Euskal Herriko Agintaritzaren Aldizkaria

72. zk., 2001eko apirilaren 17a, asteartea

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Bestelako Xedapenak

Lurralde Antolamendu, Etxebizitza eta Ingurugiro Saila

1966

EBAZPENA, 2001eko otsailaren 14koa, Ingurugiro sailburuordearena, Itsasondoko udalerrian, "Uholdeen kontra babesteko eta Oria ibaia bideratzeko proiektua, lehen zatia" eta proiektuak berak ingurugiroan duen eragina neurtzeko azterlana jendaurrean jartzen dituena.

Euskal Herriko Ingurugiroa Babesteko otsailaren 27ko 3/1998 Lege Orokorraren 41. artikuluak ezarritakoa aplikatuz, derrigorrez ebaluatu beharko da lege horren I. eranskinean jasota dauden eta Euskal Autonomia Erkidegoan gauzatu nahi diren plan eta proiektuek, publiko nahiz pribatuek, ingurugiroaren gainean duten eragina.

Ingurugiro organo honetan hasi da Itsasondoko udalerrian "Uholdeen kontra babesteko eta Oria ibaia bideratzeko proiektua, lehen zatiak" ingurugiroaren gainean duen eragina ebaluatzeko izapidetza, otsailaren 27ko 3/1998ko Legearen I.B eranskinaren 2.3 idatz-zatian jasotzen denez, eta hortaz, Ingurugiro Inpaktuari buruzko ekainaren 28ko 1302/86 Legegintzako Errege Dekretuak, eta hori garatzeko Araudia onartzen duen irailaren 30eko 1131/1988 Errege Dekretuak aurreikusitako jardunbidea bete behar du, 30 eguneko epean jendaurrean jarriz aipatutako Araudiaren 17. artikuluak xedatzen duenaren arabera.

Ondorioz, Herri-Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legean xedatutakoari atxikiz, honako hau

EBATZI DUT:

1. artikulua.– Itsasondoko udalerrian, "Uholdeen kontra babesteko eta Oria ibaia bideratzeko proiektua, lehen zatia" eta proiektuak berak ingurugiroan duen eragina neurtzeko azterlana jendaurrean jartzea, ebazpen hau EHAAn argitaratzen den egunetik hasi eta 30 asteguneko epean zehar. Epe horretan bidezko iritzitako arrazoibideak aurkeztu ahal izango dira.

2. artikulua.– Aurreko artikuluan ohartemandakoa betetzeko, proiektuari eta proiektuak berak ingurugiroan duen eragina neurtzeko azterlanari buruzko espedientea, Eusko Jaurlaritzako Lurralde Antolamendu, Etxebizitza eta Ingurugiro Saileko Ingurugiro Baliabideen Zuzendaritzan egongo da interesatuen eskuragarri (Donostia kalea 1, 2. solairua, Vitoria-Gasteiz) bai eta Lurralde Antolamendu, Etxebizitza eta Ingurugiro Sailak Gipuzkoan duen Lurralde Ordezkaritzan ere (Andia kalea 13, Donostia-San Sebastián).

Vitoria-Gasteiz, 2001eko otsailaren 14a.

Ingurugiro sailburuordea,

ESTHER LARRAÑAGA GALDOS.

<FONT SIZE=2>