RSS
48. zk., 2008ko martxoaren 7a, ostirala
- Bestelako formatuak:
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
Xedapen Orokorrak
Gipuzkoako Batzar Nagusiak
1435
1/2008 FORU ARAUA, otsailaren 11koa, Gipuzkoako zerga araudia 2007ko urriaren 25eko 28/2007 Legeak Ekonomia Itunean egindako aldaketetara, Alderdi politikoen finantzaketari buruzko 2007ko uztailaren 4ko 8/2007 Lege Organikora eta 2008. urterako Estatuko Aurrekontu Orokorrak onartzen dituen 2007ko abenduaren 26ko 51/2007 Legean sartutako aldaketetara egokitzen duena.
GIPUZKOAKO DIPUTATU NAGUSIAK
Jakinarazten dut Gipuzkoako Batzar Nagusiek onartu dutela "Otsailaren 11ko 1/2008 Foru Araua, Gipuzkoako zerga araudia 2007ko urriaren 25eko 28/2007 Legeak Ekonomia Itunean egindako aldaketetara, Alderdi politikoen finantzaketari buruzko 2007ko uztailaren 4ko 8/2007 Lege Organikora eta 2008. urterako Estatuko Aurrekontu Orokorrak onartzen dituen 2007ko abenduaren 26ko 51/2007 Legean sartutako aldaketetara egokitzen duena", eta nik aldarrikatu eta argitara dadin agintzen dut, aplikagarria zaien herritar guztiek, partikularrek nahiz agintariek, bete eta betearazi dezaten.
Donostia-San Sebastián, 2008ko otsailaren 20a.
Diputatu nagusia,
MARKEL OLANO ARRESE.
HITZAURREA
2007ko urriaren 25eko 28/2007 Legea onartzeak berarekin ekarri du indarrean dagoen Ekonomia Ituna aldatzea, Euskal Autonomia Erkidegoan itundutako zerga batzuei dagokienez, eta hartan Ikatzaren gaineko Zerga sartzea, Itunaren bigarren xedapen gehigarrian jasotakoa betetze aldera.
Aldaketa horiek eragina izan dute, besteak beste, Zergadun Ez-egoiliarren Errentaren gaineko Zergan eta Balio Erantsiaren gaineko Zergan, administrazio bati baino gehiagori zergak ordaintzeko betebeharra dakarren eragiketa-bolumenaren zifrari dagokionez. Zifra hori 6 milioi eurotik 7ra aldatu da. Balio Erantsiaren gaineko Zergaren kasuan, aipatzekoa da entitate taldeentzako erregimen berezi bat sartu izana, zergaren esparruan talde horien operatiba errazte aldera eta zergak enpresen lehiakortasunari eragin diezaioketen eragin finantzario kaltegarriak saiheste aldera.
Beste zerga itundu batzuk ere aldatu dira, hala nola Zenbait Garraiobideren gaineko Zerga Berezia eta Zenbait Hidrokarburoren Txikizkako Salmentaren gaineko Zerga. Halere, foru arau honen ondorioetarako, aldaketak ez die batere eragiten, ez baita zertan aldatu Gipuzkoan indarrean den zerga araudia.
Nabarmentzekoa da azaroaren 18ko 22/2005 Legeak lurralde erkidean sartutako zerga figura berri bat itundu izana: Ikatzaren gaineko Zerga. Izan ere, aipatu legearen bidez, antolamendu juridiko espainiarrean Batasuneko zuzentarau batzuk sartu dira energia eta elektrizitate produktuen fiskalitatearen alorrean eta estatu kide desberdinetako sozietate nagusi eta filialen zerga erregimen erkidearen alorrean, eta Europar Batasunaren esparruan pentsio fondoei egindako mugaz gaindiko ekarpenen zerga erregimena arautu da.
Itunduta dauden gainerako zerga berezien moduan, Ikatzaren gaineko Zergan Estatuak momentu bakoitzean ezarritako arau substantibo eta formal berdinak aplikatuko dituzte lurralde historikoek. Foru aldundiek exijituko dute zerga Euskal Autonomia Erkidegoan sortzen denean. Hori horrela, foru arau honetan jasotako aldaketek funtsean jasotzen dute Zerga Berezien abenduaren 28ko 38/1992 Legeak III. tituluan ezarritako erregulazioa.
Bestetik, Airearen kalitateari eta atmosferaren babesari buruzko azaroaren 15eko 34/2007 Legea onartu dela-eta Zenbait Garraiobideren gaineko Zerga Berezian hainbat aldaketa sartu direnez, Gipuzkoako foru araudia aldaketa haietara egokitu behar da, zerga bereziak ituntzeko arrazoiak direla eta.
Azken kasu horretan, aldaketa horiei ukituak eman dizkie abenduaren 26ko 51/2007 Legeak, Estatuaren 2008ko Aurrekontu Orokorrei buruzkoak. Hori dela eta, azken lege horren idazkera lehenetsi behar da 34/2007 Legearen idazkeraren gainetik. Gainera, 51/2007 Legeak bestelako aldaketak egin ditu, hala nola 73.– artikuluarena (Hidrokarburoen gaineko Zerga) edo hogeita hamahirugarren xedapen gehigarriaren aldaketa (Hidrokarburoen gaineko Zerga nekazari eta abeltzainei itzultzea); aldaketa horiek guztiak zerrendatutako gainerako neurrien modu berean jaso behar dira, aurretik azaldutakoa betez.
Azkenik, Alderdi politikoen finantzaketari buruzko uztailaren 4ko 8/2007 Legeak salbuespen kasu bat gehiago sartu du Balio Erantsiaren gaineko Zergan, alderdi politikoek beren berariazko helburua betetzeko diru laguntza lortzekoak diren eta haien onurarako bakarrik antolatuak diren ekimenak direla medio egiten dituzten zerbitzu prestazioei eta ondasun salmentei dagokienez. Aipatu kasua Gipuzkoako zerga araudian sartu behar da derrigorrez Balio Erantsiaren gaineko Zerga ituntzeko arauei buruz lehenago azaldutakoagatik.
I. KAPITULUA
EKONOMIA ITUNA ALDATZEN DUEN URRIAREN 25EKO 28/2007 LEGERA EGOKITZEA.
1. artikulua.– Aldatzea uztailaren 4ko 7/1996 Foru Araua, Sozietateen gaineko Zergarena.
Xedapen hauek aldatu dira Sozietateen gaineko Zergaren 1996ko uztailaren 4ko 7/1996 Foru Arauan:
Bat.– 2. artikulua honela aldatu da:
"2. artikulua.– Aplikazio subjetiboaren eremua, zergaren ordainarazpena eta zerga helbidea.
1.– Ondoren aipatuko diren subjektu pasiboei aplikatuko zaie foru arau honek jasotakoa:
a) Zerga helbidea Gipuzkoan dutenei, salbu bi zirkunstantzia hauek gertatzen zaizkienei:
– Aurreko ekitaldian 7 milioi eurotik gorako eragiketa bolumena lortzea.
– Ekitaldi horretan lurralde erkidean eragiketa bolumenaren 100eko 75 edo gehiago gauzatzea.
b) Zerga helbidea lurralde erkidean dutenei, baldin eta hiru baldintza hauek betetzen badira:
– Aurreko ekitaldian 7 milioi eurotik gorako eragiketa bolumena lortzea.
– Eragiketa guztiak Euskal Autonomia Erkidegoan egitea.
– Eragiketa bolumenaren proportzio handiagoa egitea Gipuzkoan beste lurralde historikoetako bakoitzean baino.
2.– Foru arau honek jasotakoa aplikaziozkoa izango zaie interes ekonomikoko taldeei eta enpresen aldi baterako elkarteei, baldin eta haiek osatzen duten guztiak lotuta badaude edozein lurralde historikotako foru araudiari, eta zerga helbidea Gipuzkoan badute edo, lurralde erkidean izan arren, Gipuzkoan eragiketa bolumen handiagoa gauzatzen badute beste lurralde historikoetako bakoitzean baino.
Entitate horiek bazkideei egotziko diete lurralde batean zein bestean egindako eragiketetan dagokien zatia, eta bazkideek kontuan hartuko dute egotzi zaien zati hori, euren eragiketen proportzioa zehazterakoan.
3.– Foru arau honek araututako talde fiskalen tributazio erregimena aplikatu behar zaie aurreko 1.– apartatuan xedatutakoaren arabera haien sozietate nagusiari foru arau honi lotuta dauden taldeei, baldin eta menpeko sozietate guztiei edozein lurralde historikotako Sozietate Zergaren araudia aplikaziozkoa bazaie.
Hori dela eta, talde fiskaletik kanpokotzat joko dira lurralde erkideko araudiari lotutako sozietateak.
4.– Gipuzkoako Foru Aldundiak ordainaraziko du zerga:
a) Oso-osorik, zerga helbidea Gipuzkoan dutenean eta aurreko ekitaldiko eragiketa bolumena 7 milioi eurotik gorakoa izan ez denean.
b) Gipuzkoan egindako eragiketa bolumenaren arabera, baldin eta aurreko ekitaldiko eragiketa bolumena 7 milioi eurotik gorakoa izan denean.
5.– Talde fiskalek Gipuzkoan izandako eragiketa bolumenaren arabera ordainduko diote zerga Gipuzkoako Foru Aldundiari.
Ondorio horietarako, Gipuzkoan lortutako eragiketa bolumena kalkulatzeko, talde fiskaleko sozietate bakoitzak talde arteko deuseztatzeak egin aurretik lurralde horretan egin dituen eragiketak batu edo gehituko dira.
6.– Subjektu pasiboak lurralde jakin batean diharduela uste izango da lurralde horretan ondasunak saldu edo zerbitzuak ematen dituenean, ondoko artikuluan jarritako irizpideei jarraituaz.
Ondasun salmenta eta zerbitzu prestaziotzat joko dira Balio Erantsiaren gaineko Zerga araupetzen duen legerian hala definituta dauden eragiketak.
7.– Eragiketa bolumentzat honakoa joko da: subjektu pasiboak, bere jardueran egindako ondasun salmentak eta zerbitzu prestazioak direla-eta, ekitaldi batean lortutako kontraprestazioen zenbateko osoa, Balio Erantsiaren gaineko Zerga eta baliokidetasun-errekargua kenduta, halakorik badago.
Ekitaldian lurralde bakoitzean egindako eragiketen zenbatekoaren proportzioa kalkulatzeko, hurrengo artikuluko arauak erabiliko dira, eta proportzioa ehunekoetan emango da, bi zenbaki hamartarrekin biribilduta.
Aurreko ekitaldia urtebetea baino laburragoa bada, eragiketa bolumena kalkulatzeko, urte osoari dagokiona kalkulatuko da ekitaldian egindako eragiketetatik abiatuta.
8.– Ekitaldian jarduera hasi berria denean, lehenengo ekitaldian egindako eragiketen zenbatekoari begiratuko zaio, eta lehenengo ekitaldia urtebetea baino laburragoa izan bada, urte osoari dagokiona kalkulatuko da, dena ekitaldian egindako eragiketetatik abiatuta. Harik eta ekitaldi horretako eragiketak zenbatekoak izan diren eta non egin diren jakin arte, halakotzat hartuko dira, ondorio guztietarako, subjektu pasiboak aurrez kalkulatzen dituenak jardueraren hasierako ekitaldian ustez egingo dituen eragiketen arabera.
9.– Subjektu pasiboen zerga helbidea eta haien sozietatearen helbidea bat etorriko dira, baldin eta azken horretan administrazio kudeaketa eta negozioen zuzendaritza benetan zentralizatuta badaude. Bestela gertatuz gero, kudeaketa edo zuzendaritza horien tokiari kasu egingo zaio.
Aurreko irizpideen arabera ezin denean zehaztu zerga helbidea non den, entitateek zerga helbidea Gipuzkoan dutela ulertu beharko da, ibilgetuaren baliorik handiena Euskal Autonomia Erkidegoan izanik, Gipuzkoan ibilgetuaren balio handiagoa dutenean beste bi lurralde historikoetako bakoitzean baino.
10.– Kontrako frogarik izan ezik, pertsona juridikoen zerga helbidea ez dela aldatu ulertuko da baldin eta aldaketaren aurreko edo ondoko urtean batere jarduerarik egiten ez badute edo jarduerari uzten badiote."
Bi.– 132.bis artikulua aldatu da, eta honela geratu da idatzita:
"132.bis artikulua.– Zergaren ikuskaritza.
1.– Gipuzkoako Foru Aldundiak ikuskatuko zerga, subjektu pasiboak Gipuzkoan badu zerga helbidea, salbu aurreko ekitaldian 7 milioi eurotik gorako eragiketa bolumena lortu eta ekitaldi horretan eragiketa bolumenaren 100eko 75 edo gehiago lurralde erkidean egin duten subjektu pasiboak badira.
Halaber, zerga helbidea lurralde erkidean duten subjektu pasiboen ikuskapena lurraldearen arabera eskumena duen Gipuzkoako Foru Aldundiak egingo du, baldin eta subjektu pasiboak aurreko ekitaldian egindako eragiketa bolumena 7 milioi eurotik gorakoa izan eta eragiketa guztiak euskal lurraldean eginak badira, Gipuzkoan eragiketa bolumenaren proportzio handiagoa lortzen duenean beste lurralde historikoetako bakoitzean baino.
2.– Ikuskaritza lanak Gipuzkoako zerga araudiari lotuko zaizkio, gainerako administrazioekin elkarlanean aritzea eragotzi gabe.
Ikuskapen lan horien ondorioz, zorren bat jaso edo kopururen bat itzuli behar dela agertzen bada, eta zor edo kopuru hori administrazio batzuei badagokie, Gipuzkoako Administrazioak kobratu edo itzuliko du. Gero dagozkion konpentsazioak emango dizkiote batak besteari, beharrezkoa bada. Organo ikuskatzaileek euren jardunaren emaitzen berri emango diete eragindako gainerako administrazioei.
3.– Gipuzkoako Foru Aldundia ez den beste administrazio batek ikuskatzen badu, Gipuzkoako Foru Aldundiari egiaztapen eta ikerketa arloan dagozkion ahalmenak eragotzi gabe ikuskatu dela ulertuko da. Era berean, azken lan horiek ezin izango dute ondorio ekonomikorik izan zergadunengan, administrazio eskudunetako organoen lanen ondorioz egindako behin betiko likidazioei dagokienez.
4.– Administrazio eskudunak egiaztapenetan zehaztutako proportzioak bete beharko ditu subjektu pasiboak obligazio likidatuei dagokienez. Horrek ez du esan nahi egiaztapen horien ondoren bi administrazioen artean behin betiko onartzen direnak bete behar ez direnik."
2. artikulua.– Aldatzea Zergadun Ez-Egoiliarren Errentaren gaineko Zergaren 1999ko apirilaren 26ko 2/1999 Foru Araua.
Honela aldatu da Zergadun Ez-egoiliarren Errentaren gaineko Zergaren 1999ko apirilaren 27ko 2/1999 Foru Arauaren 2. artikulua:
"2. artikulua.– Aplikazio eta ordainarazpen eremua.
1.– Foru arau honetan xedatutakoa honako hauei aplikatuko zaie:
a) Lurralde espainiarrean egoiliar izan gabe establezimendu iraunkorrik gabe Gipuzkoan errentak lortzen dituzten pertsona fisikoei edo entitateei, foru arau honen 12.– artikuluan xedatutakoaren arabera.
b) Lurralde espainiarrean egoiliar izan gabe Gipuzkoan helbideratutako establezimendu iraunkorraren bitartez errentak lortzen dituzten pertsona fisikoei edo entitateei, kasu hauetan:
– Aurreko ekitaldiko eragiketa bolumena 7 milioi eurokoa edo txikiagoa denean, non jarduten diren kontuan hartu gabe.
– Aurreko ekitaldiko eragiketa bolumena 7 milioi eurokoa baino handiagoa denean eta, ekitaldi horretan, erregimen erkideko lurraldean lortutako eragiketa bolumena bolumen osoaren 100eko 75 baino txikiagoa denean.
c) Lurralde espainiarrean egoiliar ez diren pertsona fisikoei edo entitateei, baldin eta lurralde erkidean helbideratutako establezimendu iraunkor bidez errentak lortzen badituzte, aurreko ekitaldian 7 milioi eurotik gorako eragiketa bolumen lortu badute eta, eragiketa guztiak Euskal Autonomia Erkidegoan eginik, Gipuzkoan eragiketa bolumenaren proportzio handiagoa lortu badute beste bi lurralde historikoetako bakoitzean baino.
2.– Zergadunak, aukerazko erregimena aplikatu ahal izateko, Pertsona Fisikoen Errentaren gaineko Zerga ordaintzea aukeratzen duenean Ez-egoiliarren Errentaren gaineko Zergari buruzko araudian ezarritako baldintzak betetzen dituela-eta, lurralde honetako araudia hartuko da kontuan, baldin eta zergadunak lanetik eta jarduera ekonomikoetatik euskal lurraldean lortzen dituen etekinek Espainian lortzen duen errenta osoaren zatirik handiena egiten badute eta, horietatik, Gipuzkoan lortutakoak handiagoak badira beste bi lurraldeetako bakoitzean lortutakoak baino.
Zergadunak itzulketarako eskubidea duenean, Gipuzkoako Foru Aldundiak ordainduko dio itzultzekoa, kontuan hartu gabe errentak Espainiako zein lekutan lortu dituen.
3.– Gipuzkoako Foru Aldundiak ordainaraziko du zerga hau ondoko kasuotan:
a) Lurralde espainiarrean egoiliar ez diren pertsona fisikoek edo entitateek establezimendu iraunkorrik gabe lortutako errentak badira, Gipuzkoan lortutzat hartzen direnean, foru arau honetako 12.– artikuluan xedatutakoaren arabera.
b) Lurralde espainiarrean egoiliar ez diren pertsona fisikoek edo entitateek establezimendu iraunkorraren bitartez lortutako errentak badira:
a´) Oso-osorik, zerga helbidea Gipuzkoan dutenean eta aurreko ekitaldiko eragiketa bolumena 7 milioi eurotik gorakoa izan ez denean.
b´) Oso-osorik, Gipuzkoan bakarrik jarduten direnean eta aurreko ekitaldiko eragiketa bolumen osoa 7 milioi eurotik gorakoa izan denean, zerga helbidea edonon edukita ere.
c´) Gipuzkoan ekitaldiaren barruan lortutako eragiketa bolumenaren proportzioan, subjektu pasiboa lurralde horretan ez ezik beste batean ere jarduten denean, lurralde erkidea izan edo foru lurraldea izan, baldin eta aurreko ekitaldiko eragiketa bolumen osoa 7 milioi eurotik gorakoa izan bada, zerga helbidea edonon edukita ere.
4.– Subjektu pasibo bat lurralde batean edo bestean jarduten dela ulertuko da, horietan ondasunak saldu edo zerbitzuak ematen dituenean Sozietateen gaineko Zergari buruzko uztailaren 4ko 7/1996 Foru Arauak 2.bis artikuluan finkatutako irizpideei jarraituaz.
Ondasun salmenta eta zerbitzu prestaziotzat joko dira Balio Erantsiaren gaineko Zergari buruzko legerian hala definituta dauden eragiketak.
5.– Eragiketa bolumentzat honakoa joko da: subjektu pasiboak, bere jardueran egindako ondasun salmentak eta zerbitzu prestazioak direla-eta, ekitaldi batean lortutako kontraprestazioen zenbateko osoa, Balio Erantsiaren gaineko Zerga eta baliokidetasun-errekargua kenduta, halakorik badago.
Ekitaldian lurralde bakoitzean egindako eragiketa bolumenaren proportzioa zehazteko, Sozietateen gaineko Zergaren uztailaren 4ko 7/1996 Foru Arauak 2.bis artikuluan jasotako arauak aplikatuko dira. Era berean, bi zenbaki hamartarrez biribildutako portzentajean adieraziko da proportzioa.
Aurreko ekitaldia urtebetea baino laburragoa bada, eragiketa bolumena zehazteko, urte osoari dagokiona kalkulatuko da ekitaldian egindako eragiketetatik abiatuta.
6.– Ekitaldian jarduera hasi berria denean, ekitaldi horretan egindako eragiketa bolumenari begiratuko zaio, eta, lehenengo ekitaldia urtebetea baino laburragoa izan bada, urte osoari dagokiona kalkulatuko da, dena ekitaldian egindako eragiketetatik abiatuta. Harik eta ekitaldi horretako eragiketak zenbatekoak izan diren eta non egin diren jakin arte, halakotzat hartuko dira, ondorio guztietarako, subjektu pasiboak aurrez kalkulatzen dituenak, jardueraren hasierako ekitaldian ustez egingo dituen eragiketen arabera."
3. artikulua.– Aldatzea abenduaren 29ko 102/1992 Foru Dekretua, Gipuzkoako Lurralde Historikoko zerga araudia Balio Erantsiaren gaineko Zergaren abenduaren 28ko 37/1992 Legearen xedapenetara egokitzen duena.
Aldaketa hauek egin zaizkio xedapenak 1992ko abenduaren 29ko 102/1992 Foru Dekretuari, hain zuzen Gipuzkoako lurralde historikoaren zerga araudia Balio Erantsiaren gaineko Zergaren abenduaren 28ko 37/1992 Legera egokitzen duenari:
Bat.– 2.bis artikuluaren lehen eta bigarren apartatuak honela geratu dira idatzita:
"Bat.– Balio Erantsiaren gaineko Zerga Gipuzkoako Foru Aldundiak ordainaraziko du ondorengo arauei egokiturik:
1.– Subjektu pasiboek aurreko urtean izan duten eragiketa bolumen osoak 7 milioi euro gainditzen ez duenean, eta beren zerga helbidea Gipuzkoako Lurralde Historikoan kokatuta dagoenean, Foru Aldundi honi ordainduko diote beti zerga, beren eragiketen lekua edozein dela ere.
2.– Subjektu pasiboak Gipuzkoan bakarrik aritzen badira eta aurreko urtean izan duten eragiketa bolumen osoa 7 milioi eurotik gorakoa bada, Gipuzkoako Foru Aldundiari ordainduko diote zerga osoa, zerga helbidea non duten kokatuta kontuan hartu gabe.
3.– Subjektu pasiboa Gipuzkoan eta, gainera, beste lurralde batean edo batzuetan jarduten denean eta aurreko urteko eragiketa bolumen osoa 7 milioi eurotik gorakoa izan denean, Gipuzkoako Foru Aldundiari ordainduko dio zerga, Gipuzkoan lortutako eragiketa bolumenaren proportzioan, artikulu honetan jasotako harreman guneen arabera zehaztuta, kontuan hartu gabe non kokatua duen zerga helbidea.
Bi.– Eragiketa bolumen osoa hauxe izango da: ondasunak saltzean eta zerbitzuak ematean subjektu pasiboak lortu dituen kontraprestazioen zenbatekoa, Balio Erantsiaren gaineko Zerga eta, halakorik badago, baliokidetasun errekargua alde batera utzita.
Jardueran hasi berriak direnen kasuan, 7 milioi euroko kopurua zenbatzeko, lehen urte naturalean egindako eragiketa bolumena hartuko da kontuan.
Jardueran emandako lehenengo urtea bat ez badator urtebete naturalarekin, kopuru hori zenbatzeko, jardueraren hasieratik egindako eragiketatik abiatuko da urte osokoa kalkulatzeko."
Bi.– 167. artikulua honela geratu da idatzita:
"167. artikulua.– Zergaren likidazioa.
Bat.– Subjektu pasiboek Ogasun eta Finantzetako foru diputatuak ezartzen duen lekuan, moduan, epeetan eta inprimakietan zehaztu eta ordaindu beharko dute zerga zorra, ondorengo apartatuan xedatutakoa salbu.
Bi.– Ondasun inportazioetan, arantzel eskubideei buruzko aduana legeriak aurreikusten duen moduan likidatuko da Zerga.
Hiru.– Soilik Gipuzkoako Foru Aldundian aitorpen-likidazioa honako hauek aurkeztu beharko dute:
1.ª Zerga helbidea Gipuzkoan izanik eta eragiketak nonahi eginda ere, aurreko urtean egindako eragiketa bolumen osoa 7 milioi eurotik gorakoa izan ez duten subjektu pasiboak.
2.ª Zerga helbidea nonahi izanda ere eragiketa guztiak Gipuzkoako lurralde historikoan egiten dituztelarik, aurreko urtean egindako eragiketa bolumen osoa 7 milioi eurotik gorakoa izan duten subjektu pasiboak.
3.ª Zerga helbidea Gipuzkoan duten subjektu pasiboak, eragiketak nonahi eginda ere eta horien zenbatekoa dirutan edozein izanda ere, ondorengo jarduerei dagokienean:
a) Nekazaritza, basogintza, abeltzaintza edo arrantzako ustiapenek edo arrantzontzien armadoreek egindako produktu salmentak, baldin eta eraldatzeko prozesurik jasan ez duten produktu naturalak badira eta labore, ustiapen edo harrapaketetatik badatoz zuzenean.
b) Garraio zerbitzuak, bai eta etxez aldatzeko zerbitzuak, atoi zerbitzuak edo garabi zerbitzuak ere.
c) Garraiobideen alokatzeak.
4.ª Balio Erantsiaren gaineko Zergatik erabat salbuetsitako edo zergapetu gabeko eragiketak egiten dituzten partikularrak edo pertsonak edo entitateak, batasun barruan garraiobide berriak eskuratzeagatik, garraiobide horiek Gipuzkoako lurralde historikoan behin betiko matrikulatzen direnean.
5.ª Aurreko zenbakian xedatutakoa eragotzi gabe, zergaren kenkari eskubide osoa edo partziala sortarazten ez duten eragiketak soilik egiten dituzten subjektu pasiboak, baita enpresari edo profesional gisa jarduten ez diren pertsona fisikoak ere, hala nahi dutelako edo foru dekretu honetako 14.– artikuluaren bi apartatuan ezarritako muga kuantitatiboak gainditu dituztelako zergapetuta dauden batasun barruko ondasunak eskuratzeagatik, beren zerga helbidea Gipuzkoan kokatua dutenean.
6.ª Erregimen erraztuari, nekazaritza, abeltzaintza eta arrantzaren erregimenean eta baliokidetasun errekarguaren erregimenari lotuta dauden subjektu pasiboak, beraiek egiten dituzten batasun barruko ondasunen eskurapenengatik, beren zerga helbidea Gipuzkoan kokatua dutenean.
Lau.– Gipuzkoako Foru Aldundiari eta jarduten diren lurraldeetako zerga administrazioei aurkeztu beharko diete aitorpen-likidazioa aurreko urtean egindako eragiketa bolumena 7 milioi eurotik gorakoa izan duten subjektu pasiboek, Gipuzkoan eta beste lurralde batean edo batzuetan jarduten direnean.
Ondorio horietarako, honako arau hauek beteko dira:
1.ª Subjektu pasiboa lurralde bat baino gehiagotan jarduten denean eta bere eragiketa bolumenari dagokionez administrazio bat baino gehiagori zerga ordaindu behar dionean, zergaren likidazioaren emaitza administrazio eskudunei egotziko zaie kontraprestazioen bolumenaren proportzioan, Balio Erantsiaren gaineko Zerga kanpoan dela. Bolumen hori kargapeko ondasun salmentei eta zerbitzu prestazioei eta kenkari eskubidea sortzen duten eragiketa salbuetsi horiei dagokie, urte natural bakoitzean zehar lurralde horietan egin direnean.
2.ª Urte natural bakoitzean behin-behin-behinik aplikatu behar diren proportzioak aurreko urteko eragiketen arabera zehaztuko dira.
Jarduera hasten den urte naturaleko likidazio-aldietan behin-behinik aplikatu behar den proportzioa subjektu pasiboak berak kalkulatuko du, bere ustez lurralde bakoitzean egingo dituen eragiketak kontuan hartuta. Hala ere, amaieran erregularizazioa egingo da.
Aurreko paragrafoan jasotakoa jasota ere, bestelako proportzio bat aplikatu ahal izango da kasu hauek direla-eta:
a) Aktiboak bategitea, bereiztea eta ekartzea.
b) Lurralde erkidean edo foru lurraldean jarduera hastea, jarduerari uztea, hura zabaltzea edo murriztea, baldin eta horren ondorioz nabarmen aldatzen bada 2.– arau honen lehenengo paragrafoan azaldutako irizpideari jarraituz kalkulatutako proportzioa.
Nolanahi, aldakuntza nabarmena dela uste izango da lurraldeetariko edozeini aplikatu beharreko proportzioak ehuneko 15 gora edo behera, gutxienez, egiten duenean.
Bestelako proportzio bat aplikatzeko, aldez aurretik subjektu pasiboak jakinarazi beharko dio Ekonomia Itunak III. kapituluko 2. sekzioan jasotzen duen Araudia Koordinatu eta Ebaluatzeko Batzordeari, foru administrazioei eta administrazio erkideari ordaindu behar zaienean zerga. Aitzitik, foru administrazioei bakarrik ordaindu behar zaienean zerga, subjektu pasiboari buruzko ikuskapenerako eskumena duen administrazioari egin beharko zaio komunikazioa.
3.ª Urte natural bakoitzeko zergaren azken aitorpen-likidazioan, subjektu pasiboak aldi horretan egin dituen eragiketen arabera kalkulatuko ditu behin betiko proportzioak, eta administrazio bakoitzarekin batera aurreko likidazioaldietan egindako aitorpenak erregularizatuko ditu.
4.ª Subjektu pasibo horiek aurkezten dituzten aitorpen-likidazioetan, betiere, administrazio bakoitzaren aurrean ateratzen diren aplikaziozko proportzioa eta kuotak agertu beharko dira.
Bost.– Batasun barruan egindako salmenta eta erosketen aitorpen laburtzaileak, hain zuzen ere, subjektu pasiboari egiaztapenak eta ikerketak egiteko eskumena daukan zerga administrazioan aurkeztu beharko dira.
Sei.– Zergaren ikuskapena honako irizpide hauen arabera egingo da:
1.– Gipuzkoako Zerga Ikuskaritza arduratuko da ikuskapenaz, kasu hauetan:
a) Subjektu pasiboak Gipuzkoako Foru Aldundian bakarrik zergapetuta daudenean.
b) Subjektu pasiboak lurralde desberdinetan egindako eragiketa bolumenaren proportzioan zergapetuta daudenean eta zerga helbidea Gipuzkoan dutenean, eragotzi gabe Estatuko Administrazioarekin lankidetzan jardutea lurralde erkidean eragiketak egiten badituzte. Ikuskapenak ondorioak izango ditu administrazio eskudun guztien aurrean, haiei dagokien tributazio proportzioa sartuta.
Aurreko paragrafoan xedatutakoa xedatuta ere, subjektu pasiboak aurreko ekitaldian eragiketen 100eko 75 edo gehiago lurralde erkidean egina badu, zehaztutako harreman guneen arabera, eskumena Estatuko Administrazioarena izango da, foru aldundi honek laguntza eman badezake ere.
Ikuskapen lan horien ondorioz, zorren bat ordaindu edo kopururen bat itzuli behar dela agertzen bada, eta zor edo kopuru hori administrazio batzuei badagokie, Gipuzkoako Administrazioak kobratu edo itzuliko du, eragotzi gabe administrazioen arteko bidezko konpentsazioak. Organo ikuskatzaileek euren jardunaren emaitzen berri emango diete eragindako gainerako administrazioei.
2.ª Gipuzkoako Foru Aldundia ez den beste administrazio batek ikuskatzen badu, Gipuzkoako Foru Aldundiari egiaztapen eta ikerketa arloan dagozkion ahalmenak eragotzi gabe ikuskatu dela ulertuko da. Era berean, azken lan horiek ezin izango dute ondorio ekonomikorik izan zergadunengan, administrazio eskudunetako organoen lanen ondorioz egindako behin betiko likidazioei dagokienez.
3.ª Administrazio eskudunak egiaztapenetan ezarritako proportzioak subjektu pasiboak bete beharko ditu, obligazio likidatuei dagokienez. Horrek ez du esan nahi administrazio eskudunen artean behin betiko zehazten dituztenak bete behar ez direnik, hala ere.
Zazpi.– Entitate taldearen erregimen berezira bildutako entitateak aurreko apartatuetan jasotako arauak aplikatuz zergapetuko dira, berezitasun hauek kontuan hartuz:
Lehenengoa.– Entitate nagusia lurralde historiko honetako ikuskaritza organoei lotuta dagoenean, taldetik kanpokotzat hartuko dira aurreko seigarren apartatuan jasotako arauei jarraituz lurralde erkideko ikuskaritza organoek ikuskatzekoak diren menpeko entitateak.
Bigarrena.– Entitate taldea osatzen duten entitateek banakako tributazioko erregimenerako ezarritako autolikidazioa aurkeztuko dute, foru dekretu honek jasotako arau orokorrei jarraituz. Zergaren arauak banaka aplikatuz ateratzen diren zenbatekoak jasoko dira aipatu autolikidazioan, hala badagokio, entitate taldeko erregimen bereziaren arauak barne hartuta.
Taldea osatzen duen entitate bakoitzak banaka kalkulatuko du zerga administrazio bakoitzari egoztekoa den autolikidazioaren emaitza. Horretarako, foru dekretu honek artikulu honetan eta 2.bis artikuluan jasotako gainerako arauak aplikatuko ditu.
Hirugarrena.– Autolikidazio metatuetan konputatzekoak diren zenbatekoak zehazteko, aurreko arauari jarraituz kalkulatu diren eta foru aldundi bakoitzari edo Estatuko Administrazioari dagozkion emaitzak batuko dira. Zerga administrazio desberdinei dagozkien kopuruak ezin dira metatu.
Laugarrena.– Entitate nagusien berariazko obligazioak zerga administrazioen aurrean bete behar dira, taldeko entitateak haien lurraldean aritzen badira.
Zortzi.– Arauz erabakiko dira zerga obligazioak betetzen direla ziurtatzeko bidezkoak diren bermeak."
4. artikulua.– Aldatzea martxoaren 3ko 20/1998 Foru Dekretua, Gipuzkoako lurralde historikoaren zerga araudia Zerga Berezien abenduaren 28ko 38/1992 Legearen xedapenetara egokitzen duena.
Aldaketa hauek egin zaizkio 1998ko martxoaren 3ko 20/1998 Foru Dekretuari, Gipuzkoako lurralde historikoaren zerga araudia Zerga Berezien abenduaren 28ko 38/1992 Legearen xedapenetara egokitzen duenari:
Bat.– Honela idatzita geratu da 1. artikulua:
"1. artikulua.– Zerga Berezien izaera.
1.– Foru dekretu honetan araututa dauden zerga bereziak zeharkako tributuak dira. Kontsumo jakin batzuk zergapetzen dituzte, eta fase bakarrean estatuaren lurralde esparruan ondasun jakin batzuk fabrikatzea, inportatzea eta, hala badagokio, sartzea kargatzen dute, bai eta garraiobide jakin batzuk matrikulatzea eta ikatza kontsumitzeko saltzea ere, foru dekretu honetako arauei jarraiki.
2.– Zerga berezitzat hartuko dira Fabrikazio Zerga Bereziak eta Zenbait Garraiobideren gaineko Zerga Berezia eta Ikatzaren gaineko Zerga Berezia."
Bi.– Honela idatzita geratu da 2. artikulua:
2. artikulua.– Aplikazio esparrua.
1.– Zerga bereziak Gipuzkoako lurralde historikoan exijituko dira, foru dekretu honetan xedatutakoaren arabera, Ekonomia Itunaren 5.– artikuluan lehenengo atalean eta Estatu espainiarrak sinatu eta baieztatu edo atxikimendua eman dien nazioarteko itun eta hitzarmenetan jasotakoa eragotzi gabe.
2.– Gipuzkoako Foru Aldundiak ordainaraziko ditu zerga bereziak, arau hauei jarraituz:
a) Fabrikazio Zerga Bereziak: sortzapena Gipuzkoako lurralde historikoan gertatzen denean.
b) Zenbait Garraiobideren gaineko Zerga Berezia: garraiobideen behin betirako matrikulazioa Gipuzkoako lurralde historikoan egiten denean.
Matrikulazioa, alor horri buruz indarrean dagoen araudian jasotako irizpideen arabera egingo da. Nolanahi ere, pertsona fisikoek Gipuzkoako lurralde historikoan matrikulatuko dute garraiobidea, zerga helbidea bertan dutenean.
c) Ikatzaren gaineko Zerga Berezia, sortzapena Gipuzkoan gertatzen denean."
Hiru. Hirugarren titulua gehitu da. Hona edukia:
"HIRUGARREN TITULUA
IKATZAREN GAINEKO ZERGA BEREZIA
78. artikulua.– Eremu objektiboa.
1.– Zerga honen ondorioetarako, ikatza direla jotzen dira Kontseiluaren 1987ko uztailaren 23ko 2658/87 Erregelamenduak (EEE) jasotako aduana eta estatistika nomenklaturaren 2701, 2702, 2704, 2708, 2713 eta 2714 kodeetan sartuta dauden produktuak. Aurrerantzean, "Nomenklatura konbinatua" esango zaio.
2.– Nomenklatura konbinatuaren egitura aldatzen denean, foru dekretu honek 18.2 artikuluan jasotakoa aplikatuko da.
79. artikulua.– Aplikazioko lurralde eremua.
1.– Ikatzaren gaineko Zerga Berezia Gipuzkoako lurralde historikoan exijituko da foru dekretu honek xedatutakoaren arabera.
2.– Nazioarteko hitzarmen eta itunduetan jasotakoa eragotzi gabe ulertuko da aurreko paragrafoan xedatutakoa.
80. artikulua.– Zerga-gaia.
1.– Ikatza kontsumitzeko saltzea zergapetuta dago.
2.– Aurreko apartatuan jasotakoaren ondorioetarako, "kontsumitzeko saltzea" direla jotzen dira eragiketa hauek:
a) Foru dekretu honek 4.– artikuluan definitutako barruko lurralde eremuan egiten den lehendabiziko salmenta edo ematea, baldin eta ikatza atera, inportatu edo Batasun barruan erosi ondoren egiten bada. Lehen salmenta edo ematea direla joko dira, era berean, ikatza berriro saltzera zuzentzen duten eta foru dekretu honek 82.1 artikuluan araututako salbuespena aplikaziozkoa izan zaien enpresariek egiten duten ondorengo salmenta edo emateak.
b) Ikatzaren autokontsumoa. Xedapen honen ondorioetarako, autokontsumotzat hartzen da aurreko letran aipatutako ekoizle edo erauzleek, inportatzaileek, batasun barruko erosleek edo enpresariek egiten duten ikatzaren erabilpena edo kontsumoa.
3.– Ikatza kontsumitzeko saldu dela joko da subjektu pasiboek ekoiztu, inportatu edo erosi den ikatza zertan erabili duten frogatzen ez dutenean.
81. artikulua.– Zergari lotu gabeko kasuak.
1.– Ez dira zergari lotuta egongo ekoizleak edo erauzleak, inportatzaileak edo batasun barruko erosleak foru dekretu honek 4.0 artikuluan jasotako barruko lurralde eremutik kanpoko destino batera zuzenean igortzea dakarten salmentak edo emateak.
2.– Aurreko 1. apartatuan jasotakoa eraginkorra izango bada, baldintza hauek bete behar dira:
a) Igorpena foru dekretu honek 4.1 artikuluan jasota dagoen eta foru dekretu honen 4.0 artikuluko lurralde eremutik kanpokoa den "Batasunaren lurralde eremura" egiten bada, merkantzia igortzen duen enpresariak frogatu behar du, horrela eskatzen zaionean, ikatzaren jasotzailea dena delako estatu kidean horretarako erregistratutako enpresa dela, estatu kide horrek ezarritako araudiari jarraituz, eta hartzaileak ikatza jaso duela. Kanarietako Autonomia Erkidegora egindako ikatz igorpenak ondorengo letran xedatutakoari jarraituz arautuko dira.
b) Baldin eta igorpena aurreko letran jasotakoa ez den zergaren aplikazioko lurralde eremutik kanpoko destino batera egiten bada, igortzen duen enpresariak ikatzaren inportazioa frogatu beharko du aduanako dokumentazioaren bidez edo, hala badagokio, Kanarietako Autonomia Erkidegora igorriz.
3.– Ez da zergari lotuta egongo ekoizleek edo erauzleek ekoizpen edo erauzpen instalazioen barruan zuzenean jarduera horiei lotuta ikatza autokontsumitzea.
82. artikulua.– Salbuespenak.
1.– Salbuetsita dago foru dekretu honek 4.0 artikuluan jasotako barruko lurralde eremuan ikatza berriro saltzera zuzentzen duten enpresariei egindako lehen salmenta edo ematea.
2.– Salbuetsita dago erositako ikatza zergaren aplikazioko lurralde eremutik kanpora igortzera zuzentzen duten enpresariei egindako lehen salmenta edo ematea. Salbuespen hau eraginkorra izango bada, foru dekretu honek 81.2 artikuluan jasotako baldintzak bete behar dira.
Dena den, horrela erositako ikatza foru dekretu honek 4.0 artikuluan definitutako barruko lurralde eremuan kontsumitzera zuzentzen bada, ikatza destino horretara aplikatzen den unean joko da lehen salmenta edo ematea egin dela.
3.– Zergatik salbuetsita daude ikatza kontsumitzeko saltzea dakarten eragiketak, ikatzari erabilpen hauek ematen zaizkionean:
a) Energia elektrikoa sortzea eta elektrizitatea eta beroa kogeneratzea.
b) Erredukzio kimikoa, eta prozesu elektrolitikoak eta metalurgikoak.
c) Prozesu mineralogikoak. Prozesu mineralogikotzat hartzen dira Kontseiluaren 1990eko urriaren 9ko 3037/90 Erregelamenduak (EEE) ezarritako NACE nomenklaturako DI 26 kodean sailkatutakoak ("metalezkoak ez diren beste produktu mineral batzuen industriak").
d) Erregai gisa, etxe eta egoitzetako kontsumoaren eremuan. Ikatzari erabilpen hori ematen zaiola joko da industriakoak ez diren amaierako kontsumitzaileei saldu edo ematen zaienean.
e) Errekuntza ez dakarren edozein prozesu.
83. artikulua.– Kuotak itzultzea.
1.– Aurrez ordaindu diren Ikatzaren gaineko Zergaren kuotak itzultzeko eskubidea izango dute foru dekretu honek 4.0 artikuluan definitutako barruko lurralde eremutik kanpoko destino batera ikatza igortzen duten enpresariek.
2.– Kuotak itzuliko badira, baldintza hauek bete behar dira:
a) Benetan igorri izana foru dekretu honek 81.2 artikuluan jasotakoaren arabera frogatuko da.
b) Itzultzeko eskatzen diren kuotak aurrez ordaindu izana aitorpen-likidazioan jasotako interesatuarentzako alea aurkeztuta frogatuko da. Dena den, ikatza igortzen duen enpresaria subjektu pasiboa edo ordaintzera behartutako erantzulea ez denean, kuotak ordaindu izana kuotak aipatu enpresariari ordainarazi zaizkiola jasotzen duen fakturaren bidez frogatuko da.
3.– Itzultzen diren kuoten zenbatekoa eta jasandako kuoten zenbatekoa berberak izango dira. Dena den, zenbateko hori zehatz-mehatz mugatzea ezinezkoa denean, kuotak zehazteko, itzulketa eskubidea dakarren eragiketaren data baino hiru hilabete lehenago indarrean dagoen tasa aplikatuko da.
4.– Itzulketa behin-behinik baimendu daiteke. Behin-behineko itzulketak behin betikoak izango dira Zerga Ikuskaritzak egindako egiaztapenaren ondorioz edo, bestela, haiek lau urteko epean egiaztatu ez direnean itzulketa eskubidea dakarren eragiketaren datatik aurrera.
84. artikulua.– Subjektu pasiboak.
1.– Zergaren subjektu pasiboak dira zergari lotutako salmenta edo emateak edo autokontsumo eragiketak egiten dituzten ekoizle edo erauzleak, inportatzaileak edo batasun barruko erosleak.
2.– Foru dekretu honek 82.2 artikuluaren bigarren paragrafoan araututako kasuetan, subjektu pasiboak izango dira ikatza erosten duten eta foru dekretu honek 4.0 artikuluan definitutako barruko lurralde eremuan kontsumitzera zuzentzen duten enpresariak.
85. artikulua.– Zerga sortzea.
1.– Ikatza erosleen eskura jartzen den unean edo, hala badagokio, autokontsumitzen den unean sortuko da zerga.
2.– Foru dekretu honek 80.3 artikuluan jasotako kasuetan, ikatzari emandako erabilpena justifikatu gabe dagoela egiaztatzen den unean sortuko da zerga.
3.– Foru dekretu honek 82.2 artikuluaren bigarren paragrafoan araututako kasuetan, ikatza foru dekretu honek 4.0 artikuluan definitutako barruko lurralde eremuan kontsumitzera zuzentzen den unean sortuko da zerga.
86. artikulua.– Oinarri ezargarria.
1.– Zergaren oinarri ezargarria zergapeko eragiketei lotutako ikatzaren energia ahalmena izango da, gigajouletan neurtuta (GJ).
2.– Oinarri ezargarria zuzeneko zenbatespenaren erregimenean zehaztuko da. Oinarri ezargarriaren zeharkako zenbatespena martxoaren 8ko 2/2005 Foru Arauak, Gipuzkoa Zergen Foru Arau Orokorrak, jasotako kasuetan eta moduan aplikatuko da.
87. artikulua.– Zerga tasa.
Zergaren tasa 0,15 euro izango da gigajoule bakoitzeko.
88. artikulua.– Zerga ordainaraztea.
1.– Subjektu pasiboek, hala badagokio, sortutako kuoten zenbatekoa ordainarazi behar diete ikatz erosleei, eta horiek jasatera behartuta daude.
2.– Indarrean dagoen araudiari jarraituz zergapeko eragiketa fakturan edo agiri baliokidean dokumentatu behar denean, sortutako kuotak agiri horretan ordainaraziko dira hartan jasotako gainerako kontzeptuetatik bereizita. Zergari lotuta edo horretatik salbuetsita dauden eragiketak direnean, aldiz, zirkunstantzia hori agirian aipatuko da, foru dekretu honek onura horren aplikazioa zein xedapenetan oinarritzen duen adierazita.
89. artikulua.– Kudeaketa arauak.
1.– Subjektu pasiboak behartuta daude sortutako kuoten aitorpen-likidazioa hiru hilean behin aurkeztera eta aldi berean zerga zorra ordaintzera. Obligazio hori ez zertan bete dena delako zergaldian ordaintzeko kuotarik ez dagoenean.
2.– Subjektu pasiboak behartuta daude, era berean, zergaren eremu objektiboan jasotako produktuei dagokienez egindako eragiketen urteko aitorpen laburtzaile bat aurkeztera.
3.– Ogasun eta Finantza diputatuak aurreko apartatuan aipatutako aitorpenak aurkezteko ereduak, epeak, beharkizunak eta baldintzak ezarriko ditu.
90. artikulua.– Urraketak eta zigorrak.
Zerga honen urraketak 2005eko martxoaren 8ko 2/05 Foru Arauak, Gipuzkoako Zergen Foru Arau Orokorrak, xedatutakoaren arabera sailkatu eta zigortuko dira."
II. KAPITULUA
ESTATUAREN 2008KO AURREKONTU OROKORREI BURUZKO 2007KO ABENDUAREN 26KO 51/07LEGERA EGOKITZEA
5. artikulua.– Aldatzea martxoaren 3ko 20/1998 Foru Dekretua, Gipuzkoako lurralde historikoaren zerga araudia Zerga Bereziei buruzko abenduaren 28ko 38/1992 Legearen xedapenetara egokitzen duena.
Honela aldatu da 1998ko martxoaren 3ko 20/1998 Foru Dekretua, Gipuzkoako lurralde historikoaren zerga araudia Zerga Bereziei buruzko abenduaren 28ko 38/1992 Legearen xedapenetara egokitzen duena:
Bat.– Honela aldatuta geratu da 50.1 artikuluan jasotako bigarren tarifaren 2.13 epigrafea:
"2.13 epigrafea.– NC 2711.29.00 kodean sailkatutako hidrokarburo gaseosoak eta NC 2705 kodean sailkatutako produktuak, karburantez bestelako erabilera dutenak; motor estazionarioetarako karburante gisa erabilitako biogasa: 1.10 epigraferako ezarritako tasa.
Epigrafe hau aplikatzeko, biogasatzat hartzen da biomasatik edota hondakinen zati batetik abiatuta sortutako erregai gaseosoa, harik eta gas naturalaren kalitatatearen antzekoa lortu arte araztu daitekeena, biokarburante gisa erabiltzekoa, edo, bestela, egurretik abiatuta sortutako gasa."
Bi.– 70. artikuluko 1.– eta 2.– apartatuak honela geratu dira idatzita:
"1.– Ondokoak egongo dira zergapetuta:
a) Zirkulatzeko motorrez eragindako ibilgailu berri edo erabiliak Espainian lehen aldiz behin betiko matrikulatzea. Hona salbuespenak:
1.ª Kontseiluak 1970eko otsailaren 6an Ibilgailu motordunen eta horien atoien homologazioari dagokionez estatu kideak hurbiltzeari buruz onartutako 70/156/EEE Zuzentarauaren II. eranskinaren 2007ko ekainaren 30ean indarrean dagoen testuan jasotako N1, N2 eta N3 kategorietan jasotako ibilgailuak, baldin eta N1 kategoriakoak jarduera ekonomiko bati modu nabarmenean atxikita badaude. Ibilgailua jarduera ekonomiko bati modu nabarmenean atxikita dagoela joko da, Gipuzkoako zerga araudia Balio Erantsiaren gaineko Zergaren abenduaren 28ko 37/1992 Legearen xedapenetara egokitzen duen abenduaren 29ko 102/1992 Foru Dekretuak jasotakoaren arabera subjektu pasiboak eskubidea badu Balio Erantsiaren gaineko Zergatik gutxienez ibilgailuaren erosketa edo inportazioa dela-eta jasan edo ordaindutako kuoten % 50 kentzeko. Ondorio horietarako, ez da garrantzitsua izango foru dekretu horretako arauetatik eratorritako kenkarirako eskubidearen beste edozein murrizpen aplikatzea.
Dena den, zergari lotuta geratuko da ibilgailu horiek lehen aldiz Espainian behin betiko matrikulatzea, etxebizitza gisa erabiltzeko egokitzen direnean.
2.ª Aurreko 1.– zenbakian aipatutako testu berean ezarrita dauden m2 eta m3 kategorietan jasotako ibilgailuak, eta tranbiak.
3.ª Objetiboki kontuan hartuta, industria, merkataritza, nekazaritza, klinika edo zientzia aplikaziorako soilik direnak, betiere Zerga Administrazioak serieko modeloak edo ibilgailuak banan-banan behar bezala homologatu baditu. Ondorio horietarako, edozein altueratako erabilera anitzeko furgoi eta furgonetak bakarrik aipatu aplikazioren bat dutela ulertuko da, baldin eta gidariarentzat eta laguntzailearentzat eserleku bana baino ez badute, eserleku gehigarririk edo horiek jartzeko euskarririk ez badute eta kargarako gordetako espazioak alboko ikusgaitasunik ez badu eta barruko bolumenaren 100eko 50etik gorakoa bada.
4.ª Bizpahiru gurpileko ziklomotorrak.
5.ª Motozikletak eta kuatrizikloak ez diren hiru gurpileko ibilgailuak, baldin eta bi kasuetan zilindrada ez bada 250 zentrimetro kubikotik gorakoa, barne errekuntzako motorrak izanez gero, edo gehieneko potentzia garbia ez bada 16 kW-tik gorakoa, gainerako motorretan.
6.ª Mugikortasun mugatua duten pertsonentzako ibilgailuak.
7.ª Ibilgailu bereziak, non eta ez diren 75.1 artikuluaren 4.– epigrafean definitutako "quad" moduko ibilgailuak.
8.ª Ibilgailu moldagarriak, karrozeriaren sabaiaren zati estrukturaletik lurzoruraino doan altura osoa 1.800 milimetrotik gorakoak dituenak, baldin eta lur orotariko ibilgailuak ez badira eta jarduera ekonomiko bati modu nabarmenean atxikita badaude. Ibilgailua jarduera ekonomiko bati modu nabarmenean atxikita dagoela joko da, Gipuzkoako zerga araudia Balio Erantsiaren gaineko Zergaren abenduaren 28ko 37/1992 Legearen xedapenetara egokitzen duen abenduaren 29ko 102/1992 Foru Dekretuak jasotakoaren arabera subjektu pasiboak eskubidea badu Balio Erantsiaren gaineko Zergatik gutxienez ibilgailuaren erosketa edo inportazioa dela-eta jasan edo ordaindutako kuoten 100eko 50 kentzeko. Ondorio horietarako, ez da garrantzitsua izango foru dekretu horretako arauetatik eratorritako kenkarirako eskubidearen beste edozein murrizpen aplikatzea.
Dena den, zergari lotuta geratuko da ibilgailu horiek lehen aldiz Espainian behin betiko matrikulatzea, etxebizitza gisa erabiltzeko egokitzen direnean.
9.ª Indar armatuek, estatuko, autonomia elkarteetako eta udaletako segurtasun gorputz eta indarrek eta aduana zaindariek defentsa, zaintza eta segurtasun eginkizunetan erabiltzera destinatutako ibilgailuak.
10.ª Zauritutakoak edo gaixoak lekualdatzeko egokitutako anbulantziak eta, beren ezaugarriak direla-eta, autobide eta errepideetan zaintza eta sorospen lanak egiteko soilik erabil daitezkeen ibilgailuak.
b) Zortzi metroko luzera baino handiagoa duten aisirako edo kirolerako urontzi eta itsasontzi berri edo erabiliak lehen aldiz behin betiko matrikulatzea ontzien matrikula erregistroan, arrunta izan edo berezia izan, edo, erregistro horretan ezin badira erregistratu, dena delako kirol federazioko erregistroan lehen aldiz matrikulatzea.
Nolanahi, luzera edozein izanik ere, zergari lotuko zaio 75.1 artikuluaren 4.– epigrafean definitutako uretako motoak lehen aldiz matrikulatzea.
Luzera hau hartuko da kontuan: Aisiako urontziak ontzien matrikula erregistroko zazpigarren zerrendan banderapean jarri eta matrikulatzeko jardunari buruzko 2007ko apirilaren 27ko 544/07 Errege Dekretuak halakotzat hartutakoa (2007ko ekainaren 30ean indarrean dagoen bertsioa).
Aisirako edo uretako kirolerako urontzi eta ontzitzat hartuko dira:
1.ª Ontzien matrikula erregistro arrunt edo bereziko sei edo zazpigarren zerrendan izena ematen zaien urontziak edo, hala badagokio, dena delako kirol federazioko erregistroan izena ematen zaienak.
2.ª Aurreko 1.– paragrafoan aipatutakoak ez diren urontziak, baldin eta aisirako nabigazio pribaturako erabiltzen badira, foru dekretu honek 4.– artikuluaren 13.– apartatuan definitutakoaren arabera.
c) Motor mekanikoz hornitutako hegazkin, hegazkin txiki eta gainerako aireontzi berri edo erabiliak lehen aldiz behin betiko matrikulatzea aireontzien erregistroan. Hona salbuespenak:
1.ª Beren ezaugarri teknikoak direla-eta nekazaritza edo basoko lanetara edo gaixo eta zaurituak eramateko erabil daitezkeen aireontziak.
2.ª Abiazio Zibileko Zuzendaritza Orokorrak emandako ziurtagiriaren arabera, aireratzerakoan 1.550 kilogramoko gehienezko pisua gainditzen ez duten aireontziak.
d) Zergari lotuta egongo da aurreko apartatuetan aipatutako garraiobideak Espainian zirkulatzea edo erabiltzea, foru dekretu honek xedapen gehigarri bakarrean aurreikusitakoaren arabera Gipuzkoako lurralde historikoan behin betiko matrikulatzea eskatu ez denean, Espainian erabiltzen hasi ondorengo 30 eguneko epearen barruan. Epe hori 60 egunera zabalduko da, garraiobideak beren titularraren ohiko bizilekua lurralde espainiarrera aldatzearen ondorioz Espainian erabiltzen direnean, baldin eta foru dekretu honek 71.– artikuluaren 1.l) artikuluan jasotako salbuespena aplikaziozkoa bada.
Ondorio horietarako, egun hauetan garraiobidea Espainian zirkulatzen edo erabiltzen hasi dela ulertuko da:
1.ª Aldi baterako inportazioko edo matrikula turistikoko erregimenetara bilduta egon diren garraiobideak badira, erregimen horiek utzi edo amaitu diren egunean.
2.ª Gainerako kasuetan, garraiobidea Espainian sartu den egunean. Egun hori modu sinisgarrian agertzen ez bada, erabilpenaren hasierako egun moduan bi data hauek baino beranduagokoa dena ulertuko da:
– Garraiobidearen erosketa eguna.
– Interesatua Espainian egoiliarra edo bertan kokatutako establezimendu baten titularra den lehen eguna.
2.– a) Aurreko 1.a) apartatuan eta 75. artikuluaren 1. apartatuan aipatutako ibilgailuak abenduaren 23ko 2822/1998 Errege Dekretuak, Ibilgailuen Erregelamendu Orokorrari buruzkoak. II. eranskinaren 2007ko ekainaren 30ean indarrean dagoen bertsioan jasota dauden definizio eta kategorien arabera, mugatu eta zehaztuko dira, goiko xedapenetan espresuki jaso gabe dagoenari dagokionez.
b) Foru dekretu honen ondorioetarako, garraiobide berritzat hartzen dira 1992ko abenduaren 29ko 102/1992 Foru Dekretuak, Gipuzkoako zerga araudia Balio Erantsiaren gaineko Zergaren abenduaren 28ko 37/1992 Legearen xedapenetara egokitzen duenak, jasotakoaren arabera halakotzat hartzen diren garraiobideak, nahiz eta lehen aldiz Kanarietan matrikulatuak izan.
c) Aurreko 1.a) apartatuaren 9. eta 10. zenbakietan aipatutako zergapetu gabeko kasuak aplikatuko badira, Zerga Administrazioak aurretik onartu behar ditu arauz jasotakoaren moduan.
Zergapetu gabeko gainerako kasuetan, aldiz, aitorpen bat aurkeztu behar zaio Zerga Administrazioari, Ogasun eta Finantza Departamentuko diputatuak erabakitako tokian, moduan, epean eta inprimakietan. Paragrafo honetan jasotakotik salbuetsita daude Zerga Administrazioak homologatutako ibilgailuak."
Hiru. Honela geratu da idatzita 75.– artikulua:
"75. artikulua.– Zerga tasak.
1.– Aplikaziozko zerga tasak zehazteko, epigrafe hauxek ezarri dira:
1.ª epigrafea.
a) CO2-aren isuri ofiziala 120 g/km-tik gora ez duten ibilgailuak, "quad" motako ibilgailuak izan ezik.
b) Barne errekuntzakoa ez den motor bakarra duten ibilgailuak, "quad" motako ibilgailuak izan ezik.
2.ª epigrafea.
CO2-aren isuri ofiziala 120 g/km-tik gora eta 160 g/km-tik behera duten ibilgailuak, "quad" motako ibilgailuak izan ezik.
3.ª epigrafea.
CO2-aren isuri ofiziala 160 g/km-tik behera ez duten eta 200 g/km-tik behera duten ibilgailuak, "quad" motako ibilgailuak izan ezik.
4.ª epigrafea.
a) CO2-aren isuri ofiziala 200 g/km edo hortik gora duten ibilgailuak, "quad" motako ibilgailuak izan ezik.
b) CO2-ren isuriak neurtzeko exijitu dakiekeen ibilgailuak, isuriak frogatzen ez direnean.
c) Etxebizitza gisa egokituta dauden N2 eta N3 kategorietako ibilgailuak.
d) "Quad" motako ibilgailuak. "Quad" moduko ibilgailutzat hartzen da lau gurpil edo gehiago izan eta eskuleku bidezko direkzio sistema duen ibilgailua, non gidaria zangalatrau eserita baitoa eta errepidetik kanpo ibiltzeko trakzio sistema jarrita baitago.
e) Uretako motoak. "Uretako mototzat" hartzen da motor batez bultzatuta doan eta pertsona batek edo gehiagok, zutik edo belauniko, krosko baten mugaren gainean eta ez barruan, gidatzeko proiektatuta dagoen urontzia.
5.ª epigrafea.
a) 1., 2., 3. edo 4. epigrafean sartu gabe dauden ibilgailuak.
b) Aisiako edo ur kiroletako urontzi eta ontziak, ur motoak izan ezik.
c) Hegazkinak, hegazkin txikiak eta gainerako aireontziak.
2.– Zerga tasa hauek aplikatuko dira:
1.ª epigrafea 100eko 0
2.ª epigrafea 100eko 4,75
3.ª epigrafea 100eko 9,75
4.ª epigrafea 100eko 14,75
5.ª epigrafea 100eko 12
3.– Zerga tasa aplikagarria sortzapenaren unean indarrean dagoena izango da.
4.– Garraiobidearen lehendabiziko behin-betiko matrikulazioa Ceuta edo Melillan egin denean eta garraiobide hori lehendabiziko behin betiko matrikulazioa egin eta hurrengo lehen urtean Penintsulara edo Baleare Irletara behin-betiko inportatzen denean, zergaren likidazioa aurreko 2.– apartatuan, dagokionaren arabera, adierazitako tasak koefiziente hauekin biderkatuz ateratzen diren tasetan egingo da:
a) Lehen aldiz behin betiko matrikulatu ondoko lehen urtean behin betiko inportatuz gero: 1,00.
b) Lehen aldiz behin betiko matrikulatu ondoko bigarren urtean behin betiko inportatuz gero: 0,67.
c) Lehen aldiz behin betiko matrikulatu ondoko hiru edo laugarren urtean behin betiko inportatuz gero: 0,42.
Apartatu honetan jasotako kasuetan, garraiobidearen aduanako balioa izango da oinarri ezargarria.
5.– Kanarietan zerga sortu duen garraiobidea lehendabiziko behin betiko matrikulazioa egin eta hurrengo urtean Penintsulan edo Baleare Irletan behin betiko sartzen denean, titularrak kontuan hartu beharko du zein den Kanarietan aplikagarria den zerga tasaren eta Gipuzkoako lurralde historikoan aplikatu behar denaren artean dagoen diferentzia, eta honi dagozkion kuotak autolikidatu eta ordaindu beharko ditu, garraiobidea sartzen den unean duen batez besteko balioa oinarri ezargarri bezala erabiliz.
Aurreko parrafoan esandakoa ez da aplikagarria izango sartzen den garraiobideak dagoeneko zerga bat ezarria badauka Kanarietan eta bertan aplikatutako oinarri ezargarria Gipuzkoako lurralde historikoak garraiobide horretarako indarrean duena baino handiagoa bada.
6.– Artikulu honetako 4 eta 5 apartatuen indarrez bidezkoak diren likidazio eta autolikidazioak ez dira exijituko, garraiobidearen titularrak behin betiko inportazioa edo behin betiko sarrera egiten den lurraldera egoitza lekualdatzen duenean.
Apartatu honetan xedatutakoa aplikatzea ondorengo beharkizun hauek betetzearen baldintzapean geratuko da:
a) Interesatuek ohiko egoitza Ceuta eta Melillan edo Kanarietan eduki behar izan dute, gutxienez lekualdaketaren aurreko hamabi hilabete jarraietan.
b) Garraiobideak Ceuta eta Melillan edo Kanarietan dauden tributazio baldintza arruntetan erosiak behar dute izan, eta lurralde horietatik irteteagatik ez dute salbuespenik edo itzulketarik eduki behar izan.
c) Interesatuak lehengo egoitzan erabiliak izan behar dute garraiobideek, gutxienez egoitza hura utzi aurreko sei hilabeteetan.
d) Apartatu honetan aipatutako garraiobideak ezingo dira saldu inportazio edo sarreraren ondorengo hamabi hilabeteko epearen barruan. Beharkizun hau ez betetzeak berarekin ekarriko du likidazioa edo autolikidazioa egin beharra, ez betetzea gertatu den egunari begira.
7.– CO2-ren isuri ofizialak frogatzeko, hala badagokio, ibilgailuaren fabrikatzaile edo inportatzaileak ziurtagiri bat egingo du berariaz, non eta isuri horiek ez dauden jasota ikuskapen teknikoko txartelean edo dena delako ibilgailurako banaka luzatutako beste edozein agiri ofizialetan.
Lau.– Honela geratu da idatzita 76. artikulua:
76. artikulua.– Zerga likidatzea eta ordaintzea.
1.– Subjektu pasiboak autolikidatu eta ordaindu beharko du zerga, Ogasun eta Finantza Departamentuko diputatuak agindutako toki, modu, epe eta inprimakietan.
2.– Ibilgailu erabiliak direnean, Zerga Administrazioak oniritzia eman behar dio autolikidazioari, Ogasun eta Finantza Departamentuko diputatuak finkatzen duen moduan, organo eskudunak behin betiko matrikulatu aurretik.
Autolikidaziotik ateratzen den kuota txikiagoa denean Ogasun eta Finantza Departamentuko diputatuak onartutako salmentarako batez besteko prezioak aplikatuz aterako litzatekeen kuota baino, paragrafo honetan aipatzen den bisatua behin oinarri ezargarri gisa jarritako balioa egiaztatuta eman daiteke 2005eko martxoaren 8ko 2/2005 Foru Arauak, Gipuzkoako Zergen Foru Arau Orokorrak, 56. artikuluan jasotakoaren arabera. Batez besteko prezioak izango dira interesatuak Zerga Administrazioari bisatua eskatzen dionean indarrean daudenak. Aitorpenean jasotako balioa egiaztatu behar da, era berean, Ogasun eta Finantza Departamentuko diputatuak autolikidazioan aipatutako ibilgailurako onartutako salmentako batez besteko preziorik ez dagoenean.
Gehienez 60 egun izango dira aipatu balioa egiaztatzeko, ibilgailuaren dokumentazioa Zerga Administrazioaren eskura jartzen denetik aurrera. Behin aipatu epea igarota balioa egiaztatu gabe, behin-behinik onartuko da zergapekoak aitortutako zenbatekoa edo balioa. Epea zenbatzeko, aplikaziozkoa izango da 2005eko martxoaren 8ko 2/2005 Foru Arauak, Gipuzkoako Zergen Foru Arau Orokorrak, 100. artikuluaren 2. apartatuan jasotakoa. Bisatua behin-behinik eman daiteke, zenbatekoa edo balioa aurretik egiaztatu gabe, autolikidazioa aurkezten denean.
Bisatua behin-behinik emateak ez du kentzen Administrazioak geroago autolikidazioaren osagai guztiak egiaztatzea.
3.– Garraiobidearen behin betiko matrikulazioa egiteko, egiaztatu behar da zerga ordaindu izana edo, hala badagokio, zergapetu gabe edo salbuetsita egotea aitortu izana."
Bost.– Indargabetuta geratu dira bigarren xedapen iragankorraren 2. eta 3. apartatuak.
XEDAPEN GEHIGARRIAK
Lehenengoa.– Aldatu ondoren, honela idatzita geratu da 1992ko abenduaren 29ko 102/9192 Foru Dekretuak, Gipuzkoako Lurralde Historikoko zerga araudia Balio Erantsiaren gaineko Zergari buruzko abenduaren 28ko 37/1992 Legera egokitzekoak, 7. artikuluaren 1. zenbakiko b) letran jasotakoa:
"b) Subjektu pasiboaren enpresa ondarea edota eskualdatzailearen jarduera enpresarialaren adar bati edo batzuei loturiko ondare elementuak beren osotasunean eskualdatzea, Sozietateen gaineko Zergari buruzko uztailaren 4ko 7/1996 Foru Arauak 90. artikuluan aipatutako eragiketen indarrez, baldin eta eragiketek eskubidea badute horietarako VIII. tituluaren X. kapituluan araututako zerga erregimena aplikatzeko."
Bigarrena.– 27. zenbakia erantsi zaio 1992ko abenduaren 29ko 102/1992 Foru Dekretuak, Gipuzkoako Lurralde Historikoko zerga araudia Balio Erantsiaren gaineko Zergari buruzko abenduaren 28ko 37/1992 Legera egokitzekoak, 20. artikuluaren bat apartatuan jasotako idazkerari. Honela dio:
"27.ª Alderdi politikoek berariazko xedea betetzeko diru laguntza lortzekoak diren eta haien onurarako bakarrik antolatuak diren ekimenak direla medio egiten dituzten zerbitzu prestazioak eta ondasun salmentak."
Hirugarrena.– Nekazari eta abeltzainei Hidrokarburoen gaineko Zerga itzultzea.
Bat.– a) Ondorengo b) letran jasotako baldintza betetzen denean, Hidorkarburoen gaineko Zergaren kuotak itzultzeko eskubidea aitortuko zaie nekazariei, baldin eta kuota horiek 1998ko martxoaren 3ko 20/1998 Foru Dekretuak, Gipuzkoako zerga araudia Zerga Bereziei buruzko 1992ko abenduaren 28ko 38/1992 Legearen xedapenetara egokitzen duenak, 50.1 artikuluaren 1.4 epigrafean jasotako tasan zergapetutako gasolio erosketak direla-eta ordaindu edo jasan badituzte 2006ko urriaren 1etik 2007ko irailaren 30era bitartean.
b) Aurreko a) letran jasotako itzulketa bidezkoa izango da letra horretan aipatutako gasolioaren batez besteko prezioa 2004ko urtarrilaren 1etik 2005eko abenduaren 31ra bitartean, nekazariak jatorrian jasotako prezioen indizea gehituta, ez bada handiagoa izan gasolio horrek 2006ko urriaren 1etik 2007ko irailaren 30era bitartean izandako prezioa baino. Kontuan hartu beharreko prezioetan, ez dira sartuko horiei gehitutako Balio Erantsiaren gaineko Zergaren kuotak.
c) Kuotak itzuliko bazaizkie, kopuru hau itzuliko zaie: 1.000 litroko 78,71 euroko tasa nekazaritzan –barazkigintza, abeltzaintza eta basogintza barne– aipatu epean benetan erabilitako gasolio bolumena (mila litrokotan adierazita) 0,998 koefizientearekin biderkatuz ateratzen den emaitzari dagokion oinarri baten gainean aplikatuz lortzen den emaitza.
Bi.– Aurreko bat apartatuan jasotako itzulketaren ondorioetarako, pertsonak edo entitateak nekazaritzat hartuko dira baldin eta, 20/1998 Foru Dekretuaren 50.1 artikuluko 1.4 epigrafearen arabera zergapetutako gasolioa adierazitako epean erabiltzeko eskubidea izanik, hura nekazaritzan karburante gisa benetan erabili badute -barazkigintza, abeltzaintza eta basogintza barne-, eta gainera, jarduera horietan aritzeari begira, 2005eko martxoaren 8ko 2/2005 Foru Arauak, Gipuzkoako Zergen Foru Arau Orokorrak, hirugarren xedapen gehigarrian aipatutako Zergapekoen Zentsuan inskribatuak egon badira.
Hiru.– Aurreko bat b) apartatuan jarritako baldintza bete izena Ogasun eta Finantza Departamentuak egiaztatuko du. Behin baldintza bete izana egiaztatuta eta itzulketa bidezkoa izanda, Ogasun eta Finantza Departamentuko diputatuak erabakitako prozeduraren bidez gauzatuko da itzulketa, eta berarekin ekar dezake interesatuek zerga aitorpenak, zentsu arlokoak barne, aurkeztu behar izatea.
AMAIERAKO XEDAPENA
Bat.– Foru arau hau Gipuzkoako Aldizkari Ofizialean argitaratu ondorengo egunean jarriko da indarrean, hurrengo apartatuetan jasotakoa eragotzi gabe.
Bi.– Foru arau honetako I. kapituluan sartutako aldaketak 2007ko urriaren 27an jarriko dira indarrean. Dena den, horren 1., 2. eta 3. artikuluetan eragiketa bolumena zehazten duen zifrari dagokionez sartutako aldaketak 2008ko urtarrilaren 1etik aurrera hasten diren zergaldi edo likidazioaldietan aplikatuko dira, dena delako zergaren arabera.
Hiru.– Foru arau honen II. kapituluan sartutako aldaketek 2008ko urtarrilaren 1etik aurrera izango dute ondorioa.
Lau.– Bigarren xedapen gehigarrian jasotakoak 2007ko uztailaren 6tik aurrera izango du ondorioa.
