean, oinarri hauek Euskal Herriko Agintaritzaren Aldizkarian argitaratu eta biharamunean kontatzen hasita.

Eskaerak eredu ofizial eta normalizatuan aurkeztuko dira, honako modu hauetako batean:

a) Bide elektronikoa/Internet baliatuta, inprimakia 4.1.c) oinarrian adierazitakoari jarraituz bete, eta eskabidea igorriz. Era honetan aurkeztutako eskabideek jaso izanaren agiria eskuratu ahal izango dute, eta han, esleitutako erreferentzia-zenbakia eta tasa ordaintzeko behar diren datuak agertuko dira.

b) Oinarri hauetako 4.3. atalean adierazten diren bulegoetan emandako inprimakia beteta.

c) www.ehu.es helbide elektronikoan eskuratu ahal izango den eredua beteta.

4.2.– Onartu eta, hala badagokie, egin beharreko hautaketa-probetan parte hartu ahal izateko, izangaiek eskaeraren atal guztiak bete beharko dituzte eta tasak ordaindu. Adierazi beharko dute eskatutako baldintza guztiak betetzen dituztela eskabideak aurkezteko epea amaitzen den egunean.

Eskariak aurkezteko epean tasak ordainduko ez balira, prozeduratik at geratuko lirateke, oinarri hauetako 2.1.h) atalean prozesuan onartua izateko ezartzen den betebeharra ez betetzeagatik.

Hala eta guztiz ere, ordaindutako zenbatekoan erratuko balitz, izangaia jakinaren gainean jarriko da, hamar lanegunen epean errakuntza zuzendu eta onartua izan dadin.

Horretarako, honako hauek adierazi beharko dituzte eskarian, zein bere atalean:

a) Eskatutako datu pertsonalak, prozesua behar bezala gestiona dadin.

b) Oposizioaren faseko ariketak egiteko aukeratu den hizkuntza ofiziala, euskara edo gaztelania.

c) Titular moduan betetzen duen lanpostuan jarraitu nahi duela esateko adierazpena; edo, alderantziz, lanpostu horretan jarraitu nahi ez duela esateko adierazpena. Bi kasu horiek oinarri hauetako 2.3 atalean aurreikusten diren ondorioak izango dituzte. Aipatutako adierazpenek hautapen prozesua gainditzen den kasuetan bakarrik izango dituzte ondorioak.

d) Minusbaliotasuna dutenek horren berri eman beharko dute, eta hautaketa-probak egin ahal izateko beharko dituzten egokitzapen teknikoak adierazi.

e) Agertutako titulazioa.

4.3.– Eskaerak aurkezteko lekuak.

Eskariak erregistro orokorretan aurkeztu ahalko dira; honako bulego hauetan, hain zuzen:

– Araba: Campuseko Errektoreordetza (Izardui Komandantearen kalea 2, 01005 Vitoria-Gasteiz).

– Gipuzkoa: Campuseko Errektoreordetza (Ignacio María Barriola eraikina, Elhuyar plaza 1, 20018 Donostia-San Sebastián).

– Leioa-Bizkaia: Errektoregoaren eraikina (Sarriena auzoa z/g, 48940 Leioa)

– Bilbao-Bizkaia: Larrako Etxea (Agirre Lehendakariaren ibilbidea 83, 48015 Bilbo)

Era berean, eskabidek aurkeztuko ahalko dira Administrazio Publikoen Araubide Juridikoaren eta Administrazio Prozedura Erkidearen azaroaren 26ko 30/1992 Legean (38.4. art.) adierazitako beste edozein lekutan.

Posta-bulegoen bidez aurkeztutako eskariak gutun-azal irekian igorri beharko dira, posta-zerbitzuko funtzionarioek data eta zigilua jarri ahal izan diezaieten, modu ziurtatuan igortzeko.

Halaber, bide elektronikoa baliatuta aurkeztu ahal izango dira, inprimakia 4.1.a) oinarrian adierazitakoari jarraituz bete, eta eskabidea igorriz.

Internet bidez aurkezten diren eskabideei dagokienez, jaso izanaren agiria eskuratu ahal izango da, eta han, esleitutako erreferentzia-zenbakiaz gain, tasak ordaintzeko behar diren datu guztiak ere agertuko dira. Jaso izanaren agiria eskuratu gabe ere, kopiatu ahal izango da datu horien zerrenda.

4.4.– Eskariak aurkezteagatiko tasak ordaintzea:

Deialdi honetako 2.1.h) oinarrian ezarritako betebeharra betetzeko, tasa eskariak aurkezteko epearen barruan ordaindu behar da, ondoko erakunde hauen edozein sukurtsaletan: BBK (Bilbao Bizkaia Kutxa), Gipuzkoako Kutxa eta Caja Vital Kutxa.

Tasaren ordainketa gauzatzeko eskariaren inprimakia aurkeztu beharko da banku-erakundean. Eskaria internet bidez egin dutenek, sistemak itzuli dien jaso izanaren agiria edo bertan agertuko diren datuak aurkeztu beharko dituzte.

Deialdi honetan parte hartzeko ordaindu behar den tasa 13,02 eurokoa da.

Tasa ez ordaintzeak edo ordaindutako zenbatekoa okerra izateak oinarri hauetako 4.2. atalean zehaztutako ondorioak izango ditu. Tasa ordaindu eta aurkeztu arren, honek ezin izango du ordezkatu 4.1 oinarrian adierazitakoa aintzat hartuta eskaria epe barruan eta behar bezala aurkezteko tramitea.

5.– Hautagaiak onartzea eta erreklamazioak.

5.1.– Eskariak aurkezteko epea amaitu eta hurrengo hilabetearen barruan, UPV/EHUko gerenteak onartutako eta baztertutakoen behin-behineko zerrenda onartzeko erabakia emango du, baztertutakoen kasuan kanpoan uzteko arrazoia azalduz.

5.2.– Kanpoan geratutakoek kexa aurkeztu ahal izango dute behin-behineko zerrenda argitaratu eta hurrengo hamar lanegunen barruan; eta, hala badagokie, egindako oker edo gabeziak zuzendu ahalko dituzte. Egitatezko akatsak edozein unetan zuzendu ahalko dira, bai ofizioz bai interesatuaren eskariz.

5.3.– Erreklamazioak egiteko epea igaro eta horien inguruko erabakiak hartu ondoren, UPV/EHUko gerenteak ebazpena emango du onartu eta baztertuen behin betiko zerrenda onartuz.

5.4.– Onartuen eta kanporatuen behin betiko zerrendari onespena emango dion erabakia argitaratu eta biharamunetik kontatzen hasita, hilabeteko epea egongo da erabaki horren aurka berraztertzeko errekurtsoa aurkeztu ahal izateko UPV/EHUko gerentearen aurrean.

Hala ere, probak egiteko eguna iritsi eta aurkeztutako errekurtsoa ebatzita ez badago, ukitutako izangaiek azterketa egin ahal izango dute, nahiz eta aipatutako errekurtsoa ezetsiz gero, baliorik izango ez duen.

5.5.– Oinarri honek aipatzen dituen erabakiak 4.3 oinarrian adierazten diren tokietako iragarki-tauletan argitaratuko dira, eta baita www.ehu.es interneteko helbidean ere. Bestalde, 5.3 oinarriko gerentearen erabakia Euskal Herriko Agintaritzaren Aldizkarian ere argitaratuko da.

5.6.– Zerrendetan izangaien izen-abizenak eta NAN zenbakia agertuko dira eta, hala dagokienean, onartuak ez izatearen arrazoia.

6.– Hautapen Batzordea.

6.1.– Izendapena.

UPV/EHUko gerentearen erabakiaren bitartez, hautapen-probak kalifikatuko dituzten Hautapen Batzordeko kideak izendatuko dira. Horretarako, espezialitate, inpartzialtasun eta profesionaltasunaren printzipioak gordeko dira; eta, hein berean, emakume eta gizonen arteko berdintasuna lortzeko ahalegina egingo da. Izendapen horiek Euskal Herriko Agintaritzaren Aldizkarian argitaratuko dira, onartu eta kanporatutako pertsonen behin betiko zerrendarekin batera.

6.2.– Osaera.

Hautapen Batzordea bost kidek osatuko dute: batzordeburuak eta lau mahaikidek. Mahaikideetako bat idazkari izendatuko da. Horiek guztiek ordezko bana izango dute.

Hautapen Batzordeko kide guztiak edozein administrazio publikotako karrerako funtzionarioak izango dira, eta epaimahaikide-izaera betiere pertsonala izango da; beraz, ezingo dute jardun inoren ordezkaritzan edo inoren kontura.

6.3.– Abstentzioa eta ezetza ematea.

Administrazio Publikoen Erregimen Juridiko eta Administrazio-Prozedura Bateratuari buruzko azaroaren 26ko 30/1992 Legearen 28. artikuluan zehaztutako egoeraren batean baldin badaude, Hautapen Batzordeko kideek autoritate dei-egileari horren berri eman beharko diote, eta kasu horretan ezingo dute hautapen prozesuan parte hartu, ezta deialdia argitaratu aurreko azken bost urteetan hautapen-probetarako izangaiak prestatzeko eginkizunetan jardun badute ere.

Era berean, aurreko arrazoietakoren bat dela eta, interesatuek edozein unetan ezetsi ditzakete epaimahaikideak, lege-testu horren beraren 29. artikuluarekin bat etorrita.

6.4.– Jarduteko arauak.

Hautapen Batzordearen jarduna azaroaren 26ko 30/1992 Legearen 22-27 bitarteko artikuluetan xedaturiko arauei lotuko zaie. Nolanahi ere, epaimahaiburuak agindurik eta idazkariak aldez aurretik deituta, hautapen-probak hasi baino lehen behar besteko aurrekotasunez bilduko da Hautapen Batzordea. Batzorde horren osaketak baliorik izango badu, gutxienez epaimahaiburua eta idazkaria (edo horien ordezkoak) eta batzordeko kideen erdia izan beharko da bertan.

Erabakiak bertaratutakoen botoen gehiengoarekin hartuko dira. Hautapen Batzordeko kide guztiek izango dituzte ahotsa eta botoa. Berdinketak epaimahaiburuaren kalitate-botoarekin ebatziko dira.

Kanpoan izateagatik, gaixo egoteagatik, edota arrazoi legal batengatik epaimahaian ezin badira egon mahaiburua eta haren ordezkoa, eta haien lekuak hutsik geratzen badira, epaimahaikoen artetik adin edo antzinatasunik handiena duten kideak izango dira ordezkoak, hurrenkera horren arabera.

6.5.– Ahalmenak.

Hautapen Batzordeak erabateko autonomia funtzionalaz jardungo du, prozeduraren legezkotasuna zainduz eta objektibotasuna bermatzeko erantzukizuna bere gain hartuta.

Halaber, ordenamendu juridikoarekin bat eginik, oinarri hauek aplikatzerakoan sor daitezkeen zalantza guztiak ebatziko dituzte eta hartu beharreko neurri guztiak hartuko, deialdia modu egokian gara dadin, oinarri hauetan aurreikusi ez diren kasuetan baliatu beharreko irizpideak ezarriz.

Oposizio-aldiko ariketa idatzien edukia isilpean gordetzen dela bermatzeko neurri egokiak hatuko ditu Hautapen Batzordeak; halaber, horiek zuzentzean azterketa-egileen izenak ere ezkutuan gordeko direla bermatuko du.

6.6.– Egoitza.

Jakinarazpen eta gainontzeko gorabeheretarako, epaimahai kalifikatzailearen egoitza honako hau izango da: errektoretzaren eraikina - pertsonalerako gerenteordetza, Sarriena auzoa, z/g, 48940 Leioa.

6.7.– Zerbitzua ematearen kalteak ordaintzea.

Hautapen Batzordeko kideek kalte-ordainak jasoko dituzte nork bere zerbitzua emateagatik; besteak beste, bertaratzeengatik, indarreko legeriak arlo horretan xedaturikoarekin bat etorriz.

7.– Hautapen-prozedura.

7.1.– Hautapen-prozedura lehiaketa-oposizio bidezkoa izango da.

7.2.– Oposizio-aldiko ariketa: bi zati izango dituen ariketa egin beharko da.

7.2.1- Lehenengo ariketa.

Hiru aukerako erantzunak izango dituzten 50 galderei erantzun beharko zaie idatziz ordu bete eta hogeita hamar minutuko gehienezko denboran. Galderak oinarri hauetan jasotako gaiei buruzkoak izango dira eta erantzuten ez diren galderek ez dute zehapenik izango.

Lehenengo ariketa hau zero (0) puntutik hamar (10) puntura bitartean kalifikatuko da, eta gutxienez bost (5) puntu (25 galdera) lortzen ez dituztenak baztertuta geratuko dira.

7.2.2.– Bigarren ariketa.

Hautapen Batzordeak proposatutako lau kasu praktikoetatik bat ebatzi beharko da batzordeak zehaztutako eran. Kasuok administrarien eskalari berezko zaizkion eginkizunekin lotuta egongo dira eta horiek ebazteko ordu bete eta hogeita hamar minutuko gehienezko denbora egongo da.

Lehenengo ariketa hau zero (0) puntutik hamar (10) puntura bitartean kalifikatuko da, eta gutxienez bost (5) puntu lortzen ez dituztenak baztertuta geratuko dira.

7.3.– Euskara-arikera: Proba bat egingo da euskararen jakite-maila ebaluatzeko; beraz, hizkuntza-eskakizunak egiaztatu nahi dituzten lehiakideek horretarako aukera izango dute.

Kasuan kasuko hizkuntza-eskakizuna egiaztatzen dutenek gai kalifikazioa jasoko dute, lortu nahi duten lanpostuak derrigorrezko hizkuntza-eskakizuna duenean.

Hizkuntz eskakizunik gabeko lanpostuetarako lehiatzen direnean, honako puntuazio hauek emango zaizkie, eta ez da izango tarteko beste puntuaziorik:

– 1. hizkuntz eskakizuna: 1,45 puntu.

– 2. hizkuntz eskakizuna: 2,90 puntu.

7.4.– Lehiaketaren fasea. Lehiaketa-fasearen kalifikazioa merezimenduetarako ondoko baremo honi esleitutako puntuak batuz lortuko da, lor daitekeen puntuaziorik gorena bederatzi puntu izanik:

7.4.1.– Eskariak aurkezteko epea amaitzen den egunera arte administrazio publikoan egindako zerbitzuak gehienez hiru punturekin baloratuko dira; zerbitzu-hilabete oso bakoitzeko 0,01 puntu emango dira.

7.4.2.– Eskariak aurkezteko epea amaitzen den egunera arte UPV/EHUko administrari-laguntzaileen eskalan egindako zerbitzuak gehienez 4 punturekin baloratuko dira; zerbitzu-hilabete oso bakoitzeko 0,012 puntu emango dira.

7.4.3.– Titulazio akademikoak. Administrarien eskalara sartzeko alegatutako titulazio akademikoa ez diren gainerako titulazioak gehienez ere puntu batez balioetsiko dira, ondoko baremo honen arabera:

– Honako lanbide-familia hauetako goi teknikarien tituluak: administrazioa, merkataritza eta marketing eta informatika, lanbide-hezkuntzako teknikari espezialista, edo indarrean dagoen legeriak ondorio akademiko edo profesionaletarako baliokidetzat dituen tituluak: 0,50 puntu tituluko.

– Goi-mailako edo erdi-mailako unibertsitate-titulazio ofizialak: puntu bat tituluko.

7.4.4.– Euskal Herriko Autonomi Erkidegoan ofizial ez diren hizkuntzak. Gehienez puntu 1 emango da, honako baremo honi loturik:

– Hizkuntz Eskola Ofizialeko frantses, ingeles edo alemanaren 3. maila edo baliokidea izateagatik: 0,50 puntu hizkuntza bakoitzeko.

8.– Merezimenduak egiaztatzea.

8.1.– Interesatuek UPV/EHUn administrazio-laguntzaileen eskalan egindako zerbitzuak adierazi beharko dituzte, baina ez egiaztatu. Zerbitzu horiek administrazioak zenbatuko ditu ofizioz. Eskaerak aurkezteko epea bukatzen den egunera arte egindako zerbitzuak baino ez dira kontuan hartuko.

8.2.– Antzinatasuna ofizioz gehituko da, egiaztatzeko beharrik gabe. Eskaerak aurkezteko epea bukatzen den egunera arteko antzinatasuna baino ez da kontuan hartuko.

8.3.– Titulazioak egiaztatzeko, tituluaren fotokopia edo, bestela, titulua emateko eskubideak ordaindu izanaren frogagiria aurkeztu beharko da, betiere titulazioak deialdi hau argitaratu aurretik lortutakoak badira. Horrela ez bada, ez dira titulazioak merezimendu bezala baloratuko.

8.4.– Hizkuntzen ezagutza-maila egiaztatzeko, horretarako berariaz prestatutako frogarik egingo ez denez, eskatutako tituluen fotokopiak aurkeztu beharko dira, betiere deialdi hau argitaratu aurretik. Horrela ez bada, ez da hizkuntzen ezagutza-maila merezimendu bezala baloratuko.

9.– Azken kalifikazioa.

9.1.– Hautaketa-prozesu osoan lortutako puntuazioen batura eginez lortuko da izangaien azken kalifikazioa.

9.2.– Oposizio-lehiaketako emaitza eta kalifikazio guztiak jendaurrean jarriko dira oinarri orokorretako 4.3. atalean zehaztutako bulegoetako iragarki-oholetan.

Halaber, www.ehu.es helbide elektronikoan jarriko dira jendaurrean.

10.– Eskaeren aurkezpena.

UPV/EHUko errektorearen erabakiaren bidez, behin betiko hautatutakoak karrerako funtzionario izendatzeko proposamena egingo da. Erabaki horretan izangai horiei hogei (20) eguneko epea emango zaie ondoren zehazten diren dokumentuak aurkez ditzaten.

10.1.– Eskatutako dokumentuak.

10.1.1.– Hautatutakoen behin betiko zerrendan agertuko diren izangaiek deialdian eskatutako gaitasun-baldintzak eta betebeharrak egiaztatzeko agiriak aurkeztu beharko dituzte; honako hauek, hain zuzen ere:

a) NANaren fotokopia konpultsatua.

b) Atzerriko izangaiek administrazioaren jakinarazpena jasoko dute, eta bertan adieraziko zaie bakoitzak bere egoeraren arabera zer dokumentazio eman beharko duen ezinbestean.

c) Administrarien eskalan sartzeko eskatutako tituluaren fotokopia konpultsatua.

d) Zinpeko aitorpena edo promesa, honako hauek adierazteko: ez dagoela funtzio publikoak betetzeko ezgaiturik; ez dagoela diziplina-espedientearen bidez edozein administrazio-publikotako zerbitzutik aldendurik; eta ez duela administrazio publikoen zerbitzuko pertsonalaren bateraezintasunei buruzko abenduaren 26ko 53/1984 Legean aurreikusten diren ezgaitasun eta bateraezintasunetarako legezko ziorik.

Espainiar nazionalitaterik ez duten izangaiek zinpeko aitorpen edo promesa aurkeztu beharko dute, adierazteko jatorrizko estatuan ez dutela funtzio publikoan aritzeko ezina dakarkion diziplina-zehapen edo zigorrik.

e) Medikuaren ziurtagiria, UPV/EHUko medikuntza-zerbitzuak emana, non egiaztatuko baita ez dutela eskatutako lanpostuak bereak dituen eginkizunetan jarduteko ezintasuna dakarren gaixotasun edo akats fisikorik.

f) Lehiaketa-fasean zehar alegatutako merezimenduen jatorrizko dokumentazioa eta fotokopia konpultsatua.

10.1.2.– Oinarri honen aurreko puntuen arabera agertutako dokumentuek jatorrizko edo kopia konpultsatuak beharko dute izan, eta konpultsak balio izan dezan, bertan agertu beharko dira konpultsaren data eta konpultsaren arduradunaren izen-deiturak, NAN eta sinadura irakurgarria.

10.1.3.– Aipatutako dokumentuak ezin aurkezteko arrazoiak behar bezala justifikatuz gero, izangaiak deialdian eskatutako baldintzak betetzen dituela egiaztatu ahal izango du zuzenbideak onartzen duen edozein froga-bitarteko erabilita.

10.2.– Aurkezteko tokia eta epea.

Arestian zerrendatutako dokumentuak hogei (20) egun naturaleko epean aurkeztu beharko dira, hautatutako izangaien behin betiko zerrenda Euskal Herriko Agintaritzaren Aldizkarian argitaratu eta biharamunetik kontatzen hasita. Dokumentuak pertsonalerako gerenteordetzan utziko dira, UPV/EHUren Leioako errektoretzaren eraikinean (Sarriena auzoa z/g, 48940).

10.3.– Dokumentuak ez aurkeztea.

Adierazitako epearen barruan eta inolako arrazoi justifikaturik gabe dokumentaziorik aurkeztu ez dutenek, edo aurkeztutako dokumentazioa aztertuta, hirugarren oinarrian adierazitako betebeharren bat betetzen ez dutenek, edo nork bere lanpostuan burutu beharreko eginkizunak betetzeko eskatutako gaitasun fisiko edo psikikoa agertzen ez dutenek ezin izango dute izendapena jaso, eta beren ekintza guztiak baliogabe geratuko dira; alabaina, eskarian faltsukeria egiteagatik lepora dakiekeen erantzukizuna oso-osorik bere gain izango dute.

Horrelako kasuetan, hautaketa prozesua gainditu dutenen behin betiko zerrendako puntuazioaren ordena kontuan harturik, Hautapen Batzordeak egingo du dagokionari lanpostua izendatzeko proposamena. Horretarako, aurreko paragrafoan adierazitako arrazoiengatik hutsik geratutako plazak adina izangai hautatuko ditu.

11.– Karreradun funtzionarioen izendapena, plaza hutsen adjudikazioa eta kargu-hartzea.

Dokumentuak aurkezteko epea amaituta, organo eskudunak Euskal Herriko Unibertsitateko karreradun funtzionario izendatuko ditu aurreko oinarrietan ezarritakoa behar bezala bete duten izangai hautatuak.

Izendapenak Euskal Herriko Agintaritzaren Aldizkarian argitaratuko dira.

Izendatutako izangaiek kargua hartu beharko dute hilabete bateko (1) epean, izendapena Euskal Herriko Agintaritzaren Aldizkarian argitaratu eta biharamunetik kontatzen hasita. Epe hori beste hamabost (15) egun natural luzatu ahalko da, izangaiak horrela eskatzen badu, eta betiere horretarako arrazoi justifikaturik baldin badago.

Ezarritako epearen barruan eta arrazoi justifikaturik aurkeztu gabe kargua hartu ez dutenek eskubideak galduko dituzte deialdiaren ondoren Euskal Herriko Unibertsitateko funtzionarioen izaera eskuratzeko. Horrelako kasuetan, 10.3 oinarrian xedatutakoa aplikatuko da.

12.– Datu pertsonalak babestea hautaketa-prozesuaren gestioan.

12.1.– Hautaketa-prozesuaren gestioan, datu pertsonalak "Lanpostuen aukeraketa eta hornitzea" eta "Langileen espedienteak" izeneko fitxategietan tratatuko dira, Euskal Herriko Unibertsitateko Gobernu Kontseiluaren erabakiaz sortuak (unibertsitateko datu pertsonalen fitxategiak sortu, aldatu eta ezabatzeari buruzko erabakia, 2007ko apirilaren 11ko EHAA). Bi fitxategi horien administrazio-organo arduraduna Euskal Herriko Unibertsitatea bera izango da, eta bertako DBLO segurtasun-arduradunarengana jo beharko da kontra egiteko, sartzeko, zuzentzeko eta ezabatzeko eskubideak baliatzeko.

12.2.– Gai horri buruzko informazioa emango duen klausula bat egongo da laugarren oinarrian aipatutako instantziak aurkezteko era guztietan.

12.3.– Euskal Herriko Unibertsitateko administrazioko langileak, epaimahaietako kideek eta horiei laguntza emango dieten adituek (halako aditurik egotekotan) isilpean gordeko dute hautaketa-prozesuaren gestioan zehar euren eskuetara heltzen diren datu pertsonalei dagokien informazioa.

12.4.– Hautaketa-prozesuko faseetan argitara emango diren lehiakideen zerrendetan, bai behin-behinekoetan bai behin betikoetan, datu pertsonal gutxi agertuko dira, zabalkunde-printzipioa betetzeko beharrezko direnak baino ez. Zerrenda horiek hautaketa-prozesua amaitu arte egongo dira ikusgai eta, era berean, erreklamazioak edo errekurtsoak jartzeko beharrezkoa izan daitekeen denbora guztian.

Zerrenda horietan klausula bat jarriko da, honako hauek adierazteko: datuak pertsonalak direla, zerrendak bete egiten duela datuak babesteko alorrean indarreko legeriak dioena, eta zerrendaren helburu bakarra dela hautaketa-prozesuko kasuan kasuko fasearen berri ematea eta parte-hartzaileak jakinaren gainean jartzea. Era berean, beste paragrafo baten adieraziko da zerrenda horiek ez direla egongo herritarren esku; ezingo direla kopiatu, ez osorik ez zati batean; eta ezingo direla, ezta ere, transmititu edo erregistratu informazioa berreskuratzeko sistemaren bat erabilita, baldin eta interesatuek horretarako baimenik ematen ez badute.

13.– Deialdiaren aurka egitea.

Deialdiaren, oinarrien eta horietatik eta epaimahaien jardutetik sortuko diren administrazio-ekintza guztien aurka jo daiteke, Administrazio publikoen araubide juridikoaren eta administrazio-prozedura erkidearen azaroaren 26ko 30/1992 legean xedatutako kasu eta moduetan.

I. ERANSKINA

(Ikus .PDF)

II. ERANSKINA

GAI-ZERRENDA

1.– Administrazioaren antolakuntza: administrazio-organoak. Kide anitzeko organoak. Antolakuntza-printzipioak: hierarkia eta eskumena. Eskuordetza, bereganatzea eta ordezkatzea.

2.– Administrazio-egintza: ekoizpena, edukia, motibazioa eta forma. Administrazio-egintzaren eraginkortasuna. Administrazio-egintzen zuzenbide osoko nulutasuna, deusezgarritasuna eta ezeztapena. Administrazio-isiltasuna.

3.– Administrazio-prozedurari buruzko nozio orokorrak: printzipio orokorrak, interesatuak eta administrazio-prozeduraren faseak; hasiera, ordenaketa, jarraibideak eta amaitzea.

4.– Administrazio-egintzak administrazio-bidean berrikustea: printzipio orokorrak. Errakuntza materialak zuzentzea. Egintzak ezeztatzea. Administrazio-errekurtsoak.

5.– Herri-administrazioen, bertako agintarien eta horien zerbitzura dagoen gainontzeko pertsonalaren erantzukizuna.

6.– Euskal Funtzio Publikoaren Legea: aplikazio-eremua, euskal herri-administrazioen zerbitzupeko pertsonala, lanpostuen zerrendak. Funtzionarioen kidegoak eta titulazio-taldeak.

7.– Euskal Funtzio Publikoaren Legea: funtzionarioen eskubide eta betebeharrak, administrazio-karrera, ordainketak eta administrazio-egoerak: nozio orokorrak: funtzionarioen diziplina-erregimena, nozio orokorrak. Hizkuntz normalizazioa.

8.– Administrazio publikoen zerbitzurako lan-kontratupeko langileak. Lan-kontratua. Lan-kontratazioaren modalitateak.

9.– Gizarte-segurantza: erregimen orokorra. Afiliazioa eta kotizazioa. Babes-ekintza.

10.– Otsailaren 25eko 3/2005 Legea, Euskal Unibertsitate Sistemari buruzkoa.

11.– Euskal Herriko Unibertsitatea Ikastegien antolakuntza eta egitura.

12.– UPV/EHUko Estatutuak: errektorea eta errektoreordeak. Dekano eta zuzendariak. Sailak.

13.– UPV/EHUko Estatutuak: Unibertsitateko Klaustroa: osaera eta eskumenak. UPV/EHUko Gobernu Kontseilua. Gizarte-kontseilua: nozio orokorrak.

14.– UPV/EHUko irakasle eta ikertzaileak: nozio orokorrak. Tipologia eta klaseak: funtzionarioak eta lan-kontratupekoak.

15.– UPV/EHUko administrazio eta zerbitzuetako langileak: UPV/EHUren estatutuetako nozio orokorrak.

16.– Administrazio-gestioan aplikatutako teknologia berriak. Metodo informatikoen erabileraren kontzeptu orokorrak eta abantailak.

17.– Aurrekontua: kontzeptua eta aurrekontu-motak. Aurrekontuak egin eta onartzeko prozedura.

18.– Gastuen aurrekontuak egikaritzea: faseak. UPV/EHUko diru-sarreren aurrekontua: diru-sarreren sailkapena.

Azterketa dokumentala