Euskal Herriko Agintaritzaren Aldizkaria

1. artikulua.– Helburua.

Agindu honen bitartez, 2005eko ekitaldian Euskadiko Gazteak Lankidetzan programarako dei egiten da, Euskal Autonomia Erkidegoko instituzioek eta gobernuz kanpoko erakundeek batera Hirugarren Munduko herrietan antolatzen dituzten lankidetza jardueretan batik bat elkartasun kultura susper dadin eta, aldi berean, bertan parte hartzeko modua ere arautzen da.

2. artikulua.– Zuzkidura.

Programa honek 2005eko ekitaldirako guztira duen gehieneko zenbatekoa 130.000 eurokoa da, eta EAEko 2005. urteko aurrekontu orokorretan berariaz ezarritako aurrekontu-ataletik aterako da. Zenbateko hori handitu egin ahalko da Agindu honen Xedapen Gehigarrian zehaztutakoaren arabera.

3. artikulua.– Bete beharreko baldintzak.

1.– Euskal Autonomia Erkidegoko administrazio orokorrak edo bere erakunde autonomiadunek onuradunari ezaugarri bereko beste laguntza edo diru-laguntzaren batzuk eman badizkiote eta horiek itzultzeko edo zigortzeko prozesuren bat oraindik ere izapidetzen ari bada, diru laguntzaren esleipena eta, hala badagokio, ordainketa egoera hori konpondu arte baldintzatua egongo da.

2.– Horrez gain, eskatzaileek ondorengo baldintzak ere bete behar dituzte:

a) 2005eko urtarrilaren 1a baino lehenagotik Euskal Autonomia Erkidegoan egoitza izatea edo, bestela, euskal izaera politikoa izatea, Autonomia Estatutuaren 7. artikuluan ezarritakoaren arabera.

b) Eskabidea aurkezteko unean 20 urtetik gorako adina izatea eta 2005eko abenduaren 31ra arte 31 urtetik beherakoa izatea.

c) Jarduera egingo den herrialdean hitz egiten duten nazioarteko hizkuntza menperatzea.

4. artikulua.– Eskabideak aurkezteko epea.

Eskabideak aurkezteko epea hilabetekoa izango da, Agindu hau ondorioak izaten hasten den egunetik hasita.

5. artikulua.– Eskabideak eta aurkeztu beharreko agiriak.

1.– Eskabideak Gazteria eta Gizarte-Ekintza zuzendariari zuzenduko zaizkio eta Lurralde Historikoetako Kulturako Lurralde Zerbitzuetan aurkeztuko dira (Donostia kalea 1, Vitoria-Gasteiz; Kale Nagusia 85, Bilbo; Andia kalea 13, Donostia-San Sebastián) zuzenean edo Herri Administrazioen Araubide Juridikoaren eta Administrazio Prozedura Erkidearena azaroaren 26ko 30/1992 Legean ezarritako edozein bidetatik.

2.– Agindu honen eranskinean emandako eskabide-orri ofizialarekin batera, bertan aipatutako dokumentazioa aurkeztu beharko da.

6. artikulua.– Akatsak zuzentzea.

Gazteria eta Gizarte-Ekintza Zuzendaritzak eskabidean zerbait gaizki dagoela edo zerbait falta duela ikusten badu, hamar eguneko epea emango dio interesatuari akatsa zuzentzeko edo aurkeztu beharreko agiriak aurkezteko, eta ohartaraziko dio eskatutakoa ez betetzeak eskabideari uko egitea ekarriko duela. Uko-egite hori ebazpen baten bidez gauzatuko da.

7. artikulua.– Hautaketa Batzordea.

1.– Informazio eta orientazio aldian sartuko diren parte-hartzaileak proposatzeko eta, ondoren, azken hautaketa-proposamena egiteko, Hautaketa Batzordea eratuko da. Hautaketa Batzordeko kideak hauek izango dira:

– Kultura Saileko Gazteria eta Gizarte-Ekintza Zuzendaritzako Gazteria burua, edo berak izendatutako pertsona bat. Batzordeburua izango da eta, kalitate botoa izanik, azken hitza izango du boto berdinketa gertatuz gero.

– Lehendakaritzako Garapen Lankidetzarako Zuzendaritzako teknikari bate, Etxebizitza eta Gizarte Gaietako Saileko Garapen Lankidetzarako zuzendariak izendatua.

– Euskadiko Gazteriaren Kontseiluko ordezkari bat, kontseiluak proposatua eta Kultura Saileko Gazteria eta Gizarte-Ekintza zuzendariak izendatua.

– Garapenerako lankidetza-programetan diharduten gobernuz kanpoko erakundeetako hamar ordezkari, gehienez, Kultura Sailak proposatuak eta Gazteria eta Gizarte-Ekintza zuzendariak izendatuak.

– Gazteria eta Gizarte-Ekintza Zuzendaritzako teknikari bat, idazkari gisa, Gazteria eta Gizarte-Ekintza zuzendariak izendatua; hitza izango du baina ez, ordea, botorik.

– Hautaketa Batzordeak, egoki iritziz gero, arlo horretako beste adituei ere eska diezazkieke aholkuak eta laguntza. Laguntzaile horiek, ordea, hitza bai baina ez dute boto eskubiderik izango.

2.– Batzordekideak abstenitu egingo dira edo ezetsi egin daitezke, azaroaren 26ko 30/1992 Legearen 28. eta 29. artikuluetan ezarritakoari jarraituz.

3.– Hautaketa Batzordeko osaera Gazteria eta Gizarte-Ekintza zuzendariaren berariazko ebazpen baten bitartez jakinaraziko da.

8. artikulua.– Balorazioa.

1.– Hautaketa Batzordeak, lehen aukeraketa proposatzerakoan, gehienez jota 170 parte-hartzaile aukeratuko ditu informazio eta orientazio aldirako, eta honako ezaugarri hauek baloratuko ditu:

a) Aurten egiten ari diren lankidetza jardueretarako egokienak izan daitezkeen titulazio akademikoak, lanbide ezagutzak eta bestelako ikasketak, %30 gehienez.

Nahiz eta lanbide bat edo bestea izatea baztertzailea ez den, hauek dira lankideek parte hartuko duten garapen proiektuetarako pertsona egokienak:

– informatikoak.

– ekonomilariak.

– kontulariak.

– medikuak.

– farmazialariak.

– erizainak.

– osasun-laguntzaileak.

– pedagogoak.

– begiraleak/gizarte-hezitzaileak.

– sistema-ingeniariak.

– industri ingeniariak.

– agronomoak.

– psikologoak.

– elebitasunean adituak diren hezitzaileak.

– albaitariak.

– tornulari mekanikoak.

– elektrikariak.

– arotzak.

– iturginak.

– gizarte langileak.

– diseinugile industrialak.

– nutrizionistak.

b) Garapenerako Lankidetzarekin zerikusia duten esperientziak eta jakintza-arloak, %20 gehienez.

c) Gobernuz kanpoko erakunde bateko kide izatea, %20 gehienez.

d) Gazte-elkarte batekoa zein helburu soziala duen beste erakunde bateko kide izatea, %30 gehienez.

Batzordeak, egoki iritziz gero, elkarrizketa pertsonala egin diezaieke hautagaiei aipatutako gai horiei buruz eta bakoitzak aurkeztutako dokumentazioaren arabera.

2.– Batzordeak gehienez bi hilabeteko epearen barruan egingo du aipatutako aurre-hautaketarako proposamena, eskabideak aurkezteko epea bukatzen denetik hasita.

9. artikulua.– Jakinaraztea.

1.– Batzordeak egindako aurre-hautaketarako proposamena ikusita, Kultura Saileko Gazteria eta Gizarte-Ekintza zuzendariak Ebazpena emango du zazpi egun balioduneko epean, Batzordeak dagokion aurre-hautaketarako proposamenaren berri ematen dionetik hasita. Ebazpen horretan, informazio eta orientazio aldirako aurre-aukeratutako partaideen zerrenda emateaz batera, informazio eta orientazio aldi hori non eta noiz egingo den zehaztuko da.

2.– Aurre-aukeratutako pertsonei banan-banan eta berariaz horren berri jakinaraziko zaien arren, aukeratutakoen zerrenda Lurralde Historikoetako Kulturako Lurralde Zerbitzuetan jarriko da, 9.1. artikuluan Ebazpena emateko jarritako epea bukatzen denetik aurrera.

3.– Aurre-aukeraketa honetarako onartu ez diren eskabideak ezetsitzat joko dira.

10. artikulua.– Informazio eta orientazio aldia.

1.– Informazio eta orientazio aldian, garapen lankidetzari buruzko bi jardunaldi izango dira:

a) Lehen jardunaldian, aurre-aukeratutako pertsona guztiek parte hartuko dute.

b) Bigarren jardunaldian, berriz, bigarren hautaketan aukeratutako pertsona guztiek parte hartuko dute.

2.– Jardunaldietan parte hartzeak ekar ditzakeen ostatu- eta janari-gastuak, horrelakorik balego behintzat, Eusko Jaurlaritzak ordainduko ditu; kanpoan geratuko dira, ordea, partaideen bidaia gastuak.

11. artikulua.– Hautagaiak izendatzea.

1.– Lehen jardunaldia (aurre-aukeratutako pertsona guztiei zuzendua) bukatu eta zazpi egun balioduneko epean, Batzordeak beraren iritziz egokienak diren gazteak proposatuko dizkio Gazteria eta Gizarte-Ekintza zuzendariari. Gehienez, 100 gazte aukeratuko dira, beti ere aurrekontu-zuzkiduraren arabera. Batzordeak, gazte horiek aukeratzeko, batetik, jardunaldian izan duten errendimendua, eta, bestetik, gobernuz kanpoko erakundeek deialdi honetarako aurkeztutako lankidetza-ekintzetarako ezaugarri egokiak dituzten aintzat hartuko ditu, baita lankidetza-ekintza horietan parte hartzeko duten astia ere. Gazteria eta Gizarte-Ekintza zuzendariak izendatuko ditu, azkenik, Batzordeak aukeratutako gazteak, Batzordearen proposamena jaso eta 7 eguneko epean.

2.– Jarduera, ahal dela, uztailetik aurrera egingo da eta hiru bat hilabeteko iraupena izango du, salbu eta aparteko kasuetan, jardueraren tutore den GKE bakoitzarekin adostutako baldintzen arabera.

3.– Aukeratutako pertsonei, banan-banan, Gazteria eta Gizarte-Ekintza zuzendariaren Ebazpenaren berri emango zaien arren, aukeratutakoen zerrenda EHAAn argitaratuko da eta Lurralde Historikoetako Kulturako Lurralde Zerbitzuetan ikusgai jarriko, 11.1. artikuluan zehaztutakoari jarraituz Ebazpena emateko jarritako epea bukatzen denetik hasita.

4.– Epea igarota, Kultura Saileko Gazteria eta Gizarte-Ekintza zuzendariak berariazko ebazpenik eman ez badu, eskaria ezetsitzat jo ahal izango da, azaroaren 26ko 30/1992 Legearen 44. artikuluaren arabera.

12. artikulua.– Lankidearen konpromisoak.

Garapen lankidetzako jardueran parte hartzeko aukeratutako gazte bakoitzak, aldez aurretik, Gazteria eta Gizarte-Ekintza Zuzendaritzan aurkeztuko duen dokumentuan, honako hauek beteko dituela hitz emango du:

a) Hirugarren munduan esperientzia hasi aurretik, tutore den GKEak antolatutako prestakuntza fasean parte hartuko du.

b) Bete beharreko jarduerak eskatzen duen bizimodura moldatuko da.

c) Jarduera egin behar den herrialdean egongo da, esperientzia-aldia bukatu arte.

d) Osasunari dagokionez emandako aholku guztiak beteko ditu.

e) Esperientzia-aldia bukatu ondoren, balorazio txostena aurkeztuko du; bertan, bizi izandako jarduera nolakoa izan den eta nola burutu den azalduko du eta, aurrerantzean antolatzen diren beste proiektu batzuetarako, akatsak eta hutsuneak nola konpon daitezkeen zehaztuko du.

f) Aurtengo egitasmoa amaitu ondoren, esperientzia bakoitzaren eta programaren garapenaren ebaluazio-jardunaldietan parte hartuko du.

g) Urte betez, GKEek nahiz Eusko Jaurlaritzako Garapen Lankidetzarako Zuzendaritzak eta Gazteria eta Gizarte-Ekintza Zuzendaritzak antolatutako sentsibilizazio-jardueretan parte hartzeko prest egongo da.

13. artikulua.– Ordainduko diren gastuak.

Eusko Jaurlaritzak ordainduko ditu jarduera egin behar den herrialdeko Gobernuz Kanpoko Erakundearekin elkartu arteko bidaia-gastuak (joan-etorrikoak), herrialde horretara joateko behar den bisatua barne, baita hautatutako parte-hartzaileetako bakoitzaren gaixotasun eta istripuetarako asegurua ere.

Esperientzia bakoitzaz arduratzen den Gobernuz Kanpoko Erakundeak egindako proposamena eta bere baliabideak kontuan hartuta, jarduera-tokiko ostatu eta janari kontuak euren esku geratuko dira eta beren bitartekoen araberakoak izango dira, beti ere, kasuan kasu, horretarako izenpetuko diren Hitzarmenetan ezarritakoak errespetatuz. Gazteak, bere baliabideak kontuan harturik, ahal duen neurrian lagunduko du gastu horiei aurre egiten.

14. artikulua.– Arauak onartzea.

Esperientzia honetan parte hartzeak berau arautzen duten erregela guztiak onartzea dakar. Lankidearen partaidetza, batez ere, berari egokitutako proiektuan garatzen diren zereginetan gauzatuko da.

15. artikulua.– Baldintzak ez betetzea eta eskubideak galtzea.

Hautatutako pertsonetakoren batek Agindu honetan ezarritako baldintzak errespetatu ezean, bete gabetzat joko da Agindua eta, azaroaren 11ko 1/1997 Legegintza Dekretuan, eta, hala badagokio, abenduaren 17ko 698/1991 Dekretuan adierazitako prozedurari jarraituz, galdu egingo du zehaztutako onurak jasotzeko eskubidea eta Euskal Herriko Diruzaintza Nagusiari itzuli beharko dio bidaia- eta aseguru-gastuei dagokien diru-kopurua, baita horri dagozkion interes legalak ere.

16. artikulua.– Kudeaketa.

Agindu honen bidez sortutako programa kudeatzeko lanak Gazteria eta Gizarte-Ekintza Zuzendaritzari dagozkio.

17. artikulua.– Datu pertsonalen tratamendua.

Euskadiko Gazteak Lankidetzan programan parte hartzen duten gazteen datuak Gazteria eta Gizarte-Ekintza Zuzendaritzaren fitxategi automatizatu batean sartuko dira, ondoren erabili ahal izateko. Fitxategi hori Datu Pertsonalak Babesteko 15/1999 Lege Organikopean dago. Fitxategia Eusko Jaurlaritzako Kultura Sailak erabiliko du, bakarrik, berak sustatutako diru-laguntzak kudeatzeko. Aipatutako Lege horretan jasotzen den moduan, interesatuak bere datuak ikusi, zuzendu edo ezabatu ahal izango ditu, baita fitxategian ez sartzeko eskatu ere; horretarako, Gazteria eta Gizarte-Ekintza Zuzendaritzara idatzi beharko du (Donostia-San Sebastián kalea, 1 – 01010 Vitoria-Gasteiz), bera baita fitxategiaren arduraduna.

XEDAPEN GEHIGARRIA