Euskal Herriko Agintaritzaren Aldizkaria

71. zk., 2005eko apirilaren 15a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Bestelako Xedapenak

Industria, Merkataritza eta Turismo Saila

1886

EBAZPENA, 2005eko martxoaren 30ekoa, Turismo sailburuordearena, turismoari buruzko ikastaro, mintegi eta bisita teknikoak egiteko laguntzak 2005eko ekitaldian emateko deialdia argitaratzeko dena.

Industria, Merkataritza eta Turismo sailburuaren 2003ko apirilaren 16ko Aginduaren bidez, turismoari buruzko ikastaro, mintegi eta bisita teknikoak egiteko laguntzetarako deialdia egin zen (maiatzaren 16ko EHAA, 95. zk.). Horrekin batera, Euskal Autonomia Erkidegoko Administrazio Orokorrak turismoari buruzko ikastaro, mintegi eta bisita teknikoak egiteko ematen dituen diru-laguntzen nondik-norakoak ezarri ziren.

Diru-laguntza horiek emateko erabiliko diren diru-baliabideak Euskal Autonomia Erkidegoaren Aurrekontu Orokorretan horretarako izendatutako aurrekontu-ataletatik aterako dira; ekitaldi honi dagokionez, abenduaren 28ko 10/2004 Legean dago ezarrita hori arautzeko modua.

Aipatutako aginduaren 7. artikuluan ezarritakoaren arabera, egoki da hor iragarritako diru-laguntzak 2005eko ekitaldian emateko deialdia egitea, eta, horretarako eman beharreko arauak ematea.

Horiek horrela, aipatutako aginduaren 7. artikuluan ezarritako ahalmena erabilita, hau

XEDATU DUT:

1. artikulua.– Xedea.

Ebazpen honen xedea da turismoari buruzko ikastaro, mintegi eta bisita teknikoak egiteko 2005eko ekitaldian laguntzak emateko deialdia egitea. Industria, Merkataritza eta Turismo sailburuaren 2003ko apirilaren 16ko Aginduan arautu ziren laguntza horiek.

Helburu hori betetzeko, 60.100 euro bideratuko dira, Euskal Autonomia Erkidegoaren Aurrekontu Orokorretan berariaz arlo horretarako izendatutako aurrekontu-kredituaren arabera.

Laguntzetarako jarritako kopurua aldatu egin daiteke —diru-laguntzei buruzko ebazpena hartu aurretik, betiere— kontuan hartuta eskatu diren laguntza guztiak eta Industria, Merkataritza eta Turismo Sailak beste laguntza-programa batzuen aurrekontuetan agortu gabe dituen baliabideak. Horrelakorik gertatuz gero, Turismo sailburuordeak horren berri emango du ebazpen baten bidez.

2. artikulua.– Betekizunak.

Eskatzaileek, Industria, Merkataritza eta Turismo sailburuaren 2003ko apirilaren 16ko Aginduan aurreikusitako laguntzak jasotzeko, agindu horren 3. artikuluan ezarritako baldintzak konplitu beharko dituzte. Agindu horren bidez, bestalde, turismoari buruzko ikastaro, mintegi eta bisita teknikoak egiteko laguntzak arautu ziren.

3. artikulua.– Eskabideak eta epea.

1.– Eskabidearen eta inprimakien ereduak Industria, Merkataritza eta Turismo Saileko edozein lurralde-bulegotan jaso daitezke, edo web-orri honetan: www.euskadi.net/turuismo.

2.– Eskatzaileek Turismoa Antolatzeko Zuzendaritzara bidali beharko dituzte eskabide-orria eta gainerako agiri osagarriak. Aurkeztu, berriz, Industria, Merkataritza eta Turismo Sailaren lurralde-bulegoetan aurkeztu beharko dituzte, edo, bestela, azaroaren 26ko 30/1992 Legearen 38.4 artikuluan ezarritako lekuetan (30/1992 Legea, Herri Administrazioen Araubide Juridiko eta Administrazio Prozedura Erkidearena).

3.– Eskabideak aurkezteko epea ebazpen hau Euskal Herriko Agintaritzaren Aldizkarian argitaratu, eta biharamunean hasiko da; amaitu, berriz, 2005eko ekainaren 1ean.

AZKEN XEDAPENAK

Lehenengoa.– Deialdia egiteko ebazpen hau Euskal Herriko Agintaritzaren Aldizkarian argitaratu, eta hurrengo egunean jarriko da indarrean.

Bigarrena.– Ebazpen honen aurka gora jotzeko errekurtsoa aurkez dakioke Industria, Merkataritza eta Turismo sailburuari. Hilabeteko epea emango da horretarako, ebazpena Euskal Herriko Agintaritzaren Aldizkarian argitaratu, eta hurrengo egunetik zenbatzen hasita.

Vitoria-Gasteiz, 2005eko martxoaren 30a.

Turismo sailburuordea,

KORO GARMENDIA GALBETE.